رايـح غـوانـزو .. أي نصايح قبل السفر ؟ china

[نجم سهيل]

السلام عليكم

صبحكم الله بالنور .. توني مقدم لي على فيزة الصين .. وان شالله رايح غوانزو بالتحديد ولمدة اسبوع وهذي أول سفرة لي للصين .. ولأخذ فكرة فقط عن مافيها على كثر ماسمعنا عنها ..

طبعا ً في كل مكان وفي أي سفرة هناك أمور مستحبة وأخرى مكروهة .. إما من ناحية الأماكن أو التصرفات أو المعاملات أو أي شيء غير ذلك .. فحبيت أخذ نصايحكم بالنسبة لأشياء تنصحوني فيها .. سلبية كانت أو إيجابية في هذا البلد ..

وجزاكم الله خير الجزاء

[واحد ثقة]

تروح وترجع بالسلامة أخي الفاضل ،،

حدد بارك الله فيك هل استفساراتك من ناحية السكن أو الأسواق أو المطاعم أو شركات الشحن أو أي شئ آخر ،،

بالنسبة للأكل ستجد صعوبة كبيرة في إيجاد مكان مناسب للأكل لأن الأكل الصيني في أغلبه يحتوى على الحشرات والزواحف ولحوم الخنازير أجلكم الله ، وأكلهم في الغالب رائحته كريهة جداً ، والمطاعم العربية قليلة جداً أيضاً ، من هنا حاول أن تجلب معك حقيبة بها بعض المؤونة من أجبان ومربى وخبز وبسكويت وغيره ،،

عموماً بالنسبة للتصرفات فشعب الصين شعب مسالم وفي حاله ، وقليل منهم من يتحدث الإنجليزية ، ولكن لا تحاول أن تكثر النقاش مع أي صيني فأنت لاتعرف كيف تفسيرهم للأمور ولاتعرف متى يكون غاضباً ، فملامح الوجه لديهم لاتتغير سواءاً كان غاضباً أم لا ،،

هنالك أمر آخر وهو رائحة العطور ، حاول قدر الإمكان أن لاتتعطر بعطور رائحتها قوية فالشعب الصيني في أغلبه لايتعطر ولا يحب رائحة العطور وتصيبهم منه حالات شبه اختناق ، ولديهم معتقد بأن من يتعطر هو في الأساس شخص كريه الرائحة ويحاول أن يغير من رائحة جسده ،،

حدد استفساراتك أخي الفاضل فالكلام يطول عن الصين وكوانزو تحديداً ،،

وأنصحكم بزيارة منتدى العرب المسافرون - بوابة الصين ، حيث ستجد مايسرك من معلومات وافية ومفيدة ،،

[واحد ثقة]

هذه المعلومات أخذتها من منتدى العرب المسافرون وقد استفدت منها كثيراً في الصين ،،

ماعليك إلا أن تريها لسائق التاكسي وهو سيذهب بك مباشرة إلى هناك ، وهنالك عداد واضح داخل التأكسي لهذا لن يكون هنالك نصب ،،



http://i785.photobucket.com/albums/yy132/jemjam/a.jpg


http://i785.photobucket.com/albums/yy132/jemjam/b.jpg


http://i785.photobucket.com/albums/yy132/jemjam/c.jpg

http://i785.photobucket.com/albums/yy132/jemjam/d.jpg

http://i785.photobucket.com/albums/yy132/jemjam/e.jpg

http://i785.photobucket.com/albums/yy132/jemjam/f.jpg

[نجم سهيل]

السلام عليكم

الله يسلمك يالغالي

والله ماعندي شي محدد أسئلك عنه .. ودي بس بخلاصة معلوماتك عن الدولة مثل ماذكرتها لي .. يعني اللي ودك تذكره وتحس انه مهم .. سواء كان إيجابي لنحفظه .. أو سلبي لنتجنبه

وانا مستغرب من سالفة العطور .. مستحيل اطلع من غيرها .. وعلى كلامك ريحتهم وريحة أكلهم ماتنطاق .. والطيب شي لابد منه

والله يجزيك خير يالغالي .. والكتيب هذا لازم أطبعه قبل لاروح
والله يجزي من تكفل به وكل من نشره لينفعنا فيه كل خير

[عذب الكلام 1]

السلام عيكم اا اسبوع اعتقد شوي اذا بشتري اثاث ما انصح اسبوع يادوب تخلص مركز واحد اقل شي اسبوعين او اكثر لان كل شي في مدينه او كل اثاث في مكان هم مقسمين الاماكن حسب كل نوع مثال المطابخ مكان والحمامات مكان اخر والغرف ماكان مختلف ولاتنس من الصبح لين ماتغيب الشمس وقبل ماتغيب بشوي الا مصكرين كل المحلات ويومين اجازه السوق مصكر وبعدين السكن بعيد عن مدينه الاثاث يباك ساعه لين توصل وساعه لين ترجع الا اذا سواق شاطر يختصر الطريق ومافي اكل في المدينه مافي الا في مكان السكن او ماك دونالد ز لا فش بس ما تقدر تاكل لا لحم ولا دجاج لان الذح مب حلال الذبح عندهم بالخنق اسغفر الله المهم يعني اسبوع تكون مضغوط حدك الله يعينك لاتنسي الصلاه صلى ولو في المحل عادي هم متسامحين يخلونك اتصلي في المحل عادي واهم شي المترجم لانهم مايعرفون انجليزي واي استفسار انا حاضر

[نور اعيوني]

حاسب اخوي من انهم يغشونك بالبضاعه عندهم قاعده يمشون عليها الشاطر اللي يعرف يغش يعني عادي انت طالب شي معين بس يشوفونك غفلت عنهم ثواني مب دقايق بعد الا هم مغيرين البضاعه مع شي ما يمشي عندهم عشان يتخلصون منه وصارت لناس من هلي يوم ارجعوا الدوحه تفاجاوا بواااايد اشياء غير ولما اسألوا ناس كانوا معاهم قالوا لهم اصلا هاي الشي عندهم يغيرون البضاعه بدون ما تدرون كان لازم تشيكون عليها هناك..يعني لازم تحطون البال من هالشي..واهم شي الشنط عندهم بعض الاماكن يبوقون الشنط وهم شاردين..

[أبورودي]

نصيحه خد اكلك معاك معلبات واندومي وخبز جاف وجبن
كل وليس معظم خد بالك (كل ) الاطعمه الصينيه بها مشتقات ودهون الخنزير
خد كميه من الاكل تكفيك اسبوع او اكثر
وترجع بالسلامه
هذه النصبحه اعطالها لى اخ مسلم يذهب دائما لعقد صفقات هناك

[نجم سهيل]

السلام عليكم

عذب الكلام 1

أبشرك يالغالي انا رايح ألقي نظرة على البلاد واعرف وش فيها ومافيها و وش لها و وش عليها
أشكر لك نصيحتك الطيبة والله يجزيك خير


نور اعيوني

زين انك نبهتني بسالفة الغش .. تراني من النوع اللي أظن فالناس خير وشكلي ببتلش وياهم ههههه

bohaa2

نصيحتك تهمني جدا اخوي
خليتني أفكر بقواطي التونة من الحين
وان شالله بجهز شنطة الأاكل قبل شنطة الثياب

وجزاكم الله كل خير جميعا ً ورحم الله والديكم على هذي النصايح الطيبة منكم

[آخر العشاق]

اخوي المدينه حلوة ورخيصه وااايد غير كذا نصيحه لازم يكون معاك مترجم والله لو تمسك دفتر الا ما يطلع لك واحد مو متعلم ولا لهجته الصينية غير لان اللهجات عندهم تختلف وانطر لين يحصل له حد يقراله الورقة جربنا واللي تعبنا هناك ان مافي مترجم بس لا تعتمد على المترجم في الاسعار لانهم ممكن يتفقون عليك فانت اللي ساعر لو بتشتري شي ، والأكل عندك مركز المدينه فيه مطاعم عربية بالهبل ، وفي الوجبات السريعة ، وخذ معاك بسكويت والاجبان من هني احسن لك لان اكلهم غير حتى كارفورهم بدعة ، ابدأ يومك من التسع لين 5ونص لانهم يصكرون ، صراحة المكان امان ما تخاف هناك كلش ومناظر طبيعية ومطر وبالتوفيق .

[آخر العشاق]

نسيت اقولك لا تحجز فندق من هني بيطلع عليك اغلى من بيع السوق ، احجز هناك وشوف الفرق والله بتشوف فرق في اسعار الفنادق ، اختار فندق من الانتر نت وخذ صورته واسمه بالصيني وتوكل على الله ، ولا تنسى وانت طالع من الفندق تتمشى يكون معاك بطاقة للفندق عشان التكاسي هناك المو متعلمين يعتمدون على شكل وصورة الفندق ، ولا تاخذ معاك دولارات بتتبهدل لازم جواز السفر عشان تصرفها في البنوك و هم السبت والاحد اجازتهم ، واذا رحت شاينا هوتيل بتحصل هناك المطاعم العربية كلها والبنوك احذاك غير انها في مركز المدينه ومكانه حلو .

[نجم سهيل]

السلام عليكم

يزاااااااااااك الله خير على ردك الوافي
وزين انك قلتي لي عن الفنادق لاني كنت بحجز عن طريق ريجنسي بس شكلي بشوف من هناك واظن ماعلينا خوف من ناحية عدم توفر حجوزات للفنادق لان فنادقهم كثيرة
شرايك بالمنطقة اللي فيها فندق اسيا واظن قريب منه فندق الغاردن ؟
ان شالله طيارتي باجر عالـ 2 وثلث
ومشكور عالرد يالغالي

[البعد الخامس]

أخي الكريم يا ريت تحدد بالضبط الهدف من زيارة الصين

هل سياحه

أم سوق

أم الأثنين معاً

كم المده ؟

وأن شاء الله نقدر نفيدك باللي نقدر عليه

تحياتي

[نجم سهيل]

السلام عليكم

الغرض هو السياحة واخذ فكرة عن الأسعار اخوي ..

ولمدة اسبوع ابتداء ً من يوم الجمعة الجاية للجمعة اللي بعدها ..

ومشكورين انت والاخوان على هاللفتة الطيبة منكم وانشاءالله في ميزان حسناتكم

واذا خاطركم بشي بعد من هناك لايردكم الا لسانكم ..

[البعد الخامس]

هذي بعض المقتطفات التي يمكن تفيدك


* اسم أكبر سوق ملابس تحت الارض بالصيني ...地一大道 diyidadao

* اللي اعرفه انه الاسواق عندهم مايأجزون واذا في اجازات عادة المصانع هي اللي تأجز والله أعلم .

* اذا اشتريتوا اي شئ من الصين سواء اثاث ولاغيره وعملتوا الفاتوره ودفعتوا العربون في هذي الحاله ماتقدرون تتراجعون الا اذا بتبدلون من نفس المحل بنفس السعر.

*تأجير سياره خاصه مع السائق من الصباح حتى اقفال الاسواق يعني المساء داخل كوانزو ب300 رممبي .

* عند خروجكم من باب المطار بتشوفون جدامكم على الشارع الثاني موقف للتكاسي وتنتظرون بالدور واذا ماعرفتوا موقف التاكسي اسألوا اي حد ، ولكن احذروا تركبون مع اي حد يعرض عليكم التوصيله ويقولكم انه تاكسي اعتمدوا على التاكسي الرسمي.

* يفضل أخذ الدولار الامريكي وبعض الصيني .

* ممكن تعرفون العمله الصينيه المزوره بعدة طرق ولكن انا اعرف طريقه وحده وهي ترفعون
ورقة العمله وتركزون عند رقم العمله مثلا ورقة 100 رممبي اذا لاحظتوا وانتوا تحركون الورقه يتغير لون الرقم 100 يعني هذي اصليه واذ شفتوا لون الرقم ثابت يعني مزوره.

* احذروا تشترون من الباعه المتجولين والافضل تشترون من المحلات.

*انصحكم باستخدام جوتي رياضه عند التسوق لانه بتمشون مسافات كبيره ومده طويله .


وبالتوفيق .... تحياتي

[h_qatar]

أنصحك في فندق ويستن فظييييع، صح بعيد شوي عن مركز المدينة بس صراحة مرييييح و خدمتهم روعة

و نصيحة أخرى خل عندك ارقام المطاعم لانك بتموت جوع، مطاعمهم العادية ما يسير ناكل منها لان ذبحهم لا هوب اسلامي و لا من اهل الكتاب،

افطر عدل ف الفندق و ع المغرب او العشاء خذوا غداء\عشاء

و بعد احتفظ برقم مترجم للحالات الطارئة بالإضافة إلى رقم تليفون الفندق

[h_qatar]

إذا ودك بأرقام محلات أثاث فخمة راسلني ع الخاص، رحت لمعرض في شهر مارس 2010 و مجمعة معلومات كثيره، بس عملني الستايل و الأسعار اللي تبيها

لا تنسى تطبع أوقات الصلاة قبل لا تروح