تجزئة الاسهم

[الغشيم]

:D شباب اللي يفهم يفهمنا بخصوص تجزئة الاسهم وش تفيدنا فيه وبعدين انا اللي فاهمه ان السهم ينقسم على عشره يعني ماسوينا شي مثل اللي عنده عشرة ريالات نوط وبعدين سواها خرده ريال ريال فالقيمه وحده هي عشر ريالات يعني لو عندي الف سهم في شركه بيصيرون تقريبا عشرة الاف سهم لكن صغار في النهايه لو جمعتهم نفس القيمه ماسوينا شي :con2: والله يا الربع انا ماني مقبض شي من سالفى تجزئة الاسهم بتقولون علشان صغار المستثمرين ؟ اقول لكن طيب ممكن هو يشتري الحين مثلا عشرة اسهم احسن مايوجع راسه ويشتري مية سهم وهي نفس القيمه :D ادري لخبطكم بس والله انا بعد متلخبط ........ :con2:

[Banana]

ماذا تعني كلمة تجزئه ؟ماهي فوائدها ومردوداتها الايجابية والسلبية ؟ ادخل لتتعلم س1 / ماذا يقصد بتجزئه الاسهم ؟؟ج1/ تجزئه الاسهم هي قسمه السهم الواحد الى كذا جزء ممكن يقسم السهم الواحد الى
( سهمين , ثلاثه اسهم , اربعه اسهم , خمسة اسهم , ..... , خمسين سهم )
وكلما كان التقسم اكبر كلما كان من صالح السوق في الوقت الحالي وبالذات مع تدفق السيوله المتوقعه من المستثمرين الاجانب وذلك بعد السماح للخليجين بتملك الاسهم بدون قيود وسيولة المواطنين وبالذات بعد اقبال الملايين من المواطنين على الاكتتابات الجديده ودخولهم بشكل أو بإخر في سوق الاسهم .

وللمعلوميه القيمه الاسميه الحاليه للاسهم 50 ريال للسهم ... ما عدا سهم بيشه الزراعيه القيمه الاسميه 100 ريال للسهم

مثال1 // لو تمت التجزئه على خمسة اسهم
بالتالي القيمه الاسميه للاسهم تصبح 10 ريال بدلا من 50 ريال للسهم وعدد الاسهم يتضاعف خمسة مرات
وربح السهم السنوي يقسم على خمسة وسعر السهم في يوم الاحقيه يقسم على خمسة ... يعني لم يتغير شي

مثال2 // لو تمت التجزئه على 50
بالتالي القيمه الاسميه للاسهم تصبح ريال بدلا من 50 ريال للسهم وعدد الاسهم يتضاعف خمسين مره
وربح السهم السنوي يقسم على خمسين وسعر السهم في يوم الاحقيه يقسم على خمسين ... يعني لم يتغير شي

س2 / ما هو الافضل لوضع السوق الحالي وللاسهم بالمستقبل القسم على خمسة أو على خمسين ؟؟؟

ج2 / الافضل من وجهة نظري ان تصبح القيمه الاسميه ريال بدلاً من 50 ريال افضل
والسبب المهم والقوي انه بعد التجزئه يكون سعر الاسهم بالقاع ( لا يوجد مخاطره ) , مثال لو قلنا ان سعر السهم
150 ريال قبل التجزئه بعد التجزئه يكون ريالين في ارخص من كذا سهم في ظل توقع لتدفق سيوله جديده للسوق .

س 3 / ما هي فوائد التجزئه ؟؟؟

ج3 / فوائد التجزئه كثيره منها
- توسيع قاعدة المستثمرين في السوق واتاحة الفرصه للجميع بتملك الاسهم التي كان من الصعب امتلاكها
قبل التجزئه بسبب ارتفاع سعرها لذوي الدخل المحدود .
- ارتفاع اسعارالاسهم عند الاعلان عن التجزئه مثل ما حصل مع شركة مكه والقصيم الزراعيه
وذلك بتوقف العرض وزيادة الطلب .
- بالتجزئه تزداد اعداد اسهم الشركات الجديده المطروحه للاكتتاب العام وبالتالي يكون التخصيص
والاستثمار وقتها مربح .
- دخول سيولة جديده للسوق بدخول المستثمرين الجدد .

(( الفائده الاساسيه هي التقليل من المخاطره ودخول سيولة مستثمرين جدد ))

س4 / ما هي سلبيات التجزئه ؟؟؟

ج4/ في حال تمت التجزئه على 50 ريال واصبحت القيمه الاسميه ريال بدلا من خمسين ريال
تكاد السلبيات تتلاشى تقريباً لانه لن يتغير الشي الكثير في وضع السوق سواء الحد من المخاطره وهذا شي ايجابي.

اما في حال تمت التجزئه على خمسة مثلا فإن المخاطره لا تزال موجوده
ولن يستطيع كل المواطنين الدخول بالاسهم السعوديه وبالتالي ممكن السيوله المتوقع تدفقه للسوق تقل
ومثال على ذلك سعر سابك 2000 ريال بعد التجزئه 400 ريال لازالت بعيده المنال عن الكثير ممن هم
في السوق اصلاً .

س5 / ما هي المعايير التي يمكن تساعد على اختيار الاسهم للتجزئه المرتقبه ؟؟؟

ج5 / الشركات الاقل عدد اسهم وتشهد تطور ملحوظ في ارباحها السنويه التشغيليه والاقل تضخم في وقت الاعلان
عن التجزئه والاسهم التي يوجد لديها محفز في الوقت الحالي مثل زيادة راس المال لانه بعد انتهاء
محفز التجزئه لديها يبدأ محفزها الاخر وهو زيادة راس المال .

س6 / من الذي يقر التجزئه ؟؟؟

ج6 / مجـــــــــــلس الـــــــــوزراء .

00000000000000000000000000000000000000000000000000 0000000
نقاط مهمه جداً يجب ان تكون واضحه للجميع

1- التجزئه لا تحل مشكله التضخم ابداً وانما تقلل من نسبه المخاطره .

2- التضخم موجود دائماً قبل وبعد التجزئه والحل الوحيد لها من وجهة نظري زيادة عدد الشركات في السوق
بيع اسهم الدوله يعني شفط السيوله وتوزيعها على اكبر قدر من الشركات .

3- كلما كان الشراء من الاسفل ( القاع ) كلما كان نسبة المخاطره اقل بعد التجزئه والعكس صحيح
كلما كان الشراء من الاعلى كلما كان هناك احتمال مخاطره بعد التجزئه .

4- التركيز بشراء الاسهم التي لم تطلع كثيراً قبل اعلان نية التجزئه .

5- كلما كان تقسيم السهم اكثر كلما قلة نسبة المخاطرة في التعامل مع الاسهم
و افضل التجزئه على خمسين لتكون القيمه الاسميه ريال واحد فقط بدلاً من 50 ريال وبهذه الطريقه نقطع
الطريق على الهوامير وصناع السوق من التلاعب بالخبر بشكل عكسي ونقلل نسبة المخاطره .

6- التجزئه ضروريه جداً في وضع سوقنا الحالي و بالذات مع دخول نسبه كبيره من المواطنين بالاسهم
بشكل أو بإخر ( عن طريق الاكتتابات الجديده ) للحد من نسبة المخاطره , وايضا ًعند الاكتتاب بإسهم
شركه جديده قليله الاسهم مثل ( سدافكو 2 مليون سهم تقريباً ) ووصل عدد المكتتبين فوق 2 مليون مكتتب !!!

[سهم طايش]

يعني اذا بتحط طلب

تقولهم مثلا حطوا لي امر شراء 70 واثنعشرانه سهم

و الله انا مثلك غشيم يا ريت حد يعلمنا بالتفصيل الممل

[الغشيم]

تدري عاد يا سهم طايش انا اللي مافهته الحين من المقال هو كيف تخف نسبة المخاطره في السوق ويعني كيف الهومير مايقدرون يتحكمون في السوق ؟؟؟؟؟؟ يعني بدال ماكان الهامور يشتري 500 الف سهم في شركه مثلا بيشتري 5 مليون سهم وبيصيرنفس الشي صح والا انا فاهم غلط؟ ابغي حد يفتح مخي لي :court:

[ابوعلي اليافعي]

اخوي الغشيم افضل ميزتين لتجزئة الاسهم اولا- ان التجزئه تساعد الاسهم ذات القيمه العاليه معاودة العود من جديد والارتفاع الى اسعار اعلى واسرع من سعرها السابق خاصه الاسهم التي تعدت المئات يعني السهم الي الحين ب300 سيصبح ب30ريال هذا الامر يشجع على رفع قيمة السهم بسبب نظرة المستثمرين لسعره الرخيص...ثانيا-تشجع اصحاب رؤؤس الاموال المنخفضه على دخول السوق والشراء لان الاسعار ستكون منخفضه وسيتمكننون من شراء كميات اكبر باموالهم. يعني تخيل الان ال 100الف ماتجيب لك اكثر من 350سهم فالدولي لكن ان تمت التجزئه واصبح السهم ب30فيمكن ان تكون الكميه 3500سهم..صحيح ان التيجه هي هي لكن الكميه ستشجع الكثير على دخول السوق والشراء في هذه الاسهم الي فالسابق كانوا ينحرجون من الشراء فيها ويتخوفون لغلاء سعرها.ولا ننسى ان الاسهم القطريه قد تم تجزئتها قبل اكثر من خمس سنوات حيث كان بنك قطر الوطني ايامها ب600ريال ولو استمر دون تجزئه كان سعره الحالي بيكون 3000ريال بدل300..هذا مثال وقس عليه بقية الشركات ..ويعطيكم العافيه

[الغشيم]

يعني الموضوع اكثر شي نفسي صح؟؟؟ الله يعطيك العافيه يا ابو علي اليافعي وشكر على سرعة الرد

[qatari1]

صح أخوي الغشيم الموضوع نفسي لا أكثر ولا أقل...
يوهم الصغار إنه سعر السهم رخيص إذا كان بـ 30 ريالا مثلاً، بينما كان سعره 300 ريال قبل التجزئة وبيشوف سعره غالي...
مثال بسيط لو في جيبك 500 ريال ورقة وحده..
أو في جيبك 50 ورقة فئة 10 ريال
بتحس بوكك في المثال الثاتي منتفخ أكثر، واللي ما يدري يقول فلوسك وايد:)
بينما في الأول بتحس بوكك فاضي...
بس في الأخير المحصلة وحدة.
وشكراً

[سهم عتيج]

الغشيم وقطري1 .. آنه أؤيدكم في طرحكم,, وهو ان عملية تجزءة السهم راح يكون لها عامل وتفسير نفسي أكثر مما هي تفسيرات اقتصادية كما يدعي البعض ,, خصوصا في الفترة الاولى,, وبعدين راح تستقر الامور كما كانت,, وبهالمناسبة,, آنه أذكر يوم كانت قيمة السهم الاسمية 100 ريال,, وبعد تجزءة الأسهم الى 10 ريالات للسهم.. جاء واحد من الشيبان للبورصة,, ويوم شاف سهم الملاحة ينباع ب 65 ريال,, انصدم وسألني,, وقال راح أشتري سهم الملاحة على هالسعر,, وقلتله ليش انت متحمس عشان تشتريه,, فقال لي لأن سعره كان ينباع ب 700 ريال,, والحين صار سعره رخيص,, بس يوم شرحت له الموضوع وفهم السالفة عدل,, تراجع عن قراره,, وهذا الشيء اللي ممكن يحدث في البداية,, ان الناس راح تعتقد ان السهم بعد التجزءة سعره أصبح أرخص وبالتالي سيرتفع,, ولكن الشيء اللي محد يعرفه وهو ان السهم صحيح لو ارتفع سعره بعد التجزءة,, وخصوصا اذا كان ارتفاعه بدون مبررات اقتصادية,, فهذا معناتها ان سعر السهم راح يظل متضخما حتى يرجع الى حالته الطبيعية بعد ان تنكشف الحقيقة,, او بعد ان تظهر دلائل جديدة تدعم سعره الجديد,, وهذا قد يستغرق بعض الوقت

والله أعلم..

[الخبير المالي]

السبب الرئيسي لتجزئة السهم هو لفتح السوق لاكبر شريحه ممكنه من صغار المستثمرين.