إلى وزاره الصحه .. واتمنى يوصل للملحق الطبي في واشنطن

[rawda]

السلام عليكم ورحمة الله وبركاته ..

أنا ماجيت اكتب .. الا بعد الغصه اللي ذقتها من سوء المعامله من المكتب الطبي القطري في واشنطن .. وودي من كل قلبي يوصل صوتي للوزاره قبل لا ارد قطر شهر 12 واتكلم في وطني الحبيب

محدثكم طالب .. وصل امريكا قبل سنتين بالضبط .. وصل شهر يناير سنه 2009 !! ولين اليوم .. وهو مب قادر يحصل على بطاقه التأمين الصحي من السفارة القطريه !!


شهر 3 السنه اللي طافت 2009 .. قالولي الشباب ترا السفاره تعطيك بطاقه عضويه عليها اسمك واسم السفاره تثبت ان انت طالب هم عاملين حسابك ويتكفلون بتكاليف علاجك لا قدر الله ان حصل لك مكروه ..

قلت زين خل نقدم .. قدمت شهر 3 سنه 2009 ! بعثت اوراقي بفيديكس !! واضح من الموقع ان اللي استلم الظرف واحد اسمه علي ووقع باستلامه .. للأسف .. اتصلت اليوم اللي بعده .. قالولي ماوصلنا شي .. وتميت اتصل لمده اسبوعين وقالولي ماوصلنا شي منك .. نسيت السالفه وقلت مامنهم فايده ..

رجعتلي الفكره شهر 7 سنه 2009 !! وقدمت نفس الشي مره ثانيه !! ووصلت اوراقي واللي وقع بالاستلام من فيديكس ( علي ) من السفاره القطريه .. اتصل فيهم لمده اسبوع .. ماحد يرد علي .. بعدها باسبوعين اتصلت وقالولي .. ماوصلنا شي !!! ماجانا شي باسمك يا فلان ! سحبت عليهم وقلت مامنهم فايده هاي كلام فاضي !!


دخلنا سنه 2010 !! رحت لمدينه فيها واحد اعرفه .. ودار هالنقاش بيني وبينه

هو : مادريت ؟؟ شباب العيله الفلانيه كلهم يوم جاهم ابو فلان اللي معاهم ( يشتغل فالخارجيه ) راح لواشنطن يومين وجابلهم كلهم بطاقات التأمين الصحي من السفاره

انا : بذمتك ؟؟ يعني السالفه لازم فيها واسطه ؟؟ ياخي انا طرشت اوراقي مرتين قبل وقالولي ماوصلنا شي ( صوره الجواز - صوره البطاقه الشخصيه - رساله من الجامعه تثبت انك طالب عندهم - صورتين شخصيه - صوره الـ I-20 )

هو : ياريال اتصلت فالدكتوره ( عايده ) المسؤوله عن الطلاب والتامين وقولها وهي بتطلعلك .. وقدم احسنلك ياريال بدال لاتدفع انت لعلاجك تراها سفاره بلادنا ولازم تدفع تكاليف علاجنا

انا : امري لله .. باكلمها وباقولها برسل اوراقي للمره الثالثه وبعطيها الـ tracking number مال فيديكس عشان ماتقولي ماوصلنا شي

هو : الله يوفقك وان شاء الله هالمره خير


ماصدقت خبر .. اتصلت فالدكتوره عايده وقلت لها شمعنى عيال ( فلان ) طلعتولهم وانا لا ؟ عشان هم عندهم واسطه واحنا لنا الله ؟؟
قالتلي لا ماعليك ارسل اوراقك وانا بسويلك كل شي ..

ارسلت وكل شي وصلهم .. واتصلت بعد اسبوع .. ردت وقالت اي الاوراق وصلت وبنسويلك

انتظرت اسبوعين .. ثلاث .. شهر لين شهر 4 وماجاني شي .. اتصلت وهذا النقاش

انا : مرحبا دكتوره معاج فلان الفلاني .. ماوصلتني البطاقه
هي : اي نعم اوراقك عندنا بس انت ناقصك ابلكيشن تنزله من الموقع وتعبيه وترسله لنا .. وانت كنت باقولك هالشي .. وبعدين نزل قرار ترا لو انت طالب على حسابك نعطيك التامين لمده 9 شهور بس !!
انا : اللحين انا ناطر شهرين على بال ان بتوصلني البطاقه واخر شي تقولينلي في اوراق بعد لازم اعبيها ؟؟ ليش ماقلتيلي من قبل ؟؟ وبعدين شنو 9 شهور بس ؟؟ انا قري اتعالج فبلادي ببلاش وهني تقولونلي بس 9 شهور ؟؟ بالله صادني شي بعد ماتنتهي البطاقه من بيتكفل بالدفع ؟؟

هي : والله هاي قوانينا وماعليك الا ان تعبي الاوراق وترسلها عشان نرسلك البطاقه
انا : استغفر الله العظيم .. تدرين دكتوره .. انتو شكلكم اصلن ماتبون تعطونا تأمين صحي لهالدرجه مستصعبين السالفه !! طوط طوط طوط وسكرت !



رجعت فالصيف قطر .. حولت مدينه ثانيه وجامعه ثانيه .. وجيت بقدم اني طالب جديد توني جاي .. وصارلي نفس الموضوع .. ماوصلنا شي منك يا فلان .. !! لاحول الله .. هاي حاله ؟؟


اللي ابي اعلمكم اياه .. ترا التامين هاي مب تامين .. مجرد عضويه تدفع انت الفلوس وتكاليف العلاج وترسلهم الفواتير وتنطر لي مايطرشونلك شيك بنفس المبلغ اللي دفعته .. واغلب الاحيان مايجيك شي ولو جاك .. نص اللي انت دفعته

نقطه ثانيه : هل معقوله ملحق طبي او سفاره او مادري شيكون هاي عنوانهم .. مكان فيه خربطه لدرجه ان نرسل اوراق وملفات فيها عناوينا واسامينا وصور جوازاتنا عشان تضيع عندهم ؟؟ هل هاي اهمال ؟؟

نقطه ثالثه : لو ابي اخلص اموري بالواسطه .. خلصتها من زمان .. بس هل هالشي ضروري وانا قطري والسفاره مجبوره بعلاجي دامني قطري وطالب ؟؟ يعني المشكله بس اني طالب على حسابي ولا شالسالفه ؟؟ وبعدين شسالفه هاي الـ 9 شهور بس تامين صحي عقب ينتهي ؟؟ ابي سبب مقنع لهالشي !! الواطه موجوده بس ليش اروح ارز بنفسي واطلب من فلان دام هاي حق هم مجبورين يعطوني اياه ؟؟


رابع نقطه : يوم ان اوراقي ناقصه وواصلتكم من شهرين .. ليش ماعطيتوني خبر من وقتها دام عندكم رقم جوالي الاول والثاني ورقم البيت ؟؟ لازم انا اتصل عشان اعرف ؟؟


خامس نقطه وهي الاهم :
السعوديين .. السفاره توفر لهم بطاقه تامين صحي من افضل الشركات فالعالم وبشهاده المستشفيات .. والكلام قدامي يوم كنت مع واحد سعودي فالمستشفى..
هم احسن منا في شنو ؟؟ ودي اعرف ؟؟ هم اكثر من 30 الف طالب في امريكا !! واحنا القطرين انا اتحدى لو نتعدى الـ 3000 لو مب اقل بعد !!


الحمد لله رب العالمين الواحد مب عيزان على انه يدفع لصحته .. بس ليش اكلف على عمري دام الدوله موفره لي شي وهالشي الحصول عليه صعب !!

انا بكره .. اخر مره ارسل اوراقي للسفاره !! وان ماجاني شي منهم خلال شهر قبل لارد الدوحه

انا واحد حقاني .. وشكاي وبو لسان طويل .. :tease:

يا اني ادخل على مدير العلاج بالخارج واعلمه واعطيه اسامي اللي قصرو فالسفاره بالتفصيل .. ولا وطني الحبيب صباح اخير ..

ومن اليوم حصلتلي كم واحد من الطلاب اللي واجه مثل مشكلتي ان نكتب كتاب شهر 12 وادخل فيه على مدير العلاج بالخارج في قطر واعلمه بالظلم والتلاعب اللي قاعد يصير ..

والساكت عن الحق .. شيطان اخرس ..

وياريت حد منكم يفيدني باللي اقدر اسويه .. لن طفح فيني الكيل :weeping:

[روح الاطلس]

اشتكي عليهم كلهم بكل ما اوتيت من قوة ماينفع معهم الا التشهير عشان يتعدلون والله يعينك

[chloe]

الله المستعان

[متداول عالمي]

اكتب كتاب للسفير

[A M A]

ذكرتني بمعاناتي في رمضان 2009

ظربت علي أسناني في رمضان 2009 في نص الشهر تقريباً
ورحت للمستشفى ودفعت رسوم الدخول بنفسي بسبب إنه الملحق
الطبي ما يردون على تلفوناتهم، تخيل مكتوب على كرتهم ممنوع
تعالجون الشخص بدون ما ترجعون للملحق الطبي، قلت مب مشكله
بس أدخل يكشفون علي ويعطوني بنج أي شي يشيل الألم ولو لفتره
بسيطه، وقالي الدكتور تحتاج علاج ونسويلك جسر وحشو في الضرس
وعطاني موعد بعد 4 أيام وقالي في هالفتره راح أشيك مع الملحق
الطبي عشان ناخذلك الـ Approval او الموافقه منهم إنه نسويلك
العمليه....تخيل أخوي 4 أيام ما كنت أنام لا ليلي ليل ولا نهاري نهار
حتى الدوام ما كنت أقدر أروح ويوم العمليه الصبح متصلي الدكتور
يقولي ترى الملحق الطبي ما وافقوا، أنا هني خلاص وصلت لمرحلة
إنه ما أقدر أشوف قدامي من الألم، إتصلت في هاذي إلي ما تتسمى
إلي يسمونها عايده إلي حرام ينادونها دكتوره....تخيل أنا شوي وأموت
في التلفون وهي تقولي بكل برود وإحتقار حالتك ما تستدعي العلاج
الفوري وتقدر تنطر 3 شهور لين ما ترجع الدوحه وتعالج هناك، هني
طبعاً أي إنسان طبيعي بيفور وبيعصب وممكن إنه يسوي أي شي غلط
فما بالك بإنسان ما رقد من 4 أيام ما نام ولا ذاق طعم النوم ويتألم....
لا شعورياً تميت أصرخ عليها في التلفون وسكرت الخط وإتصلت في
الثاني إلي إسمه دكتور عادل، ويقولي ننطر موافقة الدكتور إلي في قطر
قلت له يعني أموت لين ما يرد، يقولي هذا القوانين، هني قلت له أبيك تحولني
على السفير أبي أكلمه ألحين، إهني تبلعم وقالي لحظه شوي وحطني هولد
فتره وبعدها قالي خلاص روح المستشفى وإحنا بنكلهم، رحت المستشفى
وقالو لي إنه إتصلو فيهم الملحق الطبي وقالو لهم أوكي وعطوهم موافقه
على ربع العلاج بس قلت يالله ربع ويروح الألم وبعدين يحلها ألف حلال...
وطلعت من المستشفى وقلت زين ادفعوا وخلصوا الموضوع، تخيل شنو
إلي وصلني بعد فتره، وصلني الله يسلمك أمر محكمه إنه أحظر جلسه،
المستشفى رافعين علي دعوه إنه ما دافع لهم فلوس العلاج، ويوم إتصلت
أستفسر قالو لي إنه السفاره ما إدفعوا لهم ولا شي مع إنه الفواتير
واصلتهم وأنا بنفسي مطرشه نسخه غير نسخة المستشفى بفيدكس
عشان أتأكد إنه وصلو...وبعد حنه ورنه ومذله ادفعوا...وكل هاي ولا كملت
العلاج...


قسماً بالله الملحق الطبي أفشل ملحق طبي في الملحقات الخارجيه،
مادري لو يدفعون من مخابيهم شبيسون فينا والله


الله كريم ياخوك والله يفرجها علينا، والله الواحد يوسوس يخاف يمرض
عشان ما يروح المستشفى وخذ عاد أذية السفاره

[غايه الطواش]

الله يعينك اخوي الكريم ...مع ان احنا الملحق الطبي في واشنطن ماقصر خير شر وقاموا في الاهل قومه ويمدحون الشباب الي هناك اخوي حاول تتواصل مع الاخ صلاح المالكي والنعم فيه ريال وفيه خير
وماتشوف شر ان شاء الله

[وحيد-الشوق]

الواحد لين تغرب للأسف مايحس انه قطري معامله اسوء من الزفت تلاقيها من مكتب المانيا ولا امريكا ولا تايلاند ولامن اللجنة الطبية في الصحه الي المصري فيها الامر والناهي والمتحكم في علاج القطريين !!!!

تقعد تترجى في الاجانب عشان يمشون موضوعك لين ماينشف ريجك وفوق هذا يكلمونك بخياس نفس ومايردون على التلفونات لعنبو ذلونا حسبي الله عليهم

الله كريم بس كل شيء يمشي بالواسطة وحتى لو كان على حساب حياة انسان :(


الله المستعان

[باراكودا]

وأضح من الشخصيات المذكورة والتي تعمل في السفارة عندها أسلوب اللف
والدوران ويعملون بلا ضمير يجب عزلهم من السفارة على الفور .

[R 7 A L]

اخوي انا في امريكا الأن بقول لك شي بختصار
لاتشتكي
ولاتكلم الدكتورة الفلانية
او الدكتور فلان
عليك بالاخ صلاح المالكي
انا متاكد ان ماعندة خبر بهالشي اذا اتصلت لة امورك كلها مسنعة لين ترجع نهائياً لقطر مو 9 شهور بس


المشكلة ان الى يعقدون الامور في الملحق الطبي كلهم مش قطريين !!!

[مابدل العادات]

هي جات على هاي بس

والله العظيم يذلونك ذل على العلاج كنهم بيدفعون من جيبهم (( عايده + نبيل )) وللأسف يسمون نفسهم دكاتره

الحمدلله يوم أني قدمت أوراقي وصلني التأمين خلال اسبوعين بس ولاكن أمحق تأمين يارجال مايغطي شي أبداااااا ألا الحالات الطارئه فقط يعني لازم تكون قربت تموت جي بعدين يفكرون يفكرون يوافقون على علاجك ولا بالذل بعد يقولك موب كل شي ياخي والله مصخره الي صايره عندنا في المحلق الطبي

ولا إذا تكرمو بعد وووافقو مايدفعون الا بعد سنة تقريبا لين مايههدونهم المستشفى بالمحكمه ذيك الساعه يدفعون وهاي الشي جربته

والي يبغي يتعالج غصب عنهم أي مستشفى تروح له أكتب عنوانك هو نسفه عنوان السفاره لجل يرسلون لهم الفواتير ولا تعور راسك ولا شي

واذكر واحد من الربع ضريت عليه اسنانه قالو لو أوكيه بنغطي لك بس كم شي وهاي الكم شي ماكانو أساسيين في سبب الألم أصلا حتى الدكتور قال لهم هو يعاني من ألم في العصب قالو له لا عالج اللثه وحط كم حشوه وبس هاي الي نغطيه ولا بعد يقولون له عطنا خصم والله مصخرررره

ولو باكتب صدقني بوصل الصفحه العاشره من المصخره الي قاعده تصير

والله كريم بس

[rawda]

اشتكي عليهم كلهم بكل ما اوتيت من قوة ماينفع معهم الا التشهير عشان يتعدلون والله يعينك

وهذا باذن الله اللي بيصير لي رديت قطر :telephone:

[rawda]

الله يعينك اخوي الكريم ...مع ان احنا الملحق الطبي في واشنطن ماقصر خير شر وقاموا في الاهل قومه ويمدحون الشباب الي هناك اخوي حاول تتواصل مع الاخ صلاح المالكي والنعم فيه ريال وفيه خير
وماتشوف شر ان شاء الله

في واشنطن لما تدخل عليهم غير .. ولما تكون في ولايه ثانيه وتتعامل معاهم بالتلفون غير

يعني بالعربي هذوله ( كلكجيه ) :nice:

[rawda]

اخوي انا في امريكا الأن بقول لك شي بختصار
لاتشتكي
ولاتكلم الدكتورة الفلانية
او الدكتور فلان
عليك بالاخ صلاح المالكي
انا متاكد ان ماعندة خبر بهالشي اذا اتصلت لة امورك كلها مسنعة لين ترجع نهائياً لقطر مو 9 شهور بس


المشكلة ان الى يعقدون الامور في الملحق الطبي كلهم مش قطريين !!!



كم رقمه ؟؟ ياريت لو عندك رقه تعطيني لني مجهز كلام مابي يتوجه الا لشخص مسؤوول

[rawda]

آخر الاخبار من استهبال المسؤولين علينا توه يجيني الخبر من واحد من ربعي تعالج في مدينه غير مدينته

تدرون شقالوله ؟؟ لا دام عندك تامين احنا ندفع لعلاج في مدينتك مانغطي تكاليف علاجك لو كنت فمدينه ثانيه

هالكلام قالته الدكتوره عايده

[بلوتنيوم]

شيء مخجل بصراحة :(
اتفهم
ان يحاول اي مسئول تلميع صورته
وانه هو المحافظ على المال العام
الا
في حالات العلاج
شيء غريب ويرفع الضغط

[الـقـاسـي]

اخوي انا بقول لك شالمشكله اغلب اللي يشتغلون فالسفاره مش قطريين وهذا البلا هذا اللي مبهدلنا ..

حتى على تجديد الاقامه تتلعوز اما القطرين اللي يشتغلون هناك اشهد انهم يبردون القلب صلاح المالكي وحمد الدوسري سابقا والشباب غيرهم اللي فيهم الخير على راسهم السفير ..

[غايه الطواش]

اخوي اليوم الوطني قرب واكيد السفاره بتسوي احتفال وبتدعي كل القطريين
تجمعوا وكلموا السفير وصلاح المالكي الشكوى بشكل جماعي لها تأثير اقوى من لو كانت فرديه
والله يعنكم ان شاء الله

[khaleeji]

يبه اشتك وسو كل شي تقدر عليه ذولا الموظفين العرب الي في سفاراتنا الكثير منهم لاعب لعبته وضرب كومشن على حسابك وين مارحت .

لا ولا يشتغلون الا بمصلحه او بخشيش ولا حد يكلمهم .

[rawda]

يبه اشتك وسو كل شي تقدر عليه ذولا الموظفين العرب الي في سفاراتنا الكثير منهم لاعب لعبته وضرب كومشن على حسابك وين مارحت .

لا ولا يشتغلون الا بمصلحه او بخشيش ولا حد يكلمهم .



باذن الله .. هذا اللي بيصير

[Fahad Alqahtani]

سفارة قطر في امريكا اسمهيا سفارة ويش اللي جابك امريكا

[miss-qatr]

اخوي أنا مع الاخوان اللي قالو لاتسكت هالكلام لازم يوصل للمسؤولين

ومشكلتنا الناس اللي مش من البلاد اصلا الموجودين في الملحق الطبي

ولا عيال ديرتنا والله انهم مايقصرون لوغريب ساعدونك شلون ولدهم

أنا بعد سمعت كلام طيب عن الأخ صلاح واستغل أي فرصه وروحله

كان يوم العيد غدا في بيت السفير ليش مارحتو ؟؟؟

[Qatari In Us]

الله يعينك اخوي بالنسبة لي انا طالب مثلك بامريكا ومشكلتي كانت مع الدكتور نبيل لما رفض اني اشوف دكتور وتميت اترجاه اسبوع كامل عشان يوافق

وبخصوص مشكله ثانية انه الجامعة حاطين هولد على حساباتنا ومانقدر نسجل والسبب انه تامين السفارة فاااااشل
ولازم ناخذ تامين الجامعة بمبلغ ٥٧٠ دولار كل فصل

الدكتور نبيل والدكتوره عايدة اللي فهمته من الادفايزر عندهم ميزانية محدده للتامين الصحي فعشان جيه مايبون يصرفونها كلها قبل الوقت المحدد لانه راح يتوهقون لو انعدمت الميزانية يعني اتوقع الغلط ماكان من الدكتور نبيل لكن الغلط من اللي حط الميزانية حق العلاج لانه المفروض تكون الميزانية مفتوحة مب محدده لانه محد يدري متى يمرض او مايدرون كم واحد يمرض

[سكرمر]

اخوي انا مستغرب منك

ليش ماتكلم الاخ صلاح المالكي على طول؟؟؟؟؟

لاتنتظر رد من الموظفين اللى فى المكتب الطبي ... المفروض تواصلك مع المدير على طول

[Fahad Alqahtani]

الله يعينك اخوي بالنسبة لي انا طالب مثلك بامريكا ومشكلتي كانت مع الدكتور نبيل لما رفض اني اشوف دكتور وتميت اترجاه اسبوع كامل عشان يوافق

وبخصوص مشكله ثانية انه الجامعة حاطين هولد على حساباتنا ومانقدر نسجل والسبب انه تامين السفارة فاااااشل
ولازم ناخذ تامين الجامعة بمبلغ 570 دولار كل فصل

الدكتور نبيل والدكتوره عايدة اللي فهمته من الادفايزر عندهم ميزانية محدده للتامين الصحي فعشان جيه مايبون يصرفونها كلها قبل الوقت المحدد لانه راح يتوهقون لو انعدمت الميزانية يعني اتوقع الغلط ماكان من الدكتور نبيل لكن الغلط من اللي حط الميزانية حق العلاج لانه المفروض تكون الميزانية مفتوحة مب محدده لانه محد يدري متى يمرض او مايدرون كم واحد يمرض

وليش ترجى ياخوك هذا حقك وهذي وظيفته اللي المفروض ان يأديها على اكمل وجه .
وليش الدكتور نبيل مايقول للي حط الميزانية ان الميزانية ماتكفي ..

[Fahad Alqahtani]

اخوي اليوم الوطني قرب واكيد السفاره بتسوي احتفال وبتدعي كل القطريين
تجمعوا وكلموا السفير وصلاح المالكي الشكوى بشكل جماعي لها تأثير اقوى من لو كانت فرديه
والله يعنكم ان شاء الله

اليوم الوطني معظم الشباب بيرجعون للدوحة ..

اما السفارة تدعي طلابها هههههههه . اسمحلي بس صعبة وبقوة .

وصلنا ايميل من السفاره ان السفير مسوي عشى في عيد الاضحى وحاط عنوان البيت يعني الدعوة للي حواليه ولا يبوني اسافر من ولاية لولاية علشان عشى . بدل مايكون فيه اجتماع رسمي للقطريين في امريكا يسوون . جزاه الله خير بس الافضل يكون شي رسمي على الاقل يكون عندي عذر رسمي اني اغيب من الجامعة

[Fahad Alqahtani]

اخوي انا مستغرب منك

ليش ماتكلم الاخ صلاح المالكي على طول؟؟؟؟؟

لاتنتظر رد من الموظفين اللى فى المكتب الطبي ... المفروض تواصلك مع المدير على طول

وليش اكلم صلاح بالاساس اذا الموظف مامنه فايده يشيلونه ويجيبون واحد غيره

[rawda]

وليش اكلم صلاح بالاساس اذا الموظف مامنه فايده يشيلونه ويجيبون واحد غيره


انت فاهمني 100٪

تلاعب واستهتار من الموظفين تحت ولو يوصل الكلام للي فوق من المسؤولين القطريين ادريبهم مابيقصرون

اللي عنده رقم صلاح يعطيني اياه عالخاص ..

[sos 12]

ذكرتني بالايام الي كنت فيها متغرب ... وصادني الكبد الوبائي ... والاحد افتكر فيني ... أتصلهم يقولوني الله يعينك ... لين الكلية حاطوني من ارقى المستشفيات وعلى احسابهم ... وسفارتنا 00000الله يعين.