مسيرة اليوم الوطني بين السندان والمطرقة ... يستحق المتابعة

[أوتـ(الحزن)ـار]

السلام عليكم ورحمة الله وبركاته

تحياتي لكم جميعاُ

مسيرة اليوم الوطني من خلال نظرة وعيون وعدسة شاهدة على مااقولة

بدأت المسيرة في يوم الخميس وامتدت الى يوم الجمعة ... 3 ايام من الإحتفالات الصاخبة لمناسبة من الأفضل ان يكون الاحتفال بها مقصور على العرض العسكري أولاَ ثم العرضات الشعبيه اللي تقيمها القبائل ثانية ... ثم الاحتفال الشخصي كل واحد يزين بيته او مخيمه او سيارته وبدون مسيرة وبدون اي تجمهر

شباب وبنات خلونا نتكلم بكل صراحة ... شنهي نظرة الناس لنا عقب المسيرة ... هل هذا رقي او هل هذا سعي الى الارتقاء .. او هل هذا تباهي او .. او ... او ....

حصلت جدامي مجموعة مواقف وكان السبب في مثل هذي المواقف هم .. البنات ويتلوهم هبل وعبط وجنون الشباب

اول المواقف ...

واحد عنده عراوي ... يريوس ويجدم ويحفص على الموتر اللي وراه .. طبعاً الموتر اللي وراه فيه بنات من جنسية عربيه ... ولكن الزي خليجي ... ولكن موترهم مايسوى 15 الف وهذا شي مستحيل انه بنت قطرية تركب سيارة صغيره بهذا المستوى ,, هاذول البنات متلثمات ومشغلين الاغاني وهم اللي يتحرشون في الشباب ... كنت مع زوجتي وعيالي في المسيرة وهم بعد قطو علي حجي وهم شايفين انه عيالي وياي وحرمتي يمي ولكن لاحياة ولا ادب ولا اخلاق ولا تربيه للأسف

المهم الرجال اللي جدامهم راعي العراوي كرر الحركه وهو يحفص على وجيه البنات .. لين ماتهور اكثر وزاد الريس ودعم الموتر اللي جدامه .. وصارت مشكله ... والموتر تعطل والعراوي بعد تعطل ومن اللي ضحك في النهاية ... البنات الساقطات بكل سهوله مرو على اللي دعم وقالوله تستاهل وراحو ...؟

عقب شنو تستاهل عقب ماتحرشتيي بالرجال وخليتيه يجن جنونه ويطلع الخبال اللي فيه وقلتي له تستاهل

اذا هو خاروف مايستحي على وجهه وماصدق انه بنت وقحه مثلج تعيطيه وجه .. انتي ليش من البداية سويتي هالحركات .. ليش دخلتي مسيرة ... وشبابنا الله بالخير .. مخبلين والخبال ببيزة

...

الموقف الثاني ... في اكس ار فيه تقريباً 7 بنااااات الموتر حده حده حده مدحوب

وداشين وسط الشباب واغاني ومصخره وترقص وكلن يجي ويرقم وكلن يجي ويرش عليهم .. يعني في ذمتكم الناس اللي برع قطر شنو بتقول علينا ...؟ والله حرام اللي يستوي

غير الوصاخة وغير تشقح الأرصفة وغير الترقص وغير التحرشات وغير الاقنعة والهبل اللي شفناه بعيوننا

لاحول ولا قوة إلا بالله

شي يقهر وشي يبط الجبد ويخلي الواحد يتحسف انه ياخذ عياله وينصدم بمثل هذي السخافات

ياجماعة الأمر مب هين ويحتاج وقفه والله يحتاج وقفه من الكل

يحتاج توعية

يحتاج يد تضرب من حديد للي يخالفون ويتحرشون وهم بعد يد ضرب البنات مب بس الشباب

شفت بعيني وحده بروحها في الموتر مطلعه الرش وهي اللي ترش على الشباب

انا عندي سؤال ...؟

هل هذي هي طبيعة الشعب عندنا ولا لا ؟

طبعاً مب هذي الطبيعه .. عيل ليش الخروج عن المألوف وليش الواحد يوصل نفسه لهذا المستوى ويرقص ويستهبل ويقلل من قيمته جدام الناس

هذا احمد او اوتار صورك وانت ترقص ... كفو تقوله شي ؟؟ وفضحك بعد ونشر صورك .. تقدر تقوله شي ؟؟

باجر لي رحت تخطب او تتزوج بيقولون هذا مخبل يرقص ويرص الثوب على نفسه ويترقص مثل البنات في المسيرة

وطبعاً مكان مفتوح اعلامياً واللي في خاطره يصور يصووووور ودربه خضر

وطبعاً الحجي هذا ينطبق على البنات مب بس الشباب

لييييييييييييييييييييييييييش نوصل لهذي المواصيل ونخلي الناس تضحك علينا ...؟؟

خليل الشبرمي قال ... هذي عوايدها قطـــر ... بالشموخ والعليا والطموح والجد والاجتهاد

لاتخيبون الظن واللي يرحم والديكم واحسنو التصرفات هذي ولاعاد تطلعون بهذي الصورة مرة ثانية

اسف على صراحتي وجرآتي بالكلام ولكن والله والله والله اللي شفته جعل عيني تدمع

اخوكم ... احمد

[La Bella]

مادري ليش تنشرون غسيل الشعب بالمنتدى
الحين الكل بيدش من خارج الدوله وقص ولصق بمنتدياتهم
الي واجه شي يستر عليه وخلاص

[بومحمد911]

يحتاج يد تضرب من حديد ويد تضرب العصيد

[أوتـ(الحزن)ـار]

اها

طيب طيب

[فالكـ GOOD]

:( انا في المسيره اعرف ان تصير مثل هالاشيا عشان كذا من اولها مااطلع لا انا ولا احد من هلي

المهـم اضطريت اروح مستشفى حمد
وانا بلطريق طبــعا مامريت صوب الكورنيش لكن كانت في زحمه موطبيعيه بس اللي يقهر
ان في شباب نزلوا من سيارتهم ووقفوا عند سيارتي وحاولوا يبطلوا الباب الخلفي
انا من الخوف مالفيت ولاشفتهم وتميت اقرا المعوذات وادعي :( (( عبالي جنانوه ))

وطبعا سيارتي مسكره وجاماتي مسكره لكن عيشوني برعب الله يهديهم :(
المهم ماصدقت على الله اوصل بس الموقف كان بايخ
والمفروض هالتصرفات ماتصيــر
بس الله يهدي الجميــع وانا مو ضد المسيره انا ضد التصرفات الغير مسئوله

الله يهدي الجميع :(

[الحره]

والله لو يمنعون المسيره ويكون الاحتفال بس العرضات ابرك لان هالبلشتيه افضحونا ومحسوبين علينا انهم قطريين ومايندرى وش جنسهم ووش فصلهم حسبي الله عليهم ونعم الوكيل من بنات وشباب

[بـــــــنت النوخـّــــذه]

والله البنات لو يهدون عليهم (الشرطيات ) التابعين للفزعه انهم يسنعونهم عدل

[مستجدة]

الضو من شبابها والخيل من خيالها

لو وراهم رجال كان ماشفت هالاشكال طابين بين الرجال وفاصخين الحيا
واللي شفته من الشباب وترقصهم في الشوارع شئ يحزن معاد فيه نخوه ورجوله

اتمنى انه مثل هالمسيرات تنلغى ويتم منعها من الداخليه لانها بكل صراحه مافيها شئ من الوطنيه
وفيها ايساءه كبيره لاهل قطر الطبين .


الله يصلح حال شباب المسلمين

[غلا ابوها]

الضو من شبابها والخيل من خيالها

لو وراهم رجال كان ماشفت هالاشكال طابين بين الرجال وفاصخين الحيا
واللي شفته من الشباب وترقصهم في الشوارع شئ يحزن معاد فيه نخوه ورجوله

اتمنى انه مثل هالمسيرات تنلغى ويتم منعها من الداخليه لانها بكل صراحه مافيها شئ من الوطنيه
وفيها ايساءه كبيره لاهل قطر الطبين .


الله يصلح حال شباب المسلمين

لافض فووووك

[أوتـ(الحزن)ـار]

الله المستعان

[غايه الطواش]

اذا الاغلب راح المسيره ...والكل مستنكر الي صار

من عياله وبناته الي سوو هالحركات ؟؟؟ عيال كوكب المريخ ؟؟؟

بعيد عن الموضوع اخ اوتار

واحد من الاعضاء وبالصدفه عرفته من نكه قد صار تعامل بينه وبين جهه رسميه في حدى مؤسسات الدوله وايضا بين الجهه الي اشتغل فيها ...والاخ ماكان قد الامانه وسبب مشكله اخلاقيه وانطرد من هالمكان ..

تخيل ..جاي المنتدى يمثل دور النزيه ويتكلم عن الادب والا خلاق وهو ماحشم بنات الناس الي كان يشتغل معاهم ؟؟؟

يعني تقدر تقول بنشوف ممثلين وكلن يمثل دور المثاليه

[أوتـ(الحزن)ـار]

اخوي غاية الطواش
ماله داعي اللي ذكرته
وكلامك بعيد عن فكرة وهدف الموضوع
تقدر تطرح مشكلتك مباشرة للشخص المعني
اوتار

[عيون الدوحة]

تحصل هالممارسات الخاطئة في المسيرات عموما بأي مكان

ونتمنى اننا نبتعد عنها >> لأننا شعب راقي

مع تحياتي

[AL.SHMOKH]

اي والله صدقت ياخوي في كل كلمة قلتها
الله يهديهم يارب