موقف صج يقهر من دكاترة المراكز الصحية

[الرايــق]

السلام عليكم

اليوم حسيت بتعب وصادني صداع بالدوام
وعلى اخر اليوم حسيت اني مزكم

اول ما خلص الدوام على طول رحت المركز الصحي لاني فعلا مرهق جدا وصايدني صداع مش طبيعي

دخلت العيادة الا هالدكتور حافظ الوصفة حفظ وشكله يقولها لكل المراجعين
بندول و ادول وسلامتك... << خصوصا في هالفترة والموسم

طيب ياخي اكشف على الحالة اللي عندك ، يمكن في شي اخر ، ياخي خلي الواحد يحس انك طبيب مش تحسسنا انك تشتغل كاتب بالبدلة الطبية

والادهى من ذلك طلبت اجازة لباجر لن فعلا لو تميت على نفس الحالة ما بروح الدوام،،، تفاجأت وهو يقولي ما فيك حرارة (علما اني قست الحرارة بغرفة اخرى)
طيب شدخل الحرارة الحين بالصداع والارهاق والعطس المستمر خصوصا اني وضحتله طبيعة عملي خارجية وبالمواقع وتعرضي غدا للغبار ما بيزيد الا الطين بله...!!! وليش مفتكر اني مكلف على نفسي وجاي اشوف شكلك علشان اطر منك اجازة بس !!

تمنيت الاقي حد مسؤول اقدم شكوى فيه .. بس قلت لا تضيع وقتك وخلها على الله

فعلا صرت احس ان هالمراكز الصحية او المستشفيات عندنا صارت مقاااصب لا اكثر!!

[die 4 qtr]

اخوووي انا اجيهم ميته من التعب يقولون لي انتي تمثلين ع شان تاخذين اجازه

[بيانو]

الف سلامه عليك أخوى - الرايق - وما تشوف شر

وهذه الفتره من السنه فيها شويه برد لازم يجى خصوصا بتغيرات الجو

يمكن الدكتور الى انت وقعت معاه مش كويس - ولكن هناك دكاتره اخرين كويسين ويحسون بالمرضى ويقدرون

ونفس الشىء صار معى وكتب لى على اجازه صراحه

وارجع واقولك مب كل الدكاتره واحد

[الحره]

ماتت ضمايرهم هالدكاتره والممرضين احس صادتهم مناعه من كثر ما يشوفون المرضى وصاروا ما يحسون فيهم

[راشد محمد]

الله يعين

[مقطع حق]

الله يعينك ويشافيك

ولكن أصابع إيدك يالطيب ماهيب سوا في كل المجالات

قصر معك أحد لكن يبقى فيه الي فيهم الخير والبركه إنشاءألله

ألله يعينك ويشافيك ويعين ويشافي الجميع

[مهره]

عيل انا مرة دخلت على الدكتورة تشوف الاشعة لى الا تشوفها وتسولف مع ممرضة عن موضوع ثاني وحطت الاشعة فى الظرف وقاتلى راجعي بعد اسبوع نبي تقرير ولا قالت كلمة وتسولف مع الممرضة لا كانى المريضة ولا قالت الاشعة زينة مب زينة واضحة ولا غير واضحة خبر خيييييييييير

[ايزو]

موقف والله بلا تحيز بس صار معاي: اراجع احد المراكز الصحية منذ اكثر من 7 سنوات وكالعادة بندول واخوانه, منذ ما يقارب الشهر حسيت باحتقان وذهبت الى المركز الصحي ولاني اعرف الوصفة مسبقا من الزحمة وقفت السيارة مكان ممنوع الوقوف لاني قلت كلها 5 دقايق ودخلت على( د. قطري) الله يحفظه يحسسك انك في مستشفى خاص وجلست معاه ما يقارب 15 دقيقة واسئلة وكشف ونصائح وابتسامة والله حسيت ان الاحتقان خف من كلامه. في فترة الانتظار الدخول علية شفت الغرف الاخرى المريض ماياخذ دقيقتين ويطلع والدكتور هذا كل مريض ياخذ 10-15 دقيقة.

[ولد النصر]

لو مافيك شي بيعطيك اجازة ولو فيك شي وتبي اجازة مايعطيك صدقني صارت معاي كثير هههههههههه

[بدون]

عند البعض أصبح الطب مجرد وظيفة يؤديها و السلام
نسي أنها أمانة يتحملها إلى يوم الدين
نسي القسم الذي أداه في بداية استلامه العمل
نسي بأنه يتعامل مع أرواح الناس
أصبحت هم على قلبه بدلا من الحفاظ على قلوب الناس

لا حول و لاقوة إلا بالله العلي العظيم

و ما تشوف شر بإذن الله،،،

أجر و عافية ان شاء الله

[باسكن روبنز]

صار لي موقف مشابهه في مركز مدينة خليـفه الصحـي ،

تعبـان والدكتـور يقولي مافي أجـأأزه! ،

كلها يوم واحد!! وأخر مره ماخذ منهم أجــآزه يمكن من 6 شهـور ،

عطيتـه كلمتين حلــوين وآنا طالع < ما آخليها بخـاطري ،:)

هالسالفه صار لها قريب السنـه ومن يومهـآآ ماقربهم الله لايحوجنـي لهم ،

الله يعز دوامنا ألي معطينـا تآميـن صحـي للمستشفيـآت ،

[احمد1]

والله غاب القط العب يا فار يوم ربعنا مايتابعون الدكتور الدكتور من ما يكمل فتره بسيطه من جيته من بلاده الا يقول راتبي واخذه ليش اتعب مافي حسيب ولا رقيب عادي ..... معظمهم بس مب كلهم

[ماريسا]

ما تشوف شر بإذن الله

[" Snake "]

الحمدلله ان عندي تأمين صحي ومستشفيات الحكومه ولا اقرب صوبها
والتأمين ولله الحمد من جهة عملي

[danh]

كنت اشتكيت عند الدكتور صالح المري

اعتقد هو مدير المراكز الصحية ..

والله يشفيك ما تحتاج لإحد

[ام السعف]

امممم

للأمانة مركزنا الصحي كل لأطباء في غاية التفاهم معانا

ما ادري شكلي عايشة في كوكب ثاني ،،

زكام ورشح اكيد بيكون الكشف بالطريقة هذي
مع اشوية افتح حلجك وكشف على الإذن ،،

وارتفاع درجة الحرارة من اهم اسباب اعطاء اجازة لليوم الثاني ،،

مرة ثانية اطلع من عنده ادخل على واحد ثاني
وقول له انا ابي اجازة وتعبان حدي :(

ولا باس عليك واجر وعافية ان شاءالله

[الرايــق]

الشر ما يجيكم يا جماعة الخير
نشكر كل من اعطى رايه في هذا الموضوع ..

وهذا كاريكاتير الاخ محمد بجريدة الراية بتاريخ اليوم

http://www.raya.com/Comics/%D9%85%D8%AD%D9%85%D8%AF-%D9%81%D9%8A-06012011.jpg

[Cooki]

الف لا بأس عليك ياخوي .. اجر وعافيه انشالله

مادري بس كأني داشه عرض بالموضوع ..

الحمد لله انا كل الدكاتره اللي ادش عليهم حليويين..

واذا طلبت اجازه مايقصرون بدل اليوم يومين ..

بس الصج ينقال اغلبهم يكونون قطريين ..

لاني اول ما عطيهم بطاقتي اقول لهم لوسمحتي اختي اي دكتوره قطريه فاضيه ..

فديتهم بناتنا وعيالنا يبردون القلب..

بكل امانه .. في مستشفى حمد سواء العام او النساء او حتى المراكز الصحيه ..

الله يعطيهم العافيه فعلا مايقصرون معاي ..

الا ... طوارئ السد للاطفال .. والله هي مره ولا عدتها..

ومو من الدكاتره .. من موظفه الاستقبال اللي كانت مناوبه ذاك اليوم .. قمه في السوقيه

طبعا هذا من زمااااان 2006 وعسى الله لا يحوجني لهم ...

غير جذيه رايتهم بيضا دخاترتنا

[جمال اليافعي]

انا ما خذ اجازات اروح و انا مريض ... حسبي الله على المسؤولين الاجانب .. 5 ايام اجازة مرضيه متفرقه وخذوها حجه يشيلون عني الترقيه و يعطوني 1% بونس ... شسوي ب 85 ريال ؟

[فيزيائية]

هالموقف صادنا كلنا بدوون شك!!

بس الحمد لله مع الدكاترة القطريين المريض يحس ان فيه حد فاهمة ومتفهم معاناته ويكلمه باحترام ويعطيه العلاج بالشرح المفصل...

[بلوتنيوم]

بعض الدكاترة
محتاجين اعادة تأهيل علشان يقدرون قيمة المهنة الانسانية الى يشغلونها
بس على العكس من الشين
في الزين بعد
في بعض الدكاترة يقومون بمهاهم على اكمل وجه :)

هي الحياة
عملة بوجهين
حلو ومر

عاد حظك جاء بالمر :)

[meeemz]

لاحظت انه افضل الدكاتره في المراكز الصحيه قطريين .. يعطونك ويه ويسمعون الكلام من البدايه .. بشوشين .. ومحترمين ..عكس البقيه اللي يكذبونك ولا يعطون ويه .. وعلاج اي كلام ..