ممشى بعض السيارات يدعو للريبة .... من عنده خبره يفيدنا

[الراجي ربه]

هل من المعقول سيارة gx 2003 ممشاها 120 ألف أو 130؟؟

وهل الفحص الفني ممكن يطلع ممشى السيارة؟

وإذا أردت أعرف ما إذا كان ملعوب في الطبلون ، وين أشيك؟

ثم :

ألا يتقي الله اللي يلعبون في الطبلونات ؟

ألا يخافون أن يمحق الله بركة بيعه بسبب لعبه في الطبلون ؟

وألا يدركون أن هذا غش وليس من أخلاق المسلمين؟

ثم كم الفارق المادي الذي سيوفره له لعبه في الطبلون؟ عشرة آلاف ؟!! بس مقابل إيش؟
مقابل ظلم في رقبته، وضياع للأمانة، وذهاب للمروءة، وعدم حب للآخرين، وغش وخداع وتحايل.

وهل يرضى لنفسه أن يشتري سيارة طبلونة مخروط وملعوب فيه أم أنه من أصحاب المادة الذي لا يشتري إلا الجديد؟

والله أشياء تجعل الإنسان يحتار في ممشى بعض السيارات ويخاف من المغامرة بشراء سيارة إذا كان هذا حال بعض المسلمين (ولا أعمم) أسأل الله أن يهدينا ويهديهم.

[qatar2090]

انا معاك اخوووى وبقوة مع انى مبدل العداد ولا ناوي ابيع الموتر ولو بعت الموتر بقوله الممشي الحقيقي

وللاسف البعض يفتخر اذا نصب على شخص ثاني

[بويعقوب]

السلام عليكم ورحمة الله وبركاته

يعطيك العافيه على طرح هالموضوع المهم وخاصة في هالوقت لانه صار بزياده .

انا باقولك سالفة صارت لرجال اعرفة , اشترى رنج روفر وكان العداد ماشي 62 ألف ( تقريبا )

المهم بعد ماتمت البيعه الرجال خذ الموتر للوكالة على اساس يشيكه وتفاجأ بأن الموتر ماشي 120 ألأف في آخر مره دخل فيها الوكالة

الله يسامح الشخص اللي باعة الموتر لانه كذاب وغشاش لانه طلع معروف عنه هالشئ (( لتصريف السياره ))

نصيحة يا اخوان اللي بياخذ موتر جديد , اول شئ يتصل الوكالة ويسأل عن الممشى وآخر مره دخل فيها الوكاله

بس في بعض الاوقات الواحد يكون مجبور يغير ممشى الموتر للاسباب التاليه :
1- اخترب طبلون السياره (( العداد )) ممكن انه ياخذ طبلون جديد اصفار أو مستعمل
بس في المواتر الالمانية العداد يكون هعلى القرأة القديمه لانه الكتروني

2- رجال عنده موتر ومايفكر يبيعه ولما وضب المكينه رجع العداد علشان يعلرف الموتر كم بيمشي معاه بعد التوظيب او تبديل المكينه

3-شخص مايحب يشوف موتره ماشي وااايد , قام ورجع الطبلون الى رقم اقل بهدف الاستخدام وليس لغش الناس .

4- عطل في عداد الموتر اللي في القير ممكن يفصل مده وبعدها يصلحه ويكمل على الرقم اللي وقف منه .

ملاحظه هامه : كل الحالات اللي ذكرتها للازم وواجب على البايع انه يذكرها للشاري
إلا اذا المالك القديم ماقاله عن الممشى الحقيقي

وبشكل عام تقدر تربط ممشى السياره بنظافتها العامه من جوانب كثيره .


والله يكفينا واياكم من شر الغش التجاري في كل شئ


والسموحه على الاطالة

[بوصلووح]

اي والله صدقت صج شي يخلي الواحد يرتاب

بس مب الكل اخوي
انا كان عندي موتر 2006 مطلعه من الوكالة آخر 2008 لأن ماكان في الا هالموديل
بعته آخر 2009 و كان ماشي 55 تقريباً و انا مالعبت فيه بس في واحد اتصلي و تم يقول غريبه ليش العداد جي ...

المهم أسأل راعي الموتر و انت اصلاً بتحس من كلامه و عيونه اذا صاج ولا قاعد يكذب

[silver stone]

طبعا هالتصرف لا اخلاقي وغير مقبول بالمره
لكن الواحد اذا بيشتري موترممشاه قليل لازم يسال عن السبب
لأنه احيانا راعي الموتر يكون يستعمله كموتر ثاني في الويك اند مثلا خاصه اذا كان موتر سبورت
وفي ناس ما تستعمل مواترها للدوام اذا كان مكان العمل بعيد

[الراجي ربه]

مشكورين إخواني على مروركم الكريم

وبهذا التفاعل نحاول نقضي على هذه الظاهرة السيئة بإذن الله تعالى

فنوصل الوعي لكثير من الإخوة اللي يستهينون بمثل هذه الأشياء

واللي كما ذكر الأخ qatar2090 البعض يظنها شطارة وذكاء إذا نصب على شخص ثاني

وإذا حصلت هناك أشياء خارجة عن إرادة الشخص في تغيير الطبلون أو عطل فكما ذكر الأخ بو يعقوب
(وواجب على البايع انه يذكرها للشاري)

المشكلة أنك أحياناً تشتري من معرض وليس من شخص (أخي بو صلووح) وإلا لو كان راعي الموتر أمامك ممكن تشعر مدى صدقه أو كذبه..

حسبي اقول الله يهديهم والله لا يبتلينا

[JoOoOoOoJ]

اول شي مشكور على موضوعك الرائع لكـن انا واحد من الناس احس ممشى الموتر ضلم في البيعه ...

يجيك واحد بيتهم في الدوحه ودوامه في لفان والرجال كبير وماله في السوالف الموتر يكون ورده بس ممشاه وايد...

عندك مثلن في السعوديه ماقامو يهتمون في ممشى المواتر لانه صراحه شي عادي...

والموتر مايبين من الممشى يبين من اشيا ثانيه مثل صوت الموتر وهو واقف وصوته لين يمشي وانتو اخبر يعني في هالمواضيع...
عشان ترتاح اخوي لاتحط في بالك الممشى ويمكن راعي الجي اكس ممشاه 130الف يمكن كان موتر البيت وبعدين هو استعمله ...


والله يوفقنا واياكم

[الجوكر90]

السلام عليكم
الشيخ مب شرط
يعني كان عندي لكزس فورويل 2002 لين شهر 3 سنه 2009 كان ماشي 131 الف
ومب لاعب فالعداد
مرات تحصل موتر ورده ومرات الموتر مايسوى شي
يعني يبين يوم تسوق الموتر
وبالتوفيق ان شاء الله

[بويعقوب]

السلام عليكم
الشيخ مب شرط
يعني كان عندي لكزس فورويل 2002 لين شهر 3 سنه 2009 كان ماشي 131 الف
ومب لاعب فالعداد
مرات تحصل موتر ورده ومرات الموتر مايسوى شي
يعني يبين يوم تسوق الموتر
وبالتوفيق ان شاء الله

ازيدك من الشعر بيت

قبل شهر لقيت لكزس 2002 ماشي 66 ألف :nice:

بس الموتر طلع مصبوغ كامل :eek5:

انا عن نفسي ما اهتم في الممشى لاني مره خذت فكسار 99 كان ماشي 420 ألف :omg:

قولوا ما شاء الله :anger1:

والحمد لله ماشتكيت من شي وكنت اسافر فيه واروح العديد ولاعمره قال " بم " :nice:

[kuwaiti]

حسبنا الله ونعم الوكيل
والله هل شي صاير بزياده
وعندنا في الكويت بعد نفس الشي
وغلب الى يسون هل حركات اهل المعارض( قلت اغلب مو كلهم )
انا الحين شايف لي سياره فى معرض في الدوحه ماشيه 37 الف موديل 2007
والله انى متردد وخايف من ممشاه

[][ iMedia ][]

ناس ما تخاف ربها
من سنه اشتريت موتر موديل 2006
وكان الممشى 65 !
انا للاسف صدقت كلام الرجال . .
وبعد فتره زادت الخرابات . . وكلمت واحد في شركه فاحص
يشيكلي على الممشى الحقيقي .. في اخر مره ترخصت فيها السياره
وكان الممشى 246 :( . .
ما كملت عندي اسبوع وبعتها على طول ..
حسبي الله ونعم الوكيل فيه . .

[nnoodd]

والله يالربع الحين تقريبا كل المواتر القديمه ماشيه شي بسيط
وتستغرب والله من حقه الشاري
بس يالربع يبين في الفحص اذا غير الطبلون ولى شي واذا غيره اعرف انه في شي
والله يالربع اول امس فاحص موتر قالي الرجال ماشي 60 موديل 2001
والله الواحد يشك انا عندي موتر 2009 وماطلع فيه وايد ماشي 60
لا وطلع فيه بلاوي كل واحد يبغي يغش وافلوس حرام

[ممنوع اللمس]

انا اللي محيرني عندي سياره 2006 وكارفها وماشيه 130 الف
وعندي سياره 2009 وماشيه 137 الف؟
الكروزرات الجديده فيها موضوع ولا فهمته تمشي خطوتين العداد نقز عشره كيلو
شسالفه مادر ي:(
تسلم عالموضوع اخوي

[U Welcome]

الله المستعاااااان
واهم شي نظافه الموتر من قير ومكينه وبدي
وعمر الممشى ما يعيب الموتر دام راعيه محافظ

بس سالفه الغش زادت واجد وخصوصا في الكروزرات
وين بيرووحون من رب العالمين

[وبشرالصابرين]

موضوع مهم

اخوي عن تجربه

مااصدق اي ممشى بسيط في معرض

مره فحصت موتر ماشي 20 الف بس وديته الفص في حادث خشن لين نص السياره

ومره فحصت موتر ماشي 17 الف وقف على في الطريق شغل معارض

ومره شريت موتر ماشي 50 كلها خربات شكل العداد مغير

والحين شريت موتر ماشي 100 الف الحمد لله ممشاه الطبيعي من معرض محترم وثقه

والحمدلله



_________________________

الحين اي موتر ممشاه بسيط على طول اشك خاصه في مواتر فيها عيب من المصنع
وكلها خربان كل واحد يشتري الموتر بعد اسبوع يبيعه

[boamir]

والله وااايد سمعت سوااالف الغش
وحتى واحد من الربع موتره موديل 98 كان ماشي 500 وخلاه اقل من 100 وباعه
وعقبها باعها بسعر حلو ودش مشروع ولما إستغربت من السعر قال لي إنه رجع العداد
وقلت له لو تاخذ 40 الف حلال ابرك لك من 50 الف حرام وقلت له يكلم الرجال إنه ممشى الموتر مب حقيقي
وقال له عن الممشى وإذا له خاطر يرجع السياره ماعنده مشاكل وسبحان الله هذاك الرجال قاله عاادي اهم شي الموتر عاجبني وفحصته ومافي مشااكل

<<يعني تخييل فلوس حرام صاارت حلاال

وانا واايد شفت هالشي وفي ناس حتى لو تنصحهم ماافي فاايده اهم شي فلووس حلال ولا حراام
الله يكفينا شرهم ويهديهم إن شاء الله

[abdulla4u]

ممشى السياره من وجهه نطري مايضر كثيرا لنا استعملت سياره ممشاها كان 360 الف وقعدت وياي لين 510 الف كم وبعدين بعتها واحين اشوفها عند راعيها ميه ميه ... اهم شي صيانه المكينه اول باول وايل القير لزم تتفقده كل فتره وفتره والسيور وربلات السياره وانا تقريبا في السنه مماشي حلو 40 الف كم الين 55 الف كم ...
وبعدين مشكله الغش موجوده بكل مكان واسباب وايد بس الي يبي الرزق الحلال وراحه البال مارح يغش عشان زياده الف او الفين ريال .... وياكل نفسه وهله مال حرام وبيكون ظلم المشترى ..

[qatari 111]

السيارة بتعرف اذا كان ممشاها قليل او كثير
عندك السياره من داخلها السكان والطبلون والكراسي تقدر تميز من استهلاكها
وعندك من تحت السياره بعد يبين نظافتها
وعندك مقابض البيبان تحصلها مرتخيه مب مشدوده

اما اللي يقول انه فحص السياره وممشاها 17 الف ومن حولها واكتشف انها مدعومه لين الطبلون ترى في سيارات تندعم وهي توها طالعه تتسجل فالمرور او فالمينا او راعيها توه ماقال بسم الله الا وجاك واحد محترم ويدرول ويدعمه ....

الله المستعان

[خليفـة]

ممكن اخوي .. ومعقول ولكن حسب مالك السيارة

مثال :
الوالد .. سيارته كروزر 2004
للحين ما دشت الـ 100 ألف كم

عادي .. تصير وانا اخوك

:)

[hamoor4ever]

عادي يصير عندي موتر 2006 ماشي 28 الف بس
وعندنا واحد موديل 2002 ماشي اقل من 50 الف
وعندنا موتر 96 ماشي تقريبا قريب 60 الف

احيانا يصير تلاعب احيانا لا واهم شي حاله الموتر قبل الممشىممكن يقول ماشي شوي بس تعبان او العكس صحيح

[theeb_qatar]

Gxr 2001 ابيض
العداد 87 الف كيلو

جاته دعمه من قدام .. الويـه + خفس بانه ..

هذا موتري للدوام ..
للحين فيه مواتر ممشاها محترم ..

[الراجي ربه]

سلمت أناملكم إخواني الأعزاء

كل ما ذكرتموه صحيح

جائز يكون الموتر موتر البيت أو الوالد

وجائز يكون اندعم أول ما خرج من الوكالة أو وهو رايح المرور

والمتفق عليه أنه يوجد بعض الحركات من البعض في اللعب في الطبلون، وكما ذكر بعض الإخوة بعض السيارات القديمة الآن ممشاها يدعو للاستغراب

والجميل أنه ظهرت بعض التجارب في أن الممشى ما يضر والأهم نظافة السيارة

أشكركم مرة أخرى على ردودكم الكريمة

[atb]

والله كلامك صحيح بس اكيد في مواتر قديمه ممشاها قليل
في م ل 350 ماشي 65 الف بس بالاسبوعين يطلع مره
للوالد الموتر 2003..انا راي نحط اسامي المعارض الثقه فيهم ونرتاح
يعطيك العافيه على الموضوع المهم