أبي كاميرا احترافية ومب عارف أي نوع أشتري ( مبتدىء)

[بـن عدوان]

السلام عليكم ورحمة الله وبركاته

شخباركم ان شاءالله طيبين .. ؟

انا الصراحة أحب التصوير بس حدي تصوير بالجوال ههههههههه

والصراحة حاب آخذ كاميرا احترافية

مادري كانون أو نيكون ... ؟\

بغيت كاميرا سعرها مايكون غالي وفي نفس الوقت مميزاتها حلوة

الصراحة في صور اجوفها في بعض المواقع رووعه

او طريقه الصور

في صور زواياها مدورة مادري شلون !!

وانا طبعا بكون مبتدىء في الكاميرات ..

ياليت لو تفيدوني، وااذا حد عنده كاميرا مستعمله مع الاغراض ويبي يبيعها يكلمني

وشاكر لكم مقدما ...

[بـن عدوان]

انا سويت بحث وأشوف أنه الكانون 550d أحسن حق المبتدئين

مادري انتوا شرايكم .. ؟

وكم اسعارها: جديدة+مستعملة ؟

[بـن عدوان]

أمثلة على بعض الصور اللي عجبتني وابي اعرف شنو نوع الكاميرا:

http://24.media.tumblr.com/tumblr_lcs0su23tp1qzeykbo1_500.png
http://26.media.tumblr.com/tumblr_lcmo8lZLmu1qbemm2o1_500.jpg
http://25.media.tumblr.com/tumblr_lcmyou1Pzm1qcbemqo1_500.jpg

جوفوا هالصور شلون جاية على شكل دائري:

http://img513.imageshack.us/img513/9598/souq20wagif20207.jpg

http://img710.imageshack.us/img710/7268/souq20wagif20209.jpg

[aljabal]

أخوي نصيحة في كاميرا جدا جدا جدا روعة في الأداء والسعر وفيها ميزات موب موجودة في أغلب الكاميرات الاحترافية
اسمها فوجي hs10
http://www.qatarshares.com/vb/attachment.php?attachmentid=69500&stc=1&d=1291435077

ميزات رووووعة
1) فيها فيديو فل اتش دي أغلب الكاميرات الاحترافية مافيها فيديو

2) وفيها بانوراما يعني تصوير 180 درجة وأتحدى أي كاميرا احترافية اتصور مثلها
http://www.qatarshares.com/vb/attachment.php?attachmentid=69493&stc=1&d=1291434640

3) وفيها ميزة زووم روووووووعة 30 أوبتيكال زووم يعني يجيبلك تفاصيل التفاصيل أما في الكاميرات الاحترافية تقدر اتجيب عدسة واتركبها لكن بتدفع فلوس أكثر من حق الكاميرا وهذا معروف
http://www.qatarshares.com/vb/attachment.php?attachmentid=69496&stc=1&d=1291434708

4) وفيها تصوير مايكرو يعني تقدر اتصور حشرة بكل تفاصيلها وااضحة
5) وفيها بصراحة ميزة روووعة تقدر اتصور حديقة فيها ناس يتحركون ويطلعلك الصورة بدون الناس الي تتحرك وأتحدى أي كاميرا من الاحترافية يكون فيها ها الميزة
http://www.qatarshares.com/vb/attachment.php?attachmentid=69498&stc=1&d=1291435125

6) وفيها ميزة رووووووع تقدر اتصور مشهد متحرك سريع ويلتقط 10 صور في الثانية وكل صورة جودة عالية
http://www.qatarshares.com/vb/attachment.php?attachmentid=69499&stc=1&d=1291434996

7) والميقا بكسل فيها 10 ومميزات ثانية ليلية وووو الخ
يا عمي أي كانون وأي نيكون .؟؟؟
هذا النوع آخر موديل نزل يعني جديدة
انا ماخذها من النت حول2000 ريال لكن في الدوحة ممكن اتلاقيها فوق 2500
هذا رابط عنها والموضوع يرجعلك
http://www.fujifilm.com/products/digital_cameras/s/finepix_hs10/


هذا رأيي وفي الأخير اختار الي يعجبك
تحياتي

[نتفـه]

نفسك انا بالضبط يا صاحب الممموضوع ,, احب التصوير لكن ماعندي احتراف وخاطري بكيمره ,, شكلها فوجي شي والله .. وسعرها زين ,,
مع ان خاطري في كانون دي 500 مادري 550 ,,

[A 7 M A D]

اخوي لو فعلا تحب التصوير وبتستمر فيه خذ لك كاميرا احترافيه مثل ماقالو لك الاخوان

لكن لو فقط عجبتك كم صوره وتبي تسوي مثلهم ما انصحك

فالنهايه الصور اللي انت حاطه جات بعد خبره وتجارب واخطاء لين ماطلعوا بهالصور

بعدين الكاميرا للي بتاخذها بتكون مع عدسه عاديه جدا .. حتى مابيكون فيها زوم ممتاز

والصور اللي انت حاطه كلها بعدسات مختلفه

خصوصا اللي عاجبتك اللي تقول الزوايا مدوره " محدبه "

هاذي مأخوذه بعدسة ال fish eye

وتقدر من موقع كانون نفسه تشوف الفرق بين الكاميرات وعقب تشتري من الدوحه او من النت بسعر ارخص بالراحه

وفي بعض الاعضاء يبيعون هنا فالمنتدى كاميراتهم المستعمله تقدر تتواصل وياهم

[@north_star@]

حسب ميزانيتك وفي الكانون عندك 500d سعرها جديده 3400 تقريبا و الكانون 550d بس ما اعرف سعرها بالظبط
واذا بغيت فى النيكون خذلك d90 تصويرها روعه

وطبعا الصور اللى انت حاطها يكون تاثيرها من العدسه يعني على حسب نوع العديه
مثل ما انت حاط صورة من عدسه فيش اى والوايد انجل وبالتوفيق ان شاء الله

[abdo222]

:) حيا اخوي عساك طيب ،،

لو ناوي على كيمرا تبقى وياك روح صوب "سوني" ،، بس غاليه حبتين مقارنه بالاشياء الي ذكروها الشباب ،،

شريت من حوالي سنتين كيمرا سوني a200 ، الحين نزلوا ٣ انواع بعدها بس للحين حقتي لها سوق ،،
شريتها من بريطانيا ب ٤٠٠٠ اتوقع ،، الي اذكره انه سعرها هناك اقل من هنا ب٧٠٠ ، ٨٠٠ ريال ،،

بالنسبه للعدسات اوريدي تيي وياها عدسه و لو تزيد سعر تاخذ بعد عدستين ،، وشريت ضمان ٣ سنين ،،
الصوره المقعره الي على شكل دائري العدسه اسمها "عين السمكه" ،،

الكيمرا ممتازه بس عيبها مافيها فيديو اولا وثانيا اكسسواراتها من فلاش وعدسات من ١٠٠٠ وانت طالع ،،

روح فيرجن بتحصلها مناك ،، و لو بغيت اي شيء :) اتوقع عندك رقمي ،، فمان الله

[مهل]

لا تطلع عن الكانون و العدسه ٢٤-١٠٥ هالعدسه بتسمح لك تصور فيها كل شي في خاطرك

[Index Signal]

العدسه أهم من الكاميرا ..

لو تاخذ أغلى كاميرا إحترافيه مع عدسه متواضعه بتكون الصور عاديه ..

ولو تاخذ كاميرا إحترافيه متواضعه مع عدسه محترمه بتكون النتيجه مرضيه لك ..

و طبعاً لو كانوا الأثنين مستواهم عالي بتكون النتيجه هي الأفضل ..

لكن بالنسبه لك كمبتدئ خذ كانون ٥٥٠ دي كبدايه لأن إعدادات التصوير فيها مبرمجه و ما تحتاج إعدادات يدويه ما يعرفها إلا المحترفين ..

و إتعب على العدسات لأنها هي الإستثمار الحقيقي للمصور ..

لأن تكنلوجيا الكاميرات دايماً تتغير و ينزل منها الجديد أو إن مستواك بالتصوير بيتطور مع الوقت و بتضطر تشتري كاميرا محترفه أكثر ..

أما العدسات بتتم عندك ما تتغير .. إلا إذا بتغير لماركه ثانيه لأن كل ماركه لها عدسات خاصه ..

و حط في بالك إن هالهوايه مكلفه فإذا حاس نفسك ما بتستمر فيها لا تدخلها من الأساس و خذلك كاميرا شبه إحترافيه مثل السوني hx1 أو الفوجي إللي قال عنها الجبل و غيرها من هالكاميرات السهله إللي ممكن تشبع فضولك بالتصوير .

[Scorpion]

أخوي بما أنك مبتدأ ، انا انصحك تجرب 500d لسبب لان سعرها اقل من 550d والفرق بسيط بالاضافة لاحتوائها على المودز الي تفيد المبتدأين ...

بالنسبه للصور الاخوان ماقصروا وذكرولك السبب في جماليه الصور .. والعدسه تلعب دور في نقاوة الصوره..
والصور المدورة تكون بعدسه فيش آي واكثر استخداماتها في تصوير الاركيتكشر ..

واذا عندك استفسارات ارجو طرحها ليكون الموضوع مرجع لكل مبتدأ :)

تحيــــاتـــــــي ..

[Index Signal]

أخوي بما أنك مبتدأ ، انا انصحك تجرب 500d لسبب لان سعرها اقل من 550d والفرق بسيط بالاضافة لاحتوائها على المودز الي تفيد المبتدأين ...

بالنسبه للصور الاخوان ماقصروا وذكرولك السبب في جماليه الصور .. والعدسه تلعب دور في نقاوة الصوره..
والصور المدورة تكون بعدسه فيش آي واكثر استخداماتها في تصوير الاركيتكشر ..

واذا عندك استفسارات ارجو طرحها ليكون الموضوع مرجع لكل مبتدأ :)

تحيــــاتـــــــي ..



فرق السعر بينهم بسيط جداً ..

و ما يعرف الفرق بينهم إلا إللي جربهم أثنينهم ..

الجديده فيها خيار التصوير بدون فلاش تختاره بضغطة زر بدل ما تدخل بالسيتنق و تروح عليك اللقطه ..

الشاشه أكبر ..

الميقا بكسل أكثر ..

أعتقد هذا يكفي مافي داعي أكمل .

[بـن عدوان]

بصراحة ماقصرتوا جميعا ويعطيكم الف عافية يااارب

كفيتوا ووفيتوا

كم سعر الــ 550d مستعملة ؟

[بـن عدوان]

أخوي نصيحة في كاميرا جدا جدا جدا روعة في الأداء والسعر وفيها ميزات موب موجودة في أغلب الكاميرات الاحترافية
اسمها فوجي hs10


يعطيك العافية اخوي الكريم وعلى الشرح وماقصرت

انا بفكر وبشوف

لاهنت

[بـن عدوان]

العدسه أهم من الكاميرا ..

لو تاخذ أغلى كاميرا إحترافيه مع عدسه متواضعه بتكون الصور عاديه ..

ولو تاخذ كاميرا إحترافيه متواضعه مع عدسه محترمه بتكون النتيجه مرضيه لك ..

و طبعاً لو كانوا الأثنين مستواهم عالي بتكون النتيجه هي الأفضل ..

لكن بالنسبه لك كمبتدئ خذ كانون ٥٥٠ دي كبدايه لأن إعدادات التصوير فيها مبرمجه و ما تحتاج إعدادات يدويه ما يعرفها إلا المحترفين ..

و إتعب على العدسات لأنها هي الإستثمار الحقيقي للمصور ..

لأن تكنلوجيا الكاميرات دايماً تتغير و ينزل منها الجديد أو إن مستواك بالتصوير بيتطور مع الوقت و بتضطر تشتري كاميرا محترفه أكثر ..

أما العدسات بتتم عندك ما تتغير .. إلا إذا بتغير لماركه ثانيه لأن كل ماركه لها عدسات خاصه ..

و حط في بالك إن هالهوايه مكلفه فإذا حاس نفسك ما بتستمر فيها لا تدخلها من الأساس و خذلك كاميرا شبه إحترافيه مثل السوني hx1 أو الفوجي إللي قال عنها الجبل و غيرها من هالكاميرات السهله إللي ممكن تشبع فضولك بالتصوير .


ماشاءالله عليك شكلك خبرة

الله لا يهينك وشكلي باخذ 550d

الله لا يهينك يالطيب

[بوعلي-Qtr]

حسب النظافه
واي كيمره يديده نزل من سعرها ٥٠٠ لين ١٠٠٠ ريال ويكون هذا سعر المستعمل حسب النظافه

بالنسبه للشباب ماقصروا

نقطه احب اوضحها لخوي الجبل

السالفه مب سالفة كيمره جديده ولا قديمه
انا ممكن اجيبلك كيمره فلميه وجودة الصور فيها اضعاف اضعاف الكيمره اللي تقول عنها
عموما مثل هالكيمرات ماتقدر تقارنها لمجرد المقارنه مع كيمرات الـ slr
السنسر يختلف
الميقا بكسل يختلف
البروسيسور يختلف
الايزو يختلف
العدسات تختلف
جوده الصور تختلف
مب ممكن انك تقارنها مع الـ slr هذي شي صعب بالنسبه لها

لكن عموما تبقى كيمرات ممتازه للمبتدئبن ونتايجها جدا مرضيه بالنسبه لهم اعتقد

اخوي لو حاب تاخذلك كيمره تصور فيها كهاوي او تاخذلك صور تذكاريه
عندك كانون g12 ممتازه وحجمها حلو يعني ماراح تتعب معاها وايد
توديها وين ماتبي .. تصور بالتكنيك الاحترافي مثل ماتبي
يعني فيها الاوضاع الاحترافيه اللي تتحكم بالسرعه والفتحه والايزو وغيره
لكن عدستها ماتتبدل .. لم تسوي زوم آوت تجيك زاويه عريضه جيده للمناظر الطبيعيه
وفيها زوم ان حلو بعد اعتقد ١٠x او ١٢x ماخبر
ونتايجها قويه من ناحيه الالوان والشارب والايزو ..

اما اذا ناوي تاخذ المجال كأحتراف
خذ ٥٥٠ دي وهي slr لكن عموما هالكيمرات تكلف
لان لكل شي محتاج تاخذ عدسه
للرياضه عدسه
لتصوير المناظر الطبيعيه تحتاج عدسه عريضه
الفش آي عدسه
الماكرو عدسه

اذا بتاخذ كل هالعدسات تحتاج اقل شي ١٠ الى ١١ الف ريال
هذي اقل قيمه للعدسات اللي ممكن اعطيك اياها وهي مب من كانون
مثلا سيقما وتامرون وهالشركات اللي متخصصه في العدسات تطرح عدسات بجوده اقل وسعر اقل

وبالتوفيق

[Index Signal]

ماشاءالله عليك شكلك خبرة

الله لا يهينك وشكلي باخذ 550d

الله لا يهينك يالطيب


لا والله ماني خبير .. كلنا نتعلم من بعض ..

و إن شاء الله إني أفدتك من خلال معلوماتي المتواضعه ..

تفضل بعض النصايح إللي بتعلمك مبادئ التصوير و من خلالها تقدر تحدد حاجتك :


حتى بأفضل و أغلى معدات التصوير ، قد تكون صورك مملة للناظرين .
و لو كنت تستخدم أرخص معدات التصوير المتوفرة ، فقد تتمكن من التقاط صور تبهر الناظرين .
أهم شيء تحتاجه لتطوير مستواك في التصوير هو المزيد من التصوير. فالقراءة وحدها لا تغني عن الخبرة العملية
حب اقتناء أحدث معدات التصوير غير ضروري للمصور ما لم يكن هدفه الفعلي هو تجميع الكاميرات .
المصور الهاوي هو الذي يظن أن الكاميرا هي من يقوم بالعمل و يشيد بأداء الكاميرا و يقدرها أو أداء العدسات و المعدات المستخدمة بحيث تكون أفضل ما يمكن.
المصور المحترف الحقيقي هو من يدرك فعلاً أن الكاميرا ليست سوى أداة لالتقاط المشهد الذي يريده في عقله و صوره بعينه.
إن لم تكن تنوي شراء كاميرا مع عدسة واحدة ، أو مقتنعاً لحد الافتتان بنموذج معين من الكاميرات الحديثة فالخطأ كل الخطأ أن تظن أن اختيار (أفضل ) كاميرا هو الاختيار الأمثل ، عليك النظر للكاميرا كجزء من نظام متكامل يشمل العدسات و الفلاشات و ما يتبع ذلك و ليس مجرد اختيار هذه الكاميرا أو تلك .
إن كانت ميزانيتك محدودة و تطمح لأفضل أداء ممكن فخير لك أن تقتني عدسة غالية و تضعها على كاميرا رخيصة بدلاً من القيام بالعكس.
اشتريت الكاميرا الفلانية ، ما رأيكم فيها ؟
السؤال أعلاه يعتبر ضمن الاستثناءات لقاعدة ( لا يوجد سؤال غبي ) فما فائدة النصيحة بعد أن تكون قد اشتريت بالفعل ؟
عند شراء معدات مستعملة تأكد من أن ما تدفعه لا يتجاوز سعر نفس البضاعة جديدة و اسأل البائع عن سبب البيع
الكثير من الناس لا يفضلون استبدال العدسات و لا يحتاجونه أساساً. فلو كان الهدف من التصوير هو التوثيق وحده فلعل اختيار كاميرا مدمجة ذات جودة عالية سيعطيك صور بجودة أفضل من شراء كاميرا قابلة لتبديل العدسات مع عدسة رخيصة الثمن.
عند المقارنة بين كاميرات SLR تجنب أن تختار أحد الشركات أياً كانت شهرتها و قوة منتجها بسبب ميزة واحدة في الكاميرا وحدها إلا لو كانت تلك الميزة هي شيء تحتاجه بشكل كبير جداً و حتى مع ذلك ، تأكد أنك تحتاج تلك الميزة.
لا يوجد شركة -أيا كانت شهرتها و قوتها- تقدم أفضل معدات التصوير من كاميرات و عدسات للجميع. لأنه لا يوجد معدات مثالية لكل شخص. ما يعتبره البعض مثالياً له لا يعتبر مثالياً لشخص آخر .
إن كنت تبحث عن كاميرا ، فتجنب المتعصبين العميان الذين لا يمكنهم رؤية عيوب ( النظام ) الذي يستخدمونه لشركة معينة، و جرب المعدات التي تفكر بشرائها قبل الشراء إن أمكن.
سواء كنت تريد صوراً للطباعة أو للعرض أو فيديو واضح فالعدسة تلعب دوراً مهما في وضوح و نقاء الألوان و حدة التفاصيل. حجم الصورة أو مقاس الفيديو الناتج مهما كان كبيراً فلن يحسن من جودة الألوان و التفاصيل التي تأتي من عدسة رديئة . فما جدوى أن يكون الفيديو مثلا بتصوير مقاس Full HD و الألوان متهالكة و التفاصيل ضعيفة ؟
عدسة ثابتة ( برايم ) متوسطة الأداء يمكنها تحقيق أداء يتجاوز معظم عدسات البعد البؤري المتغير ( الزوم ) من ناحية جودة الصورة
الهواة محدودو الميزانية غالبا ما يقدمون عدسات الزوم منخفضة الكلفة على جودة الصورة البحتة كنوع من التنازل.
بينما الهواة المتقدمون غالباً ما يقدمون جودة الصورة التي تقدمها العدسات البرايم المتوسطة الكلفة و التنازل عن الحرية التي يقدمها استخدام عدسات الزوم.
بينما المحترفون قد يفضلون شراء عدسات زوم ثقيلة الوزن و عالية التكلفة نظراً لعدم اهتمامهم بالسعر و لا الوزن ولو تجاوز عدة كيلوجرامات.
خطأ شائع يقع فيه الناس هو ظنهم أن عدسات الزوم هي ما يناسب تصوير الأهداف البعيدة ، بينما هذا وصف لعدسات التيليفوتو – ذات البعد البؤري العالي -سواء كانت عدسة زوم أو برايم.
شراء كاميرا رقمية قابلة لتبديل العدسات أمر مكلف نسبياً . فلو كنت على استعداد لدفع مبلغ كبير على الكاميرا ثم تأتي للبحث عن أرخص عدسة يمكنك شراؤها فهذا ليس مجرد قرار خاطئ ، بل منتهى الحماقة لو سألت رأيي.
عند الاختيار بين عدة عدسات مثلا و رؤية معرفة الأفضل بينها بالنسبة لك فلا أفضل من تجربة تلك العدسات جميعا في نفس المحل و على حامل ثلاثي لتجنب أقل اهتزاز بدلاً من الاعتماد على أقوال أشخاص مجهولين على الشبكة في منتدى أو غيره.
التصوير بالاعتماد على الإضاءة الطبيعية يبدو في أكثر الأحيان أفضل بكثير من المعتمد على إضاءة فلاش الكاميرا المبيت .
لا تستجب لكل ما يدفعك البائع لشرائه ، مثلا شراء فلتر حماية رخيص سيؤدي لتدهور جودة الصورة بشكل كبير.
التصوير علم دقيق ، فعندما تحتاج مساعدة معينة و مفيدة فلا تتوقع أن تجد الحل الشامل بمجرد أنك سألت ( الكاميرا لا تعمل ساعدوني ! ) أو ما شابه ، فتحديد المشكلة بدقة و ملابساتها يساعد الخبراء على فهم المشكلة و بالتالي حلها.
قبل أن تسأل سؤالاً ، حاول أن تبحث عن الإجابة بنفسك. مثلا لو أردت طرح استفسار معين في أحد المنتديات فالأحرى بك أن تبحث باستخدام محرك بحث ذلك المنتدى قبل السؤال حتى تجنب أعضاءه التضايق الذي سيبدر منهم نحو سؤالك لو كان مكرر عشرات أو مئات المرات من قبل.

[aljabal]

ماشاء الله عليك يا (اندكس سيقنال) كلامك درر ياعسل

كلام منطقي الله يقويك لكن أتوقع الي يبي يشبع رغبته على قولتك تكفيه hs10

عموماً هذي الحمدلله مقتنع فيها وتكفيني وزيادة

بالتوفيق للجميع