من مضيع فلاش ميموري في مطعم تشيليز؟؟ [الأرشيف]

لـبـيـه

31-07-2010, 10:25 PM

السلام عليكم ورحمة الله وبركاته

كنت اتعشى مع الاهل البارحه واهلي لقو فلاش ميموري طايح تحت الطاوله
وكنت بسلمه لادارة المطعم لكن خفت تكون فيه اشياء شخصيه
الي مضيعه ولا يعرف حد مضيعه يراسلني على الخاص ويوصف لي شكل الفلاش واسلمه اياه بأي وقت

والسموحه لو كان موضوعي بمكان غلط
وتحياتي للجميع

حليتان*

31-07-2010, 10:27 PM

يمكن مب من المنتدى ...

ويمكن مال احد من الي يشتغلون في المطعم

الله يعطيك العافية

لـبـيـه

31-07-2010, 10:35 PM

يمكن مب من المنتدى ...

ويمكن مال احد من الي يشتغلون في المطعم

الله يعطيك العافية

مشكور على المرور سالت الاداره عن الفلاش وماعرفو وماحبيت اسلمهم اياه

باسكن روبنز

31-07-2010, 11:02 PM

راعي ذمه وضمير ولا ماكان تعنيت وسألت يا لبيه ،

الله يعطيك العافيه وفي ميزان حسناتك ،

كلاسيك قطر

31-07-2010, 11:05 PM

الف شكر والله

انزين في اي مطعم ويمكن احد يعرفه

لـبـيـه

31-07-2010, 11:09 PM

الف شكر والله

انزين في اي مطعم ويمكن احد يعرفه

المطعم هو تشيليز الي في النصر علىىالشارع الرئيسي

ميمي 88

31-07-2010, 11:33 PM

جزاااااك الله خير ,, وفي ميزان حسناتك ..
اذا ماحصلت صااحبه اكسره..

مسك روز

31-07-2010, 11:36 PM

انا اقترح عليك

انك تعطي رقمك لادارة المطعم ، عشان اذا صاحب الفلاش رجع يسأل عنه

الاداره تتصل فيك

تغلبية

31-07-2010, 11:38 PM

لقيته تحت أي طاولة بالضبط ؟ كنت هناك من يومين .. أنا مافقدت شي يمكن صديقتي

كلاسيك قطر

31-07-2010, 11:45 PM

انا اقترح عليك

انك تعطي رقمك لادارة المطعم ، عشان اذا صاحب الفلاش رجع يسأل عنه

الاداره تتصل فيك

صح كلامك يالغالي

الراقيه سبشل

31-07-2010, 11:47 PM

الله يكثر من امثالك يالشيخ

وان شاء الله الي فقد الفلاش يشوف الموضوع

هذلان

31-07-2010, 11:51 PM

انا اقترح عليك

انك تعطي رقمك لادارة المطعم ، عشان اذا صاحب الفلاش رجع يسأل عنه

الاداره تتصل فيك

سو هالشي و باسرع وقت عشان اذا صاحب الفلاش سال عن الفلاش قبل لاتبلغ الاداره ماراح يعرفونه بعدين .

و اذا مرت فتره ماطلع للميموري صاحب اتوقع انك ممكن تفتحها و تطلع على محتواها يمكن فيه بيانات تدلك على صاحب الفلاش مثل انه يكون كاتب كتاب معين و فيه اسمه و رقم تلفونه .
ترى مافيها شي

فلتة زمانها

31-07-2010, 11:57 PM

اذا مالقيت صاحبه تخلص منه واكسره

Index Signal

01-08-2010, 01:04 AM

لقيته تحت أي طاولة بالضبط ؟ كنت هناك من يومين .. أنا مافقدت شي يمكن صديقتي

لا تعليق ..!!

تغلبية

01-08-2010, 01:50 AM

لا تعليق ..!!

لضعاف النظر !

السلام عليكم ورحمة الله وبركاته
كنت اتعشى مع الاهل البارحه واهلي لقو فلاش ميموري طايح تحت الطاولهوكنت بسلمه لادارة المطعم لكن خفت تكون فيه اشياء شخصيه
الي مضيعه ولا يعرف حد مضيعه يراسلني على الخاص ويوصف لي شكل الفلاش واسلمه اياه بأي وقت

والسموحه لو كان موضوعي بمكان غلط
وتحياتي للجميع

Index Signal

01-08-2010, 02:17 AM

لضعاف النظر !

أنا ما كنت بعلّق لكن إنتي حديتيني ..

شخص لاقي فلاش ميموري تحت طاولته في المطعم ..

تسألينه لقيته تحت أي طاوله بالضبط ..؟!

يعني إنتي مقتنعه بهالسؤال ..؟!

مع العلم إنج ما فقدتي شي فمادري ليش هالسؤال الذكي من الأساس ..!!

بخصوص صديقتج سأليها بالأول إذا كانت فاقده شي و تأكدي منها بعدين تعالي إستفسري ..

و حتى لو كانت فعلا فاقده شي ذكري مواصفات الشي المفقود مو تسألين عن الطاوله ..!!

الظاهر أول مره تروحين مطعم .

تغلبية

01-08-2010, 02:24 AM

أنا ما كنت بعلّق لكن إنتي حديتيني ..

وحده لاقيه فلاش ميموري تحت طاولتها في المطعم ..

تسألينها لقيتيه تحت أي طاوله بالضبط ..؟!

يعني إنتي مقتنعه بهالسؤال ..؟!

مع العلم إنج ما فقدتي شي فمادري ليش هالسؤال الذكي من الأساس ..!!

بخصوص صديقتج سأليها بالأول إذا كانت فاقده شي و تأكدي منها بعدين تعالي إستفسري ..

و حتى لو كانت فعلا فاقده شي ذكري مواصفات الشي المفقود مو تسألين عن الطاوله ..!!

الظاهر أول مره تروحين مطعم .

!
ما أبي أدخل في نقاش وخذ وهات سطحي ..

الموضوع بالنسبة لي ببساطة

رجال >> لقى فلاش ميموري >> في تشيليز >> وماذكر اي وصف آخر ..

لولا ان الليل راح كان دقيت على صديقتي ونشدتها عن فلاشاتها وفلاشات عيالها اللي بشنطتها ..

وللتقريب سألت عن الطاولة ما سالت عن الفلاش ميموري علشان مايجي واحد ويدعي بان هذا الفلاش له من وصف الفلاش!

أول مرة ادخل مطعم والا آخر مرة ... أظنه .... " مب شغلك " :)

Index Signal

01-08-2010, 02:26 AM

!
ما أبي أدخل في نقاش وخذ وهات سطحي ..

الموضوع بالنسبة لي ببساطة

رجال >> لقى فلاش ميموري >> في تشيليز >> وماذكر اي وصف آخر ..

لولا ان الليل راح كان دقيت على صديقتي ونشدتها عن فلاشاتها وفلاشات عيالها اللي بشنطتها ..

وللتقريب سألت عن الطاولة ما سالت عن الفلاش ميموري علشان مايجي واحد ويدعي بان هذا الفلاش له من وصف الفلاش!

أول مرة ادخل مطعم والا آخر مرة ... أظنه .... " مب شغلك " :)

الله يكملج بعقلج omen

sara jsm

01-08-2010, 02:43 AM

Gh2o

01-08-2010, 02:44 AM

مع احترامي الشديد لك اخوي بس مب من حقك تاخذ الفلاش المفروض تسلمه للاداره ولا تعتقد كل هل قطر يدشون المنتدى :)
صاحب الفلاش بيرد بيكلم اداره المطعم مب يدور بالمنتديات

CH Engineer

01-08-2010, 02:53 AM

اكسره واحرقه

هذلان

01-08-2010, 02:57 AM

ربي يجزيك خير اخوي ,,
:) ترى احتمال صاحبه او صاحبته للحين ماانتبهوا انه ضايع منهم ,,
الافضل انك تخلي حد من هلك يشوف اللي داخله ,,
لان ممكن يكون فيه صور بنات او شي مايجوز تشوفه ,,
:) الله يكثر من امثالك يالطيب ,,

بخصوص انه ماعندنا سالفه غير الفلاش :nice:

زين افرضي انه الي كان في الفلاش صور شباب او شي خليع :rolleyes2:

تغلبية

01-08-2010, 02:58 AM

صارت سالفة عالفلاش يا جماعة الخير ...!!

مو بالضرورة يكون اللي في الفلاش اشياء شخصية بحتة .. احتمال يكون خالي ..

واحتمال يكون فيه ملفات عادية .. واحتمال فيه مشروع شغل او دراسة وراعيه تعبان عليه ..

افتح ملف ملفين يالبيه الله لايهينك ... اما تعرف راعيه او تسلمه لادارة المطعم وان كان يحتوي على ما يخل .. تخلص منه

وهو في الآخر يكون في حكم " اللقطـــة " ،،

خفوشه

01-08-2010, 02:58 AM

انا اقترح عليك

انك تعطي رقمك لادارة المطعم ، عشان اذا صاحب الفلاش رجع يسأل عنه

الاداره تتصل فيك .... <<< مو شرط ..يمكن واحد من أصحاب الاداره يستنذل فيك ويقول لي انا...
وحاسب من اهل الشر...

مافي الاتكسره

الكــاســــر

01-08-2010, 02:59 AM

اكسره واحرقه

شدعوة
أسرار دولة يمكن؟ :tease:

هذلان

01-08-2010, 03:03 AM

اكسره واحرقه

ول .. جعلك ما تلقالي شي ضايع :nice:

sara jsm

01-08-2010, 03:11 AM

هذلان

01-08-2010, 03:35 AM

لا لا ,, انزين يمكن فيه صور او ذكريات ,,
حرام والله تحرق ذكرياته الحلوة :nice:
:
اذا الفلاش فيه صور شباب خلاص ممكن هو يشوفه ,,
واذا صور خليعه يحرقه افضل ,,
بس الغالب بيكون فلاش لبنت وطايح من شنطتها ,,
ولا الشاب وش بيودي الفلاش معاه للمطعم :)

الحين ابي افهم شي واحد بس !!
ليش الغالب انه بيكون فلاش بنت .. يعني البنات مايروحون المطعم الا معاهم فلاش ؟
و الشباب مثلا مايعرفون حق الفاش :eek5:
انتي متسببه تبين تهاوشين :nice:

بنت^البحرين1

01-08-2010, 03:43 AM

ان شاءالله الحين وصل الفلاش لراعيه

واندكس الفلاش لاقينه تحت الطاولة اللي اول ماتدخل على يدك اليمين خخخخخخخخخخخخخخخخخ .. والله العظيم مت من الضحك على هالتعليقات

sara jsm

01-08-2010, 03:45 AM

الحين ابي افهم شي واحد بس !!
ليش الغالب انه بيكون فلاش بنت .. يعني البنات مايروحون المطعم الا معاهم فلاش ؟
و الشباب مثلا مايعرفون حق الفاش :eek5:
انتي متسببه تبين تهاوشين :nice:

هههههههههههههههههه لا اشدعوه اتهاوش ,,
بس فكر معاي :) ,, واحد رايح المطعم ,,
حاط ( بوكه - سويج السيارة - القلم - حبة فاين - تلفونينه ) كل ذولا في مخباته ,, :nice: وين في مكان حق الفلاش ؟؟
اما البنت ( كل اغراض البيت في الشنطة + الفلاش ) :tease: وفي مكان باقي في شنطتها ,,
:
انزين اذا معطر يعني مال بنت ,,:nice:

ظبيــღــه

01-08-2010, 03:50 AM

الحين ابي افهم شي واحد بس !!
ليش الغالب انه بيكون فلاش بنت .. يعني البنات مايروحون المطعم الا معاهم فلاش ؟
و الشباب مثلا مايعرفون حق الفاش :eek5:
انتي متسببه تبين تهاوشين :nice:

:nop:

عمي هذلان شفييك ..البنيه مااقصدت الا شي وااحد

ان ..اغلب النسواان ..ماايطلعون الا وكل اغراضهم بالشنطه ..من والى ..:funny::secret:

غير الشباااب يروح خفيف ويرجع خفيف:omen2:

فالغالب احناا :p

يصير فين شي ان ماخالفتك:secret:

نرجع لصاحب المووضووع ..لـبـيـه

اولا فيك الخير والله
والله يكثر من امثالك..

وان شاء الله لك ..لا عليك

هذلان

01-08-2010, 03:51 AM

انزين اذا معطر يعني مال بنت ,,:nice:

حكرتلي :nea:

هذلان

01-08-2010, 03:54 AM

بيييه ظبيه وصلت

هههههه ظبيه ارشحج تشمين الفلاش و تحددين لنا جنس صاحب الفلاش
بصراحه انتي ثقه :)

صلاه

ظبيــღــه

01-08-2010, 04:01 AM

:omg:

:secret:

وضحى قطر

01-08-2010, 06:13 AM

فيك الخير اخوي
احسنت

الـقـاسـي

01-08-2010, 06:28 AM

جزاك الله خير اخوي ..
بس الافضل انك تخلي تلفونك عند المطعم يمكن حد يجي يسىل عنه او شي ..

عـ العبيدلي

01-08-2010, 07:17 AM

مع احترامي الشديد لك اخوي بس مب من حقك تاخذ الفلاش المفروض تسلمه للاداره ولا تعتقد كل هل قطر يدشون المنتدى :)
صاحب الفلاش بيرد بيكلم اداره المطعم مب يدور بالمنتديات

وشلي يضمنه انه ادارة المطعم ما بتتعبث فالفلاش .. الثقه فيه اهو اكبر من ادارة المطعم اعتقد !! ..

لو غيره كان خذه ولعب فيه وله فكر انه يحطه فالمنتدى ..

الحل انه يخلي رقمه عند الاداراه مب يعطيهم الفلاش ..

احبك يابلد

01-08-2010, 07:23 AM

انت الله يجزاك خير وراعي الفلاش الله يعقله عليه وانت ما قصرت عداك اللوم

STAR

01-08-2010, 07:36 AM

شفت الموضوع وصل اكثر من صفحة قلت اكيييد
حصلوا على راعييه,,آخرتها قاعدين تتهاوشون وتتطنزوون..‏!!!‏

almaf1a

01-08-2010, 07:58 AM

بعد ماعرفنا تحت اي طاولة لقيته

لقيته فالليل والا في النهار؟
وش طلبت من هناك؟

<<< شغل محققين

ودي أكون

01-08-2010, 08:03 AM

ان شاءالله اتحصل راعيه ..

STAR

01-08-2010, 08:05 AM

تغلبية معليه الأعضاء إستلموج إشوي إعتبريها‏↳‏
دعابه ‏‏(‏:

الصريحه

01-08-2010, 08:09 AM

جزيت كل خير

((غلا قطر))

01-08-2010, 08:21 AM

جد جد جد أنك امين ،،، الله يكثر من أمثالك ،،

meme~qatar

01-08-2010, 08:22 AM

جزاك الله خير وفي ميزان حسناتك

وباقي الاعضاء الاعزاء

هدوا هدوا الله يهديكم مايسوى على البنية سؤال
وبعدين هي وضحت السبب من السؤال

بارك الله فيكم
ومبارك عليكم الشهر
اعاننا الله على صيامه وقيامة

حراير قطر

01-08-2010, 08:27 AM

ههههههههههههههاي

والله انكم تحفه مع تعليقاتكم

كثر الله من امثالك اخوي لبيه

لو اتحط اعلان بالوسيط يكون احسن ...

Doha Sun

01-08-2010, 09:01 AM

فيك الخير ..
حطه عندك اللين مايطلع راعيه ، ولا تكسره يمكن فيه اشياء مهمة، وماعنده نسخة !!

PoBox

01-08-2010, 09:10 AM

لـبـيـه

01-08-2010, 09:16 AM

شكرا للجميع على الردود

ودي أكون

01-08-2010, 09:18 AM

*
*
افتح الفلاش يمكن فيه ارقام ولا معلومات شخصية

تدلك على صاحبه وكان الله غفورا رحيما

ولو مافي بعد سويت اللي عليك

وحط رقمك عند المطعم للي مضيعه اكيد بيمر يدوره

شرعا اسمه اللقطة ان ماخاب ظني
المفروض تدور راعيه سنة كاملة اظن وان مالقيته يصير لك

هذا فلاش مو فلوس والا شي ينلبس ..

صعب يصيير ملكه ..

يمكن يكون في صور خاصه او شي .. يعني يتلفه .. او يتملكه لا والف لا ..

والسموحه :shy:

PoBox

01-08-2010, 09:24 AM

هذا فلاش مو فلوس والا شي ينلبس ..

صعب يصيير ملكه ..

يمكن يكون في صور خاصه او شي .. يعني يتلفه .. او يتملكه لا والف لا ..

والسموحه :shy:

خلاص عيل يعطيج اياه
وتلفين تدورين راعيه بعد مايكمل سنة عنده :nop:
وتبدا سنة عندج
شعلة الاسياد :rolleyes2:

شبح الصمت

01-08-2010, 09:25 AM

اخوي لبيـه

نصيـحه يالغالي روح وحط رقمك في المطعم علا وعسى الرجال يرد

ذكرتني في موضوع والله هالموضوع يوم الجمـعه صار قدامي

كنت جالس في استراحة نت حلو

اشوي رحت ادفع الفلوس الا جاني رجال مسكين يتشكى يقولي ياخي شنو ذي احنا جالسين في صحراء قلت له ليش عسى ما شر والأخ مصري !!!

يقولي والله كنت جالس على الجهاز وطلعت ونسيت الفلاش ممري ورجعت ما حصلته !!

والرجال في عيونه مسكين قهر يقولي والله انا مش عاوز المموري انا منقهر لانه فيه صور خواتي !!

في ذمتكم هالانسان المريض نفسي ليش تسول له نفس ياخذ شيء مب لـه !!

استغفر الله العظيم والله مسكين قلت له الله يعوضك خير وتصبر على وعسى يطلع فيه خير ويرجع للمحـل !!

مع اني اتوقع نفس هالاشكال دام سوت هالشيء مافي امل ترجعه !!

:anger1:

الرويـس

01-08-2010, 09:36 AM

عطني الفلاش وأنا أطلع لك راعيييه من تحت سابع أرض
:(

ودي أكون

01-08-2010, 09:39 AM

خلاص عيل يعطيج اياه
وتلفين تدورين راعيه بعد مايكمل سنة عنده :nop:
وتبدا سنة عندج
شعلة الاسياد :rolleyes2:

تقصد ثالث سنه لك هاا :con2:

تحلم :tease:

الحل .. ان يعطي الفلاش اي وحده ثقه من خواته .. تفحصه لو في بيانات تعطيه عشان يتصل عالشخص .. (( لان يمكن اتكون راعتيه بنت او في صور خاصه حتى لو كان ملك لواحد مو وحده )) ..

واذا اخته شافت مافيه شي مهم .. يحتفظون فيه سنه ..

وبعدها يعطوني اياه استخدمه سنه :tease:

**

لا والله الصدق تفحصه اخته مو هو .. ويا أن يحتفظ فيه لين مايحصل راعيه او يتلفه .. :)

وبس :shy:

بوخالد911

01-08-2010, 09:41 AM

موووفق

لـبـيـه

01-08-2010, 10:19 AM

شبح الصمت

01-08-2010, 10:23 AM

تقصد ثالث سنه لك هاا :con2:

تحلم :tease:

الحل .. ان يعطي الفلاش اي وحده ثقه من خواته .. تفحصه لو في بيانات تعطيه عشان يتصل عالشخص .. (( لان يمكن اتكون راعتيه بنت او في صور خاصه حتى لو كان ملك لواحد مو وحده )) ..

واذا اخته شافت مافيه شي مهم .. يحتفظون فيه سنه ..

وبعدها يعطوني اياه استخدمه سنه :tease:

**

لا والله الصدق تفحصه اخته مو هو .. ويا أن يحتفظ فيه لين مايحصل راعيه او يتلفه .. :)

وبس :shy:

وفرضا اختي طلع الفلاش لواحد من الشباب

وحط فيه صورة والبنت تشوف هالصور ويمكن مب صور محتشـمه ..

يعني حطي اختيارات ..

المهم لبيه نيـته طيبه ولو فتح المموري وشاف ان حصل شيء والا صكره وكانه ما شاف شيء لو فيه صور ..

الله يجعلنا من الناس الصالحين وعند حسن الظن

خيتو ودي اكون ما زمان ما علقت على كلامج بس اركدي اشوي

تحملي يصيدج الرادار

:tease:

شبح الصمت

01-08-2010, 10:29 AM

أخوي لبيـه

اعقدها وشغل الفلاش عادي يمكن تحصل شيء يدلك على راعي الفلاش

انا مره شريت تلفون من واحد سنة 2000 وهالتلفون كان النوكيا الطويل المهم شريت من رجال وهالرجال كان شاريه من واحد سارقه المهم سالفه طويله ( انا ما كنت ادري انه سارقه طبعا ) لين وصلت لخيوط اثبتت لي هالكلام وصحة كلامي

المهم يوم انبش حصلت مسجات وارقام بالهبل قلت هالتلفون فيه انا !!!

المهم ما يأست وقعدت اتصل على الرقم الي مكرر في المسجات وايد وطلعت لي وحده قلت لها اختي عندي تلفون مواصفاته جذيه جذيه قالت لي مدري اخوي ولا عاد تتصل :(

المهم ما يأست لاني حسيت انه هالتلفون مهم لشخص لين حصلت رقم ابوي وحجرتي المهم اتصلت على نفس البنت ههههههههاي صج اني ملغ :shy: قلت لها اختي في رقم كذا وكذا قالت لي شنو اصبر اشوي صكر وبرد اكلمك اتصلت الا قالت لي اخوي ضروري اتصل على هالرقم اتصلت الا وحده تقولي مسكينه انها كانت في السينما وحاطه تلفونها وتلفونها انباق من مكان العصير الي ينحط فيه وبس

قالت لي تلفوني مافي ضربات قلت لها اختي لا والله ما جاءته حوادث ترى صج كانت تكلم وبس رجعتها التلفون ورجعت فلوسي من الشخص الي باعه لي ..

يعني اعقدها وافتح المموري وما عليك من الي يقولك صور ومدري ايش انت ما راح تسوي شيء غلط انتي تبي توصل لخيط او تروح تسلمه للشرطه وهم بمعرفتهم بيعرفون صاحبه

:nice:

ودي أكون

01-08-2010, 10:36 AM

وفرضا اختي طلع الفلاش لواحد من الشباب

وحط فيه صورة والبنت تشوف هالصور ويمكن مب صور محتشـمه ..

يعني حطي اختيارات ..

المهم لبيه نيـته طيبه ولو فتح المموري وشاف ان حصل شيء والا صكره وكانه ما شاف شيء لو فيه صور ..

الله يجعلنا من الناس الصالحين وعند حسن الظن

خيتو ودي اكون ما زمان ما علقت على كلامج بس اركدي اشوي

تحملي يصيدج الرادار

:tease:

ليش قلت شي غلط :cry2:

ولهدرجه انتو يالشباب بايعينها (( البعض - اللي توصل فيه الدرجه ان يحط صور ...... في فلاش ويدور فيه !! )) ..

بصراحه اذا في ناس جي .. وتوصل فيهم هالمواصيل .. فالله المستعاان :(

انت آدرا

شبح الصمت

01-08-2010, 10:41 AM

ليش قلت شي غلط :cry2:

ولهدرجه انتو يالشباب بايعينها (( البعض - اللي توصل فيه الدرجه ان يحط صور ...... في فلاش ويدور فيه !! )) ..

بصراحه اذا في ناس جي .. وتوصل فيهم هالمواصيل .. فالله المستعاان :(

انت آدرا

وين راح تفكيرج يمكن الرجال مسافر برى وحط صوره عالبحر او صور وهو يركض او في الملاهي أو وهو مع هله وايد اشياء يعني !!

يعني صور ما تشوفها بنت صح والا لا وثاني شيء في ملفات اتوقع تنحفظ في التلفون يعني خطف يشوف ويصكر اذا في صور ما يتم يطالعهم لين يوصل للخيط الي يبيه

يعني الحين حلال على البنات يحطون صورهم في الفلاش مموري وعلى الشباب ما يجوز !!

:eek5:

ودي أكون

01-08-2010, 10:45 AM

وين راح تفكيرج يمكن الرجال مسافر برى وحط صوره عالبحر او صور وهو يركض او في الملاهي أو وهو مع هله وايد اشياء يعني !!

يعني صور ما تشوفها بنت صح والا لا وثاني شيء في ملفات اتوقع تنحفظ في التلفون يعني خطف يشوف ويصكر اذا في صور ما يتم يطالعهم لين يوصل للخيط الي يبيه

يعني الحين حلال على البنات يحطون صورهم في الفلاش مموري وعلى الشباب ما يجوز !!

:eek5:

بذمتك هاااي صور عيب لو شافتهم :rolleyes2:

عيل اللي عالطبيعه فالبحر واللي يركضون واللي واللي !!

وبالنسبه للفلاش لا حلال الريال يدور بفلاش من حرم هالشي !! بس الاغلب ان البنت ادور بهالاغراض مو الرياال ..

وعقب اهواااشنا هذا .. يطلع ياهل مضيع فلاشه ومدحوب العاااب :tease:

عموما انت صح وآنا غلط .. برب :)

باسكن روبنز

01-08-2010, 10:53 AM

مع احترامي الشديد لك اخوي بس مب من حقك تاخذ الفلاش المفروض تسلمه للاداره ولا تعتقد كل هل قطر يدشون المنتدى :)
صاحب الفلاش بيرد بيكلم اداره المطعم مب يدور بالمنتديات

خيراً تعمل شراً تلقى ،:rolleyes2:

وانت تحسب هالبوفلبن الي هناك ثقه اكثر من اهل قطر ؟ ،

بما انه المنتدي مشهور اكيد قال بيجرب حظه هني ،

واذا ماصار نصيب ومالقى راعيه ممكن انه يحرقه وخلاص ،

الحمدلله ماطاح الفلاش في يدك ، :victory:

بنت ابوها 19

01-08-2010, 11:04 AM

اما يطلع فاضي وصاحبه بالعماله غاله ؟؟؟

الارض

01-08-2010, 12:06 PM

اما يطلع فاضي وصاحبه بالعماله غاله ؟؟؟

ههههههههههههههههههههههههههه

والله بمووت ضحك

وهني مسوووين لهم قضيه وفاتحين محكمه هههههههههههههه واخرتها يطلع مثل ماقلتي

الصراااحه اشكرررج يعطيج العافيه :nice:

PoBox

01-08-2010, 12:09 PM

*
*
نرفع القضية لمجلس الأمن او محكمة لاهاي

ونخليهم يحكمون :telephone:

ALGHIYATHI

01-08-2010, 12:33 PM

انا اقترح عليك

انك تعطي رقمك لادارة المطعم ، عشان اذا صاحب الفلاش رجع يسأل عنه

الاداره تتصل فيك

هذلان

01-08-2010, 01:56 PM

ياجماعة الخير من اول مالقيت الفلاش رحت للادراه وسالت المدير وسال الستاف يمكن

يكون لحد من الستاف طلع مب لهم وخليت رقمي عندهم وان شاء الله اليوم العصر بمر عليهم

مره ثانيه وبجيك

بخصوص الي قال مالي حق اني اخذه بقوله تهقى هذا جزاي وجزاك الله خير والله اعلم بلنيات

الشيخ ترى ماقلت لنا انك فتحت الفلاش ولا لاء .
ترى محتوى الفلاش يمكن يخليج ترميه في الزباله اعزكم الله و تاخذ اجر بعد
و ممكن يدلك على صاحبه في اول مرف تلقاه فيه .

شويهينــه

01-08-2010, 01:57 PM

هههههههههههههههههه

يحليلكم

هذلان

01-08-2010, 02:02 PM

هههههههههههههههههه

يحليلكم

ترى الي طاف مب عبث ... تعاون عشان نرفع الموضوع :discuss:

بوعلي2

01-08-2010, 02:07 PM

الله يجزيييك خير والله

وفي ميزان حسناتك

Index Signal

01-08-2010, 02:10 PM

السلام عليكم و رحمة الله و بركاته ..

بغض النظر عن المتسبب بالسجال إللي حصل بيني و بين الإخت تغلبية في هالموضوع أمس ..

حبيت أعتذر منها أمامكم على أي مضايقه بدرت مني بحقها ..

و كذلك أي شخص ماخذ بخاطره مني لأي سبب فأنا أعتذر منه ..

داخلين على رمضان و مابي حد يكون بقلبه شي علي ..

مبارك عليكم الشهر مقدماً .

Chanel

01-08-2010, 02:15 PM

شوري عليك اكسره واحذفه

سحـابة خيـر

01-08-2010, 02:25 PM

اختي افتحي الفلاش ميموري وجوفي
يمكن تطلع صج بيانات للشخص او شي..
واذا طلع صور وهالسوالف اكسريه واحرقيه..

:)

بولينجر

01-08-2010, 02:39 PM

ان شاء الله تحصل راعيه.....

تغلبية

01-08-2010, 04:22 PM

جنوب الدوحه

01-08-2010, 11:58 PM

عجبي !!! من بعض الاسئله .. جزاك الله خير يا صاحب الموضوع .. كفيت وفيت وان شاء الله في ميزان حسناتك :)

جـوليـآن قطر

02-08-2010, 07:17 AM

جزاك الله خير

لـبـيـه

02-08-2010, 09:42 AM

السلام عليكم ورحمة الله وبركاته

رحت امس المطعم ولحد الحين مافي اي خبر

على العموم انا ماراح افتح الفلاش على راي بعض الاعضاء

وبخليه عندي لين اول رمضان اذا ماجد جديد عليه بكسره وبكون سويت الي علي

واشكر كل الاعضاء الي دعوا لي والي شاركو والله يجزيكم خير

almaf1a

02-08-2010, 09:47 AM

^
ماشاء الله عليك قدرت تنتظر لين اللحين ومافتحت الفلاش
الصراحه الصراحه انا لو مكانك حدي ساعتين

ولد الشحانية

02-08-2010, 09:55 AM

اكسريه وخلاص....واكسبي اجر

STAR

02-08-2010, 10:28 AM

أخوي إفتحه يمكن فيه بيانات الشخص

لـبـيـه

02-08-2010, 10:59 AM

أخوي إفتحه يمكن فيه بيانات الشخص

ويمكن فيه صور للبنت وماتبي حد يشوفها مادري انا اشوف اني اغض النظر عن الفتح

وشكراا على اهتمامج

بوعبدالرحمن5

02-08-2010, 11:10 AM

هههههههههه لا حولا ولا قوة الا بالله

شيط ويط

02-08-2010, 12:27 PM

أما لو اللي مضيع الفلاش ميموري شخص (ياباني) لا وفوق ذي جاي (زيارة عمل) ومحرك ثاني يوم :)

لا وأخرتها الفلاش ميموري يطلع (فاضي) مافي شي :)

أو الأدهي يطلع الغرض (ميداليه) مفاتيح على شكل (فلاش ميموري) :)

وقمة التعاسة يطلع (الياباني) عضو ويانا في المنتدى بس مسجل عشان يحمل السيريال نمبر مال (الانتي فايروس) لأن وهو يبحث في (قوقل) طلع له رابط (المنتدى) :)

أتغشمر اخوي لا تعصب :secret:

وبالنسبة لموضوع الفلاش صحيح (نص سكان قطر) يدخلون (المنتدى) .. وموضوعك مب غلط انك تنشره في المنتدى لعل وعسى حد من الاعضاء يكون راعي هالفلاش ميموري .. لكن أشوف الأولى كان تسليم الفلاش ميموري لإدارة المطعم لأن الله يسلمك الانسان بطبعه لين يضيع شي يسوي (فلاش باك) لآخر أعمال سواها .. يعني اللي ضيع الفلاش اتوقع بيرجع بذاكرته للاشياء اللي سواها في هاليوم والمشاوير والاماكن اللي كان قاعد فيها وعلى ضوءه يقدر يستشعر ويعرف المكان اللي ممكن (يدور) فيه على (الغرض) اللي ضاع منه لعل وعسى يلقاه .. وفي هالمثال أكيد (المطعم) كـ مكان كان متواجد فيه راعي الفلاش ميموري راح يكون حاضر في ذهن هالشخص وبيرجع للمكان نفسه ويسأل الإدارة عنه .

أنا أشوف ترد الفلاش ميموري للمطعم وتسألهم اذا كان فيه حد سأل عنه .. أو حط بياناته عندهم .. اذا قالوا لك محد سأل .. مالك الا تتخلص منه وكان الله غفور رحيم .

تحياتي لك واشكرك على امانتك وحرصك وكثر الله من امثالك .