أكوا بارك قطر تمنع ارتداء الملابس الخادشه للحياه

[الوعب]

الوطن الاقتصادي

أصدر راضي العنزي المدير العام قرار بعدم السماح بارتداء الملابس الخادشه للحياه والمخالفه للعادات والتقاليد القطريه داخل المدينه الخاصه بالرجال والنساء,, وارتداء الملابس المحتشمه الخاصه بالسباحه لكي لا تؤثر على الاجواء العائليه

وقد قامت الاداره بوضع لافتات باللغتين العربيه والانجليزيه للتوضيح للزائرين

[ROSE]

الله يجزيك الخير يارب على هالخبر ويجزيه الخير على هالقرار وذي اللي كنت اتوقعه

[انتر ميلان]

جزاه الله خير على إصدار هالقرار
ومب عيب اذا الواحد يصلح غلطته

وأتمنى تفعيل القرار واتخاذ الاجراءات في حق المخالفين

[ابوعلي]

الله يجزيه الخير على القرار

ولكن نتمنى تطبيقه على أرض الواقع

[OTOsan]

قريت جملة من هالقرار في اعلان الاكوا بارك اليوم ،،

[bo_s3ood]

تسلم على الخبر الحلوو

والله يعطيك العاافيه

ويجزي كل خير من سااهم في القرار

[شيط ويط]

السؤال ماهو اللبس المحتشم للسباحه ؟؟ :)

[OTOsan]

السؤال ماهو اللبس المحتشم للسباحه ؟؟ :)

لازم تروح وتشوف بنفسك :playball:

[بنت ابوها 19]

مصدقين


يعني بذمتكم بيوقفون عند الباب بيقولون لهم تعالو انتو شنو بتلبسون


ولا بيزعلون الاجانب بيقولون لهم طلعو برع


حجي فاضي متأأأأكدين انه هل القرار من قررار المجمعات ,,

[الحياة الخالدة]

السلام عليكم ..


جزاهم الله خير .. و هذا العشم فيهم ..
أهل قطر أصيلين و ما يرضون بالغلط ..
قرار صائب ..
و الأهم التطبيق ..
حتى لا يظل قرار صوري ..
كما نرى في المجمعات و غيرها ..

[شيط ويط]

لازم تروح وتشوف بنفسك :playball:

واجد ياخي (100 ريال) .. كان حد بيعزمني ما عندي مانع .. خبرك توني شاري شورت سباحه مال ميامي من العالم الجديد .. صج تقليد لكن مش حالك حالك يمشي :funny:

[MAZEN37]

يعني مسبح ايش هالقرار

ماقلتولي بكم صحن الفول اليوم ؟

[رُفق المجنّا]

السؤال ماهو اللبس المحتشم للسباحه ؟؟ :)

escape

[بوخالد911]

الله يووفق الكل

[الوعب]

مصدقين


يعني بذمتكم بيوقفون عند الباب بيقولون لهم تعالو انتو شنو بتلبسون


ولا بيزعلون الاجانب بيقولون لهم طلعو برع


حجي فاضي متأأأأكدين انه هل القرار من قررار المجمعات ,,

تفائلوا خيرا
تم وضع لافتات ويجب احترام القوانين

[OTOsan]

واجد ياخي (100 ريال) .. كان حد بيعزمني ما عندي مانع .. خبرك توني شاري شورت سباحه مال ميامي من العالم الجديد .. صج تقليد لكن مش حالك حالك يمشي :funny:

عاد لاتنسى (دبة الصليط) الصفرا .. :funny:

[كازانوفا]

لازم حد من الاعضاء يروح ويشوف ويأكد لنا الخبر عشان نصدق

[شيط ويط]

عاد لاتنسى (دبة الصليط) الصفرا .. :funny:

هههههههههههههههههههههههههههههههههههههههههه .. و(الشتره) الزرقا عشان تربطها فيه :funny:

[كبير المتداولين]

عاد لاتنسى (دبة الصليط) الصفرا .. :funny:

هو عاد في جلجل

[khaleeji]

خطوه يشكر عليها الاخ راضي عجلان ولو انها تاخرت شوي لكن ان شاء الله يتم تطبيقها فعليآ

وجعله في ميزان حسنات جميع من سعى او اثار هذا الموضوع من الغيورين على دينهم ووطنهم

[ام العيال]

خطوة جيدة ويشكرون عليها ، بس ابغي اعرف في لبس محتشم للسباحة !!

[بنت ابوها 19]

تفائلوا خيرا
تم وضع لافتات ويجب احترام القوانين

نتفائل خير من بلادنا صح

لفتات علقت بالمجمعات التجاريه بكل مكان وشكبر لكن وين الي تقيدوووو أبها ؟؟؟؟


اذا بالسوق ماتقيدو بيتقيدون بالمسابح ؟؟؟؟؟؟


بنشوووف كلها شهر بيتطبق وعقبها بينسي الموضوع

[hamoor4ever]

مسبح شنو المقصود بالملابس المحتشمه نبغي توضيح اكثر وانا اتوقع ان القصد يكون مايو قطعه وحده كامله مش القطعتين بالنهايه صبه رده

[OTOsan]

هههههههههههههههههههههههههههههههههههههههههه .. و(الشتره) الزرقا عشان تربطها فيه :funny:


هو عاد في جلجل

بسنا خرابيط يالربع لاتروح ردودنا ورا الشمس :funny:


بس تخيل ياشيط تدش لهم بمحزمه من النوع اللي يفسخ من اول غسله :tooth:

يسوون عليك حظر من جميع فروع الاكوابارك هههههههههههههه

[طاش]

الله المستعان ويهدي ابناء المسلمين

[The End Qtr]

هههههههههههههههه

فديت قطر سنة 1990 وقبل

[برزان]

ياخي وينك من البداية ....
لازم تنزاف عواطف الناس ومشاعرهم وكلاهم في الريدوا وكتابة مواضيعهم بالقهر ....

[OTOsan]

ياخي وينك من البداية ....
لازم تنزاف عواطف الناس ومشاعرهم وكلاهم في الريدوا وكتابة مواضيعهم بالقهر ....

يمكن اخوي برزان كانت البدايه عبارة عن (جس نبض) مثلا .. او ربما كانت عبارة عن (جهل) !!

[£عبدالعزيز£]

:telephone:
السؤال ماهو اللبس المحتشم للسباحه ؟؟ :)

هههههههههههههههه

نفس السؤال اللي كنت بسئله

..

بعد شنو ملابس سباحة محتشمة

يا انهم يسوون ايام بس للرجال وايام بس للنساء

ونفس ما قالوا بعض الاعضاء في مواضيع ثانية

يوم العائلات يسمح فيه بالسباحة للرجال والاطفال فقط

..

ولا بتصير مصخرة حتى لو سبحوا بعباية :telephone:

[هبوب الكوس]

يمكن يقصدون هذي الملابس


http://www.aljewar.org/images/position9/2008/8/2008_8_23_10_28_23.jpg

[Realistic]

يمكن يقصدون جي؟

http://up.hawaaworld.com/get-fg60uo2i.JPG?q=up/get-fg60uo2i.JPG

بعد مب غلط :playball:

[_QTR_]

عاد لاتنسى (دبة الصليط) الصفرا .. :funny:

شنو يعني دبة الصليط

لا يكون قصدك الكرشة هههههههههههههه

احساسي يقول انه حق المعطف

[شيط ويط]

بسنا خرابيط يالربع لاتروح ردودنا ورا الشمس :funny:


بس تخيل ياشيط تدش لهم بمحزمه من النوع اللي يفسخ من اول غسله :tooth:

يسوون عليك حظر من جميع فروع الاكوابارك هههههههههههههه

هههه با (رنج) لهم المسبح من الالوان ذي (باتفسخ) .. ما يحتاج (كلور) قاتل للحشرات :funny:

خل نطلع لا ننطرد .. خربنا موضوع الرجال :nop:

[بوراشد82]

السؤال ماهو اللبس المحتشم للسباحه ؟؟ :)

الرجال = صروال بوخيط وفانيلة علاق بس ملونين وعليهم ارقام بالعربي << نفس بدلات الاندية القديمة !!!

النساء = جلابية عادية وعباءة ولبس النقاب او البرقع او البطولة اختياري طبعا العباءة مش سودة لازم تكون ملونة ..!!!

تحياتي

[فلتة زمانها]

يمكن يقصدون هذي الملابس


http://www.aljewar.org/images/position9/2008/8/2008_8_23_10_28_23.jpg

يسمونه الشورت الاسلامي ويبيعونه السعوديات فالمنتديات
بس ما تركب شورت واسلامي احس الاسم غلط هههههههههه

[هبوب الكوس]

يسمونه الشورت الاسلامي ويبيعونه السعوديات فالمنتديات
بس ما تركب شورت واسلامي احس الاسم غلط هههههههههه

احسن من ولاشي

[عذاري قطر 2011]

يمكن يقصدون هذي الملابس


http://www.aljewar.org/images/position9/2008/8/2008_8_23_10_28_23.jpg



لو يفتحون محل صغيراو كشك تنباع فيه مثل هاذي الملابس عند باب الحديقة يكون افضل

[ضوى]

مافي شئ اسمه مايوه اسلامي ولبس محتشم للسباحة

في شئ اسمه يوم الرجال ويوم النساء ويوم النساء لازم يكون لبس الحريم فيه حشمة

[لمعة الالماس]

في البداية غلط انه رجال ونساء في نفس المسبح لازم يقسمون الايام بين النساء والرجال والاطفال كل يوم عادي

وثاني شي لافتات الاحتشام تارسه المجمعات لكن محد معبرها ونشوف لبس الاجانب شلون

نتمنى ان يتم مخالفه الشخص اللي يخالف الزي المحتشم ولو يتم وضع صور توضيح افضل


وجزاكم الله خير على الاستجابه

وانا وهلي وكل اقاربي هونا نروح بعد ما سمعنا عن عدم احتشام بعض النساء وما نبي عيالنا يلعبون في مكان ما يراعي مجتمعنا ودينا

[المخباط]

المهم فية يوم للرجال عشان عيالنا وابهاتهم يسبحون بحرية :playball:
وما يظطروون يجون في يوم العوائل ويخدشون حيائهم :mad:

[BIG-VEGA]

التصريح مجرد ابره بنج

الا اذا بينوا ايش هو اللباس المحتشم والذي يوافق العادات والتقاليد

[مشتاقة لقطر]

الحين الخوف مب على يوم للنسااااء خاص


صارالعكس سبحان الله

نتمنىونطالب بيوم للرجال خااااص عشان اللي مايستحون )فاصخات الحيا ( يدورونهم دوارة

وما عاد بيجون يوم النساء ( المقصودين ) لان هدفهم الاستعرااااض

بالنسبة لي ما جربت ولا حد من عايلتنا جرب ولا نبي نجرب نسبح

[_QTR_]

هههه با (رنج) لهم المسبح من الالوان ذي (باتفسخ) .. ما يحتاج (كلور) قاتل للحشرات :funny:

خل نطلع لا ننطرد .. خربنا موضوع الرجال :nop:

العالم تعلمت منكم

واللحين يا شيط تقول خل نطلع

اقول اشي كدرك عل البهمات

ههههههههههههههههههههههههههههههههههههههههههههه

قاموس يا شيط ان واوتوسان

[حقيقه]

الكل معترض على الحال

يعني بنخلي لهم المكان وياخذون راحتهم ؟

طيب وليش مايخافون على الرجال من الرجال مثل مانشوف من شذوذ بالمدارس

[ابو محمد7]

طبعا اول شي كلنا مع الاحتشام وانا اتفق مع الجميع في المبدأ ولكن المشكلة الاسلوب

المنتدى وطريقة تفكير البعض صارت واضحة جدا وممكن تتنبأ بنوعية بعض الردود اول ماتقرأ العنوان وفعلا لما قريت هالعنوان توقعت بعض الانواع من الردود ولقيتها

قبل كانوا يقولون نبي اماكن ترفيهية حق الصغار وطلبات وطلبات وسووا لهم مدينة مائية

بعدين صار الموضوع عدم الاحتشام وانتقاد وانتقاد وانتقاد

الحين طلعوا قرار يوجب اللبس المحتشم

صار الحديث كله تشكيك في تشكيك وخذ مواضيع

انا بس ابي اعرف هل كل من قاعد ينتقد ويوصف الوضع ويهاجمه راح وشاف بعينه !
ولا احنا بس نسمع كلام ونردد !

البعض مايعجبهم شي ولاعمرهم بيرضون سلبيين جدا جدا ماينظر الى النصف الفارغ لا لا لا الا لو تعطيه كوب كله ماي قال لك لا الكوب مب عاجبني او الماي مب عاجبني او او او

في ناس تشتغل ليل نهار وتسوي مشروع نفس الحديقة المائية

او تشتغل على قرار نفس اللي في هالموضوع وتهتم بتعليق لافتات وغيره مما يحتاجه هالقرار

المقصود ناس قاعده تعمل وتبذل جهد

وفي المقابل في ناس منصبين نفسهم قضاة في الارض وان هم محاربين ومدافعين عن كل شيء خير وزين وشغله بس انه متعب عمره ويكتب في منتدى او يسولف في مجلس !!!

انا اشوف اللي يعمل وينجز ويخطأ عن غير قصد وهذي طبيعة كل انسان وكل عمل لازم فيه قصور ولكن المهم انه ايضا يعمل على تدارك الخطأ هو افضل بكثير جدا من اللي قاعد مايسوي شي بهالدنيا غير ينتقد ويطلب !!!

صحيح رضا الناس غاية لاتدرك

[م. عبدالعزيز]

جزاهم الله خيرا ونتمنى من الناس الالتزام والتعاون

[م. عبدالعزيز]

طبعا اول شي كلنا مع الاحتشام وانا اتفق مع الجميع في المبدأ ولكن المشكلة الاسلوب

المنتدى وطريقة تفكير البعض صارت واضحة جدا وممكن تتنبأ بنوعية بعض الردود اول ماتقرأ العنوان وفعلا لما قريت هالعنوان توقعت بعض الانواع من الردود ولقيتها

قبل كانو
ا يقولون نبي اماكن ترفيهية حق الصغار وطلبات وطلبات وسووا لهم مدينة مائية

بعدين صار الموضوع عدم الاحتشام وانتقاد وانتقاد وانتقاد

الحين طلعوا قرار يوجب اللبس المحتشم

صار الحديث كله تشكيك في تشكيك وخذ مواضيع

انا بس ابي اعرف هل كل من قاعد ينتقد ويوصف الوضع ويهاجمه راح وشاف بعينه !
ولا احنا بس نسمع كلام ونردد !

البعض مايعجبهم شي ولاعمرهم بيرضون سلبيين جدا جدا ماينظر الى النصف الفارغ لا لا لا الا لو تعطيه كوب كله ماي قال لك لا الكوب مب عاجبني او الماي مب عاجبني او او او

في ناس تشتغل ليل نهار وتسوي مشروع نفس الحديقة المائية

او تشتغل على قرار نفس اللي في هالموضوع وتهتم بتعليق لافتات وغيره مما يحتاجه هالقرار

المقصود ناس قاعده تعمل وتبذل جهد

وفي المقابل في ناس منصبين نفسهم قضاة في الارض وان هم محاربين ومدافعين عن كل شيء خير وزين وشغله بس انه متعب عمره ويكتب في منتدى او يسولف في مجلس !!!

انا اشوف اللي يعمل وينجز ويخطأ عن غير قصد وهذي طبيعة كل انسان وكل عمل لازم فيه قصور ولكن المهم انه ايضا يعمل على تدارك الخطأ هو افضل بكثير جدا من اللي قاعد مايسوي شي بهالدنيا غير ينتقد ويطلب !!!

صحيح رضا الناس غاية لاتدرك

اي صراحه يابومحمد صادق 100٪
ولللاسف هذي وحده من الاسباب اللي ماتخلينا نتفوق على غيرنا من الشعوب وهو الحسد

نسال الله تعالى العفو والعافيه

[ميمي 88]

السؤال ماهو اللبس المحتشم للسباحه ؟؟ :)

المايوه الاسلامي !
بس الاجانب وغيرهم بيلبسونه!
وهل لبس هالمايوه يوقف المهازل الي بتصير !
يعني تلبس مايوه قطعه وحده بشورت وتنزل تسبح عادي مع الرجال !

المفروض حتى يوم العائلات ماينزلون الرجال يسبحون يكون فقط للاطفاااااااااااااااال برفقه عوايلهم
ويوم للرجااااااااااااااااااااااااااااال
ويوم للنساء واقص ايدي تجي وحده من الاشكال اياهم تسبح بيوم النساء



نتفائل خير من بلادنا صح

لفتات علقت بالمجمعات التجاريه بكل مكان وشكبر لكن وين الي تقيدوووو أبها ؟؟؟؟
اذا بالسوق ماتقيدو بيتقيدون بالمسابح ؟؟؟؟؟؟
بنشوووف كلها شهر بيتطبق وعقبها بينسي الموضوع

معاج حق اختي الافتات تقول لباس محتشم واحنا نشوف شورتات تفضح ماتستر وتنانير قصيره
واجسام مكشوفه عاريه وووووين اللباس المحتشم الي يقولون عنه بالمجمعات وليتنا نشوف سلطه تطردهم من المجمع الا محد كفو يكلمهم .. وشكل الي بيحاول يكلمهم بيروح ورا القمر!





يمكن يقصدون هذي الملابس

http://www.aljewar.org/images/position9/2008/8/2008_8_23_10_28_23.jpg

يابعده !





الكل معترض على الحال

يعني بنخلي لهم المكان وياخذون راحتهم ؟
طيب وليش مايخافون على الرجال من الرجال مثل مانشوف من شذوذ بالمدارس

يادلبي !
الرجال من الرجال !
شرايك نطالب بيوم لضم اشباه الرجال مع المايوهات المحتشمه <<موكفو نقول عن هالملابس اسلاميه !

احنا نطالب بوقف المهازل وعمل جدول يناسب الجميع وانت جاي تفتح باب ماله داعي !


يوم للرجال والي مورجال لايروح
يوم للعائلات برفقه اطفالهم للسباحه
ويوم للنساء والي بتجي مو محتشمه لاتجي

لو بس يخلوني يوم اضبط كل شئ عوي مضايقني :mad:
الله المستعان

[toomi9]

زيين والله
جزاه الله خير

[طلعة الروح]

احنا مع الاحتشام بالملابس لو كان يوم للرجال ويوم للنساء
مب يخلطونهم بيوم عائلات ويقولون لهم احتشموا جنهم يحطون الزيت عند النار ويقولون لهم تحملوا تشبون
حدث العاقل بمايعقل

[مسافر77]

لباس محتشم وكيف بكون؟؟؟
يعني شي أحس من شي
المشكلة بتنحل؟؟
الحمدالله واللهم عافنا

[مستجدة]

كلام طيب وقرار طيب
لكن المجمعات من بيمنع التعري اللي انشوفه كل يوم في تزايد

استغفر الله والله ونحن حريم صرنا انغض النظر عن بعض الحريم اللي انشوفهم متعرين
ومع الاسف فيه منهم مسلمين

[die 4 qtr]

في يوم خاص للنساء فقط ؟؟؟ ولا اشاعه

[لولو80]

السلام عليكم ..


جزاهم الله خير .. و هذا العشم فيهم ..
أهل قطر أصيلين و ما يرضون بالغلط ..
قرار صائب ..
و الأهم التطبيق ..
حتى لا يظل قرار صوري ..
كما نرى في المجمعات و غيرها ..

خذت الكلام من لساني

رحم الله والديكم على هالقرار :app2::app2:

ونتمنى التنفيذ علشان نجي ونتشجع وياريت يكون حتى بيوم الحريم مانبي نشوف اشياء عيب :nono:

[الدهليز]

في يوم للنساء فقط ؟؟؟؟؟
ومتى هاليوم ؟

[فلتة زمانها]

في يوم للنساء فقط ؟؟؟؟؟
ومتى هاليوم ؟

ايه يوم الثلاث
اووووف كان احلى يوم:cool:

[abn qatar]

انا اتسائل اللي يروحون هناك يلعبون ويتسبحون ايش الضمان اللي يحصلونه من نظافه

المياه او ان الاشخاص يكون مصابين بمرض جلدي مثلا خصوصا ان عدد كبير يستخدمون

الحديقه في نفس الوقت

[بـــــــنت النوخـّــــذه]

الوطن الاقتصادي

أصدر راضي العنزي المدير العام قرار بعدم السماح بارتداء الملابس الخادشه للحياه والمخالفه للعادات والتقاليد القطريه داخل المدينه الخاصه بالرجال والنساء,, وارتداء الملابس المحتشمه الخاصه بالسباحه لكي لا تؤثر على الاجواء العائليه

وقد قامت الاداره بوضع لافتات باللغتين العربيه والانجليزيه للتوضيح للزائرين

هل تكفي اللائحات لتطبيق القانون ولا لازم يوجد ناس ثقه لمتابعه تطبيق القانون بالداخل كالعضيد مثلا يتواجون داخل هذا المكان 000وياريت بعد كانو ضافو كلمه غرامه ماليه وقدرها (0000)لان بعض الناس كل شي الا الغرامه:playball: وانرد وانقول جزاهم الله خير ولكن اللائحات لاتكفي لازم غرامه ماليه + متابعه وحبس لمن يخالف00

[العـوا]

يمكن ؟؟؟