حبيت أستشيركم بتصميم بيتي ..!! واحتاج عروض اسعار وافكار للتوفير ونصايح

[محمد الجفيري]

بسم الله الرحمن الرحيم
السلام عليكم يا اخواني
ما خاب من استخار وما ندم من استشار
اخواني الكرام حبيت اراويكم تصميم بيتي وحبيت اطلب منكم الاستشارة لاني بصراحة ما اعرف كثير في البنيان وتوزيع الأماكن

فالحقيقة انا حبيت ان بيتي يكون بسيط جدا
ويكون مربع علشان المساحة والتكلفة ما تزيد علي
فياريت انكم ترشدوني جزاكم الله خير
واخليكم الان مع الصور


والخطة كالاتي
اني ابني الفيلا كاملة بدون الملاحق الخارجية
وبحاول ابني المجلس
ولين كبرت مع الايام ابني الملاحق الخارجية ان احتجت

حاليا انا ساكن في شقة ايجار فكنت افكر لو ابني المجلس بترخيص بنفسه وانتقل اسكن فالمجلس إلى ان يكتمل البيت واسكنه فشرايكم ايضا بهالمقترح ؟
وهل بامكاني احصل على ترخيص كهربا وماي للمجلس؟قبل لا يكتمل البيت ؟

ابي اعرف اسعار البناء شلون اقدر ابني بأرخص الاسعار بجودة نسبيا جيدة

بصراحة ميزانيتي مش قوية وايد بحيث اني ابي ابني البيت وأثثه فقط من قرض الدولة وماعندي استعداد ازيده شي لان علي ديون اخرى كبيرة..

مساحة الطابق الارضي 224 متر
مساحة الطابق العلوي 224 متر
مساحة البنت هاوس 64 متر

مساحة المجلس 131 متر

مساحة ملاحق المنزل 73 متر

اجمالي المساحة للبناء هي 716 متر مقسمة كالاتي:
المرحلة الأولى بناء المجلس 131 متر.
المرحلة الثانية بناء المنزل بدون الملاحق 512 متر.
المرحلة الثالثة (مستقبلية) بناء ملاحق المنزل 73 متر.

واتمنى من الله عز وجل انه ينيرني للاشياء اللي لازم انتبه لها واتجنبها

ياريت ماتبخلون علي بالنصيحة او الدعاء
وفقكم الله لما يحبه ويرضاه

اخو الجميع
الجفيري

[محمد الجفيري]

طلبت من المصمم انه ينقل مكان الملاحق الخارجية داخل المنزل الى الجهة الشمالية
بحيث يكون المطبخ الداخلي للمنزل مواجه للمطبخ الخارجي للمنزل

[سونيتا]

ان شالله تلقى الاستشارة من الأخوان اللي لهم خبره في البناء ....وموضوعك مكانه في قسم اعمال البناء والديكور..

[عابرة سبيل]

التصميم حلو ماشاء الله
بالتوفيق
بس سالت كم بيكلف البني نفس مساحة بيتي

[محمد الجفيري]

في مقاول قالي ان تكلفة المتر 1700 مع المفتاح
فما ادري بصراحة شلون الاسعار

[becauzah]

اذا انت تفكر فيه كبيت عمر فأنا انصحك انك تدور لك على مقاول احسن من هذا ،
انت عندك قرض الدولة اللي هو مليون و ميتين ، اذا قلنا مساحة ارضك مثلا 500 متر
فالبناء ما ينحسب بالطريقة اللي قلت عنها
مساحة الأرض الكاملة مشمولة مع الحوش ، مثلا 500 متر مربع
كلفة البناء ، اذا كان شغل تجاري المتر ب1700 اذا تبي تسكنه بنفسك اختار سوبر ديلوكس تقريبا 1950 للمتر

يعني التكلفة تقريبا 500 * 1950
يطلع عليك 975 ألف ريال وهو أقل من القرض اللي هو مليون و ميتين.
فالمجلس و الملحق الخارجي تقدر تبنيه و بيطلع عليك كله أقل من مليون و ميتين بإذن الله
بالتوفيق يابو حسن

[مرتبش]

الله يوفقك
التصميم حلو عجبني ماشاء الله

[qatarlands]

بالنسبه لتوزيعك للغرف صراحه حلوه ومرتبه .. بس بعد لازم تشوف الديكورات الاي في البيت اقصد الديكورات الاماكن الاي تحتاج اسمنت او حديد زياده عن الطبيعي
اخوي بالنسبه لمساحة بيتك قرض الحكومه يكفيك وزياده بعد
الحين المتر 1300 تقريبا الى 1400
وعندنا مشاريع مجربه

واي استفسار على الخاص

[محمد الجفيري]

اذا انت تفكر فيه كبيت عمر فأنا انصحك انك تدور لك على مقاول احسن من هذا ،
انت عندك قرض الدولة اللي هو مليون و ميتين ، اذا قلنا مساحة ارضك مثلا 500 متر
فالبناء ما ينحسب بالطريقة اللي قلت عنها
مساحة الأرض الكاملة مشمولة مع الحوش ، مثلا 500 متر مربع
كلفة البناء ، اذا كان شغل تجاري المتر ب1700 اذا تبي تسكنه بنفسك اختار سوبر ديلوكس تقريبا 1950 للمتر

يعني التكلفة تقريبا 500 * 1950
يطلع عليك 975 ألف ريال وهو أقل من القرض اللي هو مليون و ميتين.
فالمجلس و الملحق الخارجي تقدر تبنيه و بيطلع عليك كله أقل من مليون و ميتين بإذن الله
بالتوفيق يابو حسن

المساحة الاجمالية للبناء هي 716 *1950 متر يعني 1396200 يعني تقريبا مليون و400 الف
وانا مابي ادفع هالمبلغ

[خليفـة]

في البداية اخوي .. اتمنى لك كل التوفيق ان شاء الله
وعلى قولة اخوي الغالي شموخ دائم : عقبال ما تسمع صوت البوكلين وهو يحفر الأرض
:)

انا ما شفت الخرايط بصراحة .. ولكن انا انصحك اخوي ومن واقع تجربه ان يكون العقد مع المقاول : عظم - سور - بلاستر ( فقط )
وتقوم انت بنفسك بباقي امور التشطيب
وبهالطريقة اخوي .. انا اضمن لك شغل بجودة عالية .. وبتوفر في جيبك مبلغ يكفي لفرش البيت ومبلغ آخر تحطه بجيبك :)

بالتوفيق اخوي ان شاء الله

اخوك / خليفــة
:)

[المخفي]

كم عدد افراد اسرتك

[محمد الجفيري]

حاليا 4 والشغالة 5

[المخفي]

اذا الوالدة و انت و زوجتك و ولد واحد ابني الدور الارضي مع الملاحق و المجلس و يوم تحتاج كمل الدور الثاني

[محمد الجفيري]

حسب ما فهمت ان الدولة ماتعطيني الماي والكهربا لو بنيت دور واحد ... شرايك هل هالكلام صحيح ؟؟؟؟

[المخفي]

افضل لك تاكد من المكتب الاستشاري او البلدية قسم التراخيص

[بويوسف]

اخوي محمد بناء مجلس فقط غير مسموح حسب قوانين البلدية ..

عندك حل افضل وهو بناء الفيلا بدون ملاحق كمرحلة اولى .. ثم بعد ذلك تقوم ببناء الملاحق بالاضافة الى المجلس الذي ترغب به ..

سعر 1700 - 1900 ريال للمتر تشطيب .. تحصل من خلاله على تشطيب جيد ومناسب ومعقول اقل من ذلك فستظطر للحصول على مواصفات اقل من المأمول به ..

[نور الحور]

بالنسبة للتصميم فيعتمد على ذوقك ونفسيتك ..
هل تحب الأماكن المفتوحة أكثر أم الخصوصية ؟
إذا تحب يكون البيت مفتوح فالأفضل تفتح غرفة الطعام والمجلس على الصالة وممكن بالديكور تسوي بارتشن على كيفك ..
بالنسبة للملاحق عندي فكرة ..
إنك تضم الملاحق للفيلا كمبنى أوفر للمساحة وأسهل في التنقل ..
يعني تكون ملاحق مدمجة بالفيلا لكنها دور واحد ..
هذي ملاحظاتي وإن شاء الله أكون أفدتك بشي