:::...لهالدرجة مايحسون فينا...؟؟؟...:::...احم

[The Master]

احم احم...ثم احم...


لهالدرجة مايحسون...لهالدرجة مب امعبرين...لهالدرجة معطينا السييييييييين...
ولا الكلام مايوصلهم؟؟!! فا هذي نقطة مهمة...


من خلال هذه المقدمة البسيطة...ابتدي موضوعي...

باتكلم عن الاباء والامهات...اللي مايحسون في عيالهم...

مثال...

جاسم ولد حمد...وجابر ولد صباح...

اعمارهم اتراوح مابين ال 10 و 12 سنة...
ساكنين في فريج واحد...ويلعبون دايما مع بعض...يعني ربع...

وحالة العائلتين المادية متقاربة...وتقريبا نفس البيت ونفس السيارة...

في يوم من الايام...جابر عزم جاسم في بيته...طبعا مب اول مرة يتزاورون...متعودين على بعض...
وفي ذاك اليوم...ابو جابر وصل البيت...ركض جابر يسلم على ابوه...هلا هلا ب جبور...اليوم جايب لك هدية...الله صدق يبا...وش جبت لي؟؟...جبت لك سيكل عشان تستانس واتسوق...يا سلاااااام...شكرا يا يبا...

في ذاك الوقت جاسم كان موجود...وطاح خاطره في السيكل...وركض على طول حق امه يقول لها ابغي سيكل نفس جابر...والام ماقصرت كلمت ابوه حمد وجاب له سيكل...احسن من اللي عند جابر...

ومع الايام...والسنين...اي شي يكون عند حد فيهم...لازم اتشوفه عند الثاني...مقارنات...وتحدي...وغيرة...


وفي سنة من السنين...
صارت حالة عائلة حمد احسن من صباح...وصار عندهم خير...

يوم من الايام...والعيال اعمارهم صارت في الثلاثينات...
جاسم وجابر يسولفون...


جابر...هلا جاسم...وش سويت في موضوع معاشك؟؟؟...اخبر كانت عندك مشكلة انه مايكفيك ومضيق عليك؟؟؟...اي اي معاك حق...لكن الحمدلله تيسرت الامور الحين...اها الحمدلله شي طيب...بس تعال كيف عندك سيارة نفس اللي عندي غالية واتقول معاشك مايكفيك؟؟؟...افا عليك يا جاسم...الله يخلي لي الوالد...ماقصر معاي...عطاني من جيبه...ودفع عني نص مبلغ السيارة...ماحب يشوف ولده في هالحال...الله يجزاه خير ابوك...وبيض الله وجهه...وتستاهل كل خير ياجابر...بس ليه خذت نفس سيارتي الغالية؟؟!! ليه ماخذت ارخص منها على الاقل اتوفر...هه ياجاسم نسيت...اي شي عندك لازم يكون عندي والعكس كذلك...لكن ياجابر صار لنا فترة قاطعين هالشي وذلك بحكم ظروفك المادية وتدهورها...وظروفي انا المادية وتحسنها...كلامك صحيح يا جاسم...لكن الحمدلله ربك يسر امورنا وزادنا من فضله...وابوي ماقصر...وعطاني من اللي الله عطاه...الا ماقلت لي ياجاسم...انت كيف خذت هالموتر؟؟؟ كاش؟؟...لا وين كاش يارجال...اقصاد ودين...وللحين ادفع فيها...وكاسرة اظهري...وامضيقة علي عيشتي...طيب ابوك وينه؟؟؟ اخبر ان ماعليكم اقصور...وسمعت ان دخلكم زاد عن قبل...وحتى ابوك قام يدفع عن الناس ويساعدهم...فا وينه عنك؟؟...اي الله يجزاه خير مب امقصر...لكن لاني ابغي اكون احسن منك واشتري سيارة غالية هو اللي بهدلني...وبلغت الوالدة اتوصل كلامي لابوي...لكن ماشوف اي رد منه...يعني ابوك يشوفك على هالحاله التعبانه وماساعدك؟؟؟...يمكن لاني سويت هالشي من نفسي فا كنه يقول لي استحمل ماجاك...بس وان كان...انت ولده...وتستاهل كل خير...مادري يا جابر...يعني يا جاسم بتقول لي لهالدرجة مايحس فيك؟؟؟...ولا ما وصلوا له اعلوم حالتك وبهدلتك؟؟؟


ان شاء الله وصل المثال...
يتكلم عن واقع انعيشه...وانشوفه...قدام عينا...ناس انعرفهم او ما انعرفهم...سمعنا وشفنا...

طبعا يكون عذر الاب هو...خله يعتمد على نفسه...هو اللي جاب هالشي لنفسه...هو غلطان ولازم يتحمل...مافي شي يجي بالساهل...التعلم والخبرة مايجي الا بتعب وصبر...

وهم بعد شفنا ابهات مب امقصرين على اعيالهم...وامدلعينهم اخر دلع...حتى معاشهم مايحركونه...

وهم بعد شفنا ابهات...يعاملون اعيالهم بالتفرقة...يعني منهم من يدلعه ويفسفس...ومنهم من يقول خله يتعلم ويستفيد...


في النهاية هي وجهات نظر...واكيد اغلب الابهات يدورون مصلحة اعيالهم...مافي شك...

لكن السؤال...واوجهه لكم يا القراء الاعزاء...

وشو شعورك انت...لما يكون ابوك من هالنوعيه...اللي اوصفها ب لهالدرجة مايحس فيني؟؟؟


وانتظر ارائكم اللي تثري الموضوع...
ومن خلال هالموضوع لربما بعض الابهات بيحسون ب عيالهم...ويعدلون اوضاعهم...او يصلبونهم...احم


ويامرحبا بكم...

[loay_qatar]

والله العظيم انك جامد
اللبيب بالأشارة يفهم
قصة رائعة والمغزى واضح
فصاحة وتشبية تحسد عليه
بالتوفيق

[R 7 A L]

الله يجيب الخير

وان شاء الله متفائلين خير للايام الجاية
والحمدلله ابائنا ماقصروا معنا هو اول من ساند عيالهم قبل الجميع

[ام عبدالعزيز]

ربيت اعيالي مو كل شي انشا الله ولبيه..

يعني شي لهم حايه فيه اشتريه شي مالهم حايه ماشتريه..


ومب شرط اي شي عند فلان يكون عندهم..

والله يعيني على تربيتهم...


لاهنت اخوي

[قطري رزه]

اسقاط ولا اروع . . . وان لفي البيان لسحرا

بس محد حولك تأذن في خرابه

[بوحمد111]

الله المستعان وانا اخوك تفائل بالخير والخير جاي لا محال

[حسن]

يمكن الاب له وجهه نظر في تعليم الولد معنى قيمه القرش وشلون يحافظ عليه وكيفيه التصرف بالفلوس مهب يتبع الفخقخه والمظاهر اللي مالها داعي ولاتنسى انه المال في الاخير بيرجع للولد

[وهم قطر]

ماشاء الله عليك نعم هذا واقع نعيشه

بحط نفسي مكان الأب حتى لو الله منعم علي بالخير

الأ ب له نظره في ابناءة والأبناء منهم القنوع ومنهم المفسفس

فدائما الأبن القنوع طلباته بسيطه ومستجابه والأب يبي يسعد ابنه

والمفسفس راعي فشخره نظرته عاليه ومستحيله فتراه مضيق على الأب

طلباته عسره فلما يرفض الأب الأبن يركب راسه وياخذ الشي من غير موافقه

الأب فيكون عقابه من الأب بأنه يحمل الأبن المسؤليه الكامله حتى يعرف مدى حملها

[دلة الرسلان]

يمكن لأنهم مايحسون أنك ولدهم :(

[دلة الرسلان]

يمكن الاب له وجهه نظر في تعليم الولد معنى قيمه القرش وشلون يحافظ عليه وكيفيه التصرف بالفلوس مهب يتبع الفخقخه والمظاهر اللي مالها داعي ولاتنسى انه المال في الاخير بيرجع للولد


اكيد أن الوالد له نظرة بعيدة ويبغي يربي عياله على الاعتماد على النفس ولكنه في نفس الوقت

عينه عليهم أذا طاح الواحد منهم تله فوق وهو معصب ويقول تراها يافلان آخر مرة تصطلب

ولا خليتك بروحك .

طبعااااا هذا لو كانت علاقة الحاكم بالمحكوم علاقة أبوية حميمة ولكن الحقيقة غير ذلك فالعلاقة

بين المحكوم والحاكم هي علاقة رسمية جامدة باردة لذلك أذا للمواطنيين حقوق فلن يطالب بها

ألا ممثليهم في البرلمان المنتخب .

[عابر سبيل]

انا اشوف..ان اسلوب (بو جاسم) التربوي..
يخلق (رجال) ع الاقل يشيلون اعمارهم..
اذا ما يشيلون غيرهم من اللي هم في عازه حقيقية..

اما..اسلوب (بو جابر)..فهو اسلوب ما ينتج عنه
الا اتكاليين و اعيال ما هم بقد المسؤولية..
و الدليل..ان (جابر) من ايام السياكل..لين ايام المواتر..
و هو عايش "عاله" على ابوه ..
و ابوه ما عا قادر يتخلص من تبعات ابتلائه بهالولد..

اما جاسم..فخلاص..تعلم على (عزة النفس) و صار هو
قد قراراته..حتى لو كانت ديون تكسر ظهره..
بس..هو رجال...و لو ابوه في يوم من الايم احتاج
هو اول من بيوقف معاه..
اما..هالجابر..فما اظنه الا انه اول واحد ..
بيقول حق ابوه..
لو احتاج..روح شوف لك ابو يساعدك و ايكد عليك..
و هو..بيدور له ..حد يكون بديل حق ابوه..

حتى..لو انه يندعس تحت (زوجه) غنية..تكد عليه..
المهم..
جاسم..بيكون رجال..في عين ابوه و امه و هله..
و جابر..بيكون موب قد المسؤلية..حتى في عين..زوجته
و اعياله!..
*
*
،،
فيه فرق يا ماستر..
بين (بو جاسم) اللي لو نادوه الناس
(بو جاسم) حس انهم ينادونه باسم رجال..
يفخر فيه كل ابو و يتمنون اعيالهم مثله..

و بين (بو جابر)..اللي ما يتمنى حد يطري
اسمه ولده في مجلس من مجالس الرجال..
لان بيعرف في قرارة نفسه..
انهم يتطنزون على ولده (العاله)..
و بتحصله ايقول..بينه و بين نفسه..
او لو جلس بروحه مع (ام جابر)
اللي جاية تطلب شي جديد حق ولدها..المدلل..

(يا من شرا له..من حلاله ..عله)!

[ميموري]

طرح جميل

واسلوب ولا اروع

بس انا كنت افكر في جيرانهم الباقين

محمد ولد زايد << اكيد من طخة جابر اذا مو اعلى

ومتعب ولد فهد<< اكيد اردى من جاسم تلقونه للحين راكب سيكل جاسم والا جابر


" انا متقصده بكتابة فهد "

[ميموري]

انا اشوف..ان اسلوب (بو جاسم) التربوي..
يخلق (رجال) ع الاقل يشيلون اعمارهم..
اذا ما يشيلون غيرهم من اللي هم في عازه حقيقية..

اما..اسلوب (بو جابر)..فهو اسلوب ما ينتج عنه
الا اتكاليين و اعيال ما هم بقد المسؤولية..
و الدليل..ان (جابر) من ايام السياكل..لين ايام المواتر..
و هو عايش "عاله" على ابوه ..


من دروس تربية الطفل

"لا تبخل على طفلك بالعاطفه بالذات في السنوات الاولى من العمر

وذلك بالحنان والعطف والبذل"

وقول الرسول عليه الصلاه والسلام

"خَيْرُكُمْ خَيْرُكُمْ لِأَهْلِهِ وَأَنَا خَيْرُكُمْ لِأَهْلِي"





فيه فرق يا ماستر..
بين (بو جاسم) اللي لو نادوه الناس
(بو جاسم) حس انهم ينادونه باسم رجال..
يفخر فيه كل ابو و يتمنون اعيالهم مثله..

و بين (بو جابر)..اللي ما يتمنى حد يطري
اسمه ولده في مجلس من مجالس الرجال..
لان بيعرف في قرارة نفسه..
انهم يتطنزون على ولده (العاله)..


([color="black"]يا من شرا له..من حلاله ..عله)!

الرجولة تحتاج الى تعزيز ثقه بالنفسه وبالذات في الصغر

والاهم الاكتفاء الذاتي

[لاجل QT]

دور الاب او الوالد الحقيقي يبين في المحنات والصعاب..واكيد قلب الوالد والاب حنون وعطوف وماراح يتخلى عن ابنة الذي علمة ورباة:)

بس اذا كان قلب الاب مايحس بابنة اكيد في شي غلط :)

[بوخالد911]

تسلم للموضوع

[cavok]

يبى خلها على اللة

[العقل المدمر]

الحمد لله ابوي معودني من خامس ابتدائي ان مصروفي فيدي حق طول الشهر
اصرفه متى مابي بس ماطلب زياده عليه
وان بغيت شي اغلى من المصروف اجمع شهور

لازم الابو يخلي عياله يعتمدون ع نفسهم
مايدري هو متى الله ياخذ امانته
شيسوون عياله من عقبه ؟؟

يعني هالولد بدل مايقول مايحسون فيني
خله يقول انا ريال وعندي معاش ومعتمد ع نفسي ليش اخذ من ابوي اللي صرف علي سنين
يعني خلاص معاشه حق عياله للابد ؟؟
انا اعرف ناس هم يصرفون ع ابوهم بعد التقاعد

باختصار .. الابو يعلم عياله يعتمدون ع نفسهم من وهم صغار ولما يكبرون المفروض يشيلون نفسهم بنفسهم ويتحملون نتيجه قراراتهم

طبعا انا مع مساعده العيال فحاله مثلا لو توصل السجن او توصل ان الاكل مايكفيهم لي نهايه الشهر (واعرف ناس وصلوا لهالحاله عقب ما اسرفوا حق المفوشر !!) بس طبعا هب علطول بعد

ويعطيكم العافيه :shy:

[سحـابة خيـر]

طرح رائع ومميز الصراحه

لكن بوجه نظـري

يبي يعــلم ولده اهميه الصرف والاقتصـاد ,,ويعتمد على نفســه

يعني مو كلشي على ابوه ,,بهالطريقه مايكون تعلم شي ,,لازم يعرف شلون الاقتصاد وان هالامر صعب

يعني كان يعرف ان ابوه مابيساعده وان بيكون عليه ديون وهالسوالف ,,ليش اخذ السياره الغاليه؟

لازم الانسان يتعلم مـبدأ بالحيـاه ,,

[غير عنهم]

((هذا القدوه الحسنه ))
عن رسول الله صلى الله عليه وآله وسلم : (أنه نظر إلى رجل له ابنان فقبّل أحدهما وترك الآخر ، فقال صلى الله عليه وآله وسلم : «فهلاّ ساويت بينهما») (1) وقال صلى الله عليه وآله وسلم : «اِنّ الله تعالى يحبّ أن تعدلوا بين أو لادكم حتى في القُبَل» (2).
وأكدّ صلى الله عليه وآله وسلم على العدالة في العطاء والهدية سواء في الاَكل والشرب والثياب والالعاب إلى غير ذلك كما جاء في قوله صلى الله عليه وآله وسلم : «ساووا بين أولادكم في العطيّة ، فلو كنت مفضلاً أحداً لفضلّتُ النساء» (3).
وقال صلى الله عليه وآله وسلم : «اعدلوا بين أولادكم في النحل كما تحبّون أن يعدلوا بينكم في البرّ واللطف» (4). وبهذا النهج اعان الوالد اولاده على بره

[دااانة قطر]

ربيت اعيالي مو كل شي انشا الله ولبيه..
يعني شي لهم حايه فيه اشتريه شي مالهم حايه ماشتريه..
ومب شرط اي شي عند فلان يكون عندهم..
والله يعيني على تربيتهم...
لاهنت اخوي

صح لسااانك
أهم شي ان مايكون فيه تفرقه من الآباااء مع أبناائهم
وبعدين ليش كل شي عند صااحبتي احط عيني عليه وأبي نفسه

أنا أعااني من هالمشكله لدرجة ان صديقتي المقربه اذا كاانت معااي وجيت باشتري شي تحااول قد ماتقدر انها تكرهني في الشي وبعدها اشوفه عندها أو انها تااخذه جداامي وعمري ما تضاايقت من هالحركه
لكن هي مسألة قنااعه وحب الخير للي حوااليك وأقرب النااس لك ولا احب اضغط على أهلي ولا احملهم مسؤؤليه فوق طااقتهم


بما اني توظفت فأنا اللي المفروض أعينهم
وجهة نظر

[The Master]

والله العظيم انك جامد
اللبيب بالأشارة يفهم
قصة رائعة والمغزى واضح
فصاحة وتشبية تحسد عليه
بالتوفيق

هلا بك اخوي...وتشكر على الكلام الطيب...
وياك يارب...

ودنا نسمع تعقيبك لمثل هالامور...واتفيد ونستفيد...

بس تراني مافهمت عليك لما قلت المغزى واللبيب بالاشارة...ليه انت وش فهمت :) ...احم

يامرحبا بك...

[The Master]

الله يجيب الخير

وان شاء الله متفائلين خير للايام الجاية
والحمدلله ابائنا ماقصروا معنا هو اول من ساند عيالهم قبل الجميع

امين يارب...

متفائلين؟؟؟ ليه وش السالفة :)
ايييييه يا خوي يا رحال... كلن في قلبى شقى ليلاه :secret: ...احم

ويامرحبا بك...نورت :nice:

[The Master]

ربيت اعيالي مو كل شي انشا الله ولبيه..

يعني شي لهم حايه فيه اشتريه شي مالهم حايه ماشتريه..


ومب شرط اي شي عند فلان يكون عندهم..

والله يعيني على تربيتهم...


لاهنت اخوي

هلا بك اختي ام عبدالعزيز...

كلامك منطقي...لكن هل يطبق في الواقع...؟؟؟

طيب حطي نفسك مكان ام جاسم او ام جابر...
وتخيلي الموقف لما يجيك ولدك يطلب منك شي وانتي عندك القدرة المادية...واللي اطلبه ولدك صحيح مش مهم...لكن شي في خاطره ومب غلط...

هل بترفضين بداعي انه شي مالهم حاجة فيه؟؟؟

ويامرحبا بك اختي...
ويعينا اجمعين انربي اعيالنا في هالوقت الصعب :(

[The Master]

اسقاط ولا اروع . . . وان لفي البيان لسحرا

بس محد حولك تأذن في خرابه

تشكر يا الازقرتي...على التعليق الجميل...

بس شكلكم فاهمين الموضوع غلط :)
احم...

[The Master]

الله المستعان وانا اخوك تفائل بالخير والخير جاي لا محال

والنعم ب الله...واي شي انكون فيه انقول الحمدلله...وكل شي خير ايا كان للمسلم...يا نصبر او نشكر...ولنا الاجر...

بس وش السالفة :)
احم...

[The Master]

يمكن الاب له وجهه نظر في تعليم الولد معنى قيمه القرش وشلون يحافظ عليه وكيفيه التصرف بالفلوس مهب يتبع الفخقخه والمظاهر اللي مالها داعي ولاتنسى انه المال في الاخير بيرجع للولد

صحيح ليش لا...يمكن يعلمه الصبر...

بس اتهقى لو عندك مليارات في حسابك...وولدك اطلبك سيارة بقيمة 300 الف...خاصه ان خوياه وربعه عندهم هالسيارة...هل راح ترفض بداعي عشان يتعلم قيمة القرش؟؟؟
وهل اذا هو في محنه مادية...ومانعة الابتسامة من وجهه...ماراح اتساعده بداعي عشان يتعلم قيمة القرش؟؟؟
وهل هناك طريقة افضل واحسن من هالطريقة لتعليم الابناء قيمة القرش...غير عن السفه و قول تعلم بنفسك؟؟؟

وعن ان المال بيرجع للولد...امممم صحيح...بس مب كلهم...البعض يتبرع به للناس اللي بره...يعني صدقة وغيره...بمبالغ كبيرة...

لكن القانون مايسمح الا ب ثلث المال كا حد اقصى...للتبرع...

ويامرحبا بك...

[بنت قطريه]

للاسف أخوي انت تتكلم عن شخص أنا اعرفه عز المعرفه شخص ابتدى ابوه يعطيه من المهر اللي دفعه حق زوجته وللحين يسكن في بيت ابوه شراه له ويدفع له راتب شهري 30000 ريال والمكشله الاخ اللي ابوه يصرف عليه يمشي ويلعب بالفلوس وقدام الناس يفتخر ويتفاخر بالفلوس اللي عنده واللي هي اصلا من خير ابوه واللي يقهر ان الابو مب عادل مع عياله دلع الكبير ونسى الباقي وذي الظلم بعينه .... الله كريم

[بنت صقار]

بس جاسم ماعنده..اخوان؟؟
هل اخوانه كلهم يعانون نفس معاناته..
ولا بعضهم ابوه مايدري امهم تعطيهم من وراه؟؟
تظن جاسم ما يحس بالقهر الداخلي وعزة النفس قدام جابر..ويحاول مايظهر ابوه بمظهر اللي مقصر..
اعتقد..
لازم يكون فيه مساواه بين الاخوان..مهب حد ياخذ بالخش..ومتنغنغ..
واللي سيده..ماله الا .المثاليه؟؟اعتقد لو صارت له فرصه ياخذ بالخش..ماراح يقصر........

[The Master]

ماشاء الله عليك نعم هذا واقع نعيشه

بحط نفسي مكان الأب حتى لو الله منعم علي بالخير

الأ ب له نظره في ابناءة والأبناء منهم القنوع ومنهم المفسفس

فدائما الأبن القنوع طلباته بسيطه ومستجابه والأب يبي يسعد ابنه

والمفسفس راعي فشخره نظرته عاليه ومستحيله فتراه مضيق على الأب

طلباته عسره فلما يرفض الأب الأبن يركب راسه وياخذ الشي من غير موافقه

الأب فيكون عقابه من الأب بأنه يحمل الأبن المسؤليه الكامله حتى يعرف مدى حملها


اكيد واتفق معاك...لكن هم بعد يبقى هذا نتاج التربية والتعويد...كل شي بحسابه...

بس مب الكل سوا...يعني اللي يحب يكشخ وامعيش عمره مب غلط دام عنده الخير...والعكس كذلك...
وشي طبيعي الاب بيحب القنوع...لانه مايطلب واجد...و يوفر افلوس...احم :secret:

تشكر على التواجد الجميل والمثري...لاهنت اخوي
ويامرحبا الساع :nice:

[بدون]

موضوع حلو

أنا مع مإعانة الأب لأبناءه و لكن بحدود و أن تكون المساعدة للمحتاج منهم و ليس لمن حاول أن يتشبه بغيره و لأسباب غير منطقية

أما بالنسبة لدفع الديون من قبل الدولة فهذه في علم الغيب و برأيي أن المغني عن هذا هوالله سبحانه و تعالى و اعتماد الانسان على نفسه خير من انتظار الغير، لكن من كانت عنده ظروف قاهرة لا بأس من أن يطلب من أصحاب الشأن بشرط أن يتكل على الله أولا بالصلاة و الدعاء و التصدق و لو بأقل القليل فيبارك الله في رزقه و نفسه و أهله

شكرا على الموضوع المميز

[The Master]

يمكن لأنهم مايحسون أنك ولدهم :(

اتهقين...احم

يعني انا ولد البطة السودة :weeping: احم...

[The Master]

انا اشوف..ان اسلوب (بو جاسم) التربوي..
يخلق (رجال) ع الاقل يشيلون اعمارهم..
اذا ما يشيلون غيرهم من اللي هم في عازه حقيقية..

اما..اسلوب (بو جابر)..فهو اسلوب ما ينتج عنه
الا اتكاليين و اعيال ما هم بقد المسؤولية..
و الدليل..ان (جابر) من ايام السياكل..لين ايام المواتر..
و هو عايش "عاله" على ابوه ..
و ابوه ما عا قادر يتخلص من تبعات ابتلائه بهالولد..

اما جاسم..فخلاص..تعلم على (عزة النفس) و صار هو
قد قراراته..حتى لو كانت ديون تكسر ظهره..
بس..هو رجال...و لو ابوه في يوم من الايم احتاج
هو اول من بيوقف معاه..
اما..هالجابر..فما اظنه الا انه اول واحد ..
بيقول حق ابوه..
لو احتاج..روح شوف لك ابو يساعدك و ايكد عليك..
و هو..بيدور له ..حد يكون بديل حق ابوه..

حتى..لو انه يندعس تحت (زوجه) غنية..تكد عليه..
المهم..
جاسم..بيكون رجال..في عين ابوه و امه و هله..
و جابر..بيكون موب قد المسؤلية..حتى في عين..زوجته
و اعياله!..
*
*
،،
فيه فرق يا ماستر..
بين (بو جاسم) اللي لو نادوه الناس
(بو جاسم) حس انهم ينادونه باسم رجال..
يفخر فيه كل ابو و يتمنون اعيالهم مثله..

و بين (بو جابر)..اللي ما يتمنى حد يطري
اسمه ولده في مجلس من مجالس الرجال..
لان بيعرف في قرارة نفسه..
انهم يتطنزون على ولده (العاله)..
و بتحصله ايقول..بينه و بين نفسه..
او لو جلس بروحه مع (ام جابر)
اللي جاية تطلب شي جديد حق ولدها..المدلل..

(يا من شرا له..من حلاله ..عله)!

كلامك جدا جميل اخوي عابر...
لكن اسمح لي...المعطيات اللي انت اخذتها في الحكم على الشخصيتين كانت من فوق...يعني وكأنك تعلم ما حصل ويحصل وسيحصل...

صحيح في ناس عليه وفي ناس يعتمد عليهم...
لكن ترا هذي كلها عوامل...مثلا البيئة...المجتمع...الطفولة...التربية...

يعني هل بتلوم جابر في هالموضع؟؟؟ لما يكون ابوه وامه السبب في ذلك؟؟؟
او بتلوم ابو جابر انه دلع ولده؟؟؟ او ساعده في حل مشكلة كانت مب امخليته يعيش حياة سعيدة خاصه اذا كان الاب قادر على حلها؟؟؟

صعب على الاب او الام شوفة اعيالهم وهم في مشكلة...خاصه ان كانت كبيرة...

اتفق معاك ان الدلع وعدم خلق فكرة الاعتماد على النفس...خطأ...

وعن الفخر...هم بعد ما اتفق معاك...ياما ناس اعيالهم فشلة...ومع ذلك يتفاخرون ابهم...الا اذا ما كانوا امسودين الوجه :secret: احم...

وتشكر على المشاركة اخوي...

واحب اشكركم انتم وباقي المشرفين على المجهودات الطيبة في المنتدى...
وابصراحه خلال هالمده القصيرة عملتوا فارق الصراحه...يعني للامام...
اهم شي بوعبدالله...لحد يزعجه...احم :tease:

[The Master]

طرح جميل

واسلوب ولا اروع

بس انا كنت افكر في جيرانهم الباقين

محمد ولد زايد << اكيد من طخة جابر اذا مو اعلى

ومتعب ولد فهد<< اكيد اردى من جاسم تلقونه للحين راكب سيكل جاسم والا جابر


" انا متقصده بكتابة فهد "


اها محمد ومتعب....اممممم :con2:

شخصيات جميلة...ماجات على البال...احم

ووجهة نظر واحترمها اختي...

ويامرحبا بك...:nice:

[The Master]

دور الاب او الوالد الحقيقي يبين في المحنات والصعاب..واكيد قلب الوالد والاب حنون وعطوف وماراح يتخلى عن ابنة الذي علمة ورباة:)

بس اذا كان قلب الاب مايحس بابنة اكيد في شي غلط :)

اكيد مافي شك...لكن هل اغلب الاباء سوا؟؟؟
يعني وقت المحن اتعينهم؟؟؟
مب شرط...او معزة العيال تفرق بينهم...لاسباب او بدون اسباب...

لكن مافي شي غلط...
القلب ورغباته وطلباته و ميوله هي اللي تحكم الحين...

والله المستعان...

[The Master]

تسلم للموضوع

ومن قال سالم...

[The Master]

يبى خلها على اللة

والنعم في الله...:)

[The Master]

الحمد لله ابوي معودني من خامس ابتدائي ان مصروفي فيدي حق طول الشهر
اصرفه متى مابي بس ماطلب زياده عليه
وان بغيت شي اغلى من المصروف اجمع شهور

لازم الابو يخلي عياله يعتمدون ع نفسهم
مايدري هو متى الله ياخذ امانته
شيسوون عياله من عقبه ؟؟

يعني هالولد بدل مايقول مايحسون فيني
خله يقول انا ريال وعندي معاش ومعتمد ع نفسي ليش اخذ من ابوي اللي صرف علي سنين
يعني خلاص معاشه حق عياله للابد ؟؟
انا اعرف ناس هم يصرفون ع ابوهم بعد التقاعد

باختصار .. الابو يعلم عياله يعتمدون ع نفسهم من وهم صغار ولما يكبرون المفروض يشيلون نفسهم بنفسهم ويتحملون نتيجه قراراتهم

طبعا انا مع مساعده العيال فحاله مثلا لو توصل السجن او توصل ان الاكل مايكفيهم لي نهايه الشهر (واعرف ناس وصلوا لهالحاله عقب ما اسرفوا حق المفوشر !!) بس طبعا هب علطول بعد

ويعطيكم العافيه :shy:

هلا ب العقل المدمر :eek5:

كلامك عين العقل...والسليم...

لكن حنا ذكرنا وقت المحن...مب سالفة اشيا يوميه او روتينيه...
وانما وقت الحاجه والمصيبه...هنا نحتاج الوقفة...

وتشكرين عالمداخلة الجميلة...

[The Master]

طرح رائع ومميز الصراحه

لكن بوجه نظـري

يبي يعــلم ولده اهميه الصرف والاقتصـاد ,,ويعتمد على نفســه

يعني مو كلشي على ابوه ,,بهالطريقه مايكون تعلم شي ,,لازم يعرف شلون الاقتصاد وان هالامر صعب

يعني كان يعرف ان ابوه مابيساعده وان بيكون عليه ديون وهالسوالف ,,ليش اخذ السياره الغاليه؟

لازم الانسان يتعلم مـبدأ بالحيـاه ,,

وجهة نظر طيبة...وشي مهم...اللي اشوفه مفتقد في الاجيال الحاليه...

تشكر على وجهة نظرك...

[The Master]

((هذا القدوه الحسنه ))
عن رسول الله صلى الله عليه وآله وسلم : (أنه نظر إلى رجل له ابنان فقبّل أحدهما وترك الآخر ، فقال صلى الله عليه وآله وسلم : «فهلاّ ساويت بينهما») (1) وقال صلى الله عليه وآله وسلم : «اِنّ الله تعالى يحبّ أن تعدلوا بين أو لادكم حتى في القُبَل» (2).
وأكدّ صلى الله عليه وآله وسلم على العدالة في العطاء والهدية سواء في الاَكل والشرب والثياب والالعاب إلى غير ذلك كما جاء في قوله صلى الله عليه وآله وسلم : «ساووا بين أولادكم في العطيّة ، فلو كنت مفضلاً أحداً لفضلّتُ النساء» (3).
وقال صلى الله عليه وآله وسلم : «اعدلوا بين أولادكم في النحل كما تحبّون أن يعدلوا بينكم في البرّ واللطف» (4). وبهذا النهج اعان الوالد اولاده على بره

صلى الله عليه وسلم...
ونعم القدوة...عسى ربي يبلغنا مقامه في الجنة يارب...

الله يجزاك خير...

[qatar.1995]

شوف انقول اخوان انقول عيال عم

شرقأ او غربأ

اقرب مثل لنا انقووووووووو

عين عذاري تسقي البعيد وتخلي القريب عطشاااااااااان

[عابر سبيل]

كلامك جدا جميل اخوي عابر...
لكن اسمح لي...المعطيات اللي انت اخذتها في الحكم على الشخصيتين كانت من فوق...يعني وكأنك تعلم ما حصل ويحصل وسيحصل...

صحيح في ناس عليه وفي ناس يعتمد عليهم...
لكن ترا هذي كلها عوامل...مثلا البيئة...المجتمع...الطفولة...التربية...

يعني هل بتلوم جابر في هالموضع؟؟؟ لما يكون ابوه وامه السبب في ذلك؟؟؟
او بتلوم ابو جابر انه دلع ولده؟؟؟ او ساعده في حل مشكلة كانت مب امخليته يعيش حياة سعيدة خاصه اذا كان الاب قادر على حلها؟؟؟

صعب على الاب او الام شوفة اعيالهم وهم في مشكلة...خاصه ان كانت كبيرة...

اتفق معاك ان الدلع وعدم خلق فكرة الاعتماد على النفس...خطأ...

وعن الفخر...هم بعد ما اتفق معاك...ياما ناس اعيالهم فشلة...ومع ذلك يتفاخرون ابهم...الا اذا ما كانوا امسودين الوجه :secret: احم...

وتشكر على المشاركة اخوي...

واحب اشكركم انتم وباقي المشرفين على المجهودات الطيبة في المنتدى...
وابصراحه خلال هالمده القصيرة عملتوا فارق الصراحه...يعني للامام...
اهم شي بوعبدالله...لحد يزعجه...احم :tease:



حياك الله اخوي بو حسن..
و شاكر لك جهودك و هالتعقيب الطيب..
بس كلمتين اخيرتين..
اول شي..موب النظره كانت
"من فوق"..

يمكن انا تكلمت بمحاولة للرؤية "ببعد نظر"..
و فرق كبير لو توافقني..بين
بعد النظر و النظرة من فوق..
الا اذا انك تقصد
"علوّ" العقاب لأنه يشوف "من فوق"..
بحكم إن طياره..فوووق:secret:
*
*
،،
ثاني شي او اخيرا..
ايش رايك بهذا المثل الصيني:

" إذا جاءك طفل جائع يريد سمكا ،
لا تعطه السمك وإنما علمه كيف يصطاد السّمكة
"

[The Master]

حياك الله اخوي بو حسن..
و شاكر لك جهودك و هالتعقيب الطيب..
بس كلمتين اخيرتين..
اول شي..موب النظره كانت
"من فوق"..

يمكن انا تكلمت بمحاولة للرؤية "ببعد نظر"..
و فرق كبير لو توافقني..بين
بعد النظر و النظرة من فوق..
الا اذا انك تقصد
"علوّ" العقاب لأنه يشوف "من فوق"..
بحكم إن طياره..فوووق:secret:
*
*
،،
ثاني شي او اخيرا..
ايش رايك بهذا المثل الصيني:

" إذا جاءك طفل جائع يريد سمكا ،
لا تعطه السمك وإنما علمه كيف يصطاد السّمكة
"

هلا بك اخوي عابر...والسموحه عالتاخير في الرد...تراكمت علي المواضيع والردود...والسبب التفهي اللي انا فيه...احم

ماقصدت انا التعالي ابدا...ومب انا اللي يحكم عالناس وانا اخوك...
فا التفسير الثاني هو الصح...النظرة من فوق...ك الشاهين...او على قولتك من فوق :rolleyes2:

اول مره اسمع ب هالمثل...لكن احيييييييييك عليه...اعجبني كثير..."بس هل هو صيني فعلا؟؟؟...احم"

اوافقك عليه وبشدة...وانا من النوع اللي يطبق هالمثل...اذا بغيت الشي...سوه بنفسك "طبعا هالنسخه مالت هل الشمال...احم"

ويامرحبا الساع...:nice:

[مشتاقة لقطر]

الله يزينها .. يارب

[شـعـشـبـونـه]

اياااااا على ابوووووووي


مو مقصر معانا كلنااا مع ان حالته الماديه عاديه لكنه كريم ويحب يدلعنا
مالنا غيره الغالي هو سندنا والله مالنا غنى عنه
سالفة خله يتعلم هذي برى قاموسه ومايعرفها اي واحد في حاجه على طول يوقف معاه ويسنده
انا ادري ان هذا شي سلبي بس مايهون عليه يشوفونا محتاجينه ومايسوي شي حتى لو ماتكلمنا والله العظيم انه يحس فينا

فديتتته والله الدمعه في عيني نقطة ضعفي ابوي الله يخليه ويعطيه الصحه وطولة العمر ولا يحرمني منه..

[العقل المدمر]

هلا ب العقل المدمر :eek5:

كلامك عين العقل...والسليم...

لكن حنا ذكرنا وقت المحن...مب سالفة اشيا يوميه او روتينيه...
وانما وقت الحاجه والمصيبه...هنا نحتاج الوقفة...

وتشكرين عالمداخلة الجميلة...


والمحن ما جات الا عشان تعلمهم يكبرون ويتصرفون صح بالفلوس اللي بينسألون عنها يوم القيامه :nice:
محنه الدنيا ولا محنه الآخره
وشنو بتكون مشكلتهم .. لو سجن والا ميتين من الجوع معليه يساعدونهم بس اخر مره يعيدونها :shy: