ما مدى صحة القول : المواطن الخليجي في دولة قطر يعامل كالمواطن القطري؟؟

[الزين]

بسم الله الرحمن الرحيم

السلام عليكم ورحمة الله وبركاته

كيف الحال جميعا؟ ان شاء الله بأحسن الاحوال؟omen

سؤال يدور في بالي.. وقد يكون في بال الجميع ايضا..

كلنا نعلم ان بعض الاماكن في دولة قطر فتحت ابوابها لتوظيف الجميع

على راس الاولوية : المواطن القطري..

ومن ثم : المواطن الخليجي..

ومن ثم : الاجانب..

وللاسف ليست كل ادارة موارد بشرية في بعض الجهات تتبع قانون الموارد البشرية المتبع في داخل الدولة..

الكثير منا قد سمع بــ: معاملة المواطن الخليجي مثل معاملة المواطن القطري ، ما عدا لا يحسب له العلاوة الاجتماعية ، ولا يمكنه اخذ القرض او الارض من الدولة .. والخ

لكن يقدر يبيع ويشتري ويتاجر ويكفل وهالامور....:stop:

الفكرة من هذا الموضوع ..

توجد بعض الاستفسارات .. :con2:

1) في مجال العمل .. هل تطلب وزارة العمل من الموظف الخليجي بما يسمى بـ / بطاقة تصريح العمل من وزارة العمل؟ اي القصد انت على كفالة من ؟؟ ومن ثم يجب الحصول على الموافقة بعملك لدينا...!!!! ( يحسسون الواحد انه داش الدولة بفيزا )

2) بخصوص اجازة الوضع .. لقد تم ذكر هذا البند في قانون الموارد البشرية على تكون 60 يوم للموظفة ( ولم يذكر سواء قطرية كانت او اجنبية او خليجية) .. فللاسف توجد بعض الاماكن تفرق بين النساء... الموظفات.. اذ تعطى 60 يوما للموظفة القطرية.. بينما للخليجية او الاجنبية 30يوما... !!!!(هنا يعني ان الخليجية حالها حال الاجنبية..صح؟) ..!! هل يعقل ان ولادة هذه الموظفة تختلف عن الاخرى؟؟ فما بالكم في حل هذه المشكلة قد يتم الاتفاق ما بين المعادلة بين القطرية والاجنبية او الخليجية في اعطاءهم 45 يوما...!!! اما النقص او الزيادة؟؟؟؟

3) بخصوص التفرغ للدراسة .. او للدورة الخارجية او الداخلية... هل يمنع الموظف الخليجي او الاجنبي؟؟ وتكون الاحقية للقطري؟؟ ( ما قلنا شي بس من حق كل موظف في اي جهة كانت التطوير والتدريب والحصول على شهادات خصوصا ان الموظف قد امضى سنوات عديده في مقر عمله وهو مواظب على الحضور وذكي في حل الامور ونشط في عمله ومجد في تحصيل العائد المعنوي للوظيفة... ما قولكم حيال هذا الشي؟؟

4) بخصوص تعديل الوضع .. بعض الجهة تحرم الموظفين القدامى من اعطاءهم ما يستحقونه .. ومن ضمنهم قد يكون الخليجي او الاجنبي.. (من هني بنلاحظ ان الخليجي معدوم من كل حقوقه في عمله ) ....؟؟؟

5) بخصوص التعيينات بحسب الموهل الدراسي وسنوات الخبره ... الكل عارف ان السينيور "فئة كبار الموظفين" ( يعني من الي متخرجين من الجامعه فريش او الي متخرج وعنده خبره ) .. والجينيور "فئة صغار الموظفين" ( يعني من الي عنده موهل اقل من الجامعه سواء دبلوم او ثانوية او ...).. للاسف نرى بعض الناس تتوظف في فئة السينيور وماعندهم حتى شهادة جامعيه او خبره كبيرة .. بحكم علاقاتهم القوية بمدير التعيين او الموارد .. وفي بعض الناس موهلاتها قوية وخبراتها كثيرة يخلونهم في درجات الجينيور... (وين العدالة؟ الا كله ظلم في ظلم..) ... ابي افهم وين القانون الي يمشون عليه بعض الجهات؟؟

6) بخصوص تحديد الراتب للموظفين الجدد... للاسف نلاحظ ان رواتبنا القطريين الحمدلله (بس لو نقارنها مع الي برع) اقصد الاجانب.. والله ان رواتبنا ولا شي... وبالفعل مثال حي ... شخص خليجي وشخص اجنبي وشخص قطري = بنفس الموهلات والخبره وقوة الشخصية .. نلاحظ ان الاجنبي له الرصيد الاعلى في كل شي.... ومن ثم القطري ومن ثم الخليجي.. طبعا من المعروف ان الاولوية للقطريين في كل مكان ... بس هني المقارنة لو بنخليها بين الخليجي والاجنبي ...(يمكن تقولون وش فيها متحيزة للخليجيين .. لا بالعكس هذول منا وفينا ونص شعب قطر نلقى اهلهم من الخليج ... وعلى قولة المبدا الي اندثر.. خليجنا واحد وشعبنا واحد... وينها؟؟؟...)

المهم

ادري طولت عليكم وايد بمووضوعي .. بس والله من القهر والحرة الي تدش قلب الواحد لما يشوف حد يعز عليه او خلونا نتكلم كلمة حق ... ينظلم ... ليش..؟؟؟؟:thumbdown:

طبعا هاي بعض من الاشياء الي كانت في خاطري وللحين ترى ما فضيت الي بجبدي كله ههههههههههcrazycrazy



ماقول الا الله يعيين الناس كلهم .. ترى العدالة معدومة ,, والظلم موجود.. ومردنا الى التراب ومقابلة رب العالمين . وحزتها عاد وين الضمير الي بيرتاح ؟؟ او ايش بتردون على ربكم لو سالكم في الشي الي كان تحت يدكم؟؟

خافو الله ياللي ماسكين المناصب راعوها واعملوا بها بذمة وضمير ..

والسموحة ترى ما اقصد الا النقاش وايجاد بعض الحلول الي بعض جهات العمل لا تتتبع القوانين الا بجزء وليس الكل ..

والقصد من هالموضوع النقاش والحلول.. على الله توصل لبعض المسائيل الي مايدرون ايش يحصل من وراهم ... :thumbdown::thumbdown::thumbdown:

تقبلو مني جزيل الشكر والتقدير :pic:

[qtr-1st]

الخليجي والاجنبي = 1 في الامور المعنويه

وفي الماديات الاجنبي متصدر القائمه ومن ثم القطري وبعده الخليجي

الله المستعان

[الزين]

اي والله وانت صاج .. يعطيك العافيه على المرور والرد

بس هل انت مع او ضد هالتمييز؟؟

[قلم محايد]

والله ياخوي اسمعها مني انا خليجي و اشتغلت في دولة قطر الحبيبة منذ بداية السنة تقريبا و الان ساعود لبلادي .. بسبب بعض الامور الخاصة استقلت من عملي و بسبب بعض الامور حصلت في العمل لا اود ان اذكرها ..

و اما بالنسبة للمساواة مع قطري لا توجد , الشيء الوحيد نحن الخليجيين لا نحتاج لفيزا لدخول قطر مثل بقية الاجانب ! و طبعا هذا الشيء ينطبق على القطريين عندما يزورون دول الخليج الاخرى .

بالنسبة للراتب رواتبنا اقل من القطريين و من الاجانب ايضا ( لو جيت للاجنبي الاوربي او الاسترالي مثلا راتبه عالي جدا و بعده القطري اما الخليجي اقل شيء )

و ثاني شيء انا واحد تعطلت فترة طويلة لين طلع تصريح العمل , و رحت و جيت من بلادي و سافرت و رجعوني عدة مرات بسبب اختام ناقصة من السفارة و الخارجية على بعض الاوراق و الشهادات !

صحيح هناك تقارب في العادات و التقاليد بين الشعبين الشقيقين ووجود امور اخرى ايجابية و الراتب يعتبر جيد لكن المشكلة اقولك اياها صراحة السكن وايد غالي في الدوحة و ياخذ من الراتب نسبة كبيرة و معظم الراتب ينصرف على الاكل و بقية المصاريف ..

طبعا اكيد امور الارض و القرض و غيرها الاولى بها المواطن القطري و هذا حقه في ديرته , بس الخليجي يلاقي صعوبة لان حتى السكن بالايجار غالي و مكلف .. و هذي اكثر نقطة يعاني منها الخليجيين بحسب رايي .. اما باقي الامور فهي طيبة في الدوحة امن و امان و بلد هادئ و جميل لكن ان الخليجي فيه مساواة الجواب لا طبعا . و حتى بالتوظيف الخليجي حاله حال الاجنبي .

تحياتي

[صلاتي]

اي والله وانت صاج .. يعطيك العافيه على المرور والرد

بس هل انت مع او ضد هالتمييز؟؟

أهل الخليج هم أهلنا وحبايبنا

ونحب لهم مثل ما نحب لنا

ولكن مع الاسف التميز موجود في كل مكان

لو راح القطري في أي دولة خليجية

سوف يعامل بنفس معاملة الوافد الاجني صح

[الزين]

يعطيك العافيه اخوي

قبل كل شي انا بنت مش ولد

وبعدين ماقول الا الخيرة فيما اختارها الله

يعطيك العافيه الصراحة ما الومك .. بس انا اعرف ناس اصولها قطرية لكن تحمل جواز احد دول الخليج .. وعندهم معاملة استرداد الجنسية القطرية ,,, واهلهم قطريين ابا عن جد .. ومقيمين معاهم في نفس البيت .. لكن هم بعد التفرقه موجوده والعنصرية ...

الله المستعان .. لو بيدي شي والله ساعدتك ياخوي

لكن الله كريم ان شاء الله وربي يوفقك ويسهل عليك امورك

[الزين]

أهل الخليج هم أهلنا وحبايبنا

ونحب لهم مثل ما نحب لنا

ولكن مع الاسف التميز موجود في كل مكان

لو راح القطري في أي دولة خليجية

سوف يعامل بنفس معاملة الوافد الاجني صح

يعطيك العافيه اخوي اشكرك على الرد

انا ادري ان التمييز في كل مكان

لكن الموضوع الي انا طارحته يتكلم عن التلاعب في قانون الموارد البشرية ... والامور الي تحصل هني

انا ما تطرقت للخارج ,, عموما مشكور وماقصرت ,, في انتظار ردود الاخرين

[قطريه ماركه]

فما بالكم في حل هذه المشكلة قد يتم الاتفاق ما بين المعادلة بين القطرية والاجنبية او الخليجية في اعطاءهم 45 يوما...!!!

لا لا لا مانبي حل...... ال60 يوم حلوييييين و مانبي نقلل منهم ولا يوم !!!!!!

اي معلى خل نحس انه بلادنا تميزننا و تدللنا عنهم !!!!!!!!!!!

لو في بلادهم ما بيعطوننا أكثر من حقننا و مابيعاملوننا مثل المواطن مهما يكون !!!!!!!!!!!!

و هاي راي شخصي ..........

و شكرااااااااا ....

[مخطط قطري]

ياخوي انت على بالك قطر الجنة ترى الكلام لي ينقال عنها عباره عن بهارات اذا احنا يالقطريين مستائين من بعض الاشياء ولكان الحمدالله رب العالمين ونشكره على هذه النعه الله يدومها من نعمه ويحفظها من الزوال وبعدين قطر كلها فتره وشعبها راح ينقرض

[شيط ويط]

بالنسبة للموظفين في الوزارات الحكومية اللي تتبع مجلس الوزراء .. من حيث الراتب يتعامل الموظف الخليجي مثل الموظف (غير القطري) .. ويعين على درجة (المقطوع) .. يعني الراتب فقط من غير اي علاوات .. وينتفع بالاسكان الحكومي (ra) .. وكلا حسب مؤهلاتي وحسب المسمى الوظيفي .

من ناحية التفرغ للدراسة ( لاينطبق) عليهم هالنظام .. وكذلك الحال بالنسبة لتعديل الوضع بحيث يبقى على نفس الوظيفة اللي هو عليها باستثناء اذا وجد شاغر ويحقق المعايير عشان يعدلون وضعه لدرجه اعلى وفي الغالب مايفرق الراتب كثير .. ويحتاج واسطه عشان تعديل وضعه ومخاطبات مالها اول ولا آخر

باقي الامور ماعندي خلفيه عنها

[الزين]

انا معاج اختي

بس اقصد ان القانون محدد 60 يوم لاجازه الوضع

بس في مكان محدد للقطريات 60 يوم .. وللخليجيات 30 يوم

ونفس هالمكان لما البنات احتجو قالو خلاص بنعطيكم انتو الاثنين 45 يوم ...

وعلى فكرة في هيئة حكومية دبلوماسيه تعطي القطريات والاجنبيات 60 يوم ,, يعني وعليه الخلجيات ليش محرومات؟؟ هاي قصدي من ذي الشي

ويعطيج العافيه اختي على الرد

[الزين]

مخطط قطري ... تسلم لي على الرد هههههههههه تعليقك حلو بصراحة

اخوي شيط ويط .. كلامك وافي وانا عارفه هالشي ,, بس قصدي عن الجهات الثانيه .. بشكل عام ,,, ليش يتجاهلون او يتحاشون قانون الموارد البشرية؟؟

مشكورين على التفاعل

[قلم محايد]

يعطيك العافيه اخوي

قبل كل شي انا بنت مش ولد

وبعدين ماقول الا الخيرة فيما اختارها الله

يعطيك العافيه الصراحة ما الومك .. بس انا اعرف ناس اصولها قطرية لكن تحمل جواز احد دول الخليج .. وعندهم معاملة استرداد الجنسية القطرية ,,, واهلهم قطريين ابا عن جد .. ومقيمين معاهم في نفس البيت .. لكن هم بعد التفرقه موجوده والعنصرية ...

الله المستعان .. لو بيدي شي والله ساعدتك ياخوي

لكن الله كريم ان شاء الله وربي يوفقك ويسهل عليك امورك


الله يعافيج اختي و بارك الله فيج و شكرا لكلامج الطيب و انا ما اختلف مع الاخوان اللي يقولون بحق القطري يتميز في ديرته هذا شيء طبيعي و من حقه لكن الموضوع مثل ماقلتي ان الخليجي قد يكون اقل من الاجنبي !! لا تنسين اختي نقطة ماكنت ابي اذكرها لكن في كثير من الاعمال الاجانب و بحكم كونهم غالبية او حتى العرب تلاقين جنسية معينة متواجدة بكثافة في قسم معين في العمل و يسولفون مع بعض و يشيلون بعضهم البعض و يعلمون بعضهم و لو جا قطري غصبا عليهم يعلمونه لانه قطري , لكن الخليجي مايعلمونه شيء و يخلونه جذي بروحه مايعلمونه و يسوون روحهم مشغولين لكن لو يجي واحد منهم و فيهم من نفس جنسيتهم يعلمونه كل شيء في الشغل من الالف للياء ! و هذي نقطة اثرت علي انا شخصيا ! يعني السالفة مو مادية بس !


و تحياتي لج مرة ثانية و شكرا على الموضوع المهم .

[مخطط قطري]

هلاا فيج هذا واقع ليه ليه مانلرضى باواقع

[الزين]

قلم محايد ... يعطيك العافيه اخوي ولا شكر على واجب .. هالموضوع ممكن يخدم الف شخص يعاني هالمشكلة
وماقول الا الله يعيين الجميع ,.. وبالفعل الي قلته مر علي وقدامي في مجال عملي بس الحمدلله بعيد عني هههههههههه


مخطط قطري .. حياك الله اخوي :)

[qtr-1st]

الزين الاخ قلم محايد فادج اكثر بالرد وهذا من واقع تجربته

وانا مع الاخت قطريه ماركه في ان المواطن تختلف معاملته عن غير المواطن وهذا مايميزه في بلده

ولكن اتمنى تطبيق مقولة خليجنا واحد والمعامله بالمثل في دول الخليج

[الزين]

اخوي قطر فيرست ,.,, انا معاكم في كل الي قلتووه

بس موضوعي هني انا اتكلم عن تطبيق القانون الي يخص الموارد البشرية ... والكتاب كاهو قدامي

في اشياء لما تقراها مذكور فيه القطري وفيه مذكور الموظف .. انا اتكلم عن عدم تطبيق هالنقاط ... ليشش؟؟

الظاهر محد فاهمني .:*_*:.

[مخطط قطري]

الشيخ انت تتوقع ان الخليج معاملتهم وحده اذا القطري مب مرتاح في بلاداه والخليجين مب مرتاحين في بلاادهم تتوقع معاملاتهم وحده يمكن في عدم الراحه

[الزين]

-__-

لا تعليق

[ألحـــــان]

رأي الشخصي



1) في مجال العمل .. هل تطلب وزارة العمل من الموظف الخليجي بما يسمى بـ / بطاقة تصريح العمل من وزارة العمل؟ اي القصد انت على كفالة من ؟؟ ومن ثم يجب الحصول على الموافقة بعملك لدينا...!!!! ( يحسسون الواحد انه داش الدولة بفيزا )
:pic:

هذي قوانين ولازم تجاريها، وهي تساعد على تنظيم العمل في كل إدارات الدولة ،حتى القطريين يقدمون على تقيدم اوراقهم عن طريق *السي اي دي* يعني الحال واحد بس اختلاف الإدراات




2) بخصوص اجازة الوضع .. لقد تم ذكر هذا البند في قانون الموارد البشرية على تكون 60 يوم للموظفة ( ولم يذكر سواء قطرية كانت او اجنبية او خليجية) .. فللاسف توجد بعض الاماكن تفرق بين النساء... الموظفات.. اذ تعطى 60 يوما للموظفة القطرية.. بينما للخليجية او الاجنبية 30يوما... !!!!(هنا يعني ان الخليجية حالها حال الاجنبية..صح؟) ..!! هل يعقل ان ولادة هذه الموظفة تختلف عن الاخرى؟؟ فما بالكم في حل هذه المشكلة قد يتم الاتفاق ما بين المعادلة بين القطرية والاجنبية او الخليجية في اعطاءهم 45 يوما...!!! اما النقص او الزيادة؟؟؟؟
:pic:

هذا القانون ضد الإنسانيه وليس ضد فئه معينه او جنسيه معينه، المرأه تحتاج إلى 40 يوم فعلياً لترجع لصحتها والمفروض يخلونها 60 او حتى 45 لكل الحريم،



3) بخصوص التفرغ للدراسة .. او للدورة الخارجية او الداخلية... هل يمنع الموظف الخليجي او الاجنبي؟؟ وتكون الاحقية للقطري؟؟ ( ما قلنا شي بس من حق كل موظف في اي جهة كانت التطوير والتدريب والحصول على شهادات خصوصا ان الموظف قد امضى سنوات عديده في مقر عمله وهو مواظب على الحضور وذكي في حل الامور ونشط في عمله ومجد في تحصيل العائد المعنوي للوظيفة... ما قولكم حيال هذا الشي؟؟
:pic:

اذا وقف الموضوع على دورات صح من حق اي موظف ياخذ دورات لان اي عمل رسمي في الدوله يقدم عقد ويكتب فيه دورات للموظف لازم ان يطبق القانون بالإلتزام بتوفير الدورات المطلوبه خاصه اذا الموظف كفىء ،

ومثال حي قطر للبترول وظفت اخوانا الخليجين في وظائف معينه وقاموا بإعطائهم دورات مكثفه وتحسنت درجات وظائفهم مع الوقت




4) بخصوص تعديل الوضع .. بعض الجهة تحرم الموظفين القدامى من اعطاءهم ما يستحقونه .. ومن ضمنهم قد يكون الخليجي او الاجنبي.. (من هني بنلاحظ ان الخليجي معدوم من كل حقوقه في عمله ) ....؟؟؟
:pic:

انت ذكرت بعضها، وأتفق معاك ، ولا تنسى ان تعديل الوضع مربوط بأداء الموظف في عمله، وثانيا على حسب الإداره العامل بها لان احنا نفتقر في بعض الأدارات الكفاءه الإداريه في توزيع المهام وبالتالي توزيع الحقوق ومن ثم ايجاد الحل وهو الواسطه *الفساد الإداري* لأخذ حقك




5) بخصوص التعيينات بحسب الموهل الدراسي وسنوات الخبره ... الكل عارف ان السينيور "فئة كبار الموظفين" ( يعني من الي متخرجين من الجامعه فريش او الي متخرج وعنده خبره ) .. والجينيور "فئة صغار الموظفين" ( يعني من الي عنده موهل اقل من الجامعه سواء دبلوم او ثانوية او ...).. للاسف نرى بعض الناس تتوظف في فئة السينيور وماعندهم حتى شهادة جامعيه او خبره كبيرة .. بحكم علاقاتهم القوية بمدير التعيين او الموارد .. وفي بعض الناس موهلاتها قوية وخبراتها كثيرة يخلونهم في درجات الجينيور... (وين العدالة؟ الا كله ظلم في ظلم..) ... ابي افهم وين القانون الي يمشون عليه بعض الجهات؟؟
:pic:

:thumbup1:، حاصله قدام عيني، والساكت عن الحق شيطان أخرس،
وتكلمنا وقلنا لاكن لا حياة لمن تنادي، صاير نظام البقاء للأقوى،
والقانون اللي يمشون عليه لجل عين تكرم مدينة، :con2:والشاطر يفهمها





6) بخصوص تحديد الراتب للموظفين الجدد... للاسف نلاحظ ان رواتبنا القطريين الحمدلله (بس لو نقارنها مع الي برع) اقصد الاجانب.. والله ان رواتبنا ولا شي... وبالفعل مثال حي ... شخص خليجي وشخص اجنبي وشخص قطري = بنفس الموهلات والخبره وقوة الشخصية .. نلاحظ ان الاجنبي له الرصيد الاعلى في كل شي.... ومن ثم القطري ومن ثم الخليجي.. طبعا من المعروف ان الاولوية للقطريين في كل مكان ... بس هني المقارنة لو بنخليها بين الخليجي والاجنبي ...(يمكن تقولون وش فيها متحيزة للخليجيين .. لا بالعكس هذول منا وفينا ونص شعب قطر نلقى اهلهم من الخليج ... وعلى قولة المبدا الي اندثر.. خليجنا واحد وشعبنا واحد... وينها؟؟؟...)
:pic:

هذي توقف على ميزانية كل سنه ، ودايما الموظفين الجدد رواتبهم الأساسيه تكون أعلى من القدام، بعد ما ادري اي قانون في العالم هالشكل،

اذا بيرفعون من الرواتب الأساسيه مفروض يرفعون الكل، محد أحسن من حد

الرصيد الأعلى للأجنبي الغربي = لأنه أشقر وعيونه خضر وما عنده بيت يا حرام مسكين لان لو فيه خير ما قطه الطير ، كان خلوه عندهم يستفيدون منه، وهذا يطبق على 99% من الغرب عندنا
ولبعض العرب المتميزين، سواء كانوا شاميين يرمش لهم بعينه ويقولهم *تئبرني* و *تكرم عينك*بس للأمانه شغالين ويكرفون كرف بعضهم يستاهل وبعضهم لا

الرصيد المتوسط للقطري = لانه صاحب بلاد وما يصير ما نرضيه ونسكته عن اللي سويناه للأجانب *الغرب*

الرصيد الادنى = للخليجين لانهم اخوانا في الدين والعقيده والمجاوره

الرصيد رقم = لباقي العرب المقيمين في الدولة واللي طايح حظهم ما عندهم جوازات مثل البدون.

[الزين]

الحان ,,,,, احييك وبقوة

بصراحة ردك عجيب ,, وبالفعل انا معاك بكل كلمة

الله الشاهد وهو الي بيده كل شي ... وكما تدين تدان

بنشوف لي وين بتوصل هالمااسي

والله يعين الجميع ان شاء الله

وشاكرة لك ردك ومرورك مرة ثانيه

[لاجئ عاطفي]

يعطيك العافيه اخوي اشكرك على الرد

انا ادري ان التمييز في كل مكان

لكن الموضوع الي انا طارحته يتكلم عن التلاعب في قانون الموارد البشرية ... والامور الي تحصل هني

انا ما تطرقت للخارج ,, عموما مشكور وماقصرت ,, في انتظار ردود الاخرين


قانون الموارد البشريه ماذكر مساواة المواطن الخليجي بالقطري على حد علمي حتى في مجال العمل لان الي اذكره ان الاوليه في التوظيف للقطري ومن ثم ابناء القطرية ومن ثم الخليجين ويجي عقبهم الاجانب

[الزين]

لاجئ عاطفي.. يعطيك العافيه

ترى المشكلة حتى في ابناء القطريات او اللي حاملين وثايق قطرية

ما يلاقون وظيفة وما يشتغلون الا بالعافيه والطق

مشكور على المرور والرد

انا هني طرحت بعض النقاط للنقاش ما تكلمت بشكل عام

ويعطيك العافيه

[الـقـاسـي]

هو المفروض معامله ابناء البلاد تكون افضل معامله ويكون وضعهم افضل وضع ..
اذا بنطالب بمساواه الخليجي بالقطري والاجنبي بالقطري عجل شفايده الجواز القطري ..

عموما اغلب اللي يجون قطر من ؟؟ العمانيين او البحرينيين وقله قليله جدا من السعوديين وهذول يشتغلون في الشرطة ..

لكن اللي يشتغلون هنا وبكثره العمانيين وللاسف في فئه منهم مخربه بصراحة ..


انتي تطالبين باشياء عديده ماتنفع مثلا الاجازة القطرية من حقها تاخذ اجازة اكثر بغض النظر عن الحاله لكن انا لما اجيب غير قطري يشتغل مش جايبه ادلعه انا واعطيه اجازات طويله ..

وبالنسبه للدورات الحكومة مش ملزومة تعطي دورات لغير القطريين لان المفترض لما يشغلون غير القطري يكون على اساس عنده من الموهلات والخبره اللي تكفي مش يجيبونه يدربونه ويعلمونه ..

اما سالفه انه يتم معاملتهم بالمثل مش منطق نهائيا وبعد تبينهم يكفلون ويخيطون ويبيطون هذا كلام فاظي ..

[بوخالد911]

الله يووفق

[ابن مانع]

للا سف هذا الي حاصل في معظم مؤسسات الدوله مع اني اذكر قانون صدر في سنة 2007 بتوحيد المعاملة او المعاملة بالمثل لاكن للاسف ماتنفذ الى الحين غير صندوق التقاعد لهم وهم يجون في المرتبه 3 بعد الاجنبي بمختلف الجنسيات بعدين القطري وبعدين الخليج وحتى في اجرات تعينهم من اصعب الاجرات نفس ماذكر الاخ الي قبلي
الله يكون في عونهم

[بو خليفه 123]

الخليجي والقطري واحد من ناحية المحبه

ولا يحتاج الى اصدار اقامه مرفقه بالجواز مثل الاجنبي .


بس

[الزين]

ماشاء الله

الردود كثرت والاراء تعددت

يعطيكم العافيه والحمدلله بردتو قلبي

على الاقل حسيتو باللي انا احسه

والله يعيين الجميع

وكلنا تحت رحمة رب العالمين ورحمته واسعه فوق كل شي

ومشكورين

[moh80]

الخليجي يعامل معاملة الاجنبي وكذالك مواليد قطر و لأم قطرية كلهم نفس المعاملة