:::...بغيت اسألك عن افلان...وش بتقول عنه؟؟؟...:::...احم

[The Master]

احم احم...ثم احم...

اقروا اللي صار...


ترن ترن...ترن ترن...
هلا ومرحب...وش حالك يا بوحسن...عساك ابخير...هلا وغلا ب بوعلي...
حد حولك...لا لا ابد...امرني...الا يابوحسن بغيت اسألك عن ولد عمك جاسم علي...تسألني عنه؟؟؟...اوووووه ليكون متقدم حق ناس؟؟؟...اي نعم متقدم حق ناس...واسألوني عن الرجال...وما اعرفه...فا بغيت اسألك عنه...

الله يسلمك الرجال......................................


انتهى الموقف...
وقلت له اللي عندي...

لكن عشان انخلي الموضوع نقاش...ونستفيد منكم يا اعضاء الاسهم...
ودي اسمع رايكم...ومشورتكم...ووجهة نظركم...في هالموضوع...

المطلوب...حطوا نفسكم مكاني...وجاكم اتصال يسألونك عن واحد اتعرفه...او للحريم عن وحده اتعرفينها...ويسألونك عنها...

وش راح يكون ردك...
هل بتكون صادق واتقول اللي اتعرفه...كان فيه خير ولا شر...
ولا بتكذب عشان ما تقطع رزق الرجال ولا المره...
ولا بتكذب...وعذرك ان الواحد اذا تزوج بيتغير...
ولا بتمتنع عن الاجابه ب "ما ادري"..."لا اعلم"...

طبعا ادري ابكم محد بيركز على الردود اللي انا كتبتها...وبتكتبون اللي في بالكم..."نفس موضوع عربة الجمعيه...احم"
لكن حطيت الاجوبه...عشان اتفكرون...لا اكثر...

وبعدين باحط وش عندي...وايش اللي قلته للرجال...
وكذلك عندي سؤال متعلق في هالموضوع...لكن عقب ما اسمع الاجابات...

طبعا هالموضوع او الموقف...صادف ناس كثار...وما اعرفوا وش يتصرفون...او يقولون...

فا لعل هالموضوع يفيدهم...ويفيدنا...ونسمع وجهات النظر...
ولنا تعقيب بعدين...

[sara jsm]

وش راح يكون ردك...
هل بتكون صادق واتقول اللي اتعرفه...كان فيه خير ولا شر...
ولا بتكذب عشان ما تقطع رزق الرجال ولا المره...
ولا بتكذب...وعذرك ان الواحد اذا تزوج بيتغير...
ولا بتمتنع عن الاجابه ب "ما ادري"..."لا اعلم"...

طبعا ادري ابكم محد بيركز على الردود اللي انا كتبتها...وبتكتبون اللي في بالكم..."نفس موضوع عربة الجمعيه...احم"
لكن حطيت الاجوبه...عشان اتفكرون...لا اكثر...

^ ^ صباحك خير ,,
زين عطيتنا مجال نقول اجوبتنا هالمرة ,,
عني ( راح اقول الشي الزين في الشخص ,, واخفي الشي المب زين )
ماراح اكذب بس راح اخش ,, لان يمكن الواحد يتغير ,, طبعا اذا كان هالشي في السلوك ,,
وفي النهاية كل شي نصيب ,, يمكن اللي انا مااحب اقوله غيري يقوله ,,
بس اهم شي مااكون سبب في اني اخرب اي ارتباط ,,
ويعطيك العافية اخوي عالموضوع ,,

[Chambray]

عن نفسي باقول الزين والي مب زين
هذا زواج مب لعبه

[nadeemy]

موضوع فعلا مهم وحلو حق النقاش
وايد انسالت عن شباب , اما بحكم المعرفه العائليه او بسبب اطلاعي على اوضاعهم بحكم العمل لكن ولله الحمد اغلب من سالت عنهم كانوا شباب خيرين ولا ازكي على الله احد , لذلك تكون المهمه سهله , لكن ما فيه شخص يخلو من العيوب , العيوب الخفيفه والتي يمكن اصلاحها احاول اذكرها بطريقه لا تسيء للشخص مثلا ان يكون مبذر على اشياء تافهه موبايلات , سيارات , او انه يكون كثر سفرات ورحلات او سهرات , او مجمعات
لكن احيانا تكون العيوب قاتله وخطيره وصعبة الاصلاح وهنا اعتقد انه يجب ان لا تخفى الحقيقه
( ومن يكتمها فانه اثم قلبه ) وفي كل الاحوال دائما اختم كلامي بان على السائل ان يسال غيري
وعندي امثله كثيره نطرق لها بعد ما نشوف ردود الاخوان
واسف على الاطاله الموضوع عجبني

[المفترسه]

الصراحه اسحب نفسي من السالفه
وشلي بعوار الراس عقب يقولون فلانه اللي قالت

[STAR]

راح اقوول الصج سواء زين ولا شين..

لكن للاسف اغلب الشباب يغطون على بعض
علشان كل واحد مايفضح الثاني خخخخ

بس عن نفسي والله اقووول الصج حتى لو فيها قطع ارزااق..

هاااذي زواااااج مب لعبة وبنت النااااس مب لعبة ...

[الـقـاسـي]

شوف اخوي في اشياء مراح تضر لو ما انقالت يعني تكون اشياء ممكن لو عرفوها بتشوه صورته وعدم ذكرها خير من ذكرها ..
لكن مدام الرجال سئلك وأمنك واستشارك الواجب انك تقول الحقيقه لأن المستشار مؤتمن انا عن نفسي طحت في هالموقف اكثر من مره وفي مره كان اللي انسئلت عنه انسان صدق ماينفع فنصحت الرجال بكل صراحة وقلت له غض النظر لكن مابينت له ليش مابي افضح الرجال مهما كان ..

[موضي قطر]

الصراحة مطلوبه خاصة انه موضوع ممكن يتطور ويتم الزواج فالموضوع أمانه

اكثر منه اخذ رأي وانا اذا علي بقول كل

اللي اعرفه والقرار بعدها لهم

[chillis]

عن نفسي بقول الزين والي مهب زين انا كان جامد راح اقوله لانه زواج وعشرة عمر للابد حرام البنت تنظلم ابها

[قدها وقدود]

اللي اعرفه بقوله ...


وبقوله روح اسأل فلان وفلان لان هم ربعه الروح بالروح ودووم معاه ولاتعتمد عليي انا بس

[The Master]

كل الشكر عالتفاعل...

طيب السؤال... على اي اساس انت حكمت على الشخص؟؟؟
يعني وش هي مصادرك؟؟؟

وهل تضمن ان كلامك صحيح ميه ب الميه في الشخص اللي تكلمت عنه؟؟؟

[المهاجر]

اهلين يالماستر


طبعا هالموضوع جدا مهم بالنسبه للي راح ينسمع منك عن هالشخص

لانه في النهايه راح ينبي على اساسه بيت او ينلغي البنيان

لذلك بالنسبه لي وحصلت معاي كثير

يختلف الأمر على حسب السائل فاذا كان واحد علاقتي معاه علاقه قويه

واعرف ان كلامي اللي باقوله له بيكون بيني وبينه

وما راح يقول المهاجر قالي هالكلام

باقوله الصدق سواء كان هالشخص زين او شين
يعني باقول عيوبه وزينه
ماراح اخش شي ابد

اما اذا كان الشخص السائل علاقتي معاه عاديه او انه السؤال عن طريق وسيط اعرفه
فهنا يختلف الأمر

اذا كان الرجال زين وما فيه شي شين بامدحه له وباقوله عنه اللي اعرفه

اما اذا فيه شي مب زين واشوف انه ما يصلح

بارد عليه ما ادري وافضل انك تسأل عنه غيري

[: بوحمود :]

يامرحبا اخونا الماستر

عن نفسي الصدق ثم الصدق اذا اعرفه مظبووووووووووط

ولاراح ازيد ولا انقص

وبنصحه بان يسال عند غيري ولاياخذ على شهادة شخص واحد

واذا المعرفه سطحيه باعتذر منه

تحياتي لك

[فيزيائية]

<<<امس كنت افكر بنفس الموضوع ...المهم

باقول الصج ولاعلي من حد ...
الدنيا دوّارة بكرة حد يخطب بناتي فمثل ماغشيت او سكت بيسكتون !!
ووايد ناس يقولون مانبي مشاكل ومادري وشو ...او جملة الله بيهداهم
اوكي بتكونون سعيدين اذا تزوجوا وبعد فترة سمعتوا ان فلان طلق فلانة وبينهم يهال ؟؟؟
ترضونها على اهلكم ؟؟

وشكرا لصاحب الموضوع..

[فيزيائية]

كل الشكر عالتفاعل...

طيب السؤال... على اي اساس انت حكمت على الشخص؟؟؟
يعني وش هي مصادرك؟؟؟

وهل تضمن ان كلامك صحيح ميه ب الميه في الشخص اللي تكلمت عنه؟؟؟

انا عن نفسي ماراح اعلق الا على الشخص اللي اعرف اخلاقه ودينه واطباع بيتهم وعاشرته بمواقف مختلفة
اما اني سمعت عنه لا طبعا مايصير احكم على انسان ماشفت منه شي...