ظاهرة جديدة بدأت بالظهور بين الشباب والبنات .. تحت مسمى (النشاط) !!

[£عبدالعزيز£]

السلام عليكم ورحمة الله وبركاته



قبل كم سنة .. كنا دايما نسمع عن مراكز معروفة لسد اوقات فراغ الشباب

ومن خلالها يقدر ولي الامر انه يخلي عياله يشاركون في الانشطة

الصيفية المتعددة اللي كانت تصير كل سنة .. بعيدا عن الشبهات .. الا بالعكس

كان الواحد يقدر يدخل عياله مثل هالمراكز وهو متاكد تماما من انهم

بيستانسون ويستفيدون بنفس الوقت .. وهالمراكز معروفة للكل وراح اذكر بعض

المراكز المشهورة اللي اعرفها .. على سبيل المثال مركز شباب برزان

او حتى نادي قمم .. ومركز الفرقان الصيفي .. وغيرهم اللي ما تحضرني اسمائهم حاليا


..


لكن اللي صاير الحين (على حسب اللي نسمعه من الشباب والله اعلم اذا صج ولا لا) .. في مراكز واشباه مراكز انشئت .. ومن خلال هالمراكز

قمنا نشوف اشياء (تافهة) تصير تحت مسمى (الانشطة الصيفية)

اللي في السابق كان ولي الامر متطمن لمثل هالامور تماما .. لكن مع ظهور مثل

هالظاهرة الجديدة قام الواحد يضيع بين المراكز (المحترمة) والمراكز اللي نشاطها

الصيفي عبارة عن كلام فاضي !!

..

ياريت بس كلام فاضي .. لو كانت السالفة مجرد كلام فاضي بيكوون اهوون بوااجد

الحين قمنا نشوف ظواهر جديدة طلعت

يجمعون المسجلين (من الجنسين) ويألفون لهم موضوع يتكلمون عنه

ويجيبون اشخاص الله اعلم من وين جايين على اساس انهم خبراء في الشي الفلاني

مع كم كلمة .. وكم ضحكة .. وشوية تفلسف .. واكتمل النشاط الصيفي omen

وطبعا اكيد في شباب وبنات تعجبهم مثل هالسوالف ويمكن يكون الاختلاط هو السبب الرئيسي لتسجيلهم

وبنفس الوقت في ناس مخدوعين بمثل هالمظاهر الـ(الزائفة) والصراحة حرام نشوفهم يشاركون في مثل هالمراكز !!

فإلى متى ؟؟

..

انزين الشغل وقالوا يمكن ضروري يصير فيه اختلاط .. ونفس الشي بالنسبة للدراسة

بس مثل هالاشياء اللي يسمونها انشطة صيفية هل ضروري يصير فيها اختلاط ؟

..

الهدف من الموضوع انه لو فعلا (كلام الشباب واللي نقراه فهمناه صح)

هل توجد مراكز فيها اختلاط ؟

وهل المراكز هاذي تقدم اشياء مفيدة فعلا ؟

ووين اولياء الامور عنهم ؟

وليش ما نشوف ناس مختصين للتاكد من اللي تقدمه مثل هالمراكز ؟

..

هالاسئلة اتمنى يجاوبونا عليها اللي جربوا هالشي (وياكدون صحة الكلام او عدمه)

لانه كلامي عبارة عن وجهة

نظري اللي كونتها من كلام الشباب واللي اشوفه في الاعلام

..

ويعطيكم العافية

[meme~qatar]

تدري هذي اول مرة اعرف انه في عندنا مراكز صيفية فيها اختلاط

رحنا فيها والله

[£عبدالعزيز£]

تدري هذي اول مرة اعرف انه في عندنا مراكز صيفية فيها اختلاط

رحنا فيها والله

يمكن لو تسئليني عن اسم مركز صيفي مختلط ما بعرف اجاوبج

بس اللي اسمعه من الشباب واللي اقراه احيانا في الجرايد انه في اشياء

(بما معناه) تقدم انشطة ومن مثل هالامور وفيها اختلاط

واسمع سوالف كثيرة من الشباب

..

وموضوعي مب اكثر من اسئلة تنتظر اجابة من اللي جربوا هالشي

او شي شبيه له

..

ومشكورة اختي على المرور

[kooool]

وضح اسم المركز لو تكرمت ..مايستاهلون انك تستر عليهم ..لانها نوادي اجتماعية واي خلل يجب ان يعرف المجتمع عنه

[£عبدالعزيز£]

وضح اسم المركز لو تكرمت ..مايستاهلون انك تستر عليهم ..لانها نوادي اجتماعية واي خلل يجب ان يعرف المجتمع عنه

نفس ما قلت للاخت اللي فوق

لو حد طلب مني اسم مركز ما بعرف اجاوب

وموضوعي عبارة عن اسئلة للي جربوا انهم يسجلون في مثل هالانشطة

سواءا كانت صيفية او في غير فترة الصيف

فبانتظار ردودهم

وتسلم يالغالي على المرور

[ريم المدينة]

top shabab

[بويوسف]

اذا في مكان معين اذكره لكن سمعت وقالوا .. محد من الاعضاء سمع بهالشي ..

[بوخالد911]

متاابع
............

[بنت ابوها 19]

ماعمري سمعت بهل الشي

اول شي بداية الموضوع سمعت والشباب يقلون

عقب لحد يسالني عن اسم المركز
والعنوان مش عنوان استفسار الي يشوف العنوان يقول متاكد من الخبر 200%

[الصريحه]

ماادري وياليت مايكون صحيح

[بلوتنيوم]

اشلون نعلق
وانت اصلا مب قادر تقول لنا مركز او اسم واحد
يعني اشلون نبدأ سيمفونية ضياع الاخلاق والبكاء على اطلال الماضي:no:

[ام السعف]

ما سمعت بالشي هذا،، حتى المراكز اللي يندفع فيها فلوس يراعون عدم الاختلاط ما بين الجنسين
دورة بنتي تأجلت بسبة عدم اكتفاء العدد مع اني قلت لو كان اخوها معاها ما عندي مانع اتخلص الدورة
لو العدد كان قليل قبل رمضان ،، الا ان المركز رفض الشي هذا ،،

[ابو محمد7]

الموضوع كله سمعت !!!!!!!!!!!!!!!!!!!!!!!

المطلوب التثبت والتحقق

[مابدل العادات]

هو فعلا ماقد سمعت من حد

بس ترى عادي توقع كل شي يصير في الدوحه في هاي الزمن

والله يستر من الجاي

[غاليهم]

حبيت اأكد كلام أخوي عبدالعزيز

اللي يدرس في الجامعات بيعرف شنو هالأنشطة

انا ادش الفيس بوك وأشوف الصور

هي أنشطة أكثر مما هي مراكز وأكثرها تكون أنشطة دولية مثل ايزك وبودي وغيرها

انا أشوف شكثر أنشطة فيها اختلاط وبعد يصورون ويحطون صورهم في الفيس بوك شباب وبنات مع بعض مع الابتسامات

اخر شي أحب أشكر المراكز الصيفية الأصيلة : الفرقان ونادي المبدعين وقمم وشباب برزان اللي نشأوا على التربية الأسلامية

ومن أهم أنشطتهم قراءة القران والحب في الله تعالى

[£عبدالعزيز£]

اول شي مشكورين كلكم على الردود

حتى لو كان فيها استهزاء =)

واعتقد ان هالرد هو دليل على صحة كلامي

والموضوع كان عبارة عن سؤال .. وجاوب عليه اخوي غاليهم



حبيت اأكد كلام أخوي عبدالعزيز

اللي يدرس في الجامعات بيعرف شنو هالأنشطة

انا ادش الفيس بوك وأشوف الصور

هي أنشطة أكثر مما هي مراكز وأكثرها تكون أنشطة دولية مثل ايزك وبودي وغيرها

انا أشوف شكثر أنشطة فيها اختلاط وبعد يصورون ويحطون صورهم في الفيس بوك شباب وبنات مع بعض مع الابتسامات

اخر شي أحب أشكر المراكز الصيفية الأصيلة : الفرقان ونادي المبدعين وقمم وشباب برزان اللي نشأوا على التربية الأسلامية

ومن أهم أنشطتهم قراءة القران والحب في الله تعالى


تسلم اول شي على الرد وتوضيح الصورة اكثر

اليوم يصورون وينزلون الصور فالفيس .. باجر شبيسوون ؟

الله يستر بس

ربنا لا تؤاخذنا بما فعل السفهاء منا


...







اذا في مكان معين اذكره لكن سمعت وقالوا .. محد من الاعضاء سمع بهالشي ..

شلون محد من الاعضاء سمع والموضوع لما رديت عليه كان فيه 4 او 5 ردود بس ؟

اما عن اسامي الاماكن انا الحمدلله بعيد عنها .. ونفس ما ذكرت في الموضوع ان الهدف

منه هو ان اللي جربوا يقولون لنا

على العموم اعتقد ان رد اخوي غاليهم جا في وقته :)

وتسلم على المرور



ماعمري سمعت بهل الشي

اول شي بداية الموضوع سمعت والشباب يقلون

عقب لحد يسالني عن اسم المركز
والعنوان مش عنوان استفسار الي يشوف العنوان يقول متاكد من الخبر 200%


هاي موضوعي وهاذي طريقتي في الكتابة

تبين اهلا وسهلا .. ما تبين ليش رادة على الموضوع ؟

اما بخصوص العنوان .. طبعا لازم احط عنوان يدل على الموضوع الرئيسي

ولا تبيني اكتب لج هالعنوان :

(سمعت من الشباب انه في مراكز صيفية فيها اختلاط .. هل هذا الكلام صحيح ولا مجرد اشاعات ؟ .. تعال وشاركنا برايك .. على فكرة انا مب متاكد وما عندي اسامي مراكز)

:telephone::telephone:


شلون نعلق
وانت اصلا مب قادر تقول لنا مركز او اسم واحد
يعني اشلون نبدأ سيمفونية ضياع الاخلاق والبكاء على اطلال الماضي

المعنيين بالموضوع هم اللي جربوا هالشي وسجلوا في مثل هالمراكز

يعني لو جربت هالشي او عندك معلومات تقدر ترد

اما لو ما عندك معلومات انت مخير في هالشي omen




ما سمعت بالشي هذا،، حتى المراكز اللي يندفع فيها فلوس يراعون عدم الاختلاط ما بين الجنسين
دورة بنتي تأجلت بسبة عدم اكتفاء العدد مع اني قلت لو كان اخوها معاها ما عندي مانع اتخلص الدورة
لو العدد كان قليل قبل رمضان ،، الا ان المركز رفض الشي هذا ،،


هاي دليل على امانة المركز

وتوفقتوا فيه

وتسلمين على الرد


الموضوع كله سمعت !!!!!!!!!!!!!!!!!!!!!!!

المطلوب التثبت والتحقق

عليك نور

جبتها يا بومحمد



هو فعلا ماقد سمعت من حد

بس ترى عادي توقع كل شي يصير في الدوحه في هاي الزمن

والله يستر من الجاي

صدقت الله يستر من الجاي



..



اتمنى اني اشوف ردود الاخوان اللي رديت عليهم :telephone:

[باسكن روبنز]

ماعمري سمعت بهل الشي

اول شي بداية الموضوع سمعت والشباب يقلون

عقب لحد يسالني عن اسم المركز
والعنوان مش عنوان استفسار الي يشوف العنوان يقول متاكد من الخبر 200%

:thumbup:

[£عبدالعزيز£]

:thumbup:

دوم هالابتسامة الحلوة

نورت الموضوع

[missperfect]

دام في برنامج شباب مادري شنو اسمه كل سبت بعد المغرب بتلفزيون قطر اسالوهم يمكن عندهم خبر

الله المستعان

[£عبدالعزيز£]

دام في برنامج شباب مادري شنو اسمه كل سبت بعد المغرب بتلفزيون قطر اسالوهم يمكن عندهم خبر

الله المستعان


ما اعتقد انهم يقدرون يطرحون نفس هالموضوع

لان البرنامج اصلا يستضيف شباب وبنات

يعني نفس الشي ..

[JN000N]

اي امبلا في ورش عمل تطرحها الجامعه ودورات صغيره تكون مدتها اسبوع

ومره وحده من ربعي شاركت في دوره مدتها اسبوع وكانو خلط
على الرغم من ان البنات كانو يقعدون ع جنب الا ان المحاضر او المشرف اللي يقدم الورشه يعلمهم عالتفاعل مع بعض ويوزع الشباب والبنات بحيث بدل ماتكون مثلا الطاوله بس شباب او بس بنات
تكون شباب وبنات :)

[طرفه]

جزاك الله خير وبارك الله فيك على اثاره الموضوع للتنبيه
وهنا ياتي دور اولياء الامور ولا يتركوا الحبل على القارب

[واثق بالله]

انا لاحظت هالشي .. سجلت ولدي في النادي العلمي
كان عندهم دوره مكثفه لمدة اسبوعين وكانت خلط !!

[£عبدالعزيز£]

اي امبلا في ورش عمل تطرحها الجامعه ودورات صغيره تكون مدتها اسبوع

ومره وحده من ربعي شاركت في دوره مدتها اسبوع وكانو خلط
على الرغم من ان البنات كانو يقعدون ع جنب الا ان المحاضر او المشرف اللي يقدم الورشه يعلمهم عالتفاعل مع بعض ويوزع الشباب والبنات بحيث بدل ماتكون مثلا الطاوله بس شباب او بس بنات
تكون شباب وبنات

وهالمحاضرين هم اللي قصدتهم بكلامي في الموضوع

بانهم الله اعلم من وين جايين وشنو شهاداتهم وعلى اي اساس هم موجودين في مثل هالاماكن

وتسلمين اختي على المرور



جزاك الله خير وبارك الله فيك على اثاره الموضوع للتنبيه
وهنا ياتي دور اولياء الامور ولا يتركوا الحبل على القارب

وجزاج اختي .. مب بس تنبيه لاولياء الامور

ترى في بنات يسجلون في مثل هالانشطة وهم موهومين بانها تفيدهم

لانه مب كل اللي يسجلون هناك مسجلين لانه خلط

في وايد منهم ما شاء الله عليهم في قمة الاخلاق



انا لاحظت هالشي .. سجلت ولدي في النادي العلمي
كان عندهم دوره مكثفه لمدة اسبوعين وكانت خلط !!

تسلم على المعلومة اخوي .. والله يخلي لك عيالك ويخليك لهم

[£عبدالعزيز£]

بانتظار ردود (بعض الناس) اللي استهزؤوا :telephone:

[استغفرالله]

عطونا اسامي مراكز صيفية للاولاد
بغيت اسجل عيالي مافي مراكز تقبل التسجيل

[ام السعف]

انا لاحظت هالشي .. سجلت ولدي في النادي العلمي
كان عندهم دوره مكثفه لمدة اسبوعين وكانت خلط !!

عيالنا سجلوا في الفئتين A , B
وما قالوا ان الدورة اللي انتهت يوم الخميس اللي طاف كان فيه خلط :looking:

[واحد 11]

لا تتكلم بألغاز الله يرضى عليك ... الموضوع مايحتاج كل هالغموض .... قول اسم المركز يمكن فيه ناس يعرفونه وله وجهة نظر تؤيدك او تخالفك

بس عموما كمبدأ مرفوض ان الشباب والبنات في هالفئة السنية ندمجهم مع بعض بحجة انشطة او تعليم

[ام السعف]

لا تتكلم بألغاز الله يرضى عليك ... الموضوع مايحتاج كل هالغموض .... قول اسم المركز يمكن فيه ناس يعرفونه وله وجهة نظر تؤيدك او تخالفك

بس عموما كمبدأ مرفوض ان الشباب والبنات في هالفئة السنية ندمجهم مع بعض بحجة انشطة او تعليم

يمكن يقصدون فعاليات المدينة التعليمية ،، الجامعات او البعض منها سوت
فعاليات فجامعة الكورنيل مثلا سوت فعاليات ،،

والفعاليات هذي كانت مختلطة ،،

مثل هالأماكن اساسها اختلاط فما اعتقد بيراعون الفصل في الفعاليات ،،

اما بخصوص الفيس بوك : الله يستر علينا جميعا
البلاوي في البروفايلات الهوتميل و الفيس بوك تغني عن مليون فعالية
مختلطة ،، كل عليه متابعة عياله وترك عيال الناس في حالهم :(