معاناتها مع اسباير

[بوراشد82]

بسم الله الرحمن الرحيم

السلام عليكم ورحمة الله وبركاته ..

اعضاء منتدى الاسهم القطرية .. زبائن الحوار العام ..!!

كنت مع واحد من الربع في مجلسه وكانت سوالفنا وايد .. ودارت دفة الحديث الى سباير .. لكن شفت صديقي زعلان ويطرق برأسه ويفكر .. يافلان شبلاك .. قالي ليتك ماطريت سباير .. ليش ؟ اترككم مع صديقي ليروي لكم الموضوع بلسانه .. بس انا باخلي الحديث بدال لهو موجه لي في الحقيقة باغيره وباخليه كنه يكلمكم ويطلب مشورتكم لاني قالتله عن هالموقع الطيب وشقد فاد ناس كثير وفيه ناس فيهم الخير والبركة مايقصرون وانتم كذلك ..

فا بوجه الحديث تجاهكم وانتوا قولوله شرايكم ولا شيسوي ..

- انا زوجتي خريجة تربية بدنية وعلوم رياضة تقدير جيداجدا جامعة قطر .. تخرجت واشتغلت في معتقلات المستقلة .. قبل التخريج داومت مع مدرسة سنة كاملة وجابتلها المركز الثاني على مستوى مدارس قطر .. وبعد التخريج بعد دوامت في مدرسة اخرى وجابت كذلك المركز الثاني في لعبة اخرى على مستوى مدارس قطر .. واخر مرة شاركت فيها في اليوم الاولمبي كانت مدربة لفريق مدرستها لكرة السلة وجابت المركز الأول على مدارس قطر في اليوم الاولمبي .( للعلم ليومكم ماستلمت مكافأتها عن هاليوم والموضوع صارله سنتين والاجانب بعد البطولة يستلمون مكافأتهم مباشرة) .. المهم

بناتها الي هي تدربهم قالولها يا ابلة ليش ماتدربينا في اسباير ؟ شلون اسباير مافيها مدربين قالولها في بس مايعرفون التدريب وين .. وفاشلين .. احنا وياج خذنا كاس وحسينا بطعم البطولة .. انزين شلون الوضع في اسباير مافي خلط مافي خرابيط .. قالولها فقط الباب مشترك وعقب خلاص ادارة بكبرها حريم الي هي اسباير اكتيف والوضع المادي ممتاز والبدلات والمميزات ممتازة .. انزين خلاص باقدم ان شاء الله . (وتبتدئ معاناة الطريق الى كابول)

قبل سنة تقريبا رحت قدمت لزوجتي .. على ان بيردون علينا في مدة اقصاها شهر .. عينكم ماتشوف الا النور ماجانا رد .. المهم دخلت على مسؤول كبير في سباير .. قال مافي توظيف ولا في شواغر !! ولازم اللغة الانجليزية .. انزين شالحل ؟؟ انتظر لين يصير شاغر ..!! مايأست ورجعت ومعاي زوجتي وطلبت مقابلة مسؤول التوظيف .. الا طلعت فلبينية ..!! وطبعا زوجتي تطقطق انجليزي وتفهم وتعرف لكن تعالوا عند التحدث .. شوي لكم عليها وتوصل الفكرة .. المهم قالتلها لازم تشتغلين بارت تايم(جزء من الوقت) والراتب4000-5000 على حسب والمدة عادي لين 18 شهر ..!!! انزين ليش ؟ بنشوفج اذا تصلحين تدريب ولا لا !! كل هالانجازات ماملت عينكم ؟؟ انزين قالتلهم اذا نبي نتجاوز هالبارت تايم لازم كم عدد سنين الخبرة ؟؟ قالتلنا 3 سنين نوظفها على طول ... حلو .. زوجتي كملت سنتين وباقيلها سنة ..

رجعنا بعد السنة يعني كملت 3 سنين .. وقابلنا مسؤولة التوظيف .. هالمرة قالت لا باشوف مديرة سباير اكتيف اذا عندها شاغر ولا لا ..!!!! على فكرة مدير سباير اكتيف جنوب افريقية المهم وعدتنا بالمقابلة وعينكم ماتشوف الا النور .. مافي مقابلة .. رجعتلها الا الاخت مربية وماخذه اجازة وضع وجايبين بدالها بريطانية ماتدري شالطماط .. المهم هالبريطانية شرحتلها موضوع زوجتي وقالت ابشر بالسعد بالبريطاني !!!! ثاني يوم باكلمك ..

اتصلت ثاني يوم وارد عليها وانا اقول يالله حيها .. قالت البقا .. المهم بعد التحفي والمجاملات والقهوة << هذا كله بالتليفون !! المهم قالت انا كلمتلك مديرة اسباير اكتيف قالت ماعندي شاغر فاكلمتلك مديرة سباير تالنت الي هي اجنبية اوروبية مادري من وين اسمها ميلاني وقالت باشوف اذا عندي شاغر ..!! ولزوجتك الأولوية ..

الي فاقع كبدي ان بعدها بكم يوم فقط .. جات مغربية مدرسة زوجتي تنقي بنات لألعاب القوى .. فا راحت زوجتي وجمعت البنات وسوت لهم اختبارات لألعاب القوى ووزعتهم على كذى لعبة .. تعجبت المغربية من قدراتها وقالت ليش ماتجين عندنا سباير .. قالت كلمتهم وماعندهم شاغر .. قالت كيف وتوهم من يومين موظفين تونسية واوكرانية !!! وبعد موظفين ثنتين بنات ثانوية (للعلم مستحيل سباير اكتيف توظف بنات ثانوية لازم جامعيات) ..!!

فا شالحل مع هذيلا ؟؟ زوجتي مب محتاجة واسطة ..كفاية قدراتها تأهلها ان تمسك وظيفة مدربة هناك .. يروحون يحولونها على اسباير تالنت (الي هي للأطفال) ولا بعد اتنتظري بنشوف اذا تصلحين ولا لا ؟؟؟!! هي تبي سباير اكتيف (الي للنساء وللمنتخبات والمراهقين) وهاذي مديرتهم تقول ماعندي شاغر وكل موظفة ربعها .. انا اخبر الوظائف تتقطر بناء على اخر تصريح لسمو ولي العهد في كل جهة خاصة ولا حكومية فا مادري شالعمل وياهم؟؟

انتهى

انا محدثكم بوراشد82 .. قالتله اشتك وطني الحبيب .. رد علي قالي وشنو بيسويلي وطني الحبيب مع هالمذيع العمري .. ان اشتكيت بيوقف جدامي كنه حارس يد بيصكر البيبان في ويهي وانا بالعب بلنتي .!!! قالتله انا باكتب موضوع زوجتك هني وان شاء الله الاعضاء فيهم الخير والبركة وانتوا كذلك فا شرايكم ؟

[الخير كله]

حبيبي
الوااااااااسطه

[حليتان*]

كسرت خاطري والله :(


سبير اكثر موظفيها اجانب

[بوراشد82]

الخير كله بارك الله فيك على المرور .. وقبل لا اقولك اي واسطة بتنفع بعد الله ان كتب ..

انت تشوف موضوعها اصلا يحتاج واسطة ؟

amaf535

يعطيك العافية على المرور

[sul6an.q6r]

الله يكون في عونهم والله الواحد ماعنده جواب
لاكن يجرب يشتكي في وطني الحبيب ترى ياما فاد ناس وساعد ناس

[Right]

تسلم يا أخوي

الصراحة شي يعور القلب ويكسر الخاطر

لهذه الدرجة توصل الحالة بشباب وبنات أهل قطر الأكفاء

ياما شباب وبنات واجهو مثل هذا الموقف ومساكين محد ساعدهم

وتم ركنهم على الرفوف المغبرة مع أنهم طاقات وطنية يجب أن تستفيد منها الدولة

لأن هذه هالطاقات هي الباقية في البلد مو مثل الطاقات الأجنبية إلي أغلبها ما يعرف شي


يقول المثل العربي " زامر الحي لا يطرب "

ويقول المثل الخليجي " عنزة الفريج ما تحب إلا التيس الغريب "


ما فيه إلا حل واحد سواء للأخت المدربة القطرية وغيرها من الشباب الأكفاء

الحصول على جنسية أجنبية " انجليزي ولا أمريكي ولا لو من المريخ نفسه "

ويرجع لقطر صدقني بيلقون مليون باب من أبواب الوظائف والمميزات مفتوحة لهم


بس هااااا .... مع شوية تغيرات !!!!


مثلاً:

( صبغ الشعر أشقر ووضع عدسات خضر ولا زرق ... كنها عيون قطو .. ولوي الحلج بالانجليزي)


وموضوعك خاااااااااااااااااااااااااااااااااااااالص

[بوراشد82]

بيض الله وجيهكم يالربع وضحكني ردك يا سنايدر وفعلا صادق في كلامك لكن مافي قطري بيتنكر لبلاده

[بوراشد82]

ما شاء الله ..

كلي امل بالله ثم بكم و170 مشاهد و4 ردوا فقط ؟؟!!

على الاقل دعاويكم تكفي

[Right]

بيض الله وجيهكم يالربع وضحكني ردك يا سنايدر وفعلا صادق في كلامك لكن مافي قطري بيتنكر لبلاده



أخي بوراشد

هذا نوع من الدعابة لا أقل ولا أكثر

وليس معناه أن الواحد يتنكر لبلده قطر

قطر غالية وعزيزة علينا ومهما يصيير نفديها بأرواحنا


يا بوراشد


يقول الشاعر: مصطفى صادق الرافعي



بلادي هواها في لساني وفي دمي .... يمجدُها قلبي ويدعو لها فمي

ولا خيرَ فيمن لا يحبُّ بلادَهُ .... ولا في حليفِ الحب إن لم يتيم

ومن تؤوِهِ دارٌ فيجحدُ فضلها .... يكن حيواناً فوقه كل أعجمِ

ألم ترَ أنَّ الطيرَ إن جاءَ عشهُ .... فآواهُ في أكنافِهِ يترنم

وليسَ من الأوطانِ من لم يكن لها .... فداء وإن أمسى إليهنَّ ينتمي

على أنها للناس كالشمس لم تزلْ .... تضيءُ لهم طراً وكم فيهمُ عمي

ومن يظلمِ الأوطان أو ينسَ حقها .... تجبه فنون الحادثات بأظلم

ولا خيرَ فيمنْ إن أحبَّ دياره .... أقام ليبكي فوقَ ربعٍ مهدم

وقد طويتْ تلك الليالي بأهلها .... فمن جهلَ الأيامَ فليتعلم

وما يرفع الأوطانَ إلا رجالها .... وهل يترقى الناسُ إلا بسلم

ومن يكُ ذا فضلٍ فيبخل بفضلهِ .... على قومهِ يستغنَ عنه ويذمم

ومن يتقلبْ في النعيم شقيْ بهِ .... إذا كان من آخاهُ غيرُ منعم

[بوراشد82]

والله ادري انك تغشمر طال عمرك وانت ماتقصر ..

بس ابي الاقي الريال مرة ثانية واقوله الاعضاء شردوا علي

[ذوق]

ههههههههههههههههههههههه بصراحه اسلوبك في الطرح رائع وممتع وظريف

الي ربي كاتبه بيصير الموضوع مو موضوع مؤهلات المووضوع موضوع نصيب ورزق من الله ، تكثر من الدعاء والصدقات وقولها انطري لا واسطه ولا غيره

وعسى ان تكروه شيئآ وهو خير لكم

اختك

ذوق

[قناص 787]

بوراشد يمكن خير لها ان تقعد في المستقله ماتدري يمكن تصير صاحبة ترخيص مره وحده :omg:

محبش خخخخخخخ

[روح الاطلس]

كل شي مميز في قطر راح للاجانب من زمان

من سباير
لقطر فاونديشن
للسدرة
لدوحة لاند
للمتحف الاسلامي

ما بقى شي لنا

الله يعين

[نتفـه]

حسبي الله عليهم هالاجانب ما خلوا لنا مكان كلش !!!
الله يوفقها باحسن مكان وتصير مديرة الفلبن والجنوب افريقيه والبريطانيه بعد ,,

[بوراشد82]

الله يجزاكم خير ..

مافي الا اقول لرفيجي ردودكم ويتصل في برنامج وطني الحبيب .. ويتدرب على لعبة الفاول عدل عشان المذيع مايوقف جدامه كحارس يد ...!!!

[مجنون الفتك]

يا أخي الكريم التقطير بس كلام ما في شيء من الواقع .
أنا ما خليت مكان ما قدمت فيه وكلا نفس الكلام ما في شاغل وحنتصل فيك قدمت في :
1- اسباير
2- قطر فونديشن
3- كيوتل
3- قطر لاند
4- قطر غاز
5- مؤوسسة قطر للبترول .
بس ما في فايدة والمشكلة الى يقابلوني كلهم أجانب
مع أني حاصل علي بكلوريس كيمياء وماجستير في إدارة الأعمال وصار لي أكثر من ثلاث سنوات وأن أحاول بس دون فائدة .

[die 4 qtr]

انا من مشتركي سباير كلهم اجانب مافيه قطريات

يمكن التوظيف عندهم يقتصر ع الغير قطريين فقط

[thanked]

اخر الدوا الكي..يتصل وطني الحبيب..خل يفضح التلاعب بالوظائف والشواغر في اسباير , مادري متى بتنفك عقدة الاجنبي و محاربة القطريين,.. .. موفق اخوي

[فراغ]

هذي المشكلة عانا منها الكثير
وايد قطريين أعرفهم شخصيآ أنشاتوا من سباير وهم كفائات وعلى يد قطريين مع الأسف
الجو في أسباير يزكم الأنوف
وساخه ما بعدها وساخه
أين المسئولين من خارج سباير للأطلاع على المهزلة
قطريه وغيرها الكثير من القطريين لا يرحب بهم وأجانب تأتي وتتوظف

[مـــفاهــيم]

روحوا شوفو كلية المجتمع الأستقبال حاطين فيه وحده يمكن عمرها 70 سنه امريكيه

ويالله تطقطق على الكمبيوتر وين بنات الثانوية وشباب الثانوية ما يصلحون بعد؟؟

من غير الكفاءات الوطنيه المحاربة.

[الـقـاسـي]

والله ياخوي لي متى بنضحك على نفسنا اننا قطرين ولازم نتوظف صدقني لو يبون التقطرين بيخلون كل مكان للقطرين لكن مــــــــا يـــــبـــــــون

مافي الا تروح لاكبر راس هناك او للشيخ جاسم بن حمد وتشرح له الوضع لاتسكت خلها تتوظف غصب عن هالاجانب ..

روح لاكبر راس هناك ولا تخلي هالاجانب يلعبون فيك انت ومرتك ..

[Gentleman]

يا أخي الكريم التقطير بس كلام ما في شيء من الواقع .
أنا ما خليت مكان ما قدمت فيه وكلا نفس الكلام ما في شاغل وحنتصل فيك قدمت في :
1- اسباير
2- قطر فونديشن
3- كيوتل
3- قطر لاند
4- قطر غاز
5- مؤوسسة قطر للبترول .
بس ما في فايدة والمشكلة الى يقابلوني كلهم أجانب
مع أني حاصل علي بكلوريس كيمياء وماجستير في إدارة الأعمال وصار لي أكثر من ثلاث سنوات وأن أحاول بس دون فائدة .

أخوي إذا إنت قطري ومعدلك في بكالريوس الكيمياء جيد أو أعلى أرجو إرسال السي في على الخاص.

[Gentleman]

والله ياخوي لي متى بنضحك على نفسنا اننا قطرين ولازم نتوظف صدقني لو يبون التقطرين بيخلون كل مكان للقطرين لكن مــــــــا يـــــبـــــــون

مافي الا تروح لاكبر راس هناك او للشيخ جاسم بن حمد وتشرح له الوضع لاتسكت خلها تتوظف غصب عن هالاجانب ..

روح لاكبر راس هناك ولا تخلي هالاجانب يلعبون فيك انت ومرتك ..

كلامك صحيح أخوي القاسي.
أخوي الصفحة هذه فيها أسماء وصور المدراء الخمس الكبار في أسباير واثنان منهم قطريون. اطلب مقابلة أحدهم واشرح له قصتك أو أوصلها له في رسالة مكتوبة:
http://www.aspire.qa/ourvision/seniormanagementteam.aspx?categoryid=16

[المخباط]

اطلب مقابلة الأستاذ حازم هو المدير لأسباير
وهم اصلأ مطالبين بالتقطير يدورون القطري دوارة

[بوراشد82]

بارك الله فيكم جميع على الرد المعنوي والمساعدة بالمعلومات ..

بس اخوي من هذا حازم ؟؟ ووين مكتبه ؟؟

قلت لرفيجي روح لحازم طلع مايعرفه .. وانا اصلا ماعرفه اول مرة اسمع به ؟

ممكن تفيدني عن حازم ؟

[شيط ويط]

الله يعينها

[المخباط]

بارك الله فيكم جميع على الرد المعنوي والمساعدة بالمعلومات ..

بس اخوي من هذا حازم ؟؟ ووين مكتبه ؟؟

قلت لرفيجي روح لحازم طلع مايعرفه .. وانا اصلا ماعرفه اول مرة اسمع به ؟

ممكن تفيدني عن حازم ؟
سوري الدكتور حازم خذوة في كتارا
عندك المدير ناصر يوسف المظفر
واطلب مقابلتة شخصيا

[بنت الدوسري]

والله ادري انك تغشمر طال عمرك وانت ماتقصر ..

بس ابي الاقي الريال مرة ثانية واقوله الاعضاء شردوا علي

قوله تسلم عليك بنت الدوسري وتقول لك لو مرتك عيونها خضر وشعرها اشقر وشهادتها اعدادية كان بياخذونها على طول ولا بيحطونها بدال الفلبينية مالت التوظيف لكن مرتك وللأسف وللأسف وللأسف قطريه ولاااااااااااااااااااا ماعندها واسطة بعد :telephone: انسى تشتغل في اسباير
والله يا جماعة انا حفيت على اسباير وماخذوني وبالصدفة شاف اخوي واحد هناك يعرفة ((( مب قطري ))))) قال له شتسوي عندنا قال جاي اشوف اوراق اختي اللي من سنة قال له عطني اسمها ورقم تلفونها وروح وانا بارد عليك ..... شرايكم بس الحمدلله الله انعم علي بشغل في مكان احسن وبوظيفة احسن ( الحمدلله )

[Rider]

يارجال اسباير مايبغون القطريين واحد من ربعي حب يغير شغله راح اسباير وقدم عندهم وللعلم هذا الشخص عبقري في الكمبيوتر سووا له امتحان قبول ونجح وعطوه حق مبدئي وافق عليه وقالوا له انطر لين نتصل فيك والحين صار له سنة كاملة ولا حد اتصل ولا شي مع انه كان طول هالفترة يرجعهم لكن مدام المكان في غير قطريين اكيد بيحربون القطريين علشان لا ياخذ مكانهم

[بوراشد82]

الله يجزيكم خير على المرور وانا قلت للريال .. وقالي خل الموضوع عل وعسى مسؤول بالغلط يقرا ويحس

بس على طاري موضوع الريال .. فعلا في ناس متلتهة في كل مكان فكرت الريال بس مرته الي متلتهة ..!!

[Arab!an]

السبب كله حسب وجهة نظري انها " اتطقطق " في الانجليزي

خلها تاخذ دورة او دورتين في الانجليزي اذا صارت بيرفكت بيشغلونها حتى لو ماتعرف اتدرب

[مجنون الفتك]

أخوي إذا إنت قطري ومعدلك في بكالريوس الكيمياء جيد أو أعلى أرجو إرسال السي في على الخاص.

تم الإرسال على الخاص .

[Gentleman]

تم الإرسال على الخاص .

بارك الله فيك.

[خفوق]

تعبناا والله بس وش نسوي نبي مكان نلجأ له ونشتكي نبي الحكومه تعرف عن معانات الناس
قمنا نحسد الاجانب في بلادناا كل شي لهم الوظايف والتعليم وكل شي لهم

انا مسجله في سباير وكلهم اجانب واللي في الرسبشن فلينيات وكم وحده شاميات

والمدربات أجنبييات وقالت لي وحده ان رواتبهم شيييي مب طبيعي :/

حسبي الله ونعم الوكيل

[Fahad Alqahtani]

والله القهر بعينه

المشكلة وين الخلل ؟

مافيه قطريين تكلمونهم ولا تسوون اي شئ

الله يعينه

[العساس]

ماتدري يمكن الله كاتبلها مكان خير من اسبير
وبعدين اخبر واحد طلع هله من اسبير وردهم مدرسة
وماعرف الاسباب

[R 7 A L]

ياليتني ماقريت الموضوع
ارتفع ضغطي :anger1:

معقولة مافية قطريين مؤهلين حق هالوظايف ؟؟؟

[الصريحه]

الله يوفقها

[مجنون الفتك]

بارك الله فيك.

قوة أخوى جنتل مان ممكن اميلك الخاص حتى أقدر اتواصل معاك .

وجزاك الله خير .

[سبشل]

كل شي فالدنيا واسطه
الحق ضايع بدون واسطة

[Gentleman]

قوة أخوى جنتل مان ممكن اميلك الخاص حتى أقدر اتواصل معاك .

وجزاك الله خير .

Sent
الله يقويك وجزاك الله خير

[بدون]

لا حول و لا قوة إلا بالله العلي العظيم
شرايكم بأن ناس مقدمين عندهم ، صار لهم فوق العشر سنين و الدرجات تقارب درجات المدراء
تم الاتصال بهم و عرضوا عليهم درجات موظفين جدد (خريجين) !!!!!

[بوراشد82]

اشكر الجميع على المرور والحمدالله على اي حال ..

الريال شاف الموضوع ويقولكم جزاكم الله خير ومن طيب اصلكم ويقول الي اثلج صدره ان على الاقل موضوعه الي انا كتبته استفاد منه عضو راعي الشهادة الكيميائية والله يرزقه الوظيفه الزينة الي يرتاح لها ان شاء الله

وبعد العيد بأذن الله بيباشر موضوعه

والي عنده راي يتفضل به بعد عل وعسى

[بوراشد82]

اخواني ياليت تدلونا على ناس واصلة في سباير ....

الأجانب رافضين رفض قااااااطع توظيف القطريات حتى لو معاهم خبرة وكفاءة ....

والله يجزاكم خير ....

[princess lul]

اسباير كلهم اجانب

والله يعينه والله

[مونديال]

خله يغني اغنية مطولك يالييييييييييييييييييييل

[بوراشد82]

من فترة وحدة من الأهل شغالة بارت تايم في سباير والمدربة الأجنبية المسؤلة عليهم (( مسؤلة على القطريات بس تعطيهم أوامر وهم اللي يكرفون )) شغلتها الأصلية في بلادها مضيفة طيران !!!

بس تقول أنا هوايتي الرياضة ومتوظفة بالواسطة لأن مديرة قسم في سباير تصير أختها !!!

هل هالشي يرضيكم يا ناس ...!!!

[مونديال]

تبي الصح احنا السبب...
ولا هم اصلا شلون شتقلو

[بوراشد82]

تبي الصح احنا السبب...
ولا هم اصلا شلون شتقلو

صدقت أخوي ,,أصلا محد جابهم الا قطريين منا وفينا ,.,,

بس اللي يعور القلب انه الأجانب قلوبهم على بعض ,,تحصل الواحد لا توظف جاب عيلته وربعه وجماعته كلهم حتى لو ما عندهم شهادات ,, وروح شوف هالعصابات في أغلب مؤسسات الدولة ماكلين الخضر واليابس ,,,,وأهل قطر بعضهم ياكلون في بعض ,,,خايفين على كراسيهم ...

الله المستعان ...

[نوفا91]

الله يكون فالعون ويكتب لها ربي اللي فيه خير ..

[alrheeb2020]

والله ماعرف شارد .. موضوع صج محزن


الله يوفقها ويسر لها امورها ويرزقها بالوظيفه السنعه يارب

[مجنون الفتك]

الحل أن تغير زوجتك الى جنسية اخري وتختار أحد هذي الجنسيات :
1- أمريكية .
2- بريطانية .
3- جنوب افريقيا .
4- هندية .
5- فلبينية .
6- لبنانية .
7-مغربية .
8- تونسية .

وانشاالله أمورها طيبة في توظيف اسبير ما تحتاج واسطة ( طول ما هي قطرية راح تحتاج الى واسطة ووطني حبيب صباح الأخير )

الدليل : عمرك سمعت شكاوي في وطني الحبيب عن التوظيف من هذه الجنسيات ؟؟؟؟)

الجواب : أكيد لا لأن أمورهم في العسل ويازعم انهم خبرة واكثرهم ضايع في البلاده وصار له سنين ما يعمل
ويجي البلاد لا يمسك مدير أو مسؤول ويواظف ويقابل أهل قطر الأكفاء ويتحكم في مصير توظيفهم .

هذا الكلام ما أحد خبرني فيه بل عن سابق تجربة : أنا قابلني هندي حامل جنسية ابريطانية للتوظيف بقطر فونديشن .وأول ما قابله ما عرف الوظيفة الى جاي أنا عليها يعني كان يقابلني اي كلام ولما بعث الأميل ذكر وظيفة غير الى انا جاي عليها معناتها الأخ ضايع في السالفة ويخبط ابراحته الأن جنسيته حكمت عليه أن ما في حد يحاسبة .المسؤولين القطرين في قطر فونديشن كل واحد عاد نفسة وزير وكلا في اجتماعات وإذا قابلته يحسسك أن الراتب والتوظيف من جيبه وأنه صاحب الملك .

الله يعينا على الأجانب والمسؤولين القطرين الى ما فيهم خير ولا ينفعون أهل أبلادهم .

[بوراشد82]

اللي يضحك انه مسؤل التوظيف في سباير أجنبي,,

يعني بيكون قلبه على القطريين مثلا !!!

[meeemz]

اف اف اف
الله ياخذهم الله ياخذهم لا مؤهلات ولا شي
قههههههههههههههههههههههههههههههههههههههههر
بس سؤال لي متى بنشتكي
الكل يتكلم ولا شي يتغير .. تهميش شنيع ...والله عندهم تعصب ضد القطري ... جنه الا حد موصيهم ضدنا
وسمعت انه حتى الخليجين بعد يطقطون في قطر ومالهم نصيب ..

[meeemz]

و اللي يحر انه الكلاسات في سباير بالانجليزي مع انه معظم المشتركات عرب ..انا دخلت كلاس العصر كله قطريات ومن دول الشام مافيه الا وحده هنديه وثانيه شكلها اوروبي والكلاس حوالي 40 والمدربه مصريه وطول الوقت تتكلم انجليزي مع انها لغتها عربيه ؟!! يعني عشان خاطر هالثنتين .. والله البنات كانوا يخبصون في التمرين ومايفهمونها .. والله ذكروني بسالفه رفيجتي تقول انه كانت ادارتهم تجتمع كل اسبوع وكانوا كل اللي يحضرون قطرين لكن عشان خاطر الموظف الامريكي اليديد صار الاجتماع والاوراق المتداوله بالانجليزي...وصديقتي صارت مثل الاطرش في الزفه !

[مريومة]

و اللي يحر انه الكلاسات في سباير بالانجليزي مع انه معظم المشتركات عرب ..انا دخلت كلاس العصر كله قطريات ومن دول الشام مافيه الا وحده هنديه وثانيه شكلها اوروبي والكلاس حوالي 40 والمدربه مصريه وطول الوقت تتكلم انجليزي مع انها لغتها عربيه ؟!! يعني عشان خاطر هالثنتين .. والله البنات كانوا يخبصون في التمرين ومايفهمونها .. والله ذكروني بسالفه رفيجتي تقول انه كانت ادارتهم تجتمع كل اسبوع وكانوا كل اللي يحضرون قطرين لكن عشان خاطر الموظف الامريكي اليديد صار الاجتماع والاوراق المتداوله بالانجليزي...وصديقتي صارت مثل الاطرش في الزفه !

محترة

بس مابي اعلق :secret:

[Xx QATARI xX]

كلامك صحيح أخوي القاسي.
أخوي الصفحة هذه فيها أسماء وصور المدراء الخمس الكبار في أسباير واثنان منهم قطريون. اطلب مقابلة أحدهم واشرح له قصتك أو أوصلها له في رسالة مكتوبة:
http://www.aspire.qa/ourvision/seniormanagementteam.aspx?categoryid=16



مع احترامي حق المدارء اللي في الرابط ،، ياريتهم يهتمون بالقطري الموجود عندهم ،،

مع معارفي ،، استشاري قطري كان موجود في سباير قدم استقالته ورجع مؤسسة حمد
في البلاد اللي كان يدرس فيها عطوه عرض عمل خيالي بس عشان يقعد عندهم لكنه رفض
ورجع الدوحه وللاسف ،، يوم راح سبايرماقدر يستحمل الوضع
وقالهم ،، في امـــان الله

يا اخوان ،، والله لو نتكلم من اليوم لين يوم الدين
مافيـــــه امل وانسو ان الوضع يتعدل من هالجانب
الشكـــــوى لله

[هدوء 2]

صار لي فترة طويلة مااكتب.... فقط استطلع ع مجريات الامور ولكن هذا الموضوع شدني والسبب من اعز الربع وهم جيران خريج تربية بدنيه سنة98 - 99 سي في ماعليه كلام التقدير دائما امتياز طول السنين بطولات اذا ماتحرزالمركزالاول مستحيل تشارك ودائما كلمتها في نفسها ولله الحمد باب المنافسة معاها مفتوح لجميع القطرين تخصص تربيه بدنية وغير التربيه البدنيه اللي متربعين في المكان الرياضي ولستيج الفاصل وقت تدخل عالم البطولات قالوا فلان داخل ... البطوله له .... الاهم تم الانتداب للعمل ف اللجنه المنظمه لدورةالالعاب الاسيوية( اسياد 2006 )من عام 2004 لغاية انتهاء المدة وقدم وياليت ماقدم سواء اسباير .... اللجنةالاولمبية بالعربي أماكن الرياضه .... اللغة الانجليزية اوكية من غير عنده دورات ف المجال الاداري ودبلوم ف الادارة والسي في حافل ... والى ماله اخر .... بالنسبه لردود اللي لاقاها من بعض المسؤلين الله يكثر من أمثالهم اللي _اللجنه العليا_ للاسف ماتدري عنهم ... البعض قال تنازل عن الشهادةالجامعية ...والبعض الاخر قال راح اوضفك ع الشهادة الثانويه ...واللي بعدة قال راح تاخذ مسمى ثانوي واللي بعدة يقول ماراح يحسب سنوات الخبرة واللي يغرد ويقول مش عايز يقابل واللي قال مافي شاغر والكلام كتير ان كان ع رياضتنا الله بالخير وع الدنيا السلام .... سؤال اوجهه لقائد المسيرة الرياضيه ف قطر _ حفظك الله _ وين موظفي الاسياد انا مااقول المدراء ...المدراء اخذو حقوقهم واكثر.... القصد الموظفين الاستاف اللي كانو يقومون بالاعمال .... اللي لم يجد فرصة التعين ( البعض ) في اي مكان لعدم حصوله ع الواسطة ودائما يقول واسطتي ربي ... من اللي نظر لهم .... للعلم شخص ف اسباير ما يعرف انجليزي وبتقول يطقق بنقول ياالله والكمبيوتر الله بالخير بتقول يطقطق بعد بنقول ياالله بتقول ايش عرفك ..باقولك جمعني معاه العمل سنين ... الكلام في الرياضه وايد ويبيله وقت وكعدة وشاي ههههههه امزح اقصد عمرة ماينتهي والعمر راح مابقى منه الا القليل والله يكون ف العون

و دائما ف اخر كلامه لي :
ليت الايام ترجع 10 سنين بس.......... لا أكون غيرت التخصص ما اقول الا ياحيف عليج ياالرياضه واستغفر الله العظيم .....واسمحلي وشوف المقارنة بين اللي انت كتبته والي انا كتبته ايش تعليقك عليه ..... ولك مني التحيه

[الرويـس]

قول له ( لعله خير ) في انها ما اشتغلت

[Doha Sun]

اسباير لغير القطريين
واذا عنده مستودع للواسطة خله يستعملها كلها

[ميموري]

مو بس اسباير اجانب

الله يعينا على تحطيمهم لنا

بكل الطرق يحاولون يكسرون القطري

واخر شي بالتقاييم الحلوه

لهم الامتياز والباقي لنا

[آهـل شَـرق]

يا بوراشـد نصيحتـي حـق رفيـجك انـه يحـاول بشتـى الطـرق والاسـاليب وما يوقـف لمجـرد كذبـه خبيثـه .. لانـ هـ الكذبـه في الغالـب وراهـا مؤامـره آخبـث ..

المشـكله ان انـت يالمـواطن بريء صافـي وصـادق النيـه وماتـدري باللـي حـولك وشـ نوايـاهم .. هـ الاجـانب طاحـوا علـى كنـز وللمحافظـه علـى الكنـز عليهـم بابعـاد الكـوادر القطـريه المبـدعه عـن مجـال عملهـم !!

ذكـرت توظيـف اصحـاب الثانويـات وهـذا دليـل يقطـع الشـك باليقيـن انهـم يحـاولون الوصـول لـتقطيـر 50% مـن الوظائـف ولكـن لـ ذوي مؤهـلات لا تشفـع لهـم في التقـدم مستقبـلاً !!

وحـط في بالـك ان القطـري دامـه توظـف في مثـل هـ المجـلات استحـاله تتـم اقالتـه الا لسـبب وجيـه الا وهـو (اهمـال العمـل) فقـط !! وهـم يبـون يلعبـون بالسليـم !!

هـذي مجـرد وجهـة نظـر تطـورت وصـارت طعـن في كفائـة هـؤلاء لانـ منتـوج اسبيـار اكتيـف آو تالنـت ماهـو ملحـوظ هـذا اذا كـان فـي منتـوج من الاسـاس !!

[الحجاجي]

خير يا بوراشـــد


اذا لها نصيب في هالمكان


بعد هالمحاولات ..


باذن الله بتتوفق ..


الخــير في ما اختاره الله ..

[دلة الرسلان]

زين من مدير المديرة البريطانية روحوا قابلوه :)

[بوراشد82]

دعواتكم والريال يبشركم انه دخل على ملك الملوك وطلبه عسى مايرد يده صفر

وحاليا بانتظار رد من أحد السنافية مثلكم وشرواكم هبة ريح بيدخل وبيطلع من صاحب القرار وبيكلمه

وعقبال كل من يبي يتوظف ان شاء الله

[bos3eed]

المتصل: آآلووو وطني الحبيب
محمد العمري: تفضل اخوي اشمشكلتك؟
المتصل: زوجتي تبغي تتوظف في اسباير بس ما يوافقون عليها لانها قطرية...
محمد العمري:انزين اخوي قولي انت قدمت عندهم!!؟
المتصل: قدمت وصار لي سنه وما ردوا علي
محمد العمري: انزين جربت انك تقدم مرة ثانية
المتصل: انا رحتلهم مرتين وفي كل مرة ما وافقوا عليها
محمد العمري: انزين قدم مرة ثالثه وتاكد اخوي ان الاخوان في اسباير ما راح يقصرون معاك
المتصل: بس انا احس انهم ماوظفوها لانها قطرية وفي عنصرية ضد القطريين في اسباير
محمد العمري: لا اخوي تاكد ان ها الشي غير صحيح وان القطريين يشكلون 99.99% من القوى العاملة في قطر ومايصير اننا نوجه الاتهامات بدون دليل
المتصل: يعني انا اقص عليك!
محمد العمري: لا لا انا ماقلت جذي, بس لازم نتاكد من كلامك.

محمد العمري: نستقبل اتصال اخر آآلووو
المتصل: اخوي باص كروه داس ولدي وذبحه
محمد العمري: انت متاكد ان الباص الي داس ولدك ولا يمكن ولدك كان راقد تحت الباص...
النهاية

[بوراشد82]

زين من مدير المديرة البريطانية روحوا قابلوه :)

مسؤلة التوظيف البريطانية مديرتها وحدة من جنوب أفريقيا ومدير الأخيرة واحد استرالي ,,,

[المخباط]

مسؤلة التوظيف البريطانية مديرتها وحدة من جنوب أفريقيا ومدير الأخيرة واحد استرالي ,,,
زين بشر ويش صار معاك :telephone:

[شـعـشـبـونـه]

اولا الله يعطيك العافيه..

ثانيا: لا واسطه ولا ما يحزنون

اذا لها نصيب في هالشغله بتاخذه

والخيره فيما اختاره الله..

الله يوفقها

[موضي قطر]

المتصل: آآلووو وطني الحبيب
محمد العمري: تفضل اخوي اشمشكلتك؟
المتصل: زوجتي تبغي تتوظف في اسباير بس ما يوافقون عليها لانها قطرية...
محمد العمري:انزين اخوي قولي انت قدمت عندهم!!؟
المتصل: قدمت وصار لي سنه وما ردوا علي
محمد العمري: انزين جربت انك تقدم مرة ثانية
المتصل: انا رحتلهم مرتين وفي كل مرة ما وافقوا عليها
محمد العمري: انزين قدم مرة ثالثه وتاكد اخوي ان الاخوان في اسباير ما راح يقصرون معاك
المتصل: بس انا احس انهم ماوظفوها لانها قطرية وفي عنصرية ضد القطريين في اسباير
محمد العمري: لا اخوي تاكد ان ها الشي غير صحيح وان القطريين يشكلون 99.99% من القوى العاملة في قطر ومايصير اننا نوجه الاتهامات بدون دليل
المتصل: يعني انا اقص عليك!
محمد العمري: لا لا انا ماقلت جذي, بس لازم نتاكد من كلامك.

محمد العمري: نستقبل اتصال اخر آآلووو
المتصل: اخوي باص كروه داس ولدي وذبحه
محمد العمري: انت متاكد ان الباص الي داس ولدك ولا يمكن ولدك كان راقد تحت الباص...
النهاية


والله من يوم صار ماسك البرنامج ماعاد سمعته كافي علي القولون :weeping: