يا اخوان .نبغي نعرف عن.. مطار الدمام

[AL3NA]

السلام عليكم ورحمة الله وبركاته


كل عام وانتم بخير :nice:

انا ابغي اروح لمكه ان شاء الله وقالو لي تروح الدمام وتحجز من هناك... وتروح بالطياره اسهل لك ومافيها تعب ...

بس اللي ابغيه الحين ابغي اتواصل مع السفريات اللي بالدمام ابغي رقم اي سفريات او طريقة الحجز ؟... او الاسعار


اللي عنده خبر يطرش لي رساله او يحط الارقام في الموضوع وجزاكم الله خير :victory:

[Right]

أخوي مب لازم تروح الدمام عشان تحجز تذكرة

عادي احجز التذكرة من أقرب سفريات أو بمكتب الخطوط الجوية السعودية بالدوحة

أو حتى على موقع الخطوط الجوية السعودية

وهذا موقعهم : www.saudiairlines.com

شكثر ناس أعرفهم يسوون هالحركة

يحجزون التذاكر من الدوحة ... يعني من الدمام إلي جدة ... ومن جدة إلي الدمام

يحركون من الدوحة بسياراتهم ووقفونها في مطار الدمام

[AL3NA]

تسلم يالغلا

[khaleeji]

مرحبا يا شيخ

مثل ما قالولك الربع وممكن تروح بعد من مطار الاحساء انا رايح منه العام
وحتى اذا الحجز فل ممكن تحجز على مطار الطايف

[مستثمر_]

احسن لك عن طريق الوب سايت مال الطيران السعودي

[ذكي جدااا]

والله يا خوووك ما شوف في فرق كبيير الا اذا كنتم اسرة كبيرة وعدد افرادكم كثير انا بالصيف اخذت تذكرة الدمام جدة الدمام ب 850 ريال اذا ما خاب ظني ووقفت السياره عند واحد من الربع بس على العموم في مواقف بمطار الدمام يمكن يطلع لك على الويكند تقريبا 100 ريال . أسعار التذاكر مااعرف حاليا كم يمكن زادت لأنه الحين موسم ويمكن بعد ما تحصل روح الخطوط السعوديه بشارع السد وشوف اذا حصلت واحسب حسبتك وشوف كم بتكلفك الرحلة وكم بتوفر ولا تنسى تحسب اذا ودك تقعد ليلة بالدمام قبلها ولا لا يعني اذا رحلتك لجده الاثنين يفضل تسافر الاحد وتبات ليلة هناك يعني العملية يبي لها حسبة وبالتوفيق.

[الشامخ]

من واقع تجربه احجز من طيران السعودية اللي بالسد ، واحجز الدمام تدري ليش لان في اليوم الواحد اكثر من 5 رحلات ومطار الحسا مافي الا رحلة وحدة وهي يوم الثلاثاء على ما اتذكر .

عشان لو بغيت تقدم او اتـاخر الحجز او طارت الطايرة

وقف سيارتك في المطار في الظلال ورسومه بيسطه ، واحفظ مكان الموقف عدل ، لان مطار الدمام ضخم والمواقف كبيرة ومتعددة الادوار.

تروح وترجع بالسلامة

[ثاني]

مرحبا يا شيخ

مثل ما قالولك الربع وممكن تروح بعد من مطار الاحساء انا رايح منه العام
وحتى اذا الحجز فل ممكن تحجز على مطار الطايف

عندي استفسار فديتك
مطار الأحساء فيه سكيروتية لحفظ السيارات
وهل فيه طبيلات للمواتر

وشكرا

[غير عنهم]

اهم شي تاكيد الحجز لان الزحمه شديده

[ضيف الدولة]

على كل حال أنا جربت السفر عن طريق مطار الدمام اكثر من ثلاث مرات فهو مريح ومختصر للوقت والجهد لان الدمام من أبو سمرة كلها 300 كيلو وكنت احجز على الانترنت وجربت طيران سما وهناك طيران ناس إضافة إلى الخطوط السعودية وكلها ممكن تحجز فيها عن طريق النت
موقع سما هو :

http://www.flysama.com


وبالنسبة للسيارة تتركها في مواقف المطار وهي آمنة والموقف رخيص الساعة كلها بريال واحد ليس كمطار الدوحة الان وصلت إلى خمس ريالات!!!!

والخلاصة أن السفر عن طريق الدمام مريح ويفكك من ضرب خط 1500 كيلو

أما الأسعار ففي غير رمضان وأوقات المواسم تكون رخصة جدا ذهاب وعودة الدمام جدة الدمام ما تكون أكثر من 500 ريال

الان في الموسم ممكن تكون 700 ريال ذهاب وعودة

[fhd4]

شوف طيران نـــاس ...

www.flynas.com


أو طيران سـمـــا ...

www.flysama.com


أسعارهم أرخص ... وعندهم رحلات من الدمام ...

[khaleeji]

عندي استفسار فديتك
مطار الأحساء فيه سكيروتية لحفظ السيارات
وهل فيه طبيلات للمواتر

وشكرا
والله يا الشيخ ما اذكر لاني قطيت سيارتي في البسامي الي يشحن السيارات في الاحساء احذا المطار ورحت بالتكسي

[بـن عدوان]

أسعار الطيارات الداخلية ارتفعت مو نفس قبل ..

بس في كل الأحوال فيها توفير ..

ربي يسهل عليك اخوي

[الظغط العالي]

عندك الخطوط السعودية وطيران سما وطيران ناس وكلها تطلع من الدمام ..

وكلها تقدر تحجزها من النت بنفس السعر والخطوط السعودية مسوين عرض للي يحجز من النت ..

وبالنسبة لمطار الدمام المواقف الساعة بريالين واذا وقفت مدة طويلة السعر يقل يصير باليوم وأرخص ..

[(عبدالله)]

السلام عليكم

أولاً مواقف مطار الدمام

مظللة وواسعة وفيها عدد كبير م المواقف
قيمتها ريال واحد للساعة أي 24 ريال في اليوم
ولكن... احذر في نفس الوقت ولا تحط شي ثمين داخل السيارة مغري للسارق إنه يبوق

ثانياً حجز تذاكر الطيران الداخلية

(1) يمكنك الحجز عن طريق الخطوط السعودية في الدوحة (علي بن علي -السد)
ولكن... السعر أعلى من إنك تقطع التذكرة من السعودية
مثال: الدمام-جدة-الدمام= 780 ريال سعودي (من النت أو من داخل المملكة)
ولكن إذا قطعت التذكرة من مكتب الخطوط بالدوحة بتكلفك 1010 ريال قطري!!!

وهذا الأمر جديد الآن!!

(2) الشي الثاني... مشكلة الحجز عن طريق النت تكمن في المعلومات المطلوبة للدفع..
بتلاحظ عند الدفع إنك مطالب بتزويد معلومات إجبارية لأول مرة أواجهها: عن البلد والرمز البريدي و و إلخ...
وبالتالي ما بتقدر تدفع ببطاقتك الماستر أو الفيزا (يمكن البطاقات الصادرة فقط من السعودية يمكن الدفع بها!!)...


والله يوفقك

(عبدالله)

[جينير]

انا دايم أحجز من موقع الخطوط السعودية بالماستر والأمور كلها ممتازة
ومواقف مطار الدمام جيدة

بس الحين زحمة مافيه حجوزات لا من الدمام ولا الرياض
فيه رحلات قليلة بس ترانزيت ( ابها-نجران-حائل-الخ)
دورت خلال 21-22-23 اغسطس مالقيت حجز
فاضطريت أني اسافر بالسيارة يوم السبت إن شاءالله


وبالنسبة لطيران ناس أعتقد أنها كنسلت الرحلات الداخلية أو قللتها
لانها اشتغلت على الرحلات الدولية أكثر
والخطوط السعودية وعدت بتغطية جدول رحلات ناس الداخلية

[ثاني]

نتمنى زيادة الرحلات في مطار الأحساء

[Rayane]

طيب الاحساء مافيه منه رحلات.....

هو ابرك من ضرب خط لين الدمام.... يا ريت أحد يفيدني...

في انتظاركم...

[khalifa6]

الاربع كفو ووفو في الموضوع وعمرة مقبوله ان شاء الله

[AL3NA]

الله يجزاكم خير

عز الله ما قصرتو

[فويرط]

للعلم

تم إغلاق مطار الاحساء


يعني ماعندنا الا الدمام

واللي يبي يتأكد يسوي بحث في النت

[الكلدي]

اخوي لا تعور راسك احجز على الطيران السعودي الدوحه جده جده الدوحه
قبل شهرين ثلاثه من رمضان بتطلع عليك التذكره 1600
وريح راسك