لا تتعاملون مع محلات الحيوان...ليش؟(نصايح)

[Qtr95]

بسم الله الرحمن الرحيم ..

شحالكم؟

انا حزنت يوم اكتشفت هالنصب اللي يصير
في هالمحلات ..

وانا عندي نصايح لكم عشان اتفادون النصب ...
لأنك اذا ماتعرف شنو تبي تشتري عادي يزود عليك السعر من 100 لين 1000..

في البداية هذي محلات لا تتعامل معاها كلش لأن اسعارها
خيالية ونصابين..

-عالم الحيوان -سوق العلي
-الغابة - شارع ال شافي
-مملكة الحيوان- المنتزه ..

تعرفون شنو الشي المشترك بينهم ؟
انهم كلهم مصاروه اللي يشتغلون (مع احترامي لكافة المصريين ^^)
وكلهم يبيعون نفس المنتجات بالضبط وكلهم اسعارهم مرتفعة ..
يعني انهم متعاونين مع بعض

والشي اللي اكرهه هو انهم يظنون انك غبي وماتفهم
ويقصون عليك ..

انتوا تتسالون ليش اقول هالكلام؟..

انا اقولكم ليش ..

انا دايما اقول حق الناس لا تتعاملون معاهم ..
في مره انا رحت بس عشان اقارن معاهم بالأسعار
اللي شفتها في سوق واقف ...
ولقيتها وايد مرتفعة ودبل بعد ..(انا اتكلم عن منتجات وليست حيوانات)

ورحت بعد عشان اشوف المصري شلون يقص على العالم..

وبس في نفس اليوم ..
لقيت حوض سمج حلو وعجبني :nice:
وقلتله حطه في الموتر..
فقالي ادفع اول .. نزل سعر الحوض من 3000 لين 2000ريال
فدفعت .. بعد ما جيكت ع الحوض عدل
لقيت في شموخ على الطاولة مالته .. الطاولة الخشب..( الستاند)
فقلت عتدي ماتبين ..

بس عقب ماحط الحوض في الموتر والستاند لاحظت شمخ كبير ورا..

قلت حق العامل مال المحل يرجع الحوض..
ورجعه ..
وقلت له ابي ارجعه لأنه في شمخ عود ورا ماكان يبين..

تعرفون شنو كان رده ؟

المصري قال: ده والله مش بتاعنا ده بتاعك لما وديتوه السيارة ..
قلتله : مب الهندي مالك اللي وداه السيارة ؟
قالي: ودرايولك كمان كان معاه ..
قلت :لاتكذب ان شفت الشموخ من زمان .. وكل احواضك مشمخة.. طالع !!!
تعرفون شن قال؟..
قال : دي والله انا شاريها ومصبغوهاش كويس..
قلت له اها : عيل حتى حوضي ماصبغوه..
قالي:اهه.. وشموخك جديدة .. لو انها قديمة كانت هتكون نعمة زي الصبغ ..

شدخل !!
!!
انا كنت جايفهم من قبل وقلت عادي..بس لما فكرت فيها قلت بشوه منظر
مكان الحوض..

في ذاك اليوم حسيت اني غبي حدي لأني شريت من عنده ..
وهو اصلان مب من زينه ولا من حيواناته المريضة اللي
يبيعها ع الناس !

حاسبو منه ترا حيواناته مريضه ..
ومايهتم فيها كلش وماعنده خبره ..
بس همه انه يبيع..

وهذي نصايح مني لكم ..
خلوا المحلات هذي تخسر لأنهم يستقلون اعيالكم ويقصون
عليهم ..


:anger1:

[روح الاطلس]

زين والبديل؟؟

انا خاطري في سمكات زينه من وين اجيبهم؟؟

وخاصة اني مثل غيري مانعرف الاسعار
وبالتالي ماندري لو كان السعر مبالغ فيه او لا

[Qtr95]

ياناس اوعوا شوي ..
اذا تبون تشترون شي روحوا سوق واقف ...
او سمج نهري روحوا اكوا اس في سلوى
او السمكة الجميلة في السوق المركزي ..
او الأسماك الاستوائية في سوق المرخية..

المحلات الثانية ما يعرفون يعتنون في سمجهم وكلهم امرضى..
ولما يعطونك اياهم ما يعطونك اياهم من نفس الماي ..
يعطونك ماي ثاني وهاي اول سبب لقتل الأسماك لأن الماي في بكتيريا
والبكتيريا تختلف من ماي لين ماي فيموتون السمج ..

[Qtr95]

واذا تبون قطط طيور كلاب ..
روحوا سوق واقف ..

بس محل( عالم الحيوان- الغابة-مملكة الحيوان)
محلات نصابة وتبيع لكم حيوانت مريضة عشان
تشترون مره ثانية ..

انا عندي ثعبان ..
لما اقوله عطني فيران بيضا يعطيني همستر ب 15 ريال ..
بس لما تقوله عطني همستر للتربية بيعطيك اياه ب50 ريال نفس النوع

[بوعلي2]

الي بسوق العلي غالي ووايد يلف ويدور

الله يكون بعون الي على ويهه

وربك المستعان

[Qtr95]

الهندي اصدق بوايد الصراحة
وتكون خبرته اكبر ..

وانا شاكر لردودكم ..

[JN000N]

زين والبديل؟؟

انا خاطري في سمكات زينه من وين اجيبهم؟؟

وخاصة اني مثل غيري مانعرف الاسعار
وبالتالي ماندري لو كان السعر مبالغ فيه او لا



سمك الزينه انا كنت اخذهم من المرخيه..
صوب ابن القيم

قبل كان اللي يشتغل هناك بو نفيسه
عاد الحين مادري اذا هو نفسه


اللي ف سوق العلي صج اعلل
كل ما ساله عن شي يقولي شي ثاني

[Qtr95]

سمك الزينه انا كنت اخذهم من المرخيه..
صوب ابن القيم

قبل كان اللي يشتغل هناك بو نفيسه
عاد الحين مادري اذا هو نفسه


اللي ف سوق العلي صج اعلل
كل ما ساله عن شي يقولي شي ثاني

المرخية احسن مكان !!
ايي وهو نفسه اللي يشتغل :)

[باسكن روبنز]

وألي مايدري شاللومـي ،:)
خلاص أي شي بسندرك على طول ياخبيرنا مايسترو ،:nice:

[فتك العديد]

ياناس اوعوا شوي ..
اذا تبون تشترون شي روحوا سوق واقف ...
او سمج نهري روحوا اكوا اس في سلوى
او السمكة الجميلة في السوق المركزي ..
او الأسماك الاستوائية في سوق المرخية..

المحلات الثانية ما يعرفون يعتنون في سمجهم وكلهم امرضى..
ولما يعطونك اياهم ما يعطونك اياهم من نفس الماي ..
يعطونك ماي ثاني وهاي اول سبب لقتل الأسماك لأن الماي في بكتيريا
والبكتيريا تختلف من ماي لين ماي فيموتون السمج ..

اخوي ماعليك امر وين مكان اكوا اس الي في سلوى

[جنوب الدوحه]

انت مشاركاتك لم تتجاوز الـ 25 مشارك وقاعد تشهر بالمحلات وهذي ارزاق ناس

ثانيا اذا اردت ان تكتب موضوع في مثل هذا الصرح يجب عليك ان تكتب بمنهجيه بدون تجريج او تشهير فــ هذا ينقص من موضوعك ولا يزيده بارك الله فيك ..

وفي الاخير انت مخير تقدر تشتري من المحلات الي ذكرتهم او من دوله مجاوره او طلب من دوله اخرى عن طريق النت ولك حريه الاختيار .. مع اتفاقي معك بخصوص الاسعار المرتفه في هذي الفئه من المحلات

وتقبل مروري اخي الكريم ..

[تبتلشٍ]

اخوي المحلات لي ذكرتهم كلهم حق بوكشيشه الفرع الرئيسي المنتزه والفرعيين الشافي والسوق العلي