عطوني رابكم و تجاربكم يااعضاء في المدارس المستقلة

[فجر جديد]

السلام عليكم

ودي نفتح ملف لعرض ملاحظات وتجارب الاهالي في المدارس المستقلة بس بدون الخاصة او الاجنبية, حتى بدون شكاوي او انتقاد ممكن كل عضو بس يعرض الاسلوب والاحداث وطريقة الروتين المتبع في مدارس ابنائه . وايضا المقارنة بينهم .

حتى نستفيد واقلها نختار حق اعيالنا مدارس نرضى عنها ونرتاح فيها , لاني ادور حق اولادي مدرسة ثانية . مدرسة قوية في مناهجها وأدآئها .
والاهم : التنافس اللي ممكن يصير بين المدارس والتعلم من تجارب الاخرين .

ولكم اروع تحية .

وفي انتظار مشاركاتكم

[فجر جديد]

من تجاربي / مدرسة مريخ الابتدائية وهي في الريان عند دوار الفروسية :

- كانت الاخصائية تجلس عند الباب الرئيسي ( المدخل ) مب لتفتيش ولا لتنظيم الطلاب ولكن لتحيتهم , كانت تصافحهم وتهلي بهم , شوفوا الاستقبال الحلو على الصبح . واحيانا المديرة تكون موجودة . وايضا في الانصراف يكونون موجودين وبعد توادعهم وتقول اشوفكم بكرة .
- كان عندهم يوم في الاسبوع سباحة في اسباير جنبهم .
- منهجهم منتسوري اللي يعتمد على استخدام الحواس في التعلم لذلك عندهم ادوات تعليمية وكانت معلمتين في الصف الاول كل معلمة عندها قروب ( مجموعة ) يعني ممكن حصة عربي ورياضيات مع بعض , ماعندهم نظام الحصص والشرح الجماعي حتى مافي كراسي وطاولات للجميع , في مجموعه على الارض تحل او تتدرب على التراكيب والادوات .
- منهجهم خفيف ، للصف الاول كان اغلب الوقت دراسة حروف وكلمات بسيطة , ومبادئ الجمع والطرح , التعليم بطئ عندهم .
- انا جربتهم سنة بس , حاولت اوصف اللي شفته او عرفتة من وجهة نظري واحاول الا اعلق كثيرا عن اللي عجبني او ماعجبني لان ممكن اللي يعجبني مايعجب غيري والعكس .

بكرة تجربة ثانية . اللي يحب يتابعني ,,,,,,,

ياللة وين تجاربكم ؟؟؟؟؟

[غير البشر]

يعني انا متابع بس :p

يعطيكم العافيه :thumbup1:

[فجر جديد]

اشكر العضو المميز والوحيد اللي متابع معاي ( غير البشر ) .

ومادري ترددت وايد ، اذا الموضوع مايهم ليش استمر , بس انا في قلق على مدارسنا وبالتالي على اعيالنا اللي احنا الحين قاعدين نحسب اعمارهم في 2022 كم بتكون ياترى هم من بيكونون وشلون بيخدمون وطنهم .

ليش مجمع عمر يتميز على جميع المدارس ؟ وليش مانقدر نحصل على كرسي لعيالنا ؟ وسالفة رقم الكهرباء اللي طلع بها المجلس الاعلى ؟؟؟؟؟
ليش ماعمم المنهج اجباري على المدارس وحل مشكلة التهافت والاقبال عليه فقط ؟؟؟؟
لان اللي يميزه المنهج وهذا اللي نبحث عنه , ياريت الاهالي يطالبون , ياريت المجلس الاعلى يلتفت للسالفة ولا يخلي المنهج لعبة بيد المنسقات اللي يتغيرون كل سنة , او يجربون في اعيالنا ؟؟؟؟؟