لا (( للعلوج )) بعد اليوم ...!!!!

[لاجئ عاطفي]

كثرت في الاونة الاخيرة استبدال العملات المعندية (( باللعوج )) مما يشكل استهزاء بعملتنا الوطنية ومن ناحية اخرى تعد عمليات نصب واحتيال من خلال الاستيلاء على ما تبقى من عملات معدنية بغير وجه حق .. لذلك انشر لكم هذا الاعلان من وزارة الاعمال والتجارة للحد من هذه الظاهره حتى تختفي تماما ودفاعا منا لعملتنا الغاليه (( النص ريال )) ..
تقبلوا تحياتي ... بوخليفه
http://hh7.net/Mar5/hh7.net_13008593801.jpg

[الصريحه]

عساهم علي القوه ويروحون هالمره صوب التجار

[شبح الصمت]

احسن والله

نبي امبادل ما يخذونها اهم انقطها في صندوق جمع التبرعات

اي والله يعطونا علوووج

ارحم الله والديك يالذيب

[بنت الاول]

خلكم من العلوج وشوفة الاسعار الي كل يوم تتغير بدون حسيب ولا رقيب ....... " يعني جاءت على العلوج بس؟؟؟؟؟؟؟؟"

[الفهد1]

واذا كانت الفاتورة تسعين ريال وثمانين درهم فسرلي ذالك من وين جات ثمانين درهم

[ميموري]

يعطيهم العافيه

ماخلصنا من حماية المستهلك والبيبسي جينا ع النص والربع

ماقصرتوا والله

بس نبي مراقبة شي اكبر

النص والربع دفعة بلاء

[chillis]

كفو والله لان الحين كل شي صاير ونص
ريال ونص ريالين ونص حتى بعض ماي الصحه صاير ريالين ونص

[ابو عادل]

صعبة وانت واقف عند الكاشير ويقولون لك ماعندنا نص ريال شبتسوي ؟؟ بتتصل على حماية المستهلك وعلى مايردون عليك (هاي اذا ردو) وبتعطل العالم كله عشان نص ريال ؟؟!!
الموضوع صعب

[راشد محمد]

يعطيهم العافيه

[VX.R]

العلوووووج

ذكرتنا بالصحاف


http://images.farfesh.com/articles_images/2010/07/30/sahhaf/sahhaf3.jpg

[ام السعف]

واذا كانت الفاتورة تسعين ريال وثمانين درهم فسرلي ذالك من وين جات ثمانين درهم

صدقت يبي لهم قرار ثاني ،، مافي شي اسمه ثمانين درهم يا نص او ريال
في الأخير بيكون ريال :weeping:

[قهوجي]

صعبة وانت واقف عند الكاشير ويقولون لك ماعندنا نص ريال شبتسوي ؟؟ بتتصل على حماية المستهلك وعلى مايردون عليك (هاي اذا ردو) وبتعطل العالم كله عشان نص ريال ؟؟!!
الموضوع صعب

هذا حقك ولو بتجمعهم لسنه بطلعلك الف ريال نص ريال من هني وهناك وخرده مني مناك علي شويه طقاطيق مالها داعي
يطلعلك مايقارب في الشهر 3000 ريال يمكن تستفيد متهم اسال مجرب

شوف اليوم نص ريال بكرا الريال ينقرض شوي شوي 5 ريال
نسير شوي شوي مثل لبنان 1000 ليره تجيبلك بيبسي

[آهـل شَـرق]

قبل الاعلان ورزة الويه اتمنى من حماية التجار اقصد المستهلك ان تطلب من المركزي صرف قطع نقدية وتجبر جميع المحلات على الالتزام بالقرار .. والله عجيبه محلاتنا !!

في بريطانيا والله حتى الـ 1 pence يردونه لك وفي البحرين يردون لك حتى الفلس الواحد .. بس عندنا بطوق غدير بالنعناع وتوكل على الله مافي قرقر !!

[almaf1a]

انا صارف لي نصوص وحاطها في مخباي
صوت قرقعتهم مزعج نوعا ما لكن افتكيت من علوجهم اليابس

[جنوب الدوحه]

نحن نريد مراقبه الاسعار .. واصدار تعميم واعلان بمثل هذه الجرائه ..

وفي هذه الايام نلاحظ ارتفاع غير مبرر .. للاسعار

[غايه الطواش]

الصراحه انا اذا مالقوا لي نص اطلب ربيان والا عصير بونص

عاد تعال شوف ويه الكاشيير شلون يطالعني

[علي مهنا]

خلاص يبا الثقه معدوووومه بمب يسمى حماية المستهلم من زمان


لا حسيب ولا رقيب الاسعار تتفاوت من مكان لي مكان ولا في مراقبه ولاشي

والله في بعض المنتجات توصل الي العشر ريال الفرق من محل لي محل والجماعه نايمين في العسل

وماقدرو الا على مشكلة العلوج

[الامتياز]

واحب ان اضيف نقطة مهمة ايضا
شعارنا ليس فقط لا للعلوج
بل لا للطراطير ايضا
هههههههه

[toomi9]

اخر مره راعي الدكان عطاني علج
يقول مافي نووس ريال
قلت له مابي جيب فلوسي ولا عطني ريال كامل
دخل وجاب لي نص
عندهم بس يخشونهم مادري ليش

[لاجئ عاطفي]

اخر مره راعي الدكان عطاني علج
يقول مافي نووس ريال
قلت له مابي جيب فلوسي ولا عطني ريال كامل
دخل وجاب لي نص
عندهم بس يخشونهم مادري ليش


انا بقولك ليش..
يعطيك علوج لان العلوج ذي قيمته اقل من نص ريال يمكن ربع ريال او اقل وفي هالحاله هو مستفيد ربع ريال فربع ريال منك ومني ومن فلان وعلان اتصير في الشهر بالالاف وهذا هو سبب عدم منعهم اعطائنا العملات المعدنيه ..

[Rider]

اخذ العلوج عادي من صاحب المحل ود الاغراض السيارة ورجع مره ثانية نفس المحل وشتر منه اي شي سعره ريال ونص وعطه الريال والعلوج وشوف ردت فعله بس روح حق نفسك الكاشير وخله يحفظ وجهك اذا رفض ياخذ العلوج استلمه وطلب المدير

[ضي البدر]

اذا بيغيرووون العلوج بكافي من كادبوري ولا جالاكسي ولا حتى علوج اكسترا راضــــــــــــــــــيين ..:tease:

عندي حصالة من الأعدادي واحب اجمع فيها هالنصوووص واخشخش بالحصالة حلو صوتهم بس الحين مافيها الا كم بيزة .. بس برد أترسها وبوزعهم عليكم نفس الولد الي وزع تحويشة ابوه بالمدرسه ..:nice:


عجبتني هالكلمتين (( حماية التجار )) ...:)

[بنت البدر 77]

موقف صار قدامي ...

احد الاخوات ( ماشاء الله عليها ) عطاها الكاشير الخرده بالاضافة الى العلوج .. قالت له ابي النص ريال مابي علوج .. توتر الكاشير وقام يدور في مكتبة ومالقى وعقب راح سأل المحلات اللي جنبه في نفس الجمعية .. وعفس الدنيا .. وهي تنتظر وانا احترمتها لاني معاها .. وبعدها راح من محل الحلويات وجاب النص ريال .. وعطاها :victory:

خذت النص ريال وقدام الكل راحت للصندوق الخيري اللي بالجمعية وحطت النص فيها وهي طالعة ..

اعجبتني جداً لانها ارسلت مسج من خلال هذا التعامل انها مو مشكلتها بالنص ريال مشكلتها بالمبدأ .. واللي قاعد يقول دافعة بلاء .. خل يكرر موقف السيدة الفاضلة .. مو يتركها للموظفين او في ميزانية الجميعات !!

يستحيل ارضى اني اقبل النص ريال .. ويستحيل اطلع بدون مااخذها .. ولو هم ماعندهم لا يحطون لي قيمة الاشياء بالربع والنص والدراهم !!

علينا الا نكون سلبيين الى هذه الدرجة ..

الله المستعان .

[eXpert*]

هي جات على النص !!

الحين حتى الريال مختفي ،، تروح تطلب من مطعم يطلع حساب 39 ريال تعطيه اربعين يقولك ما عندك خردة ؟؟ أنا ما عندي ريالات يا أفندم !! تضطر تقوله خلاص مب لازم الريال علشان ماتدخل في ترهات مالها داعي ! ؟

من يوم ورايح بتبع نظام اللي ما يقدر يوفر لي الباقي يرد لي فلوسيّ كاملة و أحرك عنه .

[Abdulraman]

اي والله ذكرتني بالصحاف

[خزامئ]

كفو اول الخير قطره
دامهم انتبهو انص الباقي في الطريق انشالله

[Qt.1]

الحين خلو التلاعب في الااسعار المبالغ فيه وراحو للعلوج بونص !!

[بوعمير]

أما وقد صدر القرار فبقي التنفيذ يا حماية المستهلك، هل تعرفون معنى التنفيذ ؟؟

أما أن القصد هو الظهور الإعلامي في الجرائد اليومية لمجرد إبراز النفس !!!

ثم أرجو أن يكون الاهتمام و الالتفات إلى عظام الامور وترك القشور والامور التافه لما بعد حل مشاكل أكثر أهمية من نص ريال وعلوك يا حماية المستهلك !!

و ليكن شعاركم تنفيذ قرارتنا السابقة أولاً وإصدار قرارت تهم الموطن ولتتركوا العلوك والنص ريال في حالة لأن لدينا من المشاكل مع باقي المنتجات وباقي الاسعار ما يغنين عن هذا النص ريال !!!

[loraa]

ههههههههههههه انا عجبني كتير الموضوع وكل الردود واحد واحد قرأتهم

انا بجمع النص ريال بالحصالة ولونها شفاف وزهر كتير حلو منظرهم فيها عندي يمكن اكتر من 100 ريال ( نص وربع ) دايما بطلب النص ريال ليش همه مو ابدا من الفلوس الي بنتعب فيهم
الحصالة حجمها صغير كل ما تتعبا بفضيها وبعطيها للعامل الي عندنا في الدوام مسلم ويستحقها اكتر من الكاشيرات الي في المولات.

[oceanrose]

ويه من زمان انا وهالجمعيات والمحلات الثانيه كله هواش اما الربع او النص ياالاداره ما الاعب انا حقي واخذه خخخخخخخخخخخخخخ

[وحيد-الشوق]

هههههههههه العنوان عجييييب

بس حماية المستهلك مامنهم فايدة شوف الاسعار تزيد في كل مكان وهم بدون حراك

[سهم طايش]

اول من يتعامل بالعلوج هم الميرة

[صوت الضمير]

http://www.dohaup.com/up/2011-03-23/admin563205565.jpg (http://www.dohaup.com/)

وينهم المحلات يبون عندي ..لاني مااقبل بالعلوك .. واحب احتفظ فيهم

الحصالة هاذي من 6 سنوات عندي .. وكل مالقيت نص طايح بالبيت حطيته

وانا اوكد على كلام اللي قبلي حصل مواقف مع الميرة .. اصلا روحوا عند كل كاونتر تلقونهم حطين كراتين في علوك

ياترى كراتين للعلوك من المستفيد منها *_^ .. نقول الكرتون بخمس ريال .. يمكن فيه ثلاثين حبه الحبه بنص

مشروع ناجح

أبداع

[فراشة ناعمة]

هذا حقك ولو بتجمعهم لسنه بطلعلك الف ريال نص ريال من هني وهناك وخرده مني مناك علي شويه طقاطيق مالها داعي
يطلعلك مايقارب في الشهر 3000 ريال يمكن تستفيد متهم اسال مجرب

شوف اليوم نص ريال بكرا الريال ينقرض شوي شوي 5 ريال
نسير شوي شوي مثل لبنان 1000 ليره تجيبلك بيبسي



اتفق معاك..

تقولون ربع ولانص ريال..انا برايي هالربع والنص تاخذونها غصب واذا ماتبونها عندكم اقرب صندوق تبرعات ولا انكم تعطون هالتجار..ليش ياخذون شوي؟!

لو تحسبون كم نص ريال وربع ريال ياخذونه من العالم كم بيطلع حسابهم آخر الشهر؟!!