ليش المدرس القطري او المدرسه القطريه مايعطون دروس خصوصيه

[باسورد]

ليش المدرس القطري او المدرسه القطريه مايعطون دروس خصوصيه

ماشالله اخوانا المدرسين العرب اللي يعطون دروس خصوصيه بعضهم

يدخل بالشهر ٥٠ او ٦٠ الف وبعضهم مستقيل من المدرسه ومكتفي

بالدروس الخصوصيه.

[toomi9]

لان الاجانب جاين يشتغلون
متغربين فـ يبون زيادة دخل
لانهم يطرشون حق اهاليهم برا وكل شي بفلوس هني لهم
مثلا الكهربا والماي والسكن مش نفس القطرين
وفوق هاي
يحبون يدخلون عيالهم اقوى المدارس وخاصه،، والخاصه يبي لها قرقش مب ببلاش

[خليفـة]

لان شايفين خير طال عمرك
معروف ان المدرس الخصوصي مذلول عند الطالب وماله كرامة

لاحد يقول لي ان المدرس الخصوصي بيشرح شرح مختلف في البيت للطالب
بيعطيه الأسألة المهمه الداخله بالامتحان
مقابل مبلغ مالي مُتفق عليه بين الطرفين

القطري والقطرية طال عمرك نفوسهم عزيزة ومايرضون على انفسهم هالشي

تحياتي لكل مدرس له كرامة

:)

[باسورد]

لان الاجانب جاين يشتغلون
متغربين فـ يبون زيادة دخل
لانهم يطرشون حق اهاليهم برا وكل شي بفلوس هني لهم
مثلا الكهربا والماي والسكن مش نفس القطرين
وفوق هاي
يحبون يدخلون عيالهم اقوى المدارس وخاصه،، والخاصه يبي لها قرقش مب ببلاش


عفوا اختي انا ماقصدت شي الله يرزقهم انا قصدي ليش المدرس القطري

مايدرس خصوصي ويكون له دخل ثاني مافيها شي

[باسورد]

لان شايفين خير طال عمرك
معروف ان المدرس الخصوصي مذلول عند الطالب وماله كرامة

لاحد يقول لي ان المدرس الخصوصي بيشرح شرح مختلف في البيت للطالب
بيعطيه الأسألة المهمه الداخله بالامتحان
مقابل مبلغ مالي مُتفق عليه بين الطرفين

القطري والقطرية طال عمرك نفوسهم عزيزة ومايرضون على انفسهم هالشي

تحياتي لكل مدرس له كرامة

:)

ياليت نخلي عنا المثاليات الانسان كرامته محفوظه والشغله عاديه

يحط له غرفه برا البيت او المجلس يجمع الطلاب ويدرسهم مقابل

مبلغ مالي وبالطريقه هذي يفيد ويستفيد

[الحريّه]

محّد يوّدَه ! خلّه يدرس !
التدريس الخاص ليس بدعة أو أمراً مقتصراً على غير القطريين ! كما أنه ليس عيباً أو عاراً أن يقوم القطري أو غير القطري بالتدريس الخاص .
وإذا نظرنا إلى الدروس الخصوصية على أنها دعمٌ أكاديمي , ربما تخلصنا من هذا الإرث الذي يعيبه البعض هنا . فمن يجد لديه الكفاءة لإعطاء طالب ما , دعماً في مادة يحتاج إلى المساعدة فيها , لماذا لا يتقدم إليه بِيَدِ العون سواء طلب على المساعدة أجراً أو لم يطلب .
تحياتي

[وهم قطر]

عيب ماعندنا بنات يدرسون خصوصي :anger1:


اصلا ماعندها وقت بعد المدرسه في التزامات وواجبات كثير عليها

وين زياره الاقارب وين روحتها للمجمعات واواوا الخ

الاجانب كله في البيت واجازه الاسبوع رحله عائليه حديقه البدع

[لمعة الالماس]

لان القطريات او القطري عنده التزامات ثانية

والحياة مب كلها شغل

في حياة اجتماعية وعلاقات وراحة

وغير الابناء والاسرة كل شي له حق

وانا اشوف غلط الواحد يتم طول وقته شغل في شغل

والحمد لله على النعمة

[خزامئ]

اللة ايتم نعمه علينا

[كورديليا]

لان شايفين خير طال عمرك
معروف ان المدرس الخصوصي مذلول عند الطالب وماله كرامة

لاحد يقول لي ان المدرس الخصوصي بيشرح شرح مختلف في البيت للطالب
بيعطيه الأسألة المهمه الداخله بالامتحان
مقابل مبلغ مالي مُتفق عليه بين الطرفين

القطري والقطرية طال عمرك نفوسهم عزيزة ومايرضون على انفسهم هالشي

تحياتي لكل مدرس له كرامة

:)

الحين المدرس الخصوص سار ماعنده كرامه ومذلول:eek5:

حرام عليك:eek5:
اصلا المدرس القطري لو فكر يدرس خصوصي مابكون عنده طلاب وايد لانه بايخذ عليه مبلغ وقدره:rolleyes2:

[فكرهـ]

الشغل مب عيب والبحث عن مصدر دخل اضافي امر مشروع للجميع
لكن الاشكالية في نظرة البعض للمدرس الخصوصي بما انه يجي بيتنا وياخذ فلوس فكاننا شارينه بفلوسنا وكاسرين عينه ، وعلشان اكون موضوعية هـ النظره سببها فئة من المدرسين اللي يمشون الدرس اي كلام فالمدرسة ولين راح البيت طلع الشرح العدل والاسئلة الاضافية وخلوا الطالب يتوهم انه ماراح ينجح لو ماجابوه بيتهم ..
سالفة أن القطري أو القطرية يعطون دروس خصوصية ما اعتقد بتكون فكره مقبولة في ظل المعطيات السابقة .. :omen2:

[التيما]

لان المدرس والمدرسة القطري يعطي بذمة وضمير وبأمانة للطلاب فما يحتاجون الطللاب دروس خصوصية عكس أخوانا العرب ما يعطي كل شي ويتعمد مرات مايفهم الطلاب الدروس عشان يطلبونه دروس خصوصي .. عن نفسي احن على طالباتي وحده تقولي ابله عيدي مسألة يبطون جبدي يقولون لي فاهمين يا ابلة .. اقولهم بعيد مره و2 و3 يقولون لي لا والله فاهمين .. والحمد لله سنوات خبرتي الطويلة من أيام الوزارة ماصادف عندي رسوب الا مره وحدة وطالبة وحده كان عليها دور ثاني ونجحت ..

[شيط ويط]

يمكن المسألة مسألة ثقافه مجتمع
أو عندهم عزة نفس

[بـــــــنت النوخـّــــذه]

ليش المدرس القطري او المدرسه القطريه مايعطون دروس خصوصيه

ماشالله اخوانا المدرسين العرب اللي يعطون دروس خصوصيه بعضهم

يدخل بالشهر ٥٠ او ٦٠ الف وبعضهم مستقيل من المدرسه ومكتفي

بالدروس الخصوصيه.

يعني مثلا" المدرسة القطريه بعد الظهر اتروح ادور من بيت لي بيت ادرس خلق الله 000


والله تبغي الصج انا ضد الدروس الخصوصيه محد مخرب الطلاب والطالبات الا هالمدرسين الخصوصيين يجلس الطالب طول الحصه مفهي:rolleyes2: لانه معتمد على المدرس الخصوصي 000 شفايده المبلغ الي بتجنيه من وراء الدروس الخصوصيه والجيل فاشل معتمد على التلقين والحفظ ينتظر من يحشي مخه بالكلام :omen2:
للاسف اغلب الردود ركزو على جانب هامشي واتناسو اهم نقطه ^____________^


كنت اتمنى موضوعك يكون عنوانه:

معا" للقضاء على ظاهره الدروس الخصوصيه اههههههه :nice:

[سري جدا]

لا حول ولا قوة الا بالله اشلون المدرس الخصوص يطلع 50 او 60 الف بالشهر
نظرا لكون معظم ربعي مدرسين اللي اعرفه من كلامهم ساعة الدرس الخاص 100 او 150 ريال
\بحسبة بسيطة المدرس لو بيشتغل في مدرسة بيخلص الساعة 2 لو كان فلته زمانه في المدارس المستقلة
ويشتغل من 3 الي 12 كل يوم طبعا اكيد في وقت للتنقلات يعني تكون مدة التدريس 5 ساعات يوميا = 5 * 150 = 750

في الشهر = 750 * 30 = 22500
بالاضافة راتب شهري نقول 12 الف

الاجمالي 34 الف لو كان بشتغل من 6 صباحا الي 12 مساء يوميا ولمدة شهر وطبعا هذا مستحيل

بعدين ليش كل المدرسين ما يعطون دروس او القطريين بالذات لانه التدريس من اصعب مهام الحياة
ومرات تصيب الانسان بالقهر والتعقيدات النفسية من الطلاب ومرات من طريقة التدريس نفسها

انا عن نفسي واعرف الكثيير غيري لا احب التدريس الخاص ابدا حتى لو هاخذ الحسبة المذكوره اعلاة
لاني كل انسان له طباع وطاقة بشرية وكما له القدرة في توصيل المعلومة للاخرين بدون ان يحدث له شي

هههههههههههههههههههههههههههه
وسلامتكم

[نتفـه]

خل يخلصون شغل المستقلات اللي ما يخلص وعقب يفكرون بنشاطات اخرى مثل التدريس الخصوصي !!
الله يعينهم بس ,,

[ummalaz]

لان شايفين خير طال عمرك
معروف ان المدرس الخصوصي مذلول عند الطالب وماله كرامة

لاحد يقول لي ان المدرس الخصوصي بيشرح شرح مختلف في البيت للطالب
بيعطيه الأسألة المهمه الداخله بالامتحان
مقابل مبلغ مالي مُتفق عليه بين الطرفين

القطري والقطرية طال عمرك نفوسهم عزيزة ومايرضون على انفسهم هالشي

تحياتي لكل مدرس له كرامة

:)

المدرس سواء كان في مدرسه او يشتغل خصوصي عمروا ماكان مهان او مذلول مثل ماتفضلت الا اذا كان الشخص الذي تدرس عياله غير متعلم او مثل مانسميه فاقد تربوي
كل همه وتفكيره ان الغير يأخذون فلوسه بدون التفكير في ماذا قدموا لاولاده مقابل هذا الفلوس

[بوحارب]

القطري والقطرية متفرغ حق اعياله اكثر

وماظن له خاطر في عوار الراس

والقناعه كنز

بس لو انه مدرس مستعد اعطي دروس خصوصية في الفصحى دام السالفة فيها 50 الف هههههههههه

[^امـ نواري^]

الحين موضة
انك انت تودي عيالك للمدرس الخصوصي في بيتهم ..
مب هم اللي يلفون على عيالكم في بيوتكم ..


المدرس القطري شايف خير !! صحيح هالمقولة
بس لما نترك التدريس في مدارسنا لغير القطرييين
ونترك حتى التدريس الخاص للي بالفعل محتاج له لغير القطريين
شلون بيتعلمون عيالنا وشلون بينجحون ومن بيدرس عيالنا !!!


و مو عيب او غلط ان المدرس القطري في حالات خاصة وشروط محدده انه يدرس خصوصي ..
الافكار والعقول تنورت وتغيرت والحاجات تختلف من شخص للثاني
حتى المشاريع الصغيره ممكن تبداها من البيت

انا ايام الامتحانات ادرس عيالي وعيال خواتي وعيال اخوي وحتى بنات الجيران مرات مع بنتي
بس ما آخذ عليهم شي .....

أما فكرة اني ادرس عيال خلق الله .....
ممكن التفكير بالموضوع ليش لا
بس بيكون عندي شروط :
الاول انهم يجوني البيت
والاوقات انا احددها ساعة بس وايام الامتحانات ساعتين
ومرتين بالاسبوع
وهناك مبلغ وقدره ....
والتدريس للطلاب القطريين .. ممكن افتح المجال لابناء مجلس التعاون !
واللي نسبته قليلة او راسب ماراح ادرسة ولا اتعب معاه .. :)
..

(( مشروع قيد الدراسة عقب ماشفنا البهدلة في المجلس الاعلى والمستقلات ))

ولحد يقول وايد هالساعة بتمر مثل الهواء
يعني ساعة ومو كل يوم وبعد ترتيب الوقت والبيت و بدال مجابل هالنت او هالمسلسلات او التفرفر بالمجمعات مافيها شي
ونفيد عيالنا بدال مانقطهم على الاجانب .. كفاية وجودهم بالمدارس والله العالم شلون يدرسون عيالنا
هو اصلا شغل المدرسة مايخلص حتى لو رجعنا البيت نقعد نصحح ونحضر ونرتب الاوراق ونروح نتشرى لوزامنا وهدايانا وووو .... احسبو انتو كم ساعة


وبالاخير..
المفروض مانعود طلابنا على الدروس الخصوصيه ولا نشجعهم عليها ولا تصير موضه بين الطلاب وحتى اولياء الامور..
بس
اللي قاعدين نشوفه غير سواء من استهتار ابنائنا بالدراسة وبجديتها ا او من فشل الاجانب في توصيل المعلومة لهم

والله المستعان

[ريم الشمال]

التدريس الخصوصي يحتاج التزام بالوقت والكثيرمن القطريات لديهم التزامات منزليه واسرية او حتى انها لو لم تكن متزوجه هي تحتاج ان ترتاح ولا تزيد التزاماتها
ممكن مع الوقت مع كثرة المبندين ان تجدي من تدرس خصوصي ليش لا

ريم الشمال

[رجل مثالي]

أنا من نظرتي الخاصه لا أرى أية مشكله بأن يقوم القطري أو القطريه بالتدريس الخاص اذا كانت عليهم ألتزامات ماليه مثل أقساط البنوك أو غير ذلك من التزامات أو لتحسين دخله بسبب ظروف الحياة والاسره والعيال فلا مانع من التدريس الخاص أفضل من أن يطلب من الاخرين المساعده وشكرا

[ضوى]

لو عنده وقت خليه يدرس خصوصي وين المشكلة ، انا ضد الدروس الخصوصية الا في الحالات الملحة كجزء غير مفهوم او نقطة مبهمة ولم يتسطيع المدرس توصيل هذه النقطة للطالب في الصف ، وصراحة انا ضد انه يكون المدرس الخصوصي نفس الدرس العام في المدرسة صباحا

ولدي ثانوية عامة وللحين ماحطيت له اي مدرس لاي مادة بس ناوية ان شاء الله قبل اي امتحان مهم احط له في المواد العلمية اذا احتاج وبناء على رغبة منه

[a7medooo]

راتب المدرس المقيم اعتقد 4700 او 5000 تقريبا وكان اول على 3750 ما اعتقد يكفي اما راتب المدرس المواطن اعتقد كان فوق ال 10 في فرق ال 4000 ما تعيش هالايام