تعبت من التفكير وبغيت مشورتكم .. ( بداية الحياه الزوجيه ) [الأرشيف]

bu 3li

29-07-2010, 01:23 PM

السلام عليكم ورحمة الله وبركاته ..

اخواني وخواتي .. صار لي فتره افكر في بداية الحياه الزوجيه واشلون ممكن ابدا هـ الحياه
طبعاً انا كـ شاب اعزب وارتبطت .. لازم اغير وايد اشياء من حياتي السابقه وفي نفس الوقت بيكون فيه تنازلات عشان الحياه الجديده .. ونفس الشي عند البنت اللي ارتبطت فيها بتضطر انها تتخلى عن حياتها الاوليه وتبدا حياه جديده تشاركني فيها كل شي ..

لكن اللي محيرني ومتعبني هو ( الحياه السابقه والشي اللي تعودته من الايام اللي عشتها )

الحين لين سويت شي او قررت اسوي شي القى عدم رضى من الطرف الثاني مع اني اشوفه شي عادي ونفس الحاله من صوبها لين جات تسوي شي ولقت عدم رضى من صوبي ..
الواحد صار يتساهل ويقول معليه ( مابي اكون جاف او نكدي واحنا فـ ايام خطوبه ) لكن سرعان ماتحول هـ الشي لـ طبع .. يعني بامد البوز وبيرضى لكن الرضى يجي بعدم قناعه

فـ صار كل شي فيه شد وزعل ..
( والمعروف انه اذا طرف شد الثاني يرخي عشان مايكبر الموضوع ويتحول لـ مشكله )

ومع ذلك تستمر المشادات من الطرفين وحتى اثناء النقاش .. فـ بغيت رايكم في هـ الشي ..
اشلون ابدا حياتي واكون بعيد عن المشادات ذي والتوتر واعيش حياه مرتاحه ترضي الطرفين؟

واحد ثقة

29-07-2010, 01:36 PM

سأختصر لك يا أخي الكريم فأنا لست بمختص ،،

أهم عامل من عوامل التآلف هو الترفع عن صغائر الأمور وعدم إعطاء أي سوء فهم أكبر من حجمه الذي يستحقه ،،

ولابد للوصول إلى هذا من بعض التنازلات ، وصدقني سترى كيف تتسهّل العقبات وتسير الحياة بسهولة ويُسر وتفاهم ،،

ولاداعي للخوف من التغيير لأنه ليس هنالك تغيير بالمعنى الحقيقي للتغيير ، بل مجرد تعديلات بسيط جداً على المواعيد وأوقات الخروج والدخول ، فأنت في السابق أعزب ومسؤوليتك في الغالب لاتتعدى شخصك الكريم ، أما الآن فهنالك من يقلق عليك وينتظرك على أحر من الجمر ،،

أسأل الله أن يبارك لكما ويبارك عليكما ويجمع بينكما في خير ،،

kooool

29-07-2010, 01:37 PM

الصراحة والاتفاق

ابو محمد7

29-07-2010, 01:42 PM

الحوار والنقاش الهاديء وباسلوب متزن مناسب هو حل لجميع المشاكل

ما اعتقد بعد الزواج لازم تغير حياتك او تتخلى عن انشطتك !

المطلوب فقط انك تنظم وقتك و تخصص وقت كافي حق زوجتك وعيالك تقضي حاجاتهم ومشاويرهم وتطلعهم تمشيهم يعني ترفه عنهم شوي

اكثر المتزوجين ممكن يروح مجلس الربع مرة او مرتين بالاسبوع بس مب يوميا طبعا ويلعب رياضة ويروح البحر والبر

وبعض المتزوجين ماشاء الله غير عملهم تلاقيه يشتغل في مشروع تربوي او عمل دعوي او تطوع وغيره

من الاخطاء من وجهة نظري ان الواحد فترة الخطوبة يتصنع بزيادة ويدلع بزيادة وكل شي يقول اي اي اي وهو مب مقتنع !

فترة الخطوبة (الملجة) اصلا تكون علشان التفاهم ورسم الخطوط العريضة

في كتب وفيديوات ممكن تشوفونها مع بعض مفيدة جدا حق اشخاص مثل د. جاسم المطوع وغيرهم من المتخصصين

شوف المشهد اللي تحت يمكن يفيدك

واولا واخيرا الاسلوب هو الاساس والتضحية شي ضروري في الزواج

http://www.************/watch?v=tGrpcRmt5ao&feature=player_embedded

عزووز قطر

29-07-2010, 01:47 PM

سن الزوجة يلعب دور كبيييير
وطريفة تفكيرها

الراقيه سبشل

29-07-2010, 01:54 PM

اذا تصرف منك ماعجبها او تصرف منها ماعجبك تقدرون تتناقشون وتتفاهمون الين ماتوصلون لحل

مد البوز بعدين تراضون بعض رح يترك اثر بقلب الطرف الثاني لانه مب مقتنع ..

النقاش والحوار ممكن يقنع الطرفين بوجهة نظر وحده ومتفق عليها

وبعد هي ممكن تعرف سبب رفضك لتصرف وانت نفس الشي بالنسبة لها:victory:

والامور البسيطة غض النظر عنها .. وخلي تركيزك على الامور الحلوة بحياتكم والمفرحه:shy:

ولاتنسى احيانا الزعلات الصغيرة هي ملح الحياة .. يعني اذا هي زعلت تبي تشوف خطيبها شلون بيراضيها:nice:

والله يوفقك ويسعدك بحياتك الجديده وتكون خير عليك وعليها:)

بوحارب

29-07-2010, 02:02 PM

سو نفسي

خل حياتك بعد الزواج مثل حياتك قبل الزواج

بس سو توازن بين جدولك وجدول

وخل عنك الرسمية الزايدة مع الأهل وعاملها كأخت او صديقة !

والله يهنيك في حياتك

مجرد وجهة نظر وعن تجربة

باسكن روبنز

29-07-2010, 02:45 PM

:)

متابع و راجع ،

bu 3li

29-07-2010, 02:59 PM

الراقيه سبشل

29-07-2010, 11:54 PM

جزاكم الله خير جميعاً على ردودكم الطيبه ..

بس فيه نقطه اللي هي ( التنازل والتساهل ) بحكم ان كل شخص فينا من بيئه ثانيه او خل اقول طبايعنا غير واللي تعودنا عليه غير عن بعض .. مثلاً فيه امور احنا متشددين فيها وهم متساهلين فيها ..

اهني صعب القى حل يرضي الطرفين مع العلم ان الواحد يحاول مايرفض شي ويتقبل الامور لكن نجي على شغلات الواحد متربي ومتعود انها تكون بطريقه معينه ولو بررها بيكون تبريره ماله معنى للطرف الثاني لانه الطرف الثاني تربى وتعلم على الشي اللي هو قاعد يسويه !!!

فهمت عليك ..

بهالحاله المفروض التنازل يكون منك .. لان من الصعب تغيير شي تربت هي عليه مدة تقريبا 20 سنة "لنفرض عمر الزوجه"

المفروض تحط في بالك انها قاعدة تتبع شي هي تربت عليه وهو مو غلط ولا حرام .. لكنه مجرد تصرف انت ماعتدت عليه !

وتعتبره شي جديد على حياتك .. خلينا نقول نمط حياة جديد وغريب انت تستكشفه من بيئة شريك حياتك وعمرك .. واستكشافه في كثير من الاحيان شي ممتع وعميق

بس الاكيد انه مع الوقت بتصير تتبع تصرفاتك من نفسها عشان ترضيك بدون طلب مباشر منك:victory:

وهالاشياء كلها مابيصير لها جانب من الاهتمام بحياتك لما تدخل الحياة الزوجيه .. لانه بيكون عندك شغلات تستحق الاهتمام اكثر:nice:

bu 3li

31-07-2010, 12:56 AM

فهمت عليك ..

بهالحاله المفروض التنازل يكون منك .. لان من الصعب تغيير شي تربت هي عليه مدة تقريبا 20 سنة "لنفرض عمر الزوجه"

المفروض تحط في بالك انها قاعدة تتبع شي هي تربت عليه وهو مو غلط ولا حرام .. لكنه مجرد تصرف انت ماعتدت عليه !

وتعتبره شي جديد على حياتك .. خلينا نقول نمط حياة جديد وغريب انت تستكشفه من بيئة شريك حياتك وعمرك .. واستكشافه في كثير من الاحيان شي ممتع وعميق

بس الاكيد انه مع الوقت بتصير تتبع تصرفاتك من نفسها عشان ترضيك بدون طلب مباشر منك:victory:

وهالاشياء كلها مابيصير لها جانب من الاهتمام بحياتك لما تدخل الحياة الزوجيه .. لانه بيكون عندك شغلات تستحق الاهتمام اكثر:nice:

خل اوقف على كلامج يوم قلتي " المفروض التنازل يكون منك "
انا اخبر المره تتبع ريلها ( لو كان على حق ) وهي تدري انه على حق

خل نضرب مثال فـ التغطي .. لو البنت ماتعودت تتغطى وهو يبيها تغطي وييها
مع العلم انها ماتحط ميك اب .. مب المفروض تسمع كلامه وتطاوعه في هـ الشي
ولا يتنازل ويخليها على اللي هي تربت وتعودت عليه ؟؟

الراقيه سبشل

31-07-2010, 01:09 AM

خل اوقف على كلامج يوم قلتي " المفروض التنازل يكون منك "
انا اخبر المره تتبع ريلها ( لو كان على حق ) وهي تدري انه على حق

خل نضرب مثال فـ التغطي .. لو البنت ماتعودت تتغطى وهو يبيها تغطي وييها
مع العلم انها ماتحط ميك اب .. مب المفروض تسمع كلامه وتطاوعه في هـ الشي
ولا يتنازل ويخليها على اللي هي تربت وتعودت عليه ؟؟

بس بعد انا قلت " الاكيد انه مع الوقت بتصير تتبع تصرفاتك من نفسها"

وبعد المفروض انت ترخي بهالامور وتتكلم معاها على اساس انها تسويها وتهيئ نفسها لها لكن بعد الزواج..

وبالنسبة للتغطي .. انا خالي نفس الحالة .. وهو قال انه بيخليها فترة الخطوبة على راحتها (لانها فترة المفروض الخطاب يستانسون فيها)
لكن بعد الزواج بتتغطى..
والحين هم تزوجو والبنت تغطت :)

ANONYMOUS

31-07-2010, 01:23 AM

جا على بالي كليب يوم كتب على الصخره

سالم

لاتصالح

:p

اخوي مادري انت تستشير وتوك ماتملكت.. ولا خاطب مادري مالج اوريدي

rashid-1

31-07-2010, 01:27 AM

نمـر

31-07-2010, 01:36 AM

خصص وقت لزوجتك مثل تطلعون تتعشون ثرا الحريم يستضيقون من قعده البيت وما راح تشوف المشاكل وإذا تصرفت أو ما عجبك شي صارحها ولا تتراجع عنه وهي راح تقتنع فيه وتقبل والله يوفقك في حياتك ويبعد عنك المشاكل

(الفيصل)

31-07-2010, 01:39 AM

السلام عليكم

عشان تنجح بحياتك الزوجية لازم تصير شوي لوتي

والشي الثاني لاتشد معاها ولاتدخل معاها بمواجهه وجه بوجه

خلك مرن سهل وبنفس الوقت جامد

ليش أغلب المتزوجين عندهم مشاكل لأن كل طرف يبغي يكسر الثاني

لكن لو تجي حق زوجتك بأسلوب اللواتة وتدري هي بقرارة نفسها أنك كذاب راح تمشي معاك بس أهم شي ماتكسرها

وشكرا

ياحلو توقيعك
(ولا تمش في الأرض مرحا إنك لن تخرق الأرض ولن تبلغ الجبال طولا )
سبحان الله !!

لأخونا السائل
لم يترك غالبية الاخوان شيء لنقوله جزاهم الله خيرا
وعليك بإتباع نصيحة الاخ (واحد ثقة) من غير قصور بباقي الأخوان

ولتعلم بأن أول سنه زواج (ليست مستقره)
فهي كالاختبار سوف يتنازل أحد عن رأيه
وسوف يفرض الاخر رأيه
حتى ترسوا السفينه بإذن الله على قبطان واحد مع مساعد وجوده مهم:)
والله من وراء القصد

ذوق

31-07-2010, 01:43 AM

أخوي افضل حل من وجهة نظري انك ماتاخذ راي الناس العادين بل اخذ راي الأشخاص المختصين ، ونصيحه انك تثقف نفسك في الأمور الزوجيـه اكثر - وهناك الكثير من السي ديهات والمحاضرات التي تختص في هذه الأمور ولكن اعقد النيه واضغط على نفسك اكثـر وابحث ومن افضل الدكاتره المختصين في هذه المجالات الدكتور الأماراتي احمد النجار وعندك جاسم المطوع والدرويش بصراحه ناس مذهلين في السرد والجذب بالأسلوب
ونصيحه مهمه انك لازم تتصل على مركز الأستشارات الأسريه وتسألهم عن موعد دوره المقبلين على الزواج وربي ان هذه الدوره خذها اخوي واختي مع ازواجهم قبل لا يتزوجون ويشكرون الله ليل ونهار ان دلهم على هذه الدوره المتكامله والي مدتها اسبوع - يقولون فعلآ انهم دخلوا بقلب مرتــاح لأن تغيرت شخصيتهم وافكارهم وقناعتهم بعد هذه الدوره والتي تتكلم عن جميع الجوانب النفسيه والأجتماعيه والشخصيه والجنسيه والماليه والخ ,,, وانت الي عليك تسعى وربي بيسعى معاك

ومانبي غير الدعوات الصادقه

bu 3li

31-07-2010, 08:57 PM

جزاكم الله خير جميعاً والله اسعدني مروركم
والواحد يحتاج يسمع من الناس وخبراتهم بحكم حياتهم اليوميه واللي شافوه في بداية زواجهم
صحيح ان مب كل اثنين بيمر عليهم نفس اللي مر على غيرهم لكن سبحان الله يمكن اشياء غفلنا عنها وغيرنا نبهنا عليها ..

واخوي اللي سأل اذا مالج ولا لي الحين .. شي طبيعي باكون قريب من بداية حياه زوجيه مع شريكة حياتي وهاي اللي خلاني اسأل " اشلون ابدا هـ الحياه " .. والله يوفق الجميع ان شاء الله

missperfect

31-07-2010, 09:24 PM

استخير عدل قبل لتختار الشريكه وتوكل وربي يوفقك ويهنيك ولاتسمع كلام حد لأنك انت والزوجه الي بتختارها اعلم بحالكم فلاتعطي الموضوع اكبر من حجمه وضيع وقتك بشي مايستاهل وعادي كل البيوت تصير بها مشاكل واختلاف بالاراا والاطباع حتي لو ماخذ بنت عمك واول خمس سنين زواج تصير بها وايد اشياا يمكن ماتسرك بس عادي مش الامور وخل السفينه تمشي مثل مايقولون ولاتخلي اي حد يتدخل بينكم ولازم تفهمها من البدايه علي اطباعك ووشلي تبيه وتوكل علي الله ولا تفكر وايد والله يوفقك بزوجه صالحه تناسبك وربي يجمع بينكم علي خير ويرزقكم بالذريه الصالحه يارب

..الاميرة..

31-07-2010, 09:58 PM

اخوي خذ الامور ببساطه والامور ان شاء الله بتمشي يعني لاتصعبها وهي سهله ..

والاهم عدم فرض الرأي كأمر ويجب تنفيذه دائماً في اي موضوع تبيه منها خذها باللين والسياسه والكلام الطيب الي يسر ترى له مفعول ..

وربي يوفقك ويهدي سركم ..

السلام عليكم

عشان تنجح بحياتك الزوجية لازم تصير شوي لوتي

والشي الثاني لاتشد معاها ولاتدخل معاها بمواجهه وجه بوجه

خلك مرن سهل وبنفس الوقت جامد

ليش أغلب المتزوجين عندهم مشاكل لأن كل طرف يبغي يكسر الثاني

لكن لو تجي حق زوجتك بأسلوب اللواتة وتدري هي بقرارة نفسها أنك كذاب راح تمشي معاك بس أهم شي ماتكسرها

وشكرا

:nono:

ANONYMOUS

31-07-2010, 10:42 PM

جا على بالي كليب يوم كتب على الصخره

سالم

لاتصالح

:p

اخوي مادري انت تستشير وتوك ماتملكت.. ولا خاطب مادري مالج اوريدي

اخوي مارديت على سؤالي..

المهم..

لو توك بعيد ماتملكت.... حط رجلك..

لاتضيع وقتك ومخك بالتفكير وجهدك وشبابك... :p

اما لو تملكت خلاص..

اعمل بنصيحة اخوانا الاعضاء

وموفق انشالله