+++ مراكز الحدود (المكسيكية) الخليجية +++

[jajassim]

ينتابك إحساس وأنت تعبر مراكز الحدود لمجلس التعاون الخليجي أنك على مشارف المكسيك، إذ يواجهك سوء المنقلب والمنظر، فالوجوه دائماً عابسة، والقلوب منك نافرة ومن جيتك!

مركز (سلوى والبطحاء) السعودي:
ما إن تدخل المركز إلا وينتابك إحساس بالضيقة – مدري ليش – من شكل المركز أم مما ستواجهه من تعطيل، وأول مؤشر على التعطيل الذي لا مبرر له، فتح منفذ واحد للجميع في معظم الأيام، وفي العطلة الأسبوعية يضاف له زوج آخر يؤنسه!
لكن في جميع الأحوال يلتقي الجميع في البوابة الأخيرة، وهو عنق الزجاجة التي يختنق منها الجميع!
أما مركز البطحاء فهو على ذات المنوال، منذ سنوات ونحن نتلمس منه التصليحات والتحسينات، ولكن الحال واحد مع أخته سلوى
بالمناسبة ما سر المطبات وأنت خارج بعشرة أمتار من بوابة مركز البطحاء؟ مطبات هل هي مخلفات الزمن أم من صنع بشر؟!

مركز (السلع) الإماراتي:
كان أفضل المراكز الحدودية بلا منازع، خاصة من حيث المعاملة، لكن أحيانا وبالقطري الفصيح يبدو أن عين وصابتكم، وما صلت على النبي -صلى الله عليه وسلم-، في السنوات الأخيرة بدأت المعاملة تتغير، ولم يعد القائمون عليه كما كانوا!
بمجرد دخولك المركز تواجه بمنفذ جمرك واحد في جميع الأحوال، والتعطيل سيد الموقف..ليش ما ندري؟!
أما من حيث المعاملة فتفاجأ بوجه مختلف - البوز شبر - وما يحط عينه في عينك - وكأنك ذابح أمة !
وهذا بعكس ما كان سابقاً من رحابة وتراحيب، والبشاشة التي كانت عنوان الإماراتيين!

مركز (بوسمرا) القطري:
عيني عليكم باردة، وبالرغم من إن شهادتي مجروحة، لكن الكل يشيد بالمركز، ويشهد بالقائمين عليه، كان يفشل – تقول معرض غنم – لكن الآن مركز حدودي يشرف ويفخر به كل مواطن قطري. يعطيكم ألف عافية.

فيصل محمد المرزوقي

[Arab!an]

اتمنى ما يكون نقد المراكز الاخرى هو السبيل الى مدح ابو سمره ..

[بصمة قطرية]

صدقت أخوي في اللي قلته ..
بالفعل مركز بو سمره من افضل المراكز ..
مش عشانه مركز بلادي لاء طبعاً ..
كلمة الحق تنقال ..
لما يكون في زحمة على وجه السرعه تلقاهم يفتحون اكثر من شباك ..
ويسهلون الأمور ..
حتى المرافق الموجوده في المركز ..
مطعم وسوبرماركت وماكينة صراف آلي ..

مركز السعودية دايماً نتأخر عليه ..
زحمة غير طبيعية ..
ودائماً شباك واحد واذا كلش الزحمة خانقة فتحوا شباك ثاني ..
بس في الأخير تأمين السيارة شباك واحد ..!!

[Mishari]

عيل ماا رحت مركز الحديثه السعوديه والأردن بتشووف العجب العجااب هناك

اخوي صااار لناا سنين وبنين نتكلم ولاكن لاحيااة لمن تنااادي حتى الصحف والجراايد كتبت عن هذه المناافذ والأعلام صور حلقاات لمسلسلات رمضاانيه تتكلم عن هذه المشااكل ولاكن لا حيااة لمن تنادي

[mirage]

مافي شي اسمه السلع ذاك اول
الحين الغويفات
ولايمكن وضعه مع سلوى والبطحاء في نفس المستوى
هناك فرق شاسع في المعامله

[البدع]

اشهد ان ماشافت عيني مركز حدود راقي مثل بوسمرة

هم الافضل بلا منازع في الشرق الاوسط

[al_lord]

المرزوقي

مامر على مركز الحديثه حدود الاردن ولا كان بيمدح سلوى والبطحاء ويترحم عليهم

الواحد يدخل مركز يقول معتقل مش مركز :(

[بـن عدوان]

تحس براحة نفسية لما تدخل قطر ( بوسمرة )

داش بين اهلك :$

[بن موسى]

صحيح ماذكرت
وبوسمرة الزين مايكمل كل شي فيه حلو عدا بوابات الخروج وموظف واحد في ايام العطل والزحمات

[الفريق أول ركن]

اشوفها مسأله عاديه ...

من وجهة نظري يأتي أفضل مركز حدودي خليجي من حث التنظيم والمعامله :

1- مركز بوسمرة

2- مركز جوازات جسر الملك فهد

3- منفذ النويصيب

4- منفذ الرقعي

5- مركز االغويفات

هالمراكز اعتبرها الاحسن على مستوى الخليح من حيث التنظيم والمعاملهـ

[nadeemy]

الحمد لله على كل حال
والله اني اخر شي توقعته من قلم مثل قلم الاخ المرزوقي مشهود له بالنزاهه ان يمتدح وجود مراكز حدوديه بين دول يجمعها اتحاد لاكثر من ثلاثون عاما .
ذكرني بالرجلين المحكوم عليهم ظلما بالجلد عشرون جلده , وعند انتهاء عمليه الجلد لم يجدا ما يتحدثان فيه فاخذ كل منهما يمتدح السوط الذي جلد به من ناحية اللون الزاهي والنوعيه الجيده:)

[المهندس عبدالعزيز]

بالعكس مركز بطحا بالسعودية أسرع

مركز الحدود القطري يتابعه نساء وهن بطيئات في المعاملة بينا مركز بطحا رجال سريعين في المعاملة

[السليطي 1]

الغويفات تووووووووووووب و من بعدة البقية

[ارين]

أتمنى إزالة هذه المراكز الحدودية على الأقل بين بلادنا الخليجية ..
كدول الاتحاد الأوروبي .. فبإمكان المسافرين الانتقال والسفر بسهولة بين دولها وبلا جمارك أو أوراق لعدم وجود المراكز الحدودية بينها ..

[رجل الجزيرة]

أتمنى إزالة هذه المراكز الحدودية على الأقل بين بلادنا الخليجية ..
كدول الاتحاد الأوروبي .. فبإمكان المسافرين الانتقال والسفر بسهولة بين دولها وبلا جمارك أو أوراق لعدم وجود المراكز الحدودية بينها ..





صدقني لولا المجرمين وضعفاء النفوس ما كان حطوا مراكز من البداية طبعا من بعد قيام مجلس التعاون.

[الماليه]

على طاري المراكز الحدوديه
هل صحيح ان مركز سودانثيل بيفتحونه مره ثانيه والمرور بيكون للناس فقط والبضايع من سلوى
حد سمع شي عن هالموضوع

[ANONYMOUS]

طبعا الافضل بوسمره وهو المنفذ البري الوحيد لدولة قطر

بس ماتنلام السعوديه... كم مركز بري لها


مع قطر

البحرين

الامارات

اليمن

الكويت

الاردن


ومادري بالنسبه لسوريا والعراق وعمان وصوب مصر في مراكز حدوديه او لا

[وحيد-الشوق]

قمة التناقض مجلس تعاون ومراكز حدود وتفتيش

في اوروبا عندك فيزا اجر سيارة ودش كل دول الاتحاد الاوروبي بدون تفتيش وزحمه وخرابيط

[باراكودا]

مركز ابوسمرا فيه عيب واحد البوابة الأخيرة، وهو عنق الزجاجة التي يختنق منها الجميع .
شكرا لك ياخوي جاسم على هذا الموضوع اللطيف .

[ZURICH]

الحمدلله مركز ابوسمرا حاليا ماعلية كلام يشرف والمعاملة طيبه جدا

واغلب افراد مراكز الحدود البعيدة في الدول الخليجية وغيرها مو راغبين في اماكنهم لانها بعيدة

فــ طبيعي انه يمد بوزة وتكون نفسيته تعبانة ومالة خلق يبتسم .. ماعندهم الا المسافرين

يطلعون حرتهم عليهم

[بوخالد911]

بو سمرة الاول بلا منازع

وبعدين البقية

:)

[ابو علاوي]

أثناء سفري لسورية عن طريق البر
بعد ما أختم جوازي من مركز قطر واسمع كلمة توصل بالسلامة
اجي للحدود السعودية كأني مجرم
حتى باسمي ماينادون الا وينه السوري - ياسوري- يا.....
الاردن يطبقون عليك قوانين الدنيا لازم تنزل تختم جوازك ويسألك احيانا واحد من الأمن حتى تدخل ولازم يصيدك رادارين او3عالطريق
نجي لسورية تسمع الكلمات : اهلين بالشيخ والحمدلله عالسلامة ياشيخ حتى لو انت منت شيخ بتسمع هالكلام بعد ماتدهن .... وتختم وتدخل عالسريع
ونرجع بالعكس هههههه لنعيش كل المأساة الى ان تصل قطر وتحس فعلاً انك وصلت بلادك
اما الامارات والبحرين ماروحلهم الا طيارة

وشكراً لصاحب الموضوع

[الخزرجي قطر]

من واقع تجربتي لمراكز الحدود البريه بصفه مستمره وفي المناسبات والعطلات الاسبوعيه مركز ابوسمره بدون منازع وحتى بوابة الخروج شيء لايذكر مقارنة مع المأسي في المراكز الاخرى
(رسالة شكر وتقديرللفائمين على مركز ابوسمره والله يوفقهم ان شأالله)

[بنت^البحرين1]

صدقوني أحسن مركز مالينا احنا ..

والله ماشاءالله عليهم الموظفين البحرينيين ابتسامة دائمه .. ترحيب دائم .. في خدمة المسافرين بكل ترحيب

حتى احنا واحنا طالعين والا داشين يهلون ويرحبون ..

فديت بلادي والله

[الطيبة كلها]

بس حمامات الحريم الله يعزكم حدث ولا حرج اللي منكسر واللي خربان ولا صابون ولا فاين ولا تنظيف وهو مهم لان النساء والاطفال اللي يستخدمونه

[يراعٌ فراتي]

عندما تخرج من ابو سمرة متجها الى سلوى

تفكر متى ستنتهي معاناتك

والله اني سافرت عمرة مع حملة

نقعونا 8 ساعات

ومافي الاموظفين اثنين

اعتقد منفذ الحديثة افضل بكثيرررررررررررررررررر من سلوى
رغم كثافة الاعداد والضغط
ام الرقعي الافضل

[القحطاني505]

أبو سمرة الأول بلا منازع

[MoneyMaker]

تذكرت سالفة واحد اوروبي سافر بر سياحه للامارات وعمان.
وقت سألته اشلون كانت المعامله وكيف تشوف المراكز الحدوديه

قال اشوفها نفس اللي كانت عليه اوروبا في الستينيات من القرن الماضي
:weeping:

[فاروع]

انشاء الله جميع مراكز الحدود يستيفيدون من الاجتماعات اللي تصير بخصوص منافذ مجلس التعاون

[Xx QATARI xX]

مشكور على موضوعك

من خلال تجربتي ،، الكل ماعليهم قصور ،، قطر ،، الامارات ،، السعوديه ،، البحرين

الموظف بالساعات على الكرسي ،، بيضحك حق من ولا من ،، ويمكن المسافر اللي قبلي صارله موقف وياه ونرفزه ،، لانه فيه ناس الصراحه مايحترمون انفسهم

المعامله في المراكز السعوديه تغيرت بوايد عن قبل سواء سلوى او البطحا

دايما الناس اتكلم عن المنظر الجمالي للمركز ،، خلونا في المهم والي هو الجانب التقني ،، وعلى سبيل المثال ،، اذا دخلت مركز الغويفات يستقبلك جهاز متطور يفحص السيارة عن عدة اشياء ( ماعرف شنهي بالظبط ) وعقبها اتكمل اجراءاتك للدخول
انجي مركز بوسمره ،، اعتقد قبل لاتدخلون المركز شفتو الجهاز في المدخل واللي قبله مطبات
للاسف على كلام موظفين ،، ان الجهاز قيمته ملايين الملايين ،، ولكن للاسف مايشتغل ؟؟
الايجابيات والسلبيات موجوده لكن كل واحد له نظره في شي معين .


والموظف اللي يقدم خدمة للجمهور عليه ضغط مب طبيعي ،، الكل له حق ينتقد ،، لكن
حط نفسك مكانه

تحياتي

[بوحارب]

مركز الدوحة ممتااااااااااااز من كل النواحي

وياريت باقي مراكز الخليج تصير مثله :) وخاصة مركز سلوى !!!!

وصح السان المرزوقي على هالمقال الحلو

[العضو العتيج]

اذا وصلت بوسمره تحس انك نزيل في فندق وتحس باهتمام لكن الكاتب نسى جسر الملك فهد وجوه يوم اذن عليها غبرة

[إينشتاين]

من مشاركاتي في موضوع سابق:




الصيف الي راح كنت مسافر بالسيارة مع هلي من المانيا للنمسا وشفت الويل في المراكز الحدوديه بينهم،،

تصدقون ،، خمس ساعات في المركز الألماني وأربع ساعات في المركز النمساوي !!!!

موظفين الجمارك يفتشون السيارة برغي برغي ويفتحون الشناط كلها ويطلعون الي فيها ويفتشونه كله ،، وفي الساعة الوحده مايخلصون إلا ثلاث أو أربع سيارات.

والي يقهرون موظفين الجوازات،، قاعدين يسولفون مع بعض ومخلين الناس تنتظر،، ويوم كلمتهم وقلت لهم أنه صار لنا ساعات ننتظر رموا الجوازات في وجهي،، وقالوا اذا زعلان روح اشتكي،، ودورت حد اشتكي عنده قالو هناك مكتب المسؤول،، يوم دخلت عليه لقيته حاط الفطور على مكتبه ومجمتعين عنده الربع يتريقون ويسولفون،، وقالي مالك عندنا سنع،، خل الموظف يخلصك ماعندي صلاحيات وماقدر اكلمه هذي شغلته وهو كيفه...

المهم بعدين اكتشفت أن مراكز الجمارك بين الدول الأوروبية كلها بنفس الطريقة،، يعني الواحد يتعذب في السفر بالسيارة بين فرنسا وسويسرا والمانيا وايطاليا وكل هالدول،،

والأسباب معروفة بالطبع،، لأن هذي الدول صار بينها حروب عالمية ومات منهم الملايين وللحين حاقدين على بعض.
وكذلك لأن لغتهم مختلفه، فهناك الأنجليزية والألمانية والفرنسية والأيطالية، يعني كل دولة لها لغة غير عن لغة جارتها.
ومن الأسباب كذلك، هو اختلاف اديانهم، ففيهم مسيحيين, وفيهم يهود, وفيهم ملحدين، وكل ديانة فيها مذاهب مختلفه مثل الكاثوليك والبروستانت وغيرها.

صراحة اتمنى انهم يتعلمون من دول الخليج الي دينهم وواحد، ولغتهم وحده، وتاريخهم واحد، وعاداتهم وحده.
*



...

[الـقـاسـي]

بصراحة مركز بوسمرة افضل المراكز الحاليه لانه اجددهم .. يعني لاتنسون ان مركزنا ماله الا كم سنه والمراكز الباقيه من سنين طويله يعني مافي وجه مقارنه بينهم لو بتقارنون صح قارنوا مركز قطر القديم بالمراكز الباقيه لانها بنفس العمر تقريبا ..

مركز سلوى والبطحاء انا ماحس اني مرتاح الا لما اعديهم ولا وصلت لحدود الامارات تختلف المعامله ماعمري قد تضايقت من شي في مركز الامارات ولاقد تنقعت فيه بالعكس الا من كثر ما امر منه صرت اعرف فيه كم واحد ..

[نجم سهيل]

السلام عليكم

الحمدلله رب العالمين .. من الغويفات للبطحا لسلوى لبوسمرة لجسر الملك فهد ماعمري قد ضيق علي حد فيهم

كنت بروحي
ولا مع ربعي
ولا مع هلي

ماشفنا منهم الا كل خير
واخر مرة من شهر في منفذ سلوى .. كان رقم سيارتي نصه معلق ونبهوني الاخوة هناك
وماخلوني أطلع من عندهم الا وهم مثبتين لي الرقم وانا طالع ..

وش الضيقة اللي تجيه المرزوقي لما يشوف سيارته تمشي من غير تفتيش وسيارة مواطن هذي الدولة نفسها يتفتش على الراحة ؟

بالنسبة لي ماقد حسيت بأي ضيقة من أي معاملة .. الضيقة اللي تجيك من زحمة نهاية الاسبوع فقط!

[مساهم عادي]

في الحالات العادية ولما مايكون هناك زحمة ... مركز سلوى اسرع في انهاء الاجراءات من جواز واستمارة وتفتيش وتامين ...خصوصا ختم الجواز سريع جدا عندهم... مجرد انه يحط رقم الكمبيوتر الخاص بالجواز ..ويضغط انتر .. خلص الموضوع ....

اما في بوسمرة هناك في مشكلة تأخير واضحة في كاونتر ختم الجوازات .... الموظف او الموظفة يقعدون يطقطقون في هالكمبيوتر لين ما تطلعه روحه !!! واذا السيارة اللي قدامك فيها عائلة ... عادي تتنقع 10 دقايق!...........

لكن بشكل عام وفي اغلب الظروف وخاصة وقت الزحمة ... مركز ابو سمرة احسنهم هو والمركز البحريني على الجسر...

اما مراكز الإمارات .... فالتأخير عندهم اجباري... سواء بزحمة او بدونها....

[باسكن روبنز]

راحت آيــآآمه مركز الغويفـآآت ،

ومعاملــة موظفيــن جسـر الملك فهــد طيــبه وفيهــآآ آحترآآم ،

في ملآآحــظه ع تعآآمـل الموظفيـن بشكـل عــآآم بجميـع المــرآآكـز ،

شخصيــاً آحـب آعطيهم الجواز والآوراق بيدي اليميــن وآبتسـآآمه ،

ولي رديت الســلآآآم ع حد ومارد علي بالمثـل آول ماخذ الجــوآآز منــه بيدي اليســآآر وبدون شكــر ولا يعطيــك العافيــه ،

وآسمعه الهــدرز وآنا رآآيح ،:shy:

ومركز بوسمــره ،

شيـــخ المـــرآآكـز وكفايــه الــوآآحــد يحس برآآحـه نفسيــه من يشـوف مدخــل المــركز وتعــآآمل الموظفيــن ولا آروع ،

الله يعطيهم العآآفيــه ،:nice:

[R 7 A L]

احس بضيقة كل ماتذكرت مركز سلوى
و المواقف الغير طيبة الى قد صار لي فية من تعطيل وتاخير وتعب غير طبيعي