الحياة تغيرت ولا وش السالفة !!!!!

[قطرة مسك]

السلام عليكم جميعا اليوم نزلت موضوع في غاية الاهمية وخصوصا اننا
نعيش في وقت كله ضغوطات وامراض وقلة راحة وتعب نفسيا

ترى ليش السبب هو هذا

عن أنس بن مالك_ رضي الله عنه_ قال : قال رسول الله صلى الله عليه وسلم : ((من سرهُ أن يبسط له في رزقه ، ويُنسأ له في أثرة فليصل رحمه)) البخاري الفتح10(5986) ومسلم (2557)




اين نحن من هذا الحديث الجليل الناس صارت مش مثل اول زيارات ووناسة وتغير جو

ليش تغيرت الحياة وكل واحد قاعد في بيته لا احد يزوره ولا احد يسأل عنه

حتى الاقرب الي وصانا الرسول فيهم حتى لو كان ردينا وسيئن وصانا بزيارتهم لا نشوفهم الا بالمناسبات الاعياد او العزاء ليش

تقولون ليش تعبانين هذا السبب !!!
:weeping:

[Rider]

اختي قطرة مسك للاسف هذا هو الواقع الحياة هي نفسها لكن الناس هم الي تغيروا

[مهابه]

للاسف كلامكم صحيح


بس مش الحياه اللي تغيرت
الناس اللي تغيرت

اقولك وجهة نظري


بالاول كانت الاولويات صلة الرحم والاهل والوصل
وكانوا امهاتنا اهم شي عندهم الوصل
مربينا عليه
لكن الحين مع الجيل الثاني صارت الاولويات في الصداااقه والربع فماعادوا يهتمون بالاهل وصلة الرحم
صارت الاولويه صديقاتي اطلع وياهم او ازورهم
اما الاهل عااااادي لاحقه عليهم

وهذا ضعف من التربية الى جانب ضعف الدين

[هبوب الكوس]

الزمن ماتغير بس ويلاه اهل الزمن متغيرين. رحمتك يارحمتك يامعين

[صعبة وصوفه]

ايييي والله جبتيها عالجرح.. :(

اذكر اول يوم كنا صغار كنا ننتظر الخميس والجمعة على اااااااحر من الجمــــــر.. عشان كنا دايمن نطلع زيارات وقيلات ووناااااااااسه عالاخر...

بس للاسف اللحين اليوم نفس بكره وبكره مثل امس.. لافرق..
:(:(:(

[جمال النعيمي]

اقول كانو يقولون

غربي هواكم يا أهل الدوحة

صار هواكم لبنانييييييييييييي

http://up.shamoa.com/uploads/images/shamoa-5898cf6628.jpg

[JN000N]

خذتنا مشاغل الدنيا
كلن لاهي بشغله وعياله وبيته
محد فاضي وخاصه ان في ناس صارو يتضيرون من هالسوالف وصار كل شي رسمي ومجاملات وسخافه
حتى بين الاخوان والخوات صار في استئذان حق الزيارات
كل شي تغير خلاص
في ناس ماتسمعين صوتهم الا حزة يبغون شي ويسكرون
مصالح وقطاعه *

[الراقيه سبشل]

نعيب زماننا والعيب فينا .. وما لزماننا عيب سوانا

[مسمس12]

الواحد صار مايعرف للناس اذا زارهم يشبع غثا وقهر واذا بتسولف وتقول الصراحة ناس تزعل واضطر اتجامل وتكذب فاحسن الواحد يقعد في بيته ويزور اقاربه من فترة لفترة

[بوصالح 92]

الزمن ماتغير بس ويلاه اهل الزمن متغيرين. رحمتك يارحمتك يامعين


اي والله اهل الزمن متغيرين

[بـــــــنت النوخـّــــذه]

دام كل واحد رافع خشمه ينتظر الثاني يزوره اول وبعدين اهو 00 وين تكون صله الرحم بالله عليج00
:(:(

يلا الحمد الله على كل حال الواحد في هالدنيا بس يمشي ويقول يالله الستر و العافيه ليّ ولجميع المسلمين هذا اهم شي مع احسان الظن بالاخرين والامور بتكون طيبه بإذن الله رحمه الله وسعت كل شيئ

[R 7 A L]

مشاغل الحياة هي السبب
حتى لو فضى الواحد في يوم من الايام وراح يبي يصل رحمة حصل الى يبي يزرة مشغول
وهلم جرى

[ارين]

الحياة تغيرت ولا وش السالفة !!!!!


تمدحون الوقت والا تشتكونه

........ الردى في الروس ما هو في زمنا

[هتـان قطر]

الحمدلله ما زالت الدنيا بخير ومازال هناك ناس محافظين على صلة الرحم

وكل شخص يتذمر .. ليش ما يبدا بنفسه ويغير اللي حواليه

الكل مسؤول .. وما نلوم الزمن لان الزمن هو هو .. ماراح يتغير

الناس اللي عايشين فيه هم اللي محتاجين تغيير


الحمدلله مازلنا نتواصل.. بنيت لي خيمة في وسط الحوش

وكل يوم او يومين مجتمعين .. ولله الحمد

[بوخالد911]

رحماك رباه

[latty]

الله على المقيمين نهاية الاسبوع بسباير يتجمعون النسوان مع النسوان العيال مع العيال البنات مع البنات والرجال مع الرجال يفترشون الارض والكل يجيب غداه او فطوره روحوا خميس جمعه سبت شوفوا والله امشي واتحسر اقول وينا من هالقعدات كله ضاغطين على نفسنا وعيالنا وخدمنا

اي والله الخدم ياعوينهم كرف ليل نهار بهالبيوت

الروتين ممل

[Al-Enazi]

الله على ايام اول لاجوالات ولاشي كنا ننتظر الخميس على احر من الجمر

عشان نزور عمامنا وخوالنا لين تشوف الواحد قدك متشفق عليه وضحك وسوالف ومزح

لكن اللحين اذا صارت مكالمه ع الجوال من اسبوع لسبوع زين عسى الله يعين ياجماعه

وش هالقطــــــــــــــــــاعه.......!!

[بنت صقار]

بالعكس..ترى تسارع الزمن..وتطور الناس..وكلن صار موظف الام والاب وعيالهم..:)
واللي طلاب يردون قريب العصر..
على مايرتاحون..ويرقدون شوي..
ويخلصون امورهم..
يعني الحياة صارت مضغووووطه..
قبل الحياه سهله..
الموظفات قليل..طبيعه العمل في كل الدوله تنتهي بالكثير الساعه وحده..ولا وحده ونص..
الاجازات كبيـــــــــــــرة..:)
المدارس حكوميه وسهله..وكنا أذكياء:)
مافيه مولات..ولا كوفيهات<<جمع كوفي شوب
الحين تمشية العالم في المول..
والبنات يواعدون رفيجاتهم..فما تقدر تلقى فرصه في الويك اند حق زيارة البيت العود..
ولا الاهل فاضين حق زيارت..ياخذون راحه..من عمل اسبوع مضني..ومتعب..
يعني طبيعه العمل والتطور..
تغير..
بس هل الجوال مايكفي؟؟الناس حتى مس كول مايسوون؟؟
مسج؟؟تلفون ارضي<<عشان مانخسركم:)
كشته..للبر..ولا دخان..عائليه<<<<عادات منقرضه:)
بس محد عنده وقت..
الناس تغيروا؟؟
بعد الزمان تغير..!!

[نوفا91]

سقى الله اياام اول..