((( هل تمتلك/ين القدرة على الأستغناء عن الخدم ؟؟ )))

[مشاكل]

السلام عليكم ورحمة الله وبركاته



(((الخدم))))

وكما يقال دائماً

شرٌ لابد منه

غزوا البيوت

واصبحوا جزء لايتجزاء من أفراد العائلة

حل بابو محل الأب

وحلت ميري محل الأم

تفككت على اثرهم الروابط الأسرية

تلاشت اواصر الألفة

واتسعت الفجوة بين افراد العائلة

فـفُـقِد الجو الأسري

والخاسر الأكبر بلاشك هم الأبناء

مهما بلغ التعويض مقابل ذلك التقصير

السؤال

هل تستطيع أخي العزيز الأستغناء عن بابو والقيام بتحمل كافة الواجبات تجاه اسرتك على أكمل وجه ؟

هل تستطيعين أختي الفاضلة الاستغناء عن ميري وتحمل واجابتك تجاه أسرتك على أكمل وجه؟

[اسعاف]

لا
ما دامت ام العيال تشتغل

[الوان]

نعم و بقوة

استغنيت عن السايق

و انتظر بس كم سنه و يكبرون بناتي عشان استغني عن الخدامات

[Abdulraman]

في الوقت الحاضر ومع اهانة المرأه اقصد حقوق المرأه وعملها صعبة

[سوق واقف]

الحمد الله ما عندي سايق ولا عمري جبت ليس من باب البخل لا والله ولكن لأنه غير محرم

وضد أيضا سواقة المرأة للسيارة

وعندي خدامة وحده فقط . . . .
والحمد الله أقوم بكل متطلبات البيت سواء توصيل الأطفال أو الزوجة وتخليص كل شيء في البيت ولا أرضى أن يحل أحد مكاني مثل السائق. . .

وللعلم عشان محد يقول الشغل وما يقدر والله أنا أشتغل وللعلم بعض الأوقات أضطر أوصل الزوجة البيت عقب ما تطلع من الدوام وأرجع الدوام مرة ثانية وللعلم الدوام في الدوحه والبيت في الخور . . .

أوقات انزل الدوحه أكثر من خمس مرات . . . . .

[بنت قطريه]

انا صار لي متزوجة 4 سنوات وماعندي خدامة وانظف بيتي واغسل الثياب واكوي وارتب ونفس الوقت اشتغل .... والصراحة صج تعب وطول اليوم اقعد اشتغل بس الحمد لله ربي يعين بس لما حملت تبهدلت لاني كان لازم انام على ظهري طول فترة الشهر الثاني وتضايقت لان ماعندي حد يساعدني في شغل البيت والحمد لله نعمه من ربي اني اقدر انظم وقتي وسويت لي جدول يويم وجدول اسبوعي فيه كل شي ولله الحمد .... يعني كنت محتاجه وحاليا افكر اجيب خدامة بس متردده يمكن احتاجها بس علشان تكوي الثياب والله لان ماعندي وقت احيانا مع اني واالله منظمة وقت يعني احيانا الساعه 10 في الليل ابتدي اكوي علشان الثياب ماتتراكم ... والله المستعان.... بس عن السايق مااقدر استغني عنه لان زوجي مايرضى اسوق وانا اصلا ماابي اسوق وزوجي دوامه يختلف عن دوامي يعني لازم يكون بدوامه الساعه 5 الفجر وشلون بيوصلني ؟؟؟؟ وحاولت يوصلني اخوي الاصغر بس بعد عنده التزامات فلهسبب السايق موجود بس والله استخدامي له بسيط والحمد لله اموري ماشيه

[سونيتا]

لا ما أقدر صعبه

[hxamad]

منى واحد بخصوص الدرول ماعندى ولا افكر أجيب درول ريال مرة يمكن وبخصوص الخدامة الحريم مب مثل أمهاتنا الحين غير المرة مب فاضية بمعنى فاضية بس ماتبى تسوي شي متكسلة او تبى تقلد صديقاتها ام الحريم ألى يشتغلوون او يدرسون صراحة محتاجين لخدامه

[ثرية]

لا لاني ماحب اخم واغسل واكره الكواي

وماحب غسيل للصحون ونشر الغسيل

[نور الحور]

بصراحة ما أقدر أستغني عن الخدامة خصوصاً ..
جربت قريب السنة بدون خدامة وكنت حامل ولازم ما أتحرك لأن وضعي فيه خطورة ..
بس هلكت هلكت بمعنى الكلمة ...
السايق جبناه بعد مادخلوا العيال المدارس ومع الزحمة صعبة زوجي ياخذنا ونرجع في وقت مناسب للبيت خاصة مع الزحمة ..

الخدم والسائقين بالنسبة لي شر لابد منه .. والله ييسر للجميع خدم وسائقين عيال حلال طيبين ويكونون لهم باب للثواب والأجر..
الحياة معقدة ومسؤولياتها ومتطلباتها كثيرة .. مو مثل أيام جدودنا كلها بساطة ..
والزمن متقارب .... اليوم يطير .. لو اشتغل وأرد أكرف بالبيت صراحة بيكون هلاك وما بيصير للحياة طعم من التعب :)

[الحياة كلمه]

في الوقت الحاضر ومع اهانة المرأه اقصد حقوق المرأه وعملها صعبة

تسمي عمل المرأه اهانه:eek5: خير ان شاء الله .من متى كان العمل اهانه سواء للريال او المره.
والله اعرف حريم البيت كله قايم على معاشهم.
الله يسامحك
نسيت اجاوب عالسؤال
ممكن في حال اذا المره ماعندها وظيفه وعدد افراد عيلتها صغير.ولايمكن اذا كان العكس.

[بـــــــنت النوخـّــــذه]

السلام عليكم ورحمة الله وبركاته



هل تستطيعين أختي الفاضلة الاستغناء عن ميري وتحمل واجابتك تجاه أسرتك على أكمل وجه؟


[/color]

في بدايه حياتي يعني بيت فيه (نفرين ) ممكن :omen2:

اما عيال وبيت وكثرة المسؤوليات صعبه اشوي :(

على فكره لايعني الاستعانه بالخدم ان (كل ) ربة منزل مهمله 00ترى يعتمد على حسب توجهاتها وعقليتها ونظامها في مملكتها

[بنت صقار]

في بدايه حياتي يعني بيت فيه (نفرين ) ممكن :omen2:

اما عيال وبيت وكثرة المسؤوليات صعبه اشوي :(

على فكره لايعني الاستعانه بالخدم ان (كل ) ربة منزل مهمله 00ترى يعتمد على حسب توجهاتها وعقليتها ونظامها في مملكتها

نفس رأيي:shy:

[khalid-qtr]

نعم اخوي نقدر نستغني عنهم

بس لازم ولازم ولازم كل اسرة في قطر تستغني عن الخدم يعني خلاص يمنع جلب الخدم تدري ليش بقول لك غمض عيونك وتخيل كل البيوت الي حول بيتك بدون خدم راح كل وحدة وكل شخص يأدي واجبة على اكمل وجة وبتقل الزيارات الي مالها داعي مثل تجمعات الشباب في المجالس من غير هدف وسهر وبتقل طلعة الحريم للسوق وتجمعات في بيت فلانة للحش بتكون في زيارات لكن مثل قبل عصر جدك وجدي زيارات لها اصولها بمناسبات او للوصل ام بروح بيت رفيجتي رفيجاتي متجمعين او بنروح سينما او سوق هذي هي الي تسبب التفكك الام لهية برفيجاتها والموضوة والمقاهي والاب لهي في السهر مع ربعة او السفرات الي مالها داعي والضحية البيت والاولاد

الله يكون بالعون ان شاء الله

[Abdulraman]

تسمي عمل المرأه اهانه:eek5: خير ان شاء الله .من متى كان العمل اهانه سواء للريال او المره.
والله اعرف حريم البيت كله قايم على معاشهم.
الله يسامحك
نسيت اجاوب عالسؤال
ممكن في حال اذا المره ماعندها وظيفه وعدد افراد عيلتها صغير.ولايمكن اذا كان العكس.

:rolleyes2:

[Nojoom]

لا لاني ماحب اخم واغسل واكره الكواي

وماحب غسيل للصحون ونشر الغسيل

@@

شكلج ماتحبين تسوين شي كلش


الوحده الي مالها دور في البيت بكره غابت عنه بيكون غيابها غير مؤثر

[بنـ الدحيل ـت]

لا خادمة ولا سائق
الحمدلله
كل شيء اعمله بنفسي
الله يسعدكم

[بوحسن606]

الدريول ممكن الاستغناء عنه بس الخادمه لا صعبه وايد

[مريومة]

بكل فخر :nice:

اقدر استغنى عنهم:)

[عنابي وابيض]

الله لايحوجنا لهم

اذا البيت كبير يس ممكن

بس انا استغرب من اللي مع زوجها فالبيت وتجيب خدامه؟؟؟؟لييييييييييييش

والا اللي مايبي مرته تسوق بس يجيب لها دريول؟؟؟؟؟؟؟؟؟؟؟؟؟؟؟

الحضانات ياكثرها ادفع بيزتين زياده ولا اجيب وحده اخليها في بيتي مع عيالي بروحهم

واسجل عيالي باصات ولا اجيب لهم دريول من بلد الله يعلم شلون كان عايش فيها وامن على عيالي معاه

الله يعينا

[intesar]

بصراحة شر لا بد منه

العيال كل واحد بمدرسة
الزوج الله يعطيه العافية والصحة دوامين صبح ومساء
وأنا دوام صبح وغير تدريسهم بعد الظهر وخصوصا انهم توائم يعني

شر لا بد منهوياريت اقدر استغني عنهم لزني طول الوقت خايفه منهم وعايشه برعب انهم ممكن يسوون شي بعيالي

[نجمة في سماه]

بالنسبي لي الحمدلله ماعندي دريول ولا افكر اصلا اني اجيب الحمدلله انا أسوق ومشاويري بسيطه جدا وبوا اعيالي مب امقصرالصراحه , أما الخدامه فأنا بديت حياتي الزوجيه من غير خدامه وجبت ثلاث إعيال من غير خدامه انا الي اغسل واطبخ وانشر الغسيل واسوي كل شي الحمدلله الوالده ما قصرت علمتنا كل شي من الصغر بس في الوقت الحالي أنا مضطره انه يكون عندي خدامه لأني موظفه وعندي ياهل اصغير في البيت والشي الثاني والأهم صحتي مب مثل قبل عندي إصابه في اليد والظهر وأنا ممنوعه من الشيل والحط مثل قبل ... الحمدلله على كل شي....بس الصراحه قبل كنت واييد مرتاحه من غير الخدامه بس شاسوي للضرورة أحكام ولا أنا الصراحه بودي استغني عن الخدامه اليوم قبل باكر!!!

[مشاكل]

كل الشكر والتقدر للأخوة والأخوات على مشاركتهم واثرائهم للموضوع

واحب احيي كل رجل وكل أمرأة أستطاعوا ان يكيفوا حياتهم بعيداً عن الأستعانة بالخدم

وكذلك نلتمس العذر لكل من اجبرته ظروفه على الأستعانة بهم وبالأخص النساء العاملات واصحاب الظروف الخاصة

دمتم بود

[شيخ القبيلة]

نعم و بقوة

استغنيت عن السايق

و انتظر بس كم سنه و يكبرون بناتي عشان استغني عن الخدامات

:::victory::victory::victory::victory::victory:

[Doha Sun]

مستحيل

[قطريه ماركه]

هل تستطيعين أختي الفاضلة الاستغناء عن ميري وتحمل واجابتك تجاه أسرتك على أكمل وجه؟

لا استطيع ، صعب ...

[بوخالد911]

كلا

من الصعب جدا


20/1/2011

[latty]

لا والف لا

[basma222]

هل تستطيعين أختي الفاضلة الاستغناء عن ميري وتحمل واجابتك تجاه أسرتك على أكمل وجه؟
الاجابة نعم نعم نعم

من 14 سنه ما عندي خادمه وكنت موظفه في وزارة التربيه وعندي اطفال بس عرفت انظم وقتي واخدم اسرتي والحمدلله للان مستمرة في خدمتهم

[بو رااكان]

مستحيييل استغني عن السايق لظروف دوامي ودوام المدام

[الـقـاسـي]

ياجماعه انتوا متخيلين ان المراه لما تطلب خدامه ترى مب نوع من الدلع انا اتكلم في حال وحده مب ثلاث او اربع نفس بعض الناس اهما كلهم اثنين وخداماتهم اربع ..

يعني لو كانوا في شقه او قسم في بيت اكيد مراح يحتاجون خدامه اما بيت مثل بيوتنا مستحيل تلحق المراه على شغل البيت لحالها

[ahad]

الحين خدامتي مسافرة متلعووووووووووووووووزة ومتبهدلة

مادري افضى للعيال وطلباتهم الي ماتخللص والا اطبخ والمواعين و الواجبات الاجتماعية ,حاله والله

حياتي من غير خدامة (( سلطة ))

[لافوشيا]

اي اكيد استغنى عنها بكل اريحيه

عاااااادي ماراح اموت

[ROSE]

ماعندي خدامه ولله الحمد

مرتين في حياتي جبت خدامات وتحسفت ومايتمون شهر عندي وارجعهم


مادري ليش مااقدر اعتمد عليهم حتى لو انا بنفسي اباشرهم

فصرت ماحب اجيب اي دخيله على بيتي وعيالي تطبعوا بطبعي

[حسن]

ماعندي خدامه ولله الحمد

مرتين في حياتي جبت خدامات وتحسفت ومايتمون شهر عندي وارجعهم


مادري ليش مااقدر اعتمد عليهم حتى لو انا بنفسي اباشرهم

فصرت ماحب اجيب اي دخيله على بيتي وعيالي تطبعوا بطبعي

ياروزانتي من الانواع النادره في ذا الوقت الحالي وبينظرونلك الى حواليك باستغراب

[meeemz]

انا امنيتي اني اعيش من دونها لكن الزوج له دور في بقائها او التخلي عنها لانه ما يبي يرجع البيت يشوف زوجته مكروفه ومكشره صدقوني صعب اشتغل واحافظ على ابتسامتي والرجل مستحيل يكتفي بطفلين او 3 على غرار الاجانب لا يبون 4 و5 و6 وطبعا ما يرضى تسوق وعنده شغل ما يقدر يوصل مرته وما يرضى يعيش في شقه يبي بيت وحديقه الخ من الحلم القطري اللي كلنا نحلم فيه ..
عن نفسي ودي استغني عنهم لانهم مصدر قلق دائم يطالعونا في كل شي كله اخاف منهم الا اخاف تضرب اليهال او اخاف ماتغسل عدل او اخاف تتعرف على هندي ادخله بيتنا واخاف تبوقني ادري اني موسوسه بس لاني شفت منهم اشياء اعظم ..احس طبيعي اوسوس .. بقول بمشي نفسي من دونها لكن الحياه مستحيل تكون بنفس الطريقه ..اول شي بضطر اسوق لمشاويري .. لانه الخدامه هي اللي توصلني ..الشغل بطلع منه او بدخل عيالي حضانات (امي مستحيل تستقبل اليهال من دون خدامه )..بقول لحياتي الاجتماعيه باي باي .. مستحيل ارتاح لانه كل في مخي انه وراي شغل اما صحون او ملابس يعني الشغل ما يخلص ما فيه راحه واحتمال يستنزف من طاقتي ويخليني كشره وعصبيه على اتفه الامور الملابس بتكون اما محترقه او طاير لونها او متلونه بلون اخر (عارفه هالشي شخصي بحت وهو اني فاشله في الغسيل )..اهمال للاطفال بسبب الانشغال عنهم ..
في المقابل بحس بخصوصيه اكثر .. باخذ راحتي في المشتريات (لانه الخدم بس شغلتهم يرتزون عن الكاشير ولما نرجع البيت تصير قصتهم لبعض بكم خذنا وشكر شرينا وشكثر كلنا ) ما بحاتي عيالي
مب حارقه اعصابي مع الخدامه اذا ما اشتغلت عدل او اذا تهربت من مهامها او اذا كان غسيلها اي كلام ..

انا عشت من دونها لما كنت مغتربه .. وكان البيت حوسه بس كنت مرتاااحه ..
لو فكرت بس مجرد تفكير اني استغني عنها كل الناس اللي حولي بيعتبروني مينونه
وسؤال للي قالوا ما عندهم .. انتي من صجكم ؟! ويينكم ؟ ماعرف حد ماعنده ولا شفت قطريين ما عندهم خدامه سواء في دوامي او في حياتي !!

[meme~qatar]

مستحييييييييييييييييييييييييييييييل <<<< بعين حمرة

لما اكون موظفة وعندي زوج خمس اطفال وشغل البيت هذا يعني احتاج 60 ساعة في اليوم علشان البي طلباتهم

وهذا لا يعني ان تكون المرأة مهملة .. يعني الخدامة حق ( الديرتي وورك ) غسيل الملابس وتنظيف البيت والمواعين والمسح ... الخ <<<< يعني لاحظوا الخدامة ماتربي بل تعمل وتعتني بالنظافة تحت اشراف ربة البيت

اما تدريس الاطفال اكيد انا

اما الدريول بعد ماستغني عنه .. مثلا اذا احتجنا شغلة بسيطة من الجمعية او الدكان او مطراش حق حد مش معقولة في هالحالة اطرش زوجي الدريول هو اللي يقوم بهالعملية .. وكذلك اذا كان الزوج ينتهي دوامه الساعة 3 او 4 متى بيوصلنا انا والعيال من والى العمل والمدرسة خصوصا اذا كان شغله في الشمال واحنا مدارسنا في الدوحة .. وطبعا ماترك الاطفال بروحهم مع الدريول بل اشرف عليهم شخصيا واتطمن عليهم واروح الدوام

والله يعين الجميع


نسيت اقول ان الخدم موجودين منذ القدم وحتى الرسول صلى الله عليه وسلم كان عنده خادم .. وكذلك امر الزوج بان يحضر من يخدم زوجته خصوصا اذا كانت في بيت اهلها عندها اللي يخدمها


في الاخير ياميري ويا بابو الله لا يحرمنا منكم وانتوا شر لابيد منه

[بصمة قطرية]

هل تستطيعين أختي الفاضلة الاستغناء عن ميري وتحمل واجابتك تجاه أسرتك على أكمل وجه؟



للأسف لااااء ..
جربت ثلاث شهور من غير خدامة وهلكت ..
فعلاً هلكت بمعنى الكلمة لدرجة اني ما كنت أحصل وقت للأكل ..!!

الشغل ما يخلص ..
والخدامة راح تساعدني في شغل البيت ..
اللي عندها عيال صغار تحتاج خدامة تساعدها ..
ومثل ماهم معروف هم شرٌ لابد منه ..

[باسورد]

طبيعي مايقدرون المنتدى ماخذ وقتهم

[ahad]

طبيعي مايقدرون المنتدى ماخذ وقتهم

:omg: :omg: :omg:

الله يسامحك..هذي نظرتك عنا يعني..النت للترفيه بس ومرات تمر ايام ماندش..شدخل يعني :(

[بصمة قطرية]

طبيعي مايقدرون المنتدى ماخذ وقتهم

مش عيب ولا غلط ولا حرام ..!!

[meeemz]

والله انه فيه ردود مستفزه كلها تعميم .. منها اللي ذكر انه النسوان ماعندهم الا الحش :anger1:؟! فيه عندنا سوالف اخرى تخلو من الحش مثل اليهال الحمل والولاده ، الرجيم ، السوق ، الرياضه التلفزيون الخ صحيح انه المواضيع مب عميقه لكنها اساسيه وتخلو من الحش:ok2:
وشي بعد الرياييل يحبون يعممونه وهو انه اذا الوحده عندها خدامه طبيعي هي بتكون المربيه ، احنا نعتمد عليهم وقت الطلعات يمسكونهم و الاغلب هو انه الخدامه مجرد مساعده في البيت

[ام السعف]

اممم

جربت بداية السنة السابقة ،، شغل البيت ابدا ما كان فيه مشاكل
لكن المشكلة اني ما قدرت الحق على متابعة العيال في الكثير من الأمور،،
فمن جذيه وجود الخادمة وفر علي الكثيير من الوقت ،،

لذلك شخصيا ما استغنى عن وجودها في ظل وجود من يستحق متابعة مني ،،

[ms-qtr]

صعبة صعبة صعبة
ودام الله عطانه نعمه ليش نضيق على نفسنه
ووجود الخدم مب محرم دينيا أو شي
دائما نسمع القصص السلبية لكن في كثير من الخادمات ما يضرون حد