سهم إعمار

[نوكيا]

طبعا سهم غني عن التعريف في سوق دبي للأوراق المالية
بدايته كانت 2 درهم
وقبل 6 شهور من الآن كان سعر السهم 7 دراهم فقط وسبب ارتفاعه النتائج القوية للست شهور الاولى
والان 13 درهم لقرب توزيعات الارباح
وأغلب المحللين في مختلف المنتديات متفائلين فيه
شركة لها مشاريع جباره في مختلف الامارات اكيد سهمها له مستقبل

[قـطـريـه]

شلون نقدر نشتري السهم من قطر,,,,,,,

[السلطــــان]

السلام عليكم


اخوي تصدق امس كنت افكر بسهم اعمار قلت خلني ادش على سوق دبي للاوراق المالية

شفت سعر السهم طلع بـ 12 قلت ااوووه ماشالله رخيص !!

لكن لما شفت التقرير السنوي . . السهم يا طويل العمر وصل 60 وبعدين طااااح لين وصل 12 !!

تحيااتي

[نوكيا]

Wooow!!!
إعمار كان بـ 60
ماتوقعت
مانتبهت لتاريخه لاني متابعة يمكن من 7 شهور بس
مشكوووووووووووووووور السلطان على التوضــــيح للنقطه ذي

[إنتعاش]

يا اخوان سهم اعمار الحين غير وقبل غير


الآن عملوا تجزئه للسهم

وصار السعر وفق التغير بعد التجزئة بالشكل هذا

وما له شغل ابد الله يسلمك يالسلطان

على فكره قبل 4 شهور كانت بـ 7 ريال

والآن بـ13

يعني المليون صارو اثنين

[سهم أب]

السلام عليكم ورحمة الله وبركاته....

والله يا جماعة سبحان الله، أمس كنت أفكر أحط مبلغ في اعمار وأنساه.......

وش تنصحوني يا جماعة الخير، خاصة وهذي المرة الأولى اللي أفكر اني أحط في مكان خارج قطر......

[إنتعاش]

هلا فيك اخوي الغالي

شوف اخوي بالنسبة للسوق الاماراتي

نظرتي وامنيتي الشخصيه

في ( أملاك للتمويل )

لعدة اسباب :

1- اسلاميه
2- تمويل - يعني فلوس في فلوس-
3- ارباحها السنه هاذي 300% وماراح توزع ارباح تبي تقوي من مركزها المالي
4- سعرها 4 درهم
يعني بالله عليك بيوصل نص درهم !!

والله ودي اخذ لي 100 الف سهم وانساهم :)

[سهم أب]

السلام عليكم ورحمة الله وبركاته......

تسلم والله على النصيحة يالغالي..... وخبرني إذا نويت علشان أتشجع وأحط وياك...... :D

الله يعطيك ألف عافية....

[السلطــــان]

احم انا اسف :p

[إنتعاش]

تم تجزئة الأسهم بناء على قرار الجمعية العمومية غير العادية بتاريخ 22/6/2004 بنسبة 10 أسهم لكل سهم مملوك. بالتالي تغيرت القيمة الاسمية من 10 دراهم إلى 1 درهم، وأصبح عدد الأسهم المصدرة 2.650.00.000 سهم.

[sulai6i]

اخوي انتعاش

تقصد ان سهم اعمار عملوا له سبليت ؟

[إنتعاش]

نعم اخوي

واحد في حاله

عملوا له تجزئة

يعني السهم الواحد صار 10 اسهم

يعني اللي كان بستين قسمهم على 10 = صار 10 اسهم كل واحد بـ 6 ريال

بالعربي الفصيح

سعر إعمار حاليا ً : 13 ريال

لو انه على الوضع القديم قبل التجزئة لكان سعره = 13 * 10 = 130 ريال

اتمنى الصورة اتضحت اكثر

[eXpert*]

بصراحة انا من دخلت موقع ســــــوق دبــــــي الـــمــــالـــي على الانترنت وشفت تنظيم الموقع وانا كاره اني ادخل بورصة دبي في خاطري كنت اقول : (( الكتاب ينقري من عنوانه )) بس دام اغلب الاعضاء يشيدون بالاستتثمار في ســــــوق دبــــــي الـــمــــالـــي بعيت اعرف شالطريقه لشراء الاسهم ؟؟ هل هناك مكتب وساطه في قطر ؟؟ ولا لازم اقبض الخط واشتري ؟

مع جزيل الشكر

[sulai6i]

راشد السليطي



الشركات التي يسمح لك بالتداول بها ان لم تكن من مواطني دولة الامارات هي :

شركة أبو ظبي لبناء السفن (adsb)
بنك الشارقة (bos)
البنك التجاري الدولي (cbi)
بنك الخليج الأول (fgb)
شركة أبو ظبي للمواد الغذائية (foodco)
شركة اسمنت الخليج(gcem)
شركة رأس الخيمة للصناعات الدوائية(julphar)
شركة الواحة العالمية للتأجير(oilc)
شركة اتصالات قطر (qtel)
شركة سيراميك رأس الخيمة (rakcec)
شركة اسمنت رأس الخيمه (rakcc)
شركة رأس الخيمة للاسمنت الأبيض (rakwct)
شركة رأس الخيمة للدواجن والعلف(rapco)
الشركة السودانية للاتصالات(sudatel)
شركة أعمار العقارية (emaar)
شركة أملاك لتمويل(amlak)
الشركة الوطنية لتبريد المركزي (tabreed)

---------------------------


ولازم اخوي تفتح حساب عند وسيط هناك ( يعني تقبض خط ) وعقب كل معلملاتك بالتلفون .. ولا تنسى تسوي لك رقم مستثمر عندهم إما عن طريق السوق او عن طريق الوسيط


اولاً : الذهاب لسوق دبي المالي الموجود في مركز دبي التجاري على طريق الشيخ زايد


ثانيا : احضار جواز السفر وصوره من جواز السفر


ثالثا: تعبئة النموذج الخاص لفتح حساب مستثمر في سوق دبي المالي ( تاخذ العملية بالكثير 30 دقيقه لاستخراج الرقم )


رابعا: اختيار وسيط لتداول .. إقتراح .. " الامارت الدولي للوساطه " والسبب انا هذا الوسيط يتيح لك التداول في سوق دبي وأبوظبي معاً بينما الوسطاء الاخرين يتيحون لك التداول في سوق واحد فقط


خامساً : بعد اختيار الوسيط .. تقوم بتعبئة النماذج الخاصه لاستخراج أرقام الوساطه الخاص بك .. في حالة اختيار الامارات الدولي للوساط .. ستقوم بتعبئة نموذجين .. نموذج لسوق ابوظبي ونموذج لسوق دبي


سادساً: سيقوم الوسيط بتوجيهك لأحد البنوك لفتح حساب .. في حالة اختيار " الامارت الدولي للوساطة"
سيقوم الوسيط بتوجيهك لفتح حساب في بنك الامارت الدولي


سابعاً: فتح حساب استثمار في بنك الامارت .. الذهاب لفرع للبنك في مبني المركز التجاري وتعبئة النماذج الخاصه بفتح الحساب ..

ملاحظات :

- فتح الحساب في الأمارت لايأخذ اكثر من يوم واحد والعمليه سهله جدا
- لايوجد طريقه للتداول عن طريق الانترنت في سوق دبي أو ابوظبي المالي
- يجب حفظ الارقام التاليه في مفكرتك رقم المستثمر - رقم حساب الوساطه - رقم الحساب في البنك
- تستطيع عن طريق الانترنت متابعة حسابك الاستثماري عن طريق خدمة BANK-NET
ومن خلال الانترنت تستطيع معرفة عمليات الشراء والبيع التي قمت بأجرائها وكم تبقي من حسابك من كاش.
- تتم عمليات الشراء والبيع عن طريق الاتصال بهاتف الوسيط في الامارت
- في حالة الامارت الدولي للوساطه يكون الاتصال على الارقام التاليه
اسم الوسيط في سوق دبي : فريد رقم هاتف الوسيط في دبي : 0097143055111
اسم الوسيط في سوق أبوظبي: وائل رقم هاتف الوسيط في ابوظبي : 0097126128819
- يتم تحويل الكاش من اي بنك في قطر الى حسابك في بنك الامارت في دبي . . وبعد ذلك تستطيع القيام بعمليات الشراء والبيع


وبالتوفيق يارب

[eXpert*]

ولازم اخوي تفتح حساب عند وسيط هناك ( يعني تقبض خط ) وعقب كل معلملاتك بالتلفون .. ولا تنسى تسوي لك رقم مستثمر عندهم إما عن طريق السوق او عن طريق الوسيط




:eek: اشهد انه قبضة الخط ماهي بهينه بس شنسوي الله المستعان بنضبط البوست ان شاء الله وبنسير وربي يحفظني ان شاء الله

ما شاء الله عليك يا واحد في حاله ما خليت لي مجال علشان اسالك صكرت عليّ كل البيبان كنت مجهز لستة من الاسئلة ابي استفسر منك بس بصراحة كفيت ووفيت ان شاء الله على اخر الاسبوع بسير دبي والله ييسر الامور وبخبركم شاللي راح يصير

ورحم الله والديك يا واحد في حاله

[إنتعاش]

اخوي راشد

سمعت انا انك تقدر تشتري بالبورصه الاماراتيه

بس تروح للمبنى مال الاستثمارات النسائيه اللي صوب دوار النادي العربي الظاهر

سألت كم مره ودلوني على نفس المكان

لكن ما رحت له ولا سألت عن اجراءاته

شوف اخوي وقول لنا شيصير معاك

[eXpert*]

ان شاء الله بكره بسيير عليهم وبشوف وبرد عليكم خبر .

ولاهنت يا انتعاش

[sulai6i]

السلام عليكم ..




راشد السليطي


مبروك عليك دخولك بورصة لندن .. وعقبال بورصة دبي


مدام انك ناوي تقبض خط .. اذا تبي شوري وانا اخوك
انتظر لين اول شهر مارس وعقب توكل على الله واقبض الخط

منها تكتتتب في الشركة اللوجستية .. اللي اخونا انتعاش كتب عنها في هالموضوع
http://www.qatarshares.com/vb/showthread.php?t=592

ومنها تاخذ لك اسهم في اعمار او املاك او اللي يناسبك

اضرب عصفورين بحصاه وحده


وعلى فكره .. فترة الإكتتاب في اللوجستية 10 ايام بس .. وما حددوا متى بيبدأ الإكتتاب لين الحين
بس قالوا في اول اسبوع من شهر 3


وبالتوفيق يارب

[eXpert*]

الله يبارك فيك يا واحد في حاله

وان شاء الله بكره بشوف شالترتيب وبرد عليكم خبر

وعسى ربيّ يعم الخير على الجميع يارب

[eXpert*]

اليوم رحت صوب دوار البنك العربي وع الاسف ما دليت مبنى الاستثمارات

واتصلت على اغلب شركات الوساطة القطرية استفسر عن الموضوع ودلوني على نفس الخطوات اللي قلت عنها يا واحد في حاله يعني لازم اسير اهناك بالاول افتح حساب وعقب كل شي بالتلفون

القهر من الدوحه حاولت اشيك ويا الوسطاء فريد ووائل بس مادري ليه حد فيهم يرد (( يمكن خايفين يدفعون ثن المكالمه الدولية ))

لين بكره اذا ما فيه جديد يا اني قابض الخط او بحجز تذكره وبسير يوم السبت اول الصباح وان شاء الله خير

اتمنى التوفيق للجميع

[sulai6i]

راشد



اليوم رحت صوب دوار البنك العربي

الريال ما قال البنك العربي .. شوف شكتب لك


اللي صوب دوار النادي العربي

ياخي احذا فريجكم .. شفت دوار التضامن .. جنك تبي تروح على المول .. هو على الدوار على يدك اليمين .. وعليه قرميد ازرق

[الشقيان]

انزين ياالربع اشلون اشتري اعمار لازم اروح الامارات

علمونه يا جماعه

[eXpert*]

راشد




الريال ما قال البنك العربي .. شوف شكتب لك



ياخي احذا فريجكم .. شفت دوار التضامن .. جنك تبي تروح على المول .. هو على الدوار على يدك اليمين .. وعليه قرميد ازرق



بللل حر من طفى المكيف !!! :rolleyes:


عادي تصير في احسن العوايل :D

مادري شفيني هاليومين صاير (( حمامه )) اقرا كلمة واشقح اللي وراها <== عااش مرقع
- ترى صدق الحمامه تاكل حبة شعير وتترك الثانيه وتاكل الثاله الخ -

====================================

المهم ماعلينا اليوم مريت صوب دوار التضامن وعقب روحه ورده على نفس الشارع لقيته (( العلامة اللي على المبنى مشيوله بس الاثر مالها موجود )) المستقبل للتخطيط الماليّ ومثل ماتعرفون انه مخصص للحريم ،،، المهم طلبت رقمهم عن طريق استعلامات قطر وعقب ذل طلعوا لي الرقم دقيت ترن ترن ،،،، ترن ترن <=== 3 ساعات وانا حاول بس للاسف محد ردّ


قلت اتصل على رقم فريد في الامارت الدولي للوساطه ( دبي ) ردت علي وحده وقالت لازم تجي علشان تفتح احساب عندنا كبداية ....... الخ الخ الخ وسبحان الله الكلام اللي قالته لي نفس كلام اخوي واحد في حاله .

ان شاء الله السبت انا على اول طيارة رايح اهناك والله موفق

والعذر والسوحة على الثقل و القصور

[qatari1]

السلام عليكم ورحمة الله وبركاته....
أنا كنت من ملاك سهم إعمار، شريته على 9 وبعته على 12.75، بعد ما وصل أعلى سعر له(الهاي) 15.75 درهم، وبعد ذلك هبط سعر السهم بسبب التوزيعات النقدية الضعيفة وأسهم المنحة (2.5% أسهم مجانية، 17.5% أرباح نقدية).
أنا تركت إعمار لسبب رئيسي انها ارتفعت الضعف تقريباً في فترة لا تتعدى 3 شهور، وأرباحها عن عام 2004م كانت خيالية 1.691مليار(مليار و691 مليون) وهي ثاني شركة إماراتية تدخل نادي المليار بعد اتصالات!
والسبب الثاني إنها تملك بنك دبي، وهو بنك ربوي وإن كان يشاع أنه لا يزال يحقق خسائر! بعد البيع كرهت إعمار أكثر بعد ما زار رئيس مجلس الإدارة محمد بن علي العبار إسرائيل لشراء المستوطنات(المغتصبات) الصهيونية بعد إخلاء المستوطنين منها في الضفة الغربية حسب الاتفاقات الأخيرة في شرم الشيخ.
المهم يا جماعة الخير إذا أردتم الاستفسار عن التسجيل في بورصة دبي أو أبوظبي، وشراء الأسهم فأسألوني هنا في هذا الموضوع؟
والسالفة بسيطة جداً كلها 5 ساعات وللا انت مخلص الموضوع كامل..وإذا أراد أحدكم الذهاب إلى هناك وحب ياخذني كمستشار مالي ماعندي مانع فقط عليه تذكرة درجة رجال أعمال، والباقي علي إن شاء الله:)

[سهم عتيج]

نصيحة كبيرة يا qatari1 ,, حقيقة آنه كنت ناوي أشتري سهم اعمار من العام الماضي يوم كان سعره 37 أو 3.7 حاليا بعد التجزئة,, وقد اتصلت بمكتب وسيط هناك من دبي وقلت له ياريت اتطرش لي البيانات المالية عن الشركة حتى أتأكد بأن نشاطاتها المالية ما عليها غبار,, أو انها لا تتعدى النسبة المسموحة والتي أقرها العلماء.. ولكنه طنش
ودام انها تملك بنك ربوي,, وسوت علاقات مع اسرائيل,, فأعتقد بأن من ترك شيئا لله عوضه خيرا انشاءالله

بالنسبة لبورصة الامارات ومقارنتها ببورصة قطر,, أعتقد ان الفارق شاسع بين البورصتين,, حيث أن أنظمة بورصة قطر تفوق بورصتي دبي وأبوظبي,, وأعتقد بأن بورصة قطر حاليا تعد الأفضل بالمنطقة من حيث التشريعات والقوانين وسهولة البيع والشراء,, وهذا يحسب لسوق الدوحة للأوراق المالية,,, فقط تبقى خطوة واحدة تنقص السوق وهي أن يتمكن الشخص من التداول عن بعد عن طريق الانترنت وتصبح بورصة قطر واحدة من أفضل البورصات في المنطقة بكبرها وبدون منازع باذن الله

[eXpert*]

وإذا أراد أحدكم الذهاب إلى هناك وحب ياخذني كمستشار مالي ماعندي مانع فقط عليه تذكرة درجة رجال أعمال، والباقي علي إن شاء الله:)


خخخخخخخخخخخخخخخخخخخخخخخخخخخخخخخخخخخ


الله يغربل ابليسك انا بكره رايح ماحجزت لي تذكرة رجال اعمال ،، تبيني .......... ؟؟ :p


شوف انا لقيت لي مكان ويا الشحن اذا لك خاطر تخاويني ترى المكان فسيح ويركض فيه الخيل .


وجيب معاك مضرب جولف ترى شي تلعب في الجو . (( امزح ))


المهم مشكور على المعلومات :-


بس من خلال خبرتك اشرايك بسهم املاك ؟؟

لانه انا ساير دبي يا شاري او شاري <==\==== ما في اذنه قطرة ماء

باخذه استثمار طوووووووووووووووووووويييل الاجل (( اشدعوى حليب مراعيّ ))

والشباب اقصروا اثبتوا انها شركة اسلامية 100% .

انتظر رأيك

[qatari1]

أخي العزيز راشد السليطي(علامة مسجلة):):)
أضحك الله سنك أخي العزيز....
أملاك ممتازة جداً للمدى الطويل، خذه وانساها، بس مهب تروح هناك وتاخذ لي 2000 سهم!!!!!
خذ لك كمية حلوة وانساها.....
والله يوفقك إن شاء الله...
واذا تبي نصيحتي روح سوق دبي المالي(مكانه في برج راشد أو مركز التجارة العالمي-الدور الأرضي- شارع الشيخ زايد، وطلع رقم مستثمر، وبعدين روح سوق أبوظبي للأوراق المالية(فرع الشارقة) وهذه معلومة قليل اللي يعرفها، طلع رقم مستثمر في سوق أبوظبي بالمرة، واختار لك أي وسيط، أرشح الشرهان للأسهم، وهو يشتري لك أسهم في البورصتين، وتقدر تشتري وتبيع في البورصتين....
بس ثرى ما ياخذ كاش، إما شيك مسطر باسم مركز الشرهان للأسهم أو تروح تودع المبلغ في حسابهم في بنك أبوظبي الوطني-فرع البحيرة-الشارقة مقابل القهوة الشعبية، وعطه وصل الإيداع...وانسى بعدها تقدر تبيع وتشتري بالتلفون بكل سهولة.

[قطري]

قطري1
كم الحد الأدنى لفتح الحساب؟
وهل ممكن بعدين احول حاولة بنكية؟
شكراً لكم اخواني على التوضيحات

[eXpert*]

أخي العزيز راشد السليطي(علامة مسجلة):):)
أضحك الله سنك أخي العزيز....
أملاك ممتازة جداً للمدى الطويل، خذه وانساها، بس مهب تروح هناك وتاخذ لي 2000 سهم!!!!!
خذ لك كمية حلوة وانساها.....
والله يوفقك إن شاء الله...
واذا تبي نصيحتي روح سوق دبي المالي(مكانه في برج راشد أو مركز التجارة العالمي-الدور الأرضي- شارع الشيخ زايد، وطلع رقم مستثمر، وبعدين روح سوق أبوظبي للأوراق المالية(فرع الشارقة) وهذه معلومة قليل اللي يعرفها، طلع رقم مستثمر في سوق أبوظبي بالمرة، واختار لك أي وسيط، أرشح الشرهان للأسهم، وهو يشتري لك أسهم في البورصتين، وتقدر تشتري وتبيع في البورصتين....
بس ثرى ما ياخذ كاش، إما شيك مسطر باسم مركز الشرهان للأسهم أو تروح تودع المبلغ في حسابهم في بنك أبوظبي الوطني-فرع البحيرة-الشارقة مقابل القهوة الشعبية، وعطه وصل الإيداع...وانسى بعدها تقدر تبيع وتشتري بالتلفون بكل سهولة.


والله يا الشيخ توني راجع من دبي ع الساعه 9 ،،،،، وانا من صباح الله خير مطيح عندهم حمدالله كل شي عال العال (( بس صادفتني مشكلة شخصية انهت الموضوع بنتيجه سلبية )) .

حالياُ شلت بورصة دبي مناليّ لمده ن الزمن وان شاء الله بفكر فيها بوقت ثاني ....


واتمنى للجميع التوفيق .

[qatari1]

أخوي قطري...
السلام عليكم ورحمة الله وبركاته....
قيل لي أن بعض الوسطاء يشترطون حد أدنى....
بس ما عليك منهم روح للشرهان، وما عليك، أي مبلغ يقبلونه...وتقدر تحول حوالة بنكية بعد ما تسجل في البورصة، ويطلعون لك حساب تداول...لا وابشرك يتصل لك على الجوال إذا نفذ أمر البيع أو الشراء، ويطرش لك التأكيد على الفاكس بعد...يعني هي سفرة كم ساعة بس، وتخلص أمورك بس مثل ما قلت روح فرع الشارقة أحسن مكانهم قريب مركز الفردان وصندوق الزواج ومطل على جسر في شارع الخان....وسلامتك...

أخوي راشد
الحمد لله على السلامة، وعلى قولك سوق دبي هالأيام ما يشجع إلا العربية الفنية، ويمكن شعاع كابيتال...

[قطري]

شكراً لك اخوي على تجاوبك وتوضيحك
يعطيك العافيه

[زعيم البورصة]

يا شباب شلون اشتري بشركة اعمار ارجوا مساعدتي

[qatari1]

أخوي زعيم البورصة...
سبق جاوبت على السؤال في نفس الموضوع....
دور على الجواب بنفسك:)
تحياتي

[المستثمر القطري]

ممكن نعرف وين نقدر نشتر اسهم اعمار و حنا في قطر

[eXpert*]

ممكن نعرف وين نقدر نشتر اسهم اعمار و حنا في قطر



اخي الكريم ما تقدر تشتري وانت في قطر !!! السبب انه لازم تروح اهناك علشان تفتح لك حساب ستثر في بورصة دبي وبورصة ابو ظبي او واحد منها ( على حسب انت وين ناوي تستثمر )

وللمزيد من المعلومات ارجع لاول صفحه من الموضوع .


واي استفسار انا حاضر

[qatari1]

شباب...
وايد تسألون عن بورصة دبي وأبوظبي وطريقة الشراء.
شفيكم ما تقرون وللا مأثر عليكم حلم التخصيص؟؟؟!!!
عموماً هذا الرد كتبته في نفس الموضوع، وبما انكم عيزانين تقرونه...
هذا كان ردي.. نسخته هنا مرة ثانية...

أخي العزيز راشد السليطي(علامة مسجلة)
أضحك الله سنك أخي العزيز....
أملاك ممتازة جداً للمدى الطويل، خذه وانساها، بس مهب تروح هناك وتاخذ لي 2000 سهم!!!!!
خذ لك كمية حلوة وانساها.....
والله يوفقك إن شاء الله...
واذا تبي نصيحتي روح سوق دبي المالي(مكانه في برج راشد أو مركز التجارة العالمي-الدور الأرضي- شارع الشيخ زايد، وطلع رقم مستثمر، وبعدين روح سوق أبوظبي للأوراق المالية(فرع الشارقة) وهذه معلومة قليل اللي يعرفها، طلع رقم مستثمر في سوق أبوظبي بالمرة، واختار لك أي وسيط، أرشح الشرهان للأسهم، وهو يشتري لك أسهم في البورصتين، وتقدر تشتري وتبيع في البورصتين....
بس ثرى ما ياخذ كاش، إما شيك مسطر باسم مركز الشرهان للأسهم أو تروح تودع المبلغ في حسابهم في بنك أبوظبي الوطني-فرع البحيرة-الشارقة مقابل القهوة الشعبية، وعطه وصل الإيداع...وانسى بعدها تقدر تبيع وتشتري بالتلفون بكل سهولة.

أتمنى تكونون فهمتوا....

[المستثمر القطري]

نتائج تخصيص ناقلات قبل نهاية الأسبوع

أكد السيد فيصل السويدي مدير عام قطر غاز ان الانباء التي ترددت مؤخرا عن حجم التخصيص في ناقلات عبارة عن اشاعات مشيرا الي انه قبل نهاية الاسبوع الحالي سيتم صدور بيان بالتخصيص.

ونصح السويدي المستثمرين بعدم الاستماع للاشاعات وانتظار صدور البيان الذي هو في طور الدراسة والتدقيق حاليا، لافتا الي ان ناقلات اتخذت من الشفافية عنوانا لها في كل خطوة من خطواتها.


هذا اخر خبر عن ناقلات ....

فخلكم من الاشاعات لين اخر الاسبوع و ماباقي شي

[qatari1]

شدخل الناقلات في سهم إعمار!!!!!!!!!!!!!!!!!!!!!!!!!!!!!!!!!!!!!!!
غريبة والله.

[قطر]

موضوع ممتاز وانا كنت ابحث عن طريقة التسجيل في بورصة دبي


بس سؤال ......... لحد ايعصب علي

الحين ايش قصة مبنى استثمار السيدات ...اللي اعتقد صار اسمه اموال؟

هل يقدرون هم يفتحون لي حساب؟

ويريحوني من الروحه والجيه؟

وبالمناسبة املاك كم سعرها؟


ومتستغربون معاي موقع دبي للاوراق المالية بطيء وقديم ؟


انتظركم

المستثمر القطري كنه فاتحه شاشتين ويبي ايرد هناك ردي اهني
اعذروه :)

[tamer_dohaa]

من وين في قطر نشتري سهم اعمار؟
دلونا يا جماعة الخير

[me_night]

والله ضعنا