عرس الرجال في يوم .. و النساء في يوم آخر .. ما رأيكم ..؟!

[فارس الكلمة]

ظاهرة لا حظتها في الآونة الأخيرة .. و هي إقامة فرح و عرس

الرجال في يوم .. غير عن ليلة عرس النساء ..

و لك أن تتخيل شعور المعرس و هو يستقبل المهنئين مع أبيه .. و بعدها سيعود

إلى بيت أمه بفرح ناقص بعد أن يرمي بشته

و ينام دون أن يشاهد زوجته في هذه الليلة ..!

[بوحارب]

مرة علي مثل هالحالات من قبل واشوف مالها اي داعي

حلاته الفرحة في نفس اليوم

اطلع من عرس الرجال وانا في كامل زينتي واذهي الى عرس الحريم

واخذ عروستي واذهب معااها الى حيث لايرانا احد :(
فارس شكلك ناوي على الزواج وقاعد تستشيرنا بس مستحي صح ؟؟ :)

[KABOOM]

اي والله انا بعد لاحظتها
كلش مالها معنى الحركه

يازين المعرس وهو عقب عرسه معود البيت ..!!
او العروس عقب الزفه والحاله , ترجع بيتها

وقسم بالله شي "مـــــاصــــخ" وماله حلاه
وهذا ان دل يدل ان اعراس اليوم بس حق "الشــو" وكلن
يزابي ويستعرض انه هو في خير وفي نعمه ...

يازين اعراس اول
زل وليتات وعرضه ولجا وقت العشاء فرشوا اللقانه على الارض وكلن جلس وعينو من الله خير
واعراس الحريم زل في الحوش والطقاقات في النص مسوين حلقه ومراوح وثلاجات البيبسي والميرندا
واهم شي "البساطه" عند الباب ..
يزينها من ايــــــــــــــــام
ليتها ماولت , والا خذتنا معاها وهي رايحه
:(

[هبوب الكوس]

العاده شاهدتها في الامارات يوم للرجال واليوم الثاني للنساء

-----------------

وحلاتها حار ب حار :nice:

تنتظر اليوم الثاني مب شي كلش

[MAZEN37]

انا مريت بهالتجربه شخصيا
بصراحه ايجابياتها لاهل العروسيين فقط عن زحمه التجهيزات
اما سلبياتها على العروسين مثل ما ذكروا الاخوان فوق

[صليب الراي]

مؤيد وبقوة لهذه الطريقة
وكل إنسان ( أهم شي ) يسوي اللي يبيه هو و زوجته ويقول للناس كلها ( طز )

[فارس الكلمة]

تسلم بوحارب على هذه الطلة ..

يمكن تقصد الثانية .. :)

[ام السعف]

مؤيد وبقوة لهذه الطريقة
وكل إنسان ( أهم شي ) يسوي اللي يبيه هو و زوجته ويقول للناس كلها ( طز )

اتفق معاك الا في كلمة طز ،،، دام ان الطرفين مبسوطين ،،

بس احلى الفرحة تكون بنفس اليوم والضجة والانشغال كله في يوم واحد ،،

[بويوسف]

في نفس اليوم ولا قبلها بأسبوع اهم شي يتم الزواج على خير ويخلفون صبيان وبنات

ياناس ترى كلها عادات ماتودي ولاتجيب .. لاتنشغلون بالناس وشيسون وشيعملون .. انشغلوا الله يرضى عليكم بأنفسكم .. وبشي مفيد وايجابي لكم او لأهلكم أو لمجتمعكم وبلادكم ..

[عزتي سمو ذاتي]

أنا ضد هالشي .. الرجال بيوم زواجه له مشاعر واحاسيس ثانية صعب الواحد يوصفها
شعور بالفرح والسعادة وكاشخ وتكمل هالفرحة بشوفه شريكة حياته بكامل زينتها وخجلها

موشي كلش يرجع للبيت ويفصخ البشت وتروح هالفرحة .. وهالليلة مرة بالعمر حلاتها تكون كامله

[يراعٌ فراتي]

يوم واحد وينتهي مسلسل الدفع والمصاريف

احسن من يومين لان حلاته يوم واحد والفرحة للكل رجال ونساء

[Mshari]

كل مجتمع له عاداته

وكلن يشوف عاداته احسن واحلى

لكن اهم شي يعرس ويريح الامه العربيه واالاسلاميه هههههههههههههههههههه

[بوخالد911]

حلاته بنفس اليوم

والله يهني سعيد بسعيدة

:)

[مهل]

السلام عليكم


انا مع هذه الظاهره الجديده نوعا ما ولكن بطريقه مختلفه .

تزوج اخوي قبل ١٠ سنين و الي سواه شوي غير

كانت الدخله قبل العرس بليله ... الدخله كانت عباره عن حفل عائلي خاص جدا و عشى محفوف .

الايجابيات :

١- يلتقي الزوجين تحت ضغوط نفسيه اقل ذلك بسبب ان امعازيم هم من المقربين و ايضا لقله عدد المعازين (خوات العروس و المعرس و بعض الحمات و الخالات فقط مع امهات المعرس و العروس).
٢- في هذه الحاله يلتقي الزوجين و العروس في افضل حالاتها من ناحيه الشكل .. ففي الوضع العادي يشاهد المعرس عروسه بعد ان مرت عليها ليله طويله و عصيبه ولا تخلو من بعض البكاء و هذا كله يؤثر سالبا على شكل العروس .
٣- في ليله العرس و التي سبقتها الدخله بـ ليله يكون العروسين تحت ضغط نفسي و بدني اقل بحيث ان كل من العروسين امضا ليلته الفائته سويا مما يتيح فرصه اكبر للعروسين في الاستمتاع بليله عرسه .
٤- غيره الكثير :)

[qdalwatan]

يا خي المفروض لا عرس ولا شيء ..
حفلة بسيطة من غير مبالغة واسراف .. وياخذ الزوج زوجته ويعيشون حياتهم الهنية

[قطرية فذة]

اجل لمن العرس اذا كلن بحال؟

[عزتي سمو ذاتي]

يا خي المفروض لا عرس ولا شيء ..
حفلة بسيطة من غير مبالغة واسراف .. وياخذ الزوج زوجته ويعيشون حياتهم الهنية



:victory:

[العقل المدمر]

وانتوا ليش معورين قلوبكم
شي راجع للعروس والمعرس وهم اللي يحددون الانسب لهم :)

[فارس الكلمة]

شكراً لمداخلاتكم الجميلة ..

نحن مع الحرية الشخصية .. لكن هل هذه الظاهرة الجديدة مريحة نفسياً

و تنظيمياً ..؟!

[العقل المدمر]

شكراً لمداخلاتكم الجميلة ..

نحن مع الحرية الشخصية .. لكن هل هذه الظاهرة الجديدة مريحة نفسياً

و تنظيمياً ..؟!


بالنسبه للبعض ؟ اي
اكيد اللي يسوونها لهم وجهه نظرهم اللي تخليهم يفضلونها
يعتمد على الاشخاص نفسهم بالدرجه الاولى

[فلتة زمانها]

حلاته في يوم واحد عشان يكمل الاكشن

[هبوب الكوس]

:looking:

[بـــــــنت النوخـّــــذه]

مؤيد وبقوة لهذه الطريقة
وكل إنسان ( أهم شي ) يسوي اللي يبيه هو و زوجته ويقول للناس كلها ( طز )

والله اتمنى اشوي نختار الألفاظ ألي تحترم الذوق العام 000


المهم الاخ الفاضل فارس الكلمه000 الحركه هذي مهب مقصوده منهم تراهم مجبورين يعني مثلا حجز الفندق للعروس ماحصلو إلا بهذا اليوم والمعرس ماحصل مكان لعرسه الا قبلها بيوم او يومين عجز وهو يدور الحجز في نفس الوقت 00ترى اغلب الاعراس الي انروحها هذي مشكلتهم فما افرقت يوم ولا يومين دام عندهم ظروف اجبرتهم على هذا الشي 000

ترى على فكره من كمن يوم وحده اتقولي عرس فلانه اليوم ولكن عرس زوجها كان من شهر :eek5: يعني الرجال سوى عرسه من شهر واهي توها والسبب حجز الفندق الفلاني بالذات والمطربه الفلانيه !!!!!!!!!!!!!!!!!!!!! يعني هذي الحركه صج ماصخه

اهو الشي مهب حلو ولكن شتسوي ترى اغلبهم الظروف مجبرين وبعضهم الحريم يودونهم يمين و يسار :p

[فلتة زمانها]

والله اتمنى اشوي نختار الألفاظ ألي تحترم الذوق العام 000


المهم الاخ الفاضل فارس الكلمه000 الحركه هذي مهب مقصوده منهم تراهم مجبورين يعني مثلا حجز الفندق للعروس ماحصلو إلا بهذا اليوم والمعرس ماحصل مكان لعرسه الا قبلها بيوم او يومين عجز وهو يدور الحجز في نفس الوقت 00ترى اغلب الاعراس الي انروحها هذي مشكلتهم فما افرقت يوم ولا يومين دام عندهم ظروف اجبرتهم على هذا الشي 000

ترى على فكره من كمن يوم وحده اتقولي عرس فلانه اليوم ولكن عرس زوجها كان من شهر :eek5: يعني الرجال سوى عرسه من شهر واهي توها والسبب حجز الفندق الفلاني بالذات والمطربه الفلانيه !!!!!!!!!!!!!!!!!!!!! يعني هذي الحركه صج ماصخه

اهو الشي مهب حلو ولكن شتسوي ترى اغلبهم الظروف مجبرين وبعضهم الحريم يودونهم يمين و يسار :p

بنت النوخذه ترى ( طز ) كلمة تركيه قديمه معناه ملح قالنا دكتور في الجامعه على اي اساس صارت لفظ غير محترم:nice:

[R 7 A L]

فكرة حلوة
وفية ناس يطبقونها

بس العادة اجبرتنا يكون في يوم واحد

[بـــــــنت النوخـّــــذه]

[

بنت النوخذه ترى ( طز ) كلمة تركيه قديمه معناه ملح قالنا دكتور في الجامعه على اي اساس صارت لفظ غير محترم:nice:

ياهلا بفلته زمانها 000

اهي كلمه سوقيه ولا تصلح للتداول00 ويكفي نطقها مقزز ^_^

وايد فيه كلمات سوقيه بالمجتمع ولكن ما أجي انطقها واقول ترى معناها جذيه بالبلاد الفلانيه 00 وسلمي على دكتوركم قولي له بنت النوخذه اتقول لك هذي الكلمه يمكن اتكون مقبوله بمجتمعك اما بمجتمعنا كلمه سوقيه جدا" وعلى فكره الانسان لما يتكلم يتخير احسن الألفاظ للتعبير ويكون لها قبول على مسمع الاخرين ^____^ هذا من باب الذوق والاتيكيت 000:)

[ام السعف]

وانتوا ليش معورين قلوبكم
شي راجع للعروس والمعرس وهم اللي يحددون الانسب لهم :)


اعجبني ردك ،، :nice:

مب عارفة شنهي سالفة الناس ؟؟

ليش يبون كل شي على حسب ما تعودوا عليه او حبوه او ارغبوا فيه !!

مب عارفة ليش لو الرجل عمل ليلة عرسه بليلة غير عن ليلة الدخلة
يعدونه سكانة مرته ؟؟!!

والله دام انه بيكون سكانة مرته وبيكون سعيد في حياته هذا افضل من
انه يبين للناس انه عتر وشديد وفي الأخير حياته الخاصة مأساوية ،،

اعتقد ومع احترامي الشديد للجميع ،، محتاجين الى الكثير من
فهم حاجات الآخرين وفهم حريتهم الخاصة في فعل ما يشاؤون
فالكثير من العادات محبوبة لقدمها ويمكن التجاوز عنها ما دامت ستدخل السرور
على اصحابها ،،

ام السعف
من فضاء الحريات المطلقة

[فيزيائية]

كل(ن) وظروفه....وتفكيره .....وترتيباته

[الـقـاسـي]

في هالحاله بتكون اريح للرجل لانه بيكون مرتاح طول اليوم عموما هذي العاده تتكرر كثير في الامارات وحظرتها انا في زواج اقارب لي من الامارات ..


السلام عليكم


انا مع هذه الظاهره الجديده نوعا ما ولكن بطريقه مختلفه .

تزوج اخوي قبل 10 سنين و الي سواه شوي غير

كانت الدخله قبل العرس بليله ... الدخله كانت عباره عن حفل عائلي خاص جدا و عشى محفوف .

الايجابيات :

1- يلتقي الزوجين تحت ضغوط نفسيه اقل ذلك بسبب ان امعازيم هم من المقربين و ايضا لقله عدد المعازين (خوات العروس و المعرس و بعض الحمات و الخالات فقط مع امهات المعرس و العروس).
2- في هذه الحاله يلتقي الزوجين و العروس في افضل حالاتها من ناحيه الشكل .. ففي الوضع العادي يشاهد المعرس عروسه بعد ان مرت عليها ليله طويله و عصيبه ولا تخلو من بعض البكاء و هذا كله يؤثر سالبا على شكل العروس .
3- في ليله العرس و التي سبقتها الدخله بـ ليله يكون العروسين تحت ضغط نفسي و بدني اقل بحيث ان كل من العروسين امضا ليلته الفائته سويا مما يتيح فرصه اكبر للعروسين في الاستمتاع بليله عرسه .
4- غيره الكثير :)


بصراحة اكثر رد عجبني والفكرة ممتازة جدا وعمليه ومهمه والمفروض انها تصير بهالطريقة ..

لان مراح يكونون المعرس والعروس تعبانين طول اليوم كل واحد بيجي وهو مرتاح ومراح يكون مضغوط او شي وثاني يوم العروس بتكون مرتاحه نفسيا في عرسها لاتوتر ولا خوف والمعرس بعد نفس الشي بيكون مرتاح نفسيا ..

[الصريحه]

لا حلاته بنفس الليله
يومين حرام تعب وضغط نفسي وارهاق للجانبين مع اهلهم
ليله وتعدي

[فارس الكلمة]

كل الشعوب تقريباً .. في الشرق و الغرب .. تكون هناك ليلة واحدة للزواج

و ليس ليلتين .. كما نرى من البعض .. و قد يحصل ذلك بسبب ما قالت به أختي بنت النوخذه

من الحجوزات و أختلافها .. بين الزوج و زوجته .. مع أن المفروض أن يكون هناك ترتيباً و تنسيقاً

مسبقاً بهذا الشأن ..

[لاجل QT]

مانقدر نقول شي ..كلن حر باختيارة ..براحتهم ....

[اسعاف]

نا ولدي سواها

[ام السعف]

كل الشعوب تقريباً .. في الشرق و الغرب .. تكون هناك ليلة واحدة للزواج

و ليس ليلتين .. كما نرى من البعض .. و قد يحصل ذلك بسبب ما قالت به أختي بنت النوخذه

من الحجوزات و أختلافها .. بين الزوج و زوجته .. مع أن المفروض أن يكون هناك ترتيباً و تنسيقاً

مسبقاً بهذا الشأن ..


الأمر هذا يا اخوي فارس سمعت عنه من 10 سنين في البحرين
يعني شي مب جديد ،،
فمثل هالأمر يعني ربما يكون مب مرغوب لدينا
وامر جديد ،، ألهم اللي ياخذون به هم الأكثر مقدرة عن التعبير
عن مميزاته او عيوبه ،،

[latty]

مب حلو حلاته بليله وحده

[shady elbaik]

للضروره احكام و المستغرب اليوم بيصير بكره من العرف و الله المستعان .

[الرويـس]

يصطفلوا

[مخطط قطري]

اذكر عرس في الامارات حضرته احتفلو فيه 3 ايام وكل يوم المعرس مرتز في الخيمه مايسوى عليه لا ويجيك من العصر
حلات العرس يوم واحد ويخلص

[سكرمر]

عرس الرجال فى يوم والنساء فى اخر /// شدعوه كرنفال

[فارس الكلمة]

شكراً لردودكم ..

المثل القطري .. يقول : طق الحديدة و هي حارة .. !

[الألماسي]

يسوي اللي يبيه هو و زوجته ويقول للناس كلها ( طز )


طيب هـ الناس " ابوه . . امه . . اخوه . . اخته . . خاله . . عمه . . عمته . .الخ . . الخ "

:)

[نتفـه]

على هواهم يبه ,, وفعلا باجر اغلب الناس بيسوونها موضه كالعاده ,,
شي يستغربونه و يستنكرونه ويطبقونه !!!!

[Bin Hood]

الأمر هذا يا اخوي فارس سمعت عنه من 10 سنين في البحرين
يعني شي مب جديد ،،
فمثل هالأمر يعني ربما يكون مب مرغوب لدينا
وامر جديد ،، ألهم اللي ياخذون به هم الأكثر مقدرة عن التعبير
عن مميزاته او عيوبه ،،

كلام سليم اختي ام السعف إحنا من زمان غيرنا النظام لان الريال يتعب تعب هب طبيعي ، ويطلع من عرس الرجال الساعة 10 ببشته كانه باتمان الي عرس الحريم ، والي يقول مسكين المعرس ماشاف العروس ماعنده سالفة بأجر يشوفها وعلي سعة . *

[القلم الصريح]

واحد من الاهل سوا عرسه على يوميين ، يوم عشى الرجال ويوم الثاني حفلة النساء

وكان مجبور على يوميين بسبب انه ماعنده حد يوقف معاه ويساعده غير ابوه واخوه وبس فضطر يسويه على

يوميين على اساس اخوه وابوه يتفرغوا لمعازييمهم للرجال ويوم الثاني يتفرغوا للحريم يوديهم الصالونات

وقاعه الافراح وطلعت الفكره وايد حلوه وممتازه وكانت مريحه لاهل الزوج والزوجه

[المتحدث الرسمي]

انا من رايي اشوف انها حركه مالها داعي ... الا اذا الواحد مضطر

اخبر يوم كنت ادور قاعه حق عرسي لقيت حق عرس الرياييل بعدها بيوم من عرس الحريم

والاهل يقولون اي احسن واريح لك قلت لهم انا ما ابي الراحه وكلمت 66 الف واحد عشان يدبر لي حجز في نفس الليله والحمدلله تيسرت الامور ومشت


واذكر واحد من الربع كان مسوي عرس الحريم بعد عرس الرياييل بيوم ... الحبيب كان يمشي على الكورنيش العصر يقول للحين عندي وقت:con2::con2:

[صدى الخافق]

حلاة الفرحه بيوم واحد

ويبقى للناس عذرها بإختيار هالشي

يمكن في مشاكل بحجز القاعات مثلاً

أو يمكن الشاب يخاف أن ينهد حيله

فيقسم الفرحه على يومين

ولاحظت أن هالطريقه بعض الشباب يحبون هالتقسيم

بحيث أن يقعد مع ربعه مده أطول في العرس

ويروح بعدين ينام ويرتاح ويعين من الله خير

علشان يكون مستعد لليله الثانيه ويدش بقلب قوي

بس بصراحه مافي احلى من أن نوحد الفرحه