حامد شامي .. أعانك الله

[هتـان قطر]

استغرب ممن يتلذذ بإيذاء الاخرين

استغرب كيف لشخص أن يضحك ويستهزئ

بشخص آخر ويشهر به أمام الناس

فقط ليضحك الاخرين


أنت يا من تسخر وتستهزئ بشخص غافل

لا ذنب له سوى أن الامر كان خارج إرادته

فاصبح في نظر الجميع مجرما

كيف سيكون حالك لو كنت أنت مجرما في نظر الاخرين

في حين انك ترى ان هذا الامر خارج إرادتك

وما هو الا إرادة الله وقدره..؟



أنت يا من تستهزئ به كيف سيكون حالك

لو كنت مكانه ..؟؟

كيف ستكون ردة فعلك..؟

كيف سيكون حال أهلك وهم يقرأون مسجات

السخرية والاستهزاء بابنهم ..؟


أنت يامن تكتب البرودكاست وتنشره

فقط للاستهزاء والضحك..اما اتقيت الله..؟

اما خفت من دعوة مظلوم تصابك او تصاب أهلك ..؟

وأنت يامن تنشر البرودكاست اما خفت من أن تكون

يوما ما مكانه ويصلك هذا البرودكاست ويتم الاستهزاء بك..؟

هل سيغمض لك جفن..؟

هل ستخرج الى الشارع وتقابل

نظرات الناس المستهزئين بك..؟




حامد شامي .. لاتزعل ولا تتضايق

قدر الله وما شاء فعل

يقول الله تعالى : " ياأيها الذين آمنوا لايسخر قوم من قوم عسى أن يكونوا خيراً منهم ولانساءٌ من نساءٍ عسى أن يكن خيراً منهن ولاتلمزوا أنفسكم ولاتنابزوا بالألقاب بئس الإسم الفسوق بعد الإيمان ومن لم يتب فأولئك هم الظالمون "

[الأصيلة]

حامد شامي
خل روحك رياضية واستحمل
كم يوم وينسون الموضوع...
هذه ضريبة الشهرة ...
عاد الله يهديك لو مركز شوي كان ماصار اللي صار
لكن قدر الله ماشاء فعل...
والناس اللي ينتظرون أي موضوع للإنطلاق في النكت ياكثرهم
ومالقوا فرصة اكثر من هذا الهدف...هو بس على حامد شامي
كل يوم لهم واحد ...
كفاية الأخوة السودانيين متضررين من الفكاهات الكثيرة..
إلا البرودكاست مافيه أمل تمسك ها النوعية من الناس
عن نشر النكت والأخبار بواسطته...

شكرا لك هتان قطر

[MAZEN37]

بصراحه حامد ممتاز والاخطاء وارده

[وطن]

اجر ان شاء الله

قطعوه مسكين بالمسجات ولازالوا

[نوفا91]

حامد شامي بيظل كبييير ..واللي ينشرون مثل هالسخافات اقول الله يكون بعونكم ع اللي انتوا فيه ...

[][ iMedia ][]

شلي صاير يا جماعه ؟ -_-

[OTOsan]

هو وفهد خلفان ضحية الفهم الخاطئ لكرة القدم .. والتعامل معها كانها يجب ان تخلو من الاخطاء !

ربما هذين الشخصين ..نموذج مصغر عما يحدث في الحياة ..فعندما تكون في اوج عطائك يحملك الناس فوق الاكتاف ، وعند اول هفوة تصدر منك .. يسقطونك على الارض متناسين مجهوداتك السابقة ،،

اخت هتان ..اول مره اعرف ان لج في الكورة .. اي نادي تشجعين ؟:)

[هتـان قطر]

الاصيلة ,,, مازن ,,, وطن

صباح الخير


شي محزن ومؤسف الصراحة .. لا وشانينها حملة بعد


ليش..؟ عسى ماشر ..؟ ترى المنتخب مايستحق الفوز باي كاس

ها الفترة ..المستوى والادراة تخبط في تخبط

وحامد شامي مسكين صح انه جاب هدف على المنتخب

ولكن هناك اسباب اساسية ورئيسية للخسارة

ولا هو الاول ولا الاخير اللي يجيب هدف على مرماه

ان ما خانتني الذاكرة

كأن مبارك عنبر قد جاب هدف على فريقنا :secret:

[شبح الصمت]

مسكين ما يسوى عليه خلووه برودكسات

[][ iMedia ][]

حد يفهمني يا شباب
حتى لو ع الخاص
:telephone:

[بن جلبان]

من حامد شامي ؟؟؟ محد درى بــه ..

[ازغوىAAA]

الله يعينك ياحامد شامي الناس عندنا ماترحم

[هتـان قطر]

حامد شامي بيظل كبييير ..واللي ينشرون مثل هالسخافات اقول الله يكون بعونكم ع اللي انتوا فيه ...

ايوالله الله يعينهم .. الله يهديهم


[ imedia ][;6701100']شلي صاير يا جماعه ؟ -_-

اللي صاير ان لاعب منتخبنا سجل هدف قاتل وفي وقت قاتل

حرم المنتخب من الصعود لدور الاربعة في كاس الخليج...وبس

طبعا الهدف ابدا ابدا ما كان مقصود .. لكن الناس ما يرحمون

عسى الله ما يحطنا يوم في حلوقهم :(

[بو الجوري]

والله يكسر خاطري :weeping::.. صح فالبدايه لما كان يجيني برودكاست كنت أضحك :funny::..
لكن عقب مصخوها وايد :mad::.. وصارت سخافه وتفاهه :waiting::..

والحمدلله عمري ماطرشت برودكاست عنه:deal: :.. بس أقرا وأمسح :p:..

بس هو لو ما يقلد Usher في لبسه :..:whistling:

[عزتي سمو ذاتي]

ماتسوى عليه هالغلطه كل ماصار شي طلعوا عليه برودكاست

الله يهديهم الناس بصراحة انا لويوصلني شي عنه مايعجبني ولا احب ارسله لأن الموضوع زاد عن حده

[OTOsan]

كأن مبارك عنبر قد جاب هدف على فريقنا :secret:


حتى (عمر) جاب هدف على نفسه وفريق (المجد) في اول مباراة يلعبها :(


وين ايامك ياكابتن ماجد :(

[][ iMedia ][]

ايوالله الله يعينهم .. الله يهديهم



اللي صاير ان لاعب منتخبنا سجل هدف قاتل وفي وقت قاتل

حرم المنتخب من الصعود لدور الاربعة في كاس الخليج...وبس

طبعا الهدف ابدا ابدا ما كان مقصود .. لكن الناس ما يرحمون

عسى الله ما يحطنا يوم في حلوقهم :(

شكــرا على التوضيح اخت هتان
مع ان المباراه صارلها وقت اللحين جايين يحكو الرجال !
:rolleyes2:

[بوخالد911]

الله يعيينه

وعن نفسي ؛ خلاااص اي برود كاست يجيني عنه
خلاااص بمسحه ولا بنشره


أتمنى تسووون مثلي


تحياتي قبل توقف برود كاستاااتي

[هتـان قطر]

هو وفهد خلفان ضحية الفهم الخاطئ لكرة القدم .. والتعامل معها كانها يجب ان تخلو من الاخطاء !

ربما هذين الشخصين ..نموذج مصغر عما يحدث في الحياة ..فعندما تكون في اوج عطائك يحملك الناس فوق الاكتاف ، وعند اول هفوة تصدر منك .. يسقطونك على الارض متناسين مجهوداتك السابقة ،،

اخت هتان ..اول مره اعرف ان لج في الكورة .. اي نادي تشجعين ؟:)



هذا اللي في فكرت فيه اخوي اوتوسان .. اقول بل هذا علشان

هدف قطعوه تقطيع.. كيف لو كان خطأه في الحياة العادية

وما كان يقصد .. ايش بيسوون له ؟!!!

هذي هي الحياة تعلمنا حتى في أتفه الامور .. لكن قليل من يعتبر

ويحفظ الدرس ... وقليل من يحط نفسه مكان هالشخص




اوتوسان انا ريانية حتى النخاع..

والحين من كثر حب ولدي للبرشا .. صرت برشاوية :)

[رمــش الغلا]

بصراحة يهال اللي يؤلفون هالسخافات ويرسلونها

قال رسول الله: ( إن المفلس من أمتي يأتي يوم القيامة بصلاة وصيام وزكاة، ويأتي قد شتم هذا، وقذف هذا، وأكل مال هذا، وسفك دم هذا، وضرب هذا، فيعطى هذا من حسناته، وهذا من حسناته، فإن فنيت حسناته قبل أن يقضى ما عليه أخذ من خطاياهم فطرحت عليه، ثم طرح في النار! ) صحيح مسلم

[الأصيلة]

كأن مبارك عنبر قد جاب هدف على فريقنا :secret:
عاد مبارك عنبر الله يسلمج ماجاب الهدف أيام البلاك بيري والبرودكاست
وإلا كان صار له أكثر من حامد شامي...
والله إن هالجهاز صاير برج مراقبة على كل صغيرة وكبيرة
محد سلم منه...

[بوشاهين2]

أأأأأأأأأأأأأأأأأأأأأأخ لو أشوي أمركز .. ماكن ألي صار .. ألي صار .. بس إن شاءالله مأجور وماعليك من النقاد يعني لو ماجبت القوول كنا بناخذ الكاس مثلاً.

[هتـان قطر]

مسكين ما يسوى عليه خلووه برودكسات

الله يعينه والله يهديهم..


[ imedia ][;6701114']
حد يفهمني يا شباب
حتى لو ع الخاص
:telephone:

اقرا الرد اللي فوق


من حامد شامي ؟؟؟ محد درى بــه ..


انت ما دريت وحتى اللي مادرى درى عقب هالبرودكاستات << تعبت وانا اهجيها


الله يعينك ياحامد شامي الناس عندنا ماترحم

ايوالله افواه الناس ما ترحم حشى امواس مهب افواه :(

[الأصيلة]

اوتوسان انا ريانية حتى النخاع..
والحين من كثر حب ولدي للبرشا .. صرت برشاوية :)

ريانية ياهتان أشوفج قطعتي مبارك عنبر لأنه سداوي...
ولدي رياني حد النخاع ...الله يسامحه ماطلع على أمه وخواته...
صباحكم كورة وأهداف...

[بوخالد911]

عاد مبارك عنبر الله يسلمج ماجاب الهدف أيام البلاك بيري والبرودكاست
وإلا كان صار له أكثر من حامد شامي...
والله إن هالجهاز صاير برج مراقبة على كل صغيرة وكبيرة
محد سلم منه...

كلام( ن ) سليم:victory:

بس استلمووه الناس بالمجالس والقهاااوي

:secret::eek5::eek5::secret:

[نمر بن عدوان]

حتى (عمر) جاب هدف على نفسه وفريق (المجد) في اول مباراة يلعبها :(


وين ايامك ياكابتن ماجد :(


ولا ابطال الملاعب هالفقير المسكين الي في الصوره اول مباراه جاب هدف على فريقه محد عصب عليه غير حارس المرمى دبوس

http://www.arabic-cartoon.com/images/abtal_almaleb_dvd__3.gif

[غير البشر]

عاد مبارك عنبر الله يسلمج ماجاب الهدف أيام البلاك بيري والبرودكاست
وإلا كان صار له أكثر من حامد شامي...
والله إن هالجهاز صاير برج مراقبة على كل صغيرة وكبيرة
محد سلم منه...



هههههههههههههههههههههههههههههههههههههههههههههههههه هه
هههههههههههههههههههههههههههههههههههههههههههههههههه
هههههههههههه والله اتذكر جاب هدف بالمقص كان من احلى الاهداف ( طبعا علينا )

[الـقـاسـي]

ههههههههههه اما سالفه حامد شامي والبرودكاست مالها حل مسكين والله قطعوه ..

مع انه جزاه الله خير طلعنا سوا في منتخبنا الفاشل خير المفروض والله مايسبونه ..

[هتـان قطر]

والله يكسر خاطري :weeping::.. صح فالبدايه لما كان يجيني برودكاست كنت أضحك :funny::..
لكن عقب مصخوها وايد :mad::.. وصارت سخافه وتفاهه :waiting::..

والحمدلله عمري ماطرشت برودكاست عنه:deal: :.. بس أقرا وأمسح :p:..

بس هو لو ما يقلد usher في لبسه :..:whistling:


عاد الحين توبه يا ابو الجوري .. واشوى انك ما كنت اتطرش البرودكاست

علشان ما تاخذ اثم ..خصوصا ان احنا في يوم فضيل اللي هو العاشر من محرم

عسى الله يغفر لنا ولكم السنة الماضية


ماتسوى عليه هالغلطه كل ماصار شي طلعوا عليه برودكاست

الله يهديهم الناس بصراحة انا لويوصلني شي عنه مايعجبني ولا احب ارسله لأن الموضوع زاد عن حده

زين سويتي ..ليش الواحد يكسب إثم على شي بايخ




حتى (عمر) جاب هدف على نفسه وفريق (المجد) في اول مباراة يلعبها :(


وين ايامك ياكابتن ماجد :(

اقول ... صباح الخير :)


[ imedia ][;6701139']شكــرا على التوضيح اخت هتان
مع ان المباراه صارلها وقت اللحين جايين يحكو الرجال !
:rolleyes2:


العفو .. الله يعينه

الناس ما ترحم

[غير البشر]

الله يجزاج الخير اختي هتان
فعلا والله كلامج صح الحمدلله اني ماتعامل مع البروتكسات مادري شسمه
لاني مافكرت اخذ بي بي مع اني احتاجه واااايد
لكن خبرج اشاعات وسنداره

لكن يوميا احصل واحد يقرأ لي كم مسج عن اللاعب الخلوق حامد شامي
الله يكون بعونه

[الأصيلة]

هههههههههههههههههههههههههههههههههههههههههههههههههه هه
هههههههههههههههههههههههههههههههههههههههههههههههههه
هههههههههههه والله اتذكر جاب هدف بالمقص كان من احلى الاهداف ( طبعا علينا )

يعني هو خط الدفاع
شي طبيعي يجيب هدف في المرمى القريب منه..
مايسوى عليه خاطره يسجل مثل غيره...

[::.Silent.::]

http://www.qatarfootball.com/ads.php?id=22

[khaleeji]

حامد بطل وسوى اقصى ما عنده علشان يمنع الهدف الي هو اصلآ مؤكد

ما عليك من السوالف والله يوفقك

[ازغوىAAA]

بصراحه لو لاعب من نادي غير الغرافه كان الوضع اختلف بس الغرافه غير

[سنافي]

حامد بطل وسوى اقصى ما عنده علشان يمنع الهدف الي هو اصلآ مؤكد

ما عليك من السوالف والله يوفقك

بس والله اللي يصير مايجوز في نقل المسجات عن حامد شامي يوميا واكثر من مسج في اليوم الواحد والله مايجوز...... والواحد يؤثم في نقل هالمسجات في البلاك بيري .... والواحد ايحط نفسه مكانه اول يوم يومين الواحد يتقبل السالفه اما الحين صراحة بيخت وصارت عيب

[الأصيلة]

http://www.qatarfootball.com/ads.php?id=22

قرأت الحوار
المفروض اللاعب حامد شامي مايتأثر بها الرسائل
نكت بايخه مثل أصحابها..
وبعدين أصدقائه لو هم يحبونه كان ماغثوه بالبرودكاست اللي فيه نكت عن حامد شامي...

الله يعينك وانت كبير المفروض ماتتأثر بهذه التفاهات
والا بتكررها ..عاد هذا كاس آسيا مب لعبة...
ركز عدل يابوعبدالعزيز...

[غير البشر]

قرأت الحوار
المفروض اللاعب حامد شامي مايتأثر بها الرسائل
نكت بايخه مثل أصحابها..
وبعدين أصدقائه لو هم يحبونه كان ماغثوه بالبرودكاست اللي فيه نكت عن حامد شامي...

الله يعينك وانت كبير المفروض ماتتأثر بهذه التفاهات
والا بتكررها ..عاد هذا كاس آسيا مب لعبة...
ركز عدل يابوعبدالعزيز...




عادي اختي الاصيله مب كل الاصحاب احباب
هذول بصراحه ناس ماتستحي على وجهها ولا فيها ذره احساس
بدل مايقولون له كلمه حلوه وفيها تشجيع بالعكس يحطمون اللاعب
لكن الي مايستحي مايستحي ( رساله الى كل الي يطرش بروتاكس عن حامد )

[بوعبدالله779]

حامد شامي لاعب محترم جداً ومحبوب من الكل وما يستاهل اللي يصير فيه ورجاء خاص من كل الاخوان اللي في المنتدى انه يرسل برودكاست منه لكل اللي معاه انه مايرسل له اي شي يخص حامد شامي علشان نقدر نساهم في رفع المعاناه عن حامد لانه في النهاية كلنا بشر وكلنا نغلط

[الرويـس]

في كولومبيا عام 94 اذبحوا مدافع منتخبهم يوم انه سجل خطأ في مرمى فريقة

هذا هو العالم الآخر لكرة القدم :(

شدة وتزول

[الأصيلة]

في كولومبيا عام 94 اذبحوا مدافع منتخبهم يوم انه سجل خطأ في مرمى فريقة

هذا هو العالم الآخر لكرة القدم :(

الله يسامحك يا الرويس
البرودكاست أهون من الذبح...
تذكرهم بطرق جديدة بعد...

[الألماسي]

في كولومبيا عام 94 اذبحوا مدافع منتخبهم يوم انه سجل خطأ في مرمى فريقة

هذا هو العالم الآخر لكرة القدم :(

شدة وتزول


فعـلاً يالـرويس اندريس اسكوبار اذبحوه رمياً بالرصاص بعد تسجيله هدفاً في مرمى منتخب بلاده بالخطأ في مونديال 1994 في مباراتهم أمام المنتخب الأمريكي . .

لو احنا دوله في قاره امريكا الجنوبيّه مثلاً و البطوله هناك . . كان صارت " علووووم " :nice:

[الرويـس]

الاصيله
احنا شعوب تحكمنا العاطفة .. تدرين ان اساليب الغرب ألعن مما تتصورين
يعني سوالف البرودكاست والايميل أمر غير متبع عندهم الا ما ندر .. يعني عادي كل يوم تصبغين موترج بصبغة جديدة بسبب السب والشتم اللي تحصلينه كل يوم (مكتوب) على الموتر !!

اقول لج السالفة طويلة .. ومن سوء حظ حامد انه سالفته تزامتة مع ثورة و(ثوارة) البلاك ..

الالماسي اذا مارادونا طلعوا له قرون ودخلوه جحر المافيا وهو يغني وطلعوه وهو يهلوس .. وطينوا سمعة ابو اللي جابه في كاس العالم .. بعد ما تتوقع ان هالمدافع يشيلون رقبته !!! :(

عالم كرة القدم في اغلب الدول صار يقاس بالسياسة .. ولو متابع اي اللي صار بين الوحدات والفيصلي ماصار عبث .. اذا ما علمت ان النظرة العامه لانصار فريق الوحدات على انهم (لاجئين) فلسطينين .. وقس على ذلك الاهلي والزمالك < علوم وعلوم :(

[الألماسي]

عالم كرة القدم في اغلب الدول صار يقاس بالسياسة .. ولو متابع اي اللي صار بين الوحدات والفيصلي ماصار عبث .. اذا ما علمت ان النظرة العامه لانصار فريق الوحدات على انهم (لاجئين) فلسطينين .. وقس على ذلك الاهلي والزمالك < علوم وعلوم :(

فعلاً احداث " الوحدات و الفيصلي " كانت 100% مدبره و مسيّسه . .

[الرويـس]

^
انا ماقلت شي .. الالماسي اللي قال
:(

[بدوي]

حامد شامي لاعب مجتهد وخلوق

صحيح انه كدرنا لما حطها في الزاوية

ولو طلعها باليمين كان ابرك واحسن له :anger1:

قدر الله وماشاء فعل

بس اغنية عبدالكريم (( مانسينا )) :nice:

وكذلك فهد خلفان اخذ نصيبه من الرسايل والبرودكاست

ولكن حامد شامي خفف العبئ عليه وسرق بساط النجومية منه

(( مصائب قوم عند قوم فوائد ً )) :nice:


بس ماتلاحظون ان اثنينهم يشوتون باليسار :con2:

ولو شاتوها باليمين كان احنا بخير :omen2:

[سداوي&مدريدي]

المفروض لاعب محترف مثل حامد شامي مايتأثر بهذا الكلام

شي طبيعي تعصب الشارع الرياضي ماينلامون

وانا أتوقع بتكون دفعه له لتقديم الأفضل

سواء في المنتخب او النادي

[بوخالد911]

المفروض لاعب محترف مثل حامد شامي مايتأثر بهذا الكلام

شي طبيعي تعصب الشارع الرياضي ماينلامون

وانا أتوقع بتكون دفعه له لتقديم الأفضل

سواء في المنتخب او النادي




كلام كبيييير



PING

!!!!



:victory::victory::victory:

[OTOsan]

في كولومبيا عام 94 اذبحوا مدافع منتخبهم يوم انه سجل خطأ في مرمى فريقة

هذا هو العالم الآخر لكرة القدم :(

شدة وتزول




لاداعي للخوف ابدا ..
اسكوبار لم يقتل من قبل مشجع كولومبي متحسر على خروج فريق بلاده ..
بل قتل من قبل عصابة لشركة (مراهنات) خسرت الكثير من جراء هذا الهدف :)

[بلوتنيوم]

ضريبة الشهرة والنجومية
صحيح المدخول جيد
لكن في ضريبة عند اول خطأ
كل العدسات والفلاشات بتتركز عليك
لانه اهل الرياضة والفن
شخصيات عامة
ومتابعين من قبل الجمهور والاعلام

عموما الموضوع اخذ حجم اكبر مما يستحق
:omen2:

[المتألق]

هذا مقطع من الحوار الي كان مع حامد شامي في منتديات قطر فتبول

حامد شامي : ؟تكلم معي الكثير و اخرهم الشيخ خالد بن احمد من نادي الغرافة الذي كان مستغربا من كم المسجات الذي انتشر و قال لي " ماصار قول اللي سجلته على نفسك " ، و هذا السوال الذي لا اعرف اجابته فالى متى الصبر على استخفاف الناس ؟ انا عن نفسي سوف استحمل لانني لاعب كرة قدم و يجب ان استحمل كلام الجماهير، و لكن ماذنب اقربائي عندما يقرأون عن ابنهم مثل هذه المسجات ؟ كل من يرسلها لن يتقبلها عن نفسه او عن اقربائه ، و ليضع نفسك مكاني لو للحظة ليرى اذا ماكان اثر الاستهزاء سلبي او لا ، و الجماهير عامة لم تقصر معي من قبل و من المفترض ان يوقفوا معي بعدم ارسال مايسيء لي ، خصوصا و انه يجب التركيز في هذه الفترة على الاستعداد لكاس و هي البطولة الاهم في الفترة المقبلة .


وربي كلامه موثر وتخيل يا خوان ان احنا مكانه شنو راح بتكون حالتنا النفسيه ..!!

وربي عيب عليكم

[شموخ دائم]

,

,


مرحبا


شكرا على الموضوع

لو كان المنتخب كل سنه ياخذ كاس الخليج
والسنه هذي ما اخذناها بسبب حامد
بنقول يمكن معاهم حق الي يكتبون عنه
لكن المشكله صار لنا سنوات طويله مافيها انجازات
ولا بطولات ومن اخفاق الى اخفاق بكره القدم
والاسباب كثيرة
والاخطاء وارده بكره القدم الاعب يخطىء والحكم يخطىء والمدرب يخطىء
والمحلل يخطىء كره القدم متعتها في لاخطاء
:)

واتمنى كل من يكتب او يعيد ارسال شي يشوف هل هو ( بياخذ فيه حسنات او سيئات )
عاد الانسان مو ناقص سيئات والله


دمتي بطيب



,

,



اخوك



شموخ دائم

[بوخالد911]

الله يعيينه

وعن نفسي ؛ خلاااص اي برود كاست يجيني عنه
خلاااص بمسحه ولا بنشره


أتمنى تسووون مثلي


تحياتي قبل توقف برود كاستاااتي




:victory::victory::victory::victory:

[قطرية حنونه]

اي اوكي

[La Bella]

ياسلاااام حامد شامي أشتهر أكثر من قبل ووايد عن طريق البي بي

[bentalgala]

في الحقيقه اعجبتي تعليق على الموضوع
يقول ما يصح الا الصحيح

المنتخب القطري يتساهل في البدايه وفي النهايه يشد ونقول اووووووه ما فزنا

اما اللي يتملم عن حامد فهذا مشكله عندهم
حامد لا يطعن في اخلاقه واللي صار اكيد خارج عن ارادته

وكلنا شفناه في الدقائق الاخيره شلون حرك اللعب

استمر حامد وكلنا معاك

[دااانة قطر]

يقول الله عز وجل:
{إذ يتلقى المتلقيان عن اليمين وعن الشمال قعيد ما يلفظ من قول إلا لديه رقيب عتيد}
قال رسول الله صلى الله عليه و سلم: (من كان يؤمن بالله و اليوم الاخر فليقل خيرا او ليصمت)

[M!$s ĀŁ!eN]

مقابله ف مجلسه : لامد شامي ..
ياليت لو الكل يقراهاا

www.qatarfootball.com/showthread.php?t=133228

فكوناا من السيره ترا ما يسوا عليه ..
انا بجوف لو احد منكم بغلط شنو يكون جراته ..

[qatari1]

أنا أشهد إنه بو شامي صار عنده جبال من الحسنات!

والله سيل المسجات البلاكبيرية لا يكاد يوصف!

بل حتى أنه تجاوز " عزيزي" و " محشش" في الشهرة!

عزيزي حامد شامي..

وراء كل محنة منحة، ومحنة الهدف القاتل جاءت بالأجر العظيم فلا تحزن.

[R 7 A L]

ماعليك منهم يابو شامي
المهم انك اشهر منهم هالى يكتبون

[العـوا]

الانسان يخطي وهذا بشر

[بـــــــنت النوخـّــــذه]

من حامد شامي وشنهو سالفته ؟؟؟؟؟؟؟؟؟؟؟؟؟؟؟؟؟؟؟؟؟

[بلوتنيوم]

هاه هاي هاة تصدق كنت بمطعم أيراني أول ما وصلني البرودكاست
:) الي قاعدة جدامي عبايتها راحت وطي من البيبسي :shy:

ههههههههههه
مساكين اللاعبين :secret:



:)

كانت خارج السيطره

وحامد الى كانت تحت سيطرته المسكين :omen2:


من حامد شامي وشنهو سالفته ؟؟؟؟؟؟؟؟؟؟؟؟؟؟؟؟؟؟؟؟؟

يقولك كان يامكان
في مباراة قطر والسعودية
والسعودية عقدة قطر من زمان نادر مانفوز عليهم
وتقدم منتخبنا بعد معاناة
وجمدوا الشباب وسكروا الدفاع
وكان باقي دقايق ونتأهل للدور الثاني
وبالغلط حامد شامي حط الكورة في مرمانا
وتعادلنا وطلعنا من البطولة
فالشباب ماصدقوا حملوا حامد شامي شماعة الخروج
مع انه في اكثر من شماعة
بس الفراغ والملل ومايسوي يفتح افاق جديدة
واعلنوا حملة على بو شامي في البي بي والبرودكاست
وقاموا يكتبون سيناريوهات ومؤلفات
وينتقصون من اللاعب المسكين :(
وتوته توته خلصت الحدوته:omen2:

[La Bella]

والله صج من هذا وشسالفه ابغي اعرف مايصير جذيه اقرى الردود ومادري شسالفه وليش هاجمين عليه

لاعب كرة قدم يلعب بالمنتخب

[تحداني]

وحامد الى كانت تحت سيطرته المسكين :omen2:




وائل يلعب مباراه وديه
اما حامد يلعب مباراه مصيريه


مسكين حامد :(

[بـــــــنت النوخـّــــذه]

ههههههههههه
مساكين اللاعبين :secret:



وحامد الى كانت تحت سيطرته المسكين :omen2:



يقولك كان يامكان
في مباراة قطر والسعودية
والسعودية عقدة قطر من زمان نادر مانفوز عليهم
وتقدم منتخبنا بعد معاناة
وجمدوا الشباب وسكروا الدفاع
وكان باقي دقايق ونتأهل للدور الثاني
وبالغلط حامد شامي حط الكورة في مرمانا
وتعادلنا وطلعنا من البطولة
فالشباب ماصدقوا حملوا حامد شامي شماعة الخروج
مع انه في اكثر من شماعة
بس الفراغ والملل ومايسوي يفتح افاق جديدة
واعلنوا حملة على بو شامي في البي بي والبرودكاست
وقاموا يكتبون سيناريوهات ومؤلفات
وينتقصون من اللاعب المسكين :(
وتوته توته خلصت الحدوته:omen2:


لاعب كرة قدم يلعب بالمنتخب



اهاااااااااااااااااااا مشكورين يا اخواني 000على التوضيح و الشكر كذلك للشخص الي وضحلي السالفه على الخاص 00:nice:0

كل هذا الهجوم لجل شوته كوره لااله الا الله صج مينن هالعالم اقصد ماعندهم سالفه 0اقصد اشفيهم0:omen2:

وخسرنا التأهل لكن ربحنا استضافه محد كان يحلم فيها 2022 شهالطمع الي فيكم اههه تبغون كل شي ياجماعه العين حق وزين خسرتو نطفي العين ترى العين هالسنه كله على قطر
والله صج ماعندهم سالفه حسبت الريال مختلس شي ولا مسوي شي ولا ملبسينه تهمه بالغلط ومظلوم وفيها حقوق انسان ومطالبات دوليه بالافراج 000


اقول ياجماعه ترى الله كاتب ولو الله سبحانه قال كن فسيكون قصب يعني يفوزكم والله مهب رايد والله شي عجيب

سلام (ن) عليكم

[ghanim.qa]

ترى كل الي ينقال عن حامد شامي مب من القلب ولكن من قبيل المزح فقط ،وهو عارف هذا الشي وأن الكل يحبه وما يرضى عليه

[ارين]

والله كسر خاطري هالحامد مع إني ما أعرفه .. وخسارة منتخبنا مكتوبة علينا مسبقا وجعل
الله مسبب الأسباب هالحامد سبب في الخسارة .. ولو لم يكن حامد السبب في الخسارة ستكون هناك أسبابا أخرى غيرها

فتقبلوا قضاء الله وقدره ..

وأعــــانك الله يا حامد ..

[الأصيلة]

والله كسر خاطري هالحامد مع إني ما أعرفه .. وخسارة منتخبنا مكتوبة علينا مسبقا وجعل
الله مسبب الأسباب هالحامد سبب في الخسارة .. ولو لم يكن حامد السبب في الخسارة ستكون هناك أسبابا أخرى غيرها

فتقبلوا قضاء الله وقدره ..

وأعــــانك الله يا حامد ..



بس كانت فاجعة غير متوقعة
وخاصة إن المنتخب يلعب مع السعودية
وكان حلمنا الفوز ...

[دكان عباس]

عذي ضريبة الشهرة