المساعد الشخصي الرقمي

مشاهدة النسخة كاملة : :::...هل انت بتدفع العربه ولا زوجتك؟؟؟...:::...احم


The Master
06-03-2011, 11:06 PM
احم احم...ثم احم...


يلا حيه بالجميع...ويامرحبا بكم...:nice:

باقول لكم السالفة...


انا وكم واحد من الربع...قاعدين في المجلس من كم يوم...انسولف في امور الفروقات اللي صارت في ابلادنا قطر...وكيف ناس تغيرت...وناس فكرها تطور...وناس لازلت مثل ماكانت...

اشوي والا واحد من الشباب قال...عندي لكم سؤال يالربع...وابغي كل واحد فيكم يجاوب ابصراحه...وبدون احراج...قلنا له يلا قول...

السؤال... اذا رحت الجمعيه مع هلك..."يعني زوجتك"...وعندك بزر "طفل"...عمره سنة...
والحين قدك شريت...وخلصت وحاسبت...وبتطلع من الجمعيه...

عندك جاري فيه الاغراض...وزوجتك...وولدك...

السؤال...

هل انت بتدفع العربه...ولا زوجتك...؟؟؟


طبعا انا استهزآت السؤال...وقلت وش هالسخافه...وش هالسؤال اللي ماله داعي...

لكن ابهرتني الاجابات...وبينت لي الفروقات في المجتمع...والتفكير كيف عند البعض...



انتظر من كل واحد يجاوب...وبصراحه...وانشوف الاجابات...لكن اتمنى المصداقية...ومب عيب...كلن راضي بعقله...

ومافي مانع مشاركة النسوان...وعرضهم بوجهة نظرهم...المجال مفتوح...


ولي عودة ب اجابات الربع...والاستنتاج اللي طلعت به...:eek5::rolleyes2:

ويامرحبا بكم جميعا...:nice:


تم تعديل الخيارات...احم
مستوى الدعم
06-03-2011, 11:11 PM
السلام عليكم أخوي الماستر..

في احتمال ما ذكرته..

وهو..

إنك تحط ولدك في العربة وتدفع العربة وزوجتك شايلة شنطتها...
غايه الطواش
06-03-2011, 11:14 PM
الجاري يدزه البوي والولد شايله ابوه والمره شاله شنطتها
The Master
06-03-2011, 11:16 PM
اتمنى التقيد بالخيارات...ولحد يجيب شي من جيبه :anger1:

احم...:)
فيزيائية
06-03-2011, 11:17 PM
الحين الزوجة صارت تروح مع الدريول
وهو يدز القاري .....
واحد ثقة
06-03-2011, 11:18 PM
إذا كُنت تريد الإجابة الصريحة فهي غير موجودة من ضمن الخيارات ،،
ابو علاوي
06-03-2011, 11:19 PM
الجاري يدزه البوي والولد ماسكه بيدي ويمشي بجنبي والمرة شايلة شنطتها
%حورية قطر%
06-03-2011, 11:20 PM
اخوي الماستر
انا اذا مع زوجي البوي هو اللي يدز الجاري ويحط الاغراض في السيااره
وولدي يا انا اشيله او زوجي
وفي حالة لو البوي مب موجود اكيد ان هو بيدز الجااري وانا بشيل ولدي ولا بخليه في الجااري :)
مستوى الدعم
06-03-2011, 11:21 PM
الجاري يدزه البوي والولد شايله ابوه والمره شاله شنطتها

:nice:

آسفة أخوي الماستر..

بس سؤالك لازم جوابه من الأعضاء وليس العضوات..

ما حبينا ندش وإيدينا فاضية..

فزدنا لك بعض الاحتمالات الواقعية
القرنفل
06-03-2011, 11:23 PM
الساالفه ماتبي شطاره الاب يدز الجاري والام تشيل الولد والحياة تعاون وتفاهم
R 7 A L
06-03-2011, 11:23 PM
راح اكون صريح وردي راح يكون اقوى من ردود اخواني وخواتي الى قبلي

على شان نستفيد من الموضوع


انا الله يسلمك ويسلم الجميع
بدز العربة وزوجتي بخليها تشيل ولدي
ولو ماعندي ولد بدز العربة وبخليها تمشي وراي اذا المجمع مافية حمالي
بدون
06-03-2011, 11:25 PM
عادة الولد ينحط في العربة و الأم تدزها لأنها هي تطلب تدزها و تكلم الياهل بس إذا ما في يهال البوي يدز العربانة و ام العيال تروح السيارة ما توقف تنطر عند المحاسب
ما تفرق يعني !!!
مضارب دوسري
06-03-2011, 11:25 PM
عادي انا عن نفسي انا ادز الجاري والولد(الله يرزقني)فالجاري والمره تمشي جنبي

بس اذا اغراض وااااايد البوي يدزه
The Master
06-03-2011, 11:31 PM
:waiting:

يالربع واللي يرحم والديكم...:weeping:

ركزوا معاي...لحد يألف له جواب...:anger1:

اختاروا الاجابات فوق...crazy

هل انت بتدز العربه ولا زوجتك؟؟؟ :playball:
نبض قطر 1970
06-03-2011, 11:31 PM
كل الأحتمالات وارده

ممكن أدز الجاري وهي تشيل الطفل

وممكن البوي يدز الجاري وأنا اشيل الطفل وهي تشيل شنطتها

وممكن هي تدز الجاري وانا اشيل الطفل خاصة اذا كان الطفل قاعد يبكي ومايبغي غير ابوه

فكل الاحتمالات وارده وماعتقد أنها عيب أو حرام (( هو يدز الجاري ولا هي تدز الجاري ))


الحياه تعاون
تقبل تحياتي
The Master
06-03-2011, 11:33 PM
:nice:

آسفة أخوي الماستر..

بس سؤالك لازم جوابه من الأعضاء وليس العضوات..

ما حبينا ندش وإيدينا فاضية..

فزدنا لك بعض الاحتمالات الواقعية

اي ماشاء الله عليكم...واضح :whistling:
OREO
06-03-2011, 11:34 PM
بفترض ان العامل مهب موجود ،،

بخلي الولد تشيله امه وانا ادز الجاري ،، طبعا اذا الجاري محمل عدل مدل ،، اما اذا شفت الجاري مهب محمل لهناك انا بشل الولد و بخلي الجاري لام العيال ،،

في الاخير ،، اشوف ايش الاثقل و الاشق ،، انا راح اتحمله لان بُنية الرجل غير عن المره ،،،

صج اوقات بعض البنات يرفعون الضغط في المنتدى ،، لكن في النهايه هذول بناتنا و خواتنا و ما نرضى عليهم و ما نتمنى لهم الا كل خير ،،

يعطيك العافيه صاحب الموضوع ،،
The Master
06-03-2011, 11:42 PM
إذا كُنت تريد الإجابة الصريحة فهي غير موجودة من ضمن الخيارات ،،

اكتبها لنا...ودنا انعرف وش هي...:rolleyes2:
The Master
06-03-2011, 11:44 PM
اخوي الماستر
انا اذا مع زوجي البوي هو اللي يدز الجاري ويحط الاغراض في السيااره
وولدي يا انا اشيله او زوجي
وفي حالة لو البوي مب موجود اكيد ان هو بيدز الجااري وانا بشيل ولدي ولا بخليه في الجااري :)


كل الشكر على الراي...:victory:
The Master
06-03-2011, 11:47 PM
الساالفه ماتبي شطاره الاب يدز الجاري والام تشيل الولد والحياة تعاون وتفاهم

الله ينور...

لكن ترا اصابعك مب سوا...في ناس تفكيرها غير...بس للحين ما اوصلوا...:secret:
المهاجر
06-03-2011, 11:54 PM
هلا وغلا بالماستر ومواضيعه

شوف سلمك الله بالنسبه لي اذا في امكانيه اشيل الولد وادز الجاري

شلته ودزيت الجاري لان زوجتي المفروض ما في شيء يشغلها عن الانتباه على نفسها من الطريق ولبسها وتسترها وكل اللي عليها انها تمشي حذاي

واذا ما في امكانيه اشيل الولد خليتها تشيله وانا بادز الجاري طبعا

واذا وصلنا البيت قلت لها الحين دورج رتبي اغراضج وشيلي ولدج

وسويلي كرك يعدل الطاسه:shy:

الا وين شسمه:omen2:
مونديال
07-03-2011, 12:59 AM
عادي ليش مايدز الجاري
انا ماعتقد في تسلسل للحدث الامور تيي بروحها
يعني ممكن انا ممكن هي هسب المكان وموقع السياره
سمو الاميره
07-03-2011, 01:05 AM
الزوج هو الي يدز الجاي فشششششيله تخيل شكلك بس وزجتك تدز الجاري وانت ماسك يد ولدكـ
الأصيلة
07-03-2011, 01:09 AM
وين الخيارات ما أشوف شي...
Dmy Enabi
07-03-2011, 04:00 AM
تحياتي أخوي

موضوع طريف بالنسبة لي آنا ولا هو مافي مشكلة عادي على حسب المزاج والنفسية

مادري ليش تذكرت قصة جحا وولده والحمار - أعزكم الله -

بالفعل رضا الناس غاية لاتدرك
مساهم بسيط
07-03-2011, 04:22 AM
ياخوك انا عندي احساس انه في لغز في هذي العبارة
( هل انت بتدفع العربه...ولا زوجتك...؟؟؟ )

واتوقع انه لها معنا:
الاول: هو من سوف يتكفل بدفع قيمت مصاريف المشتريات .
الثاني: من الي بيدز الجاري .

بس عن نفسي في الحالة الاولى انا بدفع قيمت الاغراض والحالة الثانية انا بدز العربة لانها بتكون ثقيله :nice:
QatarSupport
07-03-2011, 04:55 AM
[FONT="Palatino Linotype"][COLOR="Gray"][SIZE="5"][B]هل انت بتدفع العربه...ولا زوجتك...؟؟؟



السوال فيه حنكه .. او فيه لف و دوران :nice:

اكيد بدف العربه لان زوجتي بتكون تمشي على رجولها :rolleyes2:
BIG-VEGA
07-03-2011, 06:29 AM
اذا في الجمعيه انا ادز العربه على قولتك
وفي السوق انا اشيل الاكياس
واذا مسافرين انا ادز قاري اليهال


اهوووو عطنا استنتاجك :)
سهم احمر
07-03-2011, 06:34 AM
الرجال يدز القاري والطفل في كرسي القاري والزوجة شايله شنطتها
ام السعف
07-03-2011, 06:53 AM
بو العيال كان يدز الجاري من يومه و مرات كثيرة يشل الولد ويحطه في الجاري
حتى الشنطة احطها في الجاري ،، يعني الجاري شالنا في الجمعية ومب مقصر ،،
abo saif
07-03-2011, 07:18 AM
أنا طبعاً
From A To Z

وام العيال راس المال معززه مكرمه اذا راحت معاي الجمعيه
لافوشيا
07-03-2011, 07:22 AM
مب معاها رجال ولا انا غلطانه؟؟؟
ذكي جدااا
07-03-2011, 07:26 AM
مااشووف في مشكله انا ادز الجاري ام لعياال تدز الجااري ولدي يدز الجااري خدامتنا تدز الجاري وين المشكله
chillis
07-03-2011, 07:35 AM
القاري يدزة البوي ماله داعي ندزه حنا الله مسهل الامور
حلم قطري
07-03-2011, 07:42 AM
الأم وبزرها في الجاري وابوهم يدزهم هههههه

تبي الصدق على حسب الحالة النفسية للرجال

لكن الأصح ومن وجهة نظري هي تشيل ولدها وهو يدز الجاري
وممكن هي اتدز الجاري وتشيل ولدها وهو يروح يقرّب السياره
ياجماعة الحياه حلوة لاتدقق كثيييييييير
دامها تمشي مشها
بوخالد911
07-03-2011, 07:46 AM
الكل يدزززززززززززه


عااادي


اتس اوك


it's ok with us pal

:)
بو الجوري
07-03-2011, 07:48 AM
اتمنى التقيد بالخيارات...ولحد يجيب شي من جيبه :anger1:

احم...:)

هلا أخوي :..

بما إنك قيدتنا بالخيارات :secret::.. فالجواب إن أنا اللي بدز القاري :..:)



لكن إذا تبي رايي فالموضوع :..:telephone:
هو أصلا ماودي لا الياهل ولا زوجتي الجمعيه :..:nice:
تصدق إني بروحي أخلص أسرع ونفسيا مرتاح :..:victory:
وإن لزم الأمر إنها تروح معاي :..
أخلي البوي هو اللي يدز القاري :.. :omen2:
R 7 A L
07-03-2011, 07:54 AM
اخوي علي وينك ؟؟؟

جاوبنــــــا


ننتظر الاستنتاجات !!!!!!!!!!!!!!!!!!!!!!!!
الخـود
07-03-2011, 07:59 AM
دايما ابوي يدز الجاري
ما عمري شفت امي تدزه ،، حتى انا اذا طلعت مع امي انا اللي ادزه مب هي .. يمكن كنوع من الاحترام ..
والله بصراحة في البداية حسيت الموضوع ما له داعي ،، لكن الحين احس الموضوع فعلا مهم ^_^
wadha-qa
07-03-2011, 08:21 AM
المفروض الرجال هو اللي يدزه او البوي
The Master
07-03-2011, 08:29 AM
كل الشكر للجميع اللي ابدى برايه...وجاوب...
لكن لازالت فئة من المجتمع ماجاوبت...او ماتبغي اتجاوب...
ننتظرها :)
The Master
07-03-2011, 08:49 AM
وش ثاني...ركزوا على مجمل الاجابات...وبتوصلكم لاستنتاج...
شبح الصمت
07-03-2011, 08:52 AM
طبعا أنا بدز القاري
طارق
07-03-2011, 08:54 AM
اجيب البوي أدز العربه وانا مع عائلتي مايصير يا أخوان :omg:
مثال
في اغراض خاصه بالنساء , اشلون حد يبيشتريها قدام البوي :omg:

الرجال او المره او اليهال يدزون العربه مافي فرق مادام هم مرتاحين او متفقين

بس اذا الأغراض كثيره وواجد وجب على الرجال يدز العربه
اخوكم طارق
عاشق الزعتر مع فلفل
meme~qatar
07-03-2011, 09:06 AM
الريال هو اللي بيدفع الجاري ويدفع ثمن المشتريات اكيد

وبالنسبة لنا نحط الولد والشنطة بعد في القاري وابو العيال بيدزها

وانا كفاية علي اني اخترت الاغراض
بوخالد911
07-03-2011, 09:10 AM
والبعض بيقووول : الرجال بيدز

والحرمة بتدفع الفاتورة
:)
غايه الطواش
07-03-2011, 09:17 AM
اجيب البوي أدز العربه وانا مع عائلتي مايصير يا أخوان :omg:
مثال
في اغراض خاصه بالنساء , اشلون حد يبيشتريها قدام البوي :omg:

الرجال او المره او اليهال يدزون العربه مافي فرق مادام هم مرتاحين او متفقين

بس اذا الأغراض كثيره وواجد وجب على الرجال يدز العربه
اخوكم طارق
عاشق الزعتر مع فلفل

لا طارق يقولك شروا وخلصوا الحين قاري من الكاشيير لين السياره :shy:
وبخصوص الامور الخاصه بالحريم ترى الكاشيير بطلعها جدام الله وخلقه وبيحاسب:shy:
طارق
07-03-2011, 09:22 AM
لا طارق يقولك شروا وخلصوا الحين قاري من الكاشيير لين السياره :shy:
وبخصوص الامور الخاصه بالحريم ترى الكاشيير بطلعها جدام الله وخلقه وبيحاسب:shy:


:shy:
شوهاااااااظ
شكلي انصكعت يازلمه

طبعاا البوي يدز العربه وعليه بالعافيه ال 200 درهم الي اعطيهم اياهم
اخوك طارق
عاشق السمجيه
ضي البدر
07-03-2011, 09:25 AM
الموضوع وايد حلو ومثير للنقاش وتوفقت في اختيار الموضوع اخوي..

ورايي في الموضوع مدام في رجال بيروح الجمعية مع هله اكيد هو الي بيدز الجاري مب رجال..!!

ذكرتني بوحدة مسكينه اتعاني كل اخر الشهر وتحاتي لين بتروح الجمعية,,!! لأن خروفها أقصد بعلها يشترط عليها ان رحنا الجمعية انتي ادزين الجاري وتنقين الأغراض وتدفعين بعد ليش انا برستيجي مايسمحلي وانا ولد ناس وأشتغل في مكان مرمووق ومكلنتي الأجتماعية ماتسمحلي.. والله ثم والله وهي حلفان مو قلة أدب انه كل كلمة ذكرتها الحين صحيحة وأنا مانتقد معشر الرجال ولا اني ماصدقت انفتحت سالفة عشان أهب فيكم يامعشر الرجال بس للأسف هاي الواقع وشفتهم مرة بالجمعية والله قمة النذالة وعار علية يكووون منكم..!!

واخزياة اشهالرجال يعني ابسط شي ومو قادر يتكفل فيه ولا نسيت ماقلوكم حتى ولدها معاها يقول اشلون أشيله والغترة..!!!!

الله لا يبلانا ويستر على هالمسكينه ويعافينا يارب..

يعطيك العافية على مواضيعك المتميزة..
شبح الصمت
07-03-2011, 09:26 AM
تعال اغير نظريتي

لو خلاص خلصت ودفعت

طبعا بخلي البوي يدز القاري

والولد انا بشله لين السيارة وبخلي المره تركب وبعطيها الولد

وبخلي البوي يحمل الاغراض وعطيه المقسوم
طارق
07-03-2011, 09:35 AM
الموضوع وايد حلو ومثير للنقاش وتوفقت في اختيار الموضوع اخوي..

ورايي في الموضوع مدام في رجال بيروح الجمعية مع هله اكيد هو الي بيدز الجاري مب رجال..!!

ذكرتني بوحدة مسكينه اتعاني كل اخر الشهر وتحاتي لين بتروح الجمعية,,!! لأن خروفها أقصد بعلها يشترط عليها ان رحنا الجمعية انتي ادزين الجاري وتنقين الأغراض وتدفعين بعد ليش انا برستيجي مايسمحلي وانا ولد ناس وأشتغل في مكان مرمووق ومكلنتي الأجتماعية ماتسمحلي.. والله ثم والله وهي حلفان مو قلة أدب انه كل كلمة ذكرتها الحين صحيحة وأنا مانتقد معشر الرجال ولا اني ماصدقت انفتحت سالفة عشان أهب فيكم يامعشر الرجال بس للأسف هاي الواقع وشفتهم مرة بالجمعية والله قمة النذالة وعار علية يكووون منكم..!!

واخزياة اشهالرجال يعني ابسط شي ومو قادر يتكفل فيه ولا نسيت ماقلوكم حتى ولدها معاها يقول اشلون أشيله والغترة..!!!!

الله لا يبلانا ويستر على هالمسكينه ويعافينا يارب..

يعطيك العافية على مواضيعك المتميزة..


انا اول مالوحده تكتب معشر الرجال اعرف قصتها الحزينه :weeping: وأطرشلها على حسابي:telephone: كرتون كلينكس بربري مال الحسى لدموعها و لزقه أجروح عشان قلبها المجروح .

مع التحيه
طارق / واحد من مجرمين عشيره الرجال
The Master
07-03-2011, 09:45 AM
الموضوع وايد حلو ومثير للنقاش وتوفقت في اختيار الموضوع اخوي..

ورايي في الموضوع مدام في رجال بيروح الجمعية مع هله اكيد هو الي بيدز الجاري مب رجال..!!

ذكرتني بوحدة مسكينه اتعاني كل اخر الشهر وتحاتي لين بتروح الجمعية,,!! لأن خروفها أقصد بعلها يشترط عليها ان رحنا الجمعية انتي ادزين الجاري وتنقين الأغراض وتدفعين بعد ليش انا برستيجي مايسمحلي وانا ولد ناس وأشتغل في مكان مرمووق ومكلنتي الأجتماعية ماتسمحلي.. والله ثم والله وهي حلفان مو قلة أدب انه كل كلمة ذكرتها الحين صحيحة وأنا مانتقد معشر الرجال ولا اني ماصدقت انفتحت سالفة عشان أهب فيكم يامعشر الرجال بس للأسف هاي الواقع وشفتهم مرة بالجمعية والله قمة النذالة وعار علية يكووون منكم..!!

واخزياة اشهالرجال يعني ابسط شي ومو قادر يتكفل فيه ولا نسيت ماقلوكم حتى ولدها معاها يقول اشلون أشيله والغترة..!!!!

الله لا يبلانا ويستر على هالمسكينه ويعافينا يارب..

يعطيك العافية على مواضيعك المتميزة..

اخيييييييرا :nice:
لكن الاسباب تختلف من شخص لاخر...كلن على حسب بيئته...وركزوا على بيئته...

واما عن تعقيبك عن الرجال...طبعا اصابعك مب سوا...ومثل مافي الرجال عيوب كذلك النسوان...يعني محد كامل...
وتشكرين عالمشاركة الطيبة...
تاجر
07-03-2011, 09:48 AM
ههههه
ذكرتوني بسالفتي مع القاري ..

الله يسلمكم قبل لا اتزوج اروح الجمعية مع الوالده الله يحفظها وادز القاري وهي تتشرى الاغراض وانا وراها .. ولا زلت الصراحه وهذا اقل واجب اسويه حق الوالده طبعاً ..

المهم الوالده صارت ما تقدر تروح الجمعيه وتوصي على الاغراض اللي تبيها وتجيها لين البيت .. قلت في نفسي ارتحت من دز القاري (بس وناسه تتشري الاغراض مع الوالده الله يحفظها .. العيايز ما يعجبهم شي)

يوم تزوجت الله يسلمكم صرت اروح مع المدام ونفس الشي ادز القاري وهي تشتري الاغراض (قلت في نفسي شكلي ماراح افتك من هالقاري لين اموت )

عموماً ما اطول عليكم يا محلى الرجال لما يتعاون ويدز القاري وعيب عليه لما يخلي المره هي اللي تدز القاري .. والله بادز القاري وبشيل الاغراض وبشيل ولدي (حمود الله يحفظه) اذا لزم الامر ..

اسمحو لي على الاطاله
halcrow
07-03-2011, 09:56 AM
اتوقع من الحشمه ( الواجب او التقدير ) للمره ان الرجل هو المفروض الي يدز الجاري ... حتى لو كان مع هله
لان

شكل المره وهي ادز ( ماجله البيت ) الي طبعا حد الجاري ... غير مستحب .. لا ومرات ...يطلع التاير مجيم ..عاد الله يعينها ....وزوجها يلعب في المسباح او البلاك بيري وماسك يد الطفل ...يعني يابلفيت يساعدها :nice:


اتوقع هالصوره غير مستحبه ومافيها نوع من ( التقدير ) :victory:
الـقـاسـي
07-03-2011, 10:08 AM
الذيب مايهرول عبث ياخوي علي وانت ماكتبت هالموضوع الا وفي شي براسك ..
عموما انا عن نفسي طبعا مراح اخليها دز القاري لا فالجمعيه ولا برى الجمعيه ولاحتى تشيل الاغراض او تحاسب حتى ..
عموما الموضوع اذا بننظر له بشكل سطحي مراح تخرب الدنيا لو المره دزت القاري وحتى لو كان متروس مايكون ثقيل لكن المفروض الرجل هو اللي يتحمل اي شي فيه جهد بدني او بووكي ههههه ( مالي ) يعني ..
Rayane
07-03-2011, 10:15 AM
داخل الجمعيه هي شغلها قاري الاغراض...

واحنا طالعين البوي.
Rayane
07-03-2011, 10:19 AM
اتوقع من الحشمه ( الواجب او التقدير ) للمره ان الرجل هو المفروض الي يدز الجاري ... حتى لو كان مع هله
لان

شكل المره وهي ادز ( ماجله البيت ) الي طبعا حد الجاري ... غير مستحب .. لا ومرات ...يطلع التاير مجيم ..عاد الله يعينها ....وزوجها يلعب في المسباح او البلاك بيري وماسك يد الطفل ...يعني يابلفيت يساعدها :nice:


اتوقع هالصوره غير مستحبه ومافيها نوع من ( التقدير ) :victory:

ومره وحده هو يسبح العيال ويبدل لهم ويوكلهم ويكمل جميله ويخم الصآله بعد ... صــح..؟ حتى يكون هنآك تقدير .... عجبي!!!
بوسياف
07-03-2011, 10:33 AM
مرحبا اخوووي ,,
ويسلموا على الموضوع الي المفترض اجابته بديهية وما يبي لها شئ,,,

لكن فيه نااس يختلفون وانا قابلتهم وتناقشت انا وياهم في بعض الاشكاليات ...

بالنسبة لي ,,,,
انا مثل ماقال الأخ من قبل بدز القاري او بشيل الولد ايهما اثقل ،، انا بتحمله وهذا شئ طبيعي ..
واذا كانت القاري في سعة والولد بيجلس بالغاري انا بدز الاثنين ....

وانا من الناس الي مستحيل بأي مكان في جمعية او مجمع او اي مكان تسوق اخذ بوي يشيل الاغراض
واساساص انا ضد هذي الفكرة ،، لاني ما ابي اعلم نفسي ولا عيالي ان يكونون اتكاليين حتى في حمل اغراضهم الخاصة فيهم ...

وبعدين شوقتنا نسمع اراء ربعك الي دار بينك وبينهم النقاش .....
بالتوفيق للجميع
halcrow
07-03-2011, 10:42 AM
مافيها مشاكل لو يسبح مع العيال في البحر ويبدل لهم بيتري جهاز ريموت السياره ويوكلهم في المطعم على حسابه ...ويخم العنه مع الربع


مهب هذا الي قصدته ياحليتان
qatarboy14
07-03-2011, 11:06 AM
مافيها شي لو دف القاري شوي ترا زين حق عضلات اليدين , لاهو عيب ولا هو حرام . بس للاسف الناس ماعندها شي تسويه فقاموا يحللون ويرحمون وهذا عيب وهذا لازم تسويه. نسوا يخاطبون عقولهم.
حـ ن ـيـ ن
07-03-2011, 11:59 AM
مافيها شي لا دز القاري ولا شل عياله ...

والنساء بعد مافيها شي لو دزت القاري ...

لكن حاليا انا ادز القاري مو لشي ((اسوي رياضة )):nice:
The Master
07-03-2011, 12:02 PM
طيب. الحين خلنا انقول ان هناك رجل بيئته او مجتمعه يعتمد على المرأة اعتماد كلي في القيام ب كل الامور العملية اللي اتخص البيت...
ومنها حلب الابل...

اتوقعون هل بيدفع العربة عن زوجته ولا بيخليها تدفع العربة بيد وشالة ولدها ب اليد الثانية?

فكروا فيها عدل...بدون تسرع...
ANONYMOUS
07-03-2011, 12:03 PM
السوال فيه حنكه .. او فيه لف و دوران :nice:

اكيد بدف العربه لان زوجتي بتكون تمشي على رجولها :rolleyes2:


هههههههههههههههههههههههههههههه

اضحك الله سنك

تخيل واحد يدف زوجته... والبوي يقعد في التروللي والطفل يدزه

زين اجيب حل اسهل

ودو معاكم شغالتين.. وحده تدز القاري و وحده تشيل الطفل والله لايجيب الزعل

نرد للموضوع

اكيد انا اللي بدز التروللي وفيه الطفل لو في مجال يقعد فيه

ولا يمشي معاي ولا مع امه

يعني مش قضيه كبرى


عليان انا عارف انت تبي تقرا هالاجابه

المره تدز التروللي وتمسك الطفل وانا امشي قدامهم مشية الطاووس على قولة صديقي اللدود بوتركي :p
ضي البدر
07-03-2011, 12:38 PM
انا اول مالوحده تكتب معشر الرجال اعرف قصتها الحزينه :weeping: وأطرشلها على حسابي:telephone: كرتون كلينكس بربري مال الحسى لدموعها و لزقه أجروح عشان قلبها المجروح .

مع التحيه
طارق / واحد من مجرمين عشيره الرجال



لا قصة حزينة ولا شي.. والحمدلله على كل حال أنا ماشكيتلك يادكتور فيل بن زعتر))..:tease:
أنا تذكرت سالفة الموظفة الي معاي وفي نفس الموضوع الي تم طرحه للمناقشة.. وأخيرا ..

انت بالذاااات لا ترد وتعلق لا على مواضيعي ولا على ردوودي رجاءً يكفيني الي معاي بالدوام بعد الأقي هالنوعية في المنتدى..

يالله خاااااااااارجنا..
intesar
07-03-2011, 12:47 PM
شيلوا عنكم العقد
سواء الرجال دز العربانة ولا الزوجة ولا الهندي وين المشكلة

الحضارة زينة
بوحمد1
07-03-2011, 02:00 PM
بحط ام العيال والولد والشنطة في الجاري ودزهم للبيت :tease:

.................................................. ......................................

بدز الجاري وبشيل الولد وبحط عيني على ام العيال يمكن تزلق او تعثر

لانها يالله يالله تشوف الطريق وهي تمشي :nice:
بونو
07-03-2011, 02:02 PM
مرحبا الجميع ...... ممكن اعرف فايده وحده من طرح هالموضوع ؟!! ووينك ياخوي بوعلي "المراقب" .... ماسألت عن المصدر ؟!
Nojoom
07-03-2011, 02:07 PM
بحط الولد والزوجه وشنطتها في الجاري وانا بعد معاهم وبخلي البوي يدفنا

نوع من تغير الجو :)
ترانيم الروح
07-03-2011, 02:23 PM
يظهر انه للحين مانزال نقبع في ظلال القرون الحالكه وعصور الظلام
دام انه مثل هالمواضيع للان تعتبر محل نقاش جدي ونقد ..
Rayane
07-03-2011, 03:04 PM
مافيها مشاكل لو يسبح مع العيال في البحر ويبدل لهم بيتري جهاز ريموت السياره ويوكلهم في المطعم على حسابه ...ويخم العنه مع الربع


مهب هذا الي قصدته ياحليتان

ما جآ في الحــسآب طآآآآري يالغالي... ولا العنه والبحر ... اللـــــه يعطيك العآفيه.


انت قلت المسأله هي مسألة تقديــــر...

الحسآب بيدفعه ولا ما بيكون رب الأسره صـــــح... هــذا وآجب وتقدير لأهل بيته...

والقآري وهو طآلع من الجمعيه اذا ما فيه بوي أكيد هو اللي بيدف القآآآآري... هذا وآجب وتقدير لأهله...

أما دآخل المجمع... ؟؟؟؟؟؟؟؟!!!!!!! لا والله الا بالعب في مسبآآآآحي وأطقطق في تلفووووني... وكآآآآشخ ترمبه بعد أبــشرك... لآآآ.. وآآآزيدك من الشعر بيت... ولدي ولا بنتي بتكون في القآآآري بعد.... ولا معى أمــــه.
فيزيائية
07-03-2011, 03:04 PM
انتوا للحين اتدزون القاري
ماوصلتوا للبيت ؟؟؟
MAZEN37
07-03-2011, 03:46 PM
الساالفه ماتبي شطاره الاب يدز الجاري والام تشيل الولد والحياة تعاون وتفاهم
بكل بساطه رد القرنفل عملي وطبيعي
استغرب من بعض الردود الي تصور انه الام لازم تمشي بشنطتها بس
والولد شنسوي فيه !
الامتياز
07-03-2011, 04:58 PM
اكيد سوبرمان بيشل وبيدف وبيدفع ...
الدمعه
07-03-2011, 05:13 PM
اذا كان الجاري خفيف يدزه بوالعيال ويشل ولده عني بعد .. اما اذا ثقيل هو يدزه

وانا اشل الياهل .. لكن لو جاريين شنسوووي .؟؟؟:tease:. كل واحد يدز جاري

وابو العيال معصب .. :anger1: ..

ومافيها شي لين مرضت المره الريال يسبح عياله وياكلهم .. مب دهر عاد وقت الازمات بس ..

كلن له كيانه ومعزتة ..
الأصيلة
07-03-2011, 05:26 PM
طيب. الحين خلنا انقول ان هناك رجل بيئته او مجتمعه يعتمد على المرأة اعتماد كلي في القيام ب كل الامور العملية اللي اتخص البيت...
ومنها حلب الابل...

اتوقعون هل بيدفع العربة عن زوجته ولا بيخليها تدفع العربة بيد وشالة ولدها ب اليد الثانية?

فكروا فيها عدل...بدون تسرع...
بالعكس أنا أشوف ها النوع من الرجال أكثر قربا من زوجته ومساعدة لها...
شـعـشـبـونـه
07-03-2011, 05:37 PM
معقوله هالسؤال صار قضيه وساالفه وحاله!!
ميمي 88
07-03-2011, 05:38 PM
السالفه بسيطه .. البووي يدز الجاري ويحط الاغراض وانا ولا زوجي نشيل الولد ,,
ضوى
07-03-2011, 05:44 PM
شخصيا وبعيدا عن خياراتك اخوي الكريم

اتشرى الاغراض واحط بالعربة اللي ابيه لي وللعيال وللبيت نوصل للكاشير اخذ مفتاح السيارة اخذ اليهال اذا كانوا معانا اقعد بالسيارة هو يحاسب ويجيب الاغراض معاه بس ،
%حورية قطر%
07-03-2011, 05:52 PM
البوي يدز الجاري وانا اشيل ولدي وريلي يشغل السيارة ...
بس بداخل الجمعيه هو يدز القاري واحيانا ولدي بالجاري او انا شايلته
doha2012
07-03-2011, 06:51 PM
يعطيك العافيه

استغرب من بعض الامور التي من المفترض ان تؤخذ طبيعيه

والتفكير اللي على جنب

من خلق اولا الدجاجه ام البيضه
ذيب ولد ذيب
07-03-2011, 07:06 PM
نادراً ما اخلي الهندي يدز لي الجاري ,,

والولد دوم احطه بالجاري معاي وادزه ,, حتى داخل الميره , عشان لايتعبث بالاغراض ويحذفها فالارض ,,
اسعاف
07-03-2011, 07:17 PM
آحط ولدي وام اعيالي

على راسي

وآمشي امام الناس بكل فخر


للأسف في بعض الرجال المتخلفين عقليا : يرى ان دز الجاري بحضرة زوجته وهي تتسوق في

الجمعية يعتبر ذلك من خوارم المروءة ونقص في الشهامة

وقد جاء عن رسول الله صلى الله عليه وسلم انه كان يضع ركبته منتصبة على الأرض حتى

تطأها زوجته لتركب على ظهر البعير

الرجولة والشهامة هي في رحوة المرأة والشفقة عليها

مب في من يدز الجاري
قناص 787
07-03-2011, 07:50 PM
آحط ولدي وام اعيالي

على راسي

وآمشي امام الناس بكل فخر


للأسف في بعض الرجال المتخلفين عقليا : يرى ان دز الجاري بحضرة زوجته وهي تتسوق في

الجمعية يعتبر ذلك من خوارم المروءة ونقص في الشهامة

وقد جاء عن رسول الله صلى الله عليه وسلم انه كان يضع ركبته منتصبة على الأرض حتى

تطأها زوجته لتركب على ظهر البعير

الرجولة والشهامة هي في رحوة المرأة والشفقة عليها

مب في من يدز الجاري




بيض الله وجهك وهذا ردي
حليتان*
07-03-2011, 09:41 PM
طبعاً بتكلم عن هلي بما اني مهب معرس

عقب الحساب ..الهندي يودي القاري <<اذا فجمعية الخور

اما اذا فكارفور انا اودي القاري :(


..انزين عليان يا فتى الشماليه ما الذي يدور في دواعيس مخك يا فتى ؟
الأصيلة
07-03-2011, 10:22 PM
آحط ولدي وام اعيالي

على راسي

وآمشي امام الناس بكل فخر


للأسف في بعض الرجال المتخلفين عقليا : يرى ان دز الجاري بحضرة زوجته وهي تتسوق في

الجمعية يعتبر ذلك من خوارم المروءة ونقص في الشهامة

وقد جاء عن رسول الله صلى الله عليه وسلم انه كان يضع ركبته منتصبة على الأرض حتى

تطأها زوجته لتركب على ظهر البعير

الرجولة والشهامة هي في رحوة المرأة والشفقة عليها

مب في من يدز الجاري




ونعم الزوج الصالح
بارك الله فيك أخوي إسعاف
كثير من الرجال أراهم يتولون دز الترولي في الجمعية
ما أعتقد تأثر على مرؤة الرجل ورجولته...
الله يكثر من امثالكم أيها الرجال يامن تعرفون قدر المرأة
وحقوقها ...
Super Cool
07-03-2011, 10:26 PM
اللي صاير حالياً هو ان مرات انا ادر الجاري و مرات المرة....طبعاً اذا الوزن كبير لازم انا لان المرة ما تقدر يعطيها العافية

بس فعلياً مافي فرق عندنا

و اذا فالسوق و عندنا اكياس انا اشيل اكياس و هي اكياس و الأمور ماشية,,,,مافي فرق بيني و بين زوجتي لانها فعلاً شريكة حياتي في كل شي....و امورنا طيبة
أرج ــوآنه
07-03-2011, 11:58 PM
طيب. الحين خلنا انقول ان هناك رجل بيئته او مجتمعه يعتمد على المرأة اعتماد كلي في القيام ب كل الامور العملية اللي اتخص البيت...
ومنها حلب الابل...

اتوقعون هل بيدفع العربة عن زوجته ولا بيخليها تدفع العربة بيد وشالة ولدها ب اليد الثانية?

فكروا فيها عدل...بدون تسرع...





،


آيعقل في هذا العصر يـــــــوجد آمرأه تحلب الآبل:omg:>>قول معزه آهون:)

آذا على قولتك تحلب آبل معناته هي عآيشه بالبـــــــــــر،،
آش بجيبها للجمعيه،،


من بآب الذوق العآم،،
الزوج هو من يدف القاري ويحمـــــل الطفل ويــــدفع الحسآب،،
نظرة شجاع
08-03-2011, 05:59 AM
طيب. الحين خلنا انقول ان هناك رجل بيئته او مجتمعه يعتمد على المرأة اعتماد كلي في القيام ب كل الامور العملية اللي اتخص البيت...
ومنها حلب الابل...

اتوقعون هل بيدفع العربة عن زوجته ولا بيخليها تدفع العربة بيد وشالة ولدها ب اليد الثانية?

فكروا فيها عدل...بدون تسرع...

اكيد الرجل الى بيدفع العربه وبشل الطفل (ويلطم وجه كل خبيث ) من يدسون حقدهم وسط الكلام
captin
08-03-2011, 06:03 AM
الحين الزوجة صارت تروح مع الدريول
وهو يدز القاري .....


:nice:
99%
الـقـاسـي
08-03-2011, 06:19 AM
طيب. الحين خلنا انقول ان هناك رجل بيئته او مجتمعه يعتمد على المرأة اعتماد كلي في القيام ب كل الامور العملية اللي اتخص البيت...
ومنها حلب الابل...

اتوقعون هل بيدفع العربة عن زوجته ولا بيخليها تدفع العربة بيد وشالة ولدها ب اليد الثانية?

فكروا فيها عدل...بدون تسرع...

اذا بتحلب الابل تراها مسنعه وعندها رجاجيل يسنعونها ويظفونها ويحشمونها ويجيبون لها اللي هي تبي ولعلمك النوعيه اللي انت تقصدهم من الرجاجيل " البدو" عازين حريمهم وصاينيهم ويجيهم كل شي لين البيت مايخلونهم يسوقون ويتعبون ويحاسبون ويشيلون ويحطون ويدورون من سوق لين سوق لان متزوجها رجال مب ؟؟؟؟
BIG-VEGA
08-03-2011, 06:32 AM
اتمنى في النهايه عقب كل هاي المشاركات الي ناقشت بحثك العلمي بعنوان (الجمعيه والعربه) تطلع بستنتاجاتك ونظرياتك وفلسفتك وتحليلاتك من مطلق فكري وعلمي مدروس يخرجنا من عالم الظلام الى عالم النور

ولا ترى block and delete :telephone:
طارق
08-03-2011, 06:41 AM
http://www7.0zz0.com/2011/03/08/03/606417620.jpg (http://www.0zz0.com)
شوهااااااااااااظ
بدكم تتتكاتلو هالسع
صلو عالنبي


طارق / عاشق الزعتر يازلمه
دستور
08-03-2011, 06:48 AM
طبعا انا استهزآت السؤال...وقلت وش هالسخافه...وش هالسؤال اللي ماله داعي...

مثل ما ذكرت يالماستر سؤال سخيف وماله داعي ولا حد يحط
له إعتبار إلا حد تفكيره مثل تفكيرك
ام السعف
08-03-2011, 07:04 AM
:nice:
99%

الحمدلله صج مرات كثييييييييييييرة اروح مع الدريول المجمع ،، بس ولدي الصغير او بنتي
او الخدامة يدزون الجاري عني :shy: يعني عدني من 1% اللي الدريول ما يدخل معاهم المجمع :shy:
بو راشد 1
08-03-2011, 07:06 AM
اخر مره رحنا الجمعيه طلعنا بقاريين، و الحساب 2000 ريال :omg:
الدمعه
08-03-2011, 07:13 AM
اخر مره رحنا الجمعيه طلعنا بقاريين، و الحساب 2000 ريال :omg:

لاتذكروني :cry2::cry2: ومايكمل الشهر ..
The Master
08-03-2011, 08:34 AM
مرحب مراحب...
معليش كان المفروض اني اكتب المشاركه البارحه لكن ما اسمحت الظروف...

على العموم...كل الشكر للجميع...من اول مشاركه لاخرها...اللي مدح او ذم السؤال وراعيه...تبقى وجهات نظر...ويعتمد على فهم السؤال...والنظرة للامور...

ماعلينا...

انسأل السؤال...وكانت الاجابات نفس اجاباتكم...


لو اتلاحظون...من خلال الاجابات...ان الاغلبية من الرجال...كانت اجاباتهم في التعاطف مع المرأه...واحترامها...وتقديرها...والاخذ في الحسبان بنيتها الجسمانية...وفي الاعتبار راحتها...يعني مجملا مكانها عالعين والراس..."يا ادهينة لا تنكتين...:shy: " وهذا هو الصح في ابلادنا المسلمه اللي وضحت مكانة المرأة...وقدرها في المجتمع...من خلال دينا الاسلامي...

وكلامي اوجهه لمعشر النساء...اللاتي يدعين ان الرجل ظالمهم...وماكل حقهم...ومب معطيهم اي اعتبار...
شوفوا الردود...وشوفوا قدر الحرص عليكم...واحترامهم لكم...
مع ان موضوع العربة والجمعيه ولا شي...يعني ما ينحط في عين الاعتبار...لكن اقروا الردود...وشوفوا الرجل كيف تصرفاته وتفكيره اتجاهكم...مب مسألة ان الرجل يشوف المرأة ضعيفة...لكن يقدرها ويقدر بنيتها الجسمانية...ولبسها للعباية...والبحث عن راحتها...مايبغي تعبها...لانها غالية...
لان الموضوع سهالات...اي واحد يقدر يدفع...


السؤال...هل هذا كله...التقدير...الاحترام...المعزه...والحب...من الرجل للمرأة...مايستاهل التقدير منكم...و الامتنان منكم...والاحترام منكم...مايستاهل الرجل الحب منكم :shy: ...احم

واوجه هالكلام للي يحارب الرجل من النساء..."النسوان الصبخة...اللي مايبين في عينهم شي..."(الصبخة تعني الارض اللي تشرب الماء دائما...وماتشبع ومايبين فيها الماء على كثرته...احم)



لكن ما لفت انتباهي...جواب واحد من الربع...وهو من اقرباي...يعني صلة قرابة تربطنا...وقوية...وقريبة...

قال...هي اللي تدفع العربة واتشيل البزر...هذا شغلها...ومب انا اللي ادفع العربة..."يعني انا رجال...وهي اللي لازم تشتغل..."

استغربنا...
لكن راعي السؤال قال...هذا الجواب اللي ابغيكم تسمعونه...واتقولون تطورنا...

في فئة في المجتمع...لحد الحين لما اتجيب طاري المرأة...اتقول لك " وانت ابكرامه"

وهي فئة قليلة...جدا...جدا...
وهذا في نظري ناتج عن البيئة اللي هم فيها...وعقلياتهم ونظرتهم اتجاه المرأة...اللي لحد الحين مايخلون المرأة تدرس...او اتعلم...لاسباب كثيرة...

يمكن اتقولون هذي جاهلية...اتفق معاكم...لكن حنا مسلمين وهم كذلك...يحتاجون توعية...ونضج فكري...واخراجهم من الظلام الى النور...اللي هم عايشين فيه...:)

وهالاشخاص...هم اللي شوهوا سمعة الرجل...او خلنا انقول هم اللي اعطوا فرصه للنسوان ياخذونهم كا مثال او دليل...في سوء معاملة الرجل للمرأة...وبذلك...عذرهم نبغي حريتنا...نبغي احترامنا...نبغي تقديرنا...

لكن المرأة العاجل...والثقيلة...والفاهمه...ماراح اتقارن نسبة قليلة من اللي اعقولهم متحجره اتجاه المرأة...ب فئة كبيرة جدا تحترم واتقدر وتتبع تعاليم الاسلام...في تعاملها مع المرأة...:nice:


اتمنى اوضحت الرسالة...وان شاء الله طلعتوا ب فايدة من هالسؤال اللي البعض قال عنه انه سخيف...:secret:
في نظري هالسؤال ورغم بساطته بين لي مدى حبنا للمرأة...وتقديرنا لها...ولكيانها...عكس الغرب اللي ظلمها واستخدمها في شهواته...وتغافلها...بحجه انه بيعطيها الحريه وهو مستغلها في رغباته...

وايضا معرفتي لبعض العقول...اللي توقعت انها انتهت...لكن اظهرت للسطح...وتحتاج تغيير...مفاهيم ونظرات...لان هذا خطأ...ودينا هو اساسا...ومحمد صلى الله عليه وسلم هو قدوتنا...:nice:


يمكن البعض يكذبني...وهذا محتمل...اقول له الباب يسع جمل...
لكن اللي بيناقش يا مرحبا به...مع ان الموضوع اشوف انه منتهي...ووضعت النقاط على الحروف...
لكن لايمنع اتقولون رايكم...:)
فالموضوع موضوعكم...:victory:


ويامرحبا بكم...:nice:
ام السعف
08-03-2011, 08:37 AM
الحب مااايي الا من دز الجاري ؟

معقولة هذا مقياس لحب الرجل لزوجته وعطفه عليها ؟
The Master
08-03-2011, 08:43 AM
الحب مااايي الا من دز الجاري ؟

معقولة هذا مقياس لحب الرجل لزوجته وعطفه عليها ؟

لما الرسول عليه الصلاة والسلام يحط فخذة عشان زوجته تركب البعير...

اعتبروها شهامة...وتقدير واحترام...

ولا مب عاجبتك هذي بعد؟؟؟
ومش معيار بالنسبة لك ؟؟؟


ولنفرض انه قال لها انتي ادفعي العربة؟؟؟
وش بيكون ردك؟؟؟
وش بيكون معيارك في هذا الرجل وحكمك عليه؟؟


وفي النهاية بما انك مع الدريول...
فا صعبة تفهمين هالامور واتقدرينها...
لان فاقد الشي...لايعطيه..."اوصلت :secret:...احم"
bohilal191
08-03-2011, 08:51 AM
عن نفسي اذا اغراض شوي انا ادز الجاري وولدي كبير مايحناج اشيله ويمكن اخليه يدز العربة بعد،،،،ويعطيك العافية على الموضوع
مناحي السادس عشر
08-03-2011, 08:54 AM
احييك يالماستر
على موضوعك بصراحه
كشفت لنا اشكال اللي ينطبق عليهم التالي
يقولون ما لا يفعلون
او يفعلون ما لا يقولون
مدري اي وحده صح
بس موضوعك بنقووووووو
عجبني جدا
ام السعف
08-03-2011, 08:56 AM
لما الرسول عليه الصلاة والسلام يحط فخذة عشان زوجته تركب البعير...

اعتبروها شهامة...وتقدير واحترام...

ولا مب عاجبتك هذي بعد؟؟؟
ومش معيار بالنسبة لك ؟؟؟


ولنفرض انه قال لها انتي ادفعي العربة؟؟؟
وش بيكون ردك؟؟؟
وش بيكون معيارك في هذا الرجل وحكمك عليه؟؟


وفي النهاية بما انك مع الدريول...
فا صعبة تفهمين هالامور واتقدرينها...
لان فاقد الشي...لايعطيه..."اوصلت :secret:...احم"

عليه افضل الصلاة والتسليم ،، الرسول كان كامل في كل شي مب بس في حطة فخذه
فما في مجال للمقارنة اهنيه ،، كان حليم حكيم حنون عطوف في كل حالاته ،،

اما زوجي يقول لي دزي الجاري ،، ماقط سواها بفضل من الله ونعمته علي ،،

الله يصلح لك بالك ،،
يعني تبيني اكتب لك قصة حياتي علشان اقول لك متى راح زوجي معاي ومتى ما راح وشنهي ظروفه ؟

بس علشان اطمن قلبك .... ردي الأول واضح وباين لما يكون بو العيال
مرافقي في المجمعات التسوقية ،،

بشكل عام : اللي حبيت اقوله لا يعني ان الرجل يدز جاري زوجته يعني هذا دليل
حبه لها او تقديره لها او عطفه عليها ،، المراة لما تكتب عن قسوة الرجل
فهي اقدر بحالة زوجها معاها ولايعني ان لو دز لها الجاري فهي تنكر عطفه وحبه واهتمامه

هذا اللي حبيت ابينه ،،

اما قولك بما انك مع الدريول : مب عارفة شاقول لك ،،
شكلك قريت ادريول وحسيت انك صرت ذكي :omen2: ،،
be cool
08-03-2011, 09:00 AM
النونو داخل الجاري والاب يدزه
الصدى الخالد
08-03-2011, 09:00 AM
انا ادفع العربة والسبب ان ام العيال تذكر الطلبات بمسج في الجوال وان اشتريهم وهي تقعد تجابل البيت

ولو كانت معاي بعد أنا ادز العربة :strong
The Master
08-03-2011, 09:05 AM
عليه افضل الصلاة والتسليم ،، الرسول كان كامل في كل شي مب بس في حطة فخذه
فما في مجال للمقارنة اهنيه ،، كان حليم حكيم حنون عطوف في كل حالاته ،،

اما زوجي يقول لي دزي الجاري ،، ماقط سواها بفضل من الله ونعمته علي ،،

الله يصلح لك بالك ،،
يعني تبيني اكتب لك قصة حياتي علشان اقول لك متى راح زوجي معاي ومتى ما راح وشنهي ظروفه ؟

بس علشان اطمن قلبك .... ردي الأول واضح وباين لما يكون بو العيال
مرافقي في المجمعات التسوقية ،،

بشكل عام : اللي حبيت اقوله لا يعني ان الرجل يدز جاري زوجته يعني هذا دليل
حبه لها او تقديره لها او عطفه عليها ،، المراة لما تكتب عن قسوة الرجل
فهي اقدر بحالة زوجها معاها ولايعني ان لو دز لها الجاري فهي تنكر عطفه وحبه واهتمامه

هذا اللي حبيت ابينه ،،

اما قولك بما انك مع الدريول : مب عارفة شاقول لك ،،
شكلك قريت ادريول وحسيت انك صرت ذكي :omen2: ،،

انتي اتقولين انه مش معيار احترام الرجل للمرأة دفعه عنها العربه...

طيب قولي لي
اذا زوجك قال لك انتي اللي ادفعي العربه...وامسكي البزر...

وش بيكون حكمك عليه؟؟؟
او تفكيرك اتجاهه...

"بتجاوبين حياك الله...اما ماقد قال لي...او جواب لف دروان...ما احتاجه هنا..."
وهذا كله...مجرد جدال لاستغرابك...يمكن مافهمتي كلامي عدل...
The Master
08-03-2011, 09:09 AM
احييك يالماستر
على موضوعك بصراحه
كشفت لنا اشكال اللي ينطبق عليهم التالي
يقولون ما لا يفعلون
او يفعلون ما لا يقولون
مدري اي وحده صح
بس موضوعك بنقووووووو
عجبني جدا

الله يبقيييييك...يا امناحي...

اهم شي اثبت لك على راي...احم :)

هي يقولون مالا يفعلون...

الحمدلله انه اعجبك...كلك نظر خيو...وهنا العقول الفاهمه...مب بعض العرب...ياااااااافع البلا...لازم خالف تعرف"اضف هالمثال...توه جديد...احم"

ويامرحبا الساع...:nice:
ام السعف
08-03-2011, 09:10 AM
انتي اتقولين انه مش معيار احترام الرجل للمرأة دفعه عنها العربه...

طيب قولي لي
اذا زوجك قال لك انتي اللي ادفعي العربه...وامسكي البزر...

وش بيكون حكمك عليه؟؟؟
او تفكيرك اتجاهه...

"بتجاوبين حياك الله...اما ماقد قال لي...او جواب لف دروان...ما احتاجه هنا..."
وهذا كله...مجرد جدال لاستغرابك...يمكن مافهمتي كلامي عدل...

لو قال لي دزي الجاري بدزه مافيها شي لو دزيت الجاري ،،مرت ايام كن يشل واحد من العيال وكنت ادز الجاري ،،ومب ادز الجاري وبس الا ادزه ومرات كثيرة احط الاغراض على السير ،، ومرات كثيرة ادفع لأن فلوس البيت اساسا عندي ،،

الأمور هذي عندي ماتحكم معزة بو العيال لي ،، الأمور هذي شكلية اكثر مما تكون عاطفية ،،
ممكن بالفعل ناس يعتبرونها نوع من انواع الحب ما بين الزوجين جدام الناس لكن في البيت
معاملته ابدا مافيها حب وتقدير لها ،، فهل دزه للجاري يشفع له ؟
هذا اللي حبيت ابينه وغير جذيه ما عندي توضيح ثاني ،،
.
LED
08-03-2011, 09:16 AM
سوال طيب والجواب ان شاء الله بيكون وافي قدر المستطاع :)

اكيد انا اللي بدز الجاري وبكل صدر رحب وفرحه وتستاهل كل خير

وما اشوف اي عيب او احرجا ان ادز الجاري هي اتشيل شنطتها او ولدها

وان ادز الجاري اكيد وتستاهل كل خير ام العيال ...... . . . تقبل مروري واتمنى افدتك بالاجابه
The Master
08-03-2011, 09:21 AM
لو قال لي دزي الجاري بدزه مافيها شي لو دزيت الجاري ،،مرت ايام كن يشل واحد من العيال وكنت ادز الجاري ،،ومب ادز الجاري وبس الا ادزه ومرات كثيرة احط الاغراض على السير ،، ومرات كثيرة ادفع لأن فلوس البيت اساسا عندي ،،

الأمور هذي عندي ماتحكم معزة بو العيال لي ،، الأمور هذي شكلية اكثر مما تكون عاطفية ،،
ممكن بالفعل ناس يعتبرونها نوع من انواع الحب ما بين الزوجين جدام الناس لكن في البيت
معاملته ابدا مافيها حب وتقدير لها ،، فهل دزه للجاري يشفع له ؟
هذا اللي حبيت ابينه وغير جذيه ما عندي توضيح ثاني ،،
.

الطيور على اشكالها تقع...

اتمنى مايكون هناك توضيح ثاني...

"بخصوص النقطه...مالقيتي اكبر منها مثلا...احم :secret: "
ام السعف
08-03-2011, 09:25 AM
الطيور على اشكالها تقع...

اتمنى مايكون هناك توضيح ثاني...

"بخصوص النقطه...مالقيتي اكبر منها مثلا...احم :secret: "

طيور متفاهمة ولله الحمد،،

ودي بأكبر بس ما لقيت :shy:
الـراسي
08-03-2011, 09:59 AM
اصلا عيب المره تدز الجاري والرجال معها

والله اللي يخلي مرته تدز القاري والله انه..........

وانتو تعرفون الباقي

ياخي شف شكل الرجال والمره تدز القاري والله ماله داعي
The Master
08-03-2011, 11:43 AM
هلا وغلا بالماستر ومواضيعه

شوف سلمك الله بالنسبه لي اذا في امكانيه اشيل الولد وادز الجاري

شلته ودزيت الجاري لان زوجتي المفروض ما في شيء يشغلها عن الانتباه على نفسها من الطريق ولبسها وتسترها وكل اللي عليها انها تمشي حذاي

واذا ما في امكانيه اشيل الولد خليتها تشيله وانا بادز الجاري طبعا

واذا وصلنا البيت قلت لها الحين دورج رتبي اغراضج وشيلي ولدج

وسويلي كرك يعدل الطاسه:shy:

الا وين شسمه:omen2:

احم...
تفهي من قلب...والدوام داهمنا..."ركز على داهمنا...احم":secret:

لكن ابشر ان شاء الله في القريب العاجل..."الله يعين على العاجل...احم":shy:
المهاجر
08-03-2011, 11:47 AM
احم...
تفهي من قلب...والدوام داهمنا..."ركز على داهمنا...احم":secret:

لكن ابشر ان شاء الله في القريب العاجل..."الله يعين على العاجل...احم":shy:

ههههه

الله يكون بعونك يالماستر:victory:

وبشرك الله بالفردوس:)
بوخالد911
08-03-2011, 11:49 AM
حزاات بنتي الصغيرة - الله يحفظها - تدز الجاري
:)
أم البنات
08-03-2011, 11:54 AM
ولدي فديته هو الي يدز القاري ويحفص فيه ما يخلي حد يدزه غيره
مخطط قطري
08-03-2011, 01:16 PM
لاانت ولا هي منقودطرش الصبي ولاتهون بالاغراض الي تبيها ويدزها ويجبها عندك البيت
اصلن البرستيج يخترب وانت دز قاري قدام خلق الله
ضوى
08-03-2011, 04:27 PM
:nice:
99%

سويتها مرة واحدة وبسببها كنت باحمل لقب مطلقة :secret:
لافوشيا
08-03-2011, 04:41 PM
هو ولا هي كله واحد ( الله والبرستيج الي بيضيع ويا العيايز الحين )

مهوب عيب يبا
ذيب ولد ذيب
08-03-2011, 06:38 PM
الحب مااايي الا من دز الجاري ؟

معقولة هذا مقياس لحب الرجل لزوجته وعطفه عليها ؟


اختي مش مقياس !!

هذا الشي يعطي انطباع على شخصية الرجل , اذا الرجال معتمد على زوجته في كل شي , تلاقينها متبهدله مع ولدها تمسكه والجاري تدزه وتاخذ اغراضها والرجال قاعد جنبها يتعبث بـ البي بي ولاهامه البهدله الي عايشتها زوجته !

حتى لو الشخص مايحب زوجته بس المفروض يحترمها ويعزها ويساعدها على قدر استطاعته !

وهذا مش دليل حب , دليل حسن عشره وتعامل ,,
sara jsm
08-03-2011, 09:46 PM
في الجمعيه انا :nice:
برع الجمعيه لين السيارة ,, ابوي او اخوي :nice:
ام السعف
09-03-2011, 02:11 PM
اختي مش مقياس !!

هذا الشي يعطي انطباع على شخصية الرجل , اذا الرجال معتمد على زوجته في كل شي , تلاقينها متبهدله مع ولدها تمسكه والجاري تدزه وتاخذ اغراضها والرجال قاعد جنبها يتعبث بـ البي بي ولاهامه البهدله الي عايشتها زوجته !

حتى لو الشخص مايحب زوجته بس المفروض يحترمها ويعزها ويساعدها على قدر استطاعته !

وهذا مش دليل حب , دليل حسن عشره وتعامل ,,


اخوي الكريم ،، كلامك في مجمله مب مختلفة عليه ،، واشد عليه وبل اشجع الرجل انه يشل عن زوجته دز الجاري ،، بس لما كتبت مش مقياس،، لما نربط ما بين دز الجاري ومشاعر الرجل بشكل عام ،، يعني مب كل رجل يدز الجاري عن زوجته يعني مريحها في البيت ،،
الأساس حسن المعاملة في كل مكان ،، ولا يعني ابدا لو الحرمة اشتكت من عدم شعورها بحب زوجها نقول لها ،، والله هو يدز الجاري عنج في الجمعية :rolleyes2: