ولدي طيــب وحنون شسوي معاه ؟

[ســـهم]

الســلام عليكم ورحمة الله وبركاته

مرحبا بالجميع

عندي طفل في الصف الاول سجلناه في مدرسه خاصه لأجل تحاشي المعارك والغزوات في المدارس الحكوميه

ولكن يوم من الأيام قال لي " بابا "

قلت له " لبيـــــــــــــــــــــــــــك "

قال في واحد ضربني في الصــف :(

قلت " افا " :shy:

هزلت :eek5: راح نجمع القبيله ونستنفر القوى العامله والغير عامله !!

ثاني يوم رحت للمدرسه طبعا بروحي (القبيله كانوا اجازه عرضيه ) ودخلت الفصل استقبلني المدرس وهو من اجدر وافضل المدرسين

علما ان المدرسه كلها مدرسين رجال فقــــــط

قلت للمدرس القصه وأستدعاه أمامي قال " ياولد ســـهم " من ضربك قال فلان

انا قلت فلان الحين قرندايزر !

المهم استدعى المدرس المتهم وقام من كرسيه مادري من تحت الطاوله من صغر المتهم:weeping:

انا شفته انصدمت مع ان ولدي يتمتع بطول ماشاء الله

قلت له هذا اللى ضاربك قال " أيه " :secret:

بعدها قام المدرس بسؤال المتهم عن السبب والذي استدعاه عن ضرب ابني بصوت عالي

وكان هذا المتهم والذي لايكاد يرى سوى بالمجهر صامت وثابت ثبات الأسود

قلت للمدرس كفى وحاشا وكلا :tease:

توقف المدرس مسكت الطفل ومسحت على رأسه وقلت له سلم على أخوك

بعدها اخذت ولدي وقلت له ليش لما ضربك ماضربته << دبت فيني الحميه

قال هذا يتيم ابوه متوفي قلت له يعني لو كل عيال المدرسه ايتام بتكون انت ساحة تدريب !!

قال سامحته علشانه يتيم

مابي اطول عليكم

اتذكر عندما كنت في عمره وكانت المدارس حكوميه كان راسي كله شوارع

ضارب ومضروب وحتى لو كان الخصم اقوى مني اضربه واستخدم سرعة الخوف بالهروب

بحيث انني لا اعلم هل انا اسير على الارض او في السماء من السرعه الزائده

واتوقع انه لو كان طلال منصور يركض بجانبي لتركته يعتزل في هذه المواقف آنذاك :nice:


الآن اريد الحل علما أنني اتوقع ان هذا السبب كان من التدليل الزائد عن حده

فماهي حلولكم ؟!

شكرا لكم جميعا مقدما ...

[عزيزي العضو]

ابنك خلوق لماذا تريد تغييره

[Abdlaziz]

ولدك رجال الصراحه ماكان يبي يضرب الولد لانه يتيم بس بعد لازم تعلمه محد يغلط عليه ويسكت

تقريبا في هاي السن لازم اتقول له لاتخلي حد يغلط عليك وتسكت عنه ترا وراك ناس وظهر وعلمه انه مايغلط على الناس ويكون محترم معاهم ولازم يبين نفسه واسمه يكون معروف بالمدرسه
اذا هاي غلط عليه اليوم بكره كل اليهال بيغلطون عليه ومشكلة الولد الصغير ترا من البداية لازم يكون نفسه ويصير شيطان شوي ماينفع يكون مؤدب

[sara jsm]

ههههههههههههههههههههههه فديته والله ,,
انزين الولد حنون انت ليش تبيه يصير قاسي ,, :)
ودام انه توه بالصف الاول يعني قدامه مشوار طوووويل عشان يكّون شخصيته ,,
راح يتعلم اكثر من نصايحك له ومن المدرسه ومن الربع واللي حوله :)
الله يخليه لك ان شاءالله ويشرفك بالمستقبل ,,
:) الولد مافيه مشكلة عسى الله يحفظه ,,

[The Blade]

كفو والله , مب معناه ياخوي انه مامد يده على الياهل انه خواف
الله يخليه له والهوشات لاحق عليها في الاعدادية :)

[الغالي غالي]

الله يخلية لك.........انا اختلف معاك

علمة يسامح الناس

[ســـهم]

ولدك رجال الصراحه ماكان يبي يضرب الولد لانه يتيم بس بعد لازم تعلمه محد يغلط عليه ويسكت

تقريبا في هاي السن لازم اتقول له لاتخلي حد يغلط عليك وتسكت عنه ترا وراك ناس وظهر وعلمه انه مايغلط على الناس ويكون محترم معاهم ولازم يبين نفسه واسمه يكون معروف بالمدرسه
اذا هاي غلط عليه اليوم بكره كل اليهال بيغلطون عليه ومشكلة الولد الصغير ترا من البداية لازم يكون نفسه ويصير شيطان شوي ماينفع يكون مؤدب

انا قايل له وبالحرف الواحد لاتغلط على أحد واذا غلط عليك احد كلم المدرس كحل اولي

اذا لم يفعل المدرس شي قول لي كحل ثاني

اذا لم اكن متواجد اخذ حقك بيدك مع ان ولدي مسالم ويستحق جائزة نوبل للسلام وللبرائه :(

ياخي بصيح لاتخليني اكمل :secret:

حاولت وحاولت حتى أنه في الأونه الأخيره صار مايقول لي عن اللي يضربه

في الأخير جلست مع مربي الفصــل وقال ابنك اهدء طفل في الصف وسيكون تحت ناظري

لاني بالفعل انزعجت من هدوء أبني وشطانة بعض الطلاب الله يهديهم

مع أن هذه الشطانه تعرضنا لها في أعمارهم وعشناها كوضع عادي ويومي

انا ابيه مايغلط على أحد وياليته يغلط لكن المشكله مايدافع عن نفسه هو شكله نظامي 100 %

مادري يبي يصير مدير للمرور في المستقبل ولا وشو :rolleyes2:

[النهار]

ههههههههههههههههه
انت ولدك طقه ولد
انا ايش اقول ولدي جاء يشتكي ويصيح جدامي يبا يبا ها ايش فيك
اليوم ازنطتني وطقتني صالحه طق افا يالذيب تطقك بنيه قال يبه هي قويه
قلت حق ام العيال بكره نبي نشوف سالفة صالحوه ولدي توه 4 سنوات قلت في نفسي اكيد صالحوه
جثه واكبر منه ام العيال دبت فيها الحميه خذت اختها معاها رايحين حق صالحه
يبون يشوفون صرفه معاها لان هذي مو اول مره تطقه تدورن صالحه جم طلع
عمرها 3 سنوات معصقله لو علاوي طقها بس كف تروح في خرايطها
ياخوي مدري عيال هذالزمن ايش فيهم
ام العيال راحت عند صالحه ومسحت على راسها وقالت لها هذى مثل اخوش
حرام تزنطينه وتطقينه بكل براء ردت المسكينه خالتي هو جاب معاه سندويش
قلت عطني شويه ماعطاني هههههههه

[ممنوع اللمس]

والله ان ولدك ذيبان بعدي قسم بالله الاخ جدا يهتم بمشاعر الآخرين
الله يخليه لك ويحفظه يارب بس ها لا تخليه كل مره يسترحم يعني احيانا طق وانطق نو بروبلم
والسموــحــه

[هداف]

الموضوع سهل اخي العزيز لا تنزعج

ادخله في معهد رياضي خاص با الالعاب والفنون االقتاليه ( كاراتيه ,, كنغ فو ,, تيكواندو الخ )
لتنمى عنده القدره والقوه الجسمانيه وساعتها لا تخاف عليه ان صفح او خذ حقه بيده

ومن مميزات هذه الفنون تزيد من خشونة الطفل وتزيد عنده الثقه في النفس الله يحب المسلم القوي
ولا يحب الضعيف

[ســـهم]

ههههههههههههههههههههههه فديته والله ,,
انزين الولد حنون انت ليش تبيه يصير قاسي ,, :)
ودام انه توه بالصف الاول يعني قدامه مشوار طوووويل عشان يكّون شخصيته ,,
راح يتعلم اكثر من نصايحك له ومن المدرسه ومن الربع واللي حوله :)
الله يخليه لك ان شاءالله ويشرفك بالمستقبل ,,
:) الولد مافيه مشكلة عسى الله يحفظه ,,

ساره

مابيه يكون قاسي ابيه يكون معتدل

يعني لايكون فوطه ولا يكون طابوقه <<<<< هذا مثل مستحدث من عندي

حاليا اتوقع هو تكوين الشخصيه معاي يكون عنيد في أشياء ويحب يكون له شخصيه

واتركه كما يريد ولكن عندما يرى أنني غير راضي عن الوضع الذي يريده يتراجع لأجلي

ولكن في هذه المدارس التي تلم الكثير من الاطفال والذين لكل واحد منهم شخصيه او

" شطانه " وهي بالعربي الفصيح عدم تربيه في الغلط على المدرس بقية الطلاب

طفلي جدا ذكي وهو المفضل لدى مدرسينه لأدبه وشطارته في الدروس

ولكن هذا لايعني أن يكون فريسه لبقية الطلاب

لذلك اردت أن اعطيه دافع معنوي حتى لو كانت وسيلة دفاعه عن نفسه في هذا الوقت

كلاميا لكن المشكله ايضا أن صوته لايكاد يسمع الله يهديه :weeping:

[وارث العز]

الله يبلغك فية أنشاء الله

[عبدالمحسن]

السلام عليكم


ياخي روعتني الله يهداك ، انا قريت العنوان وشفتك كاتب حنون !! قلت افااااااااا


المهم


المفروض تنمي فيه هالشي ( وهو العطف على الضعيف ) وولدك ماشاء الله عليه تفكيره اكبر من عمره بحيث عرف وتذكر انه يتيم وعطف عليه من هذا الباب <<< طبعا هذا اذا ماكان عذر منك لأنه خايف :)


والخوف شي طبيعي في مثل سنه


بس أن المدرس يقول أن ولدك هادي 24 ساعه وطيب زياده وحنون ومسالم !! هذي يبي لها وقفه


اول شي لازم تعلمه الخشونه وتنمي وتقوي شخصيته ، بأشياء اهمها :-

أن تؤيد رأيه حتى ولو كان خطأ .. ( وبعدين تفهمه بطريقه غير مباشره ماهو الصواب )

ان تتهاوش معاه ( يعني تقول تعال نتصارع ! او نتهاوش ! او انتهاد ! :) << يعني تضربه ويضربك وتقسو عليه حتى يقارب البكاء ، وتستثيره لأن يضربك ، واثناء ضربه لك تبين له مدى قوته وأن النصر كان حليفه :)

ان تحلق شعره بأستمرار :)

أن تبعده عن البنات <<< واكيد انت متبع هالشي بما أنه في مدرسه بروحه

أن تجعله يجلس معك في المجلس بأستمرار ( وتستمع له ، وان تطلب من الحضور الاستماع له ) اذا تكلم.


أن تأخذ برأيه بين الحين والأخر.

أن لا تطلب منه باستمرار ان يستمع للكبير ويحترمه وان لا يرد على منهو اكبر منه :) <<< لاتقول خوش تربيه .. طيعني



..

والله يحفظ اولادنا لنا ويجعلهم قادة في دينه وخدامٍ لوطنهم




إحترامي

[JN000N]

حرااام ولدك صغييير وشحلييله

بالعكس انا اجوف تفكيره صح،،، والياهل الثاني يتيم،،

ولدك مب طالع عليك شكلك شرير:( وهو طيب

خله هذي خصله طيبه فيه لا تحاول تغييرها
لكن فنفس الوقت لازم يتعلم مايكون سلبي وبس

[JN000N]

الله يبلغك فية أنشاء الله

تكتب إن شاء الله :victory:

[ummalaz]

الله يحفظو
ذكرتني بنتي نفس الشئ مسالمه وحبوبه وحنونه وهذا الشئ مخلي البنات في المدرسه يضربوها احياناً
اخذتها لاكاديميه تعلم الكاراتيه واحسها نوعاً ما شخصيتها قويت بس لما اقول ليها انتي خلاص اتعلمتي الكاراتيه وبعدين لما تفتح المدرسه لو البنات ضربوك اضربيهم تقول لي حرام ياماما اضرب الناس ( خسارة الفلوس والمشاوير على الاكاديميه هههههههههههههههههههه)

[VIVA]

الله يخليلك ولدك ويبلغك فيه ان شاء الله

ذكرتني في طفولتي

مره في الابتدائي طقني واحد اكبر مني بصفين، عاد انا جيت عند الوالد الله يرحمه اشتكي واقوله ان فلان طقاني، والله ان الوالد عصب علي وطقني (فوق الطق اللي انطقيت في المدرسه) وقالي ان مره ثانيه وجيت تشتكي وتقول ان احد طقك ماتلوم إلا نفسك :( وخذ حقك بيدك ولا تنتظر من اي احد ان يدافع عنك

والله من يومها واللي يطقني اطقه بس عشان اثبت حق الوالد الله يرحمه اني اقدر ادافع عن نفسي ومااحتاج احد

وهذي شي فعلا علمني درس اني ماانتظر اي احد ان ياخذ لي حقي، وان انا لازم اخذ حقي بيدي


تحياتي

[الفولاذ]

الله يبلغك فيه
عادي فلمدارس ضارب ومضروب , اهم شي لاتروح معه للمدرسة بدون داعي
حاول تعلمه في البيت شيقول وكيف يشتكي واسأله اذا جا وشسوى ؟ ... وتابعة احسن

[cartier]

علمه ايناديك يبه اول عقب علمه اشلون يضرب

[الحريّه]

[QUOTE=ســـهم;6168127][CENTER][COLOR="DarkOrange"]
الســلام عليكم ورحمة الله وبركاته

مرحبا بالجميع

عندي طفل في الصف الاول سجلناه في مدرسه خاصه لأجل تحاشي المعارك والغزوات في المدارس الحكوميه

ولكن يوم من الأيام قال لي " [SIZE="5"]بابا "

قلت له " لبيـــــــــــــــــــــــــــك "


:) أحييك أخوي سهم على روح المرح و الدعابة لديك ! مستوى من خفَة الدم لم أره منذ زمن ! حفظك الله لأسرتك
ولدك نعمة لازم تحمد ربك عليها ! لو كان بقربي لاحتظنته و قبلته !
إنه على خُلُقٍ كريم فعلا . أما ما يحدث بين الأطفال فهو تفسير للمثل القطري الشعبي " المواعين في البيت إتصاكك " خاصة بين الأطفال الذين في سن ولدك ! حاول أن لا تقول له خذ حقك بيدك , فهذا يحول المدرسة إلى أيام الجاهلية حيث لا قانون و لا سياسة سلوكيه! يجب أن لا يكون دور المدرسة غائبا هنا حيث تكون المسئولية على معلم الصف والمشرف الاجتماعي التعرف على اسباب قيام الطفل الآخر بالضرب . فقد يكتشفون أن هناك من يضربه في البيت و يسيء إليه , فيصبح سلوكه في المدرسة ماهو إلا رد فعل لما يحدث له و يكون هو الضحية أصلا ! أطلب من ولدك أن يذهب إلى المدير أو المشرف الاجتماعي حين يقوم أحد بضربه ...وهم يتابعون الموضوع و يحمون ولدك من الضرب
ألله يخليه لك و يبلغك فيه معرس ( أمين يا رب العالمين )

[alfahad1]

احذفه عند عيال عمه يلعب ويتهاوش وياهم بيصير عنيف شوي

بس مب اذا صار مشاغب تقولي انا السبب

[ودي أكون]

الله يحفظه لك يارب ..


بخصوص الحميه .. ترا اليهال يومياً راح يتضاربون .. بداوم مع ولدك حفاظاً عليه مثلاً :tease:

وبعدين يمكن ولدك سواا شي استفز الولد اليتيم :secret:

او يمكن ولدك مانضرب بس متسبب عاليتيم :omg:

<<<< متسببه ع ولدك :tease:


الصج .. ولدك أخلاق ويكفي ان مارد الاساءه مو عشان مايقدر .. ولا عشانه يخاف .. لكن عشان ان الولد يتيم ..

الله يحفظه لك .. اخلاقه حلوة .. فلاتخربه :tease:

[ورد الدوحه]

نفس الشيء بنتي كل يوم معانده ماتبي اتروح الروضة اتقول كل اطقها وحده هناك وفي مجلس الامهات قلت حق مدرستها ليش هذي البنية كل اطق بنتي ؟ردت علي بنتج ماشاء الله عليها تاخذ حقها بنفسها والبنت اللي اتكلمين عنها نتفه اصغر وحده في الروضه ويوم سألت بنتي عنها قالت لي ايه صغيره وايد وبسرعة تنخش ورى الابله مااقدر اطقها اخاف اطق الابله بالغلط

[سهم رايح]

الســلام عليكم ورحمة الله وبركاته

مرحبا بالجميع

عندي طفل في الصف الاول سجلناه في مدرسه خاصه لأجل تحاشي المعارك والغزوات في المدارس الحكوميه

ولكن يوم من الأيام قال لي " بابا "

قلت له " لبيـــــــــــــــــــــــــــك "

قال في واحد ضربني في الصــف :(

قلت " افا " :shy:

هزلت :eek5: راح نجمع القبيله ونستنفر القوى العامله والغير عامله !!

ثاني يوم رحت للمدرسه طبعا بروحي (القبيله كانوا اجازه عرضيه ) ودخلت الفصل استقبلني المدرس وهو من اجدر وافضل المدرسين

علما ان المدرسه كلها مدرسين رجال فقــــــط

قلت للمدرس القصه وأستدعاه أمامي قال " ياولد ســـهم " من ضربك قال فلان

انا قلت فلان الحين قرندايزر !

المهم استدعى المدرس المتهم وقام من كرسيه مادري من تحت الطاوله من صغر المتهم:weeping:

انا شفته انصدمت مع ان ولدي يتمتع بطول ماشاء الله

قلت له هذا اللى ضاربك قال " أيه " :secret:

بعدها قام المدرس بسؤال المتهم عن السبب والذي استدعاه عن ضرب ابني بصوت عالي

وكان هذا المتهم والذي لايكاد يرى سوى بالمجهر صامت وثابت ثبات الأسود

قلت للمدرس كفى وحاشا وكلا :tease:

توقف المدرس مسكت الطفل ومسحت على رأسه وقلت له سلم على أخوك

بعدها اخذت ولدي وقلت له ليش لما ضربك ماضربته << دبت فيني الحميه

قال هذا يتيم ابوه متوفي قلت له يعني لو كل عيال المدرسه ايتام بتكون انت ساحة تدريب !!

قال سامحته علشانه يتيم

مابي اطول عليكم

اتذكر عندما كنت في عمره وكانت المدارس حكوميه كان راسي كله شوارع

ضارب ومضروب وحتى لو كان الخصم اقوى مني اضربه واستخدم سرعة الخوف بالهروب

بحيث انني لا اعلم هل انا اسير على الارض او في السماء من السرعه الزائده

واتوقع انه لو كان طلال منصور يركض بجانبي لتركته يعتزل في هذه المواقف آنذاك :nice:


الآن اريد الحل علما أنني اتوقع ان هذا السبب كان من التدليل الزائد عن حده

فماهي حلولكم ؟!

شكرا لكم جميعا مقدما ...

بعدها قام المدرس بسؤال المتهم عن السبب والذي استدعاه عن ضرب ابني بصوت عالي


حسبي الله ونعم الوكيل على المدرس /// يعني عشان انت حضرت للمدرسة لان ولدك انطق يصرخ على الولد /// هذا ليس حل افرض ان هذا ولدك والمدرس رفع صوته عليه جدام الطلاب وولي امر طالب ما ....... حسبي الله ونعم الوكيل ....

[قطر دزاين]

بالعكس اخوي سهم هذا شي طيب في ولدك خلقه عالي فلا تغير هذي الخصله فيه
وهذا ما يدل على ضعف الشخص وانما التربيه اللي تربا عليه لا تسمح له ان يئ لا احد

الله يبارك لك فيه وفي اخوانه امين

وحبه على راسه قل من عمك محمد

[وطن]

حبيـــــــــــته
والله انه كفو الله يبارك لك فيه

جيبه عند ولدنا بيعلمه شلون ياخذ حقه بدون ضرب ومضارب

[مضارب دوسري]

عادي يا سهم أنا صف اول كنت الوحي اللي أنضرب فالصف :(

ولما وصلت صف الخامس صرت الوحيد اللي اضرب


خله مثل ماهو
من نفسه يغير شخصيته

[ساكن ازغوه]

أهم شئ يا جماعة إنا نتابع أبنائنا ونسمع منهم ترى الابناء في هذه المرحلة يبالغون كثيرا
مره جاء ولدي الله يحفظه وقالي انه دائما ينضرب في الصف وعند الاستفسار من المدرسة حصلته الله يحفظه ( مكفخ نص الصف ) ولاننسى دائماً الدعاء لأبنائنا بالهداية

[أم شيوخ]

سهم بصراحه ولدك تفكيره عقلاني حتى لو بهالكبر....
يعني عطاك تحليل انت مادخل عقلك
اهو يوم ضربه ناداك وفكر انه انا اذا طقيته ابوه يتيم يعني اكيد فكره ابوه يتيم شلون انا اذا طقيته بيقول حق من
ولدك ماشالله يفكر بالامور ويوزنها قبل كل شي حتى لو بهالعمر

انا عندي ماحب اذا ولدي انضرب يضرب لا جي باعلمه على الضرب في كللل شي

[Doha Sun]

كيوت .. خله لا تغيير فيه شي

[أم شيوخ]

انا عن ولدي حبيبي اذا ماقدر على ولد اختي وذاك نتتتتتفه لو تشوفونه جنبه وولدي ماشالله رايح في طول هذاك يقدر عليه ويجيني يقولي اقوله عيب مايطقني خخخخخ هذاك يجدم ريله بس يخاف هههه
مسوي رعب ولين هاوشته يصيح كنه فيه عرج هنود على طول الدموع اربع اربع

[ROSE]

ههههههههههههه ذكرتني بولدي

عندي ولدين واحد كان هااااادي وخجول والحين تعال شوفه

والثاني ضرب مضارب مع خلق الله حتى عمامه

مره دخلت بيت جدته اشوفه واقف على كرسي ويصيح ويضرب عمه اللي اكبر منه ذاك يبي يبعده

عنه مب قادر من عصبيه ولدي لو تشوف شكله بتضحك عليه اهم شي انه ياخذ حقه مايسكت عن حقه

خل العيال يكونون شخصيتهم بنفسهم بس بتوجيه منك يعني علمه يدافع عن نفسه

ولكن في نفس الوقت لا تقتل فيه روح التعاطف


والله يبلغك فيه يارب

[Arab!an]

انا صراحه ما احب الطفل العاقل :rolleyes2: لاحق على العقل والركادة

قلل من تدخلاتك شوي وخله يتصادم مع العيال بروحه .. بس ركب له صدام صب :tease:

وهالشي مب معناته انك تهمل الولد .. لا بالعكس راقبه وانتبه عليه لكن لا تحسسه انك موجود معاه على طول


اوكي ياعيوني ؟

اخوك اريبيان الدريع :cool:

[سوق واقف]

الله يخليلك ولدك ويبلغك فيه ان شاء الله


ونعم التربية


بالعكس أخي العزيز هذا ولد صالح وأخلاقه عالية جداااا

الله يوفقه في حياته العلمية والعملية

لا تغير سلوكه .... خذ الولد معاك الى الصلوات وحفظه كتاب الله ولا تقول ولدي صغير توه على الصلاة ....


حتى صلاة الفجر ....

عندي ثلاث صبيان
5سنوات
4سنوات ونص
9 شهور

الولدين بو خمس سنين وبوأربع آخذهم معاي الى الصلوات وحتى صلاة الفجر لتعويدهم فقط على الصلاة ...

والحمد الله أبو خمس سنوات يحفظ عشرة أجزاء من القرآن والصغير أربع أجزاء الى الآن ...

ربي يحفظ لك ولدك يا رب

[الساهر 17]

والله رائي ان ابنك على حسن خلق بس يبلغيك توديه يلعب رياضية مثل رياضية الكراتيه بس علشان يقوي جسده والله تراه رياضية جداا ممتازة تعلم الطفل الاحترام والاعتماد على النفس وتعطيه الثقة في نفسه حتى لما يتكلم بس اهم شيء توديه عند مدربين يا كوريين او صينييين والافضل الصيينين وكن دائمآ قريب منه تابعه وبعدين ممكن راح تشوف الفرق حتى في كلامه ( بيتكلم بثقه معاك ويكون الاحترام للناس هو مبداء ه ) ولا تنسى نصيب القران وحفظه ووفقك الله وهذا رائي والله تعالى اعلى واعلم

[Chanel]

الله يبارك لك فيه والتعم والله

[هذلان]

السلام عليكم


والله ياسهم انا فهمت موضوعك بطريقه شوي مختلفه . كلمه تستحي منها بدها .. الي فهمته من كلامك انك خايف او ماتبي ولدك يطلع حنين (بدلت الكلمه الف مره)

لي ملاحظه على الاطفال الي في السن هذا .. حنينيين جدا جدا و السبب هو من ولادتهم الى دخولهم المدرسه بيتوتيين ,, اشبهم سابقا بالبنات على ايامنا .. كنا احنا نشطح و مانخلي طوفه ولا حوش مانشقحه و البنات في البيت و حدهم باب الحوش و مع امهاتهم . و العذر على التشبيه .

بحكم انه ماعندي عيال حاليا .. عندي عيال اخوي و هم في هالعمر تقريبا و صارت كذا مره مواقف في المرسه مع طلبه و للاسف مع مدرسات . العيال في هالجيل مش حمشين .
الكبير غانم الله يحفظه .. انردغ ردغ لين الله شاف له من طالب و الطالب جاب اخوه و خمسوبه و طلعت عمت الطالب مدرسه بنفس المدرسه و موضوع طويل يقهر .
بصراحه و عيب علي اقول هالشي .. هو تكتم على الموضوع من الخوف الي سببوه له لا من الي ضربوه ولا من عمت الطلاب (المدرسه) ثاني يوم وهم موصلينه المدرسه يوم قريب ينزل من السياره انفجر من البكا و قال مابي انزل .. انا يوم سمعت السالفه طبخت من قمه راسي
و اتصلت فيه لاني كنت في العمل و قلت له اطلع عنهم بعيد .. ابي منك شي و انا عمك ابيك تسويه .. قالي وشو قلت ابي الولد الي طقك اول ماتدخل المدرسه تروح له ركيض و تضربه لين الله يشوف له .. حتى لو انه اقوى منك و ضربك ولكن اضرب قد ماتقدر ترى مب عيب تنظرب الله خلقه اقوى منك بس ما ارضى انك تنظرب و تسكت . يوم قلت له هالكلام ارتاح و حس بالثقه
و مابي اطول بس الموضوع وصل اعتقد المجلس الاعلى او شي من هذا القبيل
الظلم شين و عيال هاليومين الاهتمام الزايد فيهم خطر كبير .

و الحل الاكيد انك تاخذ عيالك ويك (الذكور) في اي مكان تروح له قدر الامكان

و السموحه على الاطاله و لحد يعقب على مشارتي اكيد كثير بيعارضوني :rolleyes2:

[سحابة]

أخوي سهم اول شي الله يخليك لك ولدك ويحفظه لك من كل شر ..
ثاني شي علمه ان الحنان واللطف بالايتام يكون بكل شي الا كرامته محد يمسها .. فهمه انه ممكن يساعده وممكن يعامله معامله طيبه وومكن يوقف معاه بالحلوه والمره بس مايسمح لحد يهينه او يمس كرامته يعني يصادقه ويحبه ويعطف عليه ويكون كريم وياه ويحسن اليه ..

[الصريحه]

الله يخليه ك ووديه كاراتيه ولا جودو علشان يكون اقوى

[حمد بن خالد]

الاخلاق يتبعها الاحترام

والاحترام للمدرس يتبعه الانتباه في الفصل

والنتيجه هي التفوق الدراسي في المراحل الحياتيه والعملية

أنا كنت امشي مع الساس وانا صغير

والكل كان يستقوي عليه

وكنت من الاوائل دوووم

وفي الثانوية بديت باللعانه والشطانه والضرب والمضارب وماخليت حد في حاله حتى لو ولد من يكون

والنتيجة كانت هبوط مستواي الدراسي وعدم التركيز ولا احترام المدرسين والفرعنة اللي مالها لزوم

وبالدز .. خلصت الثانوية

اليوم .. انا نادم على اني تفرعنت وخذت حقي من الناس اللي معاي

لان في النهاية

أطفال ومراهقين .. يعني , نكبر وننسى

خل الولد على حاله واهم شي الاخلاق , الصلاة واحترام الوالدين والكبير والعطف على الصغير

اما الفرعنة ... مالها اي داعي


طبعاً في حالات شاذة عن المثال اللي ذكرته عن نفسي

وربي يحفظ ولدك ويخليه بار في والديه وذخر لك ان شاء الله

ويحفظك وييسر دربك يا سهم

والسموحه عالإطالة

:)

[المقهوره]

كان عندنا طفل بالطريقه هذه

والان صار وحش كاسر من دخل المدرسه


لانه كل ما اشتكى لنا وقال فلان خنقني ولا ضربني

قلنا له وليش ماتضربه انت

المهم ضربه ورى ضربه ورى ضربه


والحين قد هو الي يضريب خلق الله

(ان لم تكن ذئبا اكلتك الذئاب )


وسبب عدم ضربه للعيال في المدرسه ان امه كانت تدافع عنه باستمرار في البيت وعند عيال القبيله الي بسنه او حتى اصغر منه .... كنه بنت

وعقب ماخلته يواجه من نفسه هنا ااشتد عوده بصراحه


يعني السبب الرئيسي كثره الدفاع عنه


ترى مدارس الاولاد اذا الواحد مب قوي ويدافع عن نفسه راااااااااااااااااااااااح فيها


بس اهم شي انه مايخطي على احد
بس الي يخطي عليه يخمس به ويسدس به ولا يخلي حقه

[سوق واقف]

كان عندنا طفل بالطريقه هذه

والان صار وحش كاسر من دخل المدرسه


لانه كل ما اشتكى لنا وقال فلان خنقني ولا ضربني

قلنا له وليش ماتضربه انت

المهم ضربه ورى ضربه ورى ضربه


والحين قد هو الي يضريب خلق الله

(ان لم تكن ذئبا اكلتك الذئاب )


وسبب عدم ضربه للعيال في المدرسه ان امه كانت تدافع عنه باستمرار في البيت وعند عيال القبيله الي بسنه او حتى اصغر منه .... كنه بنت

وعقب ماخلته يواجه من نفسه هنا ااشتد عوده بصراحه


يعني السبب الرئيسي كثره الدفاع عنه


ترى مدارس الاولاد اذا الواحد مب قوي ويدافع عن نفسه راااااااااااااااااااااااح فيها


بس اهم شي انه مايخطي على احد
بس الي يخطي عليه يخمس به ويسدس به ولا يخلي حقه


أختي العزيزة بدون زعل هذا الأسلوب خطا وراح تشوفين ثمرة هذا الأسلوب الضرب بالضرب مستقبلا

وربي يوفق أبنائكم لما فيه الخير

[تحداني]

.. الله يحفظه لك يارب ..

ماني ملمه كثيرا في تربيه الأبناء ..
ولكن أعتقد أن طريقه التعامل معهم واضحه


خليه يتصرف مع الغير بعفويته .. وخلي يمارس طفولته ..
ويتعامل مع الغير بشخصيته الحقيقيه

ماهو شطاره ولا هي تربيه أن نعلم الأطفال كل ما واحد صرخ عليك صرخ عليه
وكل ما واحد شق ثوبك ..ضيع إنعالته ..


بس علمه كل ما كنت مسالم وفي حالك
وتعامل الغير بأدب وإحترام مافي أحد يقدر يتعرض لك


ضرب الأطفال ماهو سلوك شاذ وينخاف منه
ولكن إن إستمر الوضع على هذا الحال " هنا تبد أ الاسئلة "
لماذا إبني فقط ؟؟
ولماذا يضربه دائما ؟؟
ولماذا يرى إبني ان الحق معه والعتب عليهم ؟؟


لاحق على الرجوله المصطنعه
والضرب المبرح
والصراخ الذي أخذته المجتمعات الشرقيه وسيله لفرض رجولتهم
والأوامر الذي يرون من خلالها رجوله ووقار
وهم مفاهيم الرجوله البسيطه لا يعرفونها

ليس هكذا يصنع الرجل من نفسه قاعده تليق به
انما الرجل من خلف أبناء لهم من الإحترام
ولهم من الإبداع وشهادات التقدير
ولهم من يشار إليهم بالبنان في مستقبلهم وعملهم وشهاداتهم
ويفتخر بهم ذويهم عندما يقولوا


" هذا الشبل من ذاك الأسد "



الله يسعدك وينور طريق إبنك
ويجملكم سويا برضى الرحمن

[عيون Qatar]

والله فعلا مشكله

تصدق انا ولدي كان جذي وجربنا معاه كل الطرق

ودخلناه روضه قلنا عشان يتاقلم

ولما كبر حتى نادي الدفاع عن النفس دخلناه وما في فايده


ولد خالته اصغر منه بشهرين ويضربه وولدي لايحرك ساكن

صرت اقارنه بكل اللي بسنه وانقهررر

وكرهت اروح للناس بسببه

خلاص هذه شخصيتهم

اذا كبروا نبدا نفهمهم شوي شوي

الله يعين ,,

[باسكن روبنز]

ياشين الياهل لي صار حنين ينرفزون هههههههه ،

احسن حل كل صيف سجله بمراكز رياضيه على حسب ميوله سواء قدم ولا سله او جودو ،

حلات الياهل بولسانين ودفش ويعرف يتصرف بالمواقف مب حاط يده على خده وناطر الماما ،

شوف سوالف الميالس بتملل اليهال من الحين بس لازم توديه كل اسبوع مره على الاقل ،

خله يحتك باليهال ويطلع وياهم ويتوهق بمواقف عاديه من تأليفك ،

ولد اخوي كان نفس ولدك بالضبط ويشهد الله تكفلت فيه مضبوط لانه ابوه لاهي بدنياه ،

حتي خواته الصغار عمارهم 8 سنين يهاوشهم لي شاف شعورهم طالعه في مكان عام وملسون الله يحفظه ههههههههه ،

السالفه بسيطه لاتحاتي ياسهم ،

يحتك بالدنيا شوي تحت مراقبتك وان شاء الله ماعليه شر ،

[الكاسب]

((أتق شر الحليم إذا غضب))

[محمد افندي]

ولدك يناديك " بابا " و تبيه يضرب و يسوي ؟


ما خربنا الا الدلع الزاااايد و انتوا تشوفون نتائج هذا الدلع اليوم في المجمعات مع شباب في اعمار 15-20 ما تفرق بينه و بين البنت !!

خل ولدك يضرب الي يضربة و يخمسس به بعد ..

[حقيقه]

بالاول خل يتصالحون هو والمتهم < مامحبه الا بعد عداوه :p

انا اخوي كان كذا فيه ولد يضربه ويوم اشتكى عند امي وابوي راحت معاه امي ثاني يوم وكلمت الولد بهدوء ومن يومها المتهم تغير معاه وصار واحد من ربعه المقربين


وبعد لازم تخليه يختلط مع العيال اللي قريب من عمره عيال عمه وغيرهم عشان يصير اقوى ويضرب ويتعلم فنون الضرب :telephone:

والله يحفظه ويطول بعمره وتشوفه عريس

[بوحارب]

نفس بنتي وضوح تنزل تحت الصالة تتسطر تسطر من اليهال

واخر الليل وهي منسدحة تبي تنام تشتكي ليييييين ما تقول بس ههههه

[ســـهم]

كفو والله , مب معناه ياخوي انه مامد يده على الياهل انه خواف
الله يخليه له والهوشات لاحق عليها في الاعدادية :)

ايه بس مابيه يكون هادي لدرجة لاتستاغ وصيناه انه يكون عاقل ولا يغلط على أحد ويهتم

بدراسته لكن لايعني ذلك أن يكون بهذا الهدوء والطيبه ..


الله يخلية لك.........انا اختلف معاك

علمة يسامح الناس

مايحتاج اعلمه هو مسامح من الوكاله :(



ههههههههههههههههه
انت ولدك طقه ولد
انا ايش اقول ولدي جاء يشتكي ويصيح جدامي يبا يبا ها ايش فيك
اليوم ازنطتني وطقتني صالحه طق افا يالذيب تطقك بنيه قال يبه هي قويه
قلت حق ام العيال بكره نبي نشوف سالفة صالحوه ولدي توه 4 سنوات قلت في نفسي اكيد صالحوه
جثه واكبر منه ام العيال دبت فيها الحميه خذت اختها معاها رايحين حق صالحه
يبون يشوفون صرفه معاها لان هذي مو اول مره تطقه تدورن صالحه جم طلع
عمرها 3 سنوات معصقله لو علاوي طقها بس كف تروح في خرايطها
ياخوي مدري عيال هذالزمن ايش فيهم
ام العيال راحت عند صالحه ومسحت على راسها وقالت لها هذى مثل اخوش
حرام تزنطينه وتطقينه بكل براء ردت المسكينه خالتي هو جاب معاه سندويش
قلت عطني شويه ماعطاني هههههههه

هذي ايضا حصلت مع ولدي يكون معاه شبس وعصائر ولا ياكل شي منها

صاير جمعيه خيريه في المدرسه جزاه الله خير

في الأخير صرنا نزيد كمية الأكل معاه احتياطا ..:rolleyes2:

[ســـهم]

والله ان ولدك ذيبان بعدي قسم بالله الاخ جدا يهتم بمشاعر الآخرين
الله يخليه لك ويحفظه يارب بس ها لا تخليه كل مره يسترحم يعني احيانا طق وانطق نو بروبلم
والسموــحــه

تعتقد :(

مادري هل هذا المشاعر هي خوف من الطرف الآخر وتبرير

لكن هو فعلا طيب ومحترم حتى في البيت هادئ




الموضوع سهل اخي العزيز لا تنزعج

ادخله في معهد رياضي خاص با الالعاب والفنون االقتاليه ( كاراتيه ,, كنغ فو ,, تيكواندو الخ )
لتنمى عنده القدره والقوه الجسمانيه وساعتها لا تخاف عليه ان صفح او خذ حقه بيده

ومن مميزات هذه الفنون تزيد من خشونة الطفل وتزيد عنده الثقه في النفس الله يحب المسلم القوي
ولا يحب الضعيف

هلا هداف

سجلته في اكاديمية التايكوندو اللي في النصر وخذى كم حزام لكن مايستخدم اللي تعلمه

الظاهر مخبيه للزمن !

مافيه الا اعطيه دوره في البر وأخليه يصارع الحياه

[جلمود]

هذا ولدك عسى الله يبلغك فيه أن شاء الله

بيطلع راعي ذمه من قلب ويخاف الله

ولاتخاف اله من الساكت :victory:

[ســـهم]

الله يبلغك فية أنشاء الله

جزاك الله خير اخوي على هذه الدعوه ..






السلام عليكم


ياخي روعتني الله يهداك ، انا قريت العنوان وشفتك كاتب حنون !! قلت افااااااااا


المهم


المفروض تنمي فيه هالشي ( وهو العطف على الضعيف ) وولدك ماشاء الله عليه تفكيره اكبر من عمره بحيث عرف وتذكر انه يتيم وعطف عليه من هذا الباب <<< طبعا هذا اذا ماكان عذر منك لأنه خايف :)


والخوف شي طبيعي في مثل سنه


بس أن المدرس يقول أن ولدك هادي 24 ساعه وطيب زياده وحنون ومسالم !! هذي يبي لها وقفه


اول شي لازم تعلمه الخشونه وتنمي وتقوي شخصيته ، بأشياء اهمها :-

أن تؤيد رأيه حتى ولو كان خطأ .. ( وبعدين تفهمه بطريقه غير مباشره ماهو الصواب )

ان تتهاوش معاه ( يعني تقول تعال نتصارع ! او نتهاوش ! او انتهاد ! :) << يعني تضربه ويضربك وتقسو عليه حتى يقارب البكاء ، وتستثيره لأن يضربك ، واثناء ضربه لك تبين له مدى قوته وأن النصر كان حليفه :)

ان تحلق شعره بأستمرار :)

أن تبعده عن البنات <<< واكيد انت متبع هالشي بما أنه في مدرسه بروحه

أن تجعله يجلس معك في المجلس بأستمرار ( وتستمع له ، وان تطلب من الحضور الاستماع له ) اذا تكلم.


أن تأخذ برأيه بين الحين والأخر.

أن لا تطلب منه باستمرار ان يستمع للكبير ويحترمه وان لا يرد على منهو اكبر منه :) <<< لاتقول خوش تربيه .. طيعني



..

والله يحفظ اولادنا لنا ويجعلهم قادة في دينه وخدامٍ لوطنهم




إحترامي


مرحبا عبدالمحسن

انا بالطبع اشدد عليه انه يكون هادئ وعاقل في المدرسه لانه رايح يدرس مش رايح جبهة قتال

الفرق بين جيلنا والجيل الحالي ان خروجنا من المنزل كان بأستمرار وذلك لعدم توفر الالعاب

ومنها البلاي ستيشن حاليا اي ان الأطفال الآن احتكاكهم قليل بالاطفال سوى بالمدرسه

وخروجهم قليل لتوافر المسليات

عموما هو الآن مايحب البنات نهائيا واكيد راح تتغير فكرته اذا كبر :secret:

اما انه يخالف الكبير فأنا هنا اخالفك لابد أن يحترم الكبير لكي لاينقلب علي عدم الاحترام في المستقبل والاطفال مثل الصفحه البيضاء في هذه المرحله يترسخ بعقله مايؤمر به

اما العطف والحنيه لديه ماشاء الله نوزعها على بلد يعني لو يوزعها على اسرائيل

تشوفها ثاني يوم معلنه انسحابها من فلسطين المحتله :eek5:

[aljaber1]

الله يبارك فيه ويكفيه شر العيون
مانقلت الا محاسن خلق
والكل يتمنى يكون ولده متربي وصاحب قيم

[الراقيه سبشل]

ماشاء الله ربي يحفظه ويصونه

ولدك مافيه أي مشكلة بالعكس .. كافي انه فكر بعقله قبل مايتصرف أي تصرف (حكيم)

وقليل هالايام الناس الي يحسون ..

متفائله له بمستقبل واعد ان شاء الله

[حبر سري]

يعطيك العافية ياسهم

والله ياسهم بصراحة مادري شاقول لك

لان ولدك اذا كان هذا تفكيره , يعني مارد لان الولد يتيم , فبصراحة بارك الله فيه , والنعم فيه وفي تربيته , دام هاذي افكاره , لان مايطلع هالكلام الا من انسان متربي

لكن من جهة ثانية لازم يكون في شدة شوي , بكرة يمكن (لاسمح الله) يجيه واحد يمد يده عليه , وماتدري هل هو يتيم بعد او عنده ظروف ولا لا , هل راح يسكت بعد؟

هنيه السؤال

يعني انا اقول لك شغلة اذا كان الولد من النوع الجبان اصلا ( والسموحة عالكلمة) فلازم يتعود عالشدة والجرأة في الحق

اما اذا كان فعلا كان قصده انه خلى الولد علشانه يتيم ,يعني لو ماكان يتيم كان خذ حقه منه , فاقول لك كفو عليك وعلى تربيتك , اشهد انك ربيت , والله يخلي لك ماعطاك


حبر سري

[أجودية]

اخوي احسن حل تجيبون بعده ياهل حتى يحس بالغيره ...........والله يخليه ويحفظه لكم

[أم البنات]

ولدك كان عذرة أن المعتدي علية بالضرب يتيم

أنا ولدي كله يقولي (( هذا صديقي )) ما أبي أطقة

ما أن ولدي شري بالبيت بس برى البيت كلش مسالم وحنون وطيب :secret:

[حبر سري]

اخوي احسن حل تجيبون بعده ياهل حتى يحس بالغيره ...........والله يخليه ويحفظه لكم

؟
واذا حس بالغيرة؟

[الأصيلة]

عسى الله يخلي لك ولدك اخوي سهم..
اخوي اقتراحي تجيبه عندنا كم يوم يعلمه ولدي كيفية الدفاع عن النفس...
فمع انه مشهود له بالأدب الا أنه مايقدر أحد يدوس له على طرف...
والكل يستنجد به في المدرسة عشان أخذ الحق...
أنا من يوم هو صغير أوصيه يكون قوي ومايسمح لأحد يغلط عليه...وفي نفس الوقت أحببه في التسامح والعفو...
وأخذت بعض الأفكار من كتب د: الثويني حتى أحميه من ضعف الشخصية وبالذات من التحرشات ...

[omega]

ما شاء الله رجوله الاطفال

[غزلان]

الله يخليه لك ويبارك فيه ويكون من عباده الصالحين يارب

ويتم العمر كله طيب وحنون

[الحريّه]

الله يحفظه لك يارب ..


بخصوص الحميه .. ترا اليهال يومياً راح يتضاربون .. بداوم مع ولدك حفاظاً عليه مثلاً :tease:

وبعدين يمكن ولدك سواا شي استفز الولد اليتيم :secret:

او يمكن ولدك مانضرب بس متسبب عاليتيم :omg:

<<<< متسببه ع ولدك :tease:


الصج .. ولدك أخلاق ويكفي ان مارد الاساءه مو عشان مايقدر .. ولا عشانه يخاف .. لكن عشان ان الولد يتيم ..

الله يحفظه لك .. اخلاقه حلوة .. فلاتخربه :tease:

ههههههههههههههههههههههههههه ! والله انج ظريفه و ضحكتيني صج !!!:)

[The Master]

احم...يقول لك...الحب مايطلع الا على بذره...احم

يلا الواحد وش يقول غير الحمدلله على كل حال...
الا يقول لك يتيم...ياعييييييييييني...الله يعينك صراحه...

مافي الا انك تبعده عن امه او النسوان...ترا محد يخرب تربيتنا غير النسوان...يدلعون العيال...ويخرعونهم من كل شي...ومن كل الناس...ويجيك الولد احنين ولا امفهي...

فا مافي الا انك اتكثر من الدروس الخصوصيه من صوبك...وتترك امه ابعيد عنه...احم

بس اعجبتني طريقة سردك اخوي...الله ينور...
تصلح تعطي تقارير رحلات وسوالف...

لاتحاتي الولد مافي الا العافيه...اللهم علمه على الهواش...وامناقز الطوف...والسكيع في هالشموس...وبيكون في السليم...

موفق خيو...

[مدرسة]

امممممممممممم

انا رايي ان الأمر صح يرجع للتربية بس بعد شخصية الطفل لها دور كبيييييير

انا عندي ولدين العود فيهم طيوب و على نياته ... دخلناه النادي و يعرف ياخذ حقه لكن في البداية يفضل الحل السلمي:victory:

بس ولدي الصغير ما شاء الله شرس و ما يرضى على عمره..مع ان عمره 4 سنوات بس

حتى ما يرضى نصغر اسمه!!! :anger1:

كل واحد و شخصيته

عطووووووووووووه فرصة و بيصير مثل ما تبي واحسن ان شاء الله :nice:

الله يصلحه و يبلغك فيه

[الراقيه سبشل]

ذكرتني باخوي يوم كان صغير

دخل بهواش وهو الي خسر فيه

وأبوي ماعجبه الوضع .. قام دخله نادي الكراتيه

وماشاء الله شخصيته وبنيته صارو اقوى .. وانا انصح انك تدخل ولدك بهالنادي :nice:

[مزايين]

الله يحفظه ويخليه لك

لاتستعجل عليه ....ولدي أيام المدرسة النموذجية كان حتى أكله ياكله وهو جنب الطوفه ولما خلص الثانوية وهو كان بعد بمدارس خاصة ....دريت بكل هوشاته في باقي الصفوف ومقالبه حتى مع المدرسين اللي كسروا خاطري عقب مادريت بسوالفه ....واللي مادريت بها الا الحين يوم قعد يعدها علينا

[شموخ وبس]

السالفة بسيطة ولد وطق ولدك ونتهينا بس سردك للموضوع حلو وكوميدي :)

[ســـهم]

حرااام ولدك صغييير وشحلييله

بالعكس انا اجوف تفكيره صح،،، والياهل الثاني يتيم،،

ولدك مب طالع عليك شكلك شرير:( وهو طيب

خله هذي خصله طيبه فيه لا تحاول تغييرها
لكن فنفس الوقت لازم يتعلم مايكون سلبي وبس

هذا اللي ابحث عنه انه مايكون سلبي او بمعنى آخر " فوطه "

الزمن تغير او بالاصح الناس تغيرت فلابد أن يكون هناك حل وســط ..









الله يحفظو
ذكرتني بنتي نفس الشئ مسالمه وحبوبه وحنونه وهذا الشئ مخلي البنات في المدرسه يضربوها احياناً
اخذتها لاكاديميه تعلم الكاراتيه واحسها نوعاً ما شخصيتها قويت بس لما اقول ليها انتي خلاص اتعلمتي الكاراتيه وبعدين لما تفتح المدرسه لو البنات ضربوك اضربيهم تقول لي حرام ياماما اضرب الناس ( خسارة الفلوس والمشاوير على الاكاديميه هههههههههههههههههههه)

لا اعتقد ان مثل هذه الالعاب تمني لديهم حب القتال فقد قمت بتسجيل ابني مسبقا

ولكنه اتوقع انه يعتقد ان تسجيله آنذاك كان لمجرد التسليه وليس لتعلم كيفية الدفاع عن نفسه

اخاف بكره يكونون الطلاب كلهم أيتام :(






الله يخليلك ولدك ويبلغك فيه ان شاء الله

ذكرتني في طفولتي

مره في الابتدائي طقني واحد اكبر مني بصفين، عاد انا جيت عند الوالد الله يرحمه اشتكي واقوله ان فلان طقاني، والله ان الوالد عصب علي وطقني (فوق الطق اللي انطقيت في المدرسه) وقالي ان مره ثانيه وجيت تشتكي وتقول ان احد طقك ماتلوم إلا نفسك :( وخذ حقك بيدك ولا تنتظر من اي احد ان يدافع عنك

والله من يومها واللي يطقني اطقه بس عشان اثبت حق الوالد الله يرحمه اني اقدر ادافع عن نفسي ومااحتاج احد

وهذي شي فعلا علمني درس اني ماانتظر اي احد ان ياخذ لي حقي، وان انا لازم اخذ حقي بيدي


تحياتي

احمد ربك ماطحت في واحد اقوى منك ولا كان نسيت النعال الله يعزك :secret:




الله يبلغك فيه
عادي فلمدارس ضارب ومضروب , اهم شي لاتروح معه للمدرسة بدون داعي
حاول تعلمه في البيت شيقول وكيف يشتكي واسأله اذا جا وشسوى ؟ ... وتابعة احسن

انا رحت للمدرسه لان هذه الشكوى ليست الاولى وخاصة من هذا " النتفه "

ولكن عموما هم أصدقاء بعد أن زدنا كمية " الشبس " والعصير ":(

[ســـهم]

علمه ايناديك يبه اول عقب علمه اشلون يضرب


تهقى يعني هذا السبب طيب فيه اطفال يقولون يبه وهو يتسكعون في الشوراع وليس لديهم اي أحترام لأحد ..!



[QUOTE=ســـهم;6168127][CENTER]
الســلام عليكم ورحمة الله وبركاته

مرحبا بالجميع

عندي طفل في الصف الاول سجلناه في مدرسه خاصه لأجل تحاشي المعارك والغزوات في المدارس الحكوميه

ولكن يوم من الأيام قال لي " [SIZE="5"]بابا "

قلت له " لبيـــــــــــــــــــــــــــك "


:) أحييك أخوي سهم على روح المرح و الدعابة لديك ! مستوى من خفَة الدم لم أره منذ زمن ! حفظك الله لأسرتك
ولدك نعمة لازم تحمد ربك عليها ! لو كان بقربي لاحتظنته و قبلته !
إنه على خُلُقٍ كريم فعلا . أما ما يحدث بين الأطفال فهو تفسير للمثل القطري الشعبي " [COLOR="darkorange"]المواعين في البيت إتصاكك " خاصة بين الأطفال الذين في سن ولدك ! حاول أن لا تقول له خذ حقك بيدك , فهذا يحول المدرسة إلى أيام الجاهلية حيث لا قانون و لا سياسة سلوكيه! يجب أن لا يكون دور المدرسة غائبا هنا حيث تكون المسئولية على معلم الصف والمشرف الاجتماعي التعرف على اسباب قيام الطفل الآخر بالضرب . فقد يكتشفون أن هناك من يضربه في البيت و يسيء إليه , فيصبح سلوكه في المدرسة ماهو إلا رد فعل لما يحدث له و يكون هو الضحية أصلا ! أطلب من ولدك أن يذهب إلى المدير أو المشرف الاجتماعي حين يقوم أحد بضربه ...وهم يتابعون الموضوع و يحمون ولدك من الضرب
ألله يخليه لك و يبلغك فيه معرس ( أمين يا رب العالمين )

اولا جزيت خيرا على هذه الدعوات الصادقه

ثانيا المثل هذا محدود في البيت او المطبخ مواعينه معدوده

لكن مدرسه فيها اكثر من 1000 طالب تقريبا شيكفيهم ذولا راح يرجع ولدي قطع غيار هالشكل

الولد من الاولاد الخجولين مع الأغراب لذلك لايستطيع الشكوى سوى لي ولكن بعد فوات الآوان

لذلك تم توصية مربي الفصل والذي اثنى عليه بهدوئه وانتباهه للدروس وأحترامه

لكن نتمى أن يتغير في الصف الثاني بعد أن يرى أن هناك من هو أصغر منه ويستأسد عليهم:nice:


احذفه عند عيال عمه يلعب ويتهاوش وياهم بيصير عنيف شوي

بس مب اذا صار مشاغب تقولي انا السبب

محد يستحمل عيال أحد للعلم ..


الله يحفظه لك يارب ..


بخصوص الحميه .. ترا اليهال يومياً راح يتضاربون .. بداوم مع ولدك حفاظاً عليه مثلاً :tease:

وبعدين يمكن ولدك سواا شي استفز الولد اليتيم :secret:

او يمكن ولدك مانضرب بس متسبب عاليتيم :omg:

<<<< متسببه ع ولدك :tease:


الصج .. ولدك أخلاق ويكفي ان مارد الاساءه مو عشان مايقدر .. ولا عشانه يخاف .. لكن عشان ان الولد يتيم ..

الله يحفظه لك .. اخلاقه حلوة .. فلاتخربه :tease:

لا انا متأكد انه ماغلط مع اعترف المتهم " النتفه " الله يهديه ..


نفس الشيء بنتي كل يوم معانده ماتبي اتروح الروضة اتقول كل اطقها وحده هناك وفي مجلس الامهات قلت حق مدرستها ليش هذي البنية كل اطق بنتي ؟ردت علي بنتج ماشاء الله عليها تاخذ حقها بنفسها والبنت اللي اتكلمين عنها نتفه اصغر وحده في الروضه ويوم سألت بنتي عنها قالت لي ايه صغيره وايد وبسرعة تنخش ورى الابله مااقدر اطقها اخاف اطق الابله بالغلط

هههههههههه

ماشاء الله الاطفال عندهم موسوعه من الأعذار الله يصلحهم ..

[موضي قطر]

صدقني اخوي سهم هو بتغير غصب ولا طيب من كثر ( الهدود بين الشباب )

الله يحفظه

[ذوق]

أخوي احنا مسلمين لكن للأسف معظم اخلاقنا غير اسلاميه ، ولا من نهج الرسول

تبي نصيحة اختك ولا عليك من الردود السطحيــه ـ لو تكلف على نفسك وتضغط عليها وتاخذلك سي دي الأطفال المزعجون وسي دي اخر بعنوان المربي الأيجابي من مكتبة جرير أو من اي مكتبه اخرى للدكتور مصطفى ابو سعد وصدقني انك راح تشكرني على نصيحتي .. وراح تختصر عليك وااااااجد أمور

وتقدر تدش هذا الرابــط تلقي عليه نظره

http://forum.amrkhaled.net/showthread.php?t=201267

والله يوفقك فيما تحبـه وترضـاه

أختك

ذوق

[ســـهم]

بعدها قام المدرس بسؤال المتهم عن السبب والذي استدعاه عن ضرب ابني بصوت عالي


حسبي الله ونعم الوكيل على المدرس /// يعني عشان انت حضرت للمدرسة لان ولدك انطق يصرخ على الولد /// هذا ليس حل افرض ان هذا ولدك والمدرس رفع صوته عليه جدام الطلاب وولي امر طالب ما ....... حسبي الله ونعم الوكيل ....

اذا غلط ولدي يحق للمدرس ان يضربه فهو والده في المدرسه وسأرضى لأنه في صلاح ابني

وتربيته

مايقولون " قف للمعلم وفه التبجيلا كاد المعلم أن يكون رسولا "

لو لا :)



بالعكس اخوي سهم هذا شي طيب في ولدك خلقه عالي فلا تغير هذي الخصله فيه
وهذا ما يدل على ضعف الشخص وانما التربيه اللي تربا عليه لا تسمح له ان يئ لا احد

الله يبارك لك فيه وفي اخوانه امين

وحبه على راسه قل من عمك محمد


ياهلا بك يابوجاسم وجزاك الله خير على هذه الدعوه الطيبه بارك الله فيك ..




حبيـــــــــــته
والله انه كفو الله يبارك لك فيه

جيبه عند ولدنا بيعلمه شلون ياخذ حقه بدون ضرب ومضارب

ليش فاتحين صالة كاراتيه عندكم

أمحق :rolleyes2:


عادي يا سهم أنا صف اول كنت الوحي اللي أنضرب فالصف :(

ولما وصلت صف الخامس صرت الوحيد اللي اضرب


خله مثل ماهو
من نفسه يغير شخصيته


انت فرطت يمكن ماصادتك عاهه هههههههههههههه

لكن ليش تأخرت لين الصف الخامس :secret:

تسلم ويعطيك العافيه مضارب ..

[بو الطيب]

ذكرتني ايام الابتدائيه ههههههههههه ياما انضربنا وياما ضربنا

اذكر واحد اسمه النوبي مسوي نفسه البطل في ثالث ابتدائي ان ماخاب ضني ومسندرنا في المدرسه

ومهب مخلي حد في حاله مهب مخلي حد الا واضربه والله وذاك اليوم صارت هده بين صفنا وصفه المهم عاد الحبيب طاح في يدي والله بالحديده شلخت له راسه ههههههههه من عقبها يشوفني من بعيد ويباعد عني وكان ملعوزني وانا ساكت عنه بس عقبها صار يمشي سيده
والله اذكر في الابتدائي في الاسبوع لزوم الهواش مرتين في الاسبوع

[ســـهم]

أهم شئ يا جماعة إنا نتابع أبنائنا ونسمع منهم ترى الابناء في هذه المرحلة يبالغون كثيرا
مره جاء ولدي الله يحفظه وقالي انه دائما ينضرب في الصف وعند الاستفسار من المدرسة حصلته الله يحفظه ( مكفخ نص الصف ) ولاننسى دائماً الدعاء لأبنائنا بالهداية

هههههههههههههه

لا بالنسبه لي ولدي منضبط وقايل له ترى الدوله فيها مراكز شرطه من عمره شهرين

يعني طلع نظامي زياده عن اللزوم :victory:


سهم بصراحه ولدك تفكيره عقلاني حتى لو بهالكبر....
يعني عطاك تحليل انت مادخل عقلك
اهو يوم ضربه ناداك وفكر انه انا اذا طقيته ابوه يتيم يعني اكيد فكره ابوه يتيم شلون انا اذا طقيته بيقول حق من
ولدك ماشالله يفكر بالامور ويوزنها قبل كل شي حتى لو بهالعمر

انا عندي ماحب اذا ولدي انضرب يضرب لا جي باعلمه على الضرب في كللل شي

هالشكل بقعد كل يوم رايح جاي المدرسه وكأنني في الصفا والمروى :(

لازم يعتمد على نفسه ويقول لي شسوى من ضربه وشلون تصرف

لكن هو يقول لي من ضربه بس بدون تصرف والمشكله انه مايبكي حتى لو كان الضرب مبرح

عنيد ..



كيوت .. خله لا تغيير فيه شي

امحق كيوووت <<< الا وشو كيوت :shy:




انا عن ولدي حبيبي اذا ماقدر على ولد اختي وذاك نتتتتتفه لو تشوفونه جنبه وولدي ماشالله رايح في طول هذاك يقدر عليه ويجيني يقولي اقوله عيب مايطقني خخخخخ هذاك يجدم ريله بس يخاف هههه
مسوي رعب ولين هاوشته يصيح كنه فيه عرج هنود على طول الدموع اربع اربع

ذكرني بالممثله عبله كامل :weeping:




ههههههههههههه ذكرتني بولدي

عندي ولدين واحد كان هااااادي وخجول والحين تعال شوفه

والثاني ضرب مضارب مع خلق الله حتى عمامه

مره دخلت بيت جدته اشوفه واقف على كرسي ويصيح ويضرب عمه اللي اكبر منه ذاك يبي يبعده

عنه مب قادر من عصبيه ولدي لو تشوف شكله بتضحك عليه اهم شي انه ياخذ حقه مايسكت عن حقه

خل العيال يكونون شخصيتهم بنفسهم بس بتوجيه منك يعني علمه يدافع عن نفسه

ولكن في نفس الوقت لا تقتل فيه روح التعاطف


والله يبلغك فيه يارب


جزاج الله خير

والحمدلله عطيتوني امل انه ممكن أن يتغير قريبا ولكن فاقد الشي لايعطيه

يعني انا اعرف اكثر انا ولدي ماخليته يختلط مع احد اللهم معاي ومع المقربين والمقربين جدا
جدا ..

شكرا لك .

[مضارب دوسري]

انت فرطت يمكن ماصادتك عاهه هههههههههههههه

لكن ليش تأخرت لين الصف الخامس :secret:

تسلم ويعطيك العافيه مضارب ..[/QUOTE]


لا بس خبرك كثر الدق يفك اللحام :telephone:

كنت أخاف لان كل الصف عيال عم وانا ضائع بينهم :(
قلت يا ولد من يوم ورايح قوي قلبك
:shy:
وكثرت من الديو وصار القلب حديد

شرب ولدك كل يوم قوطيين ديو :telephone:

[ســـهم]

انا صراحه ما احب الطفل العاقل :rolleyes2: لاحق على العقل والركادة

قلل من تدخلاتك شوي وخله يتصادم مع العيال بروحه .. بس ركب له صدام صب :tease:

وهالشي مب معناته انك تهمل الولد .. لا بالعكس راقبه وانتبه عليه لكن لا تحسسه انك موجود معاه على طول


اوكي ياعيوني ؟

اخوك اريبيان الدريع :cool:

انا ماتدخل نهائيا وماروح المدرسه بأستمرار وبخصوص الصدام مانعينه يقولون !

الله يعافيك عيوني متى حزت الحلقات وهل مازالت على الرآي :)



الله يخليلك ولدك ويبلغك فيه ان شاء الله


ونعم التربية


بالعكس أخي العزيز هذا ولد صالح وأخلاقه عالية جداااا

الله يوفقه في حياته العلمية والعملية

لا تغير سلوكه .... خذ الولد معاك الى الصلوات وحفظه كتاب الله ولا تقول ولدي صغير توه على الصلاة ....


حتى صلاة الفجر ....

عندي ثلاث صبيان
5سنوات
4سنوات ونص
9 شهور

الولدين بو خمس سنين وبوأربع آخذهم معاي الى الصلوات وحتى صلاة الفجر لتعويدهم فقط على الصلاة ...

والحمد الله أبو خمس سنوات يحفظ عشرة أجزاء من القرآن والصغير أربع أجزاء الى الآن ...

ربي يحفظ لك ولدك يا رب

الله يخليك لك عيالك ياسوق واقف

بالنسبه له الحمدلله في مدرسة الفرقان وهي دينيه ويحفظ من القرآن مايحفظه

والمدرسه ممتازه عندما يؤذن يذهبون المدرسين بالطلبه للمسيد يوميا

بالنسبه لهذه الشي احمدالله انه ممتاز ولكن يعيبه الخجل مع انها صفه محموده

ولكن في هذا العصر ربما يتم أستغلال خجله عسى الله يهديه ويجعله من الذريه الصالحه .



والله رائي ان ابنك على حسن خلق بس يبلغيك توديه يلعب رياضية مثل رياضية الكراتيه بس علشان يقوي جسده والله تراه رياضية جداا ممتازة تعلم الطفل الاحترام والاعتماد على النفس وتعطيه الثقة في نفسه حتى لما يتكلم بس اهم شيء توديه عند مدربين يا كوريين او صينييين والافضل الصيينين وكن دائمآ قريب منه تابعه وبعدين ممكن راح تشوف الفرق حتى في كلامه ( بيتكلم بثقه معاك ويكون الاحترام للناس هو مبداء ه ) ولا تنسى نصيب القران وحفظه ووفقك الله وهذا رائي والله تعالى اعلى واعلم

عنده أحزمه تايكوندو تبي تلعب معه :nice:

بس مثل ماقلت مسبقا يعتبرها تسليه فقط ولا يستخدمها خوفا على احاسيس الايتام

جزاه الله خير جمعيه خيريه :(


الله يبارك لك فيه والتعم والله

ماعليك زود اخوي .


السلام عليكم


والله ياسهم انا فهمت موضوعك بطريقه شوي مختلفه . كلمه تستحي منها بدها .. الي فهمته من كلامك انك خايف او ماتبي ولدك يطلع حنين (بدلت الكلمه الف مره)

لي ملاحظه على الاطفال الي في السن هذا .. حنينيين جدا جدا و السبب هو من ولادتهم الى دخولهم المدرسه بيتوتيين ,, اشبهم سابقا بالبنات على ايامنا .. كنا احنا نشطح و مانخلي طوفه ولا حوش مانشقحه و البنات في البيت و حدهم باب الحوش و مع امهاتهم . و العذر على التشبيه .

بحكم انه ماعندي عيال حاليا .. عندي عيال اخوي و هم في هالعمر تقريبا و صارت كذا مره مواقف في المرسه مع طلبه و للاسف مع مدرسات . العيال في هالجيل مش حمشين .
الكبير غانم الله يحفظه .. انردغ ردغ لين الله شاف له من طالب و الطالب جاب اخوه و خمسوبه و طلعت عمت الطالب مدرسه بنفس المدرسه و موضوع طويل يقهر .
بصراحه و عيب علي اقول هالشي .. هو تكتم على الموضوع من الخوف الي سببوه له لا من الي ضربوه ولا من عمت الطلاب (المدرسه) ثاني يوم وهم موصلينه المدرسه يوم قريب ينزل من السياره انفجر من البكا و قال مابي انزل .. انا يوم سمعت السالفه طبخت من قمه راسي
و اتصلت فيه لاني كنت في العمل و قلت له اطلع عنهم بعيد .. ابي منك شي و انا عمك ابيك تسويه .. قالي وشو قلت ابي الولد الي طقك اول ماتدخل المدرسه تروح له ركيض و تضربه لين الله يشوف له .. حتى لو انه اقوى منك و ضربك ولكن اضرب قد ماتقدر ترى مب عيب تنظرب الله خلقه اقوى منك بس ما ارضى انك تنظرب و تسكت . يوم قلت له هالكلام ارتاح و حس بالثقه
و مابي اطول بس الموضوع وصل اعتقد المجلس الاعلى او شي من هذا القبيل
الظلم شين و عيال هاليومين الاهتمام الزايد فيهم خطر كبير .

و الحل الاكيد انك تاخذ عيالك ويك (الذكور) في اي مكان تروح له قدر الامكان

و السموحه على الاطاله و لحد يعقب على مشارتي اكيد كثير بيعارضوني :rolleyes2:


لالا لا

ياهذلان مش هذا المقصــود فديت خشتك :eek5:

انت أغلب كلامك صادق احنا ماكنا نعرف بلاي ستيشن ولا العاب مثلهم ولم تتوفر لنا في الأصل

لذلك كانت طلعاتنا كثيره وكنا نلعب في ملاعب حصى مكشوفه للجميع في مناطقنا

ونروح مع آابائنا للمجالس نتعلم بطريقة غير مباشره بالاضافه الى التوصيات الحاده

والتي يكون معها تهديد ووعيد :weeping:

لكن الجيل الحالي يختلف كليا بحيث ان مايريده خارج المنزل اتاه بالداخل وتوفر له

لذلك لاحاجة له بالخروج ومخالطة المجتمع وتعلم كيفية التعايش ...

[ســـهم]

أخوي سهم اول شي الله يخليك لك ولدك ويحفظه لك من كل شر ..
ثاني شي علمه ان الحنان واللطف بالايتام يكون بكل شي الا كرامته محد يمسها .. فهمه انه ممكن يساعده وممكن يعامله معامله طيبه وومكن يوقف معاه بالحلوه والمره بس مايسمح لحد يهينه او يمس كرامته يعني يصادقه ويحبه ويعطف عليه ويكون كريم وياه ويحسن اليه ..
جزاج الله خير

ايه صحيح ممكن يقولون له مدارس الدوحه كلها تحولت الى مدارس أيتام
يعني لازم اموت انا بعد علشان يحنون على ولدي !!!

لا هالكلام ماينفع بما انني علمت ولدي مايغلط على أحد المفروض أن الناس ايضا

يعلمون عيالهم .


الله يخليه ك ووديه كاراتيه ولا جودو علشان يكون اقوى



شكرا لك وقد تم الرد على أحد المشاركات المشابهه لردج أختي .


الاخلاق يتبعها الاحترام

والاحترام للمدرس يتبعه الانتباه في الفصل

والنتيجه هي التفوق الدراسي في المراحل الحياتيه والعملية

أنا كنت امشي مع الساس وانا صغير

والكل كان يستقوي عليه

وكنت من الاوائل دوووم

وفي الثانوية بديت باللعانه والشطانه والضرب والمضارب وماخليت حد في حاله حتى لو ولد من يكون

والنتيجة كانت هبوط مستواي الدراسي وعدم التركيز ولا احترام المدرسين والفرعنة اللي مالها لزوم

وبالدز .. خلصت الثانوية

اليوم .. انا نادم على اني تفرعنت وخذت حقي من الناس اللي معاي

لان في النهاية

أطفال ومراهقين .. يعني , نكبر وننسى

خل الولد على حاله واهم شي الاخلاق , الصلاة واحترام الوالدين والكبير والعطف على الصغير

اما الفرعنة ... مالها اي داعي


طبعاً في حالات شاذة عن المثال اللي ذكرته عن نفسي

وربي يحفظ ولدك ويخليه بار في والديه وذخر لك ان شاء الله

ويحفظك وييسر دربك يا سهم

والسموحه عالإطالة

:)

صدقت اخوي

انا بعد من وجهة نظري ان الطفل الشيطان او الشقي هذا حده أول أعدادي ويبدء مع

المالبورو حياته وسنتين الا هو مشطوب من المدرسه

" وهوبا " على الشرطه او الجيش ومن اول معاش في هالمجمعات وهدد وبوالين وهيدرز

الله يهديهم ويهدي عيالنا ويجلعهم ذخرا لاوطانهم

مشكور اخوي

[meme~qatar]

الله يعينك

عيالنا مرة مطقوقين ومرة مجرمين

عطه فرصة وخله يصادق النتفة وكثر من الشبس والعصير والسندويج

وعقبه قوله قل لي من صديقك اقل لك من انت

الله يحفظه من شر الايتام يارب

[قناص الخليج]

التدليل الزائد هي المشكله الى نعاني منها

الرغبات مجابه وكل شيء سمعا وطاعه

يمكن لازم تدمجه مع العيال الى في سنه

يعني خله يحتك فيهم ضرب ومضارب

الله يحفظه لك ويطرح فيه البركة

[هند88]

حلوه لا يكاد يرى الا بالمجهر :p

انا اقول حق بنتي لاتظربين حد
بس الي يظربج ظربيه ولا تسكتين عن حقج :omen2:

الله يحفظلك ولدك يارب :)

[Al-Enazi]

مرحبا أخوي سهم

اللي سواه ولدك عين الصواب وأنت مفروض كنت تشجعه عاللي سواه اذا كان الطفل فعلاً يتيم:nice:

واذا تبي تقوي شخصيته من اللحين أول شي تسويه لاتخليه فالبيت عند الماما أخذه وياك دايم

لارحت عند الربع المجلس أخذه وياك وخله يسلم عليهم يمكن فالبدايه تكون صعبه عليه لكن مع الوقت تحصله يتجرء

سولف معاه قدامهم عطه أهميه,

كلفه دايم بمهام خله يساعدك ويعتمد على نفسه وزرع فيه الثقه

أمدحه قدام ربعه أو اذا أنجز شي جبله هديه:victory:

لارحت السوق بغيت أتشراله خله هو يختار اللي يبي ويعجبه كانه ملابس او غيره.

لاتاخذله كل مايرغب وتعوده على هالشي بس مره اوكي ومره ماعندي فلوس حتى لو كان عندك خله يحس ان الفلوس ماتجي بالساهل

كثر زياراتك للمدرسه وأسأل عنه وخله يثق أنك معاه دايم:telephone:

خلك الاب المثالي فالابن يقلدك في كل شي وخاصه اذا كنت (مدخن) تحمل تشرب زقاير قدامه

المشاكل الاسريه دايم بعيد عنهم

هذا وصلى الله على سيدنا محمد

والسلام عليكم ورحمة الله وبركاته

[OTOsan]

ياحبكم لتقليب المواجع ------> انضرب مره وهو في الابتدائي :(


انا اؤيد الاراء التي ترى ابقاء الحال على ماهو عليه مؤقتا، لانني اعتقد ان دخول الطفل للمدرسة يضعه في موقع بناء شخصيته بنفسه ولكن هذا لايمنع زرع الثقة في النفس لدى الطفل من خلال الاسرة ..

اما بالنسبة لحالة ولدك الله يحفظه ويخليه لك اخوي سهم ، فهي باعتقادي باعث على التفاؤل كونه نظر الى المسألة من ناحية انسانية بحته .. بس خله يتهاوش مع واحد مب يتيم وبعدين تقدر تحدد ان كان قابل (للتهاوش) من عدمه :)

[منصوربن حمد]

لازم يتعلم الرد من الصغر حتى لايصبح جبان