المساعد الشخصي الرقمي

مشاهدة النسخة كاملة : عسكري x مدني :::::: مقارنه و اتمنا من الجميع قرأتها


مرحوم قطر
08-10-2010, 12:23 AM
السلام عليكم و رحمة الله و بركاته


حبيت احط موضوع لان للاسف طلع خبر اليوم و ردود بعض الاعضاء زعلتني وايد

وهو خبر الزياده للعساكر


و هلموضوع بيكون مقارنه بين العسكري و المدني و انا بتكلم لكم كوني عسكري كنت مدني

و اخواني كلهم مدنيين و طبعاً ما بقدر اشمل كل الجوانب بس بتكلم بالي اقدر عليه و يطري على بالي

و ان شاء الله محد يزعل مني ولا يزعل من طرحي و طرحي ماهو الى مقارنه


اول شي و قبل كل شي بتكلم عن الزياده الي جات المدنيين من فتره مادري شتفاصيلها

بس اعرف ان جات للمدنيين بداية هلسنه

بغض النظر عن هلموضوع نتوكل على الله



الرد على الي زعلو لان في زياده حق العساكر

اول شي انت يا فلان لما تقدم على العسكريه او شي يصير فيك تطلع من حياة و تدخل حياه ثانيه


تطلع من كونك انسان مدني و تدخل على حياة العسكري ترى العسكري مب ميدان

و واحد لابس دريس و عنده رشاش و يروح يرمي مثل ما البعض حاط في باله

العسكريه غير و اكبر من كذا بوايد

اول شي بنقارن من البدايه من التوظيف

انت يا المدني لما تتوضف في مثلا بنك وش بيسوون لك بيقولون لك التعليمات و بيودونك

دوره تاسسك انت تمسك هلوضيفه مثل ما صار لي انا قبل 8 سنين لاني توظفت في بنك

و لما تخلص الدوره التاسيسيه الي بتكون في معهد في مكان مكيف فيه استراحات و فيه

كوفي شوب و اخر دلع مثل ما يقولون بتتعلم بالقلم و الدفتر و الكمبيوتر

بتتخرج و بتمسك مكانك في مكتب مكيف تداوم كاشخ امورك سهالات


اما انا يا العسكري بقدم اوراقي و بعد القبول و الفحص الخ

بروح حق اول يوم دوام لي الا وهو اليوم الاول استلام العهده

في هليوم انت تطلع من دنيه و تدخل دنيه ثانيه تطلع من كونك مدني و تدخل حياة العسكري

هذا كله باستلامك العهده الاولى و يقولون لك قبل الاستلام انت من اليوم عسكري مب مدني

و محاسب على كل صغيره و كل كبيره تسويها



دورتك يا المدني كانت مكيفه و امورك سهالات

اما انا يا العسكري اول شكانت دورتي هي تمتد من الصيف لين الاشته

تمارينك في الشمس الحاره مافي شي اسمه ظلال

كل يوم مطلوب منك تجري ال10 و ال15 كيلوا و تسوي تمارين تكسر جسمك وهذا بشكل يومي

بتخلص الرياضه و بتروح الميدان بدريس و متهند

الهندام مطلوب منك يوميا لازم بشكل يومي في الليل تلمع المسطار او الجوتي كرمكم الله

ولازم تلمعه بطريقة الحرق الي الجوتي يلق الدرجه يعكس الاشياء

على قولت مدربينه تلمعه لين ما تشوف وجهك فيه :nice:


لازم العارض يكون محدد بمسطره و مافي شعر طالع يعني لازم كل يومين تروح الحلاق تنعم

و الشعر موووس شعره وحده مب احسن لك

وش بيصير فيك اذا ما سويت كل ذي بتتجازه و بعدها بتنحجز

و بتم على هلحال 6 شهور و بيمر عليك الصيف و الحر الدرجه ان قرعتك تصير لونين


والله يا جماعه كنه نفصخ الكاب روسنه لها لونين تحت الكاب ابيض و الويه اسود

و الدوره كلها شي بدني مافي كتابه الى محاضرات بسيطه لاكن الاغلب صك و حك في الميدان

و كل دورتك جزه لازم تتجازه يوميا ً انت يا المدني ماكان عندك جزه ولا جربت امر الصفاره

وهو ان الصفاره امر اذا صفر المدرب معناتها امر


و الجزه كل مدرب يتفنن منها الجري انت ما جربت يقولون لك روح حق الشجره الي ماتبين

جيب منها غصن فيه لوز و تعال و اذا ما جبتها يويلك و طبعاً ما بتجيبها

بيقولون لك عجل ازحف على كامل الميدان لين تطلع روحك و و و و و و و و و الخ الخ الخ

بتتخرج و بتداوم


انت يا المدني داومت على مكتب في مكان مكيف و امورك سهالات

اما العسكري وين يداوم

انا بسال الشباب الي تظلموا و استنكرو رفع رواتب العساكر

هل انت بامكانك في عز الصيف الساعه 12 لين 2 الظهر و درجة الحراره توصل قريب ال50

توقف على دوار تسهل الحركه

والله يالربع كنه نطبخ نطبببببببببببببببخ في الشمس الحاره

انا كان بامكاني اطنش و اول ما يروح الظابط اقعد في الدوريه بس قلبي يعورني لاني ادري هلشي في ذمتي


و تقدر في هلحر تستحمل رزالة بعض الناس

مره كنت ماسك سلاحي بالمين و عطشان مسكت غرشة الماي باليسار الى وقف لي مطوع

قالي حرام يا شيخ و تم يفتيلي في الشارع

ياخوي شاسوي وين اقط السلاح مثلا


ولا يجيك واحد يبي يغير القانون يوقف في نص الدوار يقولك اذا واحد سوى كذا غلط لازم تغيرون القانون


ولا توقف لك عجوز تقولك يا شرطي تعال و لما تجيها نعم يما تقولك هاوش هلحمار ما يسوق عدل

يعني دريولهم


ولا تقدر في رمضان ماتفطر و الله يا شباب والله ثم والله ثم والله ان في رمضان من كم سنه

لما كنت في الدوريات كنه نفطر على ماي و زقاير

والله لين الحين اخبر ذيك الحرمه الي طرشت لي فطور مع ولدها في الكرنيش

ولما خلصت فطوري طرشت لي شاهي

وعلى فكره انا الحين ما اتشكا ولا مب عاجبني انا عاجبني هلشي لاني ادري اني اسوي شي عدل

وشي له معنا و له قيمه بس اقارن بيني و بين الي استنكرو الزياده

لاكن انت لو في دوامك و اخترب المكيف بتداوم ولا بتخلص معاملات الناس

ولا بتقول لا انا ما اقدر بعرق و بتركب سيارته و بتروح البيت

هذا حنى ماكنه نفطر و كنه في رمضان و حنى صيام نشتغل في الشمس و مانشتكي و نعطي احسن ماعندنا

و ما نفطر اما انت هل بتستحمل ان المكيف يخترب ؟.؟


لو بنتكم عن الملابس

انت يا المدني بتداوم ابشنو ابثوب و غتره و عقال و ريحة العطر واصله لين اخر الممر

الشعر بتطوله على كسفك السكسوكه بتمغطها على راحتك و امورك طيبه

اما انا بداوم بدريس و الله يا شباب ان دريسي يزيد وزني 4 كيلو

الجوتي ونتو بكرامه بس بلا و غض النظر عن الحزام الي يخنق و الكاب الي يحت الشعر


بتداوم الصبح كاشخ و على مكتبك تقرا الجرايد و تكرك و تفطر

اما انا بداوم الصبح بدريس و بروح اصف في الميدان طابور تكمل او اركان و خذ



انت يا المدني اذا تاخرت ولا غبت

شبيصير فيك شبيسوون لك بخصمون من راتبك طيب و بعدين خل يخصمون الامور سهالات

هذا اذا اتخذو فيك اجراء لان حنى نتكلم عن واحد من ياتخر ولا يغيب الى نادر

يعني يمشونه له و عادي الامور سهالات

اما انا يا العسكري لو تاخرت

6 و دقيقه انحجز و اتعاقب لان القانون العسكري تشنج من التاخير

اذا غبت شبيصير بنسجن على بالك حجز في القوه لا سجن سجن زنزانه و عدس و الي تخبرونه :tease:



انت دوامك من الساعه لفلانيه لين الساعه لفلانيه

اما انا لا انا دوامي 6 بس مب اكيد بطلع 1 يمكن اطلع العصر يمكن في الليل يمكن ابات

و انت اذا داومت زياده عطوك الافر تايم مالك اما انا اذا داومت من الصبح لين الليل

بيقولون لي يعطيك العافيه و بكره على راس العمل

في الاسياد انا داومت لمدة اسبوعين متواصلين من الساعه 6 الصباح لين الساعه 2 الفجر

ارجع البيت ارقد الساعه 3 و اقوم الساعه 5 ارجع الدوام


هل بامكانك يا المدني تسوي كذا لمدة اسبوعين

انا لما خلصت رقدت يوميت متواصلين ابي اعوض

ربعنا كل 5 ايام لازم يناوبون 26 ساعه ما يطلع من المعسكر هل تقدر تسوي كذا




السفر و الخروج من الدوله

انت اذا بتسافر في اخر الاسبوع بتركب الطياره ولا موترك و تسافر

انا لازم اخذ اذن من الدوام قبل ما اشبر شبر واحد بره البلاد



القضايا و المحاكمات

انت اذا سويت مشكله تهاوشت مثلا جاك واحد ولف عليك نزلت على متعنطز على شين قوي عين

صارخ ظربته و جات الدوريه و ودوكم المركز شبيسوون لكم

كفاله و تعهد و مع السلامه اما انا بيودوني المركز و بعدها المعسكر و بنسجن اداري

وبنعرض على النيابه و بعدها المكمه و بعدين بيوقعوني على تعهد و بتكفل و بتنتهي القضيه المدنيه

و بتبتدي القضيه العسكريه وخذ على حسب اشياء وايد يطلع فيك الحكم :anger1:



بنروح حق الرواتب الي العالم زعلانه عليها

انا ما بحط لكم جداول و بحط كشوف و ماعرف ايش

انا بعطيكم مقارنات بيني و بين اخواني و ربعي

انا عسكري من 8 سنين عندي ثنويه راتبي 17 الف

واحد من ربعي مدني في الجمارك توه متوظف و ماعنده ثنويه راتبه 16 الف


اخوي عرضو عليه بنك بروه و عنده ثنويه و توه متخرج قالوله بنعطيك 18 وانا 8 سنين راتبي 17


و و و و و الخ الخ الخ




بنروح حق التفريعات

انت يا المدني اذا شديت حيلك و حبوك ربعك ارفعوك شلي مانك انك تشد حيلك

انا داومت في مؤتمر لجه حكوميه بعض ما خلصنه انا عطوني اجازه يومين في الرصيد

و اثنين كانو يداومون معاي من هلجه كل واحد فيهم عطوه درجه

اما انا لو اشتغلت لين و نهار و حكيت لين الله قالي ترفعتي با بتتقدم يوم واحد سنتين يعني سنتين

شاء من شاء و ابا من ابا هي وحده اما المدني ممكن يتعرف اذا شد حيله




و اسمحولي طولت عليكم وايد بس جد انقهرت من ردود بعض الاعضاء و تحياتي للجميع
الحره
08-10-2010, 12:37 AM
ربي يقويكم ويعطيكم العافيه وتستاهلون الزياده والي يده في الماي غير عن الي يده في النار وماعليك من كلام الحَسد.

والحسد موجود والي يقهر الناس ماتطالع الي عندهم كله تطالع الي عند غيرهم

وهالشعب هالشعب مايشببببببببببع ولا يحمد ربه

احمدو ربكم بس.
حقيقه
08-10-2010, 01:09 AM
السفر و الخروج من الدوله

انت اذا بتسافر في اخر الاسبوع بتركب الطياره ولا موترك و تسافر

انا لازم اخذ اذن من الدوام قبل ما اشبر شبر واحد بره البلاد



فيه عسكريين يسافرون كل يومين ,, ثلاث .. اربع مادري اشلون


:victory: والله يعطيك العافيه
الأصيلة
08-10-2010, 01:14 AM
الله يعطيكم العافية
أجرك كبير في الدنيا والآخرة...
كنت بدخل ولدي العسكرية لما يخلص الثانوية
صراحة خليتني أغير رايي...!!
مرحوم قطر
08-10-2010, 03:24 AM
الاصيله خليه يدخل


انا ما اقول هلكلام يعني العسكريه مب زينه

صحيح ان فيها اشياء وايد اتعب بس بعد في اشياء وايد زينه

كفايه ان اسمي حامي البلاد و يسمونه العيون الساهره و اكفايه ان حنى الي نرفع علمها

ولو العسكريه كلش مب زينه كان قدمت استقالتي عندي سنين خدمه و عندي ثنويه

اقل شي بقدم استقالتي و بروح اشتغل في اي مكان و ابراتب احسن

بس انا مابي صحيح اني اتعب و اني انحك بس على الاقل ظامن اني محلل راتبي

على الاقل ادري ان الي اسويه صح و منه فايده

في اماكن وايد اقدر اروحها و اشتغل فيها بس انا عاجبني مكاني رغم سلبياته

لاكن القصد من الموضوع ان نراوي الي يعترضون على الزياده لنا شنو الفرق بينه و بينهم

القصد مب اظهار السلبيات وبس ترى في حسنات و اقل حسنات العسكريه اني اداوم في مكان كله قطريين

و كله ربعنا و كلها اهلنا القصد ان ليه يا فلان و يلا علان تحسدنا و حنى شغلنا اصعب من شغلك


ليه انت تبي تستلم راتب و قدره و انت تشتغل اقل منه ياخوي ما حطة الحكومه هلقرار الى وهي داريه ان حنى نستاهل


صح و لا انا غلطان

بس للاسف في ناس تقول لا و وايد و حنى اولى و هلكلام ما يعرفون وش التعب الي نتعبه

لانه قاعد في مكتب و حاط رجل على رجل ما يشوف الي يشتغل في الشارع و الشمس صاقعه راسه


انا اقول هلكلام بس حق الي يقولون العساكر ما يستاهلون الزياده


دخليه ولا تخافين عليه بس اهم شي ما يسوي مشاكل و يتحمل في نفسه

و اهم شي يشد حيله و علميه ان يحط في باله ان التعب الي يتعبه منه فايده مب على الفاظي
ياقلب لاتحزن
08-10-2010, 03:32 AM
الله يعطيكم العافية ........


وجــزاكم الله كل خير ......

ويستاهلون عيال قطر.... أبناء قطر الأوفياء يستاهلون كل خير .......

وعسى الله يرزق الجميع إن شاء الله من حيث لايحتسبون .......
a7med0_0
08-10-2010, 03:43 AM
يستاهلون العساكر وبصراحه والله يتعبون سواء جيش او شرطه
بس انشاء الله تشملهم جميعا
Mshari
08-10-2010, 04:07 AM
صدقني اخوي اكثر موظف يستحق ان الدول تهتم فيه هو العسكري
المفروض يكون مرفهه لابد درجه ماديا واجتماعيا

لكن عندنا في العالم العربي العكس
cartier
08-10-2010, 04:09 AM
حستتني انك متخرج من سانت هيرس

وانك اداوم في البنتاقون

والله في اماكن مدنيه دوامها العن من العسكريه بمليون مره
الأصيلة
08-10-2010, 07:18 AM
الاصيله خليه يدخل


انا ما اقول هلكلام يعني العسكريه مب زينه

صحيح ان فيها اشياء وايد اتعب بس بعد في اشياء وايد زينه

كفايه ان اسمي حامي البلاد و يسمونه العيون الساهره و اكفايه ان حنى الي نرفع علمها

ولو العسكريه كلش مب زينه كان قدمت استقالتي عندي سنين خدمه و عندي ثنويه

اقل شي بقدم استقالتي و بروح اشتغل في اي مكان و ابراتب احسن

بس انا مابي صحيح اني اتعب و اني انحك بس على الاقل ظامن اني محلل راتبي

على الاقل ادري ان الي اسويه صح و منه فايده

في اماكن وايد اقدر اروحها و اشتغل فيها بس انا عاجبني مكاني رغم سلبياته

لاكن القصد من الموضوع ان نراوي الي يعترضون على الزياده لنا شنو الفرق بينه و بينهم

القصد مب اظهار السلبيات وبس ترى في حسنات و اقل حسنات العسكريه اني اداوم في مكان كله قطريين

و كله ربعنا و كلها اهلنا القصد ان ليه يا فلان و يلا علان تحسدنا و حنى شغلنا اصعب من شغلك


ليه انت تبي تستلم راتب و قدره و انت تشتغل اقل منه ياخوي ما حطة الحكومه هلقرار الى وهي داريه ان حنى نستاهل


صح و لا انا غلطان

بس للاسف في ناس تقول لا و وايد و حنى اولى و هلكلام ما يعرفون وش التعب الي نتعبه

لانه قاعد في مكتب و حاط رجل على رجل ما يشوف الي يشتغل في الشارع و الشمس صاقعه راسه


انا اقول هلكلام بس حق الي يقولون العساكر ما يستاهلون الزياده


دخليه ولا تخافين عليه بس اهم شي ما يسوي مشاكل و يتحمل في نفسه

و اهم شي يشد حيله و علميه ان يحط في باله ان التعب الي يتعبه منه فايده مب على الفاظي

شكرا يامرحوم قطر على النصيحة
ورايتكم بيضاء في عملكم الطيب ...
بارك الله فيكم وجعلكم سياجا قويا للوطن...
شموخ العز
08-10-2010, 07:45 AM
مرحوم قطر موضوعك جميل ومميز وبيض الله وجهك وكلام جميل

يستااهلون العسكريين وبعدين عملهم مافيه دوام محدد وينتهي ممكن يروح من البيت ىما يرجع



ممكن اي خطأء يسويه يتحاسب عليه ويسبب له مشكله في الترقيه او العمل( العسكري الصراحه يستاهل كل خير)


بعدين دوامهم من الساعه خمس الفجر وهو صاحي من النوم

ولاننكر دور المدنيين والمدنيات فيهم البركه [color="red"]ومنهم انا موظقه مكافحه احب الوطن والعمل ولكن كلمه حق العسكري يستاهل

عسى الله يحفظ لنا هذا الوطن الغالي بقياده قائد السفينه حضرة صاحب السمو الشيخ حمد بن خليفه ال ثاني امير البلاد المفدى
عذاب
08-10-2010, 10:00 AM
يـعطيك العافيـه يا اخووي مرحوم قطر ,,وكلامك عين العقل ..
العساكر هم الي يستحقون الزيادات ,, والله يعننا على العسكريه ,,
الدوحي7
08-10-2010, 10:13 AM
حستتني انك متخرج من سانت هيرس

وانك اداوم في البنتاقون

والله في اماكن مدنيه دوامها العن من العسكريه بمليون مره

خخخخ،، صحيح كلامك،،،
شيط ويط
08-10-2010, 10:27 AM
يعطيك العافيه اخوي مرحوم قطر .. والكل فيه الخير سواء العساكر والا المدنيين والكل قاعد يأدي واجبه تجاه الوطن بطريقة أو أخرى .. وانتوا حماة الوطن سواء في الداخل او الخارج .. وتستاهلون الزيادات
العقل الحر
08-10-2010, 10:52 AM
العساكر دايمن يبالغون انهم يكرفون وانهم كذا وكذا ... الخ

نعم فيه ناس تحك بس هم الاقليه حالهم حال المدنيين فيهم ناس تحك في مصانع وجزر خارجيه

وباقي العساكر كل واحد كرشته شكبر ورى المكتب طول يومه ويطلع الساعه 12 !!
البارع
08-10-2010, 10:53 AM
ليش يزيدون العساكر ولا يزدون المدنيين والمتقاعدين ليش

مب نشتري وياهم من تاجر واحد بكره لما الجشعين من التجار يزيدون الاسعار وترد حماية المستهلك سوقنا سوق مفتوح مانقدر نفرض عليه يحدد سعره ؟؟

على فكره انا عسكري ::tease::tease:
shmokh
08-10-2010, 02:54 PM
من جد وجد

ومن زرع حصد

ومن تعب في البداية ارتاح في النهاية

لو كنت تاعب على نفسك من ايام الدراسة ومكمل جامعتك كان ارتحت ولقيت الوظيفة اللي تريحك

كل وظيفة تحتاج جهد منها وظائف تحتاج جهد عقلي ومنها وظائف تحتاج جهد عضلي

اللي درس وثقف نفسه وتعب على عقلة وصار مهندس مدني او اداري او محاسب او مهندس كمبيوتر اكيد راح يلقى وظبفة تحتاج جهد عقلي بدون تعب بدني وعضلي وله دوره المهم في المجتمع

والعكس صحيح
السندان
08-10-2010, 04:29 PM
يعطيك العافيه ياخوي

وانتوا تتكامون عن الزياده والناس قامت تحسد بعظها والى الحين مافيه شئ رسمي

واذا على كلام الجرايد والناس بتتعب .. زيادة الرواتب نسمع عنها من 4 سنين وينها

والشئ الثاني سمعنا من سنوات ان رواتب كهرماء واشغال ضاربه السما ولا حد حسدهم ليش

والاطباء والمدارس المستقله وغيرهم وكل فتره نسمع عن جهه مادري تنفذت او لا ولاكن لايعني ان العسكريين فقط اللي عليهم العين .. ياليت الناس ترضى باللي عندها وتنتظر نصيبها والحكومه ابخص

وما اعتقد فيه بيت يخلى من عسكري هذي الايام سواء رجل او امرأه واللي يحسد يايحسد اخوه او اخته

سلوط
خليفـة
08-10-2010, 04:40 PM
اخوي يعطيك العافية
ورايي بكل اختصار :
العسكرية حلوة لما تكون ضابط من رتبة ملازم ثاني وطالع
اما الرتب الأخرى فكلك نظر


والمدني نفس الكلام .. لما تكون سنير فرق عن لما تكون جنير
وطبعا الفوارق كثيرة وكبيرة


اما بالنسبة لأيهما أفضل .. السنيؤ العسكري او السنير المدني .. فهنا تختلف وجهات النظر والرغبات .. فيه ناس يحبون يضحون بأي زيادة مالية في الراتب مقابل الاستمتاع باللبس المدني .. والحرية المطلقة في العمل .

وفيه ناس ماتفرق عندهم الحياة المدنية او العسكرية .. المهم ان يكون الراتب ممتاز وعالي .. والأهم من ذلك الحصول على الامتيازات المختلفة مثل تذاكر السفر وبدل ملابس و و و الخ ..

وفي النهاية .. كل واحد بياخذ نصيبة في هذي الحياة

:)
ريم المدينة
08-10-2010, 06:22 PM
المدنية احلى لان ما فيها مذلة.....
@السفير@
09-10-2010, 02:03 AM
الف مبروك واهل قطر يستاهلون كل خير بس نبغي تساوي العلاوتين الاساسيتين (بدل السكن والاجتماعيه)للعسكري والمدني اما العلاوات الاخرى فذلك حسب الاداره علمابأنه توجد امتيازات أخرى مثل تذاكر السفرلكل طفل +الأب والزوجه وبيع الأجازه وتجميع الأجازات من سنه لأخرى والتي يفتقدها المدني في القانون الجديد هل يعقل راتب السنيرفي المدنيه مقابله في العسكريه راتب صف ظابط جديد؟ واتمنى الخير للجميع
QtrGate
09-10-2010, 03:10 AM
حاولت ادخل العسكرية مرشح لاكن ماقبلوني ..,,

والله يساعدكم

صج اكثر مكان تعبت منه
مع اني بس خلصت اجراءات الطبيه
الفحوص في مكان غير مكيف
فحوصاتهم على كل اجزاء الجسم وحتى النفسية
الدكاتره بعضهم مخيسين النفس

ويبيلك 3ايام تروح من 7 الصبح لين 1 الظهر عشان تخلص الفحوصات

الله يساعدكم وصراحة تستاهلون اكثر
ودورلي واسطة :)
G0LD
09-10-2010, 08:59 AM
يستاهلون العسكريين الصراحه محد يحس فيها غير الي جربها

وهناك كثيره من الاقسام العسكريه تعتبر ميدانيه بحته يعني كل وقته رياضه وعلوم عسكريه

وتحقيق الخ


وكذلك المدنيين يستاهلون لان هناك مدنيون كذلك يتعبون لكن اقل من العسكريه بكثير


شكرا لك

والله يوفق الجميع ان شاء الله
jassim
09-10-2010, 12:58 PM
الله يرحم ايام العسكرية
Ross
09-10-2010, 01:40 PM
المدنية احلى لان ما فيها مذلة.....

يعني العسكريه فيها مذله ؟؟ اذا العسكريه فيها مذله هاي اكبر شرف لي انذل عشان اخدم بلادي :nice:
ولد الشحانية
09-10-2010, 01:42 PM
العسكري يستحق العلاوات والزياده وتامين صحي يتعب المسكين ويسهر عشان يحافظ علي الامن
ريم المدينة
09-10-2010, 01:58 PM
يعني العسكريه فيها مذله ؟؟ اذا العسكريه فيها مذله هاي اكبر شرف لي انذل عشان اخدم بلادي :nice:


مذلة لان ناس اصغر منك تتأمر عليك ولازم تطيع حتى لو كانوا على غلط :secret:
Ross
09-10-2010, 02:30 PM
مذلة لان ناس اصغر منك تتأمر عليك ولازم تطيع حتى لو كانوا على غلط :secret:

اكيد اطيعه في حدود الشغل وانا اذا بطيعه عشان رتبته لا اكثر ولا اقل
وهم قطر
09-10-2010, 03:26 PM
حستتني انك متخرج من سانت هيرس

وانك اداوم في البنتاقون

والله في اماكن مدنيه دوامها العن من العسكريه بمليون مره

اخوي لاتغتر في سانتيرز اذا ماعرفت شلون دورتهم

على فكره العسكريه في قطر اصعب ويكفي الجو

هناك ابناء الامراء والملوك وين بتلاقي التعب ياحسره الواحد ماتجيه ضربه شمس

اذا انت قارنت انه فيه في المدنيه العن من العسكريه صحيح انا معك بس

تقدر تقارنها بأسهل دوام في العسكريه الي هو مندوب مراسلات فقط لانه مادخل دوره تاسسيه فهنا المدنيه اصعب
دورني
10-10-2010, 08:39 AM
الاصيلة


كنت بدخل ولدي العسكرية لما يخلص الثانوية
صراحة خليتني أغير رايي...!!

اذا حاسه ان ولدج شاطر وله مستقبل دراسي ، نصيحة ! نصيحة ! نصيحة !

شوفي له مكان غير العسكرية ..

مرحوم قطر


ولو العسكريه كلش مب زينه كان قدمت استقالتي عندي سنين خدمه و عندي ثنويه

شكلك ما قريت القانون عدل .؟؟ تحسب الاستقالة سهله ؟؟

اذا لك معارف في فوق .. إسال عن عدد الإستقالات .. وكم واحد منهم قدر يطلع ...

دخول العسكرية مب مثل الطلعة منها ..


بس انا مابي صحيح اني اتعب و اني انحك بس على الاقل ظامن اني محلل راتبي

على الاقل ادري ان الي اسويه صح و منه فايده

انا ما اقول ان ما في ناس راضيين بالعسكرية .. بس اغلبهم بدون طموح ،،

شغلهم الشاغل ، دوام بيت ، بيت دوام .. لا تطوير ولا غيره ..

فكرت بوضعك بعد الخدمة .؟ لا شهادة ولا راتب ..؟؟

للعلم بعد التقاعد اللي يمشي لك الاساسي والاجتماعية فقط !!


القصد مب اظهار السلبيات وبس ترى في حسنات و اقل حسنات العسكريه اني اداوم في مكان كله قطريين


اخوي .. مع كل احترامي .. هالكلام ينطبق عليك انت شخصيا ..

بس هل كل العساكر نفسك ؟؟

انا اشوف موظف البلدية يداوم مع قطريين اكثر من اي شخص ..!!

اللي عجبني في ردك .. حب الوظيفة .. وقلة التذمر .. الله لا يغير عليك ..



حقيقة



فيه عسكريين يسافرون كل يومين ,, ثلاث .. اربع مادري اشلون

هذا الكلام ما يعم الجميع .. وان كانو يطلعون فهم ضبطوا نفسهم ..

بس دامج سالتي هالسؤال ..

ما سالتي عن العسكريين اللي ما يعيدون ..؟؟

cartier


حستتني انك متخرج من سانت هيرس

وانك اداوم في البنتاقون

والله في اماكن مدنيه دوامها العن من العسكريه بمليون مره


بالعكس (( ساند هيرست )) وليست سانت هيرس.. هي ام الراحة ، وللعلم هناك مقعدين تقريبا لدولة قطر ، واسال كم شخص تخرج منها ، ومن هالاشخاص ..

اخوي وين الاماكن اللي دوامها العن من العسكرية ..؟ وخل نعمل مقارنه ..

لا تجيب لي عسكري قاعد على مكتب وتقول لي شوف العسكرية .. لان هذا شي بديهي ان بيكون اداري ..

شوف الدفاع المدني .. اللي مع الحرايق والحوادث ..

شوف لخويا اللي مع الشغب والدوارات وغيره ..

شوف المرور ..

ومر على مراكز الشرطة يوم .. شوف شكثر المشاكل اللي تمر عليهم ..

شوف المكافحة والمداهمات اللي يسونها ..

و و و و ..

المشكلة.. ان هناك ناس حطة ريل على ريل وتحسب ان هالامور تمشي بروحها ..

واذا وقف واحد على دوار وتاخر 10 دقايق يسوي سالفة ويعلم كل ربعه وجماعته عن الزحمة على هذا الدوار وبالذات في الصيف ..

انزين ما سال نفسه عن هذا اللي (( واقف)) على الدوار اكثر من ساعتين ..؟


العقل الحر


لعساكر دايمن يبالغون انهم يكرفون وانهم كذا وكذا ... الخ

نعم فيه ناس تحك بس هم الاقليه حالهم حال المدنيين فيهم ناس تحك في مصانع وجزر خارجيه

وباقي العساكر كل واحد كرشته شكبر ورى المكتب طول يومه ويطلع الساعه 12 !!



يبالغون ..؟؟

حلوة منك .. بس اخوي .. سؤال ...

دام العسكرية حلوه جذية وبها راحة نفسية .. وفيها تكبر كروش وسعة وسادة ليش ما تدخلها ..

ترى يبون ناس ..؟؟ ودوم المجال مفتوح بعكس اللي يصير بره .. تقدم في المعرض المهني وما يوظفون حد ..

واذا الواحد ((وصل)) مصنع او جزيرة خارجية قلت عنه (( يحك)) ..
بضرب لك مثل بالعسكريين اللي يداومون بمثل دواماتهم ..

العسكري بالبحرية او خفر السواحل او المكافحة ..؟

يظهرون باليومين والثلاثة في البحر .. شتسميهم ..؟؟

هذا اللي تقول عنه بالمصنع او الجزيره .. شغله بسيط ووظيفته بس يتاكد من حسن سير العمل بالمصنع .. وراتبه اكثر من العسكري بوايد ..

لكن العسكري .. اللي تقول يبالغ ..وما بجاوب من راسي ..

كم مره قريت عن ضبط كمية مخدرات او عمليات قرصنة او تهريب على الحدود ؟

كم مره سمعت عن حريق (( هائل )) ..؟؟

شكثر تقرا عن حملات اغاثات خارج الدولة ؟؟ زلازل وفيضانات وبراكين ..؟؟

كل هذا موجود في الجرايد وبالصور !!!

اخوي انا ما اقول المدني ما يقدر على هالكلام ..

لكن الحديث مب عن الاستطاعة ... انما عن المجهود في الثنتين ..

ولو سالت اغلب المدنيين .. بيقولون (( وشحادنا على العسكرية ))

ظنك هالكلمة طلعت على الفاضي ..؟؟ وهو ((مدني)) ؟؟



shmokh


من جد وجد

ومن زرع حصد

ومن تعب في البداية ارتاح في النهاية

لو كنت تاعب على نفسك من ايام الدراسة ومكمل جامعتك كان ارتحت ولقيت الوظيفة اللي تريحك

كل وظيفة تحتاج جهد منها وظائف تحتاج جهد عقلي ومنها وظائف تحتاج جهد عضلي

اللي درس وثقف نفسه وتعب على عقلة وصار مهندس مدني او اداري او محاسب او مهندس كمبيوتر اكيد راح يلقى وظبفة تحتاج جهد عقلي بدون تعب بدني وعضلي وله دوره المهم في المجتمع

والعكس صحيح


اختي ..

تعتقدين العسكرية ما فيها مهندس او محاسب او دكتور او قانوني او غيره ..؟؟

فيها كل شي ..

واذا مشيناها على حسبتج بتصير هي مقبرة المجتمع وهي اهم مرفق في المجتمع ..

اللي هو يدعم شي اساسي فيه الا وهو (( الأمــــــــن ))

من ينظم المرور .؟

من ينظم الجنسية والسفر ؟؟

عند من تشتكين اذا حد اعتدى على شي يخصج ؟ ومن اللي بيدافع عنج ؟

من بيطفي حرايقكم ..؟

من بيحمي الدولة من السموم والمخدارات ؟

من بيحمي الدولة من السرقات والنصب ؟

من ومن ومن ومن ؟؟

ما ودج اذا صارت لج اي مشكلة يكون اللي يحلها على خبره ودراية باللي يسوية .؟ ولا تبينه يكون مخلص ثانوية بالموت ؟؟

السندان


يعطيك العافيه ياخوي

وانتوا تتكامون عن الزياده والناس قامت تحسد بعظها والى الحين مافيه شئ رسمي

واذا على كلام الجرايد والناس بتتعب .. زيادة الرواتب نسمع عنها من 4 سنين وينها

والشئ الثاني سمعنا من سنوات ان رواتب كهرماء واشغال ضاربه السما ولا حد حسدهم ليش

والاطباء والمدارس المستقله وغيرهم وكل فتره نسمع عن جهه مادري تنفذت او لا ولاكن لايعني ان العسكريين فقط اللي عليهم العين .. ياليت الناس ترضى باللي عندها وتنتظر نصيبها والحكومه ابخص

وما اعتقد فيه بيت يخلى من عسكري هذي الايام سواء رجل او امرأه واللي يحسد يايحسد اخوه او اخته

سلوط

حطيت يدك على الجرح الا وهو (( الحســــــد ))

الحين كلن صار يحسد الثاني على اللي عنده ..

ورواتب كهرماء (( كانت)) قوية ...

وتخبرون سوالف الهيئات والقرار الصادر بتصعيب الاستقالات ..

واعادة الهيئات تحت مظلة الوزارات ..

وعقبها اكثر ناس كلوها اللي بكهرماء ..

ناس طلعت بديون ..

كل هذا ليش ؟؟

سؤال اترك لكم الاجابة عليه ..


بالنهاية .. اود ان اوضح شي ..

مب كل العسكريين عايشين بتعب ..

لكن البعض منهم وهم ((الاغلبية)) يعملون الكثير لامن وسلامة البلد ..

هل نبخس هال((البعض)) مجهودهم ؟؟

تقبلوا تحياتي
wadha-qa
10-10-2010, 09:01 AM
والله تستاهلون كل خير الله يعطيكم العافيه
ما عليكم من غيركم خلاص المدنيين خذوا نصيبهم من الزياده ما لهم حق يتكلمون
بن جلبان
10-10-2010, 09:08 AM
ولا توقف لك عجوز تقولك يا شرطي تعال و لما تجيها نعم يما تقولك هاوش هلحمار ما يسوق عدل

يعني دريولهم ..


ههههههههههههههههههههههههههههههههههههههههه
مرحوم قطر
10-10-2010, 10:33 AM
cartier

اخوي مع احترامي لك بس ردك ترى تعبان

انت اتقارن كليه يتخرج منها امير بريطاني ابكليتنه

عندك خبر ان معسكر زكريت للحين خيام ؟.؟


عندك خبر ان العساكر عندنا في دوراتهم يركضون يوميا مع ال 12 كيلو

يعني مافي وجه مقارنه


بس مادري شاقول و شارد عليك





حقيقة

ماقولك لا في و وايد بس لحد يصيدهم

لاكن في عساكر في قوات مثل الحرس الاميري و لخويا و غيرهم صعب عليهم

و ممكن يزرقون بس لا ينصادون لان لو انصادو تروح عليهم عشرين صفر :omen2:



العقل الحر


الشيخ في عساكر مرتاحين بس مب الاغلبيه ترى المكروفين هم الاكثريه

و العسكري متى يرتاح لين ترفع وكيل و متى بيترفع الحسبه عندك

بالنسبه للكروش لاحظ ان اغلبية المكرشين شباب الدوريات لانهم بيت دوريه دوريه بيت

بس الي يشتغلون في جزر و مصانع معروفين انا اشتغلت في قطر للبترول

كنت في مصنع في امسعيد صراحه الشغل لا يذكر على حك العسكريه

و الي يداومون في حالول ترى مرتاحين بس الي يستاذن منها الي عنده التزامات لان يتم اسبوع

و حنى ما قلنا ان المدنيين ما يتعبون بس صدقني تعبهم ما يوصل تعب العسكري

صدقني الشيخ انا بقولك الحين عن مواقف ماتتخيلها



كنت توني مسلتم في الدوريات ركبت الدوريه مع عسكري قديم و اخر الليل صفينه عند الخيام

خذنالنا كوفي توني بشرب الى بلاغ حريق في مركز العام الجديد الي عند سوق الجبر

قطينه القهوه و دعس خباط رايحين اهناك

الشيخ وصلنا الى السوق يحترق انا مالي شغل غير اني اكتب تقرير بس جوني شباب الدفاع المدني

طلبو مساعدتي ما اقدر اقول لا تدري الشيخ وش اشتغلت يومها

اول شي اخلاء المدنيين بعد ما اخليتها سويت طوق على المكان و بعد الطوق انا بنفسي

سقت تناكر الماي لان ملابس انا بنفسي سقتهم و انا اركب فوق سيارة الدفاع المدني و اعبيها ماي

و كل العساكر الي كانو موجودين منهم من شال و منهم من حط و الله يا الشيخ ان من الساعه

12 في الليل ليييين الساعه 6 الصبح و انا ما قعدت ولا ثانيه وحده الدرجه اني يوم قعدت حسيت

ابالي في ظهري و وجها اسود من الدخنه ما تذمرت ولا قلت شي لان هذا واجب



ربعنا شباب الخفر و مساندة لخويا الشيخ اسال شيصير فيهم مع الايرانيين و كم واحد فيهم انصاب

شباب لخويا شوفهم في باكستان و اندونيسيا و الصومال و لبنان في لبنان يشوفون العلم اليهودي

يرفرف قدام عيونهم و واحد من الشباب سليطي سالفته معروفه والله يالربع هو و معاه

تكرمون الكلب و كان الكلب يشم شي تحت الامبنى متهردم حفر حفر حفر و طلع بنت عمرها 5 سنين

بعدها عايشه فيها الروح و الله يالربع ان مشى اقل من 500 متر عن المبنا الى صاروخ طايح عليه دمره

هل هذا شي بسيط في باكستان بدل ما تشيل كركوش العقال على ظهرك كانو يشيلون جثث على ظهورهم

الشباب في الموكب و المرور في عز الحر درجة الحراره توصل قريب ال50 تلاقيه يسهل الحركه

عرقانه اتصبب و وجها يصير سوبر دارك من الشمس و غيرهم وايد

تعالنا في المؤتمرات و في الفعاليات شوف ربعنا شلون يحكون و شلون يكرفون


و و و و و و و الخ الخ الخ في اشياء يعني الشيخ تنقاس بالعقل اقل شي هلاشياء الخطره مايسويها مدني


مثلا العمال الي يسوون مظاهرات و يظربون في الصناعيه


بقولك سالفه واحد من امن العاصمه كان يلحق نيبالي النيبالي انخش ورى سياره و سوى روحه متعور


يوم قربو منه العسكر مد يده حق الشرطي انه يبيه يسحبه الشرطي فطين ما عطان يده

و يطلع سلاحه و بغا يثور فيه لين ما اطلع يوم طلع حس انه قط شي من يده يوم شوف وش ورى الموتر

لقا سكين ولا سيف ذو الفقار لو ان الرجال مد يده كان قطعها له و شرد لانه يدري ان باقي العساكر بيداوون خويهم

ربعنا الي يشتبكون من الايرانيين في البحر يكون بين الحياة و الموت اي زهبه ممكن تذبحه
مرحوم قطر
10-10-2010, 10:47 AM
:pioneer:shmokh

اختي اول شي كلامج صح بس ليش مب الي من جد وجد و اشتغل في العسكريه

انا اختي ما اتذمر من العسكريه بالعكس انا احب شغلي بس قاعد ابين حق الي يقولون العساكر مدلعين

انا اختي احب شغلي و حتى لو كنت جامعي بعد بدخل العسكريه على قولتهم عاشق الشقا

بس في نقطه الشيخه لو انا و اخوج و ابوج و اخوي و عمي كلنا قلنا بندرس و بنجد و بنجتهم

و بنداوم مدنيين و ما بندخل العسكريه اختي السوؤال الي يطرح نفسه

من بيطفي الحرايق و من بيسهل الحركه و من بيكافخ عصابات الصناعيه و من بيكافخ المخدرات

و من بيكافح الايرانيين و من بيكافح و من و من و من و من و لين حجة حجايجها من اول خط



ثاني شي ترى انا ما دخلت العسكريه مجبور انا دخلت لاني انا ابي ولا انا كنت اقدر اروح كذا مكان

و المجال كان مفتوح قدامي على قولتهم ربعنا وايد بس انا اخترت هلمكان مع ان كل اخواني و ابوي

و عمامي اعترضو بس انا دخلت و يوم اني دخلت العسكريه دخلت مكان ماكنت اعرف فيه ولا واحد

حتى عمامي ققالولي تعال عندنا ولا روح عند حدى ربعنا انا عييت الي البس الدريس الي لابسه

قلت هلدريس ولا مابي

ثاني شي من قالج ان العسكريه مافيها ناس يفكرون حسستيني ان العساكر كلهم اميين

انا صحيح خريج ثنويه بس انا اعرف و تعلمت و من نفسي و في بيتنه

مثلا تخبرين التصاميم مالت اليوم الوطني انا سويت وايد منها

تشوفين المؤتمرات الي تصير في الدوله كلها انا منظم فيها


والله يا الشيخه ان مجموعه تنظيميه من الامم المتحده ارفعة يدها و استسلمت و جو طلبو منه انحل محلهم

الشيخه حنى انظم مؤتمرات و ابلاش ما ناخذ فلوس في نفس الوقت الشغل الي نسويه

ياخذونه شركات ابمبالغ خياليه اختي


ترى عندنا مهندسين و عندنا خريجيين انا ظابطي الحين بيخلص الماجستير

و عندي ظابط مهندس شبكات و عندنا وكيل عنده شهادة اوركل و و و و و و الخ الخ الخ



السندان

الحسد في كل مكان و انا اخوك

و هذا القصد من موضوعي ليه الحسد و التقليل من شان الناس


روز و ريم المدنيه

مافي مذله مافي حد يقدر يقولي سو شي خارط نطاق العمل و اذا كان بشكل اخوي اقدر ارضى او ارفض

محد يقدر يجبرني على شي خارج نطاق العمل




بن جلبان

يا رجال شفنا الاكبر من كذا خلها على ربك



باقي الاعضاء الي ما كتبت اساميهم مشكورين على المرور و ماقصرتو





اخوي دورني انا خليتك في الاخر

كفيت و وفيت و ما بعد كلامك كلام

و هذا انا ثابت لك

:pioneer:


و تحياتي للجميع
قطريه ماركه
10-10-2010, 11:13 AM
يستاهلون ( العيون الساهرة ) كل خيررررر
PLATINUM
10-10-2010, 01:29 PM
يستاهلون العساكر كل خير

ولكن

المدني ماله رب ؟

ولا مايتعب ؟

هل التعب بس في المجهود البدني ؟

اذا كان على المجهود البدني فـ عمال البناء يستاهلون اكثر

مش معقوله راتب جندي عنده اعداديه مثل راتب رئيس قسم عنده ماجستير

ترى الدوم المدني مش سهل كل يوم من سبع ونص لين ثنتين وبالبصمه
والغلطه محسوبه عليك وفيها مسؤوليه

تستاهلون الزياده ماقلنا شي تتعبون
واحنا بعد نتعب
مستثمر تحت التعليم
10-10-2010, 02:33 PM
أنا لي اسبوعين دوامي من 6 الصبح الى 4 العصر ومع ذلك أنا مستمتع بعملي ولا أحس بمذله الا عزة نفس ووالله اني يوم الخميس نهايه الدوام أنتظر الأحد بفارق الصبر والسبب بسيط اني أحب شغلي الي انا أشتغله والله على ما أقوله شهيد
مرحوم قطر
11-10-2010, 12:25 AM
اخوي بلاتينيوم

المدني له رب و رب المدني و العسكري واحد احد

بس ليه دام ان جات الزياده للعسكري زعل المدني و في الوقت الي جات للمدني ما زعل العسكري

ليه العسكري ما يتذمر وايد ؟.؟

هذي بعد اساله يبيلها اجابه




اخوي مستثمر هذا هو الي يحب دوامه ما يظره شي ولا يحسد غيره على الرزق
زقرتي ومزاجي
11-10-2010, 12:30 AM
ياجماعه لين الحين مافي شي رسمي
الصريحه
11-10-2010, 08:23 AM
الله يرحم الوالد
كان يقول العسكريه تربي الرجال
معاه حق
لكم كل الحق
@السفير@
11-10-2010, 10:29 AM
اخوي بلاتينيوم

المدني له رب و رب المدني و العسكري واحد احد

بس ليه دام ان جات الزياده للعسكري زعل المدني و في الوقت الي جات للمدني ما زعل العسكري

ليه العسكري ما يتذمر وايد ؟.؟

هذي بعد اساله يبيلها اجابه




اخوي مستثمر هذا هو الي يحب دوامه ما يظره شي ولا يحسد غيره على الرزق

تدري ليش مازعل العسكري بعد زيادة المدني لأنه حتى بعد لزياده ماوصل راتب العسكري
الغالي!
11-10-2010, 11:32 AM
تستاهلون والله كفايه انكم الحره منوعه عنكم والله تستاهلون