غسيل السيارات ب 30 ريال ؟؟؟!!!

[وحيد-الشوق]

السلام عليكم




تفاجأت من كم يوم اخوي وده سيارته يغسلها في المغسلة طبعا السيارة مغبره وكلها طين غسل السيارة ب50 ريال يقوله سيارتك حالتها حاله ومغبره الا والمدير العربي في المغسلة يقوله ترا من اول الشهر الغسيل ب30 ريال :anger1:

واليوم اخوي الثاني راح نفس المغسلة وغسل سيارته ب30 ريال حسبي الله عليهم حتى ما انتظروا راس الشهر :anger1:

للعلم قبل الغسيل ب25 ريال

وين حماية المستهلك وهل يحق له يرفع السعر؟ شدعوه ياجماعه كله الا ماي وصابون ليش 30 ريال :rolleyes2:

هذي بركات زيادة اسعار البترول :weeping:

[@north_star@]

صج انهم حراميه اول كنا نغسل على عشرين ووايد عليهم وعقب صارت على 25 وقلنا مب مشكله والحين تقول 30 لا بالله كدينا والله الواحد احسنله يغسل موتره في البيت والله المستعان

[boamir]

مغاسل وقود كلها ب 30

وبعض المغاسل ب 30 وبعضها للحين ب 25

وغسيل الجيك ب 50 و 55 و45
على حسب المكان إلي تغسل فييه

[القيادة]

البترول أرتفع والغسيل أرتفع

باقي أيل السيارة علشان تكمل.

[لاجئ عاطفي]

وليش مستغرب؟ اذا تحديد العارض صار بـ 25 فشلون غسيل سياره كامله؟؟ عادي عزيزي كل شي في ارتفااااااااع ماعدا الرواتب

[g2006]

البترول أرتفع والغسيل أرتفع

باقي أيل السيارة علشان تكمل.

اصدق ان ايل السيارة ارتفع بعد , شيك على محلات تغير الايل بتلحض فعلا ارتفع

[الصريحه]

لاحول ولاقوه الا بالله

[عاشق الشهادة]

يوم السبت رحت لمغسلة الشرق بطريق سلوى وقالي موظف المغسلة 35 ريال تركته ورحت مغسلة الاستشاري الي بالعزيزية سئلته كم الغسيل قال 25 ريال وغسلت عندهم , حماية المستهلك نايمين بالعسل هو فيه من الاساس شي اسمه حماية للمستهلك :(

[ZURICH]

ليش المستهلك مايشوف اي دور لما يسمى بحماية المستهلك ..

مادري لمن ( يدااومون ) أو هل في مستهلك غيرنا .. لهدرجة الحكومة مهب قادرة تتخذ قرار .

[vtc_4.8]

انا ماغسل سيارتي في المغاسل الا جيك وكل شهرين تقريبا او اقل مرة

اغسلو سياراتكم في البيت بالمره اكسرسايز :] .. طبعا كل واحد وظروفه

وحماية المستهلك لاتتكلم عنها بعض الحلاليق (خاصه الاتراك) يظربون عليك 45 ريال وحمايه المستهلك نايمه

[ملك المشاعر]

قاطعوا اللي يرفع السعر ومصيره ينزل

[هارودز]

شكلنا لحين ماشفنا شي من التجار مستغلينا وين دورك يا حماية المستهلك
حبر على ورق وجودكم عدم وجودكم كله واحد

[القيادة]

اصدق ان ايل السيارة ارتفع بعد , شيك على محلات تغير الايل بتلحض فعلا ارتفع



الله المستعان

نشتكي حق من بعد الله سبحانه

[الـقـاسـي]

يعني شتتتوقعون منهم يسوون الحكومة خدمتهم خدمة العمر ..

[R 7 A L]

قبل لا اسافر كان الغسيل بــ25 ريال و5 ريال بخشيش
بس الحين يوم صار بــ30 معصي مافية بخشيش
مافية الا تحفيصة بعد ماغسل سيارتي وانا طالع
:anger1:

[BURBERRY]

اييه كل شي بيرتفع

و حماية المستهلك ساكته

[الخزرجي قطر]

الله المستعان هذه بداية لارتفاع الاسعار
اكثر مما هو عليه الان وكل واحد يزيد على كيفه

[سهم عتيج]

التاجر ذكي,, ويعرف متى يرفع السعر وفيه مقدمات.. وهو أول شيئ يشوف ردت الفعل,, اذا مافيه ردة فعل رفع السعر وفتح المجال لغيره من التجار من نفس السلعة لرفع الأسعار..

قبل 20 سنة,, كان سعر الشاورما بريالين وثلاث,, وسعر وجبة كنتاكي 18

بعد 20 سنة,, وصل سعر الشاورما 10 ريالات ولازالت أسعار كنتاكي تقريبا كما كانت عليه..

ليش؟؟ أتمنى التركيز على هالنقطة من اخوانا االأعضاء

عندما رفع التجار سعر كيلو اللحم في مصر في عهد رئيس مصري سابق,, قامت احتجاجات شعبية واسعة,, فظهر الرئيس وبكل برود وقال,, لاتأكلوا اللحم,, وامتنع هو بنفسه عن أكل اللحم وأعلن عن ذلك تضامنا مع شعبه,, فامتنع الشعب عن أكل اللحم,, وبعد ذلك اضطر التجار الى اعادة أسعار اللحم بالأسعار السابقة لأنهم واجهوا كسادا لسلعهم..

والله الموفق

[مضاد]

هذي بركات زيادة اسعار البترول :weeping:




وانت الصادق هذي بركات استضافة كاس العالم , السبب الأول .

[مـــــنــاف]

هــــذا الـــموضـــوع يا أخــي الــكريـــم قـــد يــجرّنا إلــى الــولــوج إلــى مُــعتــركـات أُخـــرى (نـامــت أو غــضـــّت الــعيــون) عــنهــا (الــرقابـــة) ..!!

بالأمـــس كــنتُ بإمــارة الــشارقـــة , وإتــصل بـــي أبـــني طــالــباً مــني إحــضار (قـــطعــة) غــيار لــسيارتـــة , والـــتي وجــد ســعرهــا فــي الــدوحــة بــقيـــمــة (8200) ريال .
الــمُـــهم .. وجـــدت الــقطــعة (الأصــلية) وأشــتريـــتها .. أتــــدرون بِــــكم ..؟؟؟

بـــــ( 3500) ريال فـــــقط ..!!


الـــكثير يـــسأل .. لــماذا الـــكمالـــيات فــي الـــدول الــمُـجاورة أرخــص مــنّا بـــكثـــير مــع إنــها نــــفس الــبضــاعــة ..؟؟

الــــجـواب لـــديــــــكم بارك الله فــيكم


شــاكِــرا لــك أخــي (وحــيد الــشوق) عــلى مــوضـــوعــك الــذي يــــعجُّ بإحــدى الــمُشكلات الــتي وهـــجت عــلى الــسطـــح .

[STAR]

غريبة ليش محد كلم حماية المستهلك؟؟

[qatari 111]

الله يرحم ايام اول كنت احلق الشعر والعارض مع مساج الراس ب10 ريالات والحين العارض بس ب25 ريال .......
وانصح الناس انهم يشترون مكينة براشر وغسلها فالبيت لان راح تواجهون ازمة مغاسل وراح يكون فيه ضغط على المغاسل المعدووده وترتفع الاسعار .......

الله المستعااان

[ام السعف]

انا ماغسل سيارتي في المغاسل الا جيك وكل شهرين تقريبا او اقل مرة

اغسلو سياراتكم في البيت بالمره اكسرسايز :] .. طبعا كل واحد وظروفه

وحماية المستهلك لاتتكلم عنها بعض الحلاليق (خاصه الاتراك) يظربون عليك 45 ريال وحمايه المستهلك نايمه

اي والله اغسلوا سيايركم في البيت ،، يا زين غسيل السياير
متعة ما عقبها متعة :shy:

[ANONYMOUS]

جميعا نحو شعار

غسل سيارتك في البيت .. واستمتع بالماي والصابون مع لعيال :p

[بن جلبان]

قبل لا اسافر كان الغسيل بــ25 ريال و5 ريال بخشيش
بس الحين يوم صار بــ30 معصي مافية بخشيش
مافية الا تحفيصة بعد ماغسل سيارتي وانا طالع
:anger1:


هههههههههههههههههههههههههههههههههههههههههههههههههه هه
ههههههههههههه


ضحكتني مع الصبح الله يسعدك ..

[بوخالد911]

لللحين ب 25 ريال


والله يعيين

[شبح الصمت]

لا حول ولا قوة الا بالله

بدليك على مغسلة انشاء الله انها لين الحين تاخذ 20 ريال وغسيلهم حلو وعلى كيفك قدام مدرسة الدوحة الاعدادية من جنوبيها اهم مغسلتين اول مغسله من جبله فيها (4) بيبان وجمبها مغسله وبعدها شيشه مدري شسمها ,,

انا كنت اغسل عندهم من قبل شهر وياخذون 20 ريال ,,,

غسيلهم فله وماله حل وبذمه وضمير يغسلون

الله يبارك لراعيها بحلاله ويرزقه جناته الفردوس يارب ,,

[وكر الذيب]

ياجماعة الخير انتوا سبب الزيادة صدقوني لو كل واحد فينا مايغسل سيارتة في المغسله شهر صدقوني راح يرجع السعر القديم وبدل ماتقط 30 في المغسلة عط الدريول 10 وراح ينفظ لك الموتر وانت قاعد اتقلب التلفزيون في البيت وبالنسبة للحلاليق بعد قاطعوهم وقولوا يازين الديرتي في البيت يرجعك شباب اضرب الصاطر مكينة ب ثلاث دقايق وموضوعك خالص ولابعد انضف لك من لغلغة الحلاليق وصدقوني راح يرجع السعر مثل قبل ياشباب تحركوا يد وحدة ماتصفق ويد الله مع يد الجماعة لاحد يروح يغسل وخليتونا لعبة في يد التجار

[بلوتنيوم]

الناحية الايجابية لارتفاع الاسعار
اول شيء بتغسل السيارة في البيت وبتوفر
ثاني شيء بتحلق في البيت وبتوفر
ثالث شيء وهو المهم بتقضى وقت اكبر في البيت :tease:

[PGR]

شباب ليش الواحد مايسوي حمله لمقاطعتهم ؟ انتوا ماشفتوا شنو صار في السعوديه لما الشباب قاطعوا مادري اي وكالة سيارات وخسرت خساير كبيره ؟ لكن المشكلة الشباب يقولون يالله خمس ريالات مب مشكلة مب فارقه وياي وهاي اللي يقوي راعيين المحلات انهم يرفعون الاسعار ولا يسالون عن احد

[بو الجوري]

إييييه الله يرحم مغسلة الشعب يوم كان الوالد الله يرحمه ياخذ كوبون فيه 12 غسله بـ 100 ريال :..:rolleyes2:

التيسير من زمان زادو أسعار الغسيل :..
والمغاسل الباقيه شكلها تبي تستغل الإزاله اللي فالغرافه :..
بدال ما ينزلون السعر لأن الضغط بيكون زايد عقب الإزاله :..

يعني من سنتين شالوا اللي فالغرافه :..
والحين بيكملون على الكم مغسله اللي بقت :..

وين نروح !!!!! صج بتصير أزمة مغاسل وزحمه جنه العيد :..


المهم أنا جربت مره أغسل فالبيت بمكينة الإبرشر مالت أخوي :..
والوضع فوللي :..:victory: إن شاء الله أول ما أسكن فالبيت الجديد بجيب البرشر :..:discuss:

[سوق واقف]

أمس رحت اخذ الغتر من المغسلة مودي له 12 غترة من أسبوع غسيل وكوي أمس يوم رحت أخذهم قالي 72 ريال

قلت له نعم ليش والله بكم لغسيل والكوي قالي 6 ريال قلت له ليش قالي الكفيل قالي قلت أسمع مالك ولا ريال غير أربع ريال غسيل كوي ولا بجيب الشرطة لك الحين والبلدية قالي خلاص خلاص

وحركت والله حرام غترة غسيل كوي 6ريال

[مرحوم قطر]

اصلا حنى في قطر ما عندنا اداره اسمها حماية المستهلك

لا تقصون على نفسكم


الحاله في قطر مجموعة حراميه تبوق و تنهب و شعارها الي رافعته اسمه

من امن العقاب ساء الادب


لا قوانين ولا محاسبه و الي نفسه دنيه يروح يبوق الطريق مفتوح له

و الي ما يبي ياكل من حرام ياكل هوا و يظرب راسه في الطوفه

هذا هو النظام السائد


الظاهر على الفتره الجايه الامور بتتغير و وجهات النظر بتتغير

لان القهر يولد الانفجار

[khalid-qtr]

والله لعبة الكل يرفع السعر على كيفة...

حتى الحلاليق يقولون الحين يحلقون لحية بس 20 ريال ويليت عدتهم نظيفة او يهتمون بالنظافة

الحمدلله اني احلق بالبيت وشكلي بغسل السيارة في البيت بعد مافي الا هذا الحل

[وحيد-الشوق]

شكرا لتفاعلكم مع الموضوع والسموحة غبت شوي << نزل الموضوع وشرد

كان ودي ارد على كل واحد لكن السموحة منكم :shy:

قهر مادري لين وين بنوصل مع زيادة الاسعار ويليت نتعض ونقاطع صج احنا شعب صامت :weeping:

لاهنتوا يا اخوان والله يعطيكم العافية

[لافوشيا]

السلام عليكم




تفاجأت من كم يوم اخوي وده سيارته يغسلها في المغسلة طبعا السيارة مغبره وكلها طين غسل السيارة ب50 ريال يقوله سيارتك حالتها حاله ومغبره الا والمدير العربي في المغسلة يقوله ترا من اول الشهر الغسيل ب30 ريال :anger1:

واليوم اخوي الثاني راح نفس المغسلة وغسل سيارته ب30 ريال حسبي الله عليهم حتى ما انتظروا راس الشهر :anger1:

للعلم قبل الغسيل ب25 ريال

وين حماية المستهلك وهل يحق له يرفع السعر؟ شدعوه ياجماعه كله الا ماي وصابون ليش 30 ريال :rolleyes2:

هذي بركات زيادة اسعار البترول :weeping:

الحمدلله انا بديت اتعلم اغسل سيارتي بنفسي ووفر الثلاثين ريال :rolleyes2:

[jeep-srt8]

اذا مابنحط حد بتزيد الأسعار وان زادت مابتنزل

المشكلة نتكلم هنا وحنا معصبييييييين وطبعاً ماحد شايف الي نقوله غير الي معصبين مثلنا !!!! طيب ايش رايكم نروح جماعه ونكسر ام مبناهم خخخخخخخخخخخخخخخخخخخخخخخخخخخ

اتكلم جد اصبرو شوي وان رفعت الاسعار على اشياء تافهة قدااااااام نرووووووح ونناااااام عندهم ونطيح بالبواب حقهم بعد وبنطاااااالب بالتغير خخخخخخخخخخخخخخخخخخخخخخخخ

[خليفـة]

الله يرحم ايام كانا لغسيل بـ 15 ريال
واذا تقول له من غير غسيل مكينة يوافق الهندي بـ 10 ريال
ههههههه

ايام والله

[البانوش]

غسيل لاندكروزر والبيكب غمارتين تماتيك 20 ريال غسيل جك 40 ريال امس انا عندهم

مغسلة السوق المركزي

[مونديال]

لاحول ولاقوه الا بالله

[لاجل QT]

بك حتى الماي والصابون ارتفع ..عزت الله كدينا خير