تحذير لمسافرين طريق الاحسـاء (شوفوا اش صار لي مع هالجو) عاااااااااجل

[باسكن روبنز]

السلام عليكم ورحمة الله وبركاته ،

اليوم الظهر جاني الوالد وقالي خل نروح البحرين لرحله علاجيه ،

المهم سمينا بالله وقبضنا الخط وخلصنا من حدود سلوى ودخلنا السعوديه ،

وقفنا نصب بترول في محطة ساسكو وكلمتنا اسره سعوديه اذا ممكن نرجع ولدهم وبنتهم الصغيره الي الاحساء على طريقنا وذلك لان العائله كانو متوجهين إلى قطر بس لظرف خاص فيهم كان لازم يردون اثنين من اعيالهم ،

قلنا لهم معليه حياهم ووجبناهم وركبوا معانا السياره وسوالف وياهم والبنت يحليلها كتكوته عمرها 4 سنين الله يحفظها ،

كان الجو طبيعي مع قليل من الغبار السفلي كالعاده على خط السعوديه ،

فجأه لمحنا غيوم غريبه بشكل عامودي غريب بعد تجاوزنا لمحطة تماني على خط الجافوره ،

ظنينا انه شوي غبار كالعاده وكملنا طريجنا بسرعه بطيئه شوي ،

والله ياجماعه الي صار لنا شي غريب اعوذ بالله فجأه اشتد الهواء مع نزلة مطر قويه ،

وقام يزيد الغبار والهواء بشكل مب طبيعي وعرفنا انه السالفه فيها شي ،

زااا الهواء بشكل اعصاري وقام يلعب بالسياره ووقفنا على جنب مافي امل نمشي ومانشوف شي ابد خير شر ،

كان هذا دخولنا في عافور ضخم ومابالغ لو قلت كان اعصار كبير!

الوالد قام يتشهد والسياره شبهه بتنقلب خلاص وتكسرت علينا الدرايش كلها وتضررنا منها والجزاز دخل في الاذاني والخشوم والفم وكل مكان! ،

والله صراخ البنت مسكينه داخل في اذني من خرعتها واخوها لامها بالقو وجريت لهم ثوبي وغتري المعلقين ليحميهم من الجزاز المتكسر ،

وقفنا على جنب والاعصار زحف بالسياره لي جنب الطريق في البر وغرزنا والحمدلله الي عندنا كان فورويل ،

الجزاز تكسر بكل سهوله مع العلم سيارتنا امريكيه جديده موديل 2010 والحين ماتسوا نص قيمتها بعد الي صار ،

المهم شغلنا الدبل وطلعنا بالموتر والاعصار راح بس باقي اثاره من هواء شديد وغبار لاينوصف مع مطر وكل شي مكس والله ماعرفنا شألي يصير كأنه عايشين فيلم ،

واحنا في بالنا امانة الاعيال الي معانا ووصلناهم لي بيتهم بالاحساء وردينا رجعنا لين مستوصف منفذ سلوى ،

ماقصروا وياها وعالجونا وطلعوا 3 ارباع الجزاز من كل مكان حتي من رجولنا (اكرمكم الله) ،

وانا اكلمكم الحين وفي عافيتي ربع الجزاز متناثر في جسمي كامل بس حبيت اكتب التحذير قبل لاقوم اسبح واطهر الجروح :( ،

وطول الوقت احاتي الوالد والله لانه هو الي كان يسوق والاضرار صابته اكثر وياريتها فيني ولا فيه ،

المهم ادري طولت عليكم بس حبيت اقولكم ألي صار معاي بالتفصيل الممل ،

ردينا الدوحه ولحد الحين مب مستوعبين الي صار ،

علماً انه الاعصار طلع لنا الساعه 5 بالضبط وكان يبين ملامحه وهو رايح راد في البر ،

ومستوصف منفذ سلوى قالوا لنا انه جاتهم حالات مشابهه من كم يوم لناس متضرره من هالشي وانه الجو متقلب عندهم هالكم يوم ،

حبيت احذركم يا اهل قطر حاسبوا علي انفسكم والله توني داخل البيت من الباب لي الكمبيوتر وقلت احذركم ،

الجو معفوس ومتقلب هالكم يوم وبنفسهم موظفين مستشفي سلوى قايلين لي هالكلام وهم نفسهم بيوتهم بعيده عن المستشفي ويدهم على قلوبهم وهم رايحين ورادين من الدوام ،

وعلى دخلتنا للتفتيش في بوسمره حتي موظفين الجمارك مب مستوعبين الي شافوه وكل واحد ينادي رفيجه يقوله شوف ويقولون من وين جايين انتو والجزاز متكسر والشنطه متروسه حصى ورمل هههههههه ،

كان معانا كم شخص في هالاعصار واضرارهم مثل ماصار لنا والله اعلم بحالتهم يمكن انضروا اكثر منا ،

وكلن خايف على حريمه واعياله من هالغضب الي انصب علينا ،

الله يحفظ جميع المسلمين والسموحه على الاطاله ،

[القانوني2]

الله تسر عليك و الحمدالله على سلامة

مبارك عليك شهر مقدماً

[موضي قطر]

الحمدلله على سلامتك وسلامة الوالد وسلامة الأطفال ...

[مطيع الله]

الله يرحمنا
وجزاك الله خير على النصيحة

بس ودي اجيب طحين ومستلزمات رمضان من الحسا حتى لو اخوض بحر في السيارة:secret:

[الراقيه سبشل]

الحمدلله ع سلامتكم ياباسكن .. وكفارة ان شاء الله

وفيك الخير جيت تحذرنا

وان شاء الله كل المسافرين لهناك ينتبهون على هالشي

[jassim_9]

الحمدلله على سلامتك

[بن مفتاح]

ما تشوف شر اخوي الكريم ..

والحمد لله على سلامتك .. وسلامة الوالد .. وسلامة من كان معاكم ..

الله يحفظنا من هالتقلبات الجوية الغريبة ..

وجزاك الله كل خير على التنبيه ..


حفظكم الرحمن بحفظه ..
ومأجورين خير باذن الله ..

[بوخالد الذيب]

الحمد لله على سلامة الوالد وسلامتك

وانشاءالله كفاره يااخي العزيز

[ام شوشي]

الحمدلله على سلامتك وسلامة الوالد

[ANONYMOUS]

سلامات سلامات وماتشوفون شر..

[نيساني]

سلامات وماتشفون شر يالغالي

وخاطري في برلنز وذ فات مع مكسرات ههههههههه

[بوخالد911]

سلاماااات

خطاكم الشرر

[رنج سبورت]

لاحول ولاقوة الا بالله

ماتشوفون شر

ياليت اخوي لو تحط لنا صور السياره والاضرار اللي صادتها من هالجو

ومعوضين خير

[هذلان]

تستاهلون السلامه ... هذا من تقلبات المناخ في العالم كله .

من جهه تلقى بلاد يغطيها فيضان و من جهه بلاد طول عمرها بارده و السنوات الخيره تصير حر و امطار غريبه و في اوقات غير متوقعه .

ادري انه الموقف صعب ولكن لو تصور الموتر .. الله يعوضكم بموتر اخير منه

[Chanel]

الحمد لله على السلامه في الحديد ولافيكم

[qatari 111]

الحمدلله على سلامتكم
ويعطيك العافيه عالتنبيه

[halcrow]

حمدلله ع سلامتكم .. وانا بكرة الصباح مسافر للدمام وزين انك نبهتنا ..

ولو شفت عافور قدامي بكبس له عشان يفتح لي خخخخخخخخ

خطاكم الشر

[ابن مانع]

خطاكم الشر ماجورين ان شاءالله والله يعوضكم خير

[مسك روز]

الحمدالله على سلامتكم

ومشكور اخوي على التنبيه

[eastqatar]

خطاكم الشر - والله سلمكم

[طرفه]

الحمد لله على السلامه

[aljaber1]

الحمد الله على سلامتكم
وخطاكم الشر

[فارس قطر]

الحمدلله على سلامتككم

اخذها نصيحة اخوي حاول السفر اول الصباح

اوبعد صلاة العشاء وبتعدوا عن سفر وقت ظهيرة.

[**هـتــــــان**]

الحمد لله على سلامتك اخوي باسكن ماتشوف شر ...
وتسلم على التحذير ..ومايشوف الوالد شر ..

[الميزان 1969]

سلاااااااااااااااااااااااااااااااااااااااااااااااا ااااااامتك ألف سلامة

[بنت^البحرين1]

الحمدلله على سلامتكم والحمدلله اللي الله سلمكم

في الحديد ولا فيكم .. والحديد يتعوض ان شاءالله

[ليلة]

الحمد لله على سلامتك وسلامة الوالد

[alkuwari.999]

الحمدلله ع سلامتكم ,,
او ماتجووف شر يالذيــب ,,

[ماريسا]

الحمدلله على سلامتكم
انا ضد السفر بالبر

[الصريحه]

الحمد لله على السلامه وجزيت خير على التنبيه
الله العالم شنو هذا؟؟؟؟؟؟؟؟؟
انشاءالله مايكون غضب من رب العالمين
وتحملوا مره ثانيه واذا الجو متقلب لاتسافرون
وتصدقوا ولو بشيء بسيط

[الـقـاسـي]

لاحوه ولا قوه الا بالله الحمد لله على سلامتكم وماتشوفون شر

[ثاني]

الحمدالله على السلامة

[لطيف الروح]

اولا : الحمد لله على سلامتكم وشكراً لتحذيرنا . ثانياً : كيف تناثر جزاز السيارة علما بان جزاز السيارات الحديثه لا يتناثر عند الكسر . ثالثا : ياليت تحط صور لسيارتكم حتى نشوف الاضرار التى اصابة السيارة للعبرة فقط ولمعرفة قوة العاصفة .

[Rayane]

يا دافع البلا...

[بنت قطريه]

الحمد لله على سلامتكم

[OTOsan]

الحمد لله على سلامتكم وماتشوفون شر ..

[كاروهات]

اللي صار معاكم كوم .................. واللي معطينكم عيالهم هذا كوم ثاني الصراحة ................ !!!!!!!!!!!!

[qatar.com]

والله ياخوي انتي عزيز وغالي لاكن للاسف ماصدقت من الي قلته انت ولا شي لاني توني راد من الامارات ومريت على نفس خط كان عندي شغل بالجافورة والجو اوكي والقزاز خاصة الامريكي مايتناثر ثاني شي عجل مهوب برد عشان الموتر يتكسر قزازة


وماتشوف شر وطفل عمره اربع سنين اهله يعطونه لك يقولون وصله والله لردة المريخ ولا اوصله مع واحد غريب

[ورد الدوحه]

خطاكم الشر ،أزمة وعدت على خير،الحمدلله على سلامتكم

[hamoor4ever]

خلنا نعتقد ان القصه صحيحه اخواني وان احتمال اللي عطوهم عيالهم ناس يعرفونهم او يقربون لهم بس ياليت اخوي حطيت صور للسياره علشان نشوف الاضرار والواحد يقدر ياخذ احتياطاته

[qatari_xp]

بعض الردود مستفزه وفيها من التكذيب وتهويل الموضوع

انا ابي اعرف ليش حسن النيه بدا يتلاشى حتى في المواضيع العاديه

اخوي باسكن الحمدلله على سلامتكم وخطاكم الشر

[@السفير@]

الحمدلله على السلامه وماتشوفون شر ان شاءالله بس لوسمحت لي عندي نصيحه لاتخلي اي شخص يستعطفك ويحطك في مواقف مب طيبه ( الطفلين الي معاكم ) ترا الفزعه الي مب في مكانها تودي فداهيه ويمكن يجزى الاحسان بنكران ويحدث مالا يحمد عقباه ( لاتركب اي شخص على طريق سفر في اي بلد من بلدان العالم ) وجزاك الله خير على كل ماقمت به :nice:

[منهم وفيهم]

الحمدلله عالسلامه ...وخطاكم الشر

[طبعي كذا]

صدقت أخوي باسكن أمس كنامسافرين وصادفناالجواللي تقول سبحااان الله كأنه غضب بس الحمدالله ربي ستر .......لاتكون أنت السياره السوداءاللي منكسره دريشتهااللي وراءصوب السايق ..بس إنتبهوامن طريق السعوديه تحويلاته واجده .الله يسترعلى كل المسافرين إن شاءالله .

[السندان]

سلامات وخطاكم الشر .. وقصتكم الصراحه ..عجيبه لاكن مصدق يالغالي

[مستـريــح البـــال]

بيض الله وجهك ياخوي باسكن ،،

والحمد لله على السلامه ،،


:)

[s4qatar]

نوع السيارة ؟؟

[روضه الجنة]

الحمدلله على السلاامة

[إينشتاين]

الحمدالله على السلامة يالعسكريم :)

ومايشوف شر الوالد ويقوم بالسلامة......

[باسكن روبنز]

الله تسر عليك و الحمدالله على سلامة

مبارك عليك شهر مقدماً

علينا وعليك ،

ربي يسلمك من الشر ، :)



الحمدلله على سلامتك وسلامة الوالد وسلامة الأطفال ...

الله يسلمج ياموضي ، :)



الله يرحمنا
وجزاك الله خير على النصيحة

بس ودي اجيب طحين ومستلزمات رمضان من الحسا حتى لو اخوض بحر في السيارة:secret:

ابشرك ترا الحسا غرقانه امطار من العوافير الي حاستها ،:(

الله يسلمك يالغالي ، :)




الحمدلله ع سلامتكم ياباسكن .. وكفارة ان شاء الله

وفيك الخير جيت تحذرنا

وان شاء الله كل المسافرين لهناك ينتبهون على هالشي

المفروض في تحذيرات من مراكز بوسمره وسلوى ،

بس للأسف ،

الله يسلمج من كل مكروه يالراقيه ، :)




الحمدلله على سلامتك

الله يسلمك جاسم ،




ما تشوف شر اخوي الكريم ..

والحمد لله على سلامتك .. وسلامة الوالد .. وسلامة من كان معاكم ..

الله يحفظنا من هالتقلبات الجوية الغريبة ..

وجزاك الله كل خير على التنبيه ..


حفظكم الرحمن بحفظه ..
ومأجورين خير باذن الله ..

والله يا بن مفتاح كأنه مرينا بفيلم ،

وانت الي جزاك الله خير على كلامك الطيب والله يسلمك من الشر يالغالي ، :)




الحمد لله على سلامة الوالد وسلامتك

وانشاءالله كفاره يااخي العزيز

ان شاء الله ، وجزاك الله خير يالذيب ، :)

[باسكن روبنز]

الحمدلله على سلامتك وسلامة الوالد


سلامات سلامات وماتشوفون شر..


سلامات وماتشفون شر يالغالي

وخاطري في برلنز وذ فات مع مكسرات ههههههههه


سلاماااات

خطاكم الشرر


لاحول ولاقوة الا بالله

ماتشوفون شر

ياليت اخوي لو تحط لنا صور السياره والاضرار اللي صادتها من هالجو

ومعوضين خير


تستاهلون السلامه ... هذا من تقلبات المناخ في العالم كله .

من جهه تلقى بلاد يغطيها فيضان و من جهه بلاد طول عمرها بارده و السنوات الخيره تصير حر و امطار غريبه و في اوقات غير متوقعه .

ادري انه الموقف صعب ولكن لو تصور الموتر .. الله يعوضكم بموتر اخير منه


الحمد لله على السلامه في الحديد ولافيكم


الحمدلله على سلامتكم
ويعطيك العافيه عالتنبيه


حمدلله ع سلامتكم .. وانا بكرة الصباح مسافر للدمام وزين انك نبهتنا ..

ولو شفت عافور قدامي بكبس له عشان يفتح لي خخخخخخخخ

خطاكم الشر


الله يسلمكم من الشر ولا تواجهونه يارب ،

والسياره جديده ياجماعة الخير قابض الخط فيها تحت التمرين وكانت ماشيه 250 كيلو ،

وللاسف ماصورتها واليوم الصبح اتصلنا في شركة الشفر وجوو خذوها على سطحه ،

والسياره نوعها سوبربان 2010 ،

اذا مريت الشركه بصورها لكم ،

وعد ، :nice:

[غزلان]

الحمد لله على سلامتكم اخوي

ورمضان كريم

[باسكن روبنز]

خطاكم الشر ماجورين ان شاءالله والله يعوضكم خير


الحمدالله على سلامتكم

ومشكور اخوي على التنبيه


خطاكم الشر - والله سلمكم




الحمد لله على السلامه



الحمد الله على سلامتكم
وخطاكم الشر


الحمدلله على سلامتككم

اخذها نصيحة اخوي حاول السفر اول الصباح

اوبعد صلاة العشاء وبتعدوا عن سفر وقت ظهيرة.


الحمد لله على سلامتك اخوي باسكن ماتشوف شر ...
وتسلم على التحذير ..ومايشوف الوالد شر ..


سلاااااااااااااااااااااااااااااااااااااااااااااااا ااااااامتك ألف سلامة


الحمدلله على سلامتكم والحمدلله اللي الله سلمكم

في الحديد ولا فيكم .. والحديد يتعوض ان شاءالله



الحمد لله على سلامتك وسلامة الوالد


الحمدلله ع سلامتكم ,,
او ماتجووف شر يالذيــب ,,


الحمدلله على سلامتكم
انا ضد السفر بالبر

احلى شي سفرة البر مع المخفي الكامل ،:nice:

الله يسلمكم من كل شر ياجماعة الخير ،

والله من دخلت البيت ركض على الكمبيوتر وبلغتكم التحذير لانه ادري بشعبية المنتدي وواجد ناس يدخلونه ،

ولو عندي بلاك بيري جان سويت له برود كاست مادري شيسمونه بس ماتعامل مع هالتقنيه واول مره حسيت بتكون لها فايده ،:tease:

والحديد قلعته يتعوض والله يعوضنا خير لا التأمين يعوضنا يقولون انتو خارج البلاد ،

وتأمين السعوديه ضد الغير حتي مرور سلوى ماعطانا تقرير بألي صار يقول تأمينكم ضد الغير! ،

اي صح نسيت اقول للبيع سوبربان بحاله جيده جداً:eek5: << دورني هههههه ،

الله يجزاكم خير على كلامكم الطيب ،:victory:

[toomi9]

ماتشوف شرر والله
الله يحمي جميع المسلمين يارب

[باسكن روبنز]

الحمد لله على السلامه وجزيت خير على التنبيه
الله العالم شنو هذا؟؟؟؟؟؟؟؟؟
انشاءالله مايكون غضب من رب العالمين
وتحملوا مره ثانيه واذا الجو متقلب لاتسافرون
وتصدقوا ولو بشيء بسيط

الله يسلمج وصادقه بخصوص الصدقه ، وان شاء الله ،

والله يالصريحه اليوم مكلم سعودي حتي اهل الاحساء غرقانين بمطرهم وهواهم على كلام واحد من اهلها ،:weeping:

معقوله تقلبات الجو صارت جذي مره وحده بلا تحذير رسمي! ،:anger1:



لاحوه ولا قوه الا بالله الحمد لله على سلامتكم وماتشوفون شر

الله يسلمك يالقاسي وماتشوف الشر ولا تواجهه يالشيخ ، :)




الحمدالله على السلامة

الله يسلمك يا ثاني ، :)




اولا : الحمد لله على سلامتكم وشكراً لتحذيرنا . ثانياً : كيف تناثر جزاز السيارة علما بان جزاز السيارات الحديثه لا يتناثر عند الكسر . ثالثا : ياليت تحط صور لسيارتكم حتى نشوف الاضرار التى اصابة السيارة للعبرة فقط ولمعرفة قوة العاصفة .

الله يسلمك من الشرر ، :)

للأسف هذا الي صار والجزاز تناثر والقزاز دخل حتي في اذني وحلجي والله يستر لايكون دخل بعيوني لانه حاس بألم منها ،

طلع الامريكي تعبان والله لو مسافر على البنتلي ماظني صار لنا كذا ،

طويل العمر انا مالومك لو ماتصدق والسياره في وكالة الشفر وابشر برقمها على الخاص وياريت تروح تشوفها بنفسك ولا تهون وبتشوف القزاز متناثر داخل السياره كلها ،




يا دافع البلا...

:(




الحمد لله على سلامتكم

الله يسلمج يابنت القطريه ،




الحمد لله على سلامتكم وماتشوفون شر ..

تسلم يا الياباني وفيك الخير والله ، :)


اللي صار معاكم كوم .................. واللي معطينكم عيالهم هذا كوم ثاني الصراحة ................ !!!!!!!!!!!!

لو تسافرين خطوط البر كثير جان بتشوفين اشياء اغرب من مواقف الناس ، :)



والله ياخوي انتي عزيز وغالي لاكن للاسف ماصدقت من الي قلته انت ولا شي لاني توني راد من الامارات ومريت على نفس خط كان عندي شغل بالجافورة والجو اوكي والقزاز خاصة الامريكي مايتناثر ثاني شي عجل مهوب برد عشان الموتر يتكسر قزازة


وماتشوف شر وطفل عمره اربع سنين اهله يعطونه لك يقولون وصله والله لردة المريخ ولا اوصله مع واحد غريب

مالومك لو ماتصدق لاني انا مب مستوعب الي صار للحين ،

وشوف واحد من الاعضاء مأكد كلامي وقالي انه كان موجود وشاف الجو الفظيع شلون صار ،

وامس واحد من الربع راد من الامارات ولا كان حولهم شي ترا المسافه كبيره مابين الجافوره وخط البطحاء يالغالي ،

الحين يوصلك رقم السياره على الخاص ،

واتمنى تحرجني وتروح الوكاله بالصناعيه وتشوف الموتر وتدخل المنتدي وتكذبني كاش جدام الاعضاء وانا مستعد اخذ باند من الاداره ان كنت كذاب او ابالغ ،

[باسكن روبنز]

خطاكم الشر ،أزمة وعدت على خير،الحمدلله على سلامتكم

خطاج اللاش والله يسلمج ،

الحمدلله على كل حال ، :)



خلنا نعتقد ان القصه صحيحه اخواني وان احتمال اللي عطوهم عيالهم ناس يعرفونهم او يقربون لهم بس ياليت اخوي حطيت صور للسياره علشان نشوف الاضرار والواحد يقدر ياخذ احتياطاته

ابشرر يا هامور واوعدك اصور الموتر اول ماروح الوكاله ،

والناس الي عطونا اعيالهم مانعرفهم شفناهم بمحطة بترول ، :)

الولد عمره 20 اتوقع والبنت عمرها 4 سنين ،



بعض الردود مستفزه وفيها من التكذيب وتهويل الموضوع

انا ابي اعرف ليش حسن النيه بدا يتلاشى حتى في المواضيع العاديه

اخوي باسكن الحمدلله على سلامتكم وخطاكم الشر

في ناس الله يهداهم تلقاهم ماسافروا بطريق البر الا مره او مرتين بالعمر ومبسطين ورا كيبورد ولا يدرون شسالفه ،:rolleyes2:

يحسبون الدنيا امان والاعصاير الي تصير بالبلدان الي برع كأنه مستحيل توصلنا! ،

اعوذ بالله تدري هذي اقوا تجربه احصلت لي بطريق السفر والله والي عنده ،

الله يسلمك من كل مكروه ياقطري ، :)




الحمدلله على السلامه وماتشوفون شر ان شاءالله بس لوسمحت لي عندي نصيحه لاتخلي اي شخص يستعطفك ويحطك في مواقف مب طيبه ( الطفلين الي معاكم ) ترا الفزعه الي مب في مكانها تودي فداهيه ويمكن يجزى الاحسان بنكران ويحدث مالا يحمد عقباه ( لاتركب اي شخص على طريق سفر في اي بلد من بلدان العالم ) وجزاك الله خير على كل ماقمت به :nice:

نصيحتك على العين والراس واشكرك عليها ،

والله يالسفير عمري ماوصلت حد والوالد الي رضى نوصلهم ولو كنت بروحي ماكان وديتهم ،

ابوي انكسر خاطره على البنت وقالهم تعالوا ،

الله يسلمك من الشرر يالغالي وتسلم على النصيحه ودعوتك الطيبه ، :)



الحمدلله عالسلامه ...وخطاكم الشر

الله يسلمك يا منا وفينا ، :)



صدقت أخوي باسكن أمس كنامسافرين وصادفناالجواللي تقول سبحااان الله كأنه غضب بس الحمدالله ربي ستر .......لاتكون أنت السياره السوداءاللي منكسره دريشتهااللي وراءصوب السايق ..بس إنتبهوامن طريق السعوديه تحويلاته واجده .الله يسترعلى كل المسافرين إن شاءالله .

جزاك الله خير للتأكيد والله كنت ناطر أي حد يشارك بهالمشاركه لانه الخط كان مليان مواتر اهل قطر امس ،

سيارتنا شفروليه سوبربان 2010 مادري اذا هي الي تقصدها ولا لا ،

والله يستر على الجميع تسلم يا طبعي كذا ، :)



سلامات وخطاكم الشر .. وقصتكم الصراحه ..عجيبه لاكن مصدق يالغالي

اشكرك والله يالسندان وانت اول واحد بحط له صور الموتر ، :victory:






سيناريو فلم هندي :nice:

غطيت على الهنود

ههههههههههههههههههههههه



هههههههه من اخلاقك العاليه يالطيب ،

انا مب ملزوم اعلمك شيم الرجال ،

تسلم على المرور بس لاعاد توطوط اهني مره ثانيه ، :tease:




بيض الله وجهك ياخوي باسكن ،،

والحمد لله على السلامه ،،


:)

الله يسلمك يا مستريح البال ،

ووجهك ابيض يالشيخ ، :)

[باسكن روبنز]

نوع السيارة ؟؟

شفروليه سوبربان 2010 ،

جديده بقراطسيها لك خاطر تشتريها ، :weeping:




الحمدلله على السلاامة

الله يسلمج ياروضه ،




الحمدالله على السلامة يالعسكريم :)

ومايشوف شر الوالد ويقوم بالسلامة......

فيك الخير وعسى عمرك طويل يا اينشتاين ،

تسلملي على هالدعوه الطيبه والله ، :)


الحمد لله على سلامتكم اخوي

ورمضان كريم

مبروك عليج وعلينا الشهر الفضيل ياغزلان ،

والله يسلمج من كل شر ، :)


ماتشوف شرر والله
الله يحمي جميع المسلمين يارب

الشر مايجيج يا تومي ،

مشكوره على الدعوه الطيبه يالطيبه ، :)

[بورصجي_جديد]

حمدلله على السلامه اخوي

وفعلا وقت الهوا الشديد والمطر والغبره انا كنت تووني تقريبا واصل الحسا متجه الى الدمام كنت وقتها عند البستان مول تقريبا شارع الثريا فعلا الي صار كان شبه اعصار

وفي شجر قدام عيوني تقلعت من مكانها وعواميد كهرباء طاحت من مكانها
نسال الله العافيه

وحمدلله على السلامه

[قلم محايد]

بالسلامة يالغالي والله ضايقني الخبر .. و فيه نفس الوقت خوفني لاني اسافر على هالخط ..

بارك الله فيك على التحذير بس مافيه طريقة الواحد يقدر يعرف الاحوال الجوية في الخط قبل لا يطلع ؟!

و بالسلامة ان شاء الله لك و للوالد و الله حفظكم ياخوي و يتعوض اللي صار بالسيارة ان شاء الله و باقي الجزاز انشالله يطلعونه منكم ..

[جهام]

الحمدلله على سلامتكم

[latty]

الحمدلله على سلامتك

[المستثمر الصغير88]

اللهم ياكفي البلاء

ماتشوفون شر....

جلت قدرته سبحانه وتعالى

أذكروا الله يذكركم وأستغفروه من الذنوب....

[باسكن روبنز]

بالسلامة يالغالي والله ضايقني الخبر .. و فيه نفس الوقت خوفني لاني اسافر على هالخط ..

بارك الله فيك على التحذير بس مافيه طريقة الواحد يقدر يعرف الاحوال الجوية في الخط قبل لا يطلع ؟!

و بالسلامة ان شاء الله لك و للوالد و الله حفظكم ياخوي و يتعوض اللي صار بالسيارة ان شاء الله و باقي الجزاز انشالله يطلعونه منكم ..

الله يسلمك ياقلم محايد ،

فيك الخير ياطويل العمر ، :)


الحمدلله على سلامتكم



الحمدلله على سلامتك


اللهم ياكفي البلاء

ماتشوفون شر....

جلت قدرته سبحانه وتعالى

أذكروا الله يذكركم وأستغفروه من الذنوب....

يسلمك ربي من كل مكروووه ياجهام ولاتييه ومستثمر صغير ، :)

الله لايوريكم مكروه في حبيب ،

[باسكن روبنز]

حمدلله على السلامه اخوي

وفعلا وقت الهوا الشديد والمطر والغبره انا كنت تووني تقريبا واصل الحسا متجه الى الدمام كنت وقتها عند البستان مول تقريبا شارع الثريا فعلا الي صار كان شبه اعصار

وفي شجر قدام عيوني تقلعت من مكانها وعواميد كهرباء طاحت من مكانها
نسال الله العافيه

وحمدلله على السلامه

تسلم للتأكيد يابورصجي ،:victory:

والله حفظكم ونجاكم ونصيحه ياخووي أجلو رجعتكم بالدوحه لين ماتتأكدون من حالة الجو مع أرصاد السعوديه ،

الله يحفظكم يارب ويردكم سالمين للبلاد ،




:)

[miss cute]

الحمدالله على سلامتكم
زين قريت موضوع اليوم والا لو قريته من يومين كان مارقدت لان عندي ناس مسافرين

بخصوص الاخوان اللي مكذبين الموضوع يعني انا لو بكتب مره ثانيه شي لازم أحلف لكم بدايه الموضوع ونهايته وبعد لازم اصور ماتبون بعد ادق عليكم حزتها هههههههههههه

والحمدالله على سلامتكم مره ثانيه وفيك الخير أنك نبهتنا على طول ...

[bo_hamad]

حمدلله على سلامتكم ورجوعكم سالمين

[ممنوع اللمس]

الحمد لله عالسلامه وما تشوف شر يارب وجزاك الله خير عالتحذير

[السنافية]

:eek5::eek5:
يا سلاااااااااااام الموضوع تحول لمجالس الشعراء 00اعانكم الله
عموما
الحمدلله على السلامة يا صاحب الموضوع 00 وخطاك السوء

[إعلامي قطر]

..

الحمد لله على سلامتك أخوي والحمد لله على سلامة والدك والمرافقين..

وأرثي على حال كل شخص شكك بكلام باسكن بطريقه مقززه
كأن باسكن قال شي جديد وما كأن هالأمطار والتقلبات
المناخيه تصيد السعوديه من مده ليست بالقصيره
حماك الله يالمملكه من كل سوء..

..

[wadha-qa]

الحمد لله على سلامتكم و ما تشووفون شر و الله يعوضكم احسن من هالسياره

بس استغربت شلون يخلون عيالهم يرجعون مع ناس غرب اخوي افرض انهم خاطفين البنت وش بيكون موقفك ؟ لا تامنون لاي حد في السفر الله يحفظكم !!

[وبشرالصابرين]

ماتشوفون شر اخوي الكريم وسلامات
والله غالب على أمره ولكن أكثر الناس لا يعلم


بس يارت صوره السياره لانه حسب كلام الشركات الزجاح يكون متماسك عند ا


يارت صوره السياره خاصه انها مديل 2010 يمكن خلال في التصنيع

ننتظر الصور

؟؟

[لطيف الروح]

لازال الطلب قائم الصور ثم الصور ثم الصور

[النهار]

الحمدلله على سلامتك وسلامة الوالد وسلامة الأطفال

[لطيف الروح]

الله يسلمج وصادقه بخصوص الصدقه ، وان شاء الله ،

والله يالصريحه اليوم مكلم سعودي حتي اهل الاحساء غرقانين بمطرهم وهواهم على كلام واحد من اهلها ،:weeping:

معقوله تقلبات الجو صارت جذي مره وحده بلا تحذير رسمي! ،:anger1:




الله يسلمك يالقاسي وماتشوف الشر ولا تواجهه يالشيخ ، :)





الله يسلمك يا ثاني ، :)





الله يسلمك من الشرر ، :)

للأسف هذا الي صار والجزاز تناثر والقزاز دخل حتي في اذني وحلجي والله يستر لايكون دخل بعيوني لانه حاس بألم منها ،

طلع الامريكي تعبان والله لو مسافر على البنتلي ماظني صار لنا كذا ،

طويل العمر انا مالومك لو ماتصدق والسياره في وكالة الشفر وابشر برقمها على الخاص وياريت تروح تشوفها بنفسك ولا تهون وبتشوف القزاز متناثر داخل السياره كلها ،





:(





الله يسلمج يابنت القطريه ،





تسلم يا الياباني وفيك الخير والله ، :)



لو تسافرين خطوط البر كثير جان بتشوفين اشياء اغرب من مواقف الناس ، :)




مالومك لو ماتصدق لاني انا مب مستوعب الي صار للحين ،

وشوف واحد من الاعضاء مأكد كلامي وقالي انه كان موجود وشاف الجو الفظيع شلون صار ،

وامس واحد من الربع راد من الامارات ولا كان حولهم شي ترا المسافه كبيره مابين الجافوره وخط البطحاء يالغالي ،

الحين يوصلك رقم السياره على الخاص ،

واتمنى تحرجني وتروح الوكاله بالصناعيه وتشوف الموتر وتدخل المنتدي وتكذبني كاش جدام الاعضاء وانا مستعد اخذ باند من الاداره ان كنت كذاب او ابالغ ،

للأمانة لم يصلني حتى الان رقم السيارة على الخاص حسب الوعد علماً بان صندوق الرسائل خالي من اي رسالة يعني اقدر استقبل اي رسائل دون اي مشكلة

[العليا]

يا سلام سلم

وش هالكذب و التهور اللي ماله أقصى

و الله أنا كنت هناك و بالتحديد في الوقت اللي بدأ فيه الهوا و الغبار
و زخات مطر و الله ما أستمر حتى 5 دقايق
و رجع الجو صافي و لا فيه الا الخير


أشدعوه القزاز تكسر وراح بجسمك
شكلك حلمان حلم مرعب


تعوذ من ابليس و اتفل عن يسارك 3 مرات

[دلة الرسلان]

الحمدالله على سلامتكم انت والوالد

[سهم طايش]

و الله يا جماعة انا بغيت استوعب و اصدق لكن ما قدرت مب تكذيب للاخ باسكن لكن في شي يتصدق و شي ما يتصدق 0

يعني عايلة لا تعرفهم و لا يعرفونك بيعطونك طفل عمره 4 سنوات عند مركز سلوى علشان تودية الحسا ؟؟ و الله يا خوي قوية و طفت الليتات اللي في البيت 0
انا لو عندي صخله ماخليتهم يودونها شلون طفل صغير 0

بعدين عافور بيحرك الجمس من الشارع لين الرمل شدعوة كلورادوا ذي مب الحسا !!

و شمعنى القزاز ما صادكم الا انتوا وين اليهال اللي معاكم ما صادهم شي

اسمحلي اكيد مكثر من المندي ذاك اليوم مع اللبن الخاثر و غطت عينك و حلمت بالعافور

[لـبـيـه]

الله يسلمك ياقلم محايد ،

فيك الخير ياطويل العمر ، :)








يسلمك ربي من كل مكروووه ياجهام ولاتييه ومستثمر صغير ، :)

الله لايوريكم مكروه في حبيب ،





لانك لو تجالس رجال وتدل مجالسهم ماكان ذي ردك ، :telephone:

لكن اخلاقك واضحه يالطيب انت مقهور مني لانه ماكان عاجبك ردي بموضوعك بو ريال مال مواقف النجاده ههههه ،

ع العمووم وفر وقتك الثمين مب لازم ترد دام مب مصدق وثاني مره اطردك من الموضوع لو سمحت خل عندك شوية كرامه اذا تعرفها ،
ودامك تحب الهنود وايد عيل بتفهم الي اقصده لك يالله جلوو ،:victory:

قويه بصراحه

[جنوب الدوحه]

خطاكم الشر .. ياخي انا ما احمل اي شخص على الطريق ولا اخذ اغراض اوصلها من دون ما اعرفه معرفه شخصيه لن فيها مسؤليه كبيره ما بالك باطفااال .. الحمد لله على سلامتكم اخوي وشكرا على التنبيه ..

.. لله الحمد من قبل ومن بعد ..

[barod]

الحمدلله على سلامتكم

[باسكن روبنز]

على فكره ياجماعه انا ذكرت لكم بلبدايه الموضوع اني كنت مسافر للبحرين لعلاج الوالد ،

وامس كانت طيارتنا و رجعتنا يوم الاحد الصبح ان شالله وهذا سبب دخولي القليل للمنتدي ،

ووعدتكم اروح لي الكراج واصور الموتر واحطه لكم بالمنتدي بموضوع جديد ،

على فكره اخر تطورات الموضوع انه شركة الشفروليه خذت السياره على سطحه من بيتنا ،

وفي مندوب للشركه الام في مقرهم في دبي راح يمر الدوحه هالاسبوع ويشوف حالة السياره ،

وقالوا لنا خلوها على حالها بالجزاز المتكسر لانهم مستغربين شلون تكسر وتناثر الجزاز بكل سهوله ،

والله لو تشوفون شكل السياره من برع وداخل بتظنون انه في قطاع طرق ملاحقينا ومثورين فينا! ،

ان شالله يعوضونا بوحده جديده لانه التأمين مايعوضنا تصليحها برع البلاد ،

وانا بعتث رقم السياره على الخاص للي كانوا متشككين وطلبت منهم يمرون وكالة الشفروليه ويشوفون حالة السياره ويسألون موظفين الكراج بتفاصيل الي فيها وموعد اخذهم للسياره ،

وذكرت للي تشككو انهم ياخذون التفاصيل كامله ويقارنون طرح موضوعي مع اضرار السياره ،

وان طلعت كذاب حسب مازعم البعض خل الاداره يصكوني باند بأثر رجعي ،:tease:

دعواتكم لنا بالشفاء ولو بالقلب ،

وجزاكم الله خير على الاهتمام واهم شي وصلكم التحذير وهذا كان اساس موضوعي ، :nice:

[باسكن روبنز]

ماتشوفون شر اخوي الكريم وسلامات
والله غالب على أمره ولكن أكثر الناس لا يعلم


بس يارت صوره السياره لانه حسب كلام الشركات الزجاح يكون متماسك عند ا


يارت صوره السياره خاصه انها مديل 2010 يمكن خلال في التصنيع

ننتظر الصور

؟؟

ابشر فيها يالطيب ،

يوم الاثنين بالكثير وشوف ردي الي فوق ، :)

وعقب الي شفته طاح من عيني الامريكي ،

والله غير الالماني مافي وشوف فرق الكوالتي بينه وبين الامريكي ،

والشر مايجيك ولا تواجهه يالذيب ، :nice:



لازال الطلب قائم الصور ثم الصور ثم الصور

ان شالله تراني ماشردت للحين موجود بالمنتدي بس اصبر يومين الله يسلمك ، :)




الحمدلله على سلامتك وسلامة الوالد وسلامة الأطفال

الله يسلمك يالنهار وعسى نهارك يدووم بالخير ، :victory:



للأمانة لم يصلني حتى الان رقم السيارة على الخاص حسب الوعد علماً بان صندوق الرسائل خالي من اي رسالة يعني اقدر استقبل اي رسائل دون اي مشكلة

وللامانه شوف ردودك السابقه لانك ماطلبت مني ابعث لك الرقم ،

لطيف الروح خلك لطيف وحقاني الله لايهينك ،:rolleyes2:

والحين بابعث لك الرقم واسمي بالكامل ورقم جوالي بعد ،

ومستعد اجيك لي بيتكم واوديك لوكالة الشفر وعقبها ارجع واقهويك عندي بالمجلس ، :victory:


يا سلام سلم

وش هالكذب و التهور اللي ماله أقصى

و الله أنا كنت هناك و بالتحديد في الوقت اللي بدأ فيه الهوا و الغبار
و زخات مطر و الله ما أستمر حتى 5 دقايق
و رجع الجو صافي و لا فيه الا الخير


أشدعوه القزاز تكسر وراح بجسمك
شكلك حلمان حلم مرعب


تعوذ من ابليس و اتفل عن يسارك 3 مرات

ان شالله ،

اهم شي انت بخير وعافيه احمد ربك والله ،

وانا حددت المكان الي صار فيه هالعافور وخط الحسا الله يسلمك 200 كيلو ولا انت ماتعرف تحسب ، :)

على العموم تسلم على نصيحتك واهم شي انك بخير ورديت لاهلك سالم وحمدلله على سلامتك ، :victory:



الحمدالله على سلامتكم انت والوالد

يسلمج ربي من كل شر يادلة الرسلان ، :)



و الله يا جماعة انا بغيت استوعب و اصدق لكن ما قدرت مب تكذيب للاخ باسكن لكن في شي يتصدق و شي ما يتصدق 0

يعني عايلة لا تعرفهم و لا يعرفونك بيعطونك طفل عمره 4 سنوات عند مركز سلوى علشان تودية الحسا ؟؟ و الله يا خوي قوية و طفت الليتات اللي في البيت 0
انا لو عندي صخله ماخليتهم يودونها شلون طفل صغير 0

بعدين عافور بيحرك الجمس من الشارع لين الرمل شدعوة كلورادوا ذي مب الحسا !!

و شمعنى القزاز ما صادكم الا انتوا وين اليهال اللي معاكم ما صادهم شي

اسمحلي اكيد مكثر من المندي ذاك اليوم مع اللبن الخاثر و غطت عينك و حلمت بالعافور

سهم يزاك الله خير على دعوتك الطيبه وبس ،

غير هذا ياريت تتحمد ربك انك بخير وعافيه مع والدينك واعيالك في البيت ،

والله لايوريك الي شفته وانحطيت فيه ،

ترا غضب ربك مايعرف الحسا ولا كولورادو وعلى روحتك الجايه للحسا انشد اهلها عن علوم العوافير بالفتره هذي وبتعرف بنفسك ان كنت كذاب ولا حلمان ،

الله يحفظك لعين ترجيك يالطيب ، :)

والله لايهينك بعد ماتتأكد بنفسك ياريت تجيب لي معاك صحنين مندي و روب مراعي ، :victory:

[لطيف الروح]

على فكره ياجماعه انا ذكرت لكم بلبدايه الموضوع اني كنت مسافر للبحرين لعلاج الوالد ،

وامس كانت طيارتنا و رجعتنا يوم الاحد الصبح ان شالله وهذا سبب دخولي القليل للمنتدي ،

ووعدتكم اروح لي الكراج واصور الموتر واحطه لكم بالمنتدي بموضوع جديد ،

على فكره اخر تطورات الموضوع انه شركة الشفروليه خذت السياره على سطحه من بيتنا ،

وفي مندوب للشركه الام في مقرهم في دبي راح يمر الدوحه هالاسبوع ويشوف حالة السياره ،

وقالوا لنا خلوها على حالها بالجزاز المتكسر لانهم مستغربين شلون تكسر وتناثر الجزاز بكل سهوله ،

والله لو تشوفون شكل السياره من برع وداخل بتظنون انه في قطاع طرق ملاحقينا ومثورين فينا! ،

ان شالله يعوضونا بوحده جديده لانه التأمين مايعوضنا تصليحها برع البلاد ،

وانا بعتث رقم السياره على الخاص للي كانوا متشككين وطلبت منهم يمرون وكالة الشفروليه ويشوفون حالة السياره ويسألون موظفين الكراج بتفاصيل الي فيها وموعد اخذهم للسياره ،

وذكرت للي تشككو انهم ياخذون التفاصيل كامله ويقارنون طرح موضوعي مع اضرار السياره ،

وان طلعت كذاب حسب مازعم البعض خل الاداره يصكوني باند بأثر رجعي ،:tease:

دعواتكم لنا بالشفاء ولو بالقلب ،

وجزاكم الله خير على الاهتمام واهم شي وصلكم التحذير وهذا كان اساس موضوعي ، :nice:

ما وصلني شي على الخاص منك . وعلى فكرة ان ماتدعيه في المنتدى ان زجاج سيارتكم الشفر 2010 قد تكسر و تناثر في كل مكان داخل السيارة نتيجة العاصفة مما ادى الي اصابتكم البليغه حسب أفادتك ليس بالموضوع البسيط واقصد تناثر زجاج السيارة والاصابة نتيجة ذلك ممايعني ان هذا النوع من السيارات غير أمن ويشكل خطورة لمستخدمية و يعرض حياتهم وحياة مستخدمي الطريق للخطر وبالتالي يجب ان تتدخل الجهات ذات الاختصاص بالدولة للتاكد مما تدعيه لان شريحه كبيرة من أهل قطر وكذلك الوافدين يستخدمون هذا النوع من السيارات . و اخيراً أتمني ان يكون أدعائك صحيح وليس أشاعه

[روح الاطلس]

احنا مصدقينك بس لان الموضوع شوي غريب وخاصة تشيل معك اطفال ومسألة الرعب اللي صار للسيارة

بس العيال ماصار لهم شي؟؟

وعشان اللي طلبوا صور من السيارة ويصدقون اكثر ياليت تصور بعض الجروح اللي صابتك هههه ماتشوفون شر وسلامة الوالد من كل شر

[الميزان 1969]

المفروض الحوار والنقاش أكبر من هالمستوى
أعتقد عيب جدا على الاخوان المشككين في مصداقية الاخ باسكن ،أن يتهجموا بهذا الأسلوب ، لأن مافي انسان عاقل بيتمنى لنفسه هالشر ، والأخ ماشرد ، قال لكم الأثنين بيحط الصور وبيلجم الألسنة ..... لكن للأسف بعد شنو ...
مشكلتنا ان تربية الحوار في مدارسنا قائمة على التكذيب والتهجم بدل الحوار القائم على أسس وأدب وأدلة
وأعتقد موضوع الاخ باسكن الى الان قام على أسس ( حيث وصف السيارة والمكان والزمان وأسماء مناطق وحساب طرق وغيرها ) وأيضا على أدب ورقي في (الرد على المشككين والمستنكرين ) وبقيت الأدلة ( وقد أكد بأن له عودة لوضعها وانها فقط مسألة وقت ) ....
لذا أعتقد أن من الأولى ان نتحمد له بالسلامة أولا ثم نطلب مزيد من الايضاح وبأسلوب راقي بدل التهجم والتكذيب ....
لازلنا نفتقد لأدب الحوار والنقد البناء والنقاش الفكري الراقي

[السيف5]

باسكن روبنز

الحمد على سلامتك انت والوالد وجعلكم ماتشوفون شر

[المتألم]

اولا الحمد لله على السلامه
ثانيا يوم الثلاثاء كنت على الخط وكانت في غيوم لين الظهر ومافي شمس الا لحظات وتختفي بس الجو
كان حلو وصافي
وليلة الثلاثاء كنت بالرياض وكان في زخات مطر خفيفه جدا حتى تكلموا عنها بالرداو

ثالثا ياليت نشوف صور السياره لأن الوصف بصراحه يخلي الواحد يقول الحمد لله أن ما صار لكم شئ
وخصوصا زجاج السيارة ما يتكسر بسهولة

وخطاكم الشر أخوي

[باسكن روبنز]

خطاكم الشر .. ياخي انا ما احمل اي شخص على الطريق ولا اخذ اغراض اوصلها من دون ما اعرفه معرفه شخصيه لن فيها مسؤليه كبيره ما بالك باطفااال .. الحمد لله على سلامتكم اخوي وشكرا على التنبيه ..

.. لله الحمد من قبل ومن بعد ..

الحمدلله رب العالمين ،

وبخصوص توصيل الاطفال صدقت فيها ،

صدقني لو علي انا وبروحي جان ماشمو سيت الموتر حتي:secret: بس الوالد ومايهوى ،

والله يسلمك من كل مكرووه يالذيب ، :)



الحمدلله على سلامتكم

الله يسلمك من كل شر وبارود ،:eek5:

نكك اجرااااااام وعجييييييب ،:nice:



ما وصلني شي على الخاص منك . وعلى فكرة ان ماتدعيه في المنتدى ان زجاج سيارتكم الشفر 2010 قد تكسر و تناثر في كل مكان داخل السيارة نتيجة العاصفة مما ادى الي اصابتكم البليغه حسب أفادتك ليس بالموضوع البسيط واقصد تناثر زجاج السيارة والاصابة نتيجة ذلك ممايعني ان هذا النوع من السيارات غير أمن ويشكل خطورة لمستخدمية و يعرض حياتهم وحياة مستخدمي الطريق للخطر وبالتالي يجب ان تتدخل الجهات ذات الاختصاص بالدولة للتاكد مما تدعيه لان شريحه كبيرة من أهل قطر وكذلك الوافدين يستخدمون هذا النوع من السيارات . و اخيراً أتمني ان يكون أدعائك صحيح وليس أشاعه

اسمحلي مابعثت لك مساعه لانشغالي شوي ،

وبعثت لك توني على الخاص تفاصيلي كامله من اسمي ورقم جوالي ورقم السياره وارحب باتصالك أي وقت ياخووي ،:)

وصااااادق بخصوص الامان لانه اذا سياره عائليه ومشهوره مثل هذا مافيها نظام سيفتي ،

هذا والسياره امريكيه مع العلم انه اكثر مواصفات السيفتي في امريكا! ،

مصيبه للأسف ،

وعلى عيني وراسي يالطيب وماصار الا الخير وانتظر الصور هاليومين بس ارد البلاد ،

عزيز وغالي يالطيف الروح وبتشوف بعينك بأذن الله انه صحيح ، :)




احنا مصدقينك بس لان الموضوع شوي غريب وخاصة تشيل معك اطفال ومسألة الرعب اللي صار للسيارة

بس العيال ماصار لهم شي؟؟

وعشان اللي طلبوا صور من السيارة ويصدقون اكثر ياليت تصور بعض الجروح اللي صابتك هههه ماتشوفون شر وسلامة الوالد من كل شر

تسلملي فديت خشمك ،

صادق انه الموضوع شوي غريب لانه ماقد حد جا وتكلم بمنتديات بمثل هالامور الا نادراً ،

بس والله وربي الشاهد علي ليوم الدين اني حسيت ابلاغي لكم بألي صار امانه برقبتي لاني عارف مدى مصداقية المنتدي عند الناس ،

والقصد الاول والاخير تحذير الناس للافاده ولا انا ماربحت ولا باستفيد شي من هالموضوع والبلبله كلها ،

بخصوص الاطفال ، الولد الي معانا انجرح جروح بسيطه والبنت الحمدلله ماصادها مكروه بس للأسف ترووعت من قلب ،

والسبب ياطويل العمر لاني فزيت وحذفت عليها ثوبي وغترتي الجداد المعلقين بالسيت الخلفي ،

كل شي صار بسرعه بسرعه والشاهد الله انه الموتر على ضخامته زحف داخل البر مسافه مب اقل من 100 متر والحمدلله انه مانقلب فينا واتوقع من وزنه الثقيل ،

بالنسبه للجروح بسيطه ماتنشااف شقوق الجزاز بكاميرة النوكيا ههههههه ،

حياك اعزمك على احلى كرك واتشرف بمعرفتك على ردك الطيب وتشوف كل شي بعينك ، ;)

وبالمره في سوبربان نظيييييييييييييييف موديل 2010 اذا لك خاطر فيه ، :tease:

هههههه اتغشمر معاك وعزيز وغالي ياروح الاطلس ،



المفروض الحوار والنقاش أكبر من هالمستوى
أعتقد عيب جدا على الاخوان المشككين في مصداقية الاخ باسكن ،أن يتهجموا بهذا الأسلوب ، لأن مافي انسان عاقل بيتمنى لنفسه هالشر ، والأخ ماشرد ، قال لكم الأثنين بيحط الصور وبيلجم الألسنة ..... لكن للأسف بعد شنو ...
مشكلتنا ان تربية الحوار في مدارسنا قائمة على التكذيب والتهجم بدل الحوار القائم على أسس وأدب وأدلة
وأعتقد موضوع الاخ باسكن الى الان قام على أسس ( حيث وصف السيارة والمكان والزمان وأسماء مناطق وحساب طرق وغيرها ) وأيضا على أدب ورقي في (الرد على المشككين والمستنكرين ) وبقيت الأدلة ( وقد أكد بأن له عودة لوضعها وانها فقط مسألة وقت ) ....
لذا أعتقد أن من الأولى ان نتحمد له بالسلامة أولا ثم نطلب مزيد من الايضاح وبأسلوب راقي بدل التهجم والتكذيب ....
لازلنا نفتقد لأدب الحوار والنقد البناء والنقاش الفكري الراقي
جزاك الله خير ورحم الله والديك يا أنا من الا صج انت من ،:secret:

تسلملي على ردك الطيب ويدل على طيب معدنك واخلاقك العاليه وثقافتك الكبيره ،

الحمدلله واجد من الاعضاء مثقفين وفاهمين وماستعجلوا على بالردود ،

ومبدئياً نقدر نقول انهم صدقوني بالرغم من شكوكهم لين ماجيب لهم الصور وهاليومين بأذن الله ،

اشكرك بعنف وعنفوان على ردك العجيـب ولو يصير جان حطيته ثاني رد ببداية الموضوع قبل لحد يستعجل برده علي ،:nice:



باسكن روبنز

الحمد على سلامتك انت والوالد وجعلكم ماتشوفون شر

جعل والدينك الجنه يالسيف وجزاك الله خير على كلامك الي يشرح الخاطر ويبرد القلب ،

ياشيخ لعيونك دبل ستروبري ايسكريم ، :victory:

http://4.bp.blogspot.com/_jqHZBih7kik/SiO386vvOCI/AAAAAAAAArs/l-6rvOMGH84/s400/%D8%A2%D9%8A%D8%B3+%D9%83%D8%B1%D9%8A%D9%85+%D8%A8 %D9%86%D9%83%D9%87%D8%A9+%D8%A7%D9%84%D8%AA%D9%88% D8%AA.jpg

[باسكن روبنز]

اولا الحمد لله على السلامه
ثانيا يوم الثلاثاء كنت على الخط وكانت في غيوم لين الظهر ومافي شمس الا لحظات وتختفي بس الجو
كان حلو وصافي
وليلة الثلاثاء كنت بالرياض وكان في زخات مطر خفيفه جدا حتى تكلموا عنها بالرداو

ثالثا ياليت نشوف صور السياره لأن الوصف بصراحه يخلي الواحد يقول الحمد لله أن ما صار لكم شئ
وخصوصا زجاج السيارة ما يتكسر بسهولة

وخطاكم الشر أخوي

وانت بعد الحمدلله على السلامه ،:nice:

والله يالمتألم انه الجو كان شبهه طبيعي مع شوية رياح واحنا لاحظنا شكل الجو شلون تغير مثل ماذكرت لكم ببداية الموضوع كافة التفاصيل ،

والي صار لنا كان الله يسلمك الساعه 5 بالضبط ،

وان شالله ابشر بالصور قريب يالذيب ، :)

[باسكن روبنز]

والله ياخوي انتي عزيز وغالي لاكن للاسف ماصدقت من الي قلته انت ولا شي لاني توني راد من الامارات ومريت على نفس خط كان عندي شغل بالجافورة والجو اوكي والقزاز خاصة الامريكي مايتناثر ثاني شي عجل مهوب برد عشان الموتر يتكسر قزازة


وماتشوف شر وطفل عمره اربع سنين اهله يعطونه لك يقولون وصله والله لردة المريخ ولا اوصله مع واحد غريب

هذي كانت مشاركه سابقه لاخوي قطر.كوم ،

وبعثت له على الخاص تفاصيلي كامله حتي يتأكد بنفسه ،




رقم السياره ×××××

سوبربان اسمنتي 2010

في الوكاله ،

وياريت تشوفه وتسأل الكراج هالسياره اش قصتها ومن راعيها ومتي جابوها ،

واذا حاب اروح وياك حاضرين وتفضل رقمي الشيخ ،

××××××

اخوك ×××× :)


اخوي××× قول لا اله اللى الله والله انك عزيز وغالي ومصدقك واسمحلي اذا كذبتك بشي وصحيح الي تقولة انا كلمت واحد من اهل الجافورة وقال انه هل اليومين الجو كله عوافير وماتشوف شر ان شاء الله بس السالفة الي جبتها والله ياخوي مادشت العقل لين ماكلمت كمن واحد وقالو شوي الجو خذ علية المهم اسمح لنا مرة ثانية والحمدلله على السلامة

وهذا كان رده مع شوية تشكك ،:rolleyes2:

وكل مابعثت على الخاص لقيته مليان عنده ،

qatar.com تجاوز المحد له من مساحة الرسائل الخاصة المخزونة ولا يمكنه إستلام رسائل أخرى إلى أن يحرر بعض المساحة.

ف حبيت احط ردي عليه بالعام واقوله انت بعد عزيز وغالي وتسلم على كلامك الطيب ،

اخوك في الله ، باسكن روبنز ، :)

[mohamed ab]

الحمد لله على السلامه و خطاكم الشر

[الغلا]

ماتشوف شر والحمد لله ع سلامتك وسلامة الوالد

[صندح]

الحمدلله على سلامتكم

صندح

[meme~qatar]

الحمد لله على سلامتكم

والله يستر على المسلمين

وجزاك الله خير على التنبيه

[مشتاقة لقطر]

حمدالله عالسلامة

[mE mYself & i]

الحمدلله ع سلامتكم ياباسكن .. وخطاكم الشر

[شيط ويط]

الحمدلله على سلامتكم اخوي باسكن ومشكور لتنبيهك المسافرين

[S350]

أنا مش مستوعب القصة بصراحة لعدة أسباب
أول سبب

شلون ناس مايعرفونكم بيعطونكم عيالهم لايكون قطاوة هم واحنا ماندري الواحد مايقدر يترك عيالة حتى لو عند ناس يقربون لهم فا مابالكم ناس غرباء

ثاني سبب

شلون القزاز تنثر وصادكم في اجسادكم ذي قوية جدا مثل ماقال هامور فور ايفر السيارات الجديدة القزاز مايتنثر لانة سيفتي بجميع السيارات وانتو سيارتكم 2010 مثل ماذكرت

ثالث سبب

شلون انت تقول مكسر وفيك قزاز وودوكم المستشفى وحالتك حالة وجاي المنتدى تكتب القصة اخبر الي تعبان مالة خلق حتى ايتكلم معنة تعب مش اصابات

رابع سبب

تقول سياراتكم تكسرت وشلون قدرتو ياترى تجيون فيها لقطر وحسب كلامك تكسرت وماتسوى نص قيمتها

خامسا

بعدين شلون قدرتو تروحون المستشفى وانتو مكسرين مشاء الله غطيتو على افلام الكرتون جونغر وكرانديزر

[الميزان 1969]

خلاااااااااااااااااااااااااااااااااااااااااااااااا اااااااااااااااص سندرتونا كل واحد يحلل ويتفلسف من صوب
قلنا الاثنيييييييييييييييين موعدنا وبنشووووووووووووووووف

[qatar.com]

هذي كانت مشاركه سابقه لاخوي قطر.كوم ،

وبعثت له على الخاص تفاصيلي كامله حتي يتأكد بنفسه ،




وهذا كان رده مع شوية تشكك ،:rolleyes2:

وكل مابعثت على الخاص لقيته مليان عنده ،

qatar.com تجاوز المحد له من مساحة الرسائل الخاصة المخزونة ولا يمكنه إستلام رسائل أخرى إلى أن يحرر بعض المساحة.

ف حبيت احط ردي عليه بالعام واقوله انت بعد عزيز وغالي وتسلم على كلامك الطيب ،

اخوك في الله ، باسكن روبنز ، :)



اي نعم هذي رسالتي على الخاص عندك بس اليوم بمر شركة الشفرولية لاني الصراحة للحين مهوب مصدق وتبقى عزيز وغالي بس بعد مهوب مصدق :tease: حتى لو شفت السيارة بعيني

[روح الاطلس]

لما تحط الصور باذن الله اتوقع الجرايد بيسوون معك لقاء

ويمكن يستضيفك حسن الساعي في برنامج الدار

مرة استضاف شخص تعرض لموجة بحر قوية وكان في اوروبا

لاتستبعد شكلك بتصير مشهور:nice: وخاصة ان موضوعك تنبيهي لاخذ الاحتياطات وخاصة من هالنوع من السيارات

[رياني qtr]

السلام عليكم ورحمة الله وبركاته ،

اليوم الظهر جاني الوالد وقالي خل نروح البحرين لرحله علاجيه ،

المهم سمينا بالله وقبضنا الخط وخلصنا من حدود سلوى ودخلنا السعوديه ،

وقفنا نصب بترول في محطة ساسكو وكلمتنا اسره سعوديه اذا ممكن نرجع ولدهم وبنتهم الصغيره الي الاحساء على طريقنا وذلك لان العائله كانو متوجهين إلى قطر بس لظرف خاص فيهم كان لازم يردون اثنين من اعيالهم ،

قلنا لهم معليه حياهم ووجبناهم وركبوا معانا السياره وسوالف وياهم والبنت يحليلها كتكوته عمرها 4 سنين الله يحفظها ،

كان الجو طبيعي مع قليل من الغبار السفلي كالعاده على خط السعوديه ،

فجأه لمحنا غيوم غريبه بشكل عامودي غريب بعد تجاوزنا لمحطة تماني على خط الجافوره ،

ظنينا انه شوي غبار كالعاده وكملنا طريجنا بسرعه بطيئه شوي ،

والله ياجماعه الي صار لنا شي غريب اعوذ بالله فجأه اشتد الهواء مع نزلة مطر قويه ،

وقام يزيد الغبار والهواء بشكل مب طبيعي وعرفنا انه السالفه فيها شي ،

زااا الهواء بشكل اعصاري وقام يلعب بالسياره ووقفنا على جنب مافي امل نمشي ومانشوف شي ابد خير شر ،

كان هذا دخولنا في عافور ضخم ومابالغ لو قلت كان اعصار كبير!

الوالد قام يتشهد والسياره شبهه بتنقلب خلاص وتكسرت علينا الدرايش كلها وتضررنا منها والجزاز دخل في الاذاني والخشوم والفم وكل مكان! ،

والله صراخ البنت مسكينه داخل في اذني من خرعتها واخوها لامها بالقو وجريت لهم ثوبي وغتري المعلقين ليحميهم من الجزاز المتكسر ،

وقفنا على جنب والاعصار زحف بالسياره لي جنب الطريق في البر وغرزنا والحمدلله الي عندنا كان فورويل ،

الجزاز تكسر بكل سهوله مع العلم سيارتنا امريكيه جديده موديل 2010 والحين ماتسوا نص قيمتها بعد الي صار ،

المهم شغلنا الدبل وطلعنا بالموتر والاعصار راح بس باقي اثاره من هواء شديد وغبار لاينوصف مع مطر وكل شي مكس والله ماعرفنا شألي يصير كأنه عايشين فيلم ،

واحنا في بالنا امانة الاعيال الي معانا ووصلناهم لي بيتهم بالاحساء وردينا رجعنا لين مستوصف منفذ سلوى ،

ماقصروا وياها وعالجونا وطلعوا 3 ارباع الجزاز من كل مكان حتي من رجولنا (اكرمكم الله) ،

وانا اكلمكم الحين وفي عافيتي ربع الجزاز متناثر في جسمي كامل بس حبيت اكتب التحذير قبل لاقوم اسبح واطهر الجروح :( ،

وطول الوقت احاتي الوالد والله لانه هو الي كان يسوق والاضرار صابته اكثر وياريتها فيني ولا فيه ،

المهم ادري طولت عليكم بس حبيت اقولكم ألي صار معاي بالتفصيل الممل ،

ردينا الدوحه ولحد الحين مب مستوعبين الي صار ،

علماً انه الاعصار طلع لنا الساعه 5 بالضبط وكان يبين ملامحه وهو رايح راد في البر ،

ومستوصف منفذ سلوى قالوا لنا انه جاتهم حالات مشابهه من كم يوم لناس متضرره من هالشي وانه الجو متقلب عندهم هالكم يوم ،

حبيت احذركم يا اهل قطر حاسبوا علي انفسكم والله توني داخل البيت من الباب لي الكمبيوتر وقلت احذركم ،

الجو معفوس ومتقلب هالكم يوم وبنفسهم موظفين مستشفي سلوى قايلين لي هالكلام وهم نفسهم بيوتهم بعيده عن المستشفي ويدهم على قلوبهم وهم رايحين ورادين من الدوام ،

وعلى دخلتنا للتفتيش في بوسمره حتي موظفين الجمارك مب مستوعبين الي شافوه وكل واحد ينادي رفيجه يقوله شوف ويقولون من وين جايين انتو والجزاز متكسر والشنطه متروسه حصى ورمل هههههههه ،

كان معانا كم شخص في هالاعصار واضرارهم مثل ماصار لنا والله اعلم بحالتهم يمكن انضروا اكثر منا ،

وكلن خايف على حريمه واعياله من هالغضب الي انصب علينا ،

الله يحفظ جميع المسلمين والسموحه على الاطاله ،




ماتشوف شر فلم هندي هههههههههههههههههاي طيب وشغلتو الدبل الكبير ولا السنغير حتى تعم الفائدة على الجميــــــــــــــــــــــع ونعرف اي دبل نشغل لو طحنا بنفس هالموقف :nice:

[باسكن روبنز]

الحمد لله على السلامه و خطاكم الشر




ماتشوف شر والحمد لله ع سلامتك وسلامة الوالد


الحمدلله على سلامتكم

صندح


الحمد لله على سلامتكم

والله يستر على المسلمين

وجزاك الله خير على التنبيه


حمدالله عالسلامة


الحمدلله ع سلامتكم ياباسكن .. وخطاكم الشر




الحمدلله على سلامتكم اخوي باسكن ومشكور لتنبيهك المسافرين



جزاكم الله خير ،

رحم الله والديكم على دعوتكم الطيبه ،

واسمحولي لاني جمعت المشاركات برد واحد عشان اختصر الردود ،



:)

[باسكن روبنز]

أنا مش مستوعب القصة بصراحة لعدة أسباب
أول سبب

شلون ناس مايعرفونكم بيعطونكم عيالهم لايكون قطاوة هم واحنا ماندري الواحد مايقدر يترك عيالة حتى لو عند ناس يقربون لهم فا مابالكم ناس غرباء

ثاني سبب

شلون القزاز تنثر وصادكم في اجسادكم ذي قوية جدا مثل ماقال هامور فور ايفر السيارات الجديدة القزاز مايتنثر لانة سيفتي بجميع السيارات وانتو سيارتكم 2010 مثل ماذكرت

ثالث سبب

شلون انت تقول مكسر وفيك قزاز وودوكم المستشفى وحالتك حالة وجاي المنتدى تكتب القصة اخبر الي تعبان مالة خلق حتى ايتكلم معنة تعب مش اصابات

رابع سبب

تقول سياراتكم تكسرت وشلون قدرتو ياترى تجيون فيها لقطر وحسب كلامك تكسرت وماتسوى نص قيمتها

خامسا

بعدين شلون قدرتو تروحون المستشفى وانتو مكسرين مشاء الله غطيتو على افلام الكرتون جونغر وكرانديزر

جزاك الله خير على ردك الطيب ،

بس حط في بالك اذا طينتك الله يسلمك ماتخليك تعين الناس وتفكر تحذرهم بكلمتين على قولتك الواحد عقب ذي ماله خلق يتكلم ،

فهذي شي يرجع للتربيه وكلن وتربيته طال عمرك واصابع يدك مهب سوا ،

وخل اختصر فلسفتك الزايده واقولك شلون رحنا المستشفي ،

قول يارب تمر بألي مرينا فيه وبنشوفك شلون بتروح المستشفي ، :)

حياك الله يالطيب ،



خلاااااااااااااااااااااااااااااااااااااااااااااااا اااااااااااااااص سندرتونا كل واحد يحلل ويتفلسف من صوب
قلنا الاثنيييييييييييييييين موعدنا وبنشووووووووووووووووف

بأذن الله يا انا من همم ،

وتسلم على ردودك الطيبه يالذيب ، :victory:



اي نعم هذي رسالتي على الخاص عندك بس اليوم بمر شركة الشفرولية لاني الصراحة للحين مهوب مصدق وتبقى عزيز وغالي بس بعد مهوب مصدق :tease: حتى لو شفت السيارة بعيني

ههههههه شقولك يعني! ،

عنك ماصدقت وانت بعد عزيز وغالي ، :tease:



لما تحط الصور باذن الله اتوقع الجرايد بيسوون معك لقاء

ويمكن يستضيفك حسن الساعي في برنامج الدار

مرة استضاف شخص تعرض لموجة بحر قوية وكان في اوروبا

لاتستبعد شكلك بتصير مشهور:nice: وخاصة ان موضوعك تنبيهي لاخذ الاحتياطات وخاصة من هالنوع من السيارات

هههههههه الظاهر جذي ياروح الاطلس ،

والله مابغي من الدنيا غير رضى الله ووالديني على ،

انزين ولا عليك امر طرش لي رقم حسن الساعي على الخاص ، :tease:

تسلم على مشاركتك الحلووه يالغالي ،




ماتشوف شر فلم هندي هههههههههههههههههاي طيب وشغلتو الدبل الكبير ولا السنغير حتى تعم الفائدة على الجميــــــــــــــــــــــع ونعرف اي دبل نشغل لو طحنا بنفس هالموقف :nice:

الي بخاطرك كل شي موجود ،:tease:

دووم الضحكه يارياني وان شالله نكسر خشومكم بالدوري الجاي ،

مع تحيات سداوي متعصب ، :victory:

[باسكن روبنز]

اتمنى من المراقبين اغلاق الموضوع ،

وبأذن الله يومين بالكثير وبحط لكم موضوع جديد بصور السياره وتفاصيل اكثر ،

وبالمقابل راح انتظر اعتذارات من بعض الاعضاء الي مستخفين دمهم زياده عن اللزوم ، ;)

بنشوف نتايج التربيه من رد العضو نفسه بالاعتذار ،

والله يحفظ جميع المسلمين ،

[البيرق]

اتمنى من المراقبين اغلاق الموضوع ،

وبأذن الله يومين بالكثير وبحط لكم موضوع جديد بصور السياره وتفاصيل اكثر ،

وبالمقابل راح انتظر اعتذارات من بعض الاعضاء الي مستخفين دمهم زياده عن اللزوم ، ;)

بنشوف نتايج التربيه من رد العضو نفسه بالاعتذار ،

والله يحفظ جميع المسلمين ،

الاخ باسكن روبنز
لايهمك رد من لايعرف الحدث ولم يعاصره ولا تغضب منهم فانت رددت ولم تضع الصور التي تسكت شكوكهم فغذيتها بسوف وسوف اضع الصور خل الموضوع ولا ترد حتى تضع الصور
بالنسبة للعاصفة التي مرت عليكم ومن ثم اتجهت جنوب شرق ناحية الامارات وكانت بطيئة الحركة وتابعتها الى اليوم الثاني وحركتها غريبة جدا لهذا الوقت من السنة ودخلت الامارات ومن ثم اتهت شمال شرق ومن غرب جزيرة داس والى الشمال الغربي ناحية قطر ووصلتنا الدوحة اليوم الثاني عند حوالي الساعة الحادية عشر صباحا ومتجهة غربا ولم تمطر علينا مع ان امطارها شديدة على السعودية وعلى الامارات (وصلت في بعض الاوقات الى عاصفة بردية شديدة حسب رادار الامارات بمتابعتي لها )
وسمعنا عن العاصفة وانت عاصرت عين الاعصار فحدثك اقوى الاحداث
شاكرا لك
وننتظر الصور ليس تكذيبا لك ولكن لانها حصرية

[لطيف الروح]

اتمنى من المراقبين اغلاق الموضوع ،

وبأذن الله يومين بالكثير وبحط لكم موضوع جديد بصور السياره وتفاصيل اكثر ،

وبالمقابل راح انتظر اعتذارات من بعض الاعضاء الي مستخفين دمهم زياده عن اللزوم ، ;)

بنشوف نتايج التربيه من رد العضو نفسه بالاعتذار ،

والله يحفظ جميع المسلمين ،

يا أخي الموضوع بسيط انشر الصور بالتفاصيل المملة و مايحتاج اتعب نفسك وتضيع وقتك وتفتح موضوع ثاني لنفس الموضوع ولا نصيحة لوجه الله اعتذر من اعضاء المنتدى وسكر الموضوع .

[إينشتاين]

اليوم الإثنين

[ANONYMOUS]

اليوم الإثنين


التمس لأخيك سبعين عذر


ان كانه صادق.. فجزاه الله خير هالتنبيه

وان كانه يتغشمر معانا.. ف غشمرته مقبوله.. والاكشن مطلوب في هاليومين.. خبركم حر وخير

[إينشتاين]

التمس لأخيك سبعين عذر


ان كانه صادق.. فجزاه الله خير هالتنبيه

وان كانه يتغشمر معانا.. ف غشمرته مقبوله.. والاكشن مطلوب في هاليومين.. خبركم حر وخير


أنا عن نفسي مصدقه وردي في بداية الموضوع يدل على ذلك

ولكن

(وذكر فإن الذكرى تنفع المؤمنين)

للرد على المشككين ،،:nice:

[ANONYMOUS]

أنا عن نفسي مصدقه وردي في بداية الموضوع يدل على ذلك

ولكن

(وذكر فإن الذكرى تنفع المؤمنين)

للرد على المشككين ،،:nice:


والله حتى انا مصدقه..


ولا ابغي دليل.. ارجال ينصح جزاه الله خير.... ماعتقد له مصلحه يخرع المسلمين...

[Bu Rashid]

سلامات سلامات اخوي باسكن

ان شاء الله ما ذاب الايسكريم :)

مشكووور اخوي على التنبيه

[S350]

اليوم كنت رايح المستشفى وتذكرت موضوع الاخ باسكن روبنز قلت اسئل الدكتور عن اضرار الزجاج اذا كان داخل الاجساد ذكر لي ان لة اضرار اذا القصة حقيقية وفعلا حصلت انصح باسكن انة يشيك على عمرة احسن

بعدين اليوم الاثنين وين البوستر

[اعالي الجنان]

كلامك صحيح اخوي
انا قريت كلامك وكنت ناويه عالسفر ثاني يوم
وكنت متخوفه من كلامك
توكلنا على الله وكلمت زوجي بكلامك انه عافور واجهكم
كنا حذرين بالطريق
ويوم دخلنا حدود السعوديه لقينا الرمل منثر بالشارع والعمال يشيلونه من الطريق خط الشارع كامل
يوم شفناه قال زوجي كلامه صحيح الظاهر مر عافور بهالمنطقه والدليل هالرمل المنتثر بكل مكان
جزاك الله خير عالنصيحه

[فرقة الصقور]

الحمدلله علي سلامتكم
ولازم تتحمل عدم تصديق الكثيرين وانا منهم لان فيه غرائب كثيره
وانا اقر انك برهنت بشكل جيد الكثير منها ولكن هناك تساول اتمنى منك اجابته
لم اجد له تفسير وهو
- بما ان الزجاج دخل عيونكم واجسادكم وحتى اخمص اقدامكم، اذن كان مزعج نوعا ما بل على حد تعبيرك كان موذي جدا٫ كيف بعد وصولكم الاحساء وتوصيل من كان معكم

رجوعكم الى مستوصف سلوى الذي يبعد عنكم ٢٠٠ كيلو وعدم تعالجكم في المستشفيات المتناثره في كل شارع وزاويه من الاحساء.

اتوقع انك هولت الموضوع كثيرا بل بالغت جدا مع العلم انك لم تتطرق لاصلاح الزجاج المنكسر ورجوعكم الى الدوحه بنفس حاله السياره يستحال.

شكرا لتفهمك وانتظر ردك

[ســـهم]

باسكن الحمدلله ع السلامه .. :)

[فيوليت]

الحمد لله على السلامه

والله حفظكم

انا كنت مسافره البحرين وعلى خط الحساء فعلا شفت سيارات اتنظف الرمل من الشوارع

وشاحنه مقلوبه وعلى الشارع طايح طربال اللي يغطون فيه الشاحنات يعني فوضى واستغربت

قال زوجي السعوديه الجو عندهم متغلب وشكلهم جايتهم عاصفه رمليه

والله حفظنا والحمدلله

والله يحفظ الجميع

اهم شي سلامتكم

[العساس]

ياخي انا استغرب ردود بعض الاعضاء
الي مو مصدق الرجال ذكر لكم نوع السيارة
الله لايهنكم كلها كم من كيلو وبتشفونها
اخوي باسكن الحمدلله على سلامتك انت والوالد
واجر وعافية
وجزاك الله خير انك تقبلت ووصلت اعيال الناس
وتبي نصيحتي (لاتحط صور)
ولي مايعجبه يشرب فيمتو برمضان
مبروك عليكم الشهر

[شبح الصمت]

الحمدلله على سلامتك وسلامة الوالد وسلامة الأطفال ...

[عذب الكلام 1]

الحمدلله على السلامه وهذا من طيب اصلك والمؤمن يحب ان ينبه غيره وشكراا لك

[خفيف الرووح]

ياخوي الصراحه شي مايدخل العقل

قصتك تذكرني بالافلام الهنديه لازم البطل يتفلسف شوي ويبط جبد الي يشوف الفلم

خلني اذكر لك النقاط الي ماخلتني اقتنع بقصتك

اول شي

انت تقول انك تعبان واول مادخلت البيت على طول دخلت الموقع وكتبت هالموضوع لتحذيرنا
بس الي اعرفه ان التعبان يكتب بسرعه بسرعه بس انت ماشاء الله كتبت القصه من اول شي لاخر شي يعني كنت فاضي
ونطقه ثانيه انت ذكرت سالفه البنت والولد ماظن لهم داعي انك تذكرهم في التحذير ( راح بالي بعيد حسبت ان لهم علاقه بالي صار معاك بمعنى اخر الجن:secret:)

ثاني شي

سالفه البنت الي عمرها 4 سنوات
لو انت من اهل البلد ويعرفونك اوك مب مشكله اما انك على خط سفر ويعطونك بنتهم ويطلبون منك توصلها لبيتهم :omg:هذه عليها مليون علامه استفهام:anger1:

ثالث شي

تقول جزاز السياره كلها تكسرت وان الجزاز دخل في جسمكم شلون قدرتوا تمشون بالسياره ليش ماوقفتوا وطلبتوا الشرطه او الاسعاف

ورابعا

يوم وصلتوا الحسا ووصلتوا اليهال
الي اعرفه ان الحسا فيها مستشفيات او على الاقل مستوصف
ليش رجعتوا لسلوى وانتوا بهالحاله ..؟
سيارتكم متكسره والجزاز كله في جسمكم

الصراحه ذكرتني بالبطل الي فالافلام الهنديه يوم يكون مصاب ويمشي ومايطلب المساعده من حد:D

خامسا الي هو الاهم

حتى لو جبت لنا صور السياره وهي متكسره او انا شفتها بنفسي

شعرفني انها متكسره بسبة العافور :con2:

الصراحه ياخوي قصتك ماتدخل المخ

:D

[جينير]

يوم وصلتوا الحسا ووصلتوا اليهال
الي اعرفه ان الحسا فيها مستشفيات او على الاقل مستوصف
ليش رجعتوا لسلوى وانتوا بهالحاله ..؟
سيارتكم متكسره والجزاز كله في جسمكم (((خفيف الروح)))

هذا مادار في بالي.

وإنا سافرت يوم 4/8/2010م
وخرجت من سلوى الساعة 9.30 مساءً
والجو كان فيه رياح عادية والجو صحو بشكل عام
وصلت الاحساء الساعة 10.30
وكانت الشوارع فيه ماء من الامطار
وقريت في الجريدة يوم 5/8/2010 إن الاحساء تعرضت لموجة غبار قوية
ورحت ورديت يوم 8/8/2010 والجو صحو

[Right]

ياخوي الصراحه شي مايدخل العقل

قصتك تذكرني بالافلام الهنديه لازم البطل يتفلسف شوي ويبط جبد الي يشوف الفلم

خلني اذكر لك النقاط الي ماخلتني اقتنع بقصتك

اول شي

انت تقول انك تعبان واول مادخلت البيت على طول دخلت الموقع وكتبت هالموضوع لتحذيرنا
بس الي اعرفه ان التعبان يكتب بسرعه بسرعه بس انت ماشاء الله كتبت القصه من اول شي لاخر شي يعني كنت فاضي
ونطقه ثانيه انت ذكرت سالفه البنت والولد ماظن لهم داعي انك تذكرهم في التحذير ( راح بالي بعيد حسبت ان لهم علاقه بالي صار معاك بمعنى اخر الجن:secret:)

ثاني شي

سالفه البنت الي عمرها 4 سنوات
لو انت من اهل البلد ويعرفونك اوك مب مشكله اما انك على خط سفر ويعطونك بنتهم ويطلبون منك توصلها لبيتهم :omg:هذه عليها مليون علامه استفهام:anger1:

ثالث شي

تقول جزاز السياره كلها تكسرت وان الجزاز دخل في جسمكم شلون قدرتوا تمشون بالسياره ليش ماوقفتوا وطلبتوا الشرطه او الاسعاف

ورابعا

يوم وصلتوا الحسا ووصلتوا اليهال
الي اعرفه ان الحسا فيها مستشفيات او على الاقل مستوصف
ليش رجعتوا لسلوى وانتوا بهالحاله ..؟
سيارتكم متكسره والجزاز كله في جسمكم

الصراحه ذكرتني بالبطل الي فالافلام الهنديه يوم يكون مصاب ويمشي ومايطلب المساعده من حد:D

خامسا الي هو الاهم

حتى لو جبت لنا صور السياره وهي متكسره او انا شفتها بنفسي

شعرفني انها متكسره بسبة العافور :con2:

الصراحه ياخوي قصتك ماتدخل المخ

:D



ضحكتني " يا خفيف الرووح" :nice:

حلووووة فلم هندي ... هالقصة تشبه فلم حرب النجوم "Star Wars"

سؤال واقعي: شلون بتعرف أن صورة السيارة المتكسرة بسبة العافور ؟؟

[ولـد الخليج]

نفس الموضوع شفته في منتديات الغانم
مدري الموضوع منقول ولا انت اللي كاتبها في المنتدى

[الراقيه سبشل]

عيب تشككون بكلام الريال .. وهو اعطى كلمته انه بحطلكم الصور .. مع انه اصلا مب ملزوم يأكد على كلامه

ماكان هذا العشم فيكم

صج الغلط منه انه قاعد ينصحكم ويحذركم

ولاتنسون .. ان بعض الظن اثم

[ولـد الخليج]

اخوي انا مصدق كلامك بس انت تدري ان اليهال كثروا في المنتدى .. المفروض ماتكتب اللي صار معاك
أنا صارت معاي نفس الشي السنة اللي فات بس ماتكسرت الجزاز اللهم تحركت السيارة فقط بس ماكتبت في المنتديات تدري ليش لأني اعرف ان محد يصدقني

[S350]

كل عام وانتم بخير
مبارك عليكم الشهر جميعا

باسكن

وين الصور احنا ننتظر

[باسكن روبنز]

يا أخي الموضوع بسيط انشر الصور بالتفاصيل المملة و مايحتاج اتعب نفسك وتضيع وقتك وتفتح موضوع ثاني لنفس الموضوع ولا نصيحة لوجه الله اعتذر من اعضاء المنتدى وسكر الموضوع .

وليش اعتذر؟ ،

من صباح الله خير رايح الوكاله ومنها للدوام واليوم ارتب لكم الصور ان شاءلله ، ;)




التمس لأخيك سبعين عذر


ان كانه صادق.. فجزاه الله خير هالتنبيه

وان كانه يتغشمر معانا.. ف غشمرته مقبوله.. والاكشن مطلوب في هاليومين.. خبركم حر وخير

جزاك الله خير يالذيب ،:nice:

تفكيرك واقعي جداًُ عكس بعض المشككين بلا هدف الله يهديهم يحسبوني متفرغ مثلهم ،:rolleyes2:





سلامات سلامات اخوي باسكن

ان شاء الله ما ذاب الايسكريم :)

مشكووور اخوي على التنبيه


ههههههه لا أبشرك البضاعه سليمه ،:tease:

الله يسلمك يالشيخ ، :)



اليوم كنت رايح المستشفى وتذكرت موضوع الاخ باسكن روبنز قلت اسئل الدكتور عن اضرار الزجاج اذا كان داخل الاجساد ذكر لي ان لة اضرار اذا القصة حقيقية وفعلا حصلت انصح باسكن انة يشيك على عمرة احسن

بعدين اليوم الاثنين وين البوستر

الحمدلله عدت على خير وتسلم للتحذير ،

اليوم ان شالله انتظر الصور ياخووي ومبروك عليك الشهر ، :)



كلامك صحيح اخوي
انا قريت كلامك وكنت ناويه عالسفر ثاني يوم
وكنت متخوفه من كلامك
توكلنا على الله وكلمت زوجي بكلامك انه عافور واجهكم
كنا حذرين بالطريق
ويوم دخلنا حدود السعوديه لقينا الرمل منثر بالشارع والعمال يشيلونه من الطريق خط الشارع كامل
يوم شفناه قال زوجي كلامه صحيح الظاهر مر عافور بهالمنطقه والدليل هالرمل المنتثر بكل مكان
جزاك الله خير عالنصيحه

الحمدلله على سلامتج انتي وزوجج ،


الحمدلله علي سلامتكم
الله يسلمك اخووي ، :)
ولازم تتحمل عدم تصديق الكثيرين وانا منهم لان فيه غرائب كثيره
صادق وهالحدث نادر حدوثه لكنه للاسف موجود واهل السعوديه شافوا مثل هالامور كثير ،
وانا اقر انك برهنت بشكل جيد الكثير منها ولكن هناك تساول اتمنى منك اجابته
لم اجد له تفسير وهو
- بما ان الزجاج دخل عيونكم واجسادكم وحتى اخمص اقدامكم، اذن كان مزعج نوعا ما بل على حد تعبيرك كان موذي جدا٫ كيف بعد وصولكم الاحساء وتوصيل من كان معكم

رجوعكم الى مستوصف سلوى الذي يبعد عنكم ٢٠٠ كيلو وعدم تعالجكم في المستشفيات المتناثره في كل شارع وزاويه من الاحساء.
لو قريت الموضوع بتعرف انه الي صار على خط الجافوره قبل منطقة الاحساء بمسافه مب اقل من 80 كيلو ،
وصلنا الاطفال وردينا للدوحه على اساس بنروح المستشفي هناك لكن اصريت على الوالد نروح مستشفي منفذ سلوى قبل قبل دخول جمارك سلوى ،

اتوقع انك هولت الموضوع كثيرا بل بالغت جدا مع العلم انك لم تتطرق لاصلاح الزجاج المنكسر ورجوعكم الى الدوحه بنفس حاله السياره يستحال.
الله يهداك يعني انا بتفرغ لنفسي ولا حق سيارتي والدم مبقع ثوبي من كل صوب؟ ، بتشوف صور السياره بنفسك وصدقني انا مب متفرغ عشان انزل مواضيع مثل هذي من تأليفي ،
شكرا لتفهمك وانتظر ردك
رديت عليك ومبروك الشهر الفضيل يافرقة الصقور وتسلم على اسلوبك الطيب ، :)



باسكن الحمدلله ع السلامه .. :)

الله يسلمك يالغالي سهم ، :)



الحمد لله على السلامه

والله حفظكم

انا كنت مسافره البحرين وعلى خط الحساء فعلا شفت سيارات اتنظف الرمل من الشوارع

وشاحنه مقلوبه وعلى الشارع طايح طربال اللي يغطون فيه الشاحنات يعني فوضى واستغربت

قال زوجي السعوديه الجو عندهم متغلب وشكلهم جايتهم عاصفه رمليه

والله حفظنا والحمدلله

والله يحفظ الجميع

اهم شي سلامتكم

الله يسلمج وانتو بعد منورين البلاد بوجودكم وسلامتكم ،

وسلاااامي لج ولزوجج على تأكيدج للي صار لنا بشوف عيونكم ،:nice:

مبروك عليج الشهر فيوليت ، :)



ياخي انا استغرب ردود بعض الاعضاء
الي مو مصدق الرجال ذكر لكم نوع السيارة
الله لايهنكم كلها كم من كيلو وبتشفونها
اخوي باسكن الحمدلله على سلامتك انت والوالد
واجر وعافية
وجزاك الله خير انك تقبلت ووصلت اعيال الناس
وتبي نصيحتي (لاتحط صور)
ولي مايعجبه يشرب فيمتو برمضان
مبروك عليكم الشهر

عجل وايد الي بيشربون فيمتو هههههههه ،:nice:

صادق يالعساس وواجد من ربعي قالوا تراك مب مجبور تنزل لهم صور و و و ،

بس والله لخاطر كل من صدقوني قلت ابط عيون بعض البزران الي داخلين يبربرون على الفاضي وهم جالسين في بيوتهم ولا يدرون بالدنيا ،

مبارك عليك الشهر يالشيخ ،



الحمدلله على سلامتك وسلامة الوالد وسلامة الأطفال ...

الله يسلمك ،

مبروك عليك الشهر ياشبح الصمت ، :)منورين الدوحه ، :victory:



الحمدلله على السلامه وهذا من طيب اصلك والمؤمن يحب ان ينبه غيره وشكراا لك

مبروك عليك الشهر ياعذب الكلام ،

جزاك الله خير وانت الي تسلم على ردك الراقي ، :)

[بوروضه]

الحمدالله على سلامتكم وجزاك الله خير على التنبيه

[S A L M A N]

يالله سترك !

ماتشوفون شر انشالله واحسن شي سويتوه وقفتوا على جنب .. ماكملتوا !

[باسكن روبنز]

ياخوي الصراحه شي مايدخل العقل

هذا المكتوب الله يسلمك ،
قصتك تذكرني بالافلام الهنديه لازم البطل يتفلسف شوي ويبط جبد الي يشوف الفلم
محد قالك تطالع افلام هنديه وايد ،:tease:
خلني اذكر لك النقاط الي ماخلتني اقتنع بقصتك

اول شي

انت تقول انك تعبان واول مادخلت البيت على طول دخلت الموقع وكتبت هالموضوع لتحذيرنا
بس الي اعرفه ان التعبان يكتب بسرعه بسرعه بس انت ماشاء الله كتبت القصه من اول شي لاخر شي يعني كنت فاضي
لا والله فديت خشمك مب فاضي بس ارجعت لي الراحه النفسيه بدخلتي البيت بعد الي صار وقعدت افكر واكتب الي صار مره وحده واشكرك على اطرائي بمنطقية القصه عيل من رمضان الجاي بقول حق وداد الكواري تستريح ،:tease:
ونطقه ثانيه انت ذكرت سالفه البنت والولد ماظن لهم داعي انك تذكرهم في التحذير ( راح بالي بعيد حسبت ان لهم علاقه بالي صار معاك بمعنى اخر الجن:secret:)
صح كلامك وغلطتي فعلاً اني ذكرت ألي صار بالتفصيل الممل والمفروض هالجزء ماذكره واركز على التحذير الاساسي والشاهد الله مافكرت انها بتنحسب لدى بعض الملاقيف كنقطه سوده بتحذيري ،
خبرك وايد ناس فاضيين يدخلون منتديات ههههههه ،
ثاني شي

سالفه البنت الي عمرها 4 سنوات
لو انت من اهل البلد ويعرفونك اوك مب مشكله اما انك على خط سفر ويعطونك بنتهم ويطلبون منك توصلها لبيتهم :omg:هذه عليها مليون علامه استفهام:anger1:
كان معانا اخوها مثل ماذكرت للمره المليون ،:rolleyes2: وعمره مب اقل من 25 سنه ،
ثالث شي

تقول جزاز السياره كلها تكسرت وان الجزاز دخل في جسمكم شلون قدرتوا تمشون بالسياره ليش ماوقفتوا وطلبتوا الشرطه او الاسعاف
اكيد انت مسافر على خطوط السعوديه ، بذمتك تهقى شرطتهم واسعافهم يجونك بسرعة البرق؟ ولا الاسهل انك تروح بنفسك اذا تقدر؟ ،
ورابعا

يوم وصلتوا الحسا ووصلتوا اليهال
الي اعرفه ان الحسا فيها مستشفيات او على الاقل مستوصف
ليش رجعتوا لسلوى وانتوا بهالحاله ..؟
سيارتكم متكسره والجزاز كله في جسمكم
صادق ونيتنا الرجعه للبلاد من ضيقة النفس دام فينا حيل والحمدلله بس على ردتنا للمنفذ شفت مستوصف سلوى على يسراي ودخلت عليهم عرض بالموتر خوفاً على ابوي مب علي نفسي ،

الصراحه ذكرتني بالبطل الي فالافلام الهنديه يوم يكون مصاب ويمشي ومايطلب المساعده من حد:D
هههههه لاعاد تطالع Z TV ، :eek5:

خامسا الي هو الاهم

حتى لو جبت لنا صور السياره وهي متكسره او انا شفتها بنفسي

شعرفني انها متكسره بسبة العافور :con2:

الصراحه ياخوي قصتك ماتدخل المخ
لي مريت الحسا هالفتره ذي انشد اهلها عن عوافيرها وبلاويها ياخي ترا السعوديه صحراء وقاره! ،
وبتعرف حزتها الي صار لنا واقع ولا تأليف ،
حسستني اني الوحيد بالسعوديه والعالم كله الي صار له هالشي!، :rolleyes2:
:D

هلا هلا بالمحقق كونان (امزح معاك ههههههه) ،

اقرا ردي عليك فوق ، :)





يوم وصلتوا الحسا ووصلتوا اليهال
الي اعرفه ان الحسا فيها مستشفيات او على الاقل مستوصف
ليش رجعتوا لسلوى وانتوا بهالحاله ..؟
سيارتكم متكسره والجزاز كله في جسمكم (((خفيف الروح)))

هذا مادار في بالي.

وإنا سافرت يوم 4/8/2010م
وخرجت من سلوى الساعة 9.30 مساءً
والجو كان فيه رياح عادية والجو صحو بشكل عام
وصلت الاحساء الساعة 10.30
وكانت الشوارع فيه ماء من الامطار
وقريت في الجريدة يوم 5/8/2010 إن الاحساء تعرضت لموجة غبار قوية
ورحت ورديت يوم 8/8/2010 والجو صحو
تغيير المناخ يصير بغمضة عين وانت دامك راعي سفرات اكيد عارف هالشي ،:)

اي بني ادم مايصدق يقدر ينشد اهل الدار (الحسا) عن علومهم وبيعرف ،

اخووي ترا البعض تلاقيهم مبسطين ورا اللاب وطلعاتهم حدها لي كرك النعيمي ولفتين بالكورنيش ،

لو تقوله وين سوق القيصريه بالحسا بيقولك شدراني ماقد رحت! ،

مايعرف ظروف جو الصحراء المتقلب وقاعد يتفلسف من ورا شاشه ،

عموماً الي صار كان بالضبط الساعه 5 ،

ياجماعه حسستوني اني بدخل موسوعة غينيس شسالفه! هههههههه:omg:








ضحكتني " يا خفيف الرووح" :nice:

حلووووة فلم هندي ... هالقصة تشبه فلم حرب النجوم "Star Wars"

سؤال واقعي: شلون بتعرف أن صورة السيارة المتكسرة بسبة العافور ؟؟



سؤالك حلو ومنطقي جداً ،:rolleyes2:

بس اكثر من الي قلته بعد! ، المفروض تستحي على وجهك وتشكرني او تكذبني باسلوب محترم ،

تبيني احلف لك؟ طرش لي رقمك على الخاص واليوم سحورك عندي وهات معاك مصحف قرآن واحلف لك صوت وصوره وحط الفيديو بالمنتدي ،:victory:

قعدت افكر بجواب على سؤالك العجيب وماعندي لك حل ثاني ههههههه وانا عند كلمتي ، :)[/U
نفس الموضوع شفته في منتديات الغانم
مدري الموضوع منقول ولا انت اللي كاتبها في المنتدى

لا والله ياولد الخليج ماعرف المنتدي ،:rolleyes2:

بامر على غوقل اشوفه شكله ناسخ موضوعي ،



عيب تشككون بكلام الريال .. وهو اعطى كلمته انه بحطلكم الصور .. مع انه اصلا مب ملزوم يأكد على كلامه

ماكان هذا العشم فيكم

صج الغلط منه انه قاعد ينصحكم ويحذركم

ولاتنسون .. ان بعض الظن اثم

جزاج الله خير ،

ووايد اعضاء على عيني وراسي باسلوبهم المحترم والراقي وهم عارفين انه سبب موضوعي هو تحذير الناس بس ،

لكن قمت اشوف ردود عجيبه الي يقول شلون اصدق حادث السياره والي مادري شيقول ههههههه ،

يحسبوني متفرغ نفسهم ،:secret:

شكراً الراقيه ومبروك عليج الشهر ،



اخوي انا مصدق كلامك بس انت تدري ان اليهال كثروا في المنتدى .. المفروض ماتكتب اللي صار معاك
أنا صارت معاي نفس الشي السنة اللي فات بس ماتكسرت الجزاز اللهم تحركت السيارة فقط بس ماكتبت في المنتديات تدري ليش لأني اعرف ان محد يصدقني

مبروك عليك الشهر ورحم الله والديك ياولد الخليج ،

وخطاك الشر على ماصار لك ،:)

تدري انا مريت بجميع ظروف الجو السيئه على خط السفر ،

ضباب ، مطر شديد ، غبار شديد وماتشوف الطريج عدل ، وهالثلاثه مكس على بعضهم هههههه ،:rolleyes2:

بس الي صار لي هالمره خلاني صج اجرب كل الظروف الجويه! ،

وانت ماعليك من حد وبعضهم الله يهداهم يحسبوني طالع بطل بهالموضوع او باحصل فلوس من ورا السالفه!! ،

دليل انهم بزران ما ركزو على اساس الموضوع الاساسي وهو تحذيري لهم والله يسامحهم على هالشي ،

[U]لكن لاحظ انه وايد اعضاء فيهم الخير والبركه وتحمدولي بالسلامه ومتفهمين وجزاهم الله خير ،



كل عام وانتم بخير
مبارك عليكم الشهر جميعا

باسكن

وين الصور احنا ننتظر

اليوم ان شاء الله ،

ومره ثانيه مبروك عليك الشهر يا S35 ، :nice:]

[باسكن روبنز]

الحمدالله على سلامتكم وجزاك الله خير على التنبيه

واجب علينا يا بوروضه والله يسلمك يالطيب ، :victory:



يالله سترك !

ماتشوفون شر انشالله واحسن شي سويتوه وقفتوا على جنب .. ماكملتوا !

والله يا سلمان ماكان في مجال انك تتحرك من الاساس ،

الوضع ماكان طبيعي ابد ،

الحمدلله عدت على خير وبالحديد ولا فينا ،

الشر مايجيك يالشيخ ومبروك عليك رمضان انت واخوي بو روضه ، :)

[باسكن روبنز]

اليوم بنزل لكم صور السياره بأذن الله بموضوع جديد ،

وتحياتي للجميع والله يحفظكم بطريق الاسفار ،

اخوكم باسكن روبنز ،:)

[شيط ويط]

اليوم بنزل لكم صور السياره بأذن الله بموضوع جديد ،

وتحياتي للجميع والله يحفظكم بطريق الاسفار ،

اخوكم باسكن روبنز ،:)

:nice:

[Right]

سؤالك حلو ومنطقي جداً ،:rolleyes2:

بس اكثر من الي قلته بعد! ، المفروض تستحي على وجهك وتشكرني او تكذبني باسلوب محترم ،

تبيني احلف لك؟ طرش لي رقمك على الخاص واليوم سحورك عندي وهات معاك مصحف قرآن واحلف لك صوت وصوره وحط الفيديو بالمنتدي ،:victory:

قعدت افكر بجواب على سؤالك العجيب وماعندي لك حل ثاني ههههههه [U]وانا عند كلمتي ، :)[/U


يا آيس كريم باسكن بن روبنز

شكلك متنح هذي مب سؤالي ... هذا سؤال "خفيف الرووح"

أقرا عدل رده وبتعرف سؤال من؟

لا أتحلف لي ولا أحلف لك ... أنا ما قلت أنك كذاب أو نصاب لا سمح الله

بس عجبتني القصة:nice:

المهم ما تشوفون شر والحمدلله على سلامتكم

[مرحوم قطر]

اول شي الحمدلله على السلامه


ماتشوفون شر يا الغالي


وبخصوص الي يكذبون

الظاهر امس جو الخليج و مايدون بالي يصير عندنا


ترى الي تشوفونه في السندباد و الافلام ترى حقيقه موجوده من صحراء مصل صحاري السعوديه

و الي نشوفه في بحرنا


شنو يعني عافور ظرب خط الحسا هذا ولا شي من الي نسمع عنه و الي نشوفه


يعني في اوقات ظربة عوافير اليماتخليك تشوف متر قدامك

و لا تروح بعيد اسال جدك و ابوك و انت يمكن شفت

على خط لشمال الي يسمونهم العفاريت


و اسالو اهل البحر و ش يصير فيهم لما يظرب عليهم عافور ولا دومه


بعدين الي كذبوا الرجال هذا كله يرجع للمثل الي يقول كلن يرى الناس يعين طبعه


وتحياتي للجميع

[باسكن روبنز]

يا آيس كريم باسكن بن روبنز

شكلك متنح هذي مب سؤالي ... هذا سؤال "خفيف الرووح"

أقرا عدل رده وبتعرف سؤال من؟

لا أتحلف لي ولا أحلف لك ... أنا ما قلت أنك كذاب أو نصاب لا سمح الله

بس عجبتني القصة:nice:

المهم ما تشوفون شر والحمدلله على سلامتكم

هههههههههه بس انت نسخته ياخي ،:anger1:

اسمحلى والله لو ماركزت عدل وعزيز وغالي يا سنايدر << شمعنى اسمك! ،:rolleyes2:



وتسلم على دعوتك الطيبه فيك الخير يالشيخ ،
:)






اول شي الحمدلله على السلامه


ماتشوفون شر يا الغالي


وبخصوص الي يكذبون

الظاهر امس جو الخليج و مايدون بالي يصير عندنا


ترى الي تشوفونه في السندباد و الافلام ترى حقيقه موجوده من صحراء مصل صحاري السعوديه

و الي نشوفه في بحرنا


شنو يعني عافور ظرب خط الحسا هذا ولا شي من الي نسمع عنه و الي نشوفه


يعني في اوقات ظربة عوافير اليماتخليك تشوف متر قدامك

و لا تروح بعيد اسال جدك و ابوك و انت يمكن شفت

على خط لشمال الي يسمونهم العفاريت


و اسالو اهل البحر و ش يصير فيهم لما يظرب عليهم عافور ولا دومه


بعدين الي كذبوا الرجال هذا كله يرجع للمثل الي يقول كلن يرى الناس يعين طبعه


وتحياتي للجميع

صاااادق يا مرحوم قطر ،:)

والله يرحم جميع المسلمين ،

تسلم على دعوتك والله يسلمك ويسلمك احبابك من كل مكروه ،

شوف الصور في هالرابط ولا تهون ،

http://www.qatarshares.com/vb/showthread.php?t=389822

[دروب]

ما له داعي التشكيك في اللي صار للرجال

اقرا الموضوع وخذ المفيد واشكره على التنبيه ..

[انيقه]

الحمد لله على السلامة

[ع.م]

وناسة الأجواء أكشن من قلب :)

و الحمد لله على السلامة..

بس صج أكشنات..بصراااحة: كلش كلش مااستانست ولا لجزء من الثانية؟

[بنت ذياب]

:weeping:

الحمدلله عالسلامة

واحنا تاريخ 1-8 كناا هناك

الحمدلله ماشفنا شي والجو كان طبيعي

الله ستر علينا :weeping:

ماتشوف شر .. اخوي..

[Right]

هههههههههه بس انت نسخته ياخي ،:anger1:

اسمحلى والله لو ماركزت عدل وعزيز وغالي يا سنايدر << شمعنى اسمك! ،:rolleyes2:

وتسلم على دعوتك الطيبه فيك الخير يالشيخ ،
:)






أخوي باسكن شكلك شيبت وأنت لي الحين صغير :nice:

لا يبيلك نظارة:app:

أخوي مب معنى أني نسخت الكلام ... أني مجذبك أو مب مصدق

أنا كنت أضحك على التعليق بس ... ما دريت أنها صايرة معركة بالموضوع

ما تشوف شر لا أنت و لا أبوك والحمدلله على سلامتكم وهذا أهم شئ

أهم شئ أعجبك الإسم :ok:

[Qa6ar]

خطاك الشر

والحمدالله على سلامتكم

[نااااني]

الحمد الله على السلامه وانا كنت متواجده تاريخ 4-8 -2010 في الاحساء وفعلا بعد العصر تغير الجو وكان غبار وبعدها مطر قوي لدرجه كسرت درايش موتر خالي بس الحمد الله ما صار لهم شي كانوا نازلين وصلحوها في الاحساء اعتقد....وما تشوفون شر....