ابي حل .. !! استشارة ..!! نصيحه اي شي يفيدني :(

[أم المها]

ابي حل 
بنتي عمرها سنتين ونص وعنيده وصايره عدائية وتمشي وتعضض وتضرب كل اللي قدامها صغير وكبير حتى الخدامه ماسلمت منها تارستها عضات ههه من ربيت في بنتي الثانيه وهي حالها كذا في اول شهرين كانت عادي بس لما داومت حسيت ان في غيره على حب بس مو عارفه هي شتفكر فيه مرات تبوس وتحضن أختها بطريقه تخنق ومرات تعضها وتضربها .. مع أني مهتمه فيها هي الكبيره اكثر من الصغيره وبصراحه ماعرف وش اسوي مع عنادها .. هو أبوي مدلعها واجد بس ماصارت كذا الا لما بنتي الصغيره كبرت

والمشكله الحين هي تعرف تفتح الباب والقفل والخدامه مع أني منبهه عليها انها تشيل المفتاح الا انها مرات تنسى وآخر مره نست فيها الباب مفتوح طلعت بنتي عالساعه 2 الفجر فرمضان وضاعت.. وبصراحة الخدم اللي عندي يحبونها بس مايعرفون يتعاملون معها وانا ما آلومهم لأني أنا امها ومحتاره فيها

حركيه وعدائية وعنيده ومزاجيه ...!؟

شلون أتعامل معاها ابي حل يا اهل الخبرة*

[وارث العز]

الله يخليها لج ، الاخوان بفيدونج

[ريم الشمال]

الله يخليها لج
بعطيج طريقه يمكن طويله وتحتاج نفس طويل .... بس نتائجها حلوه
لما تنام انتي نوميها وقصي عليها قصص من مواقف هي انتي تلاحظينها تسويها في النهار
وتبين عليها القصه ... وكل شوي تطلبين رائيها في التصرف الي تقوم به البنت في القصه
بهذي الطريقه تكسبين امرين او اكثر : -
1 - تقومين سلوكها .
2 - تستطلعين الذي يضايقها من خلال اجباتها.
والكثير من الامور ... جربي التجربه خير برهان .
ريم الشمال

[سيف العشق]

ام المها

اول شي الله يخليها ويخلي اختها

استخدمي معها اسلوب الثواب والعقاب بمعنى قولي لها اذا سويتي كذا راح احرمك من كذا

واذا كنتي زينه مع اختك راح اشتري لك كذا .

وتفهمينها انها الغاليه وان هذي اختها واذا هي ماخذت بالها منها يمكن تروح عند ناس غيرنا

بعدين مايصير عندك اخت وتفهمينها ان اختها الصغيره تحبها واااااجد

يعني انتي جربي معها نوعية معينه من الطرق مشابهه للي قلت لك

[3aba681]

حبيبتي في رميله في قسم خاص للاطفال .. للسلوك .. والنطق .. والنشاط الزايد ... ليش ماتودينها ويشوفها دكتور وهالجلسات وايد جيده .. انا اعرف وحده ودت بنتها ووايد استفادت بنتها صارت اهدى بوايد ..

[نااااني]

انا بعد نفس مشكلتج بنتي عمرها سنتين وشي وعدائيه ومزاجيه لابعد الحدود وعنيده مع ان ما عندي احد اصغر منها عندي اختها الكبيره خمس سنوات بس هذي عنيده...الله يخليهم لنا..........واذا ما خذت اللي تبيه تصيح لين يقطع النفس معها وانا اخاف من ها الشي........

[QtrGate]

انصحج في الاستشارات العائلية او مستشفى الرميله قسم الاطفال

هي الاماكن التي هيئتها الدولة لحل هذه المشاكل

وراح يعطونج تعليمات

وهم المتخصصين

[شيط ويط]

يمكن هالإجابة تفيدج لقيتها في الانترنت :


فإن الطفل في هذا العمر لا يستوعب كل شيء، وهذه التصرفات التي تصدر من هذه الابنة – حفظها الله – هي تصرفات طبيعية لدرجة كبيرة، وتصرف الطفلة ناتج عن نوع من الاحتجاج أو للبحث عن مزيد من العطف وشد الانتباه، فربما تكونين قد عودتها على نمط معين من الرعاية والعناية والدلال الزائد، وكثير من الأمهات يكون لديهنَّ نوع من الالتصاق الشعوري أو اللاشعوري بأطفالهنَّ، فهذا يقضي حاجة الأم العاطفية وفي نفس الوقت حاجة الطفل العاطفية، ومثل هذا التقرب الشديد والالتصاق الشديد لا شك أنه يجعل الطفل لا يتحمل أي خلل أو أي نوع من الابتعاد، فالطفل الذي تقربه أكثر يبحث عن المزيد، ويعتقد أن هناك نوعا من التقرب أفضل من الذي يُمنح له أو يُعطى له.

فهذه الطفلة غالبًا ما تكون محتجة على ذهابك إلى العمل، وربما يكون هو السبب؛ لأنها كانت تقضي معك أوقاتا أكثر، ولكن بعد ذلك أصبحت تفتقد هذه الأوقات، فهي باحثة عن مزيد من العناية، ولكني أنصحك بتجاهل هذه التصرفات التي تصدر منها، فالعلاج بالتجاهل هو الأساس لعلاج مثل هذه الحالات، مع التحفيز والتشجيع في حدود ما هو معقول وفي حدود ما تستوعبه الطفلة.

وأؤكد لك أن ابنتك لا تعاني من التوحد - ولله الحمد - وهي تتفاعل معك حتى وإن رفضت، فهذا نوع من التفاعل، والطفل التوحدي لا يتفاعل أبدًا، فأرى أن الأمر هو مجرد احتجاج وليس أكثر من ذلك.

ويجب تشجيع وتحفيز الطفلة في حدود المعقول، ولا بد أيضًا أن يتاح لها – بالرغم من صغر سنها إلا أنها بعد أن تبلغ السنتين يفضل أن يتاح لها – فرصة الاندماج مع بقية الأطفال إذا كان ذلك ممكنًا.

أنت لم توضحي نوعية الرعاية والعناية التي تجدها الطفلة حينما تكوني أنت في العمل، فهذا أيضًا أمر يجب أن لا نتجاهله، ولا أريد أن أرمي كلمات جزافًا أو أن أتهم أحدا بالنقص أو الخلل في التربية، ولكن أرجو أن تحتمي على الشخص الذي يقوم برعاية ابنتك في غيابك أن تكون هناك مسافة بينه وبينها، بمعنى أن لا تقرب التقرب الشديد، فلا بد أن يكون هناك نوع من البعد الجغرافي البسيط في أثناء اليوم ما بين الطفلة وما بين الشخص الذي يقوم برعايتها، فهذا مهم وضروري.

ولا بد أن يكون نمط المعاملة متناسقا، بمعنى أن الطريقة التي تتعاملين أنت بها يجب أن يعاملها الشخص الذي يقوم مقامك في وقت غيابك، وعليك أيضا أن تستفيدي من الألعاب، فهناك بعض الألعاب مفيدة للأطفال، وتحمل صفات وفوائد تعليمية كبيرة، هذا النوع من الألعاب تمتص غضب الطفل ويشد انتباهه، فأرجو أن تركزي على هذا.


وبالله التوفيق.

المجيب: د. محمد عبد العليم

منقوول

[فيزيائية]

اكسرت خاطري ...
هي ماتفهم اللي يصير بس اللي تسويه رد فعل
خلوا كل اهتمامكم لها وقولي للشغالات نفس الكلام
حتى اللعب والضحك كله لها ...
بس شسالفة انها تفتح وتطلع ؟؟شيلوا المفاتيح عنها..
والافضل لاتتركونها والخدم بروحها ...
الله يحفظها

[أبورودي]

اهلا وسهلا اختى الكريمه
مع احترامي لكل الردود
اليك الرد العلمى
اولا البنت عمرها سنتين ونصف العقاب النفسي والبدنى غير فعال معها لصغر سنها
لذلك انت فى حاجه الى أخصائي نفسي ليقوم بمساعدتك على عمليه تعديل السلوك
وسيطلب منك فى الاول ملاحظه سلوك الابنه وتسجيل بينات لمعرفه سبب السلوك
وسيضع لك خطه سلوكيه وسيدربك عليها انت والخدم ووالدها
وسيلجا الى اسلوب المكافاه فى حاله السلوك المقبول وليس العقاب
بمعني اذا عملت سلوك غير مقبول لن تكافئ
اما اذا قدمت سلوك مقبول يتم مكافئتها فورا
لذلك
عليك بطلب استشاره لاخصائي نفسي (ليس طبيب نفسي هناك فرق بين الاثنيين )
يمكنك اللجوء لمركز الاستشارات العائليه او الشفلح قد يساعدونك ان شاء الله

[هند88]

شكل البنت فيها طاقه بما انج تقولين انها حركيه..
ليش ماتدخلينها روضه ..منها تفرغ طاقتها ومنها تتعلم وتلعب

وبعد اايد نظرية الثواب والعقاب ..


بمعني اذا عملت سلوك غير مقبول لن تكافئ
اما اذا قدمت سلوك مقبول يتم مكافئتها فورا
بس حاسبي تتبعينها وماتكملينها وتوقعي كل انواع الصياح والصراخه .. لانها بتحاول تتمرد عليج في البدايه.. وتحملي تقارينها مع اي احد من الاطفال الي حولها..وحاولي تفهمينها الي تبينه عن طريق القصص لانها حرام توها صغيرة
الله يخليهم لج يارب

[الصريحه]

البنت غيرانه عطيها اهتمام وعطيها هديه وقولي لها هذي من اختها الصغيره
وبعدين البيت انتي سكري الباب لاتعتمدين على خدم الدنيا مافيها امان
والمفاتيح دقي لها مسمار قرب الباب وعلقيها فوق كلش علشام مايكون عذر للخدامه لو تبي المفاتيح طبعا الا المفاتيح الخارجيه
وانتبهي بعض هالحركات تكون من الحدم في غيابج يخلون البنيه تغير من اختها وتسوي مشاكل علشان تضربينها لانهم منقهرين منها لما تعظهم
ولاتخلينها تعظهم وخليها تعطيهم هدايا
وكافئيها على كل انجاز تسويه
والله يعينا وياج على التربيه

[darkuae]

في طريقه علميه ويبيلها صبر منك:

يوميا لمده 21 يوم قبل لا تنام اقعدي عتدها واول ما تحسين انها بتنام قوليلها كلمات ايجابية انتي تبينها. مثلا:
انتي شاطره ، تسمعين الكلام ، تحبينا ، تحبين اختك .......... بمدة ثلاث دقايق (انتي فهالوقت راح تخاطبين عقلها الباطن)
بس تحملييييييي تقولين لها كلمات سابية مثلا: انتي مب عنيده ، انتي من مشاغبه ، انتي ما تعضين ......

والطريقه الثاتية انتي تقولين إنك تهتمين فيها أكثر من اختها: إيش نوع الاهتمام؟ ممكن توضحين أكثر؟

[qrt_trading]

دخليها الحضانة وهي بتلها فيها وبتشوفين مع الوقت إنها بتهدى إشوي شوي والله يعينج عليها إن شاء الله.

أنا دخلت ولدي وعمرة سنة ونص ولاحظت عليه إن إبتدء يهدى مع الوقت لين الحين عبثي شوي ولكن الحمد لله صار أحسن والحين إن شاء الله بكمل 3 سنوات وهو معاهم.

[أم المها]

تسلموون على الردود جميع وبحاول ان شاء الله اطبق عليها نصايحكم

[Armani77]

الله يعينج يارب

[احمد1]

السلام عليكم بسرد تجربتي باختصار كنت رايح المستشفى لان الحمدلله رزقني الله ببنت حلوه الله يحفظها ومودي ولدي معاي الي عمره 3 سنوات تقريبا وانه رايح مريت السوبر ماركت وشريت حلويات وكوافي ويوم وصلنا المستشفى خشيناها وقلنا له البيبي جاب لك هديه وصدق ومن ذاك اليوم يحبها من قلبه واي شيء نجيبه لها نجيبه له وحتى في الدلع نفس الشيء....وشكرا

[رنج سبورت]

تصرف طبيعي للفت الانتباه

بما انها الكبيره والمولوده الجديده للحين ماتفهم معنى الغيره

زيدي اهتمامج لها ومثل ماقالوا البعض طبقي مبدا الثواب والعقاب وامسكي العصا من النص

بمعنى اذا عضت حد امسكيها وعضيها على خفيف :) عشان تعرف ان العضه مب شي سهل

واذا ضربت حد اضربيها ضرب خفيف غير مبرح على يدها

وبالمقابل لاتقصرون معاها في الاهتمام واهم شي تحسسينها بوجودها لان في هالمرحله تبي تحس بعاطفة الام وحنانها

والله يحفظها لكم

[شبح الصمت]

الله يحفظهم لج

بتتعبين ما تقدرين تحكمين في الطفل في هالسن

خليها على راحتها ترى الطفل في هالسن يتحرك ويلعب ماشاء الله لانه فيه طاقة وعدوانيتها يمكن لانها تشوفج تشيلين اختها لازم تغار في اطفال شوفي نصيحه

روحي اشتري لها لعبة وروحي قولي لها هذه هدية من اختج النونو وخليها يمها وخليها تروح تاخذها وتبوسها عشان تحبها وما تقرب صوبها

ومن ناحية انها عدائية عادي اختي مع الايام راح تخف

الخير عندج وعندنا

الله يحفظهم لنا ويحفظ لكم عيالكم يارب

[latty]

انصحج في الاستشارات العائلية او مستشفى الرميله قسم الاطفال

هي الاماكن التي هيئتها الدولة لحل هذه المشاكل

وراح يعطونج تعليمات

وهم المتخصصين

الاستشارات العائليه حتى لمشاكل طلاب المرحله الاولى واللي يرفضون الدراسه

صدقيني راح ترتاحين

وفيه طبيبه اسمها صفيه خلف قلامور بعد واجد زينه

[المقهوره]

انا بعد نفس مشكلتج بنتي عمرها سنتين وشي وعدائيه ومزاجيه لابعد الحدود وعنيده مع ان ما عندي احد اصغر منها عندي اختها الكبيره خمس سنوات بس هذي عنيده...الله يخليهم لنا..........واذا ما خذت اللي تبيه تصيح لين يقطع النفس معها وانا اخاف من ها الشي........

قطع النفس والتشنج لدرجه ان شفايفه تصير زرقاء عند اخوي نفس الحاله

ولده الوحيد دلووووووووووووووووووووووووووووووع مخربينه بالدلع الماصخ من قبل الام طبعا

اذا طلب شي وماجاه الشي يقعد يبكي ويطيح ويصير ازرق


وخافوا عليه وانا اقول لهم ترى هالولد مافيه إلا الراس اليابسه

ودوه مستشفى حمد وسوا له فحوصات وتخطيط على المخ
وقالوا مافيه شي ابداااااااااااااااااااااااااااااااا


إلا الدلع ابنكم بيدلع عليكم == كلام الدكتور



وفعلا قام ابوه بموقف حازم معه ورفض الدلع الماصخ الي تدله امه

وكل ما طلب شي ولا جاه ولا اخذت من يده شي وسوا حركه التشنج

نخليه يطيح يتشنج ومن نفسه يصحى اذا سكت وعقب يقعد يلوم امه ليش ماقمتي وشليتيني

شوفوا لاي درجه ذكي


حركاااااااااااااااااااااااااااات عندهم هاليهال


والحين لا تشنج ولا مايحزنون يبكي ويسكت هههههههههههههههه راح الدلع



والثاني من اخواني بنته يمه منها يمه دلوعه ويوم جات اختها ناشبه فيها نشبه الا تضربها ولا تنام معهم

وعقب اقعدت الام تقعد الصغيره في حظن الكبيره وتقول يله انتي اختها بوسيها ووكليها

وانفعت معها وماشي معها عسل واذا عانت يمشي معها موضوع الحرمان من الطلعات او الكافي والشيبس.


واذا راحت الجمعيه وشرت بالونه
تقول اشتري لفلانه

تروح تركض تشتري لاختها وتعودت على هالشي وانتهت الغيره الي جننتها بها

بس ما ننكر انها ساعات تعضها ههههههههههه
واذا سألتها ليش تعضين اختك
تقول احبها

[بوراشد82]

وديها لأم محمد تقرا عليها .......

[حسن]

المشكله انك حاذفته على الخدامات

[المقهوره]

السلام عليكم بسرد تجربتي باختصار كنت رايح المستشفى لان الحمدلله رزقني الله ببنت حلوه الله يحفظها ومودي ولدي معاي الي عمره 3 سنوات تقريبا وانه رايح مريت السوبر ماركت وشريت حلويات وكوافي ويوم وصلنا المستشفى خشيناها وقلنا له البيبي جاب لك هديه وصدق ومن ذاك اليوم يحبها من قلبه واي شيء نجيبه لها نجيبه له وحتى في الدلع نفس الشيء....وشكرا

انا الي اشوفه

لو كان الطفل الاول ولد وعقبها بنت يهتم فيها اهتمام غريب سبحان اللهبس المصيبه اكثر شي لو الجنسين نفس الشي

يعني جات بنت وعقبها بنت يالهوووووووووووي بالي يصير

او ولد وعقبه ولد نفس الشي مصايب

[Bozizoo]

الله يحفظ بناتنا