وين هل الخبره عن فنادق المالديف وماليزيا

[سهم مجاني]

سلام عليكم
كيف الحال ياربع
ابي اضبط لي رحله حق شهر العسل على الاسبوع الجاي
في تخطيطي ابي 5 ايام المالديف وتكون على فندقين 7 استار ولا 6 ستار
وبعدها اطير ماليزيا 13 تكون البدايه في العاصمه 3 ايام وعقب لفه على الجزر 6 وختمها في العاصمه بس فندق غير وتكون الفنادق في العاصمه 6 ستار والي في الجزر ابي شليهات ولا فنادق 6 ستار
انا ما قد رحت ذي البلدان ويا ريت من اهل الخبر الي راح وجرب شي عدل يعطينى من خبرته

همتكم ياشباب ترى ما بقى شي

[صفقه]

انا مادري عن أحوالك الماديه .. بس انت تدور الأرخص مع الجوده ..

ولا تدور أرقى شي بغض النظر عن السعر ؟؟

وياليت تحدد لنا التواريخ بالضبط علشان أخدمك .

[المعنى88]

أذا تبي 6 أو 7 ستار .............. معناتها تدفع من 2500 ريال الى 5000 ريال على الليلة بالفندق

[سهم مجاني]

هلا هلا فيكم
ان شالله يعني بكون على اخر الاسبوع الجاي
وبنسه للحوال المادي الحمد الله
2500 معقوله بس 5000 غاليه شوي
انا سمعت عن w في المالديف حد جربه
والفور سيزن بعد في المالديف
ام ماليزيا يذكرون الماريوت بس اشوفه عادي
وشنغرالا بعد اشوف مستواه عادي
مادري انا مارحت بس على الكلام الي سمعته احسه عادي
والجزر الي في ماليزيا ماسمعت بس هذي مو مشكله من هناك اتظبط الامور

[La Bella]

ماليزيا أحلا فندق مندرين أوريانتل Mandarin Oriental, Kuala Lumpur
بس بعيد عن شارع العرب يعني 10 دقايق مشي
أما الماريوت موقعة بشارع العرب
وأحجز عن طريق موقع بوكنق
أما الجزر ماحددت بتروح بيننج ولا لنكاوي عشان نفيدك
وختامها في العاصمة روح فندق الخيول الذهبية الى موقعة بمجمع صن واي لاغون
مجمع تجاري وملاهي ومدينة ترفيهية
وفي هذا الشقق الفندقية توها جديدة فاتحة من سنه Bintang Fairlane Residences و بشارع العرب موقعها
وابعد عن شنغرلا تراه بعيد عن شارع العرب وقديم حبتين

[حمد911]

بنسبة للمالديف عندك w ممتاز وكنت باخذة بس كان فل ومافي حجز

الشنغريلا حلو ومرتب وهادئ وايد بس عيبة الوحيد انة بعيد ولازم تاخذ طيران داخلي اسم الجزيرة can بس حلو وماراح تندم لو تروح لة بس حدة 3 ايام واليومين الباقين خذ لك w او الشيراتون الفل مون سابقا نوع بالفنادق افضل علشان ماتملل
الفورسيزون عيبة ان الجزيرة صغيرة واسعارة غالية وماشوفة يسوى ذي وجهة نظري الخاصة.
شي ثاني اسعار فنادق المالديف عموما غالية ومش رخيصة يعني لازم ميزانية عدلة علشان تكون مرتاح.

عندك سفريات الرحلة السعيدة يضبط لك الحجوزات وويرويك الصور واختار الي يعجبك افضل
بنسبة لماليزيا مازرتها للاسف
موفق خير ان شاء الله ومبروك مقدما

[جوال 11]

إذا الرحلة لشهر العسل أنا أنصحك برحلة على ظهر السفن وتختار البلد التي ستكون الرحلة منها ،حيث السفن تتوقف في اموانئ الدول ويمكن عمل برنامج الرحلة مع سفريات ريجنسي وأختار الشركة المناسبة للسفن ومستوى الخدمة للشركة وإليك هذا الرابط لأستكشاف برامج كل شركة والمكان .


http://www.allcruise.com/

وبعد ما ترجع بالسلامة توضع لنا تقرير من رحلتك وبالتوفيق

[سهم مجاني]

هلا والله فيكم
يسلمووو على المعلومات الحلوه
وبخصوص الجزر بينج ولا لنكاوي والله مادري شو الاحلى الي رح الجزر ياريت يفيدنا
حمد 911 انت شنو الفنادق الي سكنت فيها وهل هي اوكي ولا في احلى

[HADi]

السلام عليكم

اول شي الف مبروك اخوي ..

ماكنك متاخر في مسالة الحجوزات ؟؟ اشك انك بتحصل حجز بسهوله

على العموم بالنسبه للمالديف مثل ماقالوا لك شوي الديره غاليه

الفور سيزون في اثنين على ماعتقد والافضل اهو

Four Seasons Kuda Huraa

قريب من المطار تنتقل له بطراد السريع


سعر الاقامه فيه مدة اسبوع شامل الضرائب وتكلفة التنقل + الافطار
اقل شي 10 الاف ريال


فندق w

فندق حلوو بس راح تحتاج انك توصله بستخدام الطائره المائية


السعر المتوسط للغرف في الليلة 2715ريال شامل الضرائب والافطار

سعر الانتقال بطائره لشخص الواحد مايقارب 1695 ريال

ومثل ما قالك اخوي حمد اسعار المالديف غاليه وحط في بالك انك راح تكون في جزيره خاصه للفندق

يعني بيكون اعتمادك كامل على الفندق في الاكل والشرب واي شي تحتاجه



اما ماليزيا .. الفنادق فيها واجد واسعارها حلوه

و3 ايام اشوفها في العاصمه حلوه

اول يوم خلك في العاصمه زور البتروناس تون تاور + حديقة الطيور + حديقة الفراشات

2 يوم روح جنتق "ملاهي " وطبعاً على الطيرق مر على الشلالات

3 يوم تقدر تروح منتجع افاموزا ..فيه فعاليات جميله منها حديقة حيوانات سفاري

بعدها روح الجزر واهما لنكاوي


انصحك تجرب تسكن لما ترجع العاصمة يوم او يومين في فندق الخيول الذهبية " من افخم الفنادق " وخلهم اخر شي لان موقع الفندق على طريق المطار وبتكون قريب



والله يوفقك ان شاء الله ..ويسهل امورك

[نايف قطر]

اخوي انا رحت لها مرتين مع الاهل ومب متحسف عليها لانها صج عائليه وامنه ونظيفه وشعب محترم ومحد يتعرض لك وناس طيبين وطبيعتها واااااااااايد حلوه وروعه وفيها ملاهي للاطفال وحدايق الزهور والفراشات والطيور والفواكه والتلفريك ورحلات بحريه فالجزر وعالم ماتحت البحار احواض فيها كل انواع السمك وملاهي للاطفال ومدينه مائيه
وجوها زين انا رحت شهر 5 تقريبا كل يوم مطر في جزيرة لنكاوي

من المناطق اللي رحت لها:
جزيرة بننق:-((سكنت بفندق بارك رويال)) فيها حدايق مثل حديقة الفراشات والزهور والفواكه وفيها رحلات بحريه
جزيرة بننق :-((سكنت بفندق الشيراتون)) جنه الصراحه -احلى من بننق-فيها رحلات بالقارب-تلفريك-عالم ماتحت البحار-حديقة الطيور-سكوترات-هليكوبتر واشياء كثيره
بعدين رجعت العاصمه كوالمبور
رحت سن وي لاجون:-((سكنت بفندق سن وي لاجون))هذي الله يسلمك مجموعة فنادق حول بعض وامامهم حديقة العاب مائيه وحديقة حيوانات والعاب كهربائيه ومجمع كبير
بعدين رحت العاصمه((سكنت بفندق بارك رويال)) ومن العاصمه رحت بتاكسي لجنتنق هذي الله يسلمك فنادق والعاب كهربائيه فوق الجبل اتروح لهذي المنطقه عن طريق التلفريك
والعاصمه تقدر تسكن بشارع العرب فيه مجمعات كثيره ومطاعم عربيه
\

((بننق)) تكفيها يومين

((لنكاوي)) تكفيها 4 ايام
بعدين ترجع العاصمه
اتروح
((صن وي لاقون))تكفيها 3 ايام
((العاصمه)) تكفيها 4 ايام
ومن العاصمه تاخذ تكسي اي يوم وتروح لجنتق

واي استفسار انا حاضر بخصوص ترتيب الرحله او السفريات

[كايد الوكره]

بالنسبه لـــ كوالا
اسكن في تايم سكوير او البرنس تقريباً قيمتها 500 ريال الليله
لاتنسى تاخذ يوم كامل في جنتنق البارده
ويوم في صنو واي لاقون مجمع + ملاهي
منتجع افاموسى

[حمد911]

هلا والله فيكم
يسلمووو على المعلومات الحلوه
وبخصوص الجزر بينج ولا لنكاوي والله مادري شو الاحلى الي رح الجزر ياريت يفيدنا
حمد 911 انت شنو الفنادق الي سكنت فيها وهل هي اوكي ولا في احلى

الله يسلمك

انا سكنت في فندق شنغريلا بالمالديف الفندق مثل ماقلت لك بعيد عن العاصمة مالي يعني تاخذ طيران داخلي تقريبا المسافة ساعة وربع عقب توصل مطار جزيرة can مطارهم صغير بس مرتب يستقبلونك مندوبين الفندق وتركب الباص وعقب تركب البوت السريع وتوصل الى الجزيرة هو صحيح مشوار متعب بس شي ممتع .. الجزيرة من مميزاتها انها كبيرة وشرحة ومافيها ازعاج عندهم 3 مطاعم بالجزيرة واحد اسمة مطعم دكتور علي وهو هندي والمطعم الرئيسي اسمة جابور وفي مطعم سي فود عندهم بس مش متذكر اسمة بضبط بس اكلة حلو بنسبة لنوع السكن خذت فيلا three house بس شي خيال وماينوصف ةانا انصحك تاخذ ذي الفيلا بذات لانها الافضل .. بنسبة للخدمة 5 ستار بنسبة للمطاعم 5 ستار بنسبة للانشطة 5 ستار بعد
بنسبة للشيراتون سكنتة وخذت واتر بانجلو والفندق يعتبر حلو بس فية ازعاج نوعا بنسبة للمطاعم عندة 4 مطاعم من بينهم مطعم تايلندي ذي لاتروح لة كلش تحمل منة اكلة مب حلو بالمرة الانشطة عندهم حلوة والخدمة مقبولة نوعا ما
بنسبة للاحلى انا اشوف ان w افضل من الفل مون يعني تقدر تاخذ مثلا شنغريلا لو كنت مقتنع ان المسافة والتعب مايهمك كثير بالاضافة الى فندق w وجذي انت نوعت وبنفس الوقت خذت جولة ممتعة
رحلة موفقة ان شاء الله

[سهم مجاني]

الله يبيض وجيهكم كلكم
عز الله انكم ما قصرتو
ياربع وين افضل المكاتب الي ترتب نفس ذي الرحلات

[حمد911]

الله يبيض وجيهكم كلكم
عز الله انكم ما قصرتو
ياربع وين افضل المكاتب الي ترتب نفس ذي الرحلات

ووجهك ابيض وعزيز وغالي

بنسبة لي رتبت جميع رحلاتي عن طريق سفريات الرحلة السعيدة مكان السفريات قبل جسر الجيدة بمجمع نصر الله

مر على واحد اسمة عرفان وبيضبط لك امورك

[سهم مجاني]

تسلم ياشيخ ما قصرت

[نايف قطر]

عندك سفريات الجسره
عند موظف اسمه محسن
محترم ومايقصر
هذا رقمهم 4368167

[Qatarianes]

الشانجريلا ست نجوم في بينانغ مادري اذا بيعجبك او لا
لنكاوي اذا لك خاطر في فندق بعيد بروحه عن الباقي وشاطي خاص وبنص الغابه عندك فندق اندامان بس خمس نجوم واذا بغيت تروح لاسواق لنكاوي ونص المدينه تحتاج تكسي اربعين دقيقه يطلعك من الغابه هههههههههههه يخرع بالليل بس حلو حق الي يبي يبعد عن صخب المدن
العاصمه انا رحت بارك رويال ماعتقد يعجبك
وفي سيلانجور عندك فندق الخيول الذهبيه ( صن واي لاجون) وخذلك فله بمسبح خاص؟ بس هذا ماتقدر تدشه الا انت ومرتك مخصصينه حق شهر العسل وله رسبشن ومطعم خاص( كل ابوهم 17 فله بس )

[Qatarianes]

عندك سفريات الجسره
عند موظف اسمه محسن
محترم ومايقصر
هذا رقمهم 4368167

انا اشهد ترتيبه حلو ومسوي عنده باكج شهر العسل وكان ولا اروع ويعرف عدل الاختيارات ويساعدك ويعطيك نصايح

[هذلان]

وينك من شور

اجل عرسك :eek2:

شدعوى قبل مضان بسبوعين متزوج ... من الحين كمن يوم قضاء :pilot:

اخذها نصيحه من اخوك .. لاتكثر السفر كلش في شهر العسل حاول تكتفي في فندقين او بالكثير ثلاثه .. و انصح بفندقين .
المالديف مناسبه و جربت السكن في جزيرة كورومبا 5 نجوم و سعر الغرفه مع المسبح ب 3000 ريال
كل فندق عباره عن جزيره .. السيف انسى انك تهنا فيه خصوصا في النهار .. مالك الا الفجر او الليل .. في النهار اخر مصخره .. هذا بالنسبه للجزيرتين الي زرتهم

انصح في ماليزيا بالسكن في فندق سن وي لاغون (شاليه ببركه سباحه خاصه)

هذا الي عندي و الله يوفقك و يرزقك الذريه الصالحه

[حقل الشمال]

السلام عليكم
والله الجماعة ماقصروا في الشرح عن ماليزيا لاكن أنصحك لاتروح الكمرون كلششششششششششششش

بعيدة ومافيها شي جبال وطريق صعب كلشششششششششششش

[kuwaiti]

ماليزيا
كولالمبور
عندك فندقين
الريتز كارلتون
تريدرز ( اطلاله حلوه على البرجين )
عن تجربه
ولاتسكن الماريوت مو شي سكنته وتندمت

[khalifa9090]

انا ماليزيا ماعندي خلفيه عنها بس الشباب ماشاء الله ماقصروا بس المالديف زرتها وكانت روعه وانصحك ماتكثر عن 4 ليالي لانك بتمل من الهدوء, بالنسبة لطلبك 6 نجوم او ارقى شي في المالديف بس اسعارها غاليه وايد اللي شفته من 7000 وطالع , نصيحتي لاتاخذ بيتش فيلا ,لازم تجرب المميز عندهم في المالديف اللي هي الووتر فيلا( فيلا وسط البحر) واذا معاها مسبح خاص احسن واحسن والخصوصيه فيه حلوه , انصحك بالتالي وانت اختار

one& only ,coco palm,Taj exotica,W

وهذا الموقع تقدر تستفسر عن الاسعار وفيه كل منتجعات الفخمه في المالديف وعندهم عروض راسلهم وعطهم اللي تحتاجه سواءا خصوصيه , قريب من البحر ,شنو نوع الاكل ,,,اي شي تكتبه وهم بيراسلونك وبيرشحون لك المنتجع على حسب ذوقك, انا عن نفسي جربت وماقصروا وياي بس حجزت عن طريق سفريات فقط خذت المعلومات من عندهم . بالتوفيق ان شاء الله

[khalifa9090]

https://www.atollparadise.com تفضل

[فــلان]

ألف مبروك أخوي على العرس والله يبارك لك إن شاء الله و يرزقك بالذريه الصالحه

أنا حاليا ً متواجد في ماليزيا و توني راجع من لنكاوي ( سكنت في فندق برجايا لنكاوي ) وهو عباره عن اكواخ و فلل صغيره منها داخل الغابه و الجزء الثاني على البحر

http://www.berjayahotel.com

اول ما رجعت من لنكاوي خذت زوجتي و بنتي مباشره من المطار على منتجع أفوموسا ( يبعد عن المطار تقريبا ساعه ونص ) قعدنا ليلتين إستانسنا فيهم ومن الأنشطه المتواجده ( الطائره الشراعيه - عالم سفاري - حديقة الالعاب المائية - مدينة الكاوبوي وهاذي مسائيه من 8.30 إلى 10 تقريبا ً - صيد الأسماك في البحيره ) المنطقه خلابه و الخضار ما شاء الله يرد الروح ويهدي النفس. في المنتجع يأجرون سيارات الجولف بـ300 رينقت فاليوم أنصحك تأجرها وتخليها تحت الفندق ستاند باي لأنك مابتقدر تتحرك على راحتك هناك من كبر المكان وباصات التنقل مب شي لأنك راح تلتزم معاها بتواقيت.

*بالنسبه للفندق شوي لك عليه لكن مافي غيره بديل و أسعار الغرف تبدء من 288 إلى 600.

حالياً أنا في العاصمه كوالالمبور وساكن في فندق شنغريلا. فندق ممتاز ونظيف والخدمه توب.بإمكانك تلقي عليه نظره وتشوف الأمور شلون ماشيه ( يميز الفندق قربه من شارع العرب و التايمز سكوير )

http://www.shangri-la.com


بالنسبه لحجوزاتي كلها أسويها عن طريق hotels.com

* إذا بتحجز طيران داخلي إحجز على إير آسيا لأنها هنيه الأفضل و الأرخص وبالنسبه لحجوزاتك سوها بدري لأنك لو حجزت حق نفس اليوم إحتمال ماتلقى حجز ويخترب جدولك و التذاكر بعد راح تكون أغلى يعني لو بتحجز خلص أمورك قبل تحركك بـ يومين أو 3 على الأقل

ترجعون بالسلامه إن شاء الله و الله يبارك لكم ويهنيكم.

[هذلان]

ارجال ترى اعرس الله يبارك لك .. قال بعد اسبوع و الموضوع حاليا صار له اكثر من اسبوع

الله يوفقه و يرزقه الذريه الصالحه