خروج الفتاة مع زميلاتها نقاش حاد جدا .....

[شيخ القبيلة]

السلام عليكم ورحمة الله وبركاته
كل عائله تختلف عن غيرها ... عادات بيتهم تختلف عن البيت الآخر

ولكل عائلة رأي مختلف عن العائله الأخرى ,,

هناك عائله ملتزمة ومتقيدة بحدود وهناك عوائل متحررهـ
لأبعد الحدود ..

هناك فتيات يخرجن مع زميلاتهن(وليس مع أهلهن أو بنات أقرابهن) إلى الأماكن العامة ...

مثلاً للذهاب إلى التسوق أو العشاء في إحدى المطاعم

أو الذهاب إلى أي مكان ترفيهي ...

أود هنا نقاش الأخوهـ والأخوات ...

سؤالي للشباب ..

هل تــرضـــى لأختك الخروج مع رفيقاتها ؟ السبب؟

مارأيك في منظر الفتيات في الأماكن العامة ( شـلــة بـنات ) ؟؟

هل ترى فرق بين ذهابهم للأماكن العامة أو في منزل احدهم ؟؟

سؤالي للفتيات ..

ماذا تفضلين الخروج مع اهلك ام مع زميلاتك ؟؟

هل تحسين بأمان مع زميلاتك ؟؟ السبب ؟؟

اتمنى ان ارى وجهة نظركم بصراحه ’’’

[][ iMedia ][]

ضـــــــــــــــــــــــــــــــــــــــــد
باختصار شديد

[لاجل QT]

هذا الخراب بعينة وعلمة خروج البنت مع اصدقاءها في سن حرجة وهو المراهقة..مدري الاهل كيف يامنون على بنتهم من ابليس النفس امارة بالسوء..

اعترض وبشدة ..البنت ماتطلع الا مع امها بس و خالتها وعماتها..

[Rider]

أقول البنت تنثبر مكانها أبرك اذا بتطلع مع اهلها ماعليه لكن صديقة وخرابيط لااااااااااااااااااااااااا

[القيادة]

في الوقت هذا نشوف العجب

يطلع الصح غلط ويطلع الغلط صح

[alrheeb2020]

هل تــرضـــى لأختك الخروج مع رفيقاتها ؟ السبب؟

نعم , لابس نقاب ومحترمه نفسها ( بس طبعا تفرق على حسب المكان )

مارأيك في منظر الفتيات في الأماكن العامة ( شـلــة بـنات ) ؟؟

على حسب منظرهم طال عمرك .. مثلا لين كانوا محتشمات ومنقبات العكس الواحد يحترمهم ويقدرهم وتلقاه يدعي لهم بالثبات لا شعوريا

اما اذا كانوا متبرجات ف هذا شي ثاني ومنظر مقزز بالنسبه لي
واتكون نظرتي لهم نظرة احتقار

وبعد على حسب المكان

هل ترى فرق بين ذهابهم للأماكن العامة أو في منزل احدهم ؟؟

نعم , الاماكن العامه بيكون فيها اختلاط
بيت احدهم بيكون استر للبنت وبتاخذ راحتها اكثر



والله يجزيك خير عالطرح القيم

[شيخ القبيلة]

:victory:[=لاجل QT;6891381]هذا الخراب بعينة وعلمة خروج البنت مع اصدقاءها في سن حرجة وهو المراهقة..مدري الاهل كيف يامنون على بنتهم من ابليس النفس امارة بالسوء..

اعترض وبشدة ..البنت ماتطلع الا مع امها بس و خالتها وعماتها..[/QUOTE]

:victory:

[قوي العزايم]

خير الكلام ما قل ودل

ضــــــــــــــــــــــــــــــــــــــــــــد

هذي قلة حيا

[حيهور]

لاتعليق على الموضوع

غير

الله المستعان

[بوحمد111]

يعطيك العافيه اخوي شيخ القبيلة

موضوع قيم ومثل انت ما تفضلت في بداية الموضوع بأن كل عائله تختلف عن غيرها وبعضهم ملتزم والآخر متحرر

وعن نفسي انا اقول ما فيها شي اذا الواحد واثق من اهله اياً كان بناته أو أخواته والبنت المحتشمه ما ينخاف عليها وممكن تتصدى لألف رجل والبنت الغير محتشمه من الممكن ان أي جاهل يلعب عليها ويعيشها في احلام هي من الأصل في غنى عنها والله يستر على بناتنا وأخواتنا وجميع بنات المسلمين

[cristal]

مافييها شي
بالعكس رايحة اتغدى مع وحده والا ثنتين من ربعي
شدعووه كل شي عندكم عيب وحرام
من اللى مايطلع
خلكم واقعييين
وااايد صايريين مثالييين :omen2:

[نورالهدى]

المبدأ مرفوض عندي
بنتي ماتطلع إلا معاي
وماعندي تروح حتى تزور صديقاتها
اللي يبغي يجي حياه الله وانا موجوده بعد تحت عيني
أنا تربيت جذيه ومثل ما اتربيت بربي إعيالي
هذا مش لعدم الثقة في بنتي
ولكن للمحافظة عليها

(كلكم راع وكلكم مسؤول عن رعيته)


وشكر

[شيخ القبيلة]

المبدأ مرفوض عندي
بنتي ماتطلع إلا معاي
وماعندي تروح حتى تزور صديقاتها
اللي يبغي يجي حياه الله وانا موجوده بعد تحت عيني
أنا تربيت جذيه ومثل ما اتربيت بربي إعيالي
هذا مش لعدم الثقة في بنتي
ولكن للمحافظة عليها
وشكر

:thumbup1:

[khalid-qtr]

المبدأ مرفوض عندي
بنتي ماتطلع إلا معاي
وماعندي تروح حتى تزور صديقاتها
اللي يبغي يجي حياه الله وانا موجوده بعد تحت عيني
أنا تربيت جذيه ومثل ما اتربيت بربي إعيالي
هذا مش لعدم الثقة في بنتي
ولكن للمحافظة عليها

(كلكم راع وكلكم مسؤول عن رعيته)


وشكر

ونعم الام والله
الله يكثر من امثالج ويحفظ لج بنتج

[الخير كله]

مال اول ضد
طبعا مع التمشي والدلع والوناسه
نايس ويك اند ان كاتاااارااااااااا

[Rider]

مافييها شي
بالعكس رايحة اتغدى مع وحده والا ثنتين من ربعي
شدعووه كل شي عندكم عيب وحرام
من اللى مايطلع
خلكم واقعييين
وااايد صايريين مثالييين :omen2:

الله يعينا على مثلج

[انا حره]

طبعا ضد ومنقووووووووووووووود

الحين البنات تحت عينك والله يستر منهم شلون اخليم مع ربعه وشله ووناسه انا اشوف بالمجمعات شلل البنات يروحون الحمام ويحطون لبعض مكياج ولا يعلمون بعض قله الادب اتقوله خلي عباتك مفتوحه عشان يبين حزامك شهالخرابيط وبروحهم بلا رقيب حق الضحك والسوالف وقله الادب

مرفووووووووووووووووووووووووووووووووووووووووووووووو ووض

[خزامئ]

ضد
الا في حدود ضيقه جدا
مثل لو اعرف ام البنت و الام بتروح معهم وحسب الامكان
وعمر البنات وقبل اي شي هل البنات ثقه وهل شكلهم محتشمين
اذا توفرت الشروط ممكن اخلي بنتي اتروح وبدون تئخير

[مهل]

ضد و بدون تفكير



مال اول ضد
طبعا مع التمشي والدلع والوناسه
نايس ويك اند ان كاتاااارااااااااا

الخير كله
قلتي رايج و هذا الي انتي مقتنعه فيه و تربيتي عليه ،، مافيه خلاف في هذا
في مثل هذه المواضيع مصيده و فرز لانواع البنات (راعيه الطلعه و الروحه و الجيه و البنات الي ماسكين بيوتهم) يمكن تكلمين بحسن نيه ولكن حسن النيه بعيد عن غيرج .
ولا اقصد صاحب الوضوع .. مجرد ملاحظه و تنبيه ليس الا

[حقيقه]

مع هالشيء بس مب مع اي بنات لازم يكونون ثقه وترتاح لهم


وبعدين فيه كثير اعرفهم اهلهم يرفضون هالفكره بس البنت تطلع مع ربعها من الجامعه وتروح تمشى واهي كاشخه وتسوي بلاوي

وفيه بعض الاهالي يقول انا ارفض هالشيء وتخسي بنتي او اختي تطلع مع ربعها مسوين لي فيها رجال ويعرفون العيب

وبعيني شفته يخليها تطلع من البيت مع ربعها واهم اللي يسوقون وكاشفه وكاشخه حدها قدامه
يعني يسوي لي فيها رجال قدامي
وقدامها مايقدر يرفع عينه وصوته عليها

[ذيب ولد ذيب]

اذا تقصد المجمعات الي فيها اختلاط اكيد (لا والف لا)

اذا تقصد الاماكن الي فيها يوم مخصص للنساء فقط لايسمح للرجال الدخول (مش عائلات) مثل حديقة الحيوان او جنغل زون قبل كان عندهم يوم ما اعرف للحين هالشي او لا ,, اوافق في حدود ,, اذا عمرها اقل من 18 سنه لازم امها او اختها الكبيره تروح معها حتى لو تقعد بعيد عنها بس تشوفها من بعيد ,, واذا اكبر من 18 سنه لازم البنات الي بتروح معهم نعرفهم بنات عمها او خالها او ناس نعرفهم ونعرف ان بناتهم محترمات ,, بس مش تروح مع اي حد ما نعرف من هي وبنت من وهل هي بنت محترمه او لا ,,

والي يقول (مال اول) اقوله في عوايل للحين ملتزمه ومحافظه وحريصه على بناتهم ,,

[Eman Qtr]

يعطيك العافية أخوي على طرح الموضوع
يعتمد على حسب المكان اللي رايحت له ...
يعني أنا ضد خروج الفتاه مع زميلاتها للأماكن العامة كالمجمعات التجارية ...حتى ولو كانت الفتاه محل ثقة ....ماتدري شيصير ...
ولكن في نفس الوقت مع خروج الفتاه مع زميلاتها اذا كان المكان مثلا زيارة صديقة

وعموماُ مثل ماقلت كل عائله تختلف عن غيرها ...

هناك عائله ملتزمة ومتقيدة بحدود وهناك عوائل متحررهـ
لأبعد الحدود ..

ماذا تفضلين الخروج مع اهلك ام مع زميلاتك ؟؟
مع أهلي طبعاً :)
هل تحسين بأمان مع زميلاتك ؟؟ السبب ؟؟
لا ...

[هبوب الكوس]

[
SIZE="5"]سؤالي للشباب ..

هل تــرضـــى لأختك الخروج مع رفيقاتها ؟ السبب؟

طبعاً لا .

حمل وديع وسط ذئاب ماذا ينتظر الشخص بتجيب البنت الذيب من ذيله


مارأيك في منظر الفتيات في الأماكن العامة ( شـلــة بـنات ) ؟؟


شيء محزن ترى الفتيات لحالهم بدون ولي امر :weeping:

هل ترى فرق بين ذهابهم للأماكن العامة أو في منزل احدهم ؟؟

لايوجد فرق وجهين لعملة واحدة

سمحلي اجواب على هذي الاسأله

سؤالي للفتيات ..

ماذا تفضلين الخروج مع اهلك ام مع زميلاتك ؟؟

اكيد مع الاهل للامن والامان

هل تحسين بأمان مع زميلاتك ؟؟ السبب ؟؟

طبعاً لا

لتحرشات الشباب لهم

وشكرا لك اخوي شيخ القبيله على الطرح المنتاز والمفيد [/SIZE]

[حزينه]

الحشمه والاحترام هم الاساس سوا مع صديقتها او بنات عمها

مثال بنت طالعه مع ابوها ولكن غير محتشمه يعني انقول المهم ولي امر وخلاص ؟

البنت حتى لو حبستها لو تبي توصل للغلط بتوصله حتى وهي محبوسه

في النهايه تربية الاهل هي التي تصنع بنت صالحه

[بـــــــنت النوخـّــــذه]

خروج الفتاة مع زميلاتها
8
8
سؤاله واضحه مايبيله يمين يسار زميلاتها 000


عموما انا ضد :nice: لحد يقول مثاليه عاد هذا انا ولا ارضى ولا الي باسرتي يرضون كان بنطلع مثاليين زين والله ياحلوها من مثاليه :)

زميلاتها حياهم الله في البيت اقلب لهم الصاله او اي مكان فندق واحسن وسائل الترفيه اجيبها لهم والخصوصيه كذلك يتدللون بس ويآمرون امر حتى سيرفس للخدمه والضيافه بجيب لهم 00لكن مهيته بالشوارع عيب 00خصوصا" في فتره المراهقه 000 إلا مع اهلهم فقط

اما بنات كبار وعاقلين ومحترمات وملتزمين بالزي الشرعي التزام (تام تام تام ) والاشخاص ثقه اتروح ( للضروره يعني بتمر عليها اتخيط فستان تختار لها قطعه جذيه )(ويكونون كبار وفي سن الرشد ) ومعاهم وحده كبيره عاقله
اما قعده كوفي شوب وسماعه الاي فون بالاذن والبلاك بيري باليد وتمشي بالمجمعات لا والف لا 00تتمشى بحوش البيت اهي وربعها 00:nice: قال تطور قال

سلام (ن) عليكم

[الأصيلة]

حسب سن البنت وسن صديقاتها وأطباعهم
حسب المكان والزمان...
وأنا طبعا ضد خروج البنت مع صديقاتها للتنزه أو السينما او المطعم...
لازم يكون معاهم وحده في مقام الأم أو الخالة أو العمة بس ماتكون في سنهم..
وما دام انا بناتي اوديهم وين مايبغون يروحون...
ليش أخليهم يطلعون مع صديقاتهم...
بالنسبة لنا هذا الشيء ممنوع منعا باتا ولا نتكلم فيه أصلا
والحمدالله بناتنا متفهمين الوضع ومايطلبونه ويلحون عليه
( لا أحد يقول هذه مثاليه زايده ..لاوالله هذه هي الحقيقة...)
لأن فيه ناس مايصدقون أن في بنات ها الأيام مايطلعون ويتمشون ويروحون ويجون على كيفهم...
الله يستر عليهم لـ حد مايروحون بيت أزواجهم معززين مكرمين...

[black@white]

من الملاحظ من معظم الردود ضد
سؤال
خاطر ي اعرف البنات اللي يطلعون مع صديقاتهن ونراهم بكثره في المجمعات في اللؤلؤه بكتارا بدون اي من امهاتهن بنات من؟؟؟؟
اذا الكل رافض الفكره فهل هن يخرجن بدون علم اهلهن؟ او اهلهن يعلمون بتواجدهن في هذه الاماكن ولهن حريتهن؟

[بـــــــنت النوخـّــــذه]

من الملاحظ من معظم الردود ضد
سؤال
خاطر ي اعرف البنات اللي يطلعون مع صديقاتهن ونراهم بكثره في المجمعات في اللؤلؤه بكتارا بدون اي من امهاتهن بنات من؟؟؟؟
اذا الكل رافض الفكره فهل هن يخرجن بدون علم اهلهن؟ او اهلهن يعلمون بتواجدهن في هذه الاماكن ولهن حريتهن؟

سؤال وجيه عجبني صراحه ؟؟

عندي سؤال:

هل تعتقد ان منتدى الاسهم القطريه هو (كل الشعب القطري ) اوكل (المغتربين )000

على فكره رواد منتدى الاسهم مايجون 10% من الشعب القطري

وعشان انكون منطقيين اكثر مهب كل بنت تطلع بروحها اهي مهب محترمه 000لان الاشخاص يبينون من شكلهم وتصرفاتهم ولكن واجب على الاهل الحيطه والحذر البنت امانه في اعناقهم 00


الله يستر على بنات المسلمين

سلام (ن) عليكم :)

[راعي البيرق]

الله يرحم حريمنا اللي تربوا عالدين والعرف والاخلاق
اللي الوحدة ماكانت تعرف شكل الشارع او السكة الا بوجود محرم

[intesar]

المبدأ مرفوض عندي
بنتي ماتطلع إلا معاي
وماعندي تروح حتى تزور صديقاتها
اللي يبغي يجي حياه الله وانا موجوده بعد تحت عيني
أنا تربيت جذيه ومثل ما اتربيت بربي إعيالي
هذا مش لعدم الثقة في بنتي
ولكن للمحافظة عليها

(كلكم راع وكلكم مسؤول عن رعيته)


وشكر

اعتقد البنت اذا تعدت سن الـ٢٥ فلا مانع من انها تطلع وتزور مع صديقاتها ..ومن قال انه كل وحده حطت نقاب خلاص محتشمه .. الله يستر على بناتنا وكلنا عارفين انه الأخلاق والدين مو بالظاهر ولكن بمعدن الإنسان .. انتي تقولين بنتي ما تطلع الا معاي وهذا مو عدم ثقة وأنا أخالفج الرأي .. ما أعرف وجهة نظرج هل لأنج تربيتي جذيه مثل ماقلتي بتربين عيالج عليه .. واللي كتب تحت رايج صفق لج .. خليني أوضح لج وجهة نظري .. احنا صرنا بعصر التيك أواي .. عصر صعب جدا انج تسكرين على البنت أو الولد وتخلينهم تحت نظرج مثل العسكر والحرامي .. ترى كل ممنوع مرغوب .. أكرر كل ممنوع مرغوب .. عطيها الحرية مع المراقبة من بعيد .. لا تفهمين الحرية اللي تطالب بها الدول الغربية ولكني أقصد تبي تروح مع زميلاتها الكوفي شوب .. ان شاء الله بنيتي خذيها وصليها هناك وقعدي على طاولة ثانية .. مو لازم كل اللي تطلع تتعرض لمضايقات اللي لابسة عباية محتشمة وحجاب ساتر وبدون مساحيق تجميل أعتقد محد بيتحرش بها .. يعني بالعربي الفصيح اللي محترمة نفسها محد بيقرب منها .. تحت نظرج .. طيب ما يمكن البنت تسوي بلاوي وتحت نظرج ولا انتي حاسه .. الحلو انج تكونين صديقة لبنتج .. حاوريها وضحي لها وجهة نظرج .. الحرية بحدود حلوة .. ترى كثرة الدق يفك اللحام .. وكثرة لا وممنوع يخلي الوحدة لها فضول انها تجرب .. وياما أمثلة شفناها قبل على أيامنا من وراء أهاليهم بلاوي .. وتحت مسمى الحرص .. خربت البنت .. في زمنا هاي صعب تقولين للبنت لا أقنعيها ليش لا .. وما أ عتقد انه خروج البنت اللي تعدت الـ٢٥ فيها شي أو يخالف الشرع لكن كمراهقة ما أؤيد .. افتحي الحوار مع عيالج ولا تقولين أنا تربيت جذيه .. احنا بزمن مختلف ..

شكرا جزيلا

[um.yousef]

انا ارفض بشدة خروج البنت مع شلة بنات وذلك ليست لعدم الثقه في بناتي ولكن هذا مب من عاداتنا وتقاليدنا وهو دخيل علينا من الغرب وبناتي مايطلعون الا معي او مع خالتهم وعماتهم فقط حتى هم ينتقدون البنات الي يطلعون بروحهم ويعرفون انه عيب .

[gemini]

يعطيك العافيه على الموضوع..

انا مع خروج البنت ( وليست المراهقه) مع زميلاتها سواء لمجمعات, سينما, مطاعم الخ ولكن بشرط الاحتشام فاللبس وبدون "فل ميك أب" + وقت الخروج يكون مقبول يعني مو تقول بطلع مع ربعي 9 بالليل وبرجع 12 !! واذا البنت متربية عدل وخايفه ربها ماراح تسوي الغلط لو تقطها وسط ألف رجال.

وسلامتكم

[قوي العزايم]

خروج البنت من البيت وتسكعها هي وربعها بالمولات وغيره من أمكان

يرجع لسببين:

السبب الأول:
قلة الحيا والتربية للبنت من قبل الوالدين وأنها دايماً على صح والغير هم إلي على على غلط

السبب الثاني:
ركوب الأم وبناتها على ظهر الأب أو ركوب الزوجة على ظهر الزوج
يعني الأب أو الزوج صاير ضعيف شخصية وبالعربي الفصيح طرطور

المثل يقول: الخيل من خيالها والمره من رجالها

أما وحدة تقول لا عادي نروح نتمشى ومادري شنو
شهالخرابيط لا تكون تعتقد نفسها عايشة على شواطئ ميامي ولا في فرنسا

[فلتة زمانها]

اكيد مع هالشي بس مب مع اي بنت

صج الوحده تستانس مع ربعها اكثر من طلعات الاهل

[ام العيال]

أن فتنة النساء فتنة عظيمة حذر منها الرسول (ص)بقوله: (( ما تركت بعدي فتنة أضر على الرجال من النساء))
وكذلك ما رواه أبو سعيد الخدري- رضي الله عنه- عن النبي (ص) قال: (( إن الدنيا حلوة خضرة، وإن الله مستخلفكم فيها، فينظر كيف تعملون؛ فاتقوا الدنيا، واتقوا النساء؛ فإن أول فتنة بني إسرائيل كانت في النساء ))

ما بعد كلام نبينا عليه الصلاة والسلام اي كلام

[vtc_4.8]

عن نفسي ارفض بشده

مع الاهل ارضى

[شموخ وبس]

انا ماايد صغيره وتهيت فالمجمعات ليه مافي اهل اذا كبار متزوجات وحاشمين نفسهم شي ثاني غير كذا لا

[gemini]

انتوا الحين تقولون لا وضد ومادري شنو .. لو كبرت بنتكم وشفتوا ان صعبه تمنعونها راح تغيرون رايكم

[qqaattaarr]

الله يرحم اول ماتشوف سواده ولا معاها رجال
البنت تقعد معززه ومكرمه واميره في البيت
اذا تبيي تتفسح مع زوجها واخوها وابوها مافي مشاكل
اما مع صديقاتها عسى ماشر وين احنا
ضد ضد ضد

[Cooki]

امممم الصراحه .. يعتمد على نوعيه البنت وسنها والمكان اللي بتروحه ..
يعني انا بنتي اذا بغت تطلع مع صديقاتها او بنات خالاتها او عماتها ..

اوديهم واروح معاهم بس اراقبهم من بعيد.. واعطيهم المجال انهم يتمشون ويستانسون ..

وياخذون راحتهم بحدود الادب والحيا ..

لكن انهم يروحون بروحهم لا طبعاً..

لاني حتى لو ضمنتهم ماضمن النااس اللي بيصادفونهم هناك..

المراهقين صعبه ينهدون بروحهم بلا حسيب ولا رقيب ..

وياكثر اللي اشوفهم عند الكوفيات والسينمات يتمشون بروحهم.. واهلهم ..ياغافلين لكم الله ...

لا تعليق

عسى الله يستر علينا وعلى عيالنا ..

وعن نفسي الصراحه استانس لما اطلع مع صديقاتي واحنا كلنا امهات عيال وكبار ومحترمين ..

لا لنا فالخربطه ولا حركات المراهقين ..

نقعد بمكان والا بمطعم ونفضفض ونغير جوو.. ماعتقد فيها شي ..

حالنا من حال باقي خلق الله

ومن حقنا نستانس ونشم هوا ونشوف الدنيا ونستمتع.

.بلا عقد وتخلف ..يعني لحد يقول ماتعودنا ولا من عاداتنا وتقاليدنا ..

وايد اشياء مب من عادتناولا من تقاليدنا وقمنا نسويها واحنا نضحك ..

والعادات والتقاليد مو بالضروره تكون صح..

والمحترم محترم بكل مكان ويفرض احترامه على الكل غضباً عنهم

تحياتي للجميع

[intesar]

صح هالبنات اللي نشوفهم من عياله
هذوله كلهم بناتي ماشاء الله عليكم الحين كلكم ضد
يعني المراهقات ضد بس اللي تعدوا العشرينات ليش ضد
اللي عنده بنات لازم يتكلم مو خوات بنات لأن اللي عنده بنات يقدر يعبر اكثر
السموحة على الغلاظة

[الأصيلة]

الله يرحم حريمنا اللي تربوا عالدين والعرف والاخلاق
اللي الوحدة ماكانت تعرف شكل الشارع او السكة الا بوجود محرم

حتى الرجال ذيك الأيام
مايفارقون مجالسهم
مافيه أحد يدور في السوق والا يروح المباريات والا سينمات
يا أخوي الحياة تتغير مافيه شيء يقعد على حاله...
مو معقول نطلب من الحريم الحين يسلكون مسلك جداتنا قبل...
المهم في كل هذا التمسك بالدين...

[الـآنسـہ]

ماذا تفضلين الخروج مع اهلك ام مع زميلاتك ؟؟

مع الأهل اونس و ممكن اروح اي مكان معاهم
سواء مول او حديقه او زيارات

هل تحسين بأمان مع زميلاتك ؟؟ السبب ؟؟

مش وايد , إلا اللي اعرفهم من سنين هم اللي ممكن اثق فيهم و احس معاهم بالأمان اني ازورهم فالبيت او يزوروني ..
لكن زميلاتي فالشغل \ جامعه \ مدرسه ابدا ما اطلع معاهم خير شر حتى تلفون ما اخذ رقمهم الا لما يكون ضروري..
لازم تنبني ثقه بيننا بالأول و اعرف نفسيتها و تفكيرها شلون عشان اعرف انها ما راح تظرني او تمسني بسوء

خصوصا هالأيام وايد منتشرين الناس اللي إيمانهم ضعيف


الموضوع حلو..
شكرا للطرح

:)

[الأصيلة]

يعطيك العافيه على الموضوع..

انا مع خروج البنت ( وليست المراهقه) مع زميلاتها سواء لمجمعات, سينما, مطاعم الخ ولكن بشرط الاحتشام فاللبس وبدون "فل ميك أب" + وقت الخروج يكون مقبول يعني مو تقول بطلع مع ربعي 9 بالليل وبرجع 12 !! واذا البنت متربية عدل وخايفه ربها ماراح تسوي الغلط لو تقطها وسط ألف رجال.

وسلامتكم

نعم ماتسوي الغلط انت ضامنها
لكن ماتضمن اللي معاها واللي حولها...
والقلب بين اصابع الرحمن يقلبها حيث يشاء...
اللهم ثبتنا في الحياة الدنيا وفي الآخرة...

[المزن الرياني]

الزين في الموضوع ينعرف فيه نوع تربيه البعض
ولو بشكل بسيط

[واثق بالله]

حرصوا على بناتكم الله يجزاكم خير

صرنا نخاف على الولد من ربعه

فم بالكم في البنت !!

الله يستر على بنات المسلمين

ويكفينا الفتن ماظهر منها وما بطن

[a7med0_0]

انا ضد هالشي دام الرجال موجود
بس بعض الحريم ابيح لهم هالشي لانه فيه تقصير من قبل ولي الامر سواء كان اب ، اخ . الخ
والله المستعان على هالشي

[الخير كله]

ضد و بدون تفكير




الخير كله
قلتي رايج و هذا الي انتي مقتنعه فيه و تربيتي عليه ،، مافيه خلاف في هذا
في مثل هذه المواضيع مصيده و فرز لانواع البنات (راعيه الطلعه و الروحه و الجيه و البنات الي ماسكين بيوتهم) يمكن تكلمين بحسن نيه ولكن حسن النيه بعيد عن غيرج .
ولا اقصد صاحب الوضوع .. مجرد ملاحظه و تنبيه ليس الا

اخوي مهل انا تربيت ان الكحل قبل الزواج بس داخل العين وان التيلفون عار والطلعه اجرام ...

بس الحين الدنيا تغيرت وولكم تو كتااارا
اتمنى تفهم:)

[شمعة الدوحه]

حق المراهقات يمكن يكون فيه تحفظ شوي

انا بالنسبه لي اشوفه عادي

واللي نيته شينه معناتها هو يغلط ويظن الناس كلهم يغلطون مثله

وبعدين اللي يقولون عادات وتقاليد اتحدى انهم كلهم ماشين عالعادات والتقاليد

تلقون هم بنفسهم فيه اشياء في العادات والتقاليد موب مقتنعين فيها

الدنيا ترى غصب تغير فينا بدون مانحس

وجهة نظر :tease:

[غايه الطواش]

بالنسبه للمراهقات ماحرمهم الطلعه مع ربعهم بس اهم شي اكون معاهم او حدى عماتهم او خالاتهم ولازم اعرف صاحباتهم من ومن بناته
مراح احرمهم من مكان يبونة بس لازم تكون العين عليهم لازم حد كبير مانخليهم بروحهم ..............

اما بالنسبه لي اطلع مع ربعي اروح مطاعم اروح اتمشى اروح سوق واقف اروح كتارا نروح تغدى في فنادق نروح سباير نمشي ونتمشى نروح الكورنيش ومحترمين نفسنا مهب يهال ولا مراهقات ترى احنا نفس ولنا حق نوسع صدورنا ....

[حنان الدنيا]

ماشاء الله عليكم اغلبيتكم ضد

:eek5::eek5:

عيل بنات وخوات وزوجات مين اللى يطلعون ونشوفهم بالمجمعات والمطاعم :tease:

اسمحوا لي اقولكم تكلموا بعقلانيه شوي وبصراحه مستغربه من ردودكم


وعلى فكره كل طلعاتي مع امي وخواتي بس مافيها شئ اذا الوحده طلعت مع رفيجتها شوي دام محترمين نفسهم

وماعليهم من احد عادي

[نمر بن عدوان]

ماشاء الله عليكم اغلبيتكم ضد

:eek5::eek5:

عيل بنات وخوات وزوجات مين اللى يطلعون ونشوفهم بالمجمعات والمطاعم :tease:اسمحوا لي اقولكم تكلموا بعقلانيه شوي وبصراحه مستغربه من ردودكم


وعلى فكره كل طلعاتي مع امي وخواتي بس مافيها شئ اذا الوحده طلعت مع رفيجتها شوي دام محترمين نفسهم

وماعليهم من احد عادي


ليش ماتدرين ان اغلب اعضاء المنتدى عايشين في كوكب غير الارض اسمه كوكوب المثاليه الزايده الزائفه

[qtrose]

ضد ضد ضد !!!!

قبل الزواج مع الأم أو الأب ( الله يطول بأعمارهم )

بعد الزواج مع بعلي أو خواتي أو الوالدة أو خالاتي .


واذا بنطلع لازم يكون المكان مناسب لنا، ويناسب لبسنا....


صار شكلنا غلط بالنقاب ، يطالعونا باحتقار وبنظرة تخلف :weeping:

[غايه الطواش]

يعني عمركم ماطلعتوا مع ربعكم !!!!!!!!!!!
يعني وحده عمرها 25 او 30 سنه بتطلع ويه ربعها لازم امها معاها !!!
ترى هذا عمر راعيات بيوت .....
يعني لو كانت صيغه الموضوع خروج المراهقات ..اهنيه اجزم بالرفض لكل رواد الموضوع .....
يعني اذا طلعت الوحدة ويه ربعها يا انها بتتصرف تصرفات مشينه او حد بيعاكسهم ...
اشدعوه شباب قطر ذئاب بشريه والا بنات قطر مش متربين
تعبنا واحنا نسيئ الظن بعيال وبنات بلادنا ....
والله ان اغلب بنات وعيال قطر والنعم فيهم ادب واخلاق واحترام
واغلب التصرفات الشينه تصدر من مراهقين في فتره غفله وطيش
يعني الحين مع احترامي لكل ااعضاء المنتدى كل الناس الي بالشارع سيئه ماعدا رواد المنتدى واهلهم وعيالهم ونسباهم وقصراهم ومن يعز عليهم تراهم منزهين ....

[ام عبدالعزيز]

نطلع ويا رفيجات نعرفهم

مو مع اي ناس


وبناتي يطلعون مع عماتهم بنات خالهم


الزمن حتم علينا نخضع لها الاشياااء

[التيما]

ماشاء الله الأغلبيه ضد !! عيل اللي نشوفهم بنات منو ؟؟

على السواء البنات والشباب يحبون يطلعون مع صديقاتهم واصدقائهم من مايحب ولا يكره هالشي ؟؟ لكن دوري كأم أني اعرف بنتي طالعه مع من ؟؟
غير كذا من بيطلعهم ؟؟ اذا بيروحون مع بنتي انا بوديهم وبمشي وراهم وبخليهم على راحتهم قدام عيني ولو مع ربعها لو الأم ولا الأبو بيوديهم ماعندي مانع هاي لو كانوا صغار ولا مراهقات .. بس لو في الجامعة ولا موظفة .. من حقها تطلع .. وكل واحد عارف بنته ولا اخته وطبعها هل هي فارطه ولا محافظه ولا ولا وبالتالي لو منعها من البيت بتطلع من الدوام .. فالأسلم تطلع قدامي وأكون عارفه وين تروح وشنو لابسه وشلون تصرفاتهم لو شاكة في شي ممكن اروح واراقب من بعيد وهم مايدرون مره عالأقل للتأكيد على هالربع والصديقات وعقب بحكم ..
كثرة المنع فصلت العلاقة بين الأم والبنت والأب والولد .. صاروا مايقولون للوالدين كل شي .. والسبب ؟؟ يا الأم والأب من مجمع لمجمع ولا متشددين زيادة عن اللزوم ..

وللأسف الأغلب الأم أطين وتهبب أكثر من بنتها ..

[غابت الشمس~]

الحمد الله الاحظ اننا في قطر هالاشكال مو منتشره بقوه
يعني لازالوا الناس محافظين وبناتهم ملتزمات ومحتشمات

واغلب اللي تشوفونهم بالاماكن العامه مع صديقاتهم ولبسهم مو محتشم موووو قطريات اصل تشوفون كلامهم قطري وكشختهم..... الخ , لكن شوفوا اصلهم من وين
او ان ولي امرهم مو داري عنهم وشخصيته ضعيفه
لأن مافيه رجال يرضى على اهله بمثل هالامور ....

وكلن على ماتربى !!

[سما الوطن]

شكرا لمن فتح تلك الموضوع
فعلا صدمت بل صعقت من بعض الردود

نرجع للموضوع فعلا ..الموضوع يجب أن يناقش خروج المراهقات مع بعض وليس خروج البنات مع البعض

خروج المراهقات مع بعض ..بالنسبه لي ضد غالبا ..وقد اوافق عليه الاحيان بوجود ضوابط كثيره ..وحتى خروج المراهقين من الشباب يجب ان يخضع لضوابط ويتم تحت المراقبه بقدر الامكان

اما خروج البنات مع بعض !!!!!!
فما رايكم نناقش خروج الشباب مع بعض ؟؟؟؟؟
ضد أو مع ؟؟
ليه بس تناقشون خروج البنات؟؟

وبعدين ليه تتعاملون مع امراه وكأنها لا تعقل ولا تميز وبعض الاحيان ينخاف منها ومن اخلاقها ومحتاجه الى وصي؟؟ وصي يسمح لها او لا يسمح لها ؟؟
اي عقليه تلك هداها الله

اخوتي ..البنت اللي اخلاقها تعبانه ستفعل ما تريد وهي بغرفتها
والبنت التي تتمتع بالدين والخلق لن تفعل اي شي حتى وان كانت باي مكان ..بل ستكون قدوه بتصرفاتها
بدل ما نخاف ونناقش البنت تطلع مع صديقاتها او لا ...الاحرى نناقش تربيه البنات التي فعلا فيها عدم اهتمام غالبا من الاهل ... والحق يقال ان نناقش تربيه حتى الشباب ... ولكن الشباب لا يُقلق الاهل لانه لن يجلب لهم العار متناسين مسؤوليتهم امام الله والمجتمع بنقصان تلك التربيه بل حق ذلك الشاب وتلك الفتاه بتلك التربيه
اما البنت فكونها ممكن ان تجلب لهم العار فمن الاسهل حبسها بدل من تربيتها اليس كذلك؟ ..شي لا يقره لا عقل ولادين ولا منطق ولا اي شي

[العـوا]

اكيد الرد لا لان الصاحب ساحب
وياعلم وين يسحبه

[غيور]

الله يستر على اهلنا وجميع المسلمات , والله يهديهم .

تحياتي

[قوي العزايم]

من بعض الردود إلي قريتها

تأكد لي أن هناك بعض البنات قلنا البعض ما تفهم أو ما تبي تفهم

حتى لو تقعد تشرح لها أن هذا صح وهذا غلط إلي براسها تبي تسويه ،تربية سنعة،!!

بالعربي الفصيح والخلاصة والنهاية شبقى بعد in conclusion

بعض البنات مثل: الصبخة إلي ما ينفع فيها الزرع

الشرهة مب عليها على إلي يسمي نفسه رجال سواء كان أبوها أو زوجها أو أخوها أو طوفة

[محمد الحمدان]

خير الكلام ما قل ودل

ضــــــــــــــــــــــــــــــــــــــــــــد

هذي قلة حيا

[OREO]

ماشاء الله عليكم اغلبيتكم ضد

:eek5::eek5:

عيل بنات وخوات وزوجات مين اللى يطلعون ونشوفهم بالمجمعات والمطاعم :tease:

اسمحوا لي اقولكم تكلموا بعقلانيه شوي وبصراحه مستغربه من ردودكم


وعلى فكره كل طلعاتي مع امي وخواتي بس مافيها شئ اذا الوحده طلعت مع رفيجتها شوي دام محترمين نفسهم

وماعليهم من احد عادي


هذول اللي في القهاوي و السوق .. كزخستانيات و اوزبكستانيات ,,

اما بناتنا تحصلينهم في دار تحفيظ القرآن او في بيوتهم مثلهم مثل امهاتنا الله يرحمهم ..

[OREO]

من بعض الردود إلي قريتها

تأكد لي أن هناك بعض البنات قلنا البعض ما تفهم أو ما تبي تفهم

حتى لو تقعد تشرح لها أن هذا صح وهذا غلط إلي براسها تبي تسويه ،تربية سنعة،!!

بالعربي الفصيح والخلاصة والنهاية شبقى بعد in conclusion

بعض البنات مثل: الصبخة إلي ما ينفع فيها الزرع

الشرهة مب عليها على إلي يسمي نفسه رجال سواء كان أبوها أو زوجها أو أخوها أو طوفة




عجبني كلامك اخوي .. لكن حبيت اوضح شي .. كلمة رجال تطلق على كثير من الرجال و من ديانات مختلفه .. يعني نقدر نقول ان جون و استيف و الخ .. كلهم رجال ..

لكن هل هذول الرجال يتبعون الدين الصحيح و النهج السليم ؟؟
طبعاً لا ..

فلذالك من وجهة نظري بأن في ظل غياب الدين الصحيح و الوازع الديني هما اساس المشكله ..

موفق اخوي ..

[الدمعه]

ضد خروج المراهقه مع زميلاتها الى الاماكن العامه بدون رقيب ..

مع خروج من تعدت مرحله المراهقه ووصلت سن الرشد ووتكون محل ثقه ...

ومادام المطاعم اللحين مسووين فيها كباين وحواجز وخصوصيه اكثر فاكيد ماراح

امنعها في مرحله عمريه معينه ..

[abu abdulla]

اولا يفضل ان يكون الخروج للضروره وبمحرم او امره كبيره مثلا ام احدهم وليس عدم ثقه في البنت لكن هذا الشرع.......

ونصيحه للشباب الله يهديهم ،،،، الفتاه اللي تشوفها امامك هي الام والاخت والبنت والزوجه والعمه والخاله فهل ترضى بالخطاء عليهم،،، ماحد يرضى على محارمه ولذا لاترضوا لغبركم مالا ترضونه لانفسكم

[امـ حمد]

انا أرفض وبشده ان تطلع البنت مع أي أحد غير مع امها او اخوانها أو ابوها

لأن طلوعها من صديقاتها خراب بعينه ودمار للأسره

[واثق بالله]

حسبي الله ونعم الوكيل على
كل وحده ماتخاف الله وجرت
رفيقتها لطريق الدمار

حسبي الله ونعم الوكيل على كل وحده
تطلع من بيتها ونيتها فتنة الشباب

حسبي الله ونعم الوكيل على كل
وحده تطلع من بيتها بلبس غير
محتشم

حسبي الله ونعم الوكيل على
كل ولي أمر ما اتقى الله في
شوفاته وعطاهم الخيط والمخيط
ولا درى عنهم

[خليفـة]

ضد طبعا
مهما كانت اسباب الخروج

:)

[دااانة قطر]

المبدأ مرفوض عندي
بنتي ماتطلع إلا معاي
وماعندي تروح حتى تزور صديقاتها
اللي يبغي يجي حياه الله وانا موجوده بعد تحت عيني
أنا تربيت جذيه ومثل ما اتربيت بربي إعيالي
هذا مش لعدم الثقة في بنتي
ولكن للمحافظة عليها

(كلكم راع وكلكم مسؤول عن رعيته)


وشكر



ونعم الأم
ونعم التربيه

الله يقدرنا على التربيه الصحيحه
بناات هاليوم يحبون التقليد رفيجتي اهلها مايقولون شي رفيجتي تروح المكاان الفلااني ليش إحنا لا ( دوم أسمعها من بنتي )


الله المستعاان

[مونديال]

شكثر اسأله حطيت
الخلاصه الخروج للصياعه ضد
ولا ايش معنى بنات طالعين بروحهم

[مريومة]

السلام عليكم ورحمة الله وبركاته

وعليكم السلام ورحمة الله وبركاته

كل عائله تختلف عن غيرها ... عادات بيتهم تختلف عن البيت الآخر

ولكل عائلة رأي مختلف عن العائله الأخرى ,,

هناك عائله ملتزمة ومتقيدة بحدود وهناك عوائل متحررهـ
لأبعد الحدود ..

سؤالي للشباب ..

هل تــرضـــى لأختك الخروج مع رفيقاتها ؟ السبب؟

اذا كان من نوعية الاهل اللي عندهم حرية فالجواب نعم

واذا كان من العائلات المحافظة فالجواب لا

سؤالي للفتيات ..

ماذا تفضلين الخروج مع اهلك ام مع زميلاتك ؟؟

اذا كانت من نوعية الاهل اللي عندهم حرية فالجواب نعم

واذا كانت من العائلات المحافظة فالجواب لا




كلن على حسب طبيعته وطريقته في الحياة .. اهم شي رضى الاهل .. طالما ما يسوون شي خطأ

[Super Cool]

سؤالي للشباب ..

هل تــرضـــى لأختك الخروج مع رفيقاتها ؟ السبب؟
نعم لان اثق فيها و في تربيتها

مارأيك في منظر الفتيات في الأماكن العامة ( شـلــة بـنات ) ؟؟
انا اغض البصر دائماَ و ما اقعد اتلفت و بعدين اقول بنات صايعات....هذا هو النفاق بعينه و علمه

هل ترى فرق بين ذهابهم للأماكن العامة أو في منزل احدهم ؟؟
مافي فرق....لازم تكون محترمه فالمكانين....الأدب و الإحترام واجب سواء في مكان عام ولا مكان خاص

[حقيقه]

اففف من تفكير البعض على بالهم يوم البنات يطلعون مع بعض
يبون المغازل الحمدلله والشكر

[باسكن روبنز]

ضــــد ،

قصـــورهـآ بعـد ،:)

[فلتة زمانها]

اففف من تفكير البعض على بالهم يوم البنات يطلعون مع بعض
يبون المغازل الحمدلله والشكر

تفكيرهم على قدهم على بالهم كل الناس نفسهم

الواحد يسوي اللي يرضيه والناس اخر همه

بس غريبه في شباب علقوا وقالوا عادي خواتهم يطلعون
واثقين فيهم اشوف محد علق عليهم

[حقيقه]

تفكيرهم على قدهم على بالهم كل الناس نفسهم

الواحد يسوي اللي يرضيه والناس اخر همه

بس غريبه في شباب علقوا وقالوا عادي خواتهم يطلعون
واثقين فيهم اشوف محد علق عليهم


ايه والله صادقه
مايدرون لايعه كبودنا من الرجال
الله يقرفهم

[طارق العلي]

ايه والله صادقه
مايدرون لايعه كبودنا من الرجال
الله يقرفهم



اوووووف كلام قوي ياحقيقة . . داخله علينا بقوة شكلج مسويه حكومة حرب ضد الرجال مع الاخت مفلوته زمانها

[فلتة زمانها]

ايه والله صادقه
مايدرون لايعه كبودنا من الرجال
الله يقرفهم

ههههههههههه ااااااااااه ياقلبي ضحكتيني وانا تعبانه
تدرين تعليقاتج عسل :discuss:

[al_lord]

الكلام هذا ينطبق حتى على الشباب مش البنات فقط
ومش شرط ان البنت اللي تطلع مع زميلاتها منحرفه
والعكس صحيح فالكل يتبع البيئه التي يتماشى معها سواء فتاه او شاب

[مـــفاهــيم]

ضد ضد مع مع شو هالعقليات
ودي احلفكم ان محد قد اذى بنات بلاده حتى المحتشمات باساليب منحرفه عن الدين والعرف
عيشوا مع انفسكم بصدق وتعاملوا بوسطية وعقلانية مع شؤون الحياة كلها ومن اهمها التعامل مع ااهل بيتكم
ابرك قوامه...النساء من اول يجتمعون " شاي الضحى" ويطلعون يتزاورون من سكه لسكه محد قال انهم جابوا العار لأهلهم ولا خذهم محرم " حتى المحرم ما يعرفون متى يجب تواجده الله يرحمنا" المحرم في السفر لأكثر من 50 كم ...وبعدين من منكم مفضي نفسه بكل طيبه خاطر يروح مع محارمه للتسوق اول العشاء او الترفيه عن نفسهم " تهاوشون رايحين وتهاوشون في الرده"

عموما الموضوع هذا يخص المراهــــــــــــــــــــــــــــــــــــــــــــ ــــقين "ذكور واناث" وضوابط الأسره في التعامل معهم بحيث يعيشون زمنهم بكل عقلانية وبدون تعسف وبررررررررررفقه ومصاحبة الأسرة لهم.

قال ضد ضد مع مع..الله يرحم الأمه بهالعقول

[بوحارب]

الأهل هالأيام معطين البنات الضوء الأخضر!!!

يعني تلاقي البنت تدق سلف من الظهر
وتدخل فلم في السينما

وعقب تاخذ لفة في اللؤلؤة

وعقب تروح تكرك فالحي الثقافي

وبعدين عشا في فرايديز :(

ولفة في الكرنيش

واخر الليل ترجع البيت وكأنها رجّال يروح ويجي على كيفة ومحد يقدر يكلمه

ويقولون ليش العوانس كثير عندنا ههههههههه


وفي الختام مافيه احلى واجمل من البنت اللي قاعدة في بيتها معززة مكرمة :)

[ahad]

الدنيا سهالات وانا اختكم,,

[مهل]

كلن على حسب طبيعته وطريقته في الحياة .. اهم شي رضى الاهل .. طالما ما يسوون شي خطأ

رضى الله ثم رضى الاهل

[qatari 111]

الله يستر على بعض الردود

واتمنى بعض الاعضاء الاناث احترام الرجاجيل
ضد
خروج المرأه من الاساس
سواء مراهقه
او عدت المراهقه
او زوجه
او ام
اوكبيره بالسن

ومع
خروجها مع محرم اب _ اخ _ زوج _ خال _ عم _ جد

وكل واحد حر في تربية اهله
وانا اهم شي اني ارضي رب العالمين
وهم امانه في عنقي

الله يستر على الامه الاسلاميه

[هبوب الكوس]

الله يستر على بعض الردود

واتمنى بعض الاعضاء الاناث احترام الرجاجيل
ضد
خروج المرأه من الاساس
سواء مراهقه
او عدت المراهقه
او زوجه
او ام
اوكبيره بالسن

ومع
خروجها مع محرم اب _ اخ _ زوج _ خال _ عم _ جد

وكل واحد حر في تربية اهله
وانا اهم شي اني ارضي رب العالمين
وهم امانه في عنقي

الله يستر على الامه الاسلاميه

الحين بتهمونك انك من كوكب ثاني

ياريت يجاوبون على الاسئله علشان نعرف من اي كوكب هم :nice:

[باسكن روبنز]

الأهل هالأيام معطين البنات الضوء الأخضر!!!

يعني تلاقي البنت تدق سلف من الظهر
وتدخل فلم في السينما

وعقب تاخذ لفة في اللؤلؤة

وعقب تروح تكرك فالحي الثقافي

وبعدين عشا في فرايديز :(

ولفة في الكرنيش

واخر الليل ترجع البيت وكأنها رجّال يروح ويجي على كيفة ومحد يقدر يكلمه

ويقولون ليش العوانس كثير عندنا ههههههههه

وفي الختام مافيه احلى واجمل من البنت اللي قاعدة في بيتها معززة مكرمة :)

هههههههههههههههههه ،

اللهم لاشمـآآته ،

كل وحده مطلعه لها شعرتـين والويـه مكيـآآج فل آوبشـن بلفيت آنها بنـت ،

وبالآآآخيـر سوآلفهـآآ كآنها حـركـآآت غنـوم وعبـود! ،:rolleyes2:

وعقب ينزلون موآضيـع ويشتكـون ليش الشـبآآب يتحـرشون فينـآآ ،

آآخــص عليـهم ،:secret:

[مونديال]

ايه والله صادقه
مايدرون لايعه كبودنا من الرجال
الله يقرفهم

هع عيل ليش طالعه بروحها ولا مع بنات ... تتمشى يعني
تبي تتمايع بروحها وتطلع مواهبها ولا إذا بنت ناس وسنع
طلعت مع اهلها ولا تبي تمشي على حل شعرها

اي سبب مش مقبول على فكره اقناعكم مايقتنع فيه ابليس

[Super Cool]

هع عيل ليش طالعه بروحها ولا مع بنات ... تتمشى يعني
تبي تتمايع بروحها وتطلع مواهبها ولا إذا بنت ناس وسنع
طلعت مع اهلها ولا تبي تمشي على حل شعرها

اي سبب مش مقبول على فكره اقناعكم مايقتنع فيه ابليس


مع اني رجال بس اسألك بنفس المبدأ....ليش الرجال ما يطلع كل يوم مع ابوه ولا امه ليش دايماً مع ربعه؟؟؟؟

هل لانه طالع يغازل بس؟؟؟

كلن يرى الناس بعين طبعه

[مونديال]

مع اني رجال بس اسألك بنفس المبدأ....ليش الرجال ما يطلع كل يوم مع ابوه ولا امه ليش دايماً مع ربعه؟؟؟؟

هل لانه طالع يغازل بس؟؟؟

كلن يرى الناس بعين طبعه
اسمحلي مقياسك غلط ليش تبي الرجال يطلع مع محرم .... يحليله وهو مستحي عشان محد يتحرش فيه طالع مع امه ولا ابوه
اما النساءحتى في الدين لهم مقياس آخر في الخروج

بعدين تكلم بمنطق ... مش تقول الرجال يطلع مع امه

اقول الله الهادي بس

[دمي قطري]

انا ضد ان البنت تطلع مع صديقتهاا

مع العلم اني بنت مش ولد لكن احس الطلعه تلفت النظر ممكن التقي معااهم بالبيت او بنادي نساائي لكن برع نوو وي

بصرااحة المنااظر اللي اشووفهاا هالأياام والله تحززني كثر وادعي لهم والصرااحة احيانا ادعي عليهم على اهلهم

يعني معقوولة يشووفوون بنااتهم بهالمنظر وعاادي ماافيهم غيرررة

الله يستر علينا وعلى امة المسلمين ويدم الحشمة ياارب

[دمي قطري]

اففف من تفكير البعض على بالهم يوم البنات يطلعون مع بعض
يبون المغازل الحمدلله والشكر


حبيبتي رغم اني بنت الا اعتررض على كلاامج الرجاال ما يفكروون بهالتفكير الا اذا البنت مطلعه القذلة ومسووية البف وفاتحة العباية مطلعه السكني الماركة يابلفيت ومحد درا فيهااا
والعطر لين اخر المجمع هذا كلة شمعنااتة البنت ماا تبي المغاازل الا تبية بعينة وعلمة

اما اذا طالعه بحشمتها حتى لو متنقبلة لافة شيلتهاا عدل ومب مخرربطة في وجهاا لا بالله الشبااب بيحشموونهاا وحتى مب طالين في وجهااا

[هبوب الكوس]

مع اني رجال بس اسألك بنفس المبدأ....ليش الرجال ما يطلع كل يوم مع ابوه ولا امه ليش دايماً مع ربعه؟؟؟؟
هل لانه طالع يغازل بس؟؟؟

كلن يرى الناس بعين طبعه

مادري انت تتغشمر ولا من صجك يعني تقارن الرجل والمراه في الخروج

[Super Cool]

اسمحلي مقياسك غلط ليش تبي الرجال يطلع مع محرم .... يحليله وهو مستحي عشان محد يتحرش فيه طالع مع امه ولا ابوه
اما النساءحتى في الدين لهم مقياس آخر في الخروج

بعدين تكلم بمنطق ... مش تقول الرجال يطلع مع امه

اقول الله الهادي بس


انا ما تكلمت عن الحياء و لا على موقف الدين....انا بس حبيت ارد على نقطة "اذا بروحها يعني تغازل"....مب ممكن تكون يتيمة؟؟؟؟ هل كل ريال طالع بروحه طالع يغازل؟؟؟

سواء كان موقفك مع او ضد....و سواء كان من باب شرعي ولا لا....فالحالتين مالك حق تقول عن بنت انها تغازل بس لانها طالعه بروحها!!!!

احد الجيران توفى و عنده 6 بنات كانت اكبرهم في حينها فالاعدادية اعتقد هم الحين في عمر الجامعة او اكبر و امهم هي الزوجة الثانية....و من دولة خليجية ما عندها اهل في قطر....بكل برود بمجرد وفاة الأب باقي عايلة الاب قطعوا الصلة....هذيلا الحين اشلون يعيشون؟؟؟ يقظون مشاويرهم بالإيميل؟

[مونديال]

انا ما تكلمت عن الحياء و لا على موقف الدين....انا بس حبيت ارد على نقطة "اذا بروحها يعني تغازل"....مب ممكن تكون يتيمة؟؟؟؟ هل كل ريال طالع بروحه طالع يغازل؟؟؟

سواء كان موقفك مع او ضد....و سواء كان من باب شرعي ولا لا....فالحالتين مالك حق تقول عن بنت انها تغازل بس لانها طالعه بروحها!!!!

احد الجيران توفى و عنده 6 بنات كانت اكبرهم في حينها فالاعدادية اعتقد هم الحين في عمر الجامعة او اكبر و امهم هي الزوجة الثانية....و من دولة خليجية ما عندها اهل في قطر....بكل برود بمجرد وفاة الأب باقي عايلة الاب قطعوا الصلة....هذيلا الحين اشلون يعيشون؟؟؟ يقظون مشاويرهم بالإيميل؟
اول شي انا ماكان في ردي اي كلمه ( تغازل) ... لاتتجنى علي
ومن قال الي تطلع مع اهلها صايعه اعوذ بالله احنا كلامنا عن البنت الي تطله مع ربعها مش اهلها اما مقياس اليتيمه والي مالها حد انا قلت لها مقياس وحدود في الدين ...
اما الي متعطرين وتزينين والشعر على حله والخ ...
معروف ليش طالعين مايحتاج الواحد يقول ..

[بلوتنيوم]

اذكروا الله
الى يبي يطلع بروحه يطلع
والا يبي يطلع مع هله يطلع
والى يبي يطلع مع ربعه يطلع
والى يبي يطلع مع امه وابوه يطلع


كل واحد حر بتصرفاته :)

[qatari 111]

الحين بتهمونك انك من كوكب ثاني

ياريت يجاوبون على الاسئله علشان نعرف من اي كوكب هم :nice:

هلا هبوب الكوس
اخوي خلهم يقولون ويسون اللي يبونه اهم شي ما اكون امعه وامشي ورى الشيطان
وفالنهايه راح ربنا يحاسبني يوم الحساب

وسلامتكم :nice:

[Super Cool]

اذكروا الله
الى يبي يطلع بروحه يطلع
والا يبي يطلع مع هله يطلع
والى يبي يطلع مع ربعه يطلع
والى يبي يطلع مع امه وابوه يطلع


كل واحد حر بتصرفاته :)


بالضبط ولو الكل مشى على هالكلام الكل بيعيش مرتاح

[الحياة الخالدة]

لا إله إلا الله .. سيدنا محمد رسول الله ..

السالفة كبرت ..

أنا اقول لزوم نبلغ المراقب بالسالفة ..
وينج يا Rose ..

[مريومة]

اولا يفضل ان يكون الخروج للضروره وبمحرم او امره كبيره مثلا ام احدهم وليس عدم ثقه في البنت لكن هذا الشرع.......

ونصيحه للشباب الله يهديهم ،،،، الفتاه اللي تشوفها امامك هي الام والاخت والبنت والزوجه والعمه والخاله فهل ترضى بالخطاء عليهم،،، ماحد يرضى على محارمه ولذا لاترضوا لغبركم مالا ترضونه لانفسكم

ردك وااااايد عجبني

الله يرضى عليك ويرفع شانك دنيا وآخره

[طماطه]

باااختصااار ..

ضــــــــــــد ..

[ام السعف]

اممممم

:) ..................> ابتسامة صفرة من قلب على البعض ،،

نرجع وندخل الموضوع

ضد وبقوة:shy:

[Right]

الرجال إلي يسمح لبنته أو زوجته أو أخته أنها تآخذ راحتها على الآخر

و كلمة " على الآخر " تحتها مليون خط !!!

هذا يطلق عليه من أشباه الرجال بل عجوووووووز ودرقسون ينقاد مثل العنز

[بوحارب]

مع اني رجال بس اسألك بنفس المبدأ....ليش الرجال ما يطلع كل يوم مع ابوه ولا امه ليش دايماً مع ربعه؟؟؟؟

هل لانه طالع يغازل بس؟؟؟

كلن يرى الناس بعين طبعه

مثل ما قالوا الأخوان مقياسك غلط في غلط !! :)

الرجال من حقه يطلع اي مكان واي وقت وبدون اي قيود والتزامات غير البنت يا رجُل :)





خلك يا بوحارب محتار
وغيرك قاعد ياكل
لازم انقول حق الشيخ :shy:


شكلي ببلغ الشيخ بالسالفة :(

[لاجل QT]

اشفية الموضوع ولع

استهدو بالله ياجماعة الخير

[بوحارب]

اممممم

:) ..................> ابتسامة صفرة من قلب على البعض ،،

نرجع وندخل الموضوع

ضد وبقوة:shy:

ما تلاحظين بنات قبل جمعاتهم كلها في البيت

واما بنات الحين ماتحلى الجمعة الا في المجمع الفلاني والكوفي الفلاني :(

حق ليش وحق شحقه !!

[chillis]

والله بنظري ان الابنت عدت ال 25 سنه عادي تطلع مع صديقاتها

[هبوب الكوس]

اممممم

:) ..................> ابتسامة صفرة من قلب على البعض ،،

نرجع وندخل الموضوع

ضد وبقوة:shy:

وانا معاج وبعنف وصرار وترصد :shy:

[هبوب الكوس]

والله بنظري ان الابنت عدت ال 25 سنه عادي تطلع مع صديقاتها

اخبر اذا المراه تعدت الـ30 سنه تقدر تسافر بدون تصريح من الجوازات:secret: