عملية الليزك ( تصحيح النظر )

[Abdullah_89]

صباحكم/مساكم الله بالخير

سؤال فني سريع

انا قررت أسوي عملية ليزك عن مستشفى العيون التخصصي عند الدكتور محمد البديوي
كنت أبي اسويها عند خالد الشريف بس قالوا لي انه مسافر

أبي استفسر للي مسويين العملية أو يعرف حد مسويها

العملية فيها اي آلآم او مضآعفآت :rolleyes2:

انا اول مره اسوي عملية في حياتي وبصراحه خآيف بس لازم اسوي العملية في أقرب وقت الحمد لله الدكتور طمني وقالي العملية بتمشى معاي 100%

[الراقيه سبشل]

رفيجتي سوت العمليه لكن الي سوالها كان خالد الشريف

وماكان في مضاعفات او اي شي والحمدلله قطت النظارة بالزبالة وتشوف 6/6

وبالتوفيق بالعمليه :)

[Abdullah_89]

الراقيه تسلمين عالرد

سؤالي كان في الم وقت العمليه خخخخخخخخخخخ
ترآني خوآف حدي واول مره اسوي عملية

[الراقيه سبشل]

الراقيه تسلمين عالرد

سؤالي كان في الم وقت العمليه خخخخخخخخخخخ
ترآني خوآف حدي واول مره اسوي عملية

بصراحة ماجربت :funny:

بس هي كانت تقوللي انها كانت تضحك على شكل الدكتور اثناء العمليه

توكل على الله ولاتخاف من شي :nice:

[Abdullah_89]

هههههههههههه

اوكي الغاليه تسلمين وماقصرتي

[ماريسا]

الله يوفقك
متابعة الموضوع لأن زوجي محتاج يسوي العملية مع ذلك دايماً نأجل الموضوع خصوصاً ان هالتقنية حديثة و مو واثقين من أمانها 100% ع المدى البعيد

[G0LD]

مرحبا الشيخ

أنا سويت العمليه في البحرين سنة 2007 والحمدلله كل شي تمام وبالنسبه للألم لايذكر واذا تلبس عدسات حاول ماتلبسها على

الأقل 3 شهور يكون أفضل لإجراء العمليه

وتوكل على الله مافيه غير كل خير وبترتاح - وحافظ على الأدويه وبإنتظام

ولاتتعرض للدخان وغيره وحتى اذا ادخن حاول تقطع !!


والله يوفقك ويسهل امورك


أسم العياده : إبن النفيس للعيون

فيه دكتوره هنديه ودكتور بحريني !!

عليك بالدكتور البحريني !!

[الصريحه]

الله يقومج بالسلامه منها اعتقد مثل ماسمعت مافيها الم
واسالي دكتورك افضل
وخففي جلسات على الانترنت وغيره علشان عيونج وتحملي من التراب

[لاجئ عاطفي]

الله يوفقك
متابعة الموضوع لأن زوجي محتاج يسوي العملية مع ذلك دايماً نأجل الموضوع خصوصاً ان هالتقنية حديثة و مو واثقين من أمانها 100% ع المدى البعيد


غلطانه هالتقنيه مب حديثه تقنيه قديمه وبدت في الاتحاد السوفيتي في التسعينيات والحين وايد تطورت ومافيها اي مضاعفات ومضمونه 100% واحسن دكتور يسويها في قطر الدكتور خالد الشريف دكتور اردني زائر عنده عياده في دبي والاردن ويجي قطر زياره كل شهر عند الجبر للبصريات

[missperfect]

الحمدلله انا سوييتها من 2003 عند الدكتور خالد الشريف ماشاءالله عليه ، جني شفت امس بالجريده ان هو جاي هالايام الدوحه :telephone:اتصل العياده واسال ، وعند الدكتور احمد شوقي بعيادة العيون التخصصي هو يحضرك للعمليه
مافي الم لانهم يقطرون بعينك قطور البنج ولاتحس بحاجه وبس تبتعد عن الاضاءه نفس اليوم وتلبس النظارة الشمسية اذا بتطلع بالنور وجدام التلفزيون وترطب عينك بمرطب العين Refresh Plus كل ساعتين تقريبا عقب العمليه بس كمن يوم وهو الدكتور نفسه بيشرحلك شلون بتكون العمليه وشالي لازم تسويه بعدها

واذا كنت تستخدم العدسات ريح عينك منها قبل العمليه بشهر او شهرين عالاقل وماعليك شر ان شاءالله وتقوم بالسلامه وياحي الحياة بدون نظارة

ونصيحه استخير قبل لتسويها ( ماخاب من استخار ) وربي يوفقك

[al.wajbah]

قريبين لي مسوينها في البحرين



عند الدكتور الريفي


واللي اعرفه عن العملية

مافي الم


ويجب الابتعاد عن العطور والكمبيوتر والشمس والغبار والسجوود

يعني سجود على خفيف عشان مايكون ضغط ع العين

لمدة عشرة ايام ع الاقل




تمنياتي بالتوفيق

[المقهوره]

انا بنت خالتي سوتها في البحرين عند دكتور مؤمن الريفي

وكل الي فيهم ضعف نظر يسوونها عنده

وممتاز وقيمتها 5000 ريال

بس يتطلب منك عدم الخروج في االاضاءه والشمس لمده شهر تقريبا اما بالالم مافيه ذاك الالم الشديد

[نور اعيوني]

انا سويتها سنة 2004 على ما اتوقع وسويتها عند الدكتور خالد الشريف وكانت 100% اوكى وما حسيت باي شي ولله الحمد لانهم يقطرون العين ببنج وما تحسون بشي وما لها اي مضاعفات الا بالعكس افتكيت من النظاره..سوي العمليه وتوكل على الله..

[كازانوفا]

يا صاحب الموضوع بسالك سؤال وانت راح تعرف هل هذه العمليه مضره مستقبليا ام لاااااااااا
عمرك شفت دكتور عيون ما يلبس نظاره او مسوي عملية تصحيح النظر اذا اجاوبت بتكون جاوبت على نفسك

الله المستعان ان شالله

[antar]

السلام عليكم

خير ما اخترت

انا كنت استخدم العدسات اللاصقة من 1986 لين سنة 2000 سويت العملية عند د. براون في لندن
اهم شئ انك تريح عينك بعد العملية وتتبع التعليمات بدقة
ابعد عن التلفزيون و الشمس و اي نشاط عنيف لثاني يوم

و ان شاء الله بعدها بتحس انك كنت بسجن و طلعت منه

و الله يوفقك

[ام عبد الهادي]

السلام عليكم خاطري اسوي تصحيح نظر بس خايفه يزيد علي قصر النظر

[Abdullah_89]

تسلمون جميعا

والله ماقصرتوا رفعتوا المعنويات

الحمد لله العملية باسويها ان شاء الله تاريخ 22/8 عند الجبر لتكنلوجيا النظر والصراحه الكل مدح لي هالعيداة واهي نفس العياده اللي يجي فيها الدكتور خالد الشريف

الله يوفق الجميع ان شاء الله

[علي الكبيسي]

ياجماعه عندي سؤال للي بيسوون الليزك هذا : ليش طبيب العيون ما يسوي ليزك ؟
مب المفروظ انهم اول ناس يسوون مثل هالعملية ؟ عشان اهم بعد يتخلصون من النظارات ..
عملية الليزك فاشلة واظرارها على المدى البعيد
هذي وجهة نظري واذا منها فايده ليش ما يرخصونها في مستشفى حمد ؟اكيد الإجابات عندكم
زكل واحد ووجهة نظره

[LionFish]

ياجماعه عندي سؤال للي بيسوون الليزك هذا : ليش طبيب العيون ما يسوي ليزك ؟
مب المفروظ انهم اول ناس يسوون مثل هالعملية ؟ عشان اهم بعد يتخلصون من النظارات ..
عملية الليزك فاشلة واظرارها على المدى البعيد
هذي وجهة نظري واذا منها فايده ليش ما يرخصونها في مستشفى حمد ؟اكيد الإجابات عندكم
زكل واحد ووجهة نظره

يمكن لان الدكاترة ماعندهم مانع يلبسون النظارة لانهم متعودين عليها

وبالعكس شكلهم يكون اذكى بالنظارة :thumbup1:

[تاجر]

ياجماعه عندي سؤال للي بيسوون الليزك هذا : ليش طبيب العيون ما يسوي ليزك ؟
مب المفروظ انهم اول ناس يسوون مثل هالعملية ؟ عشان اهم بعد يتخلصون من النظارات ..
عملية الليزك فاشلة واظرارها على المدى البعيد
هذي وجهة نظري واذا منها فايده ليش ما يرخصونها في مستشفى حمد ؟اكيد الإجابات عندكم
زكل واحد ووجهة نظره


مرحبا اخوي علي الكبيسي ..
مب الكل يحتاج لعملية تصحيح نظر .. يعني واحد يلبس نظارة ومرتاح منها ليش يسوي عمليه ..
كنت افكر مثل تفكيرك لكن لما قعدت مع الدكتور شرح لي الايجابيات والسلبيات .. هل انت قعدت مع دكتور وشرح لك ؟؟

عموماً اخوي Abdullah_89
انا سويت العملية من 6 شهور في "مغربي للعيون" في مستشفى الاهلي عند دكتور زاير اسمه "هشام حمدي" وجيد حتى في تعامله وكنت البس عدسات صار لي 12 سنة .. والحمد لله العملية لا فيها الم ولا شي (انا خواف مثلك ترى) ..

ولكن مثل ماقالوا الاخوان اللي قبلي اهم شي بعد العملية الراحه وعدم الخروج في الشمس الا للضرورة القصوى مع لبس النظاره الشمسية طوال الوقت في اول الايام .. وتوكل واستعن بالله وموفق ان شاء الله

[الميزان 1969]

أنا سويتها عند دكتور أسامة ابراهيم
عيادة الدكتور يوسف بو ألفين
وسويتها ب 10000 بس الصرااااااااااااحة روعة والحمدلله وكل اللي سووا عنده مرتاحين ومافي ألم أو مضاعفات
وبالسلاااااااااااااااااامة

[*جواهر*]

انا سويت تصحيح النظر (اليزك) سنه 2005 عند الدكتور مؤمن الريفي في البحرين والحمدلله العمليه سهلة وبدون الم و يشرحون لك خطوات العمليه بالتفصيل اهم شي ماتكون شاد على نفسك خلك ريلاكس وكل امورك طيبه وبيشرحون لك خطوات الاهتمام بالعين بعد العملية.

نصيحه مهم لكل اللي بيسون ليزك العملية في الصيف لها مضاعفات لو بسيطه بس لازم تنحط في الاعتبار جفاف العين و حساسيتها من الحر والجو الجاف و الشمس والانارات القوية حتى من المكيف يعني لو تسونها في الشتا واااااااااايد احسن

وبالتوفيق للجميع

[تاجر طمووح]

نصيحه مهم لكل اللي بيسون ليزك العملية في الصيف لها مضاعفات لو بسيطه بس لازم تنحط في الاعتبار جفاف العين و حساسيتها من الحر والجو الجاف و الشمس والانارات القوية حتى من المكيف يعني لو تسونها في الشتا واااااااااايد احسنوبالتوفيق للجميع

نصية عجيبة بس هل هي صحيحه

[QaTaRSouL]

أنا سويت عملية إيبي ليزك وللأسف ما انجحت العملية بالشكل المطلوب...
-في البداية يجب التأكيد على أن من يشكو من جفاف في العين سيعاني من آثار جانبية بعد إجراء العملية والنتائج ستكون عكسية وسيتمنى العودة إلى النظارة :(

-إذا كانت درجة ضعف الإبصار كبيرة ( -8 فما فوق ) وسماكة القرنية أقل من ( 5 مم ) فأنصح بشدة بعدم إجراء العملية والإكتفاء بالنظارة ...

- في حالة إصرارك على إجراء العملية يفضل عدم استخدام العدسات اللاصقة حتى يحين موعد العملية ، مع استخدام مرطبات للعين ويفضل هذا النوع Systane ...

- بالتوفيق إن شاء الله

[ahmad3]

أنا أنصحك بإجراء عملية الليزك عند الدكتورة هيفاء محمود في البحرين
ما شاء الله عليها .... ممتازة

[شيخه123]

أخوي أنا سويت عملية الليزك سنه 2005 عند الدكتور خالد الشريف ترى العمليه سريعه وما تاخذ وقت ولا تخوف أهم شيء تلتزم بالنصايح اللي يقوله لك الدكتور وبتشوف أن نظرك تحسن من ثاني يوم والله يوفقك

[FRIENDS]

انا افكر جديا اني اسويها في رمضان لآن موعد اجازتي .. بس خايف من شي .. هل بقدر اصلي التراويح عادي واقرأ قرآن ؟؟ اذا لا بآجلها لبعد العيد ان الله اراد مع ان نفسي اعيد بدون نظاره ... لآني البس النظاره من سادس ابتدائي :)

[Abdullah_89]

تسلمون شباب وبنات ماقصرتوا
ان شاء الله باسوي العملية الاسبوع وباقولك بعدها تجرتني

اخوي friends انا نفسك احاتي التراويح والقيام قالوا لي عادي بس ماتشد على نفسك اول اسبوع وبعد اسبوع من العملية عادي وقالوا لي ان اول 3 او 4 ايام لازم الماي مايجي صوب عيني وبيعطوني نظارة خاصه للوضوء والنوم

[تاجر]

تسلمون شباب وبنات ماقصرتوا
ان شاء الله باسوي العملية الاسبوع وباقولك بعدها تجرتني

اخوي friends انا نفسك احاتي التراويح والقيام قالوا لي عادي بس ماتشد على نفسك اول اسبوع وبعد اسبوع من العملية عادي وقالوا لي ان اول 3 او 4 ايام لازم الماي مايجي صوب عيني وبيعطوني نظارة خاصه للوضوء والنوم

اخوي Abdullah_89
نصيحه بسيطه بس يمكن تستفيد منها ان شاء الله ..
انصحك تأجل العملية الى ما بعد رمضان افضل .. لان بعد العملية راح تستخدم القطور كل ساعة او ساعتين على حسب ما يقولك الدكتور .. والقطور هذا بتحس بطعمه في الفم مما قد يبطل صيامك ولكن اسأل اهل العلم واسأل الدكتور وهو راح يفيدك ان شاء الله .. حبيت انبهك بس ..

وبالتوفيق

[Abdullah_89]

اخوي تاجر تسلم وماقصرت وباتأكد من هالشي

وجزاك الله ألف خير ورحم الله والديك

[مسباح عاج]

السلام عليكم

انا مسوي العملية عند الدكتور خالد الشريف بمركز العيون التخصصي بتاريخ 1/5/2010م ، والحمدلله النتيجة طيبه جداً ، وتركت النظارة الطبية نهائياً ،
العملية ما فيها اي ألم نهائياً ومدتها حوالي 25 دقيقة ، والدكتور محترم ولطيف للغاية ، ويشرح لك الخطوات أول بأول.
أهم شي انك تتبع التعليمات الطبية بعد العملية مثل الالتزام بمواعيد القطرات والمتابعة مع الدكتور المشرف عليك .
وفي اول 24 ساعة من العملية لا تقترب من شاشة الجوال او الكمبيوتر ، ولا تمارس رياضة السباحة
وفي اول 3 ايام استخدم النظارة الخاصة بالنوم (تشبه نظارة الغوص) ويمكنك استخدامها للاستحمام ، وبعد ذلك الأمور طبيعية .
وتمنح اجازة طبية لمدة 21 يوم للراحة ، مصاريف العملية 9600 ريال .

توكل على الله ، تمنياتي بدوام الصحة

[blade]

يالربع انا سويت االعمليه بمركز الجبر بس مب الدكتور الشريف لا الدكتور احمد البدورى فكرت قبل لا اسويها عند من اسويها بس قلت اخلى الدكتور المقيم بالبلد يسويها احسن حتى اقدر اراجعه فى اى وقت اذا ما صار اى مضاعفات اما الدكتور الشريف فهو كل فترة وفترة يجى الدوحه

وعلى العموم اهى نفس التكاليف ولكن بالعكس افضل انك تسويها عند دكتور تقدر تراجعه باى وقت

[هاب ريح]

مرحبا الشيخ

أنا سويت العمليه في البحرين سنة 2007 والحمدلله كل شي تمام


أسم العياده : إبن النفيس للعيون

فيه دكتوره هنديه ودكتور بحريني !!

عليك بالدكتور البحريني !!


الحين احنا في 2010

العملية اشكثر تستغرق ؟
لازم البحرين ؟؟

تسافر وترجع في اليوم نفسه ؟؟

كم تكلف ؟

مشكووووووووووووور

[*جواهر*]

أنا سويت عملية إيبي ليزك وللأسف ما انجحت العملية بالشكل المطلوب...
-في البداية يجب التأكيد على أن من يشكو من جفاف في العين سيعاني من آثار جانبية بعد إجراء العملية والنتائج ستكون عكسية وسيتمنى العودة إلى النظارة :(

-إذا كانت درجة ضعف الإبصار كبيرة ( -8 فما فوق ) وسماكة القرنية أقل من ( 5 مم ) فأنصح بشدة بعدم إجراء العملية والإكتفاء بالنظارة ...

- في حالة إصرارك على إجراء العملية يفضل عدم استخدام العدسات اللاصقة حتى يحين موعد العملية ، مع استخدام مرطبات للعين ويفضل هذا النوع Systane ...

- بالتوفيق إن شاء الله

اخوي ممكن تذكر ليش ما نجحت عمليتك بالشكل المطلوب؟ هل المضاعفات اللي ذكرتها كانت موجوده لما سويت العمليه؟؟

الدكتور بالعاده ينصح المريض اذا العملية بتسوي له مضاعفات وبيقول له اذا العملية بتفشل.

و اللي سال كم تستغرق العملية ترى ماتاخذ وقت يعني تقريبا للعينين 5 دقايق وماراح تحس بالوقت:nice:

[مزايين]

ولدي توه مسويها عند الدكتور عادل الرشود في مركز الكحال الطبي وهو دكتور ممتاز في الدمام والحمد لله يقول مافي أي ألم وقت العملية بس بعد العملية تعب شوي ورجعنا في نفس اليوم الدوحة وعطاه أدوية لمدة شهر والحمد لله هو بخير الحين ويستعدل النظر على الآخر خلال شهر أو أكثر شوي
وأخوي سواها من سنتين والحمد لله ماحس لاوقت العملية ولا بعدها بأي شي والحمد لله نظره زين الحين ولا يحتاج نظارة وسواها بعد عند نفس الدكتور والعملية كلفت 8000 هناك
ان شاء الله تسويها وماعليك شر

[Abdullah_89]

يعطيكم العافيه جميعا

الله يسلمكم العملية تكلف في مركز العيون التخصصي 9000 ريال شاملة شهرين مراجعه مجانية

والدكتور جدا ممتاز لكن جدولة مزحوم

انا باسويها يوم الخميس وباتوكل على الله وان شاء الله خير

وموضوع اني اسافر وارجع انا اقول في بلادي احسن لي عالاقل للمراجعات واذا صار اي شي لاقدر الله اقدر اراجع الدكتور علطول

انا باسويها عند احمد بديوي واهو دكتور ممتااااااااااااااز والله العظيم من سنتين جاني التهاب في عيني مع صديد داخل العين راجعت عيادة الدوحة والاهلي ومقبرة حمد وبوالفين وكل واحد عطاني شي تميت شهرين ماشوف لكن لما رحت عند احمد بديوي سوالي عملية مدتها 3 دقايق والله ثم والله بعدها ولاكأنة شي صارلي

[Lavender]

السلام عليكم
مرحبا اخوي عبدالله اشكرك بصراحه شجعتني اني اعمل العملية ورحت *للدكتور احمد وعمل لي فحوصات بس طلع عندي جفاف في العين ووصف لي قطره ترطب العين ويوم الاثنين موعدي ان شاء الله ،،،وبعدها بيقرر اذا اقدر اسوي العمليه الحين والا عقب رمضااان،،
نفسي اعيد من غير نظارات ولا عدسات ،، تعبت من النظارة 18 سنه :( او اكثر الحمدلله على كل حال *

الله يسهل امرك ان شاء الله وشكرا لك وللجميع :)

[جلامور]

يا جماعة نوروني الله ينور عليكم
متى خالد الشريف يتواجد في الدوحة الفترة الجاية
وكيف أحجز
وكم تكاليف العملية عنده

تقبلوا تحياتي

[المحافظ]

بصراحة انا كنت على وشك اسوي العملية في الأردن من حوالي عشر سنوات ، لكن واحد من الشباب هناك كان يدرس في جامعة الاردن (كلية طب العيون) ، شار علي انه يرتب لي مقابلة مع عميد طب العيون و آخذ رأيه ، وفعلا قابلت الدكتور و قال لي ان العملية تقنيا ما عليها غبار ، لكن كل الخوف من تأثير العملية بعد فترة طويلة ، يعني بعد عشرين او ثلاثين سنة ، هل يمكن يصير ضمور و شي ضار ، هذا كان تحفظه على الموضوع ، ويوم قلت له عطني الزبدة يا دكتور ، قال لي لو مب متضايق منها لا تسويها ، واصبر ، وهو كان لابس نظارة طبية ، وقال لي شوفني أنا لابس نظارة وأنا عميد طب العيون ..

فالشاهد أني هونت مع اني كنت مسوي الفحوص المبدئية وحاجز موعد ، ولكن من كل اللي اعرفهم و سووها قليل جدا اللي ما مشت معاه العملية ، والأغلبية الساحقة نجحت العملية معاهم ..

عامل ثاني ايضا مؤثر هو عامل العمر ، يعني اللي وصل الاربعين يمكن لازم يفكر عدل قبل لا يقرر ، وعموما قبل الشخص ما يسوي العملية فيه فحوص و تصوير للعين تحدد إذا كانت العملية مناسية او غير ذلك ..

والله الموفق ،،،

[روح الاطلس]

وهل الانسان ضامن عمره ثلاثين او اربعين سنه قدام؟ اللي يبي يستانس بعمره الحين يسويها ومحد عارف كم بيعيش

[انيقه]

الله يوفقك وينجح العمليه يااااااارب

[Prinçěss]

"

انا اثنين اعرفهم مسوينها ,,
اللي عرفته منهم مافي ألم وولا شي ,, وولا نضاااارة ,,

استخير ربك وتوكل على الله ,,


"

[ماريسا]

قريت في موقع المستشفى المغربي ان من شروط العملية لازم النظر يكون ثابت على الاقل لمدة سنة قبل اجراء الليزك هل هذا صحيح؟؟ طيب و اللي نظره يضعف كل 4 شهور؟؟ ماتنفع معه الليزك؟

[قلم محايد]

انا البس عدسات و تعودت عليهم و العدسات تحسسك تقريبا انك تبصر مثل الشخص العادي لذلك ما افكر اسوي العملية في الوقت الحالي و ما البس النظارة الا فترات قليلة لان اكثر الوقت بالعدسات لكن سؤالي على العدسات نفسها لها اضرار على العين ؟

[ماريسا]

انا البس عدسات و تعودت عليهم و العدسات تحسسك تقريبا انك تبصر مثل الشخص العادي لذلك ما افكر اسوي العملية في الوقت الحالي و ما البس النظارة الا فترات قليلة لان اكثر الوقت بالعدسات لكن سؤالي على العدسات نفسها لها اضرار على العين ؟

اخي العدسات لها اضرار لأنها تسبب جفاف للعين و لما العين تنشف اكيد مع الوقت البصر يضعف
حاول تقلل من لبس العدسات و الالتزام بالنظارة

[DOHA_QATAR]

حبيبي العملية كلها ماتاخذ اكثر من 10 دقايق

انا سويتها في البحرين سنة 2002

عند الدكتور مؤمن الريفي في المستشفى العسكري

واللحين عنده عياده خاصة

واذا حاب رقم جواله راح اطرشه لك

وبالتوفيق انشاءالله

[mohd89]

ما شاء الله كل الردود ايجابيه
بقولك شي
انا زرت دكتور متخصص في عمليات الليزر والليزك في لبنان
وقالي انه اكثر من 80 مليون شخص اصيبوا بالعمى حول العالم نتيجة هذه العمليه
بالاضافه الى احتمال الاصابه بالعمى او الضعف الشديد في البصر عند بلوغ سن متقدم يعني 75 وفوق
هذا اللي قاله الطبيب وانا ذكرته عشان يكون عندك علم فقط
وقال اللي اهم من العمليه هو المتابعه بعد العمليه والاهتمام بالعين
وأخوي سواها في امريكا وقالوله نفس الكلام في سن متقدم ممكن يخف النظر بشكل كبير
مع هذا اخوي سواها وانا بسويها ان شاء الله :secret:

الله يشفيك وأن شاء الله بتنجح العمليه