معاناتي مع قرض التنمية

[بوراشد82]

بسم الله الرحمن الرحيم ..

السلام عليكم ورحمة الله وبركاته ..

مساكم الله بالخير جميعا وهذا اول موضوع لي او شكوى وماعرف وين اطق براسي لاني اصلا مب عارف من راعي المشكلة ولا أعرف وين حلها ..

الموضوع طال عمركم ان انا كانت عندي ارض وقدمت على الاسكان اني بابنيها وجات علي موافقة (الكلام من سنة 2005) يعني نقدر نقول على النظام القديم .. المهم أرضي استملكتها الدولة وطلبت بدال ارض ثانية .. طلبت تعويض مادي .. وجاني التعويض وشريت فيلا جاهزة حلو ..

المهم .. العام قدمت على الاسكان اني ابي قرض التنمية عشان اسد الي علي من دين بسبب الفيلا لاني زدت من عندي عن طريق البنك .. يعني دخلت بيتي على الاسكان عشان يرهنونه ويعطوني مبلغ 1200000 حلو .. قدمت في الاسكان على معاملة جديدة .. شيكوا رقمي وقالولي انت عليك موافقة قديمة .. قلت حلو .. ومشى الموضوع طبيعي وتعرفون الروتين الممل .. راحت معاملتي الجوازات ورجعت يشوفون اذا قطري اصل ولا لا .. والحمدالله عارف نفسي واجدادي في هالارض الطيبة منذ مبطي ..!!

عقب الله يسلمكم طرشولي مهندس يعاين البيت اذا ضمن المواصفات << موتر مب بيت ..!! المهم طلع ضمن المواصفات وتحولت على بنك التنمية الي وافق بس بشرط .. لانه اصغر بقليل فما بيعطوني بيزاتي كاملة ..!!! ليش يا جماعة الفيلا شاريها على ايام الغلا بمليونين والحين يبون يعوضوني 700 -900 الف فقط ..!!! يقولون الفيلا صغيرة نوع ما ..!! المهم هاذي مش مشكلتي ووقعوني على تعهد اني ماطالبهم عقب ..!!! مشت المعاملة وراحت الاراضي (مادري ليش) وعقب راح سند الملكية مالي للتسجيل العقاري وتسجل عليه الرهن بعد تنقيعة صح .. وخذته ورجعت الاسكان .. خلااااااااااااااااااااااااص باقي كتاب من الاسكان ان بوراشد82 يستاهل البيزات .. اصرفوله ولا عاد نشوف وجهه مرة ثانية ..!! شصار ..!! هني المصيبة ..

اتصلولي قالولي تعال .. انت صك بيتك مسجل عليه رهن قانون رقم 1سنة 1964 وهاي قانون ملغي من زمان واستحدث بداله قانون رقم 2 لسنة 2007 .. فارجع الاراضي خلهم يغيرون لك الصك ويكتبون 2007 .. لحول ولا قوة الا بالله .. ان شاء الله .. رحت الاراضي ..

قالوا لا الغلطة من الاسكان .. المفروض هم يستحدثون موافقتك ويبدلونها من قديمة الى جديدة واحنا مب على كيفنا نغيرك الرهن .. بعدين احنا عندنا مواضيع مثل موضوعك عليهم موافقات قديمة وعليهم رهن القانون القديم سنة (1964) الي هو الملغي .. ويمشونهم الاسكان .. انت ليش خلوك تغرز ؟؟ << قالتلهم دبل مافي .. المهم .. الاراضي قالولي روح يبى غير الموافقة شي جذي او خلهم يطرشون لنا عشان احنا نغيرها لقانون 2007 .. رجعت الاسكان ..

حبيبي انت شجايبك ؟؟ مب قلنالك تغير القانون وماتراوينا ويهك الا لين تجيب صك الملكية عليه رهن القانون 2007 ؟؟ الغلط من عندهم ويطلعولي معاملات ناس قديمة وتحولت جديدة بقدرة قادر ...!! ليش الاراضي ما مشوك ؟؟

المشكلة ماعرف هي وين ولا من الي مسويها ؟؟ لان الي اعرفه ان عندي فيلا ومطابقة للمواصفات وكل الي ابيه ينزل اسمي في اللستة قبل تاريخ 28-10 ولا بلنتي بيطلع علي .. والاسكان موقفين معاملتي بسبب هالقانون السخيف والاجراء الاسخف ..!!

كل واحد يقول الغلط من الاخر ويجيبلي ادلة الاسكان يقول الغلط من الاراضي والاراضي تقول الغلط من الاسكان وياليل ياللالي .. شهرين تخيلوا معاملتي واقفة على هالموضوع ..

أتمنى اي اعضاء من الاسكان والاراضي لهم باع طويل في هالمجال او اي حد من الاعضاء عنده خبرة -سلطة -واسطة يعلمني شالطماط لان علي التزامات وابي اوفيها وضيعوني في حق هو لي ..

أرجو من الاعضاء الي بيقرون موضوعي على الاقل اذا ماعرفت الحل .. دعوة المسلم لأخيه المسلم في ظهر الغيب مجابة بأذن الله .. ارفع الموضوع بدعوة طيبة منك وجزاك الله خير

[maruuma]

ماعرف شي في الاسكان


بس الله يفرجها عليك

والله المستعان

[شويهينــه]

الله يكون بعونك

وان شاء الله احد يقدر يساعدك

[a7med0_0]

الله يهون عليك والله انا تعبت ما بين اداره المساحه والتخطيط العمراني وبنك التنميه

[بوناصر1]

الله ييسر لك امورك ويخلصونك بسرعه

[بوراشد82]

ما شاء الله 93 شافوا موضوعي و4 الي ردوا .!!!

الباقي ماعندهم خبرة في هالموضوع ؟؟

الله كريم ويسلموا يالاربعة الي رديتوا وماقصرتوا

[Rayane]

هذا اختصاصهم الحقيقي في الاسكان وهيئة التخطيط ...

قمة الفشل والملل والتنقيعه اللي ما لها داعي.... لآآآآآآ والمصيبه فاتحين مواقع ومستانسين وخدمة مسيان وعصر السرعه والكمبيوتر ومدري وشو... الله يهديهم ولا يآخذهم أخذ عزيز مقتدر.

على الاقل نحصل ناس فاهمه شغلها.

[حمد بن سعد]

تدري بوراشد ليش سو فيك جذي









لانك مواطن قطري والله يكون في عونك

[بوراشد82]

الله يجزاكم خير على المرور وفعلا لو اني مثل في توقيع الاخو واسمي (غريغوري82) جان الفيلا بالمجان مع سيارة ودراجة وسكوتر او جت بوت اختياري ..

يعني يالربع الموضوع بسيط .. عندي بيت ودخلته على الاسكان ومرهون للدولة وابي قرض عليه ..

روح تعال لا اي نعم غلط .. يعني بعض الادارات اللهم يا كافي مادري شلون معاملتك بسيطة يخلونها تقرير منظمة الفضاء الأمريكية (الناسا) ..!!

[صمت 1]

اخوي الله يحفظك شوف اي فراش في الوزاره وسلمه المعامله ومئة ريال

ان شاءالله امورك خالصه

بالتوفيق

[بوحارب]

لو انت لاعب كورة او مغني تعصي ربك كان بيكون لك كل شي متوفر وبدون اي تعقيدات

المهم يابوراشد حاول تقابل مدير بنك التنمية او تقدم له كتاب تشرح فيه وضعك وان شاء الله ربك بيسر لك الأمور

[فتى الجود]

في بنك التنمية
ادخل على العبيدلي 0 او عيسى الكوارى

وخذمنهم الكلام
هم بيوجهونك الى اى جهة تروح

[qatari 111]

الله يعينك ويسهل دربك

[بوراشد82]

الله يجزاكم خير يالربع بس الي اخبره والي اعرفه ان بنك التنمية جهة بس تصرف البيزات شي جذي .. باقي كتاب من الاسكان ان اصرفوله الدفعة فقط ..!!

وهذا الكتاب الي انا واقف عليه وانا علي موافقة قديمة فا على هالاساس الاراضي سجلولي الرهن بالقانون القديم << فا الغلط على من على الاراضي الي مالهم خص في موضوعي ولا الاسكان الي في اعتقادي انهم الغلطانين ؟؟

[BO.ABDULLA]

بالتوفيق انشالله

[bo_hamad]

الله ييسر أمورك أن شاء الله وتحل مشكلتك معاهم وبالتوفيق بوراشد

[بوتين]

بوراشد طرشلي رقمك على الخاص يمكن اقدر اساعدك ان شاء الله

[بوراشد82]

الله لا يهينكم جميعا على المرور والرد ..

بوتين تم الارسال في الخاص