شلون افتح مطعم او معصرة؟؟

[ورقــة أمــل]

السلام عليكم

ابي افتح مطعم وماعرف شنهي الاجراء من الالف الى الياء ممكن حد يساعدني :shy:

مطعم او معصرة صغيرة مب مخططة على شي كبير لان المبلغ اللي عندي مايتجاوز مية الف :eek5:

واهم نقظة شلون اضمن حقي من غير مايبوقوني العمال :rolleyes2:

[قطراوي للأبد]

وعليكم السلام ورحمه الله وبركاته


ان شاء الله اقدر افيد باللي اقدر عليه

اولا .. السجل التجاري والرخصه ..

استخراج السجل التجاري بالأنشطه المطلوبه من وزاره الإقتصاد والتجاره .. ومادري كم بيكلف بس على حسب الأنشطه الموجوده .. لكن حروه 3000 .. اقل او اكثر بشوي ..

استخراج الرخصه التجاريه من البلديه التابع لها .. وبما ان هذي اول مره ! .. فـ ممكن تستخرجها من وزاره الإقتصاد الدور الأرضي على اليمين ..

لكن لأن هذا مطعم .. في شروط خاصه ... يكون ملبس سيراميك كامل .. لون فاتح ! ويستحسن ابيض .. وارخص مكان يبيعه جنب وكاله الأوستن مارتن عند دوار مدماك .. نسيت اسم المحل والله ..

وعندك شفاطه ! لازم تكون مرتفعه فوق المبنى بـ مترين .. وفي اشياء ثانيه .. مر على البلديه وخذ البروشور من عندهم .. قبل ماتبدى في اي شي

طبعا استأجار المحل يكون بين الخطوتين ! بين الرخصه وبين السجل !! .. بعد ماتستخرج السجل ! اجر محل .. وخذ عقد الإيجار وروح البلديه خذ رخصه تجاريه + رخصه اعلان ..

بس قبل ماتاجر !! تأكد ان الشروط كلها موجوده في محلك !


وبخصوص المراقبه وهاي كله .. المشكله ان هالشي صعب !!! .. لأن هاي اكل ..

حاول تخلط بين الجنسيات .. يعني لاتخليهم كلهم هنود !!!

ووو شوف شاللي يناسب نشاطك .. يعني اذا معصره مثلا .. حط لك كيمره عند المدخل تراقب مكان خروج الطلبات .. ووحده داخل ! عند مكان العمل .. وعليك الحسبه انت

هذا اللي فـ بالي ! انا ممكن اساعدك فالخطوات اللي فوق .. لكن بخصوص شلون مايبوقونك ! هاي سالفه ..

اذا عندكم هندي ثقه مثلا !!! .. حطه فوق راسهم .. او اشتغل معاهم بنسبه ! .. ولا سو مثل بعض الناس .!! تاخذ منهم مبلغ شهريا ! والباقي لهم < مانصحك طبعا ..

والله يوفقك في كل الأحوال .. واذا في شي اقدر اساعد فيه .. انا فالخدمه

[بوعيسى1]

الله يوفقك اخوي

[مخطط قطري]

الله يوفق ويجعله مشروع خير عليك وبارك الله لك فيه

[كاشف الغطاء]

الله يوفقك ويعطيك العافية اخوي قطراوي كفيت ووفيت انا كان عندي تقريبا نفس الاستفسارات

عندي سؤال واحد بس .. هل ممكن مبلغ 100 الف ريال يكفي لادارة معصرة ؟

ومن اين استطيع جلب العاملين فيه

[البدع]

الله يوفقك ويعطيك العافية اخوي قطراوي كفيت ووفيت انا كان عندي تقريبا نفس الاستفسارات

عندي سؤال واحد بس .. هل ممكن مبلغ 100 الف ريال يكفي لادارة معصرة ؟

ومن اين استطيع جلب العاملين فيه

لا .. لاتكفي حتى لخلو محل

اعتقد 200 الف اقرب

[captin]

إضافة على ما تفضل به الإخوان

من شرح وسرد للإجراءات الرسمية الخاصة لبدء النشاط
من استخراج سجل ورخصة واستقدام عمال

أحب أنهي بأن

نشاط المطعم أو المعصرة أو البقالة أو محل الخضار والفواكة والكهربائي وغيرها
من الأنشطة التي لايمكن إدراتها من قبل الشريك القطري لأنها تحتاج من الشخص الوقوف اليومي والتواجد المستمر ومراقبة كل حركة لضمان حصر الداخل والمنصرف
ومراقبة الحسابات. لأن فيها شراء مواد من الغير وبيع مواد بشكل آخر للزبائن

الحل الوحيد تأجير السجل التجاري لشخص متخصص في المجال
هو يدير وهو يجيب العمال وهو يشتري المواد من السوق
والقطري يأخذ مبلغ تأجير السجل الشهري المتفق عليه
مع التأكد من دفع الأجرة الشهرية للمحل وصرف الرواتب بإيصالات ودفع رسوم الكهرباء والماء والرسوم الحكومية الأخرى يأخذ الكفيل منها نسخة كل شهر ويحطها بملف عنده في البيت
تحسبأ لأي مطالبة قد تنشأ في المستقبل.

النصيحة مري علي بعض من الهنود أصحاب المطاعم والمعاصر المشهورين
وقولي لهم عندي سجل تجاري في النشاط الفلاني تأجرونه وانا بوفر لكم الدعم
الإداري من أوراق وتلخيص فيز واجراءات رسمية.


بالتوفيق ان شاء الله

[ورقــة أمــل]

الله يجزيكم خير ويرحم والديكم ماقصرتوااا

ان شاء الله لو عندي اسال ثانيه او ماشتغل في المشرووع بعلمكم

[SomeOne]

المبلغ لايغطي ، فهذا الزمن ،

صعوبة الحصول على ايجار محل رخيص واذا كان من غير خلو ،

[ورقــة أمــل]

السلام عليكم

الموضوع فتحته من زمان

الحين انا بصدد فتح سجل تجاري جديد باذن الله ومحتارة مابين مطعم او مغسلة ملابس تكون للنساء فقط

ياريت تفيدوني

[بومحمد911]

السلام عليكم

الموضوع فتحته من زمان

الحين انا بصدد فتح سجل تجاري جديد باذن الله ومحتارة مابين مطعم او مغسلة ملابس تكون للنساء فقط
ياريت تفيدوني

بصراحة هذي فكرة حلوة اعتقد لاتوجد عندنا في قطر مغسلة نسائية

طبعا كل الستاف لازم يكون نسائي افضل علشان الخصوصية للحريم

وبالتوفيق

[STAR]

فكرة المغسلة حلوة بس سالفة انها تكون نسائية..‏!! هاذي يبيلها شرح؟!‏

انا اشووفها لو تخلينها نسائية ورجالية افضل...


ليش ما تفكرين بخياط نسائي؟! بشرط الطاقم الموجود يكون نسائي ‏
يعني وحده ‏اما هندية او فلبينية ‏‏(‏:

انا لو عندي فلووس كنت بسوي هالمشروع..

[ورقــة أمــل]

مابي خياط نسائي مبدئيا لان ماعندي خبرة كافية في هالموضوع ويبيله متابعة

المغسلة قلت انها فكرة محد نفذها من قبل وتخدم الحريم بشكل اكبرر واقدر اتابعها بنفسي دام الطاقم بيكونون كلهم حريم

اقدر اسويها رجالية ونسائية بس ماينفع احط حريم ويجوني رجال لغسل ملابسهم

ارجو منكم الافادة شنو الاقل من ناحية التكاليف والمتابعة واضمن حقي من الارباح

[البدع]

أنا جربت مطعم

وما أنصحك

مغسلة افضل

وبالتوفيق

[محمد الجفيري]

ما شاء الله ما قصروا الاعضااء

عقبااال العزيمة في المطعم هههه :)

[احمـد]

والله يااختي اعتقد ان مغسله لكلا الجنسين افضل لج وبعدين سالي نفسج شنو الخصوصيه في الموضوع , لان ببساطة المجتمع الحين عندنا منفتح يعني لاتتوقعي ان فيه حريم بيفضلوا مغسلتج لانها حريميه , وبعدين انتي تاجره يعني تدورين الربح والمغسلى ان شاء الله مافيها اي كلام من ناحيه الدين , يعني انصحج توكلي على الله وافتحي مغسله لكلا الجنسين , وبخصوص التكاليف هي نفسها سواءا مغسله للحريم بس او مختلط .

بالتوفيق ان شاء الله

[STAR]

والله يااختي اعتقد ان مغسله لكلا الجنسين افضل لج وبعدين سالي نفسج شنو الخصوصيه في الموضوع , لان ببساطة المجتمع الحين عندنا منفتح يعني لاتتوقعي ان فيه حريم بيفضلوا مغسلتج لانها حريميه , وبعدين انتي تاجره يعني تدورين الربح والمغسلى ان شاء الله مافيها اي كلام من ناحيه الدين , يعني انصحج توكلي على الله وافتحي مغسله لكلا الجنسين , وبخصوص التكاليف هي نفسها سواءا مغسله للحريم بس او مختلط .

بالتوفيق ان شاء الله

:nice::nice::nice:

هذا اللي كنت ابي اقووله