سرقة مبلغ من حسابي في بنك الخليجي من هكرز !!!!!!!

[al-mafia]

الموضوع ابتدأ عندما قمت بأيداع 500 ريال في صراف البنك الخليجي في محطة وقود فرع الصناعيه يوم الاحد الموافق 19- ديسمبر 2010 قبل الساعه العاشره صباحا ولم تدخل في حسابي وظهر امر بأنه تم حجز المبلغ وبأنه يجب التحدث مع خدمه العملاء وهذه اول مره تحصل لي فا من أجل التأكد قمت بأيداع 15 ريال بعد ان ضاعت الـ 500 ريال ولم تدخل في حسابي فأستغربت ووجدت الـ 15 ريال نزلت بالحساب والـ 500 ريال لم تنزل وبعد ان حدث ذلك بدقائق بالفعل اتصلت بخدمه العملاء وقد ردت علي موظفه في الكول سنتر فا طلبت مني بعض البيانات للدخول على حسابي للتأكد من العمليات فقالت لي مافي ايداع تم بـ 500 ريال استغربت قالت لي روح اقرب فرع لك يوم الاثنين من فروع الخليجي وقدم طلب بما حدث معك وان الفلوس راح ترجع خلال 3 ايام !!!! وانتهت المكالمه وفي نفس اليوم وانا نايم وجدت خدمه العملاء لبنك الخليجي تتصل علي 2.30 فجرا يوم الاثنين !!! فا رديت وكلمني موظف وقالي ممكن اتأكد من بياناتك فذكرت له كل البيانات الشخصيه المتعلقه بي وبعد ذلك قالي انت اشتريت الساعه الواحده صباحا (الفجر) من على الانترنت ؟؟ قلت له لا طبعا كيف اشتري وانا نايم وانت صحيتني من النوم !!!!! قالي في عمليه شراء تمت يوم الاثنين الموافق 20-ديسمبر 2010 بقيمه 72,75 ريال من على الانترنت من امريكا . قلت له انا متأكد بأني لم اشتري بعدين انا بقطر مش بأمريكا !!! وقلت له قصه الـ 500 ريال التي لم تدخل الحساب وقلت له الحين انسرق من حسابي فلوس من هكرز فا قلت له شو الحل الحين ؟؟ قالي الـ 500 ريال فلوسك بتشوفها في حسابك بكرا الصبح!!! اما الفلوس الي انسرقت 72,75 ريال ما راح ترجع لك !!! رحت الصبح على بنك الخليجي اليوم فرع الدائري الثالث وكان في موظف واحد بس في خدمة العملاء !!!! انتظرت لحد ما جى دوريي وقلت له الي حصل فقال لي انا بقدم لــ operations department طلب عن ما حصل وقالي وقع على الطلب فا وقعت !!! وبعدها سألته شو مصير الفلوس ؟؟ قالي الـ 500 ريال هاذي فلوسك ان شالله بترجع اما الفلوس الي انسرقت من حسابك ماراح ترجع قلت وانا ايش ذنبي قالي الحمد لله ان المبلغ صغير وبعدين هذوول هكرز ما حد يقدر يسوي شي وقالي انت عارف. انا استغربت لما قالي هل الكلام انا اشوف من وجهة نظري ان البنك غير امين على اموالي وقررت اغلق الحساب واسحب الفلوس قالي ما تقدر تسحب الفلوس الا لما يردون عليك في موضوع الطلب الي مقدمه الحين الي المفروض اراجعهم فيه الاسبوع الجاي!!!!

الحين وين الواحد يقدر يشتكي ؟؟؟؟؟؟

[شموخ دائم]

,

,


السلام عليكم ورحمه الله

اخوي انت تقصد ان ( السرقه صارت من الفيزا ) تبعك وليس من حسابك

لان الشراء من النت يتم عن طريق ( الفيزا )

ياريت توضح


,

,


اخوكم


شموخ دائم

[المزن الرياني]

اذا الفلوس اسنرقت من حسابك الشخصي ورفض البنك يعوضك
عليك بالمصرف المركزي

[al-mafia]

,

,


السلام عليكم ورحمه الله

اخوي انت تقصد ان ( السرقه صارت من الفيزا ) تبعك وليس من حسابك

لان الشراء من النت يتم عن طريق ( الفيزا )

ياريت توضح


,

,


اخوكم


شموخ دائم

نعم من الفيزا

[آهـل شَـرق]

واحد من الشباب يعد علي سالفته وصار له نفس موضوعك لكن الفرق المبلغ اللي انسحب من حسابه كان فوق الـ 200 الف واللي سرقهم شرى فيهم سياره :)) .. فـ بلغ واتضح لهم ان الرجال في قطر والمشترى كان خارج الدوله فرجعوا له الفلوس على طوول وغيروا فيزته وطبعا الفلوس اللي انسرقت خسرها البنك لان الغلطه كانت عن طريقهم .. وعلى فكره السرقه كانت عن طريق الفيزا ..

الخلاصه .. في هذي الحاله البنك هو المسؤال عن هالشي .. يعني في حالة تاكد استخدام بطاقتك في امريكا ووجودك انت في قطر يردون لك المبلغ !!

وكلام الرجال اللي في خدمة العملاء صحيح .. مسالة الفيزا مافيها امان .. يعني لو سافرت مكان واستخدمت بطاقتك .. اول شي تسويه بعد ما ترد الدوحه تبدل البطاقه او السكيورتي نمبر .. !!

على العموم الحمدلله طلع الحرامي قنوع وجابها على 72 ريال بس ..

[الصريحه]

الله يعوضك خير

[hamoor4ever]

اخوي انا اشتغل في بنك وللاسف هم استغلو عدم فهمك واوهموك ان فلوسك راحت عليك لان هكرز خذ فلوسك وانت قاعد بالدوحه ، انا اقول لك اكتب كتاب رسمي والبنك مجبور يرجع فلوسك وهم يضحكون بعد واذا ارفضو اشتك في المركزي وراح تاخذ حقك لو نص ريال ، صدقني لو انت مب قطري كان رجعو فلوسك وهاذه اللي يصير في البنوك لاتسكر حسابك ولاشي بس خلك رسمي وياهم واكتب كتاب رسمي وراجعهم بعد اسبوع اذا شفت انهم ماسوو شي عطهم اياها على بلاطه وقول لهم انك رايح المركزي تشتكي وراح تفضحهم لان للاسف البنك قام يستغفلك بالشي هاذه مافي شي اسمه هكرو على حسابي وخذو فلوسي في اي بنك بقطر ، وقول لهم ان ان بأستطاعتهم التشييك على الجواز في حاله رغبتهم بذلك وانت تبغي حقك منهم وانك غير مسؤول عن ضعف الامان في شبكتهم وتقدر اذا كان المبلغ مسحوب من الفيزا انك بنفس الوقت تكتب كتاب لشركه الفيزا بأمريكا تشتكي على البنك وبلي صار وياك يعني خربها وياهم من الصوبين من المركزي ومن شركه فيزا وشوف شيصير وياهم برجعون فلوسك غصب مهب طيب

[muraikhi77]

شوف والله اعلم لو انه هكرز ماسرق منك ها المبلغ البسيط .

بعدين البنك لازم يفتح تحقيق بالموضوع خصوصاً وأن البنك هو وسيط للفيزا وليس هو صاحب شركة فيزا ، فهناك تحقيق يجرى لمعرفة من المستفيد وذلك عن طريق مراسلات خاصة بين البنوك و محل الشراء وحتى لو كان هناك طلب على الانترنت من خلال التحقيق يتم معرفة من المستفيد من هذا الشراء عن طريق العنوان . وحدث معي نفس هذا الشي مع البنك التجاري ولكن حدث اني كنت مشترك بأحد المكتبات الرقمية وهو اشتراك سنوي وفي العام التالي تم خصم مبلغ وبعد التحري عرفت اني لم ألغ اشتراكي .
تأكد أخي الكريم من مصدر المستفيد للعملية وستجدة في الفاتورة وربما اشتركت اشتراك سنوي مثلا ً.

[CH Engineer]

اخوي انا اعرف واحد اشترى من امريكا بمبلغ حول 1800 ريال وهو في قطر.. عن طريق بطاقة الفيزا والبطاقه مب مالته ونسى يقول لراعيها..
راعي الفيزا اتصل على البنك وقالهم انتو ساحبين مني 1800 ريال ليش!!
بعد ماوضحوا له قالهم لا مب انا الي اشتريت
رجعوا فلوسه وهم تفاهموا مع المصدر الي سحب الفلوس لان بتصير مشاكل امنيه البنك مسؤول عنها مب انت..

بعدها اخونا فالله اللي سحب الفلوس جاه اتصال من امريكا يقولون له انك اشتريت بطريقة غير قانونيه وكانوا بيسحبونه..
مافي شي اسمها هكر ومانقدر عليه والكلام هذا محاسب عليه الموظف..

[القيادة]

مثل مانصحوك الاعضاء الكرام

لاتسكت وتخلي حقك يضيع

الحقوق تبيلها حلوج

[شيط ويط]

مكرررررررر

[شيط ويط]

أخوي عندك ايفون ؟؟؟؟؟

[HiTec]

اخواني واخي صاحب الموضوع

في الفترة الاخيرة وكما عرض على شاشات التلفزيون الاخبارية ..
وبعد اعتقال صاحب موقع ويكيليكس ، قام مجموعة من الهكر بالاستيلاء على الكثير الكثير من عملاء فيزا
والشراء او سحب اموال منها عن طريق موقع امازون انتقاماً لصاحب موقع ويكليكس
هذا لأن سيرفر الموقع كان مع امازون وبعد اعتقاله والضغط على امازون تم سحب استضافة الموقع


فاللي كاله الموظف صحيح ، وهذا سبب اتصاله عليك بالوقت المتأخر
لأن اكيد البنوك كلها متأهبة اولاً
ودلاله على حرص البنك ثانياً

وفيه مبالغ كبيرة انسرقت خير انها بس 72


ومن باب اخر المفروض التقيد بالفيزا واستخداماتها عبر الانترنت والافضل استخدام الفيزا الي يسموها .. زيرو لمت .. لأجل ايداع المبلغ الي يحتاجه العميل على قد البضاعة
وكثير من الناس حتى عندي من الاهل قام بشراء بعض الكتب وتم سحب 3 اضعاف المبلغ من الشركة ذاتها
بحجج واهية
فوحب الحرص والحذر

[مخطط قطري]

وانت شتبي دش في بنك ربوي هذا اول الغيث:)

[latty]

الله يستر

كيف ماننسرق واحنا بالكارفور والجمعيات الميره لما نجي ندفع بالكارد يكون الجهاز مفتوح حتى امام اللي يشيل الاغراض والمحاسب والجمهور يعني رقمك السري تحطه امام الكل وانت تضحك وين الحمايه

[ثرية]

انا انسرق من بطاقتي ماستر كارد مبلغ 4000 والمبلغ انسرق من الامارات وتم شرااء تذكرة سفر
ورحت الماستر واشتكيت قالوا انتي سحبتيه قلت متى وشلون على كيفكم المبلغ انسحب من الامارات وانا ماسااافرت ولا طلعت من البلد هالفتره وفعلا تم التاكد ان المبلغ نسرق وتم ارجاع المبلغ في حساب الماستر وغيروا البطاقة كلها

[غيور]

اخوي العزيز صاحب المشكلة ,
والله انا عارف شعورك وزعلك على الطريقة التي تنصل البنك من واجبه تجاهك !!
ولكن لازم تعرف مع الأسف الشديد انه عندما يعرف رقم بطاقتك اي شخص فأنت معرض للسرقة .
والشي الثاني مثل ماقالوالاخوان البنك يستطيع معرفة المستفيد من عملية الشراء .
الشي الثالث: البنك سوف يحاول اقناعك بأن العملية تمت بين حامل البطاقة و البائع (المتجر) في امريكا ,
وسوف يقول ليست مسؤولية البنك ؟ قلهم انا لااتهم البنك ولكن انتوا قادرون على معرفة اللي استخدمها .
وسوف يحاولون يطفشونك ( سوف نحتاج شهرين ) قلهم بأنك سوف تخاطب الشركة (الفيزا الأم) وفي تلك الحالة سوف يتغير كلامهم , لأن الشركة الفيزا لو عرفت باالسرقة سوف توجه لهم توبيخ او سحب الترخيص من البنك باستخدام الفيزا .( لأن شركة الفيزا لاتريد فقدان الثقة والمصداقية مع عملائها )

والله يوفقك وادا تأزمت الامور ارسلي رسالة على الخاص لاني مع الاسف اعرف كباريه عندهم .

وشكرا

[مرتبش]

بطاقات الفيزا والماستركارد عليها تأمين من شركاتهم
فالمفروض البنك يرجع الفلوس

[بوخالد911]

علييك بمصرف قطر المركزي

[MR.STOP]

[color="black"]واحد من الشباب يعد علي سالفته وصار له نفس موضوعك لكن الفرق المبلغ اللي انسحب من حسابه كان فوق الـ 200 الف واللي سرقهم شرى فيهم سياره :)) .. فـ بلغ واتضح لهم ان الرجال في قطر والمشترى كان خارج الدوله فرجعوا له الفلوس على طوول وغيروا فيزته وطبعا الفلوس اللي انسرقت خسرها البنك لان الغلطه كانت عن طريقهم .. وعلى فكره السرقه كانت عن طريق الفيزا ..

Color]

200 الف فالفيزا ؟؟؟ وش ناوي يسوي

[باراكودا]

روح أشتكي في المصرف المركزي .