مطلوب مصمم مبدع للفيلا

[sweety]

حد يدليني على استشاري فلبيني لاني الصراحة حابة اصمم بيتي تصميم خيالي وسمعت ان الفلبينيين سمعتهم طيبة في التصميم والابداع
وشاكرة لكم :p تعاونكم

[بويوسف]

اختي مب شرط فلبيني .. ممكن يكون هندي ومبدع .. الابداع ماتحدده الجنسية .. بالتوفيق ان شاءالله.

[sweety]

اي والله صح كلامك اخوي
اصابعك مب سوى

[بوعبدالله 8]

في الشيخه مهندس ديكور شاطر اذا لين الحين ادورين قولي لي وبرسلج رقمه

[sweety]

اخوي بوعبد الله 8 طرش لي رقمه اذا تكرمت
بس أول شي حابة استفسر منك ايش اسم الشركة الي يداوم فيها؟

[sweety]

اخوي بوعبد الله8
وين الاقي القصر الكلاسيكي؟
وهل هي شركة تصميم داخلي أم توزيع ديكورات ؟
وشاكرة لك

[شموخ دائم]

,


,


مرحبا

السلام عليكم ورحمه الله

نصيحتي للخريطه ندور على شركه ذات سمعه طيبه
للتصميم الطيب هذا من ناحيه ومن ناحيه ثانيه
هناك امور فنيه كثيره جدا الشركه الزينه راح تريحك فيها
منها توزيع الكهرباء ومنها المساحات المناسبه
ومنها تمديدات الماء بالشكل السليم
وارتفاع المناسيب وكميات الحديد واحجامها

ممكن تعملون الخريطه ب 7000 ريال ويحط لكم كميات حديد زايده ويخسرك 30 الف ريال وتوزيع الكهرباء ما ينفع وتحطون شخص يعيد توزيع الكهرباء ب 5000 ريال او اكثر
او مصمم
وممكن تعملون الخريطه في مكان جيد ب 20 الف ويوفر عليكم امور كثيره
من النواحي الفنيه
البيت ليس مجرد شكل وانما شكل وجوهر

بالتوفيق ان شاء الله وعقبال ما نشوف البيت منوره ليتاته
:)

,

,


اخوكم



شموخ دائم

[شموخ دائم]

,


,


مرحبا
ان شاء الله يجي بوعبدالله يرد ما بيقصر
:)

بس حبيت اقول ان الخريطه لازم نروح لمكتب ( رسم خرائط و استشاري )
لان في رخص كثيره لازم تخلص مع الدوله
كهرباء ومطافي ومجاري وكيوتل
موفقين يارب


,

,


اخوكم



شموخ دائم

[بوعبدالله 8]

القصر الكلاسيكي مكانهم بين المعموره والسلطه فيلا على الشارع العام وهم يسون الخرايط كامله ويخلصونها من كل الدوائر هم .
واي استفسار ثاني ماراح يقصر شموخ

[sweety]

الصراحه مب عارفه شلون اشكركم على طولت بالكم وسعة صدركم
بس بقى لي ان اعرف ايش جنسيات المهندسين في القصر الكلاسيكي؟؟

[حورية]

القصر الكلاسيكي مكانهم بين المعموره والسلطه فيلا على الشارع العام وهم يسون الخرايط كامله ويخلصونها من كل الدوائر هم .
واي استفسار ثاني ماراح يقصر شموخ

هلا اخواني
بالنسبة للقصر الكلاسيكي هذا بيت المهندس نفسه ومش مكتب هندسة اما بالنسبة للشركة فعندك المجمع الي بالزاوية عند الجسر وانت رايح طريج سلوى نفس المجمع الي فيه حول الامارات والمهندسين الي عنده فلبيينيين

[sweety]

شاكرة لجميع الاخوة والاخوات الصراحة ماقصرتو والله يعطيكم العافية
بس سؤال للاخ شموخ
اي مكتب تنصحني اتعامل معاه ؟

[بوعبدالله 8]

هلا اخواني
بالنسبة للقصر الكلاسيكي هذا بيت المهندس نفسه ومش مكتب هندسة اما بالنسبة للشركة فعندك المجمع الي بالزاوية عند الجسر وانت رايح طريج سلوى نفس المجمع الي فيه حول الامارات والمهندسين الي عنده فلبيينيين

مرحبا اختي بخصوص بيت المهندس صح بس هو مكتبة كان بالسد وانا تعاملت معاه بس الحين خذ البيت الي جنب بيته . للتوضيح فقط

[ابو علاوي]

القصر الكلاسيكي مكانهم بين المعموره والسلطه فيلا على الشارع العام وهم يسون الخرايط كامله ويخلصونها من كل الدوائر هم .
واي استفسار ثاني ماراح يقصر شموخ
انا اعرف انهم في السد
اما اللي تقصده هذا بيت صاحب الشركة

[captin]

أحب أضيف على ماتفضلوا فيه الإخوان

بالنسبة لتصميم المنزل يكون بالخطوات التالية

أولا التصميم المعماري وهو توزيع المساحات
ومرافق المسكن المختلفة ( صالة - مجلس - مطعم - مطبخ - غرف - حمامات)
بالإضافة إلى الملاحق الخارجية ( مجلس خارجي - غرفة سائق - مطبخ خارجي - مخزن)
وعادة يكون على دورين اول وارضي وهناك ناس تفضل الأرضي فقط.
كلن حسب ذوقة. وبعد ما يستقر الشخص على التوزيع والمساحات بكل جزء
بما يتناسب مع ظروفة الاجتماعية وعدد أفراد الأسرة والتوسع المستقبلي المتوقع.

ندخل المرحلة الثانية وهي مرحلة فنية يقوم فيها المصمم بتوزيع الكهرباء ونقاط الهاتف والخدمات الأخرى بالوحدات المختلفة.
ومعظم المكاتب في قطر يقوم بتوزيع نقاط الكهرباء والإضاءة بشكل ستاندرد أو قياسي دون الرجوع للزبون لمعرفة وجهة نظره في مواقع التكييف والاضاءة ونقاط الكهرباء التي من المفروض ان تستند الى توزيع الأثاث بكل مساحة.

انا أشوف ومن المهم وضع تصور واضح من البداية عند الاتفاق على التصميم المعماري للمسكن لموضوع توزيع الاثاث بحيث يتم الأخذ في الاعتبار نقاط الكهرباء والإضاءة بكل مساحة ولاتنسين بعض نقاط الكهرباء الإضافية في الحوش وعلى السطح لمكائن الغسيل للحوش والمكيفات السبليت وغيرها.

بيكون ممتاز إذا كان مكتب التصميم عنده قسم للديكور الداخلي بحيث يكون التصميم شامل معماري وانشائي وديكور داخلي مع بعض.

بالتوفيق ان شاء الله

[بوعبدالله 8]

انا اعرف انهم في السد
اما اللي تقصده هذا بيت صاحب الشركة

صح كانوا بالسد والحين هو ماخذ الفيله الي جنبه بيته بالضبط بيت اخوه وهو الي بانيه حق اخوه وانا من يومين كنت عنده اسوي خرايط بيت اخوي وقبل مسوي عنده خرايط بيتي .