ممكن حد يرتب لي جدول في الرمضان (القاهره)

[محمد 2002]

السلام عليكم

ياليت حد يرتب لي جدول في الرمضان طبعاً السكن في القاهره وين افطر وين اتمشى في خيام وش احسن خيم رمضانيه ولا حد يخبرلي مكتب تأجير سيارات عدله بدون سايق لا يبخل علينا

[بوحمد1]

الله يحفظك

عليك بملازمة المساجد باكثر وقت تقدر عليه حتى تكون في السيفتي اما موضوع الخيام فأنا لا انصحك بها لا في رمضان ولا غير رمضان


وسلامتك

[محمد 2002]

الله يحفظك

عليك بملازمة المساجد باكثر وقت تقدر عليه حتى تكون في السيفتي اما موضوع الخيام فأنا لا انصحك بها لا في رمضان ولا غير رمضان


وسلامتك

جزاك الله خير ان شاء الله الرحله من جده بعد الانتهاء من العمره ونصيحتك على عيني وراسي وهذا حق المسلم على المسلم النصيحه ما قصرت طال عمرك

[abu m7md]

ودي اساعدك
بس مصر مازرتها بحياتي كلها
عمره مقبوله باذن الله وترجع لنى بالسلامه
ولاتنسى تجيب لي معاك
محمصيه
ههههههههههههههه

[captana]

والله يامحمد الاماكن في مصر كثيرة, أول نصيحة لا تطلع بالنهار لأن الزحمة وعصبية الناس هناك تزيد في رمضان فمافي داعي تعكر مزاجك او تجرح صيامك.
بالنسبة للفطور حاول دايما انك تحجز في المطعم اللي انت ناوي تفطر فيه لأنك لو رحت بدون حجز 90% ما راح تلاقي مكان (المطاعم دايما مليانة وقت الفطور والافضل تخلي الفندق يحجزلك).
وين تفطر هذا يرجع لذوقك وميزانيتك وايش تحب تاكل , اذا تحب الاكل المصري عندك مقهى نجيب محفوظ في الحسين اكله ممتاز وعندهم تشكيلة كبيرة من المحاشي والطواجن وغيرهم من الاكلات المصرية
وممكن عقب ماتفطر هناك تضرب لك حجر (اذا كنت تشيش) أو تروح تاخذ لك شاي بالنعناع في قهوة الفيشاوي او رز باللبن والمكسرات من عند المالكي وكلهم قراب من بعض في الحسين.
اذا تبي اختيارات ثانية للاكل المصري عندك مطعم ابوالسيد في الزمالك وعنده فرع في مجمع سيتي ستارز هم بعد الاكل المصري متميز عندهم.
اذا تبي شي انترناشونال اكثر ارشح لك مطعم زيتوني اللي في الفور سيزونز نايل بلازا اكلهم منوع بين شرقي لبناني وغربي وعندهم بوفيه في رمضان. وبعد فندق انتركونتننتال ستي ستارز عندهم بوفيه افطار
ممتاز والمول اللي جنبه فيه كافيهات كثيره لو بغيت تقعد او تتسوق هناك.
عندك بعد سفينة نايل سيتي وهي سفينة ثابتة فيها عدة مطاعم مثل تشيليز ومطعم حلقة السمك ومطعم استوديو مصر.
اذا لك في المأكولات البحريه عندك قدورة في جامعة الدول لكن احس ان مستواه مب مثل اول عقب ماتوفى راعيه الله يرحمه وعندك مطعم كاستن في مدينة نصر عندهم طاجن كالاماري
وسمك سنجاري (نفس المسكوف العراقي) مش طبيعي, وفي بعد مطعم في السيدة زينب بس مايعرفونه وايد الخليجيين اسمه ابن حميدو عنده شوربة سي فود خيالية وطواجن رز بالجمبري.
الخيام الرمضانية انا عدي بها من زمان فما اقدر افيدك وايد لكن اذكر ان فيه خيمة زينة عند مركز التجارة العالمي و فيه خيام في طريق الهرم الصحراوي بس ما يحضرني اسمها.
اتمنى اكون قدرت افيدك بهالمعلومات بس هذا اللي تذكرته.. واذا في اي استفسار انا حاضر.

[محمد 2002]

مشا الله تسلم على الجدول الخطير الله يوفقك يارب

[سمعت الشور]

الاخ بصراحة عطاك البرنامج بس بتحس في رمضان المصريين عندهم روحانية عجيبة و انصحك تروح فرست مول ع الساعة 10 وبعدين تطلع للحسين وجرب قعدة الفيشاوي لكن تحمل من الاكل المكشوف وعموما كل فندق لة جو وانصحك بالجراند وبجنبة القرية النوبية وبالنهار مثل ما تفضل الاخ ما انصحك تطلع من الاوتيل كلششششش 0

[سمعت الشور]

فية مطعم بشارع جامعة الدول اسمة قندهار مكس هندي على لبناني ممتاز وبعدين اضرب حجرين في لوكيشن بنفس الشارع او روح الدوحة كافية في المهندسن جنبك 0

[captana]

مشا الله تسلم على الجدول الخطير الله يوفقك يارب

وياك انشالله اخوي... وانشالله تستانس في رحلتك

[برزان]

مصر في رمضان كل شي موجود وكل شي ايصير
يعني مفيش حاجة اسمها لاءّه

امس جايني مسج ان في مكتب يدعولك بفلوس ... تبي رمضان كله ولا اوقات معينه مع بكاء ولا بدون
ضحكت والله ...عاد الله واعلم بصحة هالكلام : )

الله ايوفق لك اخوي

بس في مطعهم مهم جدا لازم تفطر او اتسحر عنده وهو معروف ....مطعم فرحات في ميدان لبنان في المهندسين ...شغل حمام مشوي و فريك بس شي عجييييييب وينك يالسرير عقبه .:)

عندك سلمك الله فندق الماريوت عنده جلسه برع في الحديقة حلوه وجلستها هادية و ونيسه وفيها فطور واكل طيب دامه مهب موسم صيف .
و الجلسة الحوه بعد عندك فندق جراند حياة عنده مطعم من داخل الفندق على النيل جلستة حلوه و ممتعه .

الله ايوفق لك اما مصر اماكنها ماتخلص ...بالتوفيق ان شاء الله