ابغي نصيحه من الاخوان في مشروع المقاولات

[منابر خالده]

السلام عليكم ورحمه الله

عندي مهندس من جنسيه عربيه يحاول يفتح معاي شركه مقاولات بناء*بصراحه ودي ادخل في المقاولات لاكن في نفس الوقت خايف من عمليات النصب انا فتحت لي مؤسسه و ابغي ابدى بالمشروع معاه لاكن هو موب
على كفالتي المهندس شغله زين وشفت شغله واعرفه لاكن بعد الحذر واجب
ياليت من الاعضاء اللي لهم خبره يفيدوني وينصحوني عشان اتجنب المشاكل

ابغي نصيحه منكم
مشكورين
*

[ماجستك]

خذ اهم النصايح من مجرب

بسم الله

1- اذا فتحت سجل تجاري ومعاك شريك اجنبي لازم اتسوي جرد سنوي عند شركه محاسبه معترفه من قبل وزاره الاعمال والتجاره (وهذا ايكلفك 10,000) واذا عندك ارباح ..الوزاره تاخذ 10% من ارباح الاجنبي

بعني لاتدخل معاك اجنبي في السجل نهائيا

2-حاليا مافيه شغل في الدوحه(نهائيا)..لذلك اذا عندك ناس تطلع شغل (بشكل مستمر) من تحت الارض توكل على الله..ولا تتوقع ان الشغل يجيك الى مكانك ابدا

3-حاول تاخذ محل صغير باجار بسيط جدا خاصه في البدابه

4- الموضوع راجع لك بعد الله سبحانه..استخير وشوف...بس انا ما انصح انك تبدا الحين..على الاقل انتظر لين انشوف من ياخذ بطوله العالم 2022 ..الله لا ايجيبها


الله ايوفقك

[منابر خالده]

مشكور يالغالي على تجاوبك السريع المؤسسه باسمي وهو حاول يكون شريك معاي لاكن انا فضلت ان يكون كل شي باسمي بروحي عشان ما اطيح في مشكله او خطاء
مشكور مره ثانيه وعساك على القوه

[khaldoon]

تاكد انه هو اللي بيجيب شغل و الا يعتمد عليك لانه في كثير مقيمين يفتحون شغل مع المواطنين على امل انه المواطن هو اللي راح يجيب شغل من علاقاته المتعدده

تحياتي

[منابر خالده]

انا حاليا ضامن موقع او بيت بس ابي مثل ماتقول احط النقاط على الحروف معاه بحيث اضمن نفسي واضمن شغل المؤسسه وابي اتجنب الثغرات

يعطيك العافيه

[طالع بن نازل]

اولا اخوي لازم تعمل دراسة جدوى للمشروع وهل انت قادر على التكاليف .
ثانيا بالنسبة للمهندس هل هو قادر يجيبلك نقل كفالة .( هذا اهم شي ).
ثالثا انت ممكن تقوله انه له نسبة من الشغل فقط بدون راتب علشان يدور الشغل دواره .
رابعا سوها مؤسسة باسمك .
خامسا ترا فيها تعب ومشاكل وجع راس , هل انت مستعد للامور هذي .

والله يوفقك .......................

[منابر خالده]

اتفقت معاه على نسبه مع العلم هو ماراح يدفع شي مع انها كبيره بس علشان مايلعب علي

اما موضوع الكفاله لا هو ما راح يكون على كفالتي

[مناتسا]

اخوي انا عندي بعض النقاط

اولا : اذا كانت مؤسسه انا انصحك تخليها شركه ذات مسؤليه محدوده لان خاصه في المقاولات اذا في غلط ولا رحت المحكمة بيتعدون على املاكك الخاصه

ثانيا : نقل الكفاله من اهم الامور واذا بينه وبين كيله الحالي مشكله انصحك خلك بعيد لين ما ينقل كفالته

ثالثا : لازم تكون قريب من الحسابات وتوظف المحاسب من طرفك وتخلي ولائه لك انت

رابعا : مثل ما قالو الاخوان قبلي خليه يعرف انك ما راح تجيب اي شي وانه هو المسؤل عن البحث عن المشاريع واي شي انت تجيبه يكون زيادة خير وليس الاساس

خامسا : ولان هالنقطة هي الاقل اهميه خليتها للاخير. عندنا في قطر بين كل بيت وبيت في شركة مقاولات وبين كل اخو واخوه في واحد منهم في هالمجال. الشغل فيه فلوس حلوه ودخلها مغري ولكن عوار الراس مع العمال والزباين والتأخير في المواد ألخ ألخ ألخ مقارنة بالمنافسه الي في السوق انا شخصيا ما افكر ادخل فيها مع اني انعرض علي نفس العرض الي جاك

في الاخير انا انصحك صل استخاره والله بيسرلك دربك

وبالتوفيق

[منابر خالده]

مشكور يالغالي على الرد

هو ماعنده مشاكل مع كفيله بس هو مختلف معاه على النسبه فقط

النقطه الرابعه مهمه والله يجزاك خير على التنبيه

مشكور وماقصرت

[BigBrother]

بسم الله الرحمن الرحيم

الاخوان قبلي نصائحهم من ذهب واتمنى تتقبل اضافتي

اولا : المؤسسة حدود مسؤليتك خطيرة فيها
يفضل تسوي شركة شخص واحد محدودة المسئولية
ولا تنسى تذكر راس المال وتذكر اسم الشركة متبوع ب : ش.ش.و
حتى في البزنس كارد علشان تكون حدود مسؤولية الشركة في راس مالها فقط في حالة الخسارة او المشاكل لا سمح الله

ثانيا : اذا كانت نسبة الشريك الاجنبي مرتفعة ... انصحك بالشراكة الرسمية حتى لا تكون تستر تجاري وتهرب ضريبي ,,, وشوف لك محامي معتمد يسوي لك الاتفاقيات من الالف الى الياء تحمي نفسك فيها وتكون على بينة من الناحية القانونية


ثالثا : الله يبارك لك في تجارتك ومالك واهلك واتمنى لك كل التوفيق

[منابر خالده]

مشكور على النصايح يالغالي

وعلى الاضافات الذهبيه

والله يجزاك خير على الدعاء والله يوفقك في كل خطوه

والموضوع مفتوح لاضافه اي نصيحه او مشوره من الطيبين

بارك الله فيكم

[مضارب مستثمر]

لابد يكون على كفالتك,,,,,,واذا انت واثق منه
وستتابع الاعمال اوكي,,,,,

غير هالكلام ,,,,,,ابعد عن الشر وغني له,,,,,

والناس بهالايام تشتري راحتها بفلوس,,,,,,

ودور لك على استثمار مجدي افضل من عوار راس المقاولات

الله يوفقك

[منابر خالده]

مشكور اخوي اكيد واثق منه
جزاك الله خير

[ماجستك]

حاولت ارد ع رسالتك بس انت حاط خاصيه عدم استلام رسايل من الاعضاء


مرحبا

اول شي اتطلع سجل تجاري من وزاره الاعمال والتجاره-يطلبون صوره بطاقتك
وعقب اتروح البلديه ومعاك عقد الاجار مال المحل وصوره بطاقتك وصوره السجل وصوره الافته الي فوق المحل وتطلع رخصه بلديه

وعقب تاخذ السجل والرخصه وتروح اتطلع قيد منشاه من الجوازات ..وقيد المنشاه ايكون فيه اسم المخول بالتوقيع يعني هو الشخص الي يقدر ايوقع عشان يطلب عمال او ايسفر عمال

وهذي الثلاث اوراق هي الاوراق الاساسيه حق كل محل(السجل+الرخصه+قيد المنشاه)
---------------

نصيحه لاتدخل اجنبي معاك في السجل مثل ماشرحت لك قبل يعني السجل ايكون باسمك انت فقط وهو شريك معاك (يعني رسميا محد شريك معاك)..ويفضل ايكون هو على كفالتك لانه بيسلم وبيستلم فلوس منك ومن الزباين واذا مب على كفالتك ماتضمنه يمكن ياخذ دفعه من كل شخص ويعطيهم وصولات باسم شركتك وعقب ايسافر ويخليك بروحك اتسدد

ايضا..اذا تبي تبني بيوت حق الناس ..تر ماتقدر اتاجر المحل فتره بسيطه لين اتطلع كل الاوراق وعقب اتسكره..لان مجرد اتشيل الافته ايسكرون الرخصه..و كل بيت تبي تبنيه لازم اوراق المقاول اتروح البلديه ويتاكدون ان رخصته شغاله..
لذلك لازم اتكون مستاجر المحل على طول والافته موجوده على طول...
والاجارات ناااااار للاسف.. بس تقدر تستاجر محل خاارج الدوحه ..ابعد مكان تقدر اتحصله برخيص..وتاجره وتحط لافتتك لان اصلا المحل ماتحتاجه الا عشان اتكون في الصوره القانونيه بالنسبه حق البلديه عشان مايسكرون الرخصه

ايضا لازم اتسوي ختم من عند اي مطبعه ولاتخلي الختم عند حد كان من كان..لان توقيعك مع الوقت كلن بيعرفه بس الختم لازم محد ياخذه نهائيا..لان وجود توقيعك وختمك يعني انت مسوؤل


الله ايوفقك...لكن شخصيا وبصراحه مثل ماقلت لك مانصح ان تفتح مقاولات الحين الا اذا عندك من يجيب شغل من تحت الارض وبشكل متواصل لان عندك رواتب عمال واجار محل واجار سكن ومواصلات واقامات وووووووو


فيه حديث عن النبي عليه الصلاه والسلام ايقول (تسع اعشار الرزق من التجاره)
او كما قال عليه الصلاه والسلام
الله ايوفقك