سرقووو بيتنا يهاال في ليلة القرنقعوه

[كاتم الاحزان]

يالربع انا حاب اعرض عليكم مشكله صارت لي الليله وهي ليلة القرنقعوه الليله اللي يدشون فيها ابناء الجيران من دون استئذان وبكثره


وهو عندما كنت في الساعه التاسعه مساء وصلني اتصال من الاهل يقولون انسرقنا وبعدين رحت البيت لقيت الوالده و قالت لي انها كانت في المطبخ وردت الصاله لقت جوالها مسروق والكرت موجود على الكنب
بعدين رحت وسئلت الجيران و قالو لي قبل ساعه طلعو ثلاث اطفال من بيتكم وركبو ويا سياره وعطوني مواصفاتها وتميت ادور على السياره وبعدين اتصلو لي لاهل وقالو ان الحرامي رجع الجوال ولقيناه منزله عند الباب
ورديت للبيت بسرعه لقيت سيارة الحرامي اللي سرق الجوال طالعه من الحاره وبعدين وقفتهم ولقيت فالسياره ثلاث اطفال اعمارهم من 9 الى 11 سنه و وياهم خالتهم وخالهم من الهند وهو اللي يسوق فيهم وقعدو يتاسفون مني ويقولون هذولا يهال ومن هالكلام لاكن انا حبيت اخرعهم شوي و اوديهم قريب مركز الشرطه وخذيت رخصة السواق وانا في الطريق وصلني اتصال من شخص من قبيله معرووفه وقال لي هذولا اخواني من ابوي ولا تفضحنا وانا اسف ولا تكبر السالفه وبعدين سامحته لوجه الله بس قلت له اني حبيت اخوفهم وانا ماكنت ابي اوديهم للمركز

وانا حبيت احذركم من هالناس لان اللي سرق الجوال بيسرق غيره

وابي اسئل كل من اطلع على هالموضوع لو كنت في مكاني وش بتسوي

[العضو الماسي]

هذي صارت مع بيت خالتي . العام . كانت بنتهم الصغيره يمكن 13 قاعده في بيت الشعر ألي برع وفاتحه الباب للأطفال الصغار . على أساس توزع عليهم القرنقعوه وحاطه جنبها كيمره كانون مادري كم قيمتها يمكن 8 أو 10 . على أساس أذا جاو عيال الجيران وبنات الجيران تصورهم . ماحطت الكميرا وراحت تجيب جوالها على أساس تكلم بيت خالتها وتشوف متي بيجونهم . ماعودت الا الكميرا مسروقه . والف الحمدلله . أن ماكان فيها صور مفضيتها على أساس عيال الفيريج وبنات الفريج لاجاو تصورهم .

وياخوي ينخاف من الأجانب وخاصه (( العرب منهم )) و الاسيوين (( نادر الأسويين أكثر شي فالعيد )) .

تلاقي عيالهم كبار مشاء الله ولحين يبغي يقرقع .

[BIRDS]

والله زين سويت فيهم
لازم تخرعهم وزين اطلعوا ناس خايفين الله وردوا علشان يرجعونه
الله يديم علينا الامن والامان

[CH Engineer]

تخيل اخوي واحد من عيالك شيطان
وراح يقرقع وشاف جوال فبيت الناس وحطه فجيبه
ويوم عرفت هالشي مسكته وضربته وخليته يرجع الجوال لبيت الناس..

وكان موقف راعي البيت مثل موقفك!!!!!!!!!!!!!!!!!




قول الحمد لله انه جوال مب كميرا وفيها صور..
لانه الي ماعندهم ذمه قاموا يخافون يبوقون الجوالات.. لانهم يعرفون انه الشرطه تقدر تجيبهم

[ابن قطر]

اخونا كانم بيض الله وجهك

يمكن صح كلامهم يهال وفز قلبهم على الجوال بدل من المكسرات عاد كريكعانكم انتو غير شكل

والعفو عند المقدرة ومن شيم الرجال

[حنان k]

فعلك فعل نشامى وأنا أختك روح الله يبلغك ليلة القدر ويجعلك من عتاقها ويرضي والدينك عليك

[مستجدة]

حرام اتسوي معاهم هالشئ وتفضحهم المفروض اتسامحهم على طول لان اللي سوا هالشئ قلتها اطفال واهلهم مع انهم مب عرب
ردوا الجهاز من اكتشفوا انه عيالهم ماخذينه من بيتكم هم مب حراميه بالعكس المفروض تشكرهم واتحرصهم
على عيالهم في الاول والاخير اطفال مايعرفون شنو معنى سرقه

لازم اتكونوا حرصين وعينكم على الاطفال والله اليوم كسروا خاطري الجو حر ورطوبه بدل ماوزع القرنقعوه
اوزع فاين ومسح وجيهم فديت وجيهم البرئيه

[khaleeji]

والله يوم عيد الاضحى لقيت جارتنا وهي عجوز تدعي عند الباب ودريولها متقابض مع صبيان كبار بايقين فلوس من حجرته

لاشعوريآ عطته كف خليته يعووور مكانه ورجع الفلوس وكنت بجيب له الشرطه بس تعوذت من ابليس

فاعتقد ان تصرفك ماعليه كلام وجزاك الله خير

[خنور]

هذي نتائج البدع والخرافات التي لا تتصل بديننا ولاشرعنا و علمت اعيالنا الشحاذه ودخول بيوت الناس

بدون اذن ، ناهيك عن خطورتها على الاطفال وطوافهم بالطرق والحارات ليلا .

لا وبعد لها انصار يدافعون عنها انها من التراث الشعبي ومافيها شي الا بدعه وخرافه تم سنها وتم اتباعها

ماقول الا يارب اعفو عنا جميعا ولا تهلكنا مع من سن هذه البدعه التي مالها نص من الكتاب ولا من السنه .

[إينشتاين]

حرام اتسوي معاهم هالشئ وتفضحهم المفروض اتسامحهم على طول

من الي فضحهم ؟؟

الأخ يقول يبي يوديهم قريب مركز الشرطة عشان يخوفهم ماقال انه بيوديهم المركز

وتصرفه صحيح عشان يكون في قلوبهم رهبة وخوف من السرقة ويحسبون حساب تصرفاتهم والطفل في سن 11 سنة يعرف الصح من الخطأ

[بوحارب]

الله يعينك اخوي

بس زين انك خرعتهمhttp://www.7mmlbs.com/img/oil30690.jpg (http://www.7mmlbs.com/) حتى يتأدبون وما يعيدونها


ولو كنت مكانك بسوي نفسك حكم :)

[كاتم الاحزان]

اشكر كل من شرفنا بردوده الطيبه
وانا ماكنت بفضحهم مثل ماقريت في احد الردود لاوالله بس حبيت اخوفهم على اساس مايتجروون على هالشي مره ثانيه

وبالنسبه للي يقول ان القرنقعوه بدعه

انا مدري وش اقول لك بس
انا بالنسبه لي اخواني وعيال عمي ولله الحمد محد منهم يقرقع عند ناس مانعرفهم لازم يكونون من الاقارب او من الجيران المقربين لنا

او الناس اللي يعزووون علينا

موب مثل بعض الناس اللي يخلون عيالهم يلفوون الفريج بيت بيت مع احترامي لهم موب زين

وشكرا لكم جميعا

[m7mmd]

البدعه تكون في عباده وشدخل القرنقعوه في العباده
ياناس يابشر القرنقعوه من سنيين وبنيين في قطر ليش محد من علمائها ومشايخها انكره
او قال عنه بدعه قاعدين يجيبون لكم فتاوي مستورده مش مالي عينهم الشيخ بن محمود والشيخ الانصاري والشيخ القرضاوي استغفر الله العظيم ناس كل همها التضييق على المسلمين في كل شارده ووارده بكره بيقولون العيديه بدعه ومدفع رمضان بدعه لا تفتحون لهم الباب وردوا عليهم ولا عليكم منهم مدام مافيه عالم من قطر من قديم الازل انكرها
والي خايف من السرقات يخلي القرنقعوه في الحوش والي مايبي يصكر بابه محد بطامر عليه:playball:
____________

[كاتم الاحزان]

شفيك معصب اخوي جزاك الله خير

انا ماقلت لك بدعه او لا انا ماحبيت اتدخل في هالشي او اني افتي فيه

وبالنسبه لتسكير البيبان الحمدلله بيبانا مفتوحه على القرنقعوه وغيره وماتعودنا نسكر بيبانا للضيف سواء عاقل ولا جاهل

بس انا اقول لك انا عيالنا مايقرقعون عند الناس اللي مانعرفهم حتى لو كانو من الفريج

اذا الواحد يبي عياله يقرقعون ياخذهم لبيت قرايبه كلهم بيت بيت موب يهيتهم فالحواري

[m7mmd]

السلام عليكم
أخوي كاتم الاحزان اسمح لي انت فهمتني غلط انا فعلآ معصب بس مب منك ولا عليك في احد الردود حد قال بدعه مب انت :nono:
جايك من هالرابط حار بحار واسف اذا ازعجتك

http://www.qatarshares.com/vb/showthread.php?t=393078&page=3

[latty]

عندنا وعندكم خير

العام سرقوا فلوس كانت على الطاوله وهم مب من الفريق لا الا باكستان اصلا ما يعرفون ايش القرقعان بس جمع بالمكسرات والتمشي ببيوت الناس

والبارح طرحوا الخدامه ارضا وشالوا القرقعان بدون ادنى مراعاة حرمة البيت عاد قرقعانا كان مكيس وبعلب مرتبه لكن اش نسوي

صارت باصات تجي وتنزل من هالناس ويالله

بعضهم شكله خاط الشنب والبعض من البنات على 15 سنه

كل قرقعان ولكل بخير

[الصريحه]

هذي نتائج البدع والخرافات التي لا تتصل بديننا ولاشرعنا و علمت اعيالنا الشحاذه ودخول بيوت الناس

بدون اذن ، ناهيك عن خطورتها على الاطفال وطوافهم بالطرق والحارات ليلا .

لا وبعد لها انصار يدافعون عنها انها من التراث الشعبي ومافيها شي الا بدعه وخرافه تم سنها وتم اتباعها

ماقول الا يارب اعفو عنا جميعا ولا تهلكنا مع من سن هذه البدعه التي مالها نص من الكتاب ولا من السنه .

اخوي انا معاك لكن اعتقد كاني اخبروني ناس قرايبي ان الشيخ محمد العريفي سئل عنها وقال مادامت مافيها خطا وعاده قديمه لاتحث على شيء خطا فمافيها مشكله
لكن اعتقد حذر من المبالغه من الاسراف فيها لان الاسراف مذموم في كل الاحوال
وجزيت كل خير لحرصك

[رمــش الغلا]

والله يسرقون كل شي

اذكر مرة يهال باكستانيين دزوا خدامتنا وخذوا القرنقعوه كله واشردوا وخلوا خدامتنا طايحة مسكينه :(

[بنت ابوها 19]

هذي نتائج البدع والخرافات التي لا تتصل بديننا ولاشرعنا و علمت اعيالنا الشحاذه ودخول بيوت الناس

بدون اذن ، ناهيك عن خطورتها على الاطفال وطوافهم بالطرق والحارات ليلا .

لا وبعد لها انصار يدافعون عنها انها من التراث الشعبي ومافيها شي الا بدعه وخرافه تم سنها وتم اتباعها

ماقول الا يارب اعفو عنا جميعا ولا تهلكنا مع من سن هذه البدعه التي مالها نص من الكتاب ولا من السنه .

قلنا انها عباده وانا مادري


بسكم عاد

عيل تدرون عيشو بلا يوم استقلال ولا يوم وطني ولا يوم قرنقعوه


عيشو النكاده بعينها وعلمها


وقسم بالله خاطري اعرف شدخل الدين بالعادات والتقاليد
في ناس تفتي وتحرم علي كيفها هذا هو الحرام بكبره

:anger3:

[عربسات]

اخوي الي سويته في تخويف اليهال عين العقل في الاخر هذا في مصلحتهم وراح يتعضون من الشي ولا بيفكرون يعيدونها لانهم عرفوا وشوا العواقب الي بتجيهم

بس لا تزعلون مني اغلبيه الناس الي انباقت اغراضهم الغلط منهم عيل تهدون الاغراض سبيل ولا تبونها تنباق ما يصير !!!!!!!!! الاعيال الي بيدشون بيوتكم اغلبيتهم غرب في منهم الزين والشين وليش ادخلونهم لين الصاله ... العاده ينطرون في الحوش وتطلعون لهم برع وتقرقعونهم

اما الي تكلموا على ان القرنقعوه بدعه يروحون يكملون ارقادهم احسن !!

[كازانوفا]

الحمدلله ما طلع عيالي لا قرنقعو ولا عيد خير شر ...

واحلى شي انه اخوهم من عائله معروفه يعني الحمدلله الخير موجود ... ايش خلو للفقارى والمساكين؟؟؟؟

الحمدلله على سلامة الجوال ورجوعه لبيتكم :)

[Al-Enazi]

أول شي الحمد لله على رجعت الجوال

وبعدين تراهم بزران وماينشره عليهم يعني كان التهديد بالشرطه كافي صدقني ماينساها

بس شكلك سببتلهم ربع الله يهديك

[هام السحاب]

والله يسرقون كل شي

اذكر مرة يهال باكستانيين دزوا خدامتنا وخذوا القرنقعوه كله واشردوا وخلوا خدامتنا طايحة مسكينه :(

المره الجايه حطو بودي قارد يوزع القرنقعوه :p

[بـــــــنت النوخـّــــذه]

لاكن انا حبيت اخرعهم شوي و اوديهم قريب مركز الشرطه وخذيت رخصة السواق وانا في الطريق وصلني اتصال من شخص من قبيله معرووفه وقال لي هذولا اخواني من ابوي ولا تفضحنا وانا اسف ولا تكبر السالفه وبعدين سامحته لوجه الله بس قلت له اني حبيت اخوفهم وانا ماكنت ابي اوديهم للمركز

وانا حبيت احذركم من هالناس لان اللي سرق الجوال بيسرق غيره

وابي اسئل كل من اطلع على هالموضوع لو كنت في مكاني وش بتسوي

ارحم الله والديك تصرف سليم 00 انك هددت السارق وبينت العقوبه المترتبه على الخطأ الي قام به وثانيا" سامحته لوجه الله بعد اعترافهم بالخطأ وطلب احد اقاربهم بالعفو عنهم 000صراحه رايتك بيضه في الحالتين

[حنان الدنيا]

اول شى الحمدلله جات على التلفون ورجعوه

بس في شى لفت انتباهي لقصتك اخوي واسمح لي اعلق شوي عليه

انته قلت في الطريق جاك اتصال من واحد من قبيله معروفه طيب اشلون عرف برقمك ؟؟ استغربت

[العـوا]

حرام اتسوي معاهم هالشئ وتفضحهم المفروض اتسامحهم على طول لان اللي سوا هالشئ قلتها اطفال واهلهم مع انهم مب عرب
ردوا الجهاز من اكتشفوا انه عيالهم ماخذينه من بيتكم هم مب حراميه بالعكس المفروض تشكرهم واتحرصهم
على عيالهم في الاول والاخير اطفال مايعرفون شنو معنى سرقه

لازم اتكونوا حرصين وعينكم على الاطفال والله اليوم كسروا خاطري الجو حر ورطوبه بدل ماوزع القرنقعوه
اوزع فاين ومسح وجيهم فديت وجيهم البرئيه

كلام سليم 100%

[هتـان قطر]

انا لعوزوني عيال الباكستانيين..كل سنة نفس الحالة في القرنقعوة وفي العيد

ما يكتفون بمغرافة او ثنتين يطبون على المخرف يلقطون الحلويات والعلوج

اصارخ عليهم ولا هم معبريني..:anger3:

وفي العيد نفس الحالة كل واحد ياخذ فلوس يدور ورى ربعه ويرجع مرة ثانية

الله يهديهم ويكافينا شرهم ..

مع العلم انه ما عندنا في منطقتنا عوايل باكستانية ..ما ادري من وين يجون ؟

[شبيــه الريح]

انا لعوزوني عيال الباكستانيين..كل سنة نفس الحالة في القرنقعوة وفي العيد

ما يكتفون بمغرافة او ثنتين يطبون على المخرف يلقطون الحلويات والعلوج

اصارخ عليهم ولا هم معبريني..:anger3:

وفي العيد نفس الحالة كل واحد ياخذ فلوس يدور ورى ربعه ويرجع مرة ثانية
الله يهديهم ويكافينا شرهم ..

مع العلم انه ما عندنا في منطقتنا عوايل باكستانية ..ما ادري من وين يجون ؟


:eek2::eek2::D


صج يضحكون ههههههههه

[نمـر]

هذي نتائج البدع والخرافات التي لا تتصل بديننا ولاشرعنا و علمت اعيالنا الشحاذه ودخول بيوت الناس

بدون اذن ، ناهيك عن خطورتها على الاطفال وطوافهم بالطرق والحارات ليلا .

لا وبعد لها انصار يدافعون عنها انها من التراث الشعبي ومافيها شي الا بدعه وخرافه تم سنها وتم اتباعها

ماقول الا يارب اعفو عنا جميعا ولا تهلكنا مع من سن هذه البدعه التي مالها نص من الكتاب ولا من السنه .

ماقلت عن العيديه بدعة فيها فلوس السالفة

فرحة لليهال بعد ما تبيهم يفرحون

[بنت شيوخ]

انا اعتبرهم كبار قد المسؤليه

واللي سويته هو الصح لازم يعرفون ان في عقاب للسارق

وجزاك الله خير اخووي ان الموضوع انتهى بسهوله لان في غيرك ممكن يمسكهم ويضربهم

ماقصرت

[شاهيناز]

تصرف سليم منك اخوي

في العيد والقرقيعان دوم نخلي حد عند باب البيت وداخل البيت يراقب الداخلين لان الاطفال وخاصه من البيوت الي تجي مانعرفهم يكونون مجرميين صغار
ويدخلون من باب ويطلعون من الباب وبعضهم في سيارات توصلهم والي في السياره هو الي يحثهم على السرقه
للاسف البعض يستغل ها المناسبات لممارسه نشاطه

[السندان]

زين سويت ياكاتم
وخوالهم طلعوا اجاويد على نسابتهم ولا رظوا بالحرام ورجعوا لبيتكم
والجاهل ماعليه حرج

[STAR]

لا تعليق ع بعض الردود..‏!‏‏!‏

[كاتم الاحزان]

الرقم خذاه من السايق اللي وياهم
وانا اتمنى من لاخوه والاخوات الاعضاء انهم مايتكلمون فالدين
لان الذنب اخاف ييجي علي انا
و هالمواضيع نتركها للناس اللي افهم منا في البدع


وبالنسبه للحراميه اخوهم من قبيله معروفه وامهم هنديه مطلقه

وانا والشاهد الله سامحتهم لوجه الله

[عزتي سمو ذاتي]

تصرفك عين العقل حتى لوهم يهال بس لازم يخافون ويتأدبون
لأن لوهم صغار تعلموا يمدون ايديهم راح يمدونها وهم كبار

[FAUCHON]

@@

شنو هذا الطفل اللي مخطط ومطلع الكرت وماخذ الجوال

لاحول ولا قوه الا بالله

اخوي تصرفك سليم وجزاك الله خير

[رمــش الغلا]

والله يسرقون كل شي

اذكر مرة يهال باكستانيين دزوا خدامتنا وخذوا القرنقعوه كله واشردوا وخلوا خدامتنا طايحة مسكينه :(

ههههههههههههههه اي والله يبيله
السنة حطينا 3 خدامات :strong3:

[ورد الدوحه]

ههههههههههههههه اي والله يبيله
السنة حطينا 3 خدامات :strong3:

اللي اعرفه ان ماعندج الا خدامتين من وين يبتي الثالثه علينا هالكلام:eek2:

[بوخالد911]

حتى بيوم العييد
يسرقووون

حاسبوا بس