ظاهره خطيره ؟ ................هل من رقيب ؟

[>الخسرانة<]

انتشرت في الفترة الاخيرة ظاهرة هروب الخدم وبكثره خصوصا الخدم الرجال
الطباخين والسواقين
والحين شفنا الظاهره زادت وبكثره من
الخدامات ( النسوان )
شاللي قاعد يصير ؟
ومن اللي يساعدهم على الهروب ؟
وبرايكم مب هذي مصيبه ؟
ومن عنده يشتغلون؟
والحل ؟
ما طرحت هالموضوع الا عشان اخذ ارائكم واقتراحاتكم للقضاء أو الحد من ها الظاهره.
لاني عانيت من هالمشكله وحسيت فيها بعد هروب خداماتي ؟
مع العلم اني اعاملهم بأفضل معامله بس والله ما ينفع فيهم
:weeping::weeping::weeping:

[455]

المكاتب اللي ماعندهم ضمير يتفقون معاهم والله اعلم

[موضي قطر]

لااا القانون اللي مايحط لهم عقوبة صارمة وغرامة لأنهم يبون فلوس ولو دورا انهم قبل ما يتسفرون

بيدفعون مبلغ وقدرة صدقيني ماراح يسون شي والسبب الثاني حقوقو الانسان وادارة العمل والخدم

وسفاراتهم ( مصدقين عندهم ) والكفيل ( كذااااااااااااب ) وظالم وهو القوي والخدامة ( مسكييينة )

[حقيقه]

بالنسبه لهروب الخدامات اكيد فيه اسباب

ومحد ينكر هالشيء


مافيه خدامه تجي من بلادها واتخلي اهلها وزوجها وابناءها
عشان تشتغل اسبوع شهر شهرين وتشرد

[بومحمد55]

الصراحه أنا مالوم الخدم لأن السايق ماراح يشرد إلا أذا شافله شغله ثانيه
ومشاء الله على أصحاب الشركات والمحلات يبون كل شي ببلاش حتى العمال يبونهم ببلاش
ويكون في علمكم أن في عايله قطريه شافو خدامتهم الأثيوبيه الي شردت من مكفولها تشتغل في أحدى
المحلات اللي كانت مشاركه في المعرض ( الألعاب) ومشاء الله عليهم ملبسينها عبايه وشيله ومكشخينها

[maruuma]

جزاج الله خير على الموضوع

بس كأنه مكرر بمقدمة جديدة واسلوب جديد

والله المستعان

[فيصـــل]

للاسف اختي الظاهر هذي منتشرة من فترة لكن خلال هالكم سنة زادت بشكل كبير خاصه من الخدامات واخص بالذكر الملسمات ..

صرنا نعاني معاهم وهذول كنهم الا جايين سياحه واستجمام مب لطلب الرزق ..

يعني من تجربة شخصيه صرنا نعاني من المسلمات الاندونيسيات خاصه مع العلم ان المعامله طيبه لكن مايملي العين ..

غير المسيحيات مافيه للاسف الشديد هم اللي يعمرون

[رُفق المجنّا]

يا وزير العمل ويا وزير الدّاخليّة , أنتم أصحاب القرار فاسمعوا من أبناء شعبكم واعوا كبر حجم المشكلة

امّا أن تجدوا لنا حل ولا فتنحّوا عن مناصبكم

[الأغر]

يمكن الراتب غير كافي يمكن المعامله معاهم على انهم عبيد ومش بشر يمكن ما عندهم غرف نوم يمكن مشغلينهم 24 ساعه في اسباب كثيره يا ريت نراجع انفسنا بالأول قبل كل شيء ليش هرب الخادم او الخادمه او السائق

[حسن]

السبب الاول ضعف القانون من حيث العقوبه والغرامه والسبب الثاني تقصير اعلام وزاره الداخليه وتوعيه المقيمين سواء قطري اجنبي بتشغيلهم وايوئهم باختصار لويبون يحلونه كان انحلت مثل مب كفو قطري يخيم على البحر دون الويكند

[أم غانم]

السفارات .. وشروط المكاتب مقوية ظهورهم .. إن الواحد تكلم مابيلقى من وراهم شي؟

كلمة كلمتين بيقولون إحنا بينا وبينكم عقد وشرط .. وخلاص

وإن شردوا و راحوا سفاراتهم .. بيقولون إنتوا الغلطانين وهم لهم شروط وبينكم عقد وهالكلام

والله لو مخلينها مثل قبل لا شروط ولا عقد ولاغيرة أبرك ..


الواحد يجيبهم ويسنعهم على سنع البيت أحسن..



يبه الخدم عينهم تفتحت على كل شي.. يبون الطلعه والروحه والأجازة .. والخدامة الحين تبي الجوال

وغيرة..


الله يعينا والله

[455]

اتبعوا حل خادمه بدون خبره ولاول مره تشتغل ، وان شاء الله ماتشوفون الا كل خير ، طبعا اكيد فيه اشياء بسيطه بس ماتوصل للهروب

[حقيقه]

يمكن الراتب غير كافي يمكن المعامله معاهم على انهم عبيد ومش بشر يمكن ما عندهم غرف نوم يمكن مشغلينهم 24 ساعه في اسباب كثيره يا ريت نراجع انفسنا بالأول قبل كل شيء ليش هرب الخادم او الخادمه او السائق


خل الراتب على جنب لانه بيكون اتفاق مع المكتب قبل ماياخذون الخدامه

بس البعض من الاسر اللي يعانون من ظاهرة هروب الخدم عندهم

اول شيء الراتب مايعطونه للخادمه او السايق كل شهر لا البعض منهم مايعطونهم الا بعد ست شهور او اكثر او لين مايقرر يسافر وساعات يسافرون بدون راتب للاسف

والشيء الثاني المعامله السيئه من افراد الاسره ان كان الزوج الزوجه الابناء .. الخ

والشيء الثالث عدم توفير غرفة نوم تصلح للسكن الادمي .. البعض منهم ينامون بدون مكيف مع انه صاحب الاسره بامكانه انه يوفر هالشيء بس ممنوع على الخدامه تنام بمكيف واغلبيتهم ينامون بالمطبخ او المخزن

والشيء الرابع الشغل اربع وعشرين ساعه تخيل خدامه تنام الساعه 1 او 2 بالليل وتصحى من الاربع ونص او خمس ونص الفجر واتم مواصله شغل في شغل لين الساعه 1 او 2 بالليل مثل ماقلت وهكذا

وفيه شيء خطير وهو التصرفات الشاذه مع الخدم من قبل بعض افراد الاسره من رجال كبار ومراهقين

ولحد يقولي مافيه لا فيه وهالشيء مار علينا بالشغل ومتأكدين منه

والمدام ماتدري عن شيء


وانرد وانقول البعض ويمكن تكون فيه قله قليله من هالخدم صح يهربون طلب لراتب الاقوى يشتغلون سنه سنتين هاربين ويجمعون هالراتب وعقب ع الابعاد

[برشلوني قطر]

القانووون الي يساااعدهم

عيل تشرررد ومتى جمعت افلووس سلمت نفسها قالولك تعال ادفع افلووس التذكره

والله قهر

[الصريحه]

معاك ولابد من الضرب بيد من حديد
الموضوع كل ماله يتوسع ويزيد

[بوخالد911]

والضحية المواطن كالعاادة

:(

[بنت ابوها 19]

القهر انها تشرد وعقب ماتشرد وتسود الويه تتصلي السفاره وتقولج دفعي لها تذكره

بكل الحالات الكفيل يكون مظلوم يدفع ويجيب ويخسر ولا بعد يقطع تذكره

كل الشردات ماتجي اله من ورا المكاتب

[>الخسرانة<]

شكرا لكل اللي تفاعلوا مع موضوعي
بالنسبه للمعامله احنا نعاملهم افضل معامله
وابدا ما نأخر رواتبهم
بالعكس موفرين لهم كل سبل الراحه
ومستحيل في قطر يكون في البيت خدامة وحده
لا بد يكون معاها وحده ثانيه وبعض الناس ثالثه ورابعه تساعدها
بعكس بعض الدول الخليجيه اللي البيت ثلاث ادواروثلاث عائلات تشتغل فيه خدامه وحدة
لكن فيه مشكلة
فيه حد وراهم ومستفيد منهم
لكن لابد من قوانيين صارمه لهم
عشان نحد من هالمشكلة
احنا نطالب بحلول لللمشكلة اللي قاعده تكبر يوم عن يوم
والمكاتب تزيد في الاسعار كل شهر وصارت مبالغهم خيالية
لابد سفاراتهم تاخذ معاهم إجراءات صارمه
وسفاراتهم تتحمل عواقب هروبهم
:telephone::telephone::telephone: