المجمعات التجاريه في تايلند

[مزعله النساء]

السلام عليكم ورحمه الله وبركاته

حابه استفسر عن المجمعات التجاريه في بانكوك ؟

وسال عن الجزر محتار بين بوكيت وكوساموي لمده يومين بس

وشرايكم بالفورسيزون في كوه ساموي

وشكرا

[هدهد سليمان]

افضل كا سموي ( كا يعني جزيره ) سموي جزيرة رائعه .. بالنسبه للشراء ما انصحك تشترين من هناك .. الاحسن من بانكوك ارخص بواجد .. وفي هالايام الدولار يطلع فوق .. المجمعات كثيره اختي في بانكوك لا تروحين نانا وهالطخه لأن الاسعار دبل .. روحي باتونام حي كامل فيه اللي تبينه .. وتقدرين تفاصلين بالسعر اما المجمعات اسعار محدده ! وهي نفس اللي برع .. في اماكن ممكن ادليك عليها لكن اخاف تضيعين عقبها تدعين علي :) .. على كل اذا بغيتي بالجمله عندك بوبي ماركت مجمع كبير ومقسم ثلاث اقسام .. الاول حق الأطفال الثاني حق النساء الثالث حق الشباب والشياب لكن بالدرزن .. عندك تشاكو تشاك ( سوق السبت والأحد ) بعد ارخص من باتونام بس تاخذين القطار الكهربائي ما يعادل خمس او عشر ريال رايح راد او بالأصح على حسب المكان اللي تطلعين منه .. هذا بشكل عشوائي وان شاء الله اذا تذكرت شي ارد مره ثانيه واكتب .. موفقين ان شاء الله

[بوعبدالله100]

انا انصح بمجمع ان بي كي صراحه روعه وكل يوم بضاعه يديده

[فارس قطر333]

بصراحه بوكت جزيره حلوه وهاديه

وبالنسبه للمجمعات في ام بي كي وسيام لاغون

[التيما]

وانتي تتمشين بتشوفين مجمعات واااايد وفي مجمع صراحة مايحضرني اسمه صعب شوي بس فيه سفاري فوق في آخر دور .. وفي مجمع ثاني فيه حوض أسماك نفس اللي في دبي أرضي .. واااااااايد مجمعات في بانكوك ..

[Ginger]

المجمعات المشهوره في بانكوك

مجمع سنترال - تحت مكياج ماركات وملابس ونعل وكل ما صعدتي فوق كل ماحصلتي اكثر مثل الملابس والجواتي الله يعزكم والاثاث وملابس الاطفال وكلشي - ولا تنسون تاخذون الفات فري الي هي الضريبه ولازم تسوونها في نفس اليوم فوق في نفس المجمع

مجمع ام بي كي - نوعا ما تقليدي يعني بتحصلين التيشرتات التقليد اهناك وجواتي رياضه رخيصه وشنط التقليد جميع الانواع وفي محلات نظارات وفيه الاكسسوارات بجميع انواعها والتقليد . الطابق الثاني خاص بالجوالات والكفرات بجميع انواعها

جمب ام بي كي بالضبط مجمع طوكيو وتدخلون له من داخل مجمع ام بي كي - الطابق الاول مكياج وجواتي وبعض الشنط والاكسسوارات والطابق الثاني ملابس


من المجمعات الراقيه والضخمه واللي فيها الماركات العالميه بجميع انواعها مجمع سيام براغون
هو مجمع كبير وتقريبا اكبر مجمع في تايلند فيه كل الماركات شانيل ديور هيرمز غوتشي فيرساتشي اف سان لوران مارك جاكوبس سلفاتور فيراغامو ارماني تودز .. اغلب الماركات ماعدا لوي فيتون موجود في مجمع الامبوريوم احذا سيام براغون ... الطابق الارضي كله مطاعم والطابق الاخير كله مكتبات روعه للاطفال
وفي هالمجمع بعد اكواريوم ( احواض السمك ) تاخذون تذكره وتدخلون ولا تفوتونه وايد حلو

ماعليج اختي الا انج اذا دخلتي سيام تاخذين الكتيب الي فيه كلشي عن المجمع مكتوب فيه كل المحلات وكل المطاعم ووين بالضبط .. ولا تنسون تاخذون بطاقة الخصم للسياح لما تشترين من اي محل بيعطونج اياها

وفي مجمع امبوريم بعد هذا فيه ماركات عالميه مثل لوي فيتون ودي كي ان واي وغيرهم

واذكرج لاتنسين الفات فري لازم تسوونه في نفس اليوم وفي نفس المجمع

في وايد مجمعات بس هذيلا احسنهم واختصارا للوقت

ودعواتج الطيبه

[مزعله النساء]

مرحبا

اشكر الجميع على المشاركه والمساعده والصراحه الواحد مايلحق على هالمجمعات

واحلاهم سيام براغون روعه من المطاعم والمقاهي والملابس والاحذيه

والله ماعرف شوصف واقول


في امان الله

[yousef545]

كسموي حاسبو بس لحد ايروح في المون بارتي ولا في هاف مون بارتي هههههههههههههههه

بوكيت هاديه و حلوه بس كسموي اصغر و هاديه اكثر و كله اجانب و بالذات الاسرائيلين بكثره اهناك

و بالنسبه للأسواق البات بونق في بنكوك اسعاره زينه و في محلات ورى البارات على اليسار ايبيع

شنط نسائيه تقليد درجه اولى ارخص من فريده علي بوايد