ارجو المشوره والمساعده لأهل الخبره...شاليه سبب لي خساره كبيره

[مختصة]

مرحبا
في يوم من الايام وصلني رقم غريب
رديت عليه وقالو لي شركة قــطــر لانـــد
انت فايز معانا بجائزه
رحت لهم واقنعوني اني اخذ شاليه عن طريقهم
والشاليه ممكن ابدله لأي فندق في مصر..
وسعره الشاليه 85 الف
بالاظافه الى رسوم سنويه الف ريال لصيانة الشاليه
قالو لي اذا شريته تقدر تبيعه وتقدر تاجره
بس لازم تدفع نص المبلغ
ولما كملت اكثر من نص المبلغ
قالو لي مانقدر ناجر
واذا عندك جيب زباين وبناجر لك او انتظرنا لين يجونا زباين
جابولي صك الملكيه
وقالو لي اخذها ووقع على شيكات
بس مارظيت اوقع
ولااخذ الملكيه
وقالو لي اذا ماسويت هذا الشي
راح نلغي لك الملكيه وكل فلوسك بتروح عليك
ماقدر ادفع لهم
لاني احس اني مومستفيد
بس وقتها اقنعوني وزينولي الموضوع
ويوم فكرت لقيت ان موضوع مامنه فايده
دامهم ماراح يبيعونه لي
ولابيأجرونه
شالفايده اكمل لهم باقي المبلغ
وانه دفعت اكثر من نص المبلغ
يعني خسرته وراح علي..
ول في طريقه اقدر اخذ فيها حقي..
انه مابي استفيد ولاابي شي
بس ابي حقي الي دفته لهم
او ابي استفيد من هالمبلغ عالاقل بدون ماخسر شي
ارجوكم ساعدوني وقولو لي شاسوي..
لاني ماعندي خبره كافيه في هسوالف
ارجو المساعده..

[المتألق]

ليش ماتشورينا قبل تروحين لهم

هذولا شركة نصب

والمشكله كل شي متاح لهم في قطر

عندج حل واحد تسألين عن صاحب شركة قطر لاند وتطلبين منه يساعدج

[nagano]

الله يسامحج على اللي سويته

كل العالم تعرفهم على الاقل اسألي اي حد قريب منج

المهم مافيه الا حل واحد تبلغين عليهم وتشرحين لهم السالفه انج تعرضتي

لعملة نصب وممكن ترجع الفلوس

ولو مارجعت الفلوس مايطيح فيها شخص ثاني

وانشالله الاخوان يعطونج الحل المناسب

[المتألم]

هذه الشركات ومن على شاكلتها شركات نصب وأحتيال
أخذت عندهم دورات في فن التعامل وجذب الزبائن وقد عرضوا على العمل لديهم
بعدما راووا أن لدي قدرة لا بأس بها في الإقناع ورفضت طبعا لأنني مدرك أنهم يستدرجون
المغفلين من الناس ويضحكون عليهم باللعب بالكلمات وبالآمال السقيمه ..

المشكلة الكبرى أختي الكريمة أن الناس نشروا مقولة
" القانون لا يحمي المغفلين "

والحقيقة أن القانون وضع أصلا لحماية المغفلين والبسطاء الذين يخدهم دواهي الناس
وذئابهم


الله يعوضك زين وفتحي عيونك قبل ينقص عليك بأمور أخرى
ومحد يشتري سمك بالماي ..

إلا أقولك عندي شاليه بأسبانيا تشترينه : (

[البحار00]

مساكين هالموظفات الي عندهم

اول مايدقون علي اهددهم اني بشتكي عليهم


والله يعين كل شخص طاح في يدهم

[هذلان]

الله يعينج

كنت اسئل نفسي اذا مرت علي شركه من هالشركات هذي سواء اتصال او قابلتهم في مكان .. من يصدقهم و شلون صار لهم هالشركات سنين و مستمرين بهالسوالف معقوله حد يصدق و يشتري .

طلع فيه :rolleyes2:

انصحج تاخذين كل المستندات الي عندج و تروحين لمحامي و تشرحين له القصه من اولها لين اخرها و هو بيوجهج للوضع الصحيح

[المبتسم]

انا رحت لهم وقلت لهم باستشير الاهل,,,ومن باب يمسكون فيني عطون خصم 50% بدورة كمبيوتر بمعهد مشهور!!!!!!!!!! اخذت الخصم واعتذرت لهم,,,وتموا يتصلون لي مده لحد الياس!!!!!!!!!!!!!
طبعا الخصم انتهى وما استعملته خفت انه حرام!

[سلطان911]

الله يوفق الجميع
والمثل يقول لا فات الفوت ماينفع الصوت
الحل الوحيد ترفعين قضيه على الشركه وتشوفين محامي زين

[mubarak84]

الله يعوضج خير

انا اقول ترى سواء رفعتي قضيه والا اشتكيتي والا رحتي لمدير الشركه مب راد لج شي
اعتبريها ثمن درس ووفري على نفسج عوار الراس
والله يعوضج خير انشالله ولا يسامحهم على اللي يسونه في العالم

[مختصة]

مشكورين وماقصرتو على ردودكم
الله يجزيهم على الي سووه فيني
والله لايبارك لهم في كل ريال خذوه مني
راح ادعي عليهم اذا ماردو فلوسي
والدنيا فانيه
لكن يويلهم من عذاب الدنيا الي راح يتسلط عليهم
والي اكثر منه عذاب الاخره
الله ينتقهم لي منهم
وياخذ حقي منهم

[بولينجر]

روحي لمحامي وهو بيسوي الاجراءات المطلوبة..... والله يعوضج كل خير.....

[مختصة]

مشكور اخوي...
الله لايوفقهم دنيا واخره..
والله ياخذ حقي منهم
وينتقم لي منهم..

[ابن الجزيرة]

والله انا اتالم عندما اسمع مثل هذه القصص وهي كثيرة في قطر والخليج

هذه الشركات لا زالت تعمل في قطر وتستدرج البسطاء


تدروا ليش ؟

لان من نصب عليهم يكتفوا بالدعاء عليهم

والمبكي عندما يستشير صاحب المشكلة مثل صاحبة الموضوع ياتي من يقول لا توجعي راسج واتركي الموضوع


طبعا هذا الذي يجعل هؤلاء يشتغلوا وينصبوا على اناس اخرين

رايي ان كل واحد تعرض لمثل هكذا نصب ان يرفع قضية ويذهب الى الشرطة ويوجع راسهم وينغص حياتهم


لان استمرار تجاهلهم مزيدا من النصب والاحتيال


لقد تعرضت لنصبهم وبمبلغ بسيط ولكني لم اسكت عليهم

وفي النهاية ادينوا وعوقبوا وحميت اناس اخرين من الوقوع في نصبهم


القانون موجود فقط عليكم باللجوء اليه

[راعي 2006]

قهر والله ..

حاولوا فيني لين زهقوا

حتى الهديه الي قالولي عنها في الاخير ماعطوني اياها لانهم زهقوا معاي وشافوا مامني فايده

والله يعوضج يارب

حاولي قد ماتقدرين انج ماتوقعين على شي جديد من الي بيقولونه لج ..

والفلوس تروح وترجع الخساره خسارة الروح ..

[captin]

معوضة خير ان شاء الله


قطر أصبحت أرض خصبة لجميع أنواع الحرامية
وخصوصا من الجنسيات الشامية على الجميع الانتباه

[مختصة]

حسبي الله ونعم الوكيل عليهم دنيا واخره
حرام عليهم كل الي خذوه
ويعلهم مايتهنون في ول ريال من الي خذوه
ويصرفونه على صحتهم يارب

[الصريحه]

لاحول ولاقوه الا بالله

[بدون]

الله يعوضج خير و ياخذ حقج منهم

[mohd89]

احنا صايره لنا مشكله مع شركة وهميه تتدعي انه عندها شاحنات تأجرها وجزء من الدخل يرجع لنا
المهم بعد فتره ما نزلت الفلوس في الحساب لمدة شهرين واكتشفنا ان الشركه ناصبه على جميع المتعاقدين معاها .. ولكن اوراق الشركه كلها رسميه ومسجله في الوزاره
وتم تجميد حساب الشركه فيه 16 مليون ريال من فلوس العالم المساكين
الله يعوضنا خير وياج اختي وأذا الشركه قانونيه ورسميه ممكن ترجعين للقانون وأن شاء الله بيرجعون حقج

[الجوكر90]

السلام عليكم
الشيخه كم لازم تدفعين لهم؟
اتوقع 35 الف
دفعيهم حق محامي وصدقيني راح اطلعين فلوسك كلها وفوقهم تعويض
وبالتوفيق ان شاء الله

[ضوى]

سبحان الله نفس الكلام انقال لي ، خليتها تكمل كلامها كله يمكن ساعة وشوي ، عقب قلت لها ترى انا ماحب السفر ولا اسافر ولا احب الشاليهات واصلا ماعجبني ايا من كلامها انصفق ويهها وقالت لي بس الجايزة تروح عليج قلت لها حلال عليج هدية لج مني :)

[JN000N]

حسبي الله ونعم الوكيل


جربي حظج مع محامي عدل
شدراج يمكن على يده الله يرد لج بيزاتج


والله يكون في عونج

[شبح الصمت]

بقولكم قصتي معاهم حلو

انا قصتي نفس قصة الاخت ولا تسألوني وين عقلي بس انا اهون منها

الشاليه الي خذته 60 ألف ريال حلو

عطيتهم دفعة 6 آلاف ريال

قالوا اقساط لمدة مدري كم كل شهر 800 ريال المهم

يوم طلعت من عندهم سالت رفيجي طاح في بطني والمهم قالي طنش وطنش لهم الحين لي يمكن سنه وشيء او سنتين يتصلون فيني من كل مكان لي طرشوا لي المحامي مالهم الي صوته تقول عزرايل استغفر الله العظيم

قام يقولي الاخ فلان قلت له اي امر قالي معاكم المحامي شركة الله لا يبارك فيهم المهم قلت له خير اش تبي قالي انت متاخر عن السداد قلت له شنو سداد وشو يالحبيب قالي الشاليه قلت له ياخوك انا يوم وقعت معاكم العقد كنت مب في قواي العقلية !!!

قالي اشلون قلت له ياخي كنت مب في قواي العقلية قالي شنو !!!

قلت له الي تسمعه والمبلغ الي خذتوه مني صدقة مني لكم !!!

احسه انصدم قالي يعني كذا مش عاوز تحل المشكلة وديا !!

قلت له اسمع اسمعني لا اعاد اشوف رقمك مره ثانية واذا في شيء الحمد لله في محاكم تفض النزاع بيني وبينكم !!!

قالي اوكي

وعشان تدرون انهم كذابين وما يقدرون يسون شيء عقب شهرين اتصل بعد يبي يفاوضني او اكثر لو بيدهم شيء كانوا طلعوه بالقانون من عيوني !!!


وعلى فكره سألت رفيجي محامي قالي دام مافي شيكات عليك ما يقدرون يسوون شيء

ما ااقول الا الله يعينج اختي والله يعين كل واحد تضرر من ذولي الاشكال ..

عالعموم نصيحه طنشي يا تخسرين فلوسج يا اختي ترفعين عليهم قضـيه لانج الله يهداج دافعة نص المبلغ

الله يعوضج خير الله يعوضج خير

ارقامهم الي شكلوا لي منها
44131558
44131557
44342713
44365081
44131916

[اعالي الجنان]

لاحول ولاقوة الابالله
الله يعوضج خير بس لاتسكتين عن حقج روحي حق محامي وخليه مطلع على كل شي سويتيه يمكن تلقين لج حل لمشكلتج

[mohd89]

وين الدوله عن هالشركات ؟

[miss.qa]

انا اتصلوا في ابوي 2007 وقالي ابوي روحي مع زوجج واخوج استلموا الهدية انا مالي خلق وماعرف شنهي هديتهم قلنا له اوكي واحنا مستانسين على بالنا رابحين سياره ولين مادلينا العمارة الحترة ووصلنا طابقهم وقدعونا بكمن قلاص عصير وقعدنا ننطر نص ساعه وانطل من ورا الباب ونلقى هالعالم موزعين كل عايلة قطرية ماسكتهم مصرية ولا عراقية وماعرفنا السالفه الا يوم جا دورنا وعقب ماخذو بياناتنا الشخصية بس احنا كنا شاطرين قلنا لهم انا احنا مانشتغل وبطالية في البيت ماعندنا ريال وابونا يصرف علينا وبعد قالوا لنا مب مشكلة وايقعدونا حول الساعتين ونص اتهذر المصرية فوق روسنا وبعدها اتريح اتجينا العراقية وعقبها مصري يقيس النبض اذا اقتنعنا ولا لا ,,, عاد انا تمللت وتليفوني ماسكت واقوم وارد واطقها بسالفه عصبت علي وقالت لي صكي قلت لها اسفه مكالمة ضروريه وماقدر اصك وانا بديت اتنرفز واتضايق وانا مب مقتنعة باللي اتقولينه وماعندي فلوس وبعدين وين الهدية هااااااا انا ظهري عورني وتعبت يالله يالربع قوموا ماصدقوا عاد وتلحقنا انتوا مش عايزين الهدية الهدية الهدية يامادام ويوم جات تعطينها الا كوبون خصم 50 % من معهد كمبيوتر واخذ الكوبون وافره في ويهه ان عاد شفت رقمكم مره ثانية وقلتوا لي هدية ماهدية والله لاجيكم ومعاي الشرطة وبس ومن سنة 2007 ماعيزوا دقوا على العايلة الكريمة وعلى رفيجاتي واللي معاي بالدوام واهل ريلي نفس الشركة اللي تبيع المخمة اللي ب 12 الف سندرونا احشرونا أف مابي اسب (( اللهم اني صائمة ))

[المقهوره]

ذكرتوني بشركه كان يروج لها واحد سوداني بس ناسيه اسمها

الي هي تشترين منها وعقب ابلفيت تكون لك ورث للابد وكل ماسويتي شبكه من ثلاث اشخاص يطلع لك شيك بـ 25 دولار

وكل ماروجتي لها اكثر نزل لك شيكات اكثر واكثر

هذه سودانيه ادخلت فيها وقالت لي عنها ( مع انها ملتزمه وتحلف بالله انها استفادت)

بس انا ما اقتنعت فيها بصراحه احسها ما تصلح لنا نقعد نروج

[BIG-VEGA]

وين الدوله عن هالشركات ؟

الشركه الي في السد مصرحه ,ولها سجل تجاري وصار لها سنين شغاله

والعروض والخدمات الي تقدمها الشركه حقيقيه

والمشكله في انك اتحصل حجز في وقت يناسبك (من سابع المستحيلات)
الجوده الي يتكلمون عنها مش موجوده في الواقع
ويبالغون بطريقه غير طبيعيه ان عرضهم افضل عرض في تاريخ البشريه

الزبده هي شركه تزين وتوعد بدون تنفيذ ولا فيه اي شي قانوني ضدها

[PARIS]

انا اتصلوا فيني ونزلت موضوع في المنتدى وماقصروا الاعضاء حذروني وعلموني انهم نصابين جزاهم الله خير وطنشتهم ولارديت عليهم وخليتهم يولووون ................

[مناحل بوسيف]

وانا نفس الشي انصبوا علي نفس الشركة ( شركة قطر لاند ) حسبي الله عليهم

وخذوا اكثر من نص المبلغ .. واوهموني ان صاحب الشركة قطري فلان بن فلان ال ثاني

وشفت ورقة تثبت هالشي .. عاد ماادري ورقة صحيحة والا كذب .. ويم تهاوشت معاهم

قالوا لي اكتبي شكوى وبنرفعها للأدارة .. قلت انا ابي توصل توصل لصاحب الشركة

اللي من ال ثاني ويوم ضيقت عليهم في الطلب قالوا لي ان صاحب الشركة القطري طلع

خلاص والحين وحده قطرية هي اللي خذت الشركة .. قلت عطني اسم صاحبة الشركة

ابي اشتكي عليكم عندها دام انها قطرية الا يقول اسمها فتحية السيد الجندي

قلت نعم خير ان شاء الله !!!:eek5: هاذي مصرية مب قطرية

الظاهر كلكم نصابين من اكبركم لين اصغركم ...


ديروا بالكم اخواني وخواتي تتعاملون مع هالشركة .. احنا انصب علينا وخلااااص

لكن ما ابغي ضحايا اخريين هالشركة وامثالها ...


حسبي الله ونعم الوكيل فيهم

[شيط ويط]

هذي تالية اللي يسوي الشي (بالخش) يابلفيت (خايفين) من الحسد :secret:

[^^^EAGLE^^^]

صدقي والله تسمعي خبرهم عن قريب لان الله يمهل ولا يهمل

واستشيري محامي ولا تيأسي ابدا لين ما تردين حقك منهم

[omega]

محد يتعلم ببلاش

الله كريم

[انيقه]

اختي اذا بينك وبينهم اتفاق مكتوب انصحك تلجأين للقضاء وهم بيردون لج حقج بس اذا ما عندج شي يثبت حقج بحاولي توصلين معاهم لحل ودي

[بلوتنيوم]

هل في عقد بينك وبين الشركة ؟
هل في شروط العقد انه الشركة ملزمه تأجر او تساعدك في تاجير الشالية ؟
هل في شروط جزائية في العقد ؟

الموضوع محتاج قانوني لو حصل لك ثغرة ممكن يساعدك او ممكن يحد من الاضرار الى صارت او بتصير
خذ لك استشارة قانونية عند محامي بس تاخذ معاك الاوراق الى وقعتها واتمنى انك اخذت نسخة من كل ورقة وقعتها معاهم !!

ومعوضين خير ان شاء الله