استفسارعن حديقة في قطر

[~ جناين ورد ~]

السلام عليكم

مبارك عليكم هالليالي الفضيلة الله يتقبل منا ومنكم صالح الأعمال

سؤال لوسمحتوا بغيت موقع او اي معلومات عن حديقة حيوانات اعتقد في قطر

خالتي راحتها قبل تقريبا 25 سنه او اكثر فيه مثل النفق وفيه حيوانات ورا زجاج

مادري اشكل عليي الشرح بس اتمنى فهمتوني دامكم قطريين اكيد تعرفونها..

ياليت توافوني باي معلومه عنها لوسمحتوا واكون شاكره لكم...

[al-sadd]

ماضن انها تغيرت من ٢٥ سنه
لاكن لو تبين الطريق بالتحديد
لو تقدرين توصلين لين حديقه اسباير وتكون على يمينج
وتلفين يسار
بتحصلين الحديقه على يسارج
وهاذي صوره توضح الطريق

http://www.mediafire.com/imgbnc.php/ef0fd2182616d1568cb854a3d7f467266g.jpg

تمشين على شارع الوعب لين ماتحصلين استاد خليفه على يمينج وبعدها حديقه اسباير
بتحصلين على ماضن جسر او دوار او تحويله ماذكر المهم اخذيه ولفي يسار
وان شاءالله بتحصلين حديقه الحيوان على يسارج =)
واي مساعده ان شاءالله محنا مقصرين معاج

[~ جناين ورد ~]

شكرا الشيخ يعطيك الف عافيه على الشرح الوافي.. يزاك الله خير

الروحه بتكون بتاكسي بس كنت حابه اعرف اسمها
هي نفسها حديقة الحيوان؟؟

خالتي تقول انهم دخلوا نفق فيه فوق ال 300 نوع من الزواحف يمه :( مغطاه بزجاج طبعا.
هي نفسها؟؟؟

لاتوروني صور لهالزواحف حقيقه مرعبه بس يعني هي نفسها؟

[al-sadd]

اي نعم اختي
واذا ع التكسي قوليلهم ودوني حديقه الحيوان
او الـــ Zoo
على طول بيدلونها
وان شاءالله تستمتعون هناك =)
بس حاولو اتجنبيون طلعه الضهر يعني نصيحه خلكم ع العصاري
ولا تروحون فليل او المغرب لان ماعرف اوقاتهم متى يفتحون ومتى يقفلون
واتوقع والله اعلم ان يوم الحمعه يقفلون مش اكييييد !! اتوقع ! ويمكن تحصلونها مفتوحه
لاكن نصيحه تجنبو الضهر ^^
اما اذا تحبون الحر كيفكم ^^

[~ جناين ورد ~]

شكرا الشيخ على الافاده والنصايح ماقصرت الله يعطيك الف عافيه

[وحيد-الشوق]

حديقة تفشل اغلب الحيوانات مب موجوده اذا سألت عن الاسد قالوا لك راقد :looking:

الحلو فيها قسم الزواحف :vampire: فقط بس والله روحتها مالها داعي

[الفارس2]

نعم نفس الحديقة بس في زيادة الملاهي تفتح بالشتاء بس اعتقد النفق تسكر للصيانة لا فية شروخ الاوقات على طول من 8 لين 9 بالليل

[HEART_LION]

حديقة الحيوان بعد اشارات المناصير وانتي جاي من دوار معيذر ع اليسار

[بنت شيوخ]

موجوده وحديقه تحسنت عن قبل

[Rashid554]

وحاليا فيها مدينة العاب للكبار

[abdo222]

الحديقه نفس مكانها الي بالخريطه ،، الدخول بدون رسوم ،، رحت لها العام ،، فيها كفتيريات ،، الفيل والزرافه والاسد والضباع والنمور و القرود و و وتطعم الفيل و وحيد القرن ،، وناسه هناك ،، و بط وطوواويس في كل مكان تمشي في كل مكان ،، والكهف الي فيه ثعابين وعقارب وعناكب ،،،

يبالها حوالي ساعتين لفه بكامل الحديقه لو معاكم اطفال ،، بس قبل ما يروح التكسي تاكدوا من انها مفتوحه (٩٩٪ مفتوحه لانه في العيد تكون مليانه وكل الناس هناك) ،، مناظر حلوه و ان شاءالله يكون الجو حلوه بعد ال ٤ ،،

و عيدكم مبارك :)

[هام السحاب]

عمري ماطبيت حديقه الحيوان :looking:

[~ جناين ورد ~]

شكرا لكم جميع ماصار جانس نيي
ان شاءالله المرات اليايه، تسلمون

[زمردة الدوحه]

http://store3.up-00.com/Nov10/WMo32246.jpg

يعطيكم العافيه ..:)

[فيزيائية]

حديقتنا احلى من وايد حدايق خليجية وعربية ....
حلوة وشرحة ...وخصوصا لما يبرد الجو...
ودوووم يجددون فيها وفعالياتهم بالعيد حلوة ....
بس يبيلها شويه افكار ودعاية ...

[غرِيبهـ]

والتقرير اللي حاطينه عنها من يومين في الجرايد عن زيارة وزير البلدية لها
وان حالتها يرثى لها وان مانعمل لها صيانة من ربع قرن

تحتاج تجديد واهتمام وبتطلع ورده