خمسة الاف حاج يمرون مركز ابوسمرة في نصف ساعة ومركز سلوى 12 ساعة

[صلاتي]

خمسة الاف حاج يمرون المركز القطري( ابوسمرة)

في نصف ساعة ومركز سلوى (السعودي) 12 ساعة

في الوقت الذي نرى فية الامكانيات الكبيرة والجبارة

من المملكة العربية في خدمة الحرميين الشريفين

لماذا لا تقدم السعودية خدمات افضل في الحدود!!!

من أجل راحة الحجاج والوافدين

[بوعبدالله779]

معليش اخوي تعرف ليش هل عدد في الفترة اللي ذكرته ؟؟؟لانه الساعة 12 امس اخر وقت لدخول الحجاج من منفذ البر للسعودية والاهم ليش هل تاخير كله من اصحاب الحملات ؟؟؟ليش ماكان الخروج قبل كم يوم؟؟؟يعني لا تحط كل شي على السعودية ...جزاهم الله الف خير على حسن الاستقبال في الحرم وتعاملهم الراقي مع الكل تحت الصغط العالي من الحجاج من الملايين وبارك الله في جهودهم

[Aigner]

الله يعينا على مركز سلوى

أحس انهم يتمتعون في تأخير القطريين

الله يعين بس

[عوآآآآشـي]

اي والله وانا أشهد

الله يعينهم الحجاج

[بوعبدالله779]

الله يعينا على مركز سلوى

أحس انهم يتمتعون في تأخير القطريين

الله يعين بس

السلام عليكم .... مافي داعي تكتب كلام تثير اخوانا علينا يا غالي

[دلة الرسلان]

الحين موسم حج ومتوقع الزحمة واللي متجهين للحج يحتسبون للأجر في الصبرعلى التعب

وما منفذ سلوى الا البداية .

[simsim1963]

لا بالعكس المركز السعودي مركز جيد بس لا تنسى وجود بعض الموظفين الشيعه . وهم من يقومون بتأخير الناس لكسب الحسنات من الملالي في أيران

[حليتان*]

الله يعطيهم الصحه والعافيه

حج مبرور وذنب مغفور


:)

والله يرجعهم بالسلامه

[عتيجه]

اخواني ترى تسجيل بيانات الخروج من مركز بوسمره غير عن تسجيل بيانات دخولكم للسعوديه وبالذات وقت الحج يكونون مشددين عشان الامن وغير دفع التأمين وتفتيش السيارات نرجوا مراعات انه الاعداد كبيره ونتمى لهم التوفيق في تسهيل الامور

[مروض الفكرة]

فعلا


المنفذ السعودي يستلذ ويستمتع بتأخير الناس


سواء حجاج أو غيرهم


وروتين زيادة عن حده


الحين وش المانع يكثرون الكونترات والموظفين


وهم يدرون ان الناس الي داخلين أعدادهم كبيرة


الي يقول خدمات الحج والحرمين


ندري ما تقصر الحكومة السعودية في هالشي


وفعلا مجهوود جبااااااار



بس هذا ماله علاقة بموضوع منفذ سلوى


التقصير حاصل وبقوووة


والكل يشتكي


والله ييسر حج هذا العام

[cristal]

انا رايحة الحج يوم الخميس باذن الله
ادعولي بالتوفيق والله يتقبل حجتي

ويسر امورنا

[مروض الفكرة]

انا رايحة الحج يوم الخميس باذن الله
ادعولي بالتوفيق والله يتقبل حجتي

ويسر امورنا



الله ييسر أموركم


ويسهل حجكم

[الصريحه]

الله يوفقهم ويتقبل منهم
والفال لنا

[شيط ويط]

الله يعينهم

[ALRAYYAN]

بعض الموظفين السعوديين وخصوصا في ابوسمره يستلذون ويستمتعون ويستطربون في تاخيرنا

زحمه وامة لا اله الا الله وتلقاهم فاتحين شباك ولا اثنين والباقي يتسكعون برع الغرف يدخنون وتضحكون

هذا رايي من تجربه مب من فراغ

[الملا]

الاعضاء اللي اشتكو من منفذ سلوى كلهم عن تجارب وانا واحد منهم

للاسف معاملتهم سيئة جدا وبطيئين في انهاء المعاملات واذا خلص شفت وجا شفت الثانية في هاللحظات الله يعين الشخص اللي ينطر ، لازم الشخص اللي عنده لزام يتأخر نص ساعة وبعد اول مايجي يتكلم بالموبايل

[BoFahed]

ان شالله الحكومة السعودية تقوم بتطوير المركز اللي على حاله من اكثر من 25 سنة خصوصا وانه مركز نشط دايما الحركة فيه طول السنه لان التبادل التجاري بينا وبين اخوانا بالسعودية بالمليارات والمواطنين القطريين ساهموا بشكل كبير في تطور الهفوف ولفت النظر لها في المشاريع يعني الكل مستفيد.

والقيادة السعودية ما تقصر في شئون البنية التحتية تصرف مئات المليارات عليها

[نورالهدى]

لاحول ولا قوة الا بالله العلي العظيم
ياجماعة لا أحد يحط في ذمته
الله عالم بخفايا النفوس
وتعب الحجاج أجر إن شاء الله

[حسن]

بالعكس اجرائاتهم اسرع من جميع مراكز دول الخليج الاخري الجواز ياخذ في اقل من 3ثواني

[Level]

امس كنت جاي من السعودية متوجه الى قطر .. في مركز سلوى السعودي على كثرة السيارات الا ان الزحمه ماتاخذ دقايق السيارات تمشي وفي بوابة التدقيق الاخيرة ماكان يدقق اهم شي ماتوقف السيارات

ولكن الصدمة في قطر

مركزنا الجديد الراقي الي يدعوا للمفخرة

بوابات الجوازات فاتحين الشبابيك كلها ولكن نمشي حبه حبه على قلبي حبه حبه

برود مش طبيعي

ويوم طلعنا استقبلونا موظفين الجمارك بالابتسامه المعهودة جزاهم الله خير

وبعدها الصاعقة الكبرى كل السيارات الي طلعت من اكثر من 8 شبابيك للجوازات تزدحم عند شباك واحد للتدقيق الخارجي الشكلي الي ماله داعي ابداً علماً بأنه يوجد اكثر من 3 تقريباً شبابيك مغلقة وهات يا ازدحام خيالي غير متوقع

[مساهم عادي]

امس كنت جاي من السعودية متوجه الى قطر .. في مركز سلوى السعودي على كثرة السيارات الا ان الزحمه ماتاخذ دقايق السيارات تمشي وفي بوابة التدقيق الاخيرة ماكان يدقق اهم شي ماتوقف السيارات

ولكن الصدمة في قطر

مركزنا الجديد الراقي الي يدعوا للمفخرة

بوابات الجوازات فاتحين الشبابيك كلها ولكن نمشي حبه حبه على قلبي حبه حبه

برود مش طبيعي

ويوم طلعنا استقبلونا موظفين الجمارك بالابتسامه المعهودة جزاهم الله خير

وبعدها الصاعقة الكبرى كل السيارات الي طلعت من اكثر من 8 شبابيك للجوازات تزدحم عند شباك واحد للتدقيق الخارجي الشكلي الي ماله داعي ابداً علماً بأنه يوجد اكثر من 3 تقريباً شبابيك مغلقة وهات يا ازدحام خيالي غير متوقع


تدري ليش معاملة تسجيل الجواز وحتى السيارة تصير في ثواني في مركز سلوى ...لأنه هم عندهم نظام رقم كمبيوتر خاص فيهم لكل جواز ولكل سيارة ... فيوم تدخل اول مرة بالجواز يتم تسجيل بيانات الجواز ومن ثم الكمبيوتر يطلع رقم لهذا الجواز فيقوم الموظف بكتابة هالرقم على الصفحة الأخيرة ... فمرة ثانية خلاص بمجرد يحط رقم الكمبيوتر تطلع البيانات فيضغط انتر يتم تسجيل الدخول ... يعني كل جواز ماياخذ الا 5 ثواني .... ونفس العملية للسيارة...

اما عندنا في مركز بو سمرة فعملية تسجيل الجواز والسيارة تاخذ فترة طويلة ...فمثلا تحصل واحد في موتر قدامك وهو بروحه وموظفة الجوازت عندها جوازه قاعدة تدقدق في هالكمبيوتر لين ماتطلع روحه وانت تنتظر ..اتقول تسجل عملية دخول جواز من جزر الواق واق....

فمادري ماهو الخلل .. هل هو في برامج الكمبيوتر التي هي بطيئة وتتطلب ادخال بيانات كثيرة لاتمام عملية التسجيل ام ماذا ؟

وهالمشكلة موجودة بعد في الأمارات ....

فعن تجربة سرعة كاونتر واحد سعودي توازي سرعة كاونترين في الامارات .... و 4 كاونترات في بوسمرة ؟؟!!

لكن يبقى عندهم هالعيب الكبير .... مايفتحون كاونترات اضافية وقت الزحمة .....

[الـقـاسـي]

اولا في مركز قطر مافي تفتيش وانت طالع عكس المركز السعودي ..
ثاني شي لاتنسى حركات السعوديين معروفه في المركز وانت عارف اغلب اللي يشتغلون فيه من وين ..
اذا ايام الويكند زحمه شلون ماتبي ايام الحج تكون زحمه ..
ياليت لو يهتمون في مركز سلوى ويعدلون الوضع فيه شوي .. ومع هذا كله يعطيهم الف عافيه اخوانا السعوديين بالفعل مجهود جبار يقومون فيه ..

[بسك يازمن]

[CENTER][SIZE="6"]المركز السعودي مع انه قديم كمبنى الا انه رااائع كمعامله وسرعه انجاز..

اول مايشوفون زحمه على طول شغلوا الشبابيك وكثروا الموظفين

البلى في مركزنا والله،، عمران وعلى الطل.. تاتا تاتا...

والله الخميس 4/11 وصلنا الساعه 4 العصر المركز وطلعنا 5 وشوي واقول للعيال الله بستر من الى جدام شكلنا بنخلص الساعه 8

والله مع التأمين والتشييك وكل شي ماقعدنا ربع ساعه.

العالم تغيرت وتطورت واحنا عمرنا عمران والعقول هي العقول

طيب تعال ارجع قطر

5 او 4 بوابات ولي شغال بوابه؟؟؟؟سؤالي ليش؟؟؟؟ بوابه بس ليش؟؟

لا والبوابه لنا وللشاحنات,, والموظف مسكين قلبه على البيبي والمسجات.... والسرى اللهم ياكافي.... والشاحنات كل شوي داخل عليك واحد!!!

للامانه

نحتاج اعاده برمجه في الحدود................ توجيهات للجمارك.... وموظفات الجوازات..... والحبيب الي عند البوابه

او يأجرون البوابات ويخلونها محلات بقاله والاجار يصرفونه ادويه ضغط على اهل قطر تعويض للتأخير:rolleyes2::tease:

[جهام]

كل دوله ومن حقها تحافظ على امنها

[البدع]

شكاوي بالمئات على حدود سلوى

بس شخصيا ماواجهت اي مشكلة معاهم

ونادر ما أتفتش عندهم

المشكلة ان الناس معودين نفسهم على الدخول والخروج في اوقات معينة*

وهذا مستحيل

[الفولاذ]

الله يعينا على مركز سلوى

أحس انهم يتمتعون في تأخير القطريين

الله يعين بس


مع احترامي لك
كلامك غير صحيح , منفذ سلوى من افضل المنافذ واسرعها
يعني حاول ترجع بذاكرتك شوي , وشوف كم اكثر مرة قعدت فيه ماتتعدى ربع ساعه

[Aigner]

السلام عليكم .... مافي داعي تكتب كلام تثير اخوانا علينا يا غالي

وانا صادق اخوي

وانا ما سبيتهم ولهم احترام

[Aigner]

مع احترامي لك
كلامك غير صحيح , منفذ سلوى من افضل المنافذ واسرعها
يعني حاول ترجع بذاكرتك شوي , وشوف كم اكثر مرة قعدت فيه ماتتعدى ربع ساعه


سبحان الله اخوي

يمكن تقصد ابو سمره ما تتعدى ربع ساعه ولا انت طالع

[دااانة قطر]

12 سااعه صج واايد
بس لاتنسون بعد مايصير يسمحون للكل بالمرور مره وحده
خبركم السواالف اللي تصير
فهذا من بااب حماايتهم وحمااية اهل المنطقه

[سكرمر]

الله يعطيهم العافيه

[..er..]

لايستلذ ولاهم يحزنون


واعتقد دخولهم مع ابوسمره بدون تفتيش

ودخولهم مع سلوى يحتاج تفتيش واساسا هذا شغلهم :)

وياليت تصفون النيه ..

[Mshari]

اولا نسأل الله ان يتقبل من حجاج قطر والمسلمين كافه حجهم وحجا مبرور وسعيا مشكور


مسالة منفذ سلوى وابو سمره

نفس المشكله انا مواطن سعودي ادخل من منفذ سلوى ما اخذ دقايق وكل شي خالص

اما عند ابوسمرى اتاخر

طبعا ما الوم الاخوه في قطر لان هذا حقهم في اتخاذ اجراءات امنيه للوافدين لبلدهم


ومن حق السعوديه ايضا التفتيش بشكل دقيق خصوصا على الحجاج يمكن يطلع لنا حد مهرب متفجرات مثلا يبي يفجر بين الحجاج عشان يقول السعوديه ما فيها امن


الموسم هذا موسم يحصل فيه كل شي لذالك لا تلومون السعوديه على اتخاذ الاجراءات الامنيه اللازمه هي لسلامة الحجاج اولا




مسالة يستلذون صدقتو يا اخوان نفس الشي انا كمواطن سعودي اللاحظ ان بعض الاخوه في بعض المنافذ بالدول الخليجيه يستلذون بل يتمتعون المماطله والتاخير في اجراءات دخول المواطن السعودي يعني يستقعدون للمواطن السعودي الذي يذهب لزيارة اخوانه في بلدان الخليج :weeping::weeping::weeping:

نقول الله يصلح الحال ويلتفتون المسؤولين في دول الخليج لمسالة المعالمه للمسافرين

[قلم محايد]

والله في شغلة ابي اقولها و كنت مخليها في قلبي عند منفذ بو سمرة (القطري) تحديدا ..

انا كذا مرة اسافر عبر منفذ بو سمرة الحدودي القطري و ادخل منفذ سلوى السعودي ..

للامانة منفذ بو سمرة حديث و جميل و يفتح النفس .. لكن التأخير كبير و كل سيارة تاخذ وقت طويل جدا .. مع ان عدد السيارات يكون قليل ( يعني الله يستر لين صارت سيارات وايد) ..

و الادهى من ذلك اخر مرة دخلت قطر .. كملت الاجراءات .. و اول مرة صادفني هالموقف .. مع الشخص اللي يوقف عند البوابة ( اخر واحد اللي يدقق) في المنفذ القطري .. الحبيب جلس يطالع في جواز زوجتي (البحرينية) و عقبها (جوازي البحريني) و يقلب صفحاتهم صفحة صفحة والله العظيم كمل كل صفحات الجواز و هو يقلب فيهم و يرجع عليهم و حسيت من حركته و شكله انه يبي يستفزني .. يبيني اعصب و انا واحد بصراحة سريع النرفزة لكني تجنبت المشاكل و مسكت اعصابي و سكت و قلت خل انطره لين يخلص ! مع العلم اني خلصت الجوازات و الجمارك قبله و هو مادري ليش يطالع في الجواز ورقة ورقة يعني سافرت كذا مرة و حدود كذا دولة خليجية و حدود قطر نفسها كذا مرة و هذي اول مرة يحصل لي هالموقف والله حز في نفسي كثيرا كنت ياي من مسافة طويلة من البحرين خمس ساعات و تعبان و للاسف الشخص هذا نرفزني و لكني سكت مثل ماقلت و تجبنت للمشاكل .. و ماحبيت افتح موضوع بالسالفة وقت اللي حصلت لان ادري الاعضاء يمكن مايعجبهم الموضوع و الكلام .. و للعلم في المنفذ السعودي سلوى رغم انه قديم الشكل لكن ما واجهت اي مشاكل و بالعكس الموظفين كانوا يرحبون و يسلمون .

و سلامتكم

[أبو مناير]

لا بالعكس المركز السعودي مركز جيد بس لا تنسى وجود بعض الموظفين الشيعه . وهم من يقومون بتأخير الناس لكسب الحسنات من الملالي في أيران






إن بعض الظن اثم ؟؟؟

[الأصيلة]

الله يحفظهم ويتقبل منهم...

[حمد بن سعد]

الله المستعان بس

عرب وش اتسوي فيهم:anger1:

[miss.qa]

بحج ومن غير حج كله زحمه ولا في تطور ف مراكزهم من سيء للاسوء

[الكاسر99]

صح كل مره أروح المركز السعودي ونحصل المركز زحمه وفاتحين بوابة وحده ليش

هل في تلذذ لتأخير المسافرين

[عبدالله بن محمد]

الله يعينا على مركز سلوى

أحس انهم يتمتعون في تأخير القطريين

الله يعين بس

السلام عليكم
اسمحلي اخوي
انا اغلب سفراتي بالسياره
ولا مره اخرونا فالسعوديه
بس يفتح الشنطه ويطالع شوي
ويصكرها
وكان الله غفور رحيم

حرام الظلم عشان انت تاخرت مره ولا مرتين
او سمعت احد قال اخرونا

وبالتوفيق

[QatarSupport]

شي طبيعي عزيزي

الاجراءات الامنيه تختلف عند الخروج و الدخول

عند الخروج فقط التحقق من الجوازات و بعض الامور البسيطه في كل الدول

و اما عند الدخول فـ الاجراءات تكون اكثر دقه في كل الدول

من التحقق من الجوازات و التفتيش و غيره

لا انكر ان مرات يحدث تاخير بالمركز السعودي

وبالجانب الثاني يحدث تاخير بالمركز القطري ايضا


فمن رايي هذا شي طبيعي و يحدث في كل المراكز الحدوديه

و باذن الله ماجورين حجاجنا و الله يتمم حجهم و يردهم للبلاد سالمين

كل التقدير لك .. !!

[&بوشهد&]

هم بدون شي زحمة وشلون الحج
الله المستعان

[Ghost]

السعودية ربي مسخرها للحرمين ولا حد يتكلم عنها لان الجهود الجبارة اللي يقومون فيها من وامان واستيعاب للملايين والنظافة والصحة والخدمات الاخرى اللي تقدم لحجاج بيت الله بغض النظر عن المور الاخرى
وبعدين الحملات اللي بتتاخر وكلهم يرحون في وقت واحد علشان يوفرو يوم او يومين في السعودية خبركم المصاريف ليومين تفرق

[ابو عادل]

والله انا استغرب موظفات ابوسمرة شيسوون في الجوازات هالكثر ؟؟؟؟؟؟
والله يرتفع ضغطي مليون وهم يطقطقون بهالكمبيوتر شدعوة بتصنعين صارووووخ ؟؟؟؟؟؟؟؟؟

[Al-Qatari]

والله انا استغرب موظفات ابوسمرة شيسوون في الجوازات هالكثر ؟؟؟؟؟؟
والله يرتفع ضغطي مليون وهم يطقطقون بهالكمبيوتر شدعوة بتصنعين صارووووخ ؟؟؟؟؟؟؟؟؟

هههههههه والله انك صادق



................................................


انا رأيي ان الزحمه في المركز السعودي في الدخول اذا حصلت زحمه بتخلص اسرع من الزحمه في الدخول اذا حصلتها في المركز القطري للأسف ..


المشكله في سلوى عدم الترتيب .. يعني اذا صار فيه زحمه صارت مشاكل ومساقط بين السيارات لأن مافيه مسارات واضحه فتسبب مشاكل بين السواقين ..

اما ابوسمره فبطيء جدا ً حتى لو ما قدامك الا سياره وحده لازم تنتظر .. واذا حصلت زحمه فإحسب حسابك على ساعتين وزود ...



والدريشة الاخيره هذي عله ولا لها داعي والموظف اللي فيها متفرغ يفتش الجواز على راحته .. حتى لو تعطيه بطاقه قعد يقلبها كأنه اول مره يشوفها ..

[nouar]

المهم انهم الله يوصلهم بالسلامه

[Gentleman]

السلام عليكم .... مافي داعي تكتب كلام تثير اخوانا علينا يا غالي

بوعبدالله الحق ما يزعّل.
السعودية تربح المليارات سنوياً من الحج والعمرة والأسعار هناك أيام الحج والعشر الأواخر من رمضان أعلى من أي مكان في العالم،،، ولكن لا زال هناك تأخير على الحدود وفوضى في المواصلات وحرائق وحوادث في الجمرات والأماكن الأخرى. هذا غير حالات التسمم الجماعية التي نسمع عنها كل عام أكثر من مرة.
حجة صغر المكان وكثرة الناس غير مقبولة. هناك أماكن في العالم (محطات القطار في لندن مثلاً) يستخدمها عشرات الملايين يومياً وتقع على مساحات أصغر ولا تحدث فيها مشاكل.
الناس لهم حق يطالبون بخدمات ممتازة في مقابل المبالغ الباهظة التي يدفعونها.

[قطري متواضع]

اخووووووي اشوووف العكس صحيح صار مركز سلوى نصف ساعه وابوسمرة حتى ايام الويكند صار 12 ساعه واسئل مجرب يسافر اسبوعيا

[تاجر121]

الله يعطيهم الصحه والعافيه

حج مبرور وذنب مغفور




والله يرجعهم بالسلامه