علاوة الـ ( غربيين ) !!

[بن لادن]

Western Inducement Allowance

ترجمتها :

علاوة دافع للغربيين


بسم الله الرحمن الرحيم

كنت جالس مع واحد كندي الجنسية ، والشخص هذا له منصب في أحدى الشركات الحكومية ، وقعدنا نتكلم عن التقطير والرواتب والتطوير وغيرها من الأمور ، هو عربي لكن يحمل الجنسية الكندية .

وقالي ان قبل لايجي قطر قدم على وظيفة بجوازة الأصلي وجاته عروض عمل لكن برواتب ماتزيد عن 12 الف ريال ، وبعدها بسنة قدم مره ثانية بجوازة الكندي ، وجاته عروض مب طبيعية ، وراتبة حالياً 85 الف ريال ( الله يزيده ) . بنقول الرجال ذكي وشغول وغيرها من الأمور اللي (( القطري )) مايقدر يسويها !!!

لكن من بين علاواته ، فيه علاوة اسمها Western Inducement Allowance
، ومعناتها تحفيز الغربيين للعمل ، وهالعلاوة 7000 ريال شهرياً !!

وليش هالعلاوة اللي مالها داعي !! انشالله عمره ماتحفز ولا تشجع !! هل فوق راسة ريشة ؟ هل هو لاقي شغل في بلادة علشان يحتاج تحفييز ؟ ولا لازم يكون أشقر علشان يستحق الـ 7000 ريال ؟

كفاية ان لهم مميزات مب طبيعية مثل :
- عياله يدرسون مجاناً في أرقى المدارس
- تأمين صحي له وعائلته
- تذاكر درجة اولى له ولعائلته مره فالسنة ( طبعا يبيعونها ويطلعون لهم بـ 100 الف عالاقل )
- اشتراك لأي نادي يختارة
- بدل اثاث سنويا

يعني اذا صرف 1000 ريال فالشهر زين ، اللي باقي يروحون الجمعية ويشترون له اغراضة !!

ليش كل القطريين ماياخذون اللي انذكر !!


وفالنهاية يقولون تقطير وتقطير ، الله يعين شبابنا ، والله انا اشوف ان هل قطر اولى من الاجانب في هذي العلاوة ، ( أو ) تنقطع عنهم ومانرفع خشومهم ونعطيهم علاوة لانهم شقر ، كفاية العنصرية اللي فيهم وارفعين خشومهم علينا ، كفاية نظرتهم ومعاملاتهم للقطريين .

شوفوا اللبس اللي يلبسونه ، شوفوا السيارات اللي يركبونها ، شوفوا البيوت اللي يسكنونها ، شوفوا حياة عيالهم والترف اللي هم فيه ، هذا كله من خير قطر ، اللي القطريين ابدى فيه .

فالنهاية الكورة ماراح اتسوي لنا شي ، ومساعدات افريقيا ماراح تنفعنا بشي ، خلوا بترولنا وغازنا لنا ، ليش ( خيرنا حق غيرنا ) ، خلوا استثمارات قطر في قطر وليست في لندن ، خلوا الاجانب يراكضون حق قطر علشان يتسيحون فيها ويقطون فلوسهم فيها ، مب علشان يدورون شغل ويتكبرون علينا .

ادخلوا خريطة قطر في جوجل ، 90 % من قطر بر ، ليش هالبر مايتعمر ، ليش ماتنبني بيوت حق هل قطر من بدال شراء عقارات في لندن وفرنسا مثل هيرتز وغيرها .


هذا اللي عندي والله المستعان

[موضي قطر]

القطري يحمد ربه اذا عطوه علاوة " انفجار القولون " :(

[المرحب]

الله المستعان

[هدهد سليمان]

لا تعليق الصراحه !!!!!!!!!!!!!!!!!!

[Abdulraman]

:anger1::anger1::anger1::anger1:

[hamoor4ever]

توك تدري عنها من زمان ياخذونها وهاذي علاوه للاجانب الشقر والعيون الخضر فقط

[qatari911]

القطري يحمد ربه اذا عطوه علاوة " انفجار القولون " :(

وانت صادقه بيقولون مايستحق لانه قطري ابن البلد يعني <<<<<<الي مايطول العنب .....!؟؟:weeping:

[مونديال]

آآآآآآآآآآي والله قهر

وآنا علاوة الخطر مستانس عليها :anger1:
الواحد صاير يفكر والشيطان شاطر :eek5:
يهاجر كم سنه ويرجع بالجواز الجنبي ... عشان يغني فوق النخل فوق

((( مع ويهي مايهون قلبي احبه العنابي ))) الخوف من طرف واحد :secret:

[qatari911]

آآآآآآآآآآي والله قهر

وآنا علاوة الخطر مستانس عليها :anger1:
الواحد صاير يفكر والشيطان شاطر :eek5:
يهاجر كم سنه ويرجع بالجواز الجنبي ... عشان يغني فوق النخل فوق

((( مع ويهي مايهون قلبي احبه العنابي ))) الخوف من طرف واحد :secret:

من قالك ترى فيه ناس هاجرو ورجعو بالجوازات
الي كان ياخذ 10000 صار ياخذ 50000 و60000
انا شفت ناس رواتبها 90000 الف والله قهر والقطري نفس منصبه كان ياخذ 10000 شتقول
خلها على الله:weeping:

[حيهور]

ارزاق ياخوك

ترى ردهم جاهز

القطري موب حق شغل

عاد الزقت فينا ياخوك شنسوي

[qatari911]

http://2.bp.blogspot.com/_pXDgaqbi28k/S4RuIzuEJ6I/AAAAAAAAAV8/4ph8a_b6y74/s320/hand.jpg
الي يقولك مايشتغل رد عليه
اصابع يدك مو سوى :(

[bos3eed]

الحمدلله على كل حال, لاحول ولا قوة الا بالله

[meeemz]

العلاوه اسمها يرفع الضغط زين ليش الغرب والاجانب اللي من الشرق ؟ ولا العرق الابيض عرق اسمى وارفع ؟! والله هاي مبادئ هتلر :anger1: على الاقل النازيين تعصبوا لعرقهم ..واحنا بلادنا تمارس العنصريه على نفسها

[meeemz]

بس سؤال من اللي خصص هالعلاوه ؟ معقوله قطري ؟

[][ iMedia ][]

صادق . .
كل صحابي اللي معهم جوازات كنديه وامريكيه . .
رواتبهم فوق 40 . .
هم فلسطينين بالاصل . . لكن عـاشو ودرسوا هناك . .

( بديت افكر اروح للماستر ان شاء الله . . )

ليش انا اخذ 10 ( على سبيل المثال ) وغيري متخصص نفس التخصص
وراتبه 45 ؟ :)

[مجنون الفتك]

هــــــــــــــذي عـــــــــــــــــــــوايدهـــــــــــــــــــا قطــــــــــــــــــــــــر .

1- غلاء معيشة .
2- الواظائف صعبة للقطريين مهما كانت شهاداته وخبراته .
3- الراتب لا يساير معيشة الحياة والمستقبل .
4- صعوبة في السكن والأستقرار .
5-معرض للإحالة للتقاعد في اي وقت .
6- سوء في الرعاية الصحية والتعليمية .

علما بأن سيدي سمو الأمير لم يقصر بتوزيع الميزانيات لصالح المواطنين والشعب ولكن الخلل من المسؤولين الذين لم يوظفو الميزانية في مكانها الصحيح وفي خدمة الشعب القطري .منهم من ينهب بطريقته الخاصة ومنهم من يوفرها ويبخل على الشعب .

[الخير كله]

[ imedia ][;6905992']صادق . .
كل صحابي اللي معهم جوازات كنديه وامريكيه . .
رواتبهم فوق 40 . .
هم فلسطينين بالاصل . . لكن عـاشو ودرسوا هناك . .

( بديت افكر اروح للماستر ان شاء الله . . )

ليش انا اخذ 10 ( على سبيل المثال ) وغيري متخصص نفس التخصص
وراتبه 45 ؟ :)

روح فديتك خذ الماستر وتعال
ولا تدري ماسترك بدون جواز اجنبي قطه بحر

[الخير كله]

تحلطمو كنكم عيوز بايقين عشاها
ان شالله هالتحلطم يجيب اللي نبيه

[qatari911]

روح فديتك خذ الماستر وتعال
ولا تدري ماسترك بدون جواز اجنبي قطه بحر

:omen2:

[بو رااكان]

آآآآآه يا القهر والله حرام اللي قاعدين يسوونه فينا احنا عيالهم واخوانهم المفروض الاقربون اولى بالمعروف

مش الاجنبي اللي يلهف ويمش يده في الطوفه

[][ iMedia ][]

روح فديتك خذ الماستر وتعال
ولا تدري ماسترك بدون جواز اجنبي قطه بحر

تكسـير مجاديف تايم :(
.
.
اعتقد اللي يدرس بكندا ماستر ويستوفي جميع شروط الحصول على الجواز
يحصل عــليه على الفــور . .
المهم . . في وقتها يصير خير . . بدري على هالكلام ههههههه
.

عاد ماتدرين في ذاك الوقت اشغل واسطاتي بالجزيره واشتغل هناك ب 50 الف . .
بدون جواز ولا هم يحزنون ..
كل شي جايز :
< يمون على وضاح خنفر:tease:
:victory:

[الخير كله]

اهم شي خنفر...
والله لو جوازك واق واق انت:nice:

[][ iMedia ][]

اهم شي خنفر...
والله لو جوازك واق واق انت:nice:


:nice:

[روح الاطلس]

ممكن اعرف شلون احصل جواز كندي:shy:



وهل قانون قطر يسمح بحمل جنسية اخرى مع القطرية:shy:

عشان نخش العنابي ونطلع الثاني يوم نبي نشتغل

[ExploSivE]

ماعتقد يصير لانه انا المفروض عندي جوازين .. بس سألت الوالدة ربي يحفظها تقول القطري ممنوع يحمل جوازين :s

[موضي قطر]

ممكن اعرف شلون احصل جواز كندي:shy:



وهل قانون قطر يسمح بحمل جنسية اخرى مع القطرية:shy:

عشان نخش العنابي ونطلع الثاني يوم نبي نشتغل


تحمل تاخذ جواز من الدول المجاورة :(

[النديم]

القطري يحمد ربه اذا عطوه علاوة " انفجار القولون " :(

عورني قلبي من الضحك :thumbup:،
الله يسعدك، وابشري بعلاوة خطر ان شاء الله لزوم القولون

[][ iMedia ][]

تحمل تاخذ جواز من الدول المجاورة :(

والله يالغالي انا اللي اعرفه ان " القطري " ممنوع يكون عنده جوازين . .
اما بخصوص الحصول على الجنسيه الكنديه . . فالشروط طويله عريضه
ومن اهمها ( 7 ) او ( 7 ونص ) بالايلتس . . :tease:
هههههههه . . وان تكون دارس تخصص مطلوب عندهم . .
او شئ من هذا القبيل . .
مع كشف حساب من جميع البنوك الي لك راس مال فيها . .

وفي شروط طويله عريضه .. لازم الشخص يستوفيها عشان
يكون من حقه انه يكون " مواطن " هناك :tease:

تحيااتي . .

[Cooki]

والله حتى لو انفجر قولونك وانت بالدوام بيقولون مب منا ..

هذا من الكيما والشاي الكرك على الريج...:anger1:

خلوها على الله ..

والمشكله في هالاجانب مبطليييين عيونهم علينا ويقولون الماي والكهربا ابلااااااااش ..:eek5::eek5:

اللهم لك الحمد والشكر على كل حال:weeping::weeping:

[الطيبة كلها]

ما ادري اجوز بناتي من اجانب ---- اول مره اشوف بلاد يفضلون الاجنبي على ولد البلد من بيحميها ومن اللي يفديها ومن ومن ومن -- يكفي انهم من ورانا ما يحبونا ويطنزون على غبائنا

[STAR]

توك تدري عنها من زمان ياخذونها وهاذي علاوه للاجانب الشقر والعيون الخضر فقط

والهنود والجالية الاسيوية لهم نصيب من هالعلاوة؟!‏

[MoneyMaker]

اخوي هالشي عادي جدا نفس الشي القطريين ناخذ هالعلاوات اذا في بعثه خارجيه او فترة عمل من 3 الى 6 اشهر في اوروبا وامريكا وكندا واليابان.تختلف النسبه في كل بلد
مثلا في العراق هالايام الاجنبي ياخذ مالايقل عن 5000 دولار بدل.
الشي اللي بتلاحظ ان الاجانب معظمهم رواتبهم من شركات اجنبيه ربحيه لها تاريخها في الموارد البشريه ونادر ماتشوف الموظف منظلم حتى المندوب اللي راتبه 6000 ريال تلاقي عنده تأمين له ولعايلته وله تذاكر سنويه.

الغلط عندنا من ادارة العمل عايشين على قوانين قديمه الضحيه فيها المواطن.

[hamoor4ever]

والهنود والجالية الاسيوية لهم نصيب من هالعلاوة؟!‏

لا فقط الاوربيين او الامريكيين وكندا من ظمنهم وكذلك استراليا على حسب علمي

[sendarala]

حسبي الله ونعم الوكيل

نبي الدرجة اللي موقفينها من زمان

يا ظالم لك يوم تنسأل فيه آآآآآآآآآآه يا ربي

[Bin Hood]

في مدرس في الجامعة عنده جنسيتين الاولى يمنية وهي الاصلية و الثانية عمريكية

الريال قابلينه بالجنسية اليمنية بس الجامعة قالوا له اذا يبت الجواز الامريكي بنعطيك دبل راتب

الريال هب عارف السبب ليش بيعطونه دبل بمجرد ان يبدل الجواز بنفسه قايل

For a reason the are going to Double my salary !!!!!!!!!!!

[بو رااكان]

ليتني امريكي

[بن لادن]

والله ماينلام واحد من الربع الله يوفقه ويسهل له أمورة لما كان يقول يبي يهاجر أمريكا . ووالله سواها وصار له 9 سنوات ماندري عنه شي ، وكان مسؤل ومدير في احد الدوائر الحكومية ..

وانا شخصيا اعرف 3 اشخاص طلعوا ودرسوا فالخارج ولم يعودوا لدولتهم (قطر) .

أكتبوا في الجوجل ( نظرةالأجانب للعرب ) وشوفوا وانصدموا من اللي راح يطلع لكم ، بينما نظرة العرب للأجانب العكس تماما ، هم الراقيين الفاهمين المتعلمين ، هم القوى العظمى اللي محد يقدر يكلمهم واللي عندهم سفارات تحمييم واتجيب لهم حقوقهم رغم أنف القوانين .

ووالله بلدانهم هي اللي عازتهم ومسوية لهم قدر وأحترام وتقدير ومكبرتهم على المجتمعات الثانية .. مثال سريع ،، في الجواز الأمريكي ، الصفحة الأخيرة ، وبكذا لغة ، اتعرفون ايش مكتوب ؟؟ أن حامل هذا الجواز أمريكي الجنسية ، وان أمريكا مستعدة ان تخوض الحروب من أجل حامل هذا الجواز .. يالله ياعرب ، كل واحد يروح بسرعه يفتح الصفحة الأخيرة من جوازة ، واقروا ايش مكتوب : ) ،، اقل شي مكتوب هذا الجواز وسيلة سفر ويمكن استرجاعها للدولة في اي وقت ..


"الساكت عن الحق شيطان أخرس، والناطق بالباطل شيطان ناطق"

وقال النبي - صلى الله عليه وسلم – : (إن الناس إذا رأوا المنكر فلم يغيروه أوشك أن يعمهم الله بعقابه)

وقال عليه الصلاة والسلام : ( من رأى منكم منكرا فليغيره بيده فإن لم يستطع فبلسانه فإن لم يستطع فبقلبه وذلك أضعف الإيمان)

وفالنهاية أقول للمسؤلين اللي يقرون الموضوع ويقدرون يغيرون هالأشياء ، أحنا الحمدلله في خير ونعمة ، والحمدلله ماعلينا قصور ، لكن العلاوة هذي مالها داعي ، وكفاية ننفخ هالأشكال ونعطيها اكبر من حجمها ، وهم فالواقع ولا شي ، ولاهم أحسن من أهل قطر ، واللي سوا قطر هم أهل قطر ، واللي عمرها ووصلها رجال قطريين ، وكلام النشيد الوطني يثبت كلامي !!

((كلكم راع وكلكم مسؤول عن رعيته، فالإمام راع ومسؤول عن رعيته، والرجل راع في أهله ومسؤول عن رعيته، والمرأة راعية في بيت زوجها ومسؤولة عن رعيتها، والولد راع في مال أبيه ومسؤول عن رعيته، والخادم راع في مال سيده ومسؤول عن رعيته، وكلكم راع وكلكم مسؤول عن رعيته)).

وفالنهاية أقول لبعض العرب اللي مستانسين على حالهم ، خلوا اكبر كعكة فالعالم تنفعكم ،

وداخلين موسوعة جينيس .. بالله عليكم هل هذا انجاز ؟ اكبر كعكة فالعالم ، واكبر مجبوس فالعالم واكبر كنافة فالعالم ، والله انهم يضحكون علينا واحنا مستانسين ..


ومع السلامة

[المـهـفـة والـســفـرة]

نسيت العرضة يااخوي ههههه شاركت وياهم.


وأن جيت لكلمة الحق ,
أنا أتوقع السبب .... أن الرجاجيل اللي يقولون كلمة الحق راحوا.
الأ من رحم ربي.

لما أرجع البيت من المدرسة وأسولف مع أمي على الغدى
تقولي الحريم اللي يتكلمون بوطني الحبيب
أكثر من الرجاجيل.


ولدكم طالب أول ثانوي:nice:

[h9466]

[ iMedia ][;6906172']والله يالغالي انا اللي اعرفه ان " القطري " ممنوع يكون عنده جوازين . .
اما بخصوص الحصول على الجنسيه الكنديه . . فالشروط طويله عريضه
ومن اهمها ( 7 ) او ( 7 ونص ) بالايلتس . . :tease:
هههههههه . . وان تكون دارس تخصص مطلوب عندهم . .
او شئ من هذا القبيل . .
مع كشف حساب من جميع البنوك الي لك راس مال فيها . .

وفي شروط طويله عريضه .. لازم الشخص يستوفيها عشان
يكون من حقه انه يكون " مواطن " هناك :tease:

تحيااتي . .

اخوي من قالك شروط طويلة عريضة؟؟
انا واحد قدمت لكندا وجاتني موافقة ...عيش بس هناك 3 سنوات سواء متواصلة او متقطعة وتحصل على الجنسية والجواز...وتامين صحي وتعليم مجاني لاولادك,,وسكن في حال ماعندك سكن...وبدل بطالة الى ان يقلون لك عمل يناسب وضعك...وفوق كل هذا احترام في كل مطارات ودول العالم...
وهذا موقعهم الرسمي الحكومي...يعني لاتزور غيره ..
www.cic.gc.ca

[الـقـاسـي]

لو عندك جواز امريكي تتغير كل القوانين لعيونك مستحيل يسقطون منك الجنسيه القطريه ..
يعني لو يجي واحد جوازه قطري بيكون راتبه 10 الاف ريال مثلا ونفس الشخص بنفس المؤهلات بس حصل على الجنسيه الامريكية كم بيكون راتبه ومميزاته ياترى ؟؟

هل الرواتب على الجواز ولا على الشهاده والشغل

[بن لادن]

لو عندك جواز امريكي تتغير كل القوانين لعيونك مستحيل يسقطون منك الجنسيه القطريه ..
يعني لو يجي واحد جوازه قطري بيكون راتبه 10 الاف ريال مثلا ونفس الشخص بنفس المؤهلات بس حصل على الجنسيه الامريكية كم بيكون راتبه ومميزاته ياترى ؟؟

هل الرواتب على الجواز ولا على الشهاده والشغل


الشهادة ؟!!!

ولد عمي خريج احدى الدول العربية ، درجة بكالريوس ، لما راح يشتغل قالوا له صدقها من التربية والتعليم ، وماصدقوها له ، بينما أجنبي خريج من نفس الجامعة الشهادة اتشغله بدون تصديق !!!

ووالله ان نص الاجانب بقطر شهاداتهم مضروب جنبها ، والله يشهد على كلامي ان في اجنبي عنده شهادة جامعية ومزورة ، واللي قالي عنها صديقة اللي الاول غدر فيه ،، ولما بلغت مديرة جابه وسحبه فالكلام وقاله قدم استقالتك .. بس قدم استقالتك !! والفلوس اللي خذها مدة 6 سنوات !!

وانا شخصيا اعرف ناس عندهم شهادات ثانوية مزورة من دول اخرى ومعترف فيها ويشتغلون سينيريه !!

( والله كلمة مسخرة شوي )

خلونا في موضوعنا اللي هو علاوة الاجنبي الغربي ، ولاتقلبون المواجع في مواضيع ثانيه ..

[مونديال]

من قالك ترى فيه ناس هاجرو ورجعو بالجوازات
الي كان ياخذ 10000 صار ياخذ 50000 و60000
انا شفت ناس رواتبها 90000 الف والله قهر والقطري نفس منصبه كان ياخذ 10000 شتقول
خلها على الله:weeping:
اخوي 90000 كم زرقه فيها ..:tease:
وكم يوميته في الشغل :anger1:
يعني شيسوي مخترع طياره

[بن لادن]

اخوي 90000 كم زرقه فيها ..:tease:
وكم يوميته في الشغل :anger1:
يعني شيسوي مخترع طياره

مستكثر الـ 90000 ؟

هذا متوسط رواتب الأنجليز في قطر :)

في واحد ينقال له Mr Phillip Thorpe راتبة 1.000.000 ريال قطري شهرياً ‏ :)

[][ iMedia ][]

اخوي من قالك شروط طويلة عريضة؟؟
انا واحد قدمت لكندا وجاتني موافقة ...عيش بس هناك 3 سنوات سواء متواصلة او متقطعة وتحصل على الجنسية والجواز...وتامين صحي وتعليم مجاني لاولادك,,وسكن في حال ماعندك سكن...وبدل بطالة الى ان يقلون لك عمل يناسب وضعك...وفوق كل هذا احترام في كل مطارات ودول العالم...
وهذا موقعهم الرسمي الحكومي...يعني لاتزور غيره ..
www.cic.gc.ca


اعيش هنــاك " بطالي " ثلاث سنوات ؟؟
وضحلي اكثر لو تكرمت :victory:

[حسن]

يستاهلون هل الجانب متغربين ويخدمونه بيض الله وجيهم والله يعطيهم العافيه

[hxamad]

خيرنا لغيرنا عشان يمدحنا برع

[chillis]

الله المستعان

[قهوجي]

علاوه غرب
طيب احنا المسلمين عطونا علاه اسلام
حمد الله علي نعمه الاسلام
اخوي الاداره مسويه واحد اجنبي يعني بالعربي يبي يوظف كله اجانب اروبا والغرب ولعلمك مقيمين العرب مايشغلهم اذا راتبه واطي يوظفه
ولولا التقطير كان قال للمواطن مافي مكان
يعني مخ االاروبي والامريكي طازه العرب زباله؟؟؟؟
العربي ممكن تهتمه بتطويره يصير احسن من كل العالم
وعلي فكره هاذول يكونو مو لاقين لقمه ياكلونها في بلادهم عشان شذي يجي في الخليج اموت حر بس اعيش
وقابلت ناس والله العظيم شهاداتهم دبلوم مو بعد بكالريوس ما اقول عن الراتب بس يعطونه بدل سكن 30000 بس في شركات خاصه

[تركي محمد]

يستاهلون هل الجانب متغربين ويخدمونه بيض الله وجيهم والله يعطيهم العافيه

الموضوع كله ما شدني غير رد الحبيب اللي يرفع الضغط اكثر من الموضوع نفسه

[الصريحه]

ايه اقول خلنا ماندري احسن
علشان لاننقهر ونسوي اضراب سلمي عام

[ساكن قطر]

اللــه كــريم

الواحد يرضى بالي عنده ويطلب الزياده من الرازق سبحانه

هذي ارزاق واحنا الحمدلله احسن من غيـرنا

الحمدلله على كل حال

[بن لادن]

يستاهلون هل الجانب متغربين ويخدمونه بيض الله وجيهم والله يعطيهم العافيه

متغربين ويخدمون بفلوس ، مب علشان سواد عيونك

[almaf1a]

اللحين بيجون اعضاء وبيقولون
احمد ربك ترى الاجنبي يدفع كهرباء وماي وانت لا :tease:

[qatari911]

اخوي 90000 كم زرقه فيها ..:tease:
وكم يوميته في الشغل :anger1:
يعني شيسوي مخترع طياره

ماتدري:eek5:
من زماااااااااااااااان ماكلين الاخضر واليابس:(

[شوشو 1574]

لا تعليق

[قطريه ماركه]

حسبي الله ونعم الوكيل ...

خل يسمعون وطني الحبيب و يشوفون المره اللي صاحت اليوم تدور وظيفة !!!!!!

[المخباط]

حسبي الله ونعم الوكيل ...

خل يسمعون وطني الحبيب و يشوفون المره اللي صاحت اليوم تدور وظيفة !!!!!!
لهاالدرجة :(
لايكون تعدادنا بالملايين وحن ما ندري

[الحظ]

القطري يحمد ربه اذا عطوه علاوة " انفجار القولون " :(

لكم الله يا أهل قطر لكم الله يا أهل قطر لكم الله يا أهل قطر لكم الله يا أهل قطر لكم الله يا أهل قطر لكم الله يا أهل قطر لكم الله يا أهل قطر لكم الله يا أهل قطر لكم الله يا أهل قطر لكم الله يا أهل قطر لكم الله يا أهل قطر لكم الله يا أهل قطر لكم الله يا أهل قطر لكم الله يا أهل قطر لكم الله يا أهل قطر لكم الله يا أهل قطر لكم الله يا أهل قطر لكم الله يا أهل قطر لكم الله يا أهل قطر لكم الله يا أهل قطر لكم الله يا أهل قطر لكم الله يا أهل قطر لكم الله يا أهل قطر لكم الله يا أهل قطر لكن كل الاسي

عن معاذ بن جبل رضى الله عنه قال :قال رسول الله صلى الله عليه وسلم :لن تزول قدم عبد يوم القيامة حتى يسأل عن أربع خصال : عن عمره فيما أفناهُ وعن شبابه فيما أبلاهُ وعن ماله من اين أكتسبه وفيما أنفقهُ وعن علمه ماذا عمل فيه : رواه البزار و الطبراني

[d522]

مواضيع تنزل ... وردود مختلفة .... ولا حياة لمن تنادي

[مستجدة]

7 الاف بس عشااااااااان تحفيز :omg:
مجرد علاوه اكثر من راتب الشؤون 3 اضعاف ومن راتب المتاقدين
مساكين يا أهل قطر الحمدلله انه الشياب والعجايز مايقرون اللي نقاره كان جاتهم ازمه نفسيه وقلبيه من القهر :secret:

[alsahm 12]

والله قهر .. فيه موطنيين من المتقاعدين معاشاتهم لاتزيد عن 6000 ريال وخصوم منها باقساط السكن يعني يصفاله 3000 ريال .. والاجانب فوق 80000 الف ..

[بوخالد911]

حسبي الله ونعم الوكيل

:(

[بوخالد911]

حسبي الله ونعم الوكيل ...

خل يسمعون وطني الحبيب و يشوفون المره اللي صاحت اليوم تدور وظيفة !!!!!!

وبالاسبوع الفايت
اتصل 1 يتكلم عن وضع أخته
وانها اضطرت تتنازل عن شهادتها الجامعية والاكتفاء بالثانوية
عشان تشتغل



لا حول ولا قوة الا بالله
:secret::secret::secret:

[السهم الملتهب]

المخرج عايز كداااا

[مساهمة بسFresh]

اخوي انت تاكدت ان العلاوة هاذي موجودة؟ لان حسب علمي انها مب موجودة
لاتقول لي قال لك انها موجودة لاني انا بعد اقول لك مب موجودة:shy:

[القيسي]

حسبي الله ونعم الوكيل

[فلهاااا]

بنقول الرجال ذكي وشغول وغيرها من الأمور اللي (( القطري )) مايقدر يسويها !!!

انا مو مستغرب من الموضوع انا مستغرب من فكرتكم عن انفسكم

ليش هو بشنو احسن يعني؟؟؟؟؟؟؟

[سعيد حمد]

ياليت اعرف شنهي شهادته او خبرته عشان ياخذ 85000

انا مستعد ادرس واجتهد واجيب نفس شهادته ومن الجامعه الي درس فيها بس

ابي راتب مثله ....

[الجوهرة الثمينة]

عندنا علاوة الكهربا ببلاش :weeping:

[علي رشيد]

.



لا تعلـــــــــــيـــق !!

[شيخ الديرة]

يستاهلون هل الجانب متغربين ويخدمونه بيض الله وجيهم والله يعطيهم العافيه

دقيقة يا جماعة, كم مرة واحدكم راد طبيب أجنبي يعالجه؟ أو راد حكم اجنبي بمباراة كورة؟ او افتخر بحاجة ماركة مستوردة؟ أو أو أو

نظرة المؤسسات للأجنبي هي نتيجة طبيعية لما ذكرته أعلاه, لأن المؤسسة هي تابعة لمدراء تتخذ نفس التصرفات اللي ذكرتها

أما بالنسبة للرواتب, ما يحيرني دائما الربط الغريب الذي يقول أن زيادة رواتب الأجانب هي سبب نقصان رواتب المواطنين, أريد واحد يفهمني هذا الربط أرجوكم.

[Dawn]

معروف بعد ان الكنديين والامريكان من اصول عربيه ياخذون اقل من الغربيين القبيليين ... ترا هالمعلومه صحيحه 100% ، يعني هذا الكندي لو كان ولد اصل مب مجنس كان بياخذ اكثر من 85

وانا كانوا عندي زميلتين من نفس الجنسيه بنفس المسمى الوظيفي بس وحده متجنسه من اصل عربي ووحده اوروبيه اصيله ،،، الاوروبيه الأصيله راتبها اعلى بوايد من المجنسه :) ...
اللي في الموارد ( في المؤسسات اللي تشغل اجانب وايد ) اكيد يعرفون هالشي .. بس اسم البدل ( علاوة الغربيين ) مادري هو صحيح ام غير ذلك ...

[Dawn]

دقيقة يا جماعة, كم مرة واحدكم راد طبيب أجنبي يعالجه؟ أو راد حكم اجنبي بمباراة كورة؟ او افتخر بحاجة ماركة مستوردة؟ أو أو أو

نظرة المؤسسات للأجنبي هي نتيجة طبيعية لما ذكرته أعلاه, لأن المؤسسة هي تابعة لمدراء تتخذ نفس التصرفات اللي ذكرتها

أما بالنسبة للرواتب, ما يحيرني دائما الربط الغريب الذي يقول أن زيادة رواتب الأجانب هي سبب نقصان رواتب المواطنين, أريد واحد يفهمني هذا الربط أرجوكم.


نعم نعم فيه رابط منطقي يالشيخ ..
جهات العمل لها ميزانيه محدده كل سنه ما تتعداها ... وهذه توزع على رواتب الموظفين ،، فتخيل لو اجنبي اخذ راتب 100ألف مثلا راح يضطر المدير لتعيين اجنبي رخيص ( خل نقول من جنسيه عربيه او هندي مثلا ) بدل من المواطن ... حتى لا يتجاوز الميزانيه ...... وترا هذا الحاصل في التوظيف ولهالسبب فيه مشكله في قبول وتوظيف المواطنين لانهم يكلفون الدوله ،،، ومابقى لهم شي من الميزانيه ، والسبب من ؟؟ الخبير ابو عيون زرق ....

[قسماً]

آآآآآه يا القهر والله حرام اللي قاعدين يسوونه فينا احنا عيالهم واخوانهم المفروض الاقربون اولى بالمعروف

مش الاجنبي اللي يلهف ويمش يده في الطوفه


الاجنبي اذا لهف ومش يده في الطوفه حلو على قلبهم لكن القطري حرام ياكل من خير بلاده ويمش يده في الطوفه ... مايصيييير
المسكين يكرف طول الشهر عشان الفتافيت اللي بتروح في يومين بس
الرواتب العدله لاهفها الاجنبي
سبحان الله ويش اللي قلب الحال هالشكل!!!!
شنو مصلحتهم في هذا كله!!!

[jwar7]

حسبي الله ونعم الوكيل

[بوفصول]

ضريبة الغاز والبترول..

مايطلعونه ابلاش .. خذ وعط وعط .. لين ماتقعد على الحديدة

[روح الشمال]

والله انتوا يا اهل قطر ناس فسقانين الصراحة ولا بعاجبكم العجب ولا الصيام برجب

ياخي انتوا في خير ونعمة

مايكفي انكم صرتوا اغنى دولة في العالم ؟!!!!!!!

يـــــــــــــــا اخي ليــــــــــــش حاسديــــن اخوانا الاجانب المساكين اللي على قد حالهم

احنا نفس الشي واحسن منهم ( بكثـــــــــــــــ !!!!!!!! ــــــــــــــــــــــــر )

شوفوا امتيازات القطري

1- تقــــــــــــــــــــــــاعد مبكر

2- بند مركـــــــــــــــــــــــــزي

3- عمالة فائظـــــــــــــــــــــة

4- ديـــــــــــــــــــــــــــــــــــــون وفوائد مركبة ( لين تموت ) والدين مايتغيير هوهو !!!

5- صحة ومستشفيات خاصة للقطريين !!! من افضل دكاترة العالم !

6- ارخص دولة خليجية

7- فرص عمل ( على افا من يشيل )

8- المخالفات المرورية الادنى في الخليج !!!

9- لاتوجد شكاوى في وطني الحبيب صباح الخير

10- لاتوجد تظلمات وظيفية

11-
11-
11-
11- تبون تعرفون وشو 11 ؟

بتييني جلطـــــــــــــــــــــــــــــــــــــــــــة من القهر

[قسماً]

والله قهر .. فيه موطنيين من المتقاعدين معاشاتهم لاتزيد عن 6000 ريال وخصوم منها باقساط السكن يعني يصفاله 3000 ريال .. والاجانب فوق 80000 الف ..


اعرف شخص بعد مااحالوه على التقاعد الاجباري صفاله 6000 وشوي، البنك ياخذ منه 3500 دين ، واللي يصفى له مايسد لاقساط السكن ، يعني حتى القرض اللي بيبني به ارضه انحرم منه
يالله فرجك يارب

[قسماً]

يستاهلون هل الجانب متغربين ويخدمونه بيض الله وجيهم والله يعطيهم العافيه


ماشاء الله قلبك مكسور عليهم انهم متغربين !!! وبشنو خدموك هالاجانب المتغربين !!!! بلم الخير من هالبلد وتعمير بلادهم ! اشهالتفكير!!
كان من الاولى لو كنت مواطن يكون قلبك على المواطن اللي مثلك :omen2:

[alkuwari4u]

والله قهر

ليش هذي التمييز ضد القطريين في قطر

ولا السؤال اللي مو قادر احصل له جواب من زمان هو " اللي يتخذون هذي القرارات مو قطريين؟ فليش يسون شي في اهلهم واهل بلادهم؟؟؟؟"

ولا نقول الا لا حول ولا قوه الا بالله

[قسماً]

القطري يحمد ربه اذا عطوه علاوة " انفجار القولون " :(


ولا يمكن يدفعونه تعويض على الانفجار والتسبب في ترويع الاجانب:protest:

[نجدي قطري]

معروف بعد ان الكنديين والامريكان من اصول عربيه ياخذون اقل من الغربيين القبيليين ... ترا هالمعلومه صحيحه 100% ، يعني هذا الكندي لو كان ولد اصل مب مجنس كان بياخذ اكثر من 85

وانا كانوا عندي زميلتين من نفس الجنسيه بنفس المسمى الوظيفي بس وحده متجنسه من اصل عربي ووحده اوروبيه اصيله ،،، الاوروبيه الأصيله راتبها اعلى بوايد من المجنسه :) ...
اللي في الموارد ( في المؤسسات اللي تشغل اجانب وايد ) اكيد يعرفون هالشي .. بس اسم البدل ( علاوة الغربيين ) مادري هو صحيح ام غير ذلك ...

يعني هذي حالتنا من قبليّة إلى قبليّة.

[قسماً]

ضريبة الغاز والبترول..

مايطلعونه ابلاش .. خذ وعط وعط .. لين ماتقعد على الحديدة


وين ضريبة اباءنا واجدادنا اللي خدمو هالبلد وقضو عمرهم يخدمونه !!!! مب عيالهم اولى بخير البلد اللي تعبو هم فيها !!!!
يجي واحد من برا ويعيش احسن عيشه والمواطنين يتلتهون في بلادهم
والله قهر :anger1:

[(بوطلال)]

الاجنبي يحصل على راتب يستحقه ويعتبر نفسه شريك في كل انجازات الدوله والبترول والغاز . الانجليز هم من فجر البترول من تحت الارض وكذلك الشركات الاجنبيه الاخرى هي من اكتشفت الغاز . والامريكان هم السبب بعد الله سبحانه في صد الاحتلال العراقي الي كان متوقع للخليج . لذلك هؤلاء لهم امتيازات ولهم حقوق مفروضه ومواطنين دولهم كذلك . هذا اذا استثنينا خبراتهم وعلمهم وحاجة الدوله لهم .

[M O H A D]

آآآآه يالقهر :weeping:

بتجيني جلطه و انا في عز شبابي :weeping:

[CH Engineer]

وليش هالعلاوة اللي مالها داعي !! انشالله عمره ماتحفز ولا تشجع !! هل فوق راسة ريشة ؟ هل هو لاقي شغل في بلادة علشان يحتاج تحفييز ؟ ولا لازم يكون أشقر علشان يستحق الـ 7000 ريال ؟

اعتقد هالعلاوه قيمتها 14000 ريال
يمكن الرجال مب انجليزي قبيلي " لازم عيونه زرق او عالاقل اسمه مسيحي"


الاجنبي يحصل على راتب يستحقه ويعتبر نفسه شريك في كل انجازات الدوله والبترول والغاز . الانجليز هم من فجر البترول من تحت الارض وكذلك الشركات الاجنبيه الاخرى هي من اكتشفت الغاز . والامريكان هم السبب بعد الله سبحانه في صد الاحتلال العراقي الي كان متوقع للخليج . لذلك هؤلاء لهم امتيازات ولهم حقوق مفروضه ومواطنين دولهم كذلك . هذا اذا استثنينا خبراتهم وعلمهم وحاجة الدوله لهم .

تقصد الانجليز هم من احتل العالم وسرق ثرواته فالعصور الوسطى والسبب في تأخر وتخلف دول العالم الثالث
شركات البترول موجوده في كل دول العالم سواء في الصين ولا الهند ولا امريكا الجنوبية..

اعرف ردك هو للسخريه على الوضع الحالي
بس الله يعينك لو فعلا هذا تفكيرك

[wadha-qa]

قهرررررررررررر :(

[العقل الحر]

الاجنبي يحصل على راتب يستحقه ويعتبر نفسه شريك في كل انجازات الدوله والبترول والغاز . الانجليز هم من فجر البترول من تحت الارض وكذلك الشركات الاجنبيه الاخرى هي من اكتشفت الغاز . والامريكان هم السبب بعد الله سبحانه في صد الاحتلال العراقي الي كان متوقع للخليج . لذلك هؤلاء لهم امتيازات ولهم حقوق مفروضه ومواطنين دولهم كذلك . هذا اذا استثنينا خبراتهم وعلمهم وحاجة الدوله لهم .

اهاااا

يعني علشان اجداده فعلوا كذا ... احفادهم يتكافئون ... ممتاز ... معادلة طيبه

ممكن تذكر لي جميع الذين قاتلوا مع الشيخ جاسم ومن مات معه شهيد ... ايش مميزاتهم ؟

وهل ممكن انمشي حق احفاد الصحابه الذين فتحوا العالم وادخلوا العجم الاسلام ... مكافأت ومميزات اكثر من غيرهم ؟

هل لازم يمشون رواتب من الديوان لأبناء جمال عبدالناصر لانه سبب قوي لتعجل الانجليزي اعلان استقلال قطر والكويت والامارات ؟

ننتظر الاجابة

بعدين اول من اخترع واستخرج النفط هم الامريكان والانجليز مجرد ناقل حالهم حال غيرهم اليوم من صينيين وكوريين

[intesar]

ياربي صار لي فترة أقول ليش الهنود صاورا أكشخ من القطري .. واللبنانيين سياراتهم رزةأكثر.. الحين عرفت ليش.. بصراحة مخي راح يودي ويجيب .. ودخل في أماكن ممنوعة .. الحمد على سلامه مخي ..
ياحيف عليكم ياحيف .. ياتني غصة ١٠٠ ألف الا ١٤ ألف ..

[مملوحة الفال]

ممكن يلاقون لي وللبنات اللي معاي وظيفة يعتبرونه تحفيز بس بدون فلوس

[امل الحياه]

:anger1: حنا نبي علاوة بدل تحمل بلاوي وجود المقيمين عندنا :anger3:

[tradesman]

ياخي احمد ربك الكهرباء والماي ببلاش

<<< دوم اسمع ذي العباره ذلونا

وفوق ذي ارض وقرض
<<< الي من سنين واحنا نحلم نفس بيض الصعو

بس مسكين الاجنبي

تارك دولته وجايبينه يشتغل <<<مو كانه هو الي مقدم الطلب

بس الحمد لله

الراتب يوصل لين نص الشهر وبقية الشهر سلف من الربع وعلى الكيما ههههههههههههههههههههه


اللهم لك الحمد والشكر على الصحه والعافيه

[استغفرالله]

يستحق الزيادة مسكين اما هل قطر ما يستحقون

[The Watcher]

هالعلاوة موجودة عندنا في الشركة
وغيرو مسماها Global Inducement Allowance
وهي عبارة عن نسبة من الاساسي .. يعني مثل طبيعة العمل في الحكومة

وهي تعتمد على شيئين: الوظيفة نفسها .. والجنسية
بمعنى .. لو مهندس كيميائي وقطري .. ممكن ياخذها
ولو مهندس كيميائي امريكي .. بياخذها .. بس غالباً بتكون اكثر

وهي تتراوح مابين 5% الى 70% من الراتب الاساسي

[jeep-srt8]

والله انقهر يوم اشوف هالرواتب والمميزات تروح لغير ابن البلد ؟؟؟؟؟؟؟؟؟؟؟؟؟؟؟؟؟؟؟

جر 80 الف وبعد يبي زيادة راتب 7 الاف ؟؟؟؟؟؟؟؟؟؟ 7الاف هذول انا راتبي اقل من نصهم هههههههههههههههههههههههههههههههههههههههههههههههههه ههه

لاحول ولا قوة الا بالله

ياجماعة لنا الجنة ولهم الدنيا

[المفترسه]

وفي علاوه يعطونها للعاملين في القطاع الطبي سمعت عنها
اسمها بدل سكر سمعتها من فرنسي اصله مغربي بس مو متاكده