تحويل اهتمام الشباب من العسكرية الى الجامعة !

[PP]

بسم الله الرحمن الرحيم

السلام عليكم ورحمة الله وبركاته .

كل واحد منا سمع ان صديقه دخل ترشيحه .
كلية احمد بن محمد مثلاَ .
ولا دخل اللخويا ولا الفزعة و الدفاع المدني وشوي يقولك المطافي .
يشتغل في KFC احسن :nice:

المهم , وصار كثير من الأهل والطلاب ما يفكرون إلا " شرطة - جيش "
ولا يشتغل في بنك .

أهو صحيح ان الشغل في العسكرية مب عيب , وهو شرف كبير
لكثير من الناس ولكن ..

ما تشوفون ان كثيرين همهم ترشيحة وكثيرين يدخلون ترشيحه ؟
مرات افكر ان الضباط بيكونون اكثر من العساكر :victory:

فكيف يا ترى نصب تفكير الطلاب إلى شيء اسمى من هذا ؟
مثلاَ إكمال الدراسة الجامعية وما بعدها .
أو العمل في مجال مهم جداَ كالطب !
أنا ما اقول ان نوقف كليات والمعسكرات الشرطة وغيرهم
ولكن كثيرين بعد دخولهم لهذا العمل , يـنـدم .
كيف ان واحد اصغر منه وأقل منه معرفه وصبر يصير ضابط ومسؤول عليه .

طيب , ما تشوفون ان العساكر شوي مرتاحين ؟
أنا اسمع ان في مصر , الجيش يزرعون الاراضي !
فهل يقدرون عساكرنا فعل هذا الشيء ؟
وليش ما ننتفع بهم ويحرثون الأرض ويحلون مشكلة كبيرة عندنا !؟
وعندها , ما يفكر بالعسكرية إلا الي بايع عمره :tease:


والشيء الثاني والي قاعد يصير الحين والحمدلله , هو الحملات
التوعوية . ومقابلات مع اناس اكملوا دراساتهم واصبحوا ناجحين
ويتقاضون اكثر من الضباط :D

مب مفروض نزرع في روح اولادنا روح المثابرة والأجتهاد ونوجه
تفكيرهم إلى العمل الطويل والشاق ونفيدهم بتجاربنا ؟
" بس هذي تكون في مراحل الطفوله او الصغر "

في النهاية اترك الباقي لكم .





أخوكم :

P!nk Panther


.

[Arab!an]

رواتب العساكرالاكثر

الجامعه عشان ندخلها لازم توفل ولازم جهد (فكري) وماراح اتحصل فلوس لا تشتري سيارة الا عقب 4 سنين

الشباب يبون فلوس ويبون سيارات

لازم يكون في دعم وتسهيل للشباب علشان يدخلون الجامعة .. ولازم يكون في دعم وتسهيل علشان الابو المديون ما يستعجل على ان ولده يشتغل ويستفيد من راتبه عقب

[PP]

رواتب العساكرالاكثر

الجامعه عشان ندخلها لازم توفل ولازم جهد (فكري) وماراح اتحصل فلوس لا تشتري سيارة الا عقب 4 سنين

الشباب يبون فلوس ويبون سيارات

لازم يكون في دعم وتسهيل للشباب علشان يدخلون الجامعة .. ولازم يكون في دعم وتسهيل علشان الابو المديون ما يستعجل على ان ولده يشتغل ويستفيد من راتبه عقب
وش فيها التوفل ؟
بالمناسبة التوفل = الايلتز
وتيكنيكياَ , مستوى الطالب بعد الثانوية يكون جاهز ليحصل
درجة عالية في الامتحانين .
واضرب مثال , اخوك " أنا " دارس حكومي 10 سنين واخذت
الايلتز في نصف الفصل في ثاني ثانوي وجبت 5.5
وبسهوله . وانا متأكد اني بجيب الحين اكثر بكثير لكن انتظر اللحظة المناسبة .

ومن قال لك ان لازم الواحد يحتاج لأهله علشان يعينونه ؟
روح ادرس على حساب المجلس الأعلى في امريكا مثلاَ
ويمشون لك معاش يكفيك
جب قبول غير مشروط وحتى لو كنت جايب 50% في شهادتك
واذا قلت ما يكفي
اخواني يدرسون برع ومرتاحين على الاخر .
والحياة هناك جنة , ويجي ويكون عنده قرشين وهو مرتاح
ويعطونه في التخرج بعد كم دفعه .
ومب محتاجه تدخل من افراد الاسرة ابداَ .

[تحداني]

" محمد " بعد ما تخرج من الجامعه سالته وين بتروح ؟؟ قال بروح ترشيحه يا تحداني الزمن
أو يمكن أروح لخويا .. على الأقل أحصل لي على 15 او 16 الف ريال أبي أتزوج .. وأبي أساعد الوالد.. والبيت ما عاد يتحمل مصدر دخل واحد

مرت السنه الأولى
وبعدها الثانيه .. " محمد " رد مره ثانيه .. خير اشفيك .. ابي أكمل دراسه ؟؟
ليه .. مو انت في لخويا .. اي .. بس ما عاد يكفيني الراتب
ليه مو يعطونك 15 الف ريال ..

بس لا .. تظل الشهاده الجامعيه شي ثاني
تخيلي " تحداني " لو جامعي واشتغل في لخويا كم راح يكون راتبي


بس عندي مشكله
اليوم انا متزوج وعندي اعيال .. وما اقدر اكمل دراسه برا الدوحه
وفي الدوحه شهادتي قديمه

القصه طويله


" عبد الله " خير اشفيك .. والله صار لي فتره طويله وانا ملازم
وين المشكله ؟؟ تعبت من العسكريه .. وعقول قديمه .. ونمط روتيني بدائي ويلوع الكبد
معقوله

اييييييييييييييه تراج ما اتعرفين شي

العسكريه يعني الموت ببطئ .. والتعايش مع ناس اعمارهم تشفع لهم نجومهم
ومن أوصل لمنصب يقولون لي اقبض الباب

الترشيحه يقولون رواتبها قويه
اي رواتب واله منخدعين الناس فينه


وبالفعل منخدعين

كم يستلمون العسكريين ؟؟
وايش نوعيه العلاوات ؟؟

اليوم معظم القطاعات الخاصه رواتبها عاليه .. والشاب صار يفاوض بالثلاثين والاربعين الف
تعالوا اخذكم جوله سريعه لعالم الرواتب .. ايش رايكم


مهندس مدني .. خبره في العمل 15 سنه يعمل في بروه يستلم راتب وقدره 45 الف ريال
مع تأمين صحي .. بدل دراسه ابناءه .. بدل تذكره .. سياره خاصه


فني شبكات .. يعمل في كيوتل .. خريج دبلوم .. ولديه عدد من الشهادات الخارجيه
يعمل حول ال10 سنين .. يستلم 25 الف ريال وعليها بونص .. واشويه علاوات حلوه


خريجه جامعه فرجينيا .. جرافيك ديزاين .. تعمل في المكتب الهندسي
تستلم 28 الف ريال مع العلاوات .. وبدل دراسه وتأمين

سفير :) وعليه عليه .. يستلم راتب وقدره 78 الف ريال .. عمره تجاوز الستين
سنوات الخدمه يمكن تكون 30 سنه


نائب الرئيس التنفيذي في العقاريه 126 الف ريال
جهاز قطر للمال ما اعرف الاستثمار .. وثيقه قطريه خريجه جامعيه " محاسبه " تستلم 16 الف ريال


العسكريه ولا شئ يا اخواني في ظل هذه المبالغ الخياليه
بلا نجوم .. بلا تحيه عسكريه وبلا اوامر وبلا تعليمات

في مستقبل تقدر تخلق بداخله مستقبل اروع

وفي مجال .. ما يعطيك غير نجوم .. وحقول تأبى مجاراه التطور



شخصيا لا احبذ العسكريه




جملك الله برضى الرحمن

[Arab!an]

ومن قال لك ان لازم الواحد يحتاج لأهله علشان يعينونه ؟
..
..
ومب محتاجه تدخل من افراد الاسرة ابداَ .


مب هو اللي محتاج لاهله ..

هم اللي محتاجين له .. محتاجين عشان كذا يوظفونه بسرعه علشان يستفيدون من راتبه

اما التوفل سو استفتاء في المنتدى شوف كم واحد متأذي من سالفة التوفل

وعاد اقنعهم ان التوفل سهل

[تحداني]

مب هو اللي محتاج لاهله ..

هم اللي محتاجين له .. محتاجين عشان كذا يوظفونه بسرعه علشان يستفيدون من راتبه






وانت صادق يا اخوي


.. علشان كذا ساعات الواحد ما يملك جواب على سؤال يمكن يكون بسيط بنظري الا وهو ليه ما كملت دراستك ؟؟ ويكون الجواب قاسي جدا لمن ذكرتهم " عشان أساعد أهلى "

وبالتالي رده الفعل لا نملك الا ان نترجمها
" قدرك أن تكون اما بلا شهاده .. او تضحي من اجل اهلك عن الشهاده "


مؤلم هذا الاحساس


جملك الله برضى الرحمن

[PP]

مب هو اللي محتاج لاهله ..

هم اللي محتاجين له .. محتاجين عشان كذا يوظفونه بسرعه علشان يستفيدون من راتبه

اما التوفل سو استفتاء في المنتدى شوف كم واحد متأذي من سالفة التوفل

وعاد اقنعهم ان التوفل سهل

والله هذا يلي ما عنده شخصية بيقعد بلا إستقلالية !
وبالنسبة للتوفل

انا اقدر اوقف قادم كل واحد وأواجهه
لو انا حكومي واخوي حكومي و اصدقائي من حكومية قدرنا نجيبها قبل ما نخلص الثانوية بسنة " ثاني ثانوي " تخيل !
والشي الثاني , هذا من إهمال الأسرة لـ الطالب و الطالب لنفسه .
تعينه قاعد يتفرج على MBC ولا يلعب Play station
وشوف الاجانب تارسين British council في الصيف :anger1:

[ضوى]

ودي وبقوة ان اولادي ينخرطون في العسكرية بس بدراسة مش جنود وافراد عاديين ، بس للاسف ميولهم مختلفة واحد يبي طيران والثاني يبي طب والله ينولهم مرادهم ويسهل طريقهم ويفتح لهم جميع ابواب الخير اميييييييييييييييييييييييين

[تحداني]

والشي الثاني , هذا من إهمال الأسرة لـ الطالب و الطالب لنفسه .
تعينه قاعد يتفرج على mbc ولا يلعب play station
وشوف الاجانب تارسين british council في الصيف :anger1:




اعتذر بس حبيت أعلق على هذه النقطه

لا تلوم الأهالي لان بعضهم ما عندهم هاذي الثقافه .. وما عندهم هذا البعد الكبير في اهميه اللغه .. حياتهم تاركينها على البركه .. ويعتقدرن ان اعيالهم يدرون وابخص ابحالهم وأوضاعهم


مافي ام ولا اب بالعالم يتمنون ان اعيالهم يتبهدلون في الحياه
ويتمرمطون في الجامعات ومو لاقيين مكان يقبلهم
الاهل يدفعون عمرهم كله عشان تعليم اعيالهم .. بس في ابهات وامهات مساكين

انا اهلي ما كانوا يعرفون قيمه اشياء كثيره
مو متعلمين .. فكانوا كل شئ يوكلونه علينه .. ولولا اجتهادنا واعتمادنا على انفسنا كان حتى المدارس المسلئيه ما تقبلنا


اما اليوم تعامل اهلي مع اخواني الاصغر مختلف تماما
احسن مدارس
واحسن اهتمام
واحسن كتب .. والولد يامر والاهل ينفذون .. وفوق هذا يدفعون




جملك الله برضى الرحمن

[الزجاجي]

مش عارف ليش ماقدر ارد على هذا الموضوع بس بحاول :)

اخوي ممكن اسرد لك قصتي؟
مثلا خويك قعد 6 سنين في الجامعه من غير عمل اللهم الوالد يصرف علي حلو ..
وربعي البعض منهم اشتغل على طول .. تخيل انا وهم نفس الراتب ونفس الدرجه ؟!!

المشكله مش العسكريه ولا الجامعه .. المشكله ما كان على ايامنا ارشاد اجتماعي واكاديمي ولا حتى تكوين الذات !!
يعني عمري 26 سنه ومحتاج تجمع علشان تكون نفسك 3 او 4 سنين والطامه الكبرى اذا ما كفتك

[PP]

اخوي , لو فكرت عدل
لعينت ان التخصصات الصعبة والمطلوبة ويدفعون اي شي علشانك
اللعبة عرض وشراء
مثلا الطب .
اول ما يتوظف 25 ويرتفع إلى ان يصل 40 ويمكن زيادة بعد هذا على حسب
الخبرة وسنوات العمل وإذا كملت تخصص ولا لا .

ومثلاَ سدرة . لما تدرس يعطونك حوالي 17 او 16 الف . مب كافية ؟
اقصد الراتب يلي يكون بقطر + الراتب يلي يكون في الخارج .
واول ما تجي يكون راتبك 60 الف من اول يوم " لو كان معك m.d " او ما
يساويها .

وبالنسبة لمهندس الاتصالات في فودافون . في وحدة تستلم فوق الـ 90 الف.

وهندسة البترول عامة , يدفعون ويتكفلون بكثير من الاشياء


p.p

[PP]

اعتذر بس حبيت أعلق على هذه النقطه

لا تلوم الأهالي لان بعضهم ما عندهم هاذي الثقافه .. وما عندهم هذا البعد الكبير في اهميه اللغه .. حياتهم تاركينها على البركه .. ويعتقدرن ان اعيالهم يدرون وابخص ابحالهم وأوضاعهم


مافي ام ولا اب بالعالم يتمنون ان اعيالهم يتبهدلون في الحياه
ويتمرمطون في الجامعات ومو لاقيين مكان يقبلهم
الاهل يدفعون عمرهم كله عشان تعليم اعيالهم .. بس في ابهات وامهات مساكين

انا اهلي ما كانوا يعرفون قيمه اشياء كثيره
مو متعلمين .. فكانوا كل شئ يوكلونه علينه .. ولولا اجتهادنا واعتمادنا على انفسنا كان حتى المدارس المسلئيه ما تقبلنا


اما اليوم تعامل اهلي مع اخواني الاصغر مختلف تماما
احسن مدارس
واحسن اهتمام
واحسن كتب .. والولد يامر والاهل ينفذون .. وفوق هذا يدفعون




جملك الله برضى الرحمن

نفس المشكلة , ولكن ما احد تذمر
وكمل حياتك طبيعي :)

[رُفق المجنّا]

في قطر بالذّات , ما عندنا أي تقدير لـ الشّهادة

معقولة بشهادة هندسة تتوظّف مدير موارد بشريّة !!

أضف إلى أن بعثات العسكريّة يستلمون ما بين 4000 دولار وحتى 7000

بينما المجلس الأعلى ( 2000 )

!!

وعندكم المايك :)

[باسكن روبنز]

ذكرتني بآلي مضـى ،
سنة 2002 سجلت بمعهد الشرطه كـ جندي ،


دخلت آسبوعيــن وشردت طلعت منها بالعافيه ومهب عشان الكرف والتعب ،
الآ الحمدلله تلاحقت على نفسي وماضيعت عمري وسنيني على رتب عاديه مع آحترامي للعساكر ،

أتمنـى وصل لك جوابي بموضوعك ،
(وجهة نظـري) ،





ذيـك الآيام ماكنت مكمل الثانويه للآسف لظروف مرضيه والعلاج بالخارج ولاا والله دخلت مرشح وآنا مغمض ،
عمري حالياً تحت الـ30 وكل ماروح آستفسر قالولي فوق الـ24سنه مايقبلون الآ باستثناء قـوووي ،

آلي عنده واسطه يدخلني ترشيحه على رفقه نروح المرور وآسلمه آسويج الجمس الحمر غماره آلي عندي <<اغراءات من الصبح وقد كلامه ،
حلااااااااااال عليه ،:):):)

[مشتاقة لقطر]

والله كلامك بالصميم

بس سبحان الله انا اايد العسكرية

لتجربة قدام عيني ..

الاول ..ترشح بكلية الضباط.. ويستلم راتب 5000 الاف بس .. وتزوج .. مباشرة على ايام الرخص .. هههههه

وتخرج بعد 4 سنين ونص ..والحمدلله ترفع 3 ترفيعات(3 نجوم ) بفترة حلوة وراتبه ممتاز واشترى بيت الخ ( قوولو ماشالله )

واخوه
دخل عسكرية مباشرة ويستلم راتب اكثر منه اول ما اشتغل .. بس بعد التخرج مافيه مقارنة بين راتب الاول والثاني
مع ان الثاني شغله مريح مدني بالمطار .. بس راتبه نص راتب الضابط وترفيعاته بطيئة


الزبدة .. كل مجال فيه خير ..

بس يكون اللي يشتغل فيه طموح وعنده اخلاص وولاء للي يقوم فيه .. من عمل ويتقنه ..

[PP]

في قطر بالذّات , ما عندنا أي تقدير لـ الشّهادة

معقولة بشهادة هندسة تتوظّف مدير موارد بشريّة !!

أضف إلى أن بعثات العسكريّة يستلمون ما بين 4000 دولار وحتى 7000

بينما المجلس الأعلى ( 2000 )

!!

وعندكم المايك :)

بس شوف , تخلص بعثة العكسرية , غصباَ عنك تشتغل عندهم
عدد سنوات يلي درستها وتخيل لو ما ارتحت مع جو العسكرية ؟

أو تدفع كل تكاليف الدراسة.

بالنسبة للمجلس الأعلى , شوف كتيب طالب المبتعث .
وهو صراحة قليل ولكن تخلص وتكون Free
مب مربوط بأي عقد إلا انك تشتغل لصالح قطر عدد سنوات
الدراسة ولكن مب محدد لا جهة ولا شركة :nice:

وانت ايش حقه تاخذ المجلس الأعلى كـ sponsor لك ؟
إذا كنت بتدرس هندسة , البترول ما يقصر .
وإذا طب , سدرة ما تقصر :omen2:

[PP]

ذكرتني بآلي مضـى ،
سنة 2002 سجلت بمعهد الشرطه كـ جندي ،


دخلت آسبوعيــن وشردت طلعت منها بالعافيه ومهب عشان الكرف والتعب ،
الآ الحمدلله تلاحقت على نفسي وماضيعت عمري وسنيني على رتب عاديه مع آحترامي للعساكر ،

أتمنـى وصل لك جوابي بموضوعك ،
(وجهة نظـري) ،





ذيـك الآيام ماكنت مكمل الثانويه للآسف لظروف مرضيه والعلاج بالخارج ولاا والله دخلت مرشح وآنا مغمض ،
عمري حالياً تحت الـ30 وكل ماروح آستفسر قالولي فوق الـ24سنه مايقبلون الآ باستثناء قـوووي ،

آلي عنده واسطه يدخلني ترشيحه على رفقه نروح المرور وآسلمه آسويج الجمس الحمر غماره آلي عندي <<اغراءات من الصبح وقد كلامه ،
حلااااااااااال عليه ،:):):)

كل الناس راح يحاسبون على انهم استخفوا بواجبهم
وأخذوا الشي السهل والمضمون لهم
وما يعرفون ان الضمانة ما تحميك طول الوقت :victory:
ولكن لما تشوف انواع الذل , أو انك في محل غير محلك.
فـ أيش راح يكون تفكيرك ؟ ضيعت طول عمرك علشان معاش
وسيارة , لاااااحقين عليها بعدين .

[PP]

والله كلامك بالصميم

بس سبحان الله انا اايد العسكرية

لتجربة قدام عيني ..

الاول ..ترشح بكلية الضباط.. ويستلم راتب 5000 الاف بس .. وتزوج .. مباشرة على ايام الرخص .. هههههه

وتخرج بعد 4 سنين ونص ..والحمدلله ترفع 3 ترفيعات(3 نجوم ) بفترة حلوة وراتبه ممتاز واشترى بيت الخ ( قوولو ماشالله )

واخوه
دخل عسكرية مباشرة ويستلم راتب اكثر منه اول ما اشتغل .. بس بعد التخرج مافيه مقارنة بين راتب الاول والثاني
مع ان الثاني شغله مريح مدني بالمطار .. بس راتبه نص راتب الضابط وترفيعاته بطيئة


الزبدة .. كل مجال فيه خير ..

بس يكون اللي يشتغل فيه طموح وعنده اخلاص وولاء للي يقوم فيه .. من عمل ويتقنه ..

اعتقد ردي راح يكون نفسه مثل الرد على باسكن روبنز .

[Qa6ar]

عموما خدمه الوطن شرف وكل انسان وده يخدم وطنه بأي مكان لكن في عصر الغلا لازم نهتم بدراستنا

الجامعيه وبأي مكان ممكن نخدم وطننا وكل ماوصل الانسان لمرحله اعلى من العلم تتيح امامه افاق كثيره

يقدر يغير مكانه او وظيفته وكل انسان يتبع مصلحته